Back to EUR-Lex homepage

EUR-Lex Access to European Union law

Back to EUR-Lex homepage

This document is an excerpt from the EUR-Lex website

Use quotation marks to search for an "exact phrase". Append an asterisk (*) to a search term to find variations of it (transp*, 32019R*). Use a question mark (?) instead of a single character in your search term to find variations of it (ca?e finds case, cane, care).
Search tips
Need more search options? Use the Advanced search
You are here

Summaries of EU Legislation

Id-data miftuħa u l-użu mill-ġdid tal-informazzjoni tas-settur pubbliku

Date of last review:
25/01/2023
Author:
Uffiċċju tal-Pubblikazzjonijiet tal-Unjoni Ewropea
Responsible entity(ies):
Id-Direttorat Ġenerali għan-Networks tal-Komunikazzjonijiet, Il-Kontenut u t-Teknoloġija
Summarised document(s):

Id-data miftuħa u l-użu mill-ġdid tal-informazzjoni tas-settur pubbliku

 

SOMMARJU TA’:

Direttiva (UE) 2019/1024 dwar id-data miftuħa u l-użu mill-ġdid tal-informazzjoni tas-settur pubbliku

X’INHU L-GĦAN TAD-DIRETTIVA?

  • Hija tistabbilixxi l-qafas legali għall-użu mill-ġdid* ta’ informazzjoni tas-settur pubbliku bħal informazzjoni ġeografika, tar-reġistru tal-artijiet, statistika jew legali miżmuma minn korpi tas-settur pubbliku* jew impriżi pubbliċi*, u ta’ data tar-riċerka ffinanzjata minn fondi pubbliċi.
  • Din għandha l-għan li ttejjeb il-potenzjal soċjoekonomiku tal-informazzjoni tas-settur pubbliku, pereżempju billi tagħmilha aktar faċilment disponibbli għal negozji ġodda u intrapriżi ta’ daqs żgħir u medju, billi żżid il-provvista ta’ data dinamika* u settijiet tad-data b’impatt ekonomiku partikolarment għoli, u billi tippromwovi l-kompetizzjoni u t-trasparenza fis-suq tal-informazzjoni.
  • Din hija parti minn pakkett ta’ miżuri mfassal biex isaħħaħ l-ekonomija tad-data tal-Unjoni Ewropea (UE), inkluż l-iżvilupp tal-intelliġenza artifiċjali.
  • Imsejħa wkoll id-“direttiva dwar id-data miftuħa”, din tirriformula d-Direttiva 2003/98/KE.
  • Hija tħassar id-Direttiva 2003/98/KE u d-Direttiva 2013/37/UE mis-17 ta’ Lulju 2021.

PUNTI EWLENIN

Id-direttiva hija bbażata fuq il-prinċipju ġenerali li d-data pubblika u dik iffinanzjata pubblikament għandha tkun tista’ terġa’ tintuża għal finijiet kummerċjali jew mhux kummerċjali.

data miftuħa

Id-direttiva tippromwovi l-użu ta’ data miftuħa (data ppreżentata f’formati miftuħa* li l-individwi jistgħu jużaw b’mod liberu u jikkondividu għal kwalunkwe skop). Il-korpi tas-settur pubbliku u l-impriżi pubbliċi għandhom jagħmlu d-dokumenti tagħhom disponibbli b’xi format jew lingwa eżistenti qabel u, fejn xieraq, b’mezzi elettroniċi f’formati li huma miftuħa, li jistgħu jinqraw mill-magni, aċċessibbli, li jistgħu jinstabu u jerġgħu jintużaw, kompluti bil-metadata tagħhom.

Arranġamenti prattiċi għall-użu mill-ġdid

  • Il-korpi tas-settur pubbliku jridu jipproċessaw it-talbiet għall-użu mill-ġdid tad-dokumenti, permezz ta’ mezzi elettroniċi fejn xieraq, billi jagħmluhom disponibbli fi żmien raġonevoli.
  • Fl-istess ħin, dawn għandhom jagħmlu l-arranġamenti meħtieġa biex jiffaċilitaw it-tiftix online u l-iskoperta tad-dokumenti li jżommu.
  • L-Istati Membri tal-UE għandhom jiffaċilitaw ukoll l-użu mill-ġdid effettiv tad-dokumenti, b’mod partikolari billi jipprovdu informazzjoni dwar id-drittijiet deskritti fid-direttiva u billi joffru għajnuna u gwida.

data dinamika u f’ħin reali

data dinamika għandha ssir disponibbli għall-użu mill-ġdid immedjatament wara l-ġbir permezz ta’ interfaċċa għall-ipprogrammar tal-applikazzjonijiet u, fejn rilevanti, bħala tniżżil massiv.

