32002D0596

Id-Deċiżjoni tal-Kunsill

tad-19 ta’ Lulju ta’ l-2002

dwar il-konsegwenzi tat-tmiem tat-Trattat li jistabbilixxi l-Komunità Ewropea tal-Faħam u l-Azzar (KEFA) dwar il-ftehim internazzjonali konklużi mill-KEFA

(2002/596/KE)

IL-KUNSILL TA’ L-UNJONI EWROPEA,

Wara li kkunsidraw it-Trattat li jistabbilixxi l-Komunitajiet Ewropej, u b’mod partikolari l-Artikolu 133 flimkien ma’ l-Artikolu 300(1) f’dan ir-rigward,

Wara li kkunsidrat il-proposta tal-Kummissjoni,

Billi:

(1) Permezz ta’ l-Artikolu 97 f’dan ir-rigward, it-Trattat tal-KEFA jintemm fit-23 ta’ Lulju ta’ l-2002.

(2) Numru ta’ ftehim internazzjonali ma’ pajjiżi terzi ġew konklużi mill-KEFA.

(3) Dawn il-ftehim ma jipprovdux għall-eventwalità tat-tmiem tat-Trattat tal-KEFA.

(4) Fi tmiem it-Trattat tal-KEFA, il-materja koperta mit-Trattat tkun koperta mit-Trattat li jistabbilixxi l-Komunità Ewropea (KE), inkluż l-Artikolu 133 f’dan ir-rigward.

(5) Ir-Rappreżentanti tal-Gvernijiet ta’ l-Istati Membri, li ltaqgħu fi ħdan il-Kunsill, stabbilew li l-KE qed taċċedi għad-drittijiet u l-obbligi li joħorġu mill-ftehim internazzjonali konklużi mill-KEFA [1].

(6) Huwa kunsidrat li huwa fl-interessi tal-KE li dawn il-ftehim internazzjonali jitkomplew wara t-tmiem tat-Trattat tal-KEFA, u li dawn għandhom jiddevolvu fuq il-KE.

(7) Uħud minn dawn il-ftehim jistgħu jinħtieġu emendi tekniċi biex ikunu kompatibbli mar-regoli tal-KE

(8) Ikun neċessarju li pajjiżi terzi konċernati jkunu informati,

IDDEĊIEDA DAN LI ĠEJ:

Artikolu 1

B’seħħ mill-24 ta’ Lulju ta’ l-2002, il-KE tissuċċiedi għad-drittijiet u l-obbligi li joħorġu mill-ftehim internazzjonali konklużi mill-KEFA ma’ terzi pajjiżi.

Artikolu 2

Il-Kummissjoni għandha tinforma lil terzi pajjiżi konċernati dwar suċċessjoni mill-KE għad-drittijiet u obbligi tal-KEFA li joħorġu mill-ftehim konċernati. Barra minn hekk, tagħmel l-emendi tekniċi meħtieġa kollha biex tagħmel il-ftehim kompatibbli mar-regolamenti tal-KE, u fejn ikun meħtieġ, tinnegozja emenda għall-ftehim.

Artikolu 3

Din id-deċiżjoni tidħol fis-seħħ fil-jum wara li tkun pubblikata fil-Ġurnal Uffiċjali tal-Komunitajiet Ewropej.

Din id-deċiżjoni tapplika mill-24 ta’ Lulju ta’ l-2002.

Magħmul fi Brussel, 19 ta’ Lulju ta’ l-2002.

F’isem il-Kunsill

Il-President

T. Pedersen

[1] Ara paġna 35 ta’ dan il-Ġurnal Uffiċjali.

--------------------------------------------------