Regoli tal-UE aktar stretti fuq it-tabakk

 

SOMMARJU TA’:

Id-Direttiva 2014/40/UE dwar l-approssimazzjoni tal-liġijiet, ir-regolamenti u d-dispożizzjonijiet amministrattivi tal-Istati Membri rigward il-manifattura, il-preżentazzjoni u l-bejgħ tat-tabakk

X’INHU L-GĦAN TAD-DIRETTIVA?

Id-Direttiva tistabbilixxi regoli dwar il-manifattura, il-preżentazzjoni u l-bejgħ ta’ sigarretti, tabakk tal-brim, tabakk tal-pipa, sigarri, cigarillos, tabakk li ma jdaħħanx, sigaretti elettroni`i u prodotti erbali għat-tipjip.

Hija għandha l-għan li jipproteġi s-saħħa tal-bniedem, speċjalment dak taż-żgħażagħ, u li jissodisfa l-obbligi tal- Unjoni Ewropea (UE) taħt il-Konvenzjoni Qafas tal-Organizzazzjoni Dinjija tas-Saħħa dwar il-Kontroll tat-Tabakk.

PUNTI EWLENIN

Ingredjenti u livelli massimi ta’ emissjoni

L-Istati Membri tal-UE jeħtieġu li l-manifatturi u l-importaturi jissottomettu listi ta’ ingredjenti u livelli ta’ emissjonijiet. Emissjonijiet minn sigaretti mqiegħda fuq is-suq jew manifatturati fl-UE m’għandhomx jaqbżu:

• 10 mg ta’ qatran;
• 1 mg ta’ nikotina;
• 10 mg ta’ monossidju tal-karbonju.

Twissijiet tas-saħħa

Id-direttiva teħtieġ twissijiet prominenti tas-saħħa fuq il-pakketti tas-sigaretti u tat-tabakk tal-brim:

• twissija ġenerali ta’ “It-tipjip joqtol — ieqaf issa” jew “It-tipjip joqtol”;
• il-messaġġ ta’ informazzjoni: Id-“duħħan tat-tabakk għandu ’il fuq minn 70 sustanza magħrufa li jikkawżaw il-kanċer”;
• test ieħor u immaġnijiet espliċiti miġjuba minn lista u librerija tal-istampi fl-annessi tad-direttiva;
• twissijiet ikkombinati li għandhom ikopru 65 % tan-naħat ta’ quddiem u ta’ wara tal-pakkett.

Projbizzjoni fuq it-togħmiet u l-ippakkjar f’format żgħir

Id-direttiva tipprojbixxi:

• togħmiet, bħall-frott u l-mentol, li jħeġġu l-bidu tat-tipjip billi jtaffu togħmiet aktar qawwija tat-tabakk; u
• pakketti tas-sigaretti attraenti, żgħar, jixbħu l-lipstik, li ta’ spiss ikunu mmirati lejn bniet u nisa żgħażagħ.

Sigaretti elettroniċi

Il-leġiżlazzjoni tistabbilixxi regoli ta’ sigurtà u kwalità għas-sigaretti elettroniċi li jkun fihom in-nikotina, inkluż:

• twissijiet obbligatorji tas-saħħa fuq il-pakketti;
• projbizzjoni fuq elementi promozzjonali fuq il-pakketti.

Miżuri oħrajn

• L-Istati Membri jistgħu, jekk ikunu jixtiequ, jipprojbixxu l-bejgħ fuq l-internet tas-sigaretti u tal-prodotti tat-tabakk.
• Qed tiġi introdotta sistema ta’ traċċar u monitoraġġ madwar l-UE kollha biex tindirizza l-kummerċ illegali tas-sigaretti.

Traċċabbiltà

Id-direttiva tintroduċi regoli għat-traċċabilità tat-tabakk u l-karatteristiċi tas-sigurtà applikati għall-prodotti tat-tabakk, elaborati fil-leġiżlazzjoni sekondarja li ġejja.

Ir-Regolament (UE)2018/574 (att ta’ implimentazzjoni) jistabbilixxi standards tekniċi għas-sistema tat-traċċabilità tat-tabakk:

• Il-pakketti jridu jkunu mmarkati b’identifikatur uniku biex jirreġistraw il-movimenti tagħhom permezz tal-katina tal-provvista, maħruġa minn emittent indipendenti u validu għal sitt xhur;
• l-ispeċifikazzjonijiet għar-repożitorji tad-data biex jiġu rreġistrati l-movimenti tal-prodotti tat-tabakk u t-tranżazzjonijiet relatati.

Dan ir-regolament ġie emendat mir-Regolament ta’ Implimentazzjoni (UE)2023/448.