data ta’ riċerka

  • L-Istati Membri għandhom jadottaw politiki u jieħdu azzjoni biex jagħmlu d-data ta’ riċerka ffinanzjata pubblikament disponibbli b’mod miftuħ, skont il-prinċipju tal-“ftuħ b’mod awtomatiku” u jappoġġjaw it-tixrid ta’ data ta’ riċerka li tista’ tinstab, li tkun aċċessibbli, interoperabbli u li tkun tista’ terġa’ tintuża (il-prinċipju FAIR).
  • Tħassib relatat mad-drittijiet tal-proprjetà intellettwali, il-protezzjoni u l-kunfidenzjalità tad-data personali, is-sigurtà u l-interessi kummerċjali leġittimi għandu jitqies skont il-prinċipju ta’ “kemm jista’ jkun miftuħ, magħluq kemm meħtieġ”.
  • Id-data ta’ riċerka ffinanzjata pubblikament tista’ tintuża mill-ġdid għal finijiet kummerċjali jew mhux kummerċjali f’każijiet fejn tkun diġà saret disponibbli għall-pubbliku permezz ta’ repożitorji istituzzjonali jew ibbażati fuq is-suġġett.

Kummerċ ġust u nondiskriminazzjoni

  • L-użu mill-ġdid tad-dokumenti huwa miftuħ għal kulħadd fis-suq u kull kundizzjoni tal-użu mill-ġdid applikabbli m’għandhiex tkun diskriminatorja.
  • Bħala regola ġenerali, l-arranġamenti bejn il-korpi tas-settur pubbliku u l-impriżi pubbliċi li jkollhom id-dokumenti u l-partijiet terzi ma jistgħux jagħtu drittijiet esklussivi.
  • F’każijiet definiti b’mod ristrett fejn id-direttiva tippermetti dawn l-arranġamenti, il-validità tagħhom hija soġġetta għal rieżami regolari u japplikaw rekwiżiti tat-trasparenza speċjali.

Settijiet tad-data ta’ valur għoli

Id-dokumenti li l-użu mill-ġdid tagħhom huwa assoċjat ma’ benefiċċji soċjoekonomiċi sinifikanti għandhom isiru disponibbli b’kundizzjonijiet ta’ użu mill-ġdid partikolarment favorevoli. Għalhekk, id-direttiva obbligat lill-Kummissjoni Ewropea tadotta lista ta’ settijiet tad-data ta’ valur għoli li għandhom isiru disponibbli mingħajr ħlas, f’formati li jinqraw mill-magni, permezz ta’ interfaċċi għall-ipprogrammar tal-applikazzjonijiet u, fejn rilevanti, bħala tniżżil massiv. Is-settijiet tad-data ntgħażlu minn sitt kategoriji tematiċi stabbiliti fl-Anness I:

  • ġeospazjali;
  • l-osservazzjoni tad-dinja u l-ambjent;
  • meteoroloġika;
  • statistika;
  • il-kumpaniji u s-sjieda tal-kumpaniji;
  • il-mobbiltà.

Jistgħu jiżdiedu kategoriji tematiċi ġodda mill-Kummissjoni, permezz ta’ att delegat.

B’riżultat ta’ dan, att ta’ implimentazzjoni, ir-Regolament (UE) 2023/138, jistabbilixxi lista ta’ settijiet tad-data speċifiċi ta’ valur għoli u l-arranġamenti għall-pubblikazzjoni u għall-użu mill-ġdid tagħhom.

Spejjeż

  • L-użu mill-ġdid tad-dokumenti għandu jkun mingħajr ħlas. Madankollu, l-ispejjeż marġinali mġarrba għar-riġenerazzjoni u għad-disseminazzjoni tad-dokumenti, għall-anonimizzazzjoni tad-data personali u għall-protezzjoni tal-informazzjoni kummerċjalment kunfidenzjali jistgħu jiġu rkuprati.
  • Bħala eċċezzjoni, l-istituzzjonijiet kulturali, l-impriżi pubbliċi u xi korpi tas-settur pubbliku li jissodisfaw ir-rekwiżiti stabbiliti fl-Artikolu 6(2) jistgħu jimponu ħlas akbar sabiex jirkupraw l-ispejjeż eliġibbli.

Eċċezzjonijiet

Id-direttiva ma tapplikax għal:

  • dokumenti li għalihom partijiet terzi jżommu drittijiet tal-proprjetà intellettwali;
  • dokumenti li l-aċċess għalihom huwa eskluż jew ristrett minħabba reġim ta’ aċċess nazzjonali jew minħabba protezzjoni ta’ infrastruttura kritika sensittiva;
  • dokumenti li l-forniment tagħhom jaqa’ barra mill-kamp ta’ applikazzjoni tal-kompitu pubbliku ta’ korp tas-settur pubbliku jew barra mill-kamp ta’ applikazzjoni tal-forniment ta’ servizzi fl-interess ġenerali ta’ impriża pubblika;
  • dokumenti relatati mal-attivitajiet ta’ impriżi pubbliċi esposti b’mod dirett għall-kompetizzjoni u għalhekk mhumiex soġġetti għal regoli tal-akkwist skont l-Artikolu 34 tad-Direttiva 2014/25/UE (ara s-sommarju);
  • dokumenti oħra msemmija fl-Artikolu 1(2) tad-direttiva.

