Ir-regoli tal-UE dwar il-produzzjoni u t-tikkettar ta’ prodotti organiċi (mill-2022)

 

SOMMARJU TA’:

Ir-Regolament (UE) 2018/848 — regoli dwar il-produzzjoni organika u t-tikkettar ta’ prodotti organiċi

X’INHU L-GĦAN TAR-REGOLAMENT?

Huwa għandu l-għan li jirrevedi u jsaħħaħ ir-regoli tal-Unjoni Ewropea (UE) dwar il-produzzjoni organika u t-tikkettar ta’ prodotti organiċi b’rabta ma’:

• is-sistema ta’ kontrolli;
• is-sistema kummerċjali;
• ir-regoli ta’ produzzjoni.

B’dan il-mod, għandu l-għan li:

• joħloq kundizzjonijiet ekwi għall-operaturi;
• jarmonizza u jissimplifika r-regoli;
• itejjeb il-fiduċja tal-konsumaturi fil-prodotti organiċi u fil-logo organiku tal-UE.

Dan jirrevoka u jissostitwixxi l-leġiżlazzjoni preċedenti (ir-Regolament (KE) Nru 834/2007 mill-1 ta’ Jannar 2022.

PUNTI EWLENIN

• Ir-regolament jibni fuq u jwessa’ l-kamp ta’ applikazzjoni tal-leġiżlazzjoni tal-UE dwar il-produzzjoni u t-tikkettar ta’ prodotti organiċi sabiex tkopri wkoll prodotti relatati mill-qrib mal-agrikoltura bħas-sufra, il-melħ, iż-żjut essenzjali, il-qoton u s-suf.
• Dan jarmonizza r-regoli applikabbli għall-operaturi organiċi fl-Istati Membri tal-UE u f’pajjiżi terzi permezz tal-introduzzjoni tas-sistema ta’ konformità.
• Dan jissimplifika l-aċċess għall-iskema għall-operaturi ż-żgħar.
• Dan jirrevedi r-regoli dwar il-produzzjoni organika tal-bhejjem u jintroduċi regoli għal speċijiet ġodda, bħall-fniek.

Prinċipji

Il-produzzjoni organika għandha:

• tirrispetta s-sistemi u ċ-ċikli naturali;
• iżżomm u ttejjeb il-kundizzjoni tal-ħamrija, tal-ilma u tal-arja, tas-saħħa tal-pjanti u tal-annimali, u tal-bilanċ bejniethom;
• tippreserva l-elementi ta’ pajżaġġi naturali;
• tuża l-enerġija u r-riżorsi naturali b’mod responsabbli;
• tipproduċi varjetà kbira ta’ prodotti ta’ kwalità għolja li jissodisfaw id-domanda tal-konsumaturi;
• tiżgura l-integrità tal-produzzjoni organika fl-istadji kollha tal-produzzjoni, l-ipproċessar u d-distribuzzjoni tal-ikel u l-għalf;
• teskludi l-użu ta’ organiżmi ġenetikament modifikati (OĠM) u prodotti li jiġu prodotti minn jew permezz ta’ OĠM*, ħlief prodotti mediċinali veterinarji;
• tirrestrinġi l-użu ta’ inputs esterni;
• tfassal u timmaniġġja proċessi bijoloġiċi permezz ta’ metodi bbażati fuq il-valutazzjoni tar-riskju u l-użu ta’ miżuri ta’ prekawzjoni u ta’ prevenzjoni;
• teskludi l-klonazzjoni tal-annimali;
• tiżgura livell għoli ta’ benessri tal-annimali.

Rekwiżiti

Fost affarijiet oħra, il-biedja organika għandha:

• iżżomm u ttejjeb il-ħajja tal-ħamrija u l-fertilità naturali tagħha, l-istabbiltà tal-ħamrija u l-kapaċità tagħha li żżomm l-ilma, u l-bijodiversità;
• tuża żrieragħ u annimali bi brad għoli ta’ diversità ġenetika, reżistenza għall-mard u lonġevità;
• tagħżel varjetajiet ta’ pjanti — b’kont meħud tal-karatteristiċi ta’ sistemi speċifiċi tal-produzzjoni organika, b’enfasi fuq il-prestazzjoni agronomika u r-reżistenza għall-mard;
• tagħżel razez ta’ annimali filwaqt li tqis livell għoli ta’ diversità ġenetika, valur tat-tnissil, adattament, lonġevità, vitalità u reżistenza għall-mard u problemi tas-saħħa;
• tipprattika l-produzzjoni ta’ bhejjem adattata għall-post u relatata mal-art.

