Ftehim Interbus: it-trasport internazzjonali okkażjonali ta’ passiġġieri bil-coach u bix-xarabank

PUNTI EWLENIN

Ftehim Interbus

Il-ftehim japplika għat-trasport internazzjonali okkażjonali ta’ passiġġieri, ta’ kull nazzjonalità, u ta’ vjaġġi mingħajr tagħbija bil-karozzi tal-linja u coaches ikkonċernati b’dawn is-servizzi fit-territorji tal-UE u fl-Albanija, Andorra, il-Bożnja u Ħerzegovina, il-Moldova, il-Montenegro, il-Maċedonja ta’ Fuq, is-Serbja, it-Turkija, l-Ukraina u r-Renju Unit.

Il-ftehim:

• jirregola t-traffiku mhux biss bejn Stati Membri tal-UE u pajjiżi mhux tal-UE ikkonċernati imma wkoll bejn il-pajjiżi stess mhux tal-UE, u b'riżultat ta' dan jistabbilixxu grad ta’ armonizzazzjoni fiskali, soċjali u teknika flimkien ma’ regoli ta’ aċċess għas-suq.
• jippermetti għal adeżjoni, sussegwenti għad-dħul fis-seħħ tiegħu, minn kull membru tal-Konferenza Ewropea tal-Ministri tat-Trasport (issa l-Forum tat-Trasport Internazzjonali), u minn San Marino u Monako;
• jissostitwixxi l-ftehimiet bilaterali dwar is-suġġett konklużi bejn il-partijiet kontraenti;
• jinkorpora l-biċċa l-kbira tal-miżuri ta’ liberalizzazzjoni tal-ftehim ASOR waqt li jżid miżuri soċjali, fiskali u tekniċi bbażati fuq il-prinċipju ta’ nondiskriminazzjoni bejn il-partijiet konraenti varji.

Il-prinċipju ta’ nondiskriminazzjoni fuq raġunijiet ta’ nazzjonalità jew il-post ta’ stabbiliment tal-oriġini tal-operatur tat-trasport, u l-oriġini jew destinazzjoni tal-karozza tal-linja jew tal-coach, hu kundizzjoni bażika li tapplika għall-provvista ta’ servizzi ta’ trasport internazzjonali.

Proċeduri simplifikati ta’ spezzjoni

Biex jissimplifika proċeduri ta’ spezzjoni, il-ftehim jistipula mudelli uniformi għal

• dokument tat-trasport, bħal dokument ta’ kontroll għal servizzi okkażżjonali liberalizzati; u
• l-awtorizzazzjoni u l-formola ta’ applikazzjoni għal servizzi mhux liberalizzati.

Eżenzjonijiet

Ix-xarabankijiet u l-coaches huma eżentati minn:

• it-taxxi kollha tal-vetturi u l-ħlasijiet imposti fuq iċ-ċirkolazzjoni jew il-pussess ta’ vetturi;
• it-taxxi speċjali jew it-taxxi kollha imposti fuq l-operazzjonijiet tat-trasport fit-territorju tal-partijiet kontraenti l-oħra.

Madankollu, ix-xarabankijiet u l-coaches mhumiex eżentati minn:

• il-pagament ta’ taxxi u tariffi fuq il-fjuwil tal-magni;
• taxxa fuq il-valur miżjud fuq servizzi tat-trasport;
• ħlasijiet għall-użu tat-toroq u tariffi għall-utenti imposti fuq l-użu tal-infrastruttura.

Ġestjoni u applikazzjoni tal-ftehim

Il-ftehim jistabbilixxi kumitat konġunt, li hu responsabbli għall-ġestjoni u għall-applikazzjoni xierqa tal-ftehim. B’mod partikolari, huwa responsabbli għal:

• Li jfassal lista tal-awtoritajiet responsabbli għal ċerti kompiti previsti fil-ftehim;
• li jemenda jew jadatta d-dokumenti ta’ kontroll u mudelli oħra ta’ dokumenti stabbiliti fl-annessi tal-ftehim;
• li jemenda jew jadatta l-annessi li jikkonċernaw l-istandards tekniċi applikabbli għax-xarabankijiet u l-coaches;
• li jfassal lista, fuq il-bażi ta’ informazzjoni pprovduta mill-partijiet kontraenti, tad-dazji doganali, taxxi u tariffi kollha;
• li jemenda jew jadatta r-rekwiżiti dwar id-dispożizzjonijiet soċjali sabiex jinkorpora miżuri futuri meħuda fi ħdan l-UE;
• li jsolvi kwalunkwe tilwima dwar l-implimentazzjoni u l-interpretazzjoni tal-ftehim;
• li jirrakkomanda aktar passi lejn il-liberalizzazzjoni ta’ dawk is-servizzi okkażjonali li għadhom soġġetti għal awtorizzazzjoni.