MINN META JAPPLIKAW DAWN IR-REGOLI?

Id-direttiva kellha tiġi trasposta fil-liġi nazzjonali sas-17 ta’ Lulju 2021.

SFOND

Għal aktar informazzjoni, ara:

TERMINI EWLENIN

Użu mill-ġdid. L-użu, minn individwi jew korpi legali, ta’ dokumenti li jinżammu minn korpi tas-settur pubbliku jew impriżi pubbliċi.
Korp tas-settur pubbliku. L-istat, awtoritajiet reġjonali jew lokali, korpi regolati mil-liġi pubblika jew assoċjazzjonijiet iffurmati minn tali awtoritajiet, jew korpi regolati mil-liġi pubblika.
Impriża pubblika. Kwalunkwe impriża li fuqha l-korpi tas-settur pubbliku jeżerċitaw influwenza dominanti permezz ta’ sjieda, parteċipazzjoni finanzjarja jew ir-regoli li jirregolawha; dawn jinkludu dawk li jaġixxu bħala operaturi tat-trasport pubbliku tal-passiġġieri bit-triq jew bil-ferrovija, trasportaturi tal-ajru u sidien tal-bastimenti tal-UE li jissodisfaw l-obbligi tas-servizz pubbliku.
data dinamika. Dokumenti f’forma diġitali, soġġetti għal aġġornamenti frekwenti jew f’ħin reali minħabba l-volatilità jew il-ħruġ rapidu mill-użu tagħhom; tipikament data ġġenerata minn sensuri.
Format miftuħ. Format ta’ fajl li huwa indipendenti mill-pjattaforma u li jitqiegħed għad-dispożizzjoni tal-pubbliku mingħajr ebda restrizzjoni li xxekkel l-użu mill-ġdid tad-dokumenti.

DOKUMENT PRINĊIPALI

Id-Direttiva (UE) 2019/1024 tal-Parlament Ewropew u tal-Kunsill tal-20 ta’ Ġunju 2019 dwar id-data miftuħa u l-użu mill-ġdid tal-informazzjoni tas-settur pubbliku (riformulazzjoni) (ĠU L 172, 26.6.2019, pp. 56–83).

DOKUMENTI RELATATI

Ir-Regolament ta’ Implimentazzjoni tal-Kummissjoni (UE) 2023/138 tal-21 ta’ Diċembru 2022 li jistabbilixxi lista ta’ settijiet tad-data speċifiċi ta’ valur għoli u l-arranġamenti għall-pubblikazzjoni u għall-użu mill-ġdid tagħhom (ĠU L 19, 20.1.2023, pp. 43–75).

Id-Direttiva (UE) 2016/2102 tal-Parlament Ewropew u tal-Kunsill tas-26 ta’ Ottubru 2016 dwar l-aċċessibbiltà tas-siti elettroniċi u tal-applikazzjonijiet mobbli tal-korpi tas-settur pubbliku (ĠU L 327, 2.12.2016, pp. 1–15).

Id-Direttiva 2014/25/UE tal-Parlament Ewropew u tal-Kunsill tas-26 ta’ Frar 2014 dwar l-akkwist minn entitajiet li joperaw fis-setturi tas-servizzi tal-ilma, l-enerġija, it-trasport u l-posta u li tħassar id-Direttiva 2004/17/KE (ĠU L 94, 28.3.2014, pp. 243–374).

Emendi suċċessivi għad-Direttiva 2014/25/UE ġew inkorporati fit-test oriġinali. Din il-verżjoni konsolidata għandha valur dokumentarju biss.

Ir-Regolament (KE) Nru 1008/2008 tal-Parlament Ewropew u tal-Kunsill tal-24 ta’ Settembru 2008 dwar regoli komuni għall-operat ta’ servizzi tal-ajru fil-Komunità (riformulazzjoni) (ĠU L 293, 31.10.2008, pp. 3–20).

Ara l-verżjoni konsolidata.

Ir-Regolament (KE) Nru 1370/2007 tal-Parlament Ewropew u tal-Kunsill tat-23 ta’ Ottubru 2007 dwar servizzi tat-trasport pubbliku tal-passiġġieri bil-ferrovija u bit-triq u li jħassar ir-Regolamenti tal-Kunsill (KEE) Nri 1191/69 u 1107/70 (ĠU L 315, 3.12.2007, pp. 1–13).

Ara l-verżjoni konsolidata.

Ir-Regolament tal-Kunsill (KEE) Nru 3577/92 tas-7 ta’ Diċembru 1992 li japplika l-prinċipju ta’ libertà li jiġu pprovduti servizzi għat-trasport marittimu fi ħdan l-Istati Membri (kabotaġġ marittimu) (ĠU L 364, 12.12.1992, pp. 7–10).

Ara l-verżjoni konsolidata.

l-aħħar aġġornament 25.01.2023

Top