Produzzjoni

Biex jevitaw l-effetti ħżiena fuq l-ambjent u fuq is-saħħa tal-annimali u tal-pjanti, il-produtturi għandhom:

• jieħdu miżuri xierqa biex:
  • jippreservaw il-bijodiversità u l-fertilità tal-ħamrija,
  • jipprevjenu l-okkorrenza ta’ pesti u ta’ mard,
  • jikkontribwixxu għat-trattament xieraq għoli tal-annimali u għal ambjent mhux tossiku;
• jieħdu miżuri proporzjonati u prekawzjonarji f’kull stadju tal-produzzjoni, preparazzjoni u distribuzzjoni sabiex jevitaw il-kontaminazzjoni ma’ prodotti jew sustanzi mhux awtorizzati għall-użu fil-produzzjoni organika.

Perjodu ta’ konverżjoni

• Meta razzett ikun jixtieq jgħaddi milli jipproduċi prodotti organiċi, dan ikollu jgħaddi minn perjodu ta’ konverżjoni li matulu r-razzett kollu għandu jiġi ġestit skont ir-regoli tal-produzzjoni organika, għalkemm f’dan l-istadju l-prodotti tiegħu ma jitqisux li huma organiċi. Ikun jista’ biss iqiegħed il-prodotti tiegħu fis-suq bħala prodotti organiċi ladarba jintemm dan il-perjodu ta’ konverżjoni u jkun ġie ċċekkjat.
• Barra minn hekk, il-prodotti tal-ikel u tal-għalf li joriġinaw mill-pjanti li fihom ingredjent wieħed biss tal-għelejjel agrikoli jistgħu jiġu kkummerċjalizzati bħala prodotti fil-fażi tal-konverżjoni, dment li jkun hemm perjodu ta’ konverżjoni ta’ 12-il xahar qabel il-ħsad. Din ir-regola issa tapplika wkoll għall-materjal riproduttiv tal-pjanti (inklużi ż-żrieragħ u l-pjanti fi kwalunkwe stadju ta’ tkabbir użat għall-produzzjoni ta’ pjanti sħaħ).
• Wara l-perjodu ta’ konverżjoni, kwalunkwe azjenda agrikola tal-UE li tkun tixtieq tgħaddi għall-produzzjoni organika għandha tiġi ġestita għalkollox f’konformità mar-rekwiżiti tal-produzzjoni organika.
• Ir-regolament jippermetti wkoll irziezet li kemm il-produzzjoni organika kif ukoll dik mhux organika, bil-kundizzjoni li l-attivitajiet tagħhom ikunu separati f’termini ta’ unitajiet ta’ produzzjoni (mhux organiċi, fil-konverżjoni u organiċi), li għandhom ikunu separati b’mod ċar u ġenwinament.

Ċertifikazzjoni

• L-operaturi (jiġifieri l-produtturi, il-proċessuri u d-distributuri) għandhom jinnotifikaw l-attivitajiet tagħhom lill-awtoritajiet kompetenti sabiex l-awtoritajiet ikunu jistgħu jiċċertifikaw uffiċjalment li jikkonformaw mar-regoli dwar il-produzzjoni organika u t-tikkettar.
• Ir-regolament jintroduċi sistema ġdida ta’ ċertifikazzjoni tal-grupp* għall-bdiewa ż-żgħar, li tagħmilha aktar faċli għalihom biex jaqilbu għall-biedja organika.

Kontrolli uffiċjali u tikkettar

• Is-sistema ta’ kontrolli hija msaħħa permezz ta’ miżuri ta’ prekawzjoni aktar stretti u kontrolli sodi bbażati fuq ir-riskju tal-katina ta’ provvista. Fil-prinċipju, kontrolli fuq il-post isiru fuq l-operaturi darba fis-sena. Madankollu, dan jista’ jiġi estiż sa sentejn meta l-kontrolli preċedenti ma jkunux urew l-ebda każ ta’ nuqqas ta’ konformità matul it-3 snin preċedenti u l-operaturi kkonċernati jippreżentaw riskju baxx ta’ nuqqas ta’ konformità.
• Jekk korp ta’ kontroll jissuspetta li operatur qed jipprova jqiegħed fis-suq prodott mhux awtorizzat bħala “organiku”, dan għandu jagħmel investigazzjoni formali u jipprojbixxi temporanjament it-tqegħid fis-suq ta’ dak il-prodott sakemm tintemm l-investigazzjoni. F’każ ta’ ksur serju u ripetut, l-operaturi jistgħu jiġu pprojbiti milli jbiegħu prodotti deskritti bħala organiċi għal perjodu speċifiku jew iċ-ċertifikat tagħhom jista’ jiġi rtirat.
• Il-kontrolli speċifiċi fuq il-biedja organika huma kkomplementati mir-regoli ġenerali tal-UE dwar il-kontrolli uffiċjali tul il-katina agroalimentari (Ir-Regolament (UE) 2017/625 — ara s-sommarju).