Durata tal-ftehim

Il-ftehim ġie konkluż għal perjodu ta’ 5 snin, mid-data tad-dħul fis-seħħ tiegħu. It-tul ta’ żmien huwa awtomatikament estiż għal perjodi suċċessivi ta’ 5 snin fost dawk il-partijiet kontraenti li ma jesprimux ix-xewqa tagħhom li ma jagħmlux hekk.

Protokoll għall-ftehim Interbus

Il-protokoll jestendi l-ftehim Interbus għat-trasport internazzjonali regolari u regolari speċjali ta’ passiġġieri bil-coach u karozzi tal-linja. Ma jemendax jew jidduplika r-regoli komuni imma jirreferi għad-dispożizzjonijiet sottostanti fil-ftehim Interbus. Il-partijiet kontraenti jistgħu jiffirmaw u jikkonkludu, jirratifikaw jew jaderixxu għall-protokoll biss wara li jkunu ffirmaw u kkonkludew, irratifikaw jew aderrixxew għall-ftehim Interbus; dan jiżgura li r-regoli Interbus huma aċċettati u japplikaw minn dawn il-partijiet meta jiffirmaw u jikkonkludu, jirratifikaw jew jaderixxu għall-protokoll.

Kamp ta’ applikazzjoni

Il-protokoll japplika, taħt ċerti kundizzjonijiet:

• għat-trasport internazzjonali ta’ passiġġieri, ta’ kull nazzjonalità, bit-triq, permezz ta’ servizzi regolari u regolari speċjali bil-coach jew bil-karozza tal-linja; u
• għal vjaġġi mingħajr tagħbija tal-karozzi tal-linja u coaches ikkonċernati b’dawn is-servizzi.

Il-protokoll ma jippernettix l-operazzjoni ta’ servizzi regolari jew regolari speċjali bl-oriġini u destinazzjoni fl-istess parti kontraenti minn operaturi stabbiliti f’parti kontraenti oħra (kabotaġġ). Madanakollu, fejn it-trasport hu parti minn servizz għal jew mit-territorju li fih l-operatur tat-trasport hu stabbilit, il-passiġġieri jistgħu jinġabru jew jitniżżlu fit-territorju ta’ kull parti kontraenti fi triqtha li tippermetti waqfa fit-territorju tiegħu.

Ma japplikax għall-użu ta’ karozzi tal-linja u coaches iddisinjati biex iġorru passiġġieri għat-trasport ta’ prodotti għal skopijiet kummerċjali jew servizzi awtonomi.

Aċċess għas-suq

Il-protokoll jistabbilixxi regoli dwar servizzi regolari internazzjonali u regolari speċjali suġġetti għal awtorizzazzjoni. Il-partijiet kontraenti u l-Istati Membri jistgħu jiddeċiedu dwar jekk jagħmlux servizzi regolari jew regolari speċjali bejniethom suġġett għal arranġamenti ta’ sħubija bejn l-operaturi tal-oriġini u d-destinazzjoni tas-servizz. Operaturi tal-partijiet kontraenti jew Stati Membri li jinkroċjaw fit-triq b’passiġġieri li jkunu qed jinġabru u jitniżżlu għandhom id-dritt li jissieħbu ma’ tali sħubijiet.

Kundizzjonijiet li japplikaw għal operaturi tat-trasport ta’ passiġġieri bit-triq

Dawn jinsabu fl-Anness I għall-protokoll u huma suġġetti għar-regoli stipulati fir-Regolament (KE) Nru 1071/2009 dwar regoli operattivi għal kumpaniji tat-trasport (ara s-sommarju) u r-Regolament (UE) Nru 181/2011 dwar id-drittijiet tal-passiġġieri fit-trasport bix-xarabank u bil-kowċ (ara s-sommarju).

Awtorizzazzjoni

Regoli dettaljati huma stabbiliti fir-rigward tal-awtoritajiet li jistgħu jagħtu awtorizzazzjonijiet, il-proċeduri tal-applikazzjoni li jridu jsegwu l-operaturi, il-perjodi ta’ validità tal-awtorizzazzjonijiet, it-tiġdid, l-oġġetti li jridu jkunu speċifikati fl-awtorizzazzjonijiet u l-użu ta’ vetturi addizzjonali f’ċirkostanzi temporanji u eċċezzjonali.

Kumitat konġunt li għandu rappreżentanti tal-partijiet kontraenti jimmaniġġjaw il-protokoll.