Ir-Regolament (UE)2018/573 (att delegat) jistabbilixxi l-elementi ewlenin li għandhom jiġu inklużi fil-kuntratti tal-ħżin tad-data bejn il-manifatturi jew l-importaturi u l-fornituri tal-ħżin tad-data:

• id-depożitarji primarji u sekondarji (minn hawnhekk) u r-router tas-sistema għandhom jiġu stabbiliti;
• servizzi tekniċi anċillari oħra għandhom jiġu pprovduti fuq talba;
• l-ispeċifikazzjonijiet dwar l-operabilità, id-disponibilità, il-prestazzjoni u l-indipendenza finanzjarja u organizzazzjonali tas-servizzi għandhom jissodisfaw ir-rekwiżiti minimi.

Id-Deċiżjoni ta’ Implimentazzjoni (UE)2018/576 tistabbilixxi l-istandards tekniċi għall-karatteristiċi tas-sigurtà tal-imballaġġ tat-tabakk:

• il-pakketti individwali kollha għandu jkollhom karatteristika tas-sigurtà li ma tistax titbagħbas, magħmula minn elementi viżibbli u inviżibbli, sabiex jiżguraw l-awtentiċità;
• il-karatteristika għandha tinkludi mill-inqas ħames tipi ta’ awtentifikazzjoni, inkluż elementi ċari, mhux daqshekk ċari u moħbija;
• mill-inqas element ta’ awtentikazzjoni wieħed għandu jiġi pprovdut minn parti terza indipendenti.

MINN META JAPPLIKAW IR-REGOLI?

• Id-direttiva kellha tiġi trasposta fil-liġi nazzjonali sal-20 ta’ Mejju 2016. Dawn ir-regoli japplikaw mill-istess data.
• Ir-Regolament ta’ Implimentazzjoni (UE) 2018/574 fuq it-traċċabilità ilu japplika mis-6 ta’ Mejju 2018.
• Ir-Regolament ta’ Implimentazzjoni (UE) 2023/448 japplika mill-21 ta’ Diċembru 2023.
• Ir-Regolament Delegat (UE) 2018/573 dwar il-ħżin tad-data ilu japplika mis-6 ta’ Mejju 2018.
• Id-Deċiżjoni ta’ Implimentazzjoni (UE) 2018/576 dwar karatteristiċi tas-sigurtà li ma jistgħux jitbagħbsu ilha tapplika mit-18 ta’ Diċembru 2017.

SFOND

Għal aktar informazzjoni, ara:

• Tabakk (il-Kummissjoni Ewropea)
• Sistemi għat-traċċabbiltà tat-tabakk u l-karatteristiċi tas-sigurtà (il-Kummissjoni Ewropea).

DOKUMENT PRINĊIPALI

Id-Direttiva 2014/40/UE tal-Parlament Ewropew u tal-Kunsill tat-3 ta’ April 2014 dwar l-approssimazzjoni tal-liġijiet, ir-regolamenti u d-dispożizzjonijiet amministrattivi tal-Istati Membri rigward il-manifattura, il-preżentazzjoni u l-bejgħ tat-tabakk u prodotti relatati u li tħassar id-Direttiva 2001/37/KE (ĠU L 127, 29.4.2014, pp. 1–38).

Emendi suċċessivi għad-Direttiva 2014/40/UE ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Id-Direttiva Delegata tal-Kummissjoni (UE) 2022/2100 tad-29 ta’ Ġunju 2022 li temenda d-Direttiva 2014/40/UE tal-Parlament Ewropew u tal-Kunsill fir-rigward tal-irtirar ta’ ċerti eżenzjonijiet fir-rigward ta’ prodotti msaħħna tat-tabakk (ĠU L 283, 3.11.2022, pp. 4–6).

Ir-Regolament Delegat tal-Kummissjoni (UE) 2018/573 tal-15 ta’ Diċembru 2017 dwar l-elementi ewlenin tal-kuntratti tal-ħżin tad-data li għandhom jiġu konklużi bħala parti minn sistema ta’ traċċabilità għall-prodotti tat-tabakk (ĠU L 96, 16.4.2018, pp. 1–6).

Ir-Regolament ta’ Implimentazzjoni tal-Kummissjoni (UE) 2018/574 tal-15 ta’ Diċembru 2017 dwar l-istandards tekniċi għat-twaqqif u għat-tħaddim ta’ sistema ta’ traċċabilità għall-prodotti tat-tabakk (ĠU L 96, 16.4.2018, pp. 7–55).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2023/448 tal-1 ta’ Marzu 2023 li jemenda r-Regolament ta’ Implimentazzjoni (UE) 2018/574 dwar l-istandards tekniċi għat-twaqqif u għat-tħaddim ta’ sistema ta’ traċċabilità għall-prodotti tat-tabakk (ĠU L 65, 2.3.2023, pp. 28–57).

Id-Deċiżjoni ta’ Implimentazzjoni tal-Kummissjoni (UE)2018/576 tal-15 ta’ Diċembru 2017 dwar l-istandards tekniċi għall-karatteristiċi tas-sigurtà li jiġu applikati fuq il-prodotti tat-tabakk (notifikat skont id-dokument C(2017) 8435) (ĠU L 96, 16.4.2018, pp. 57–63).

l-aħħar aġġornament 20.04.2023