Importazzjonijiet

Prodott jista’ jiġi importat minn pajjiż li mhuwiex fl-UE sabiex jinbiegħ fl-UE bħala prodott organiku jekk ċerti kundizzjonijiet ikunu ssodisfati. Il- prodott għandu:

• jikkonforma mar-regoli ta’ produzzjoni u ta’ kontroll tal-pajjiż li mhuwiex fl-UE li huma rikonoxxuti taħt ftehim internazzjonali bħala ekwivalenti għal dawk fl-UE;
• ikollu ċertifikat maħruġ minn awtoritajiet ta’ kontroll jew korpi ta’ kontroll rilevanti fil-pajjiżi li mhumiex fl-UE li jikkonferma li l-prodott huwa konformi mal-istandards tal-UE.

Atti ta’ implimentazzjoni

Il-Kummissjoni Ewropea adottat l-atti legali li ġejjin.

• Ir-Regolament ta’ Implimentazzjoni (UE) 2020/464, li jistabbilixxi regoli għall-applikazzjoni tar-Regolament (UE) 2018/848 fir-rigward ta’:
  • id-dokumenti meħtieġa għar-rikonoxximent retroattiv tal-perjodi għall-fini ta’ konverżjoni,
  • il-produzzjoni ta’ prodotti organiċi,
  • l-informazzjoni li l-Istati Membri jeħtieġ li jipprovdu lill-Kummissjoni;
• Ir-Regolament ta’ Implimentazzjoni (UE) 2021/279, li jistabbilixxi regoli għal:
  • investigazzjonijiet uffiċjali f’każijiet ta’ suspett ta’ nuqqas ta’ konformità,
  • id-daqs tal-gruppi ta’ operaturi u d-dokumentazzjoni tas-sistema ta’ kontrolli interni tagħhom,
  • rekwiżiti minimi ta’ kontroll,
  • katalgi nazzjonali ta’ miżuri għal każijiet ta’ nuqqas ta’ konformità,
  • l-iskambju ta’ informazzjoni bejn l-Istati Membri u l-Kummissjoni;
• Ir-Regolament ta’ Implimentazzjoni (UE) 2021/1165, li jawtorizza u jelenka ċerti prodotti u sustanzi għall-użu fil-produzzjoni organika, li wara ġie korrett u emendat bir-Regolament ta’ Implimentazzjoni (UE) 2023/121.
• Ir-Regolament ta’ Implimentazzjoni (UE) 2021/1378, li jipprovdi regoli għaċ-ċertifikat maħruġ lill-operaturi, gruppi ta’ operaturi u esportaturi f’pajjiżi mhux tal-UE involuti fl-importazzjonijiet ta’ prodotti organiċi u fil-konverżjoni fl-UE, u biex jistabbilixxi lista ta’ awtoritajiet ta’ kontroll rikonoxxuti u korpi ta’ kontroll f’pajjiżi mhux tal-UE.
• Ir-Regolament ta’ Implimentazzjoni (UE) 2021/1935 li jemenda r-Regolament ta’ Implimentazzjoni (UE) 2019/723, li jipprovdi għall-użu tas-Sistema ta’ Informazzjoni Organika għall-preżentazzjoni ta’ informazzjoni u data dwar il-produzzjoni organika u t-tikkettar tal-prodotti organiċi li għandhom jiġu sottomessi permezz tal-formola ta’ mudell standard li għandha tintuża fir-rapporti annwali ppreżentati mill-Istati Membri fir-rigward tar-Regolament (UE) 2017/625.
• Ir-Regolament ta’ Implimentazzjoni (UE) 2021/2119, li jipprovdi regoli dettaljati għal ċerti rekords u dikjarazzjonijiet meħtieġa mill-operaturi u mill-gruppi ta’ operaturi u dwar il-mezzi tekniċi għall-ħruġ taċ-ċertifikati, u li jintroduċi emendi għar-Regolament ta’ Implimentazzjoni (UE) 2021/1378 fir-rigward tal-ħruġ taċ-ċertifikati għall-operaturi, għall-gruppi ta’ operaturi u għall-esportaturi f’pajjiżi terzi.
• Ir-Regolament ta’ Implimentazzjoni (UE) 2021/2307, li jipprovdi regoli għad-dokumenti u n-notifiki meħtieġa għall-prodotti organiċi u fil-fażi tal-konverżjoni maħsuba għall-importazzjoni fl-UE.
• Ir-Regolament ta’ Implimentazzjoni (UE) 2021/2325, li jistabbilixxi l-lista ta’ pajjiżi terzi u l-lista ta’ awtoritajiet ta’ kontroll u korpi ta’ kontroll rikonoxxuti skont ir-Regolament (KE) Nru 834/2007 għall-fini tal-importazzjoni ta’ prodotti organiċi fl-UE.

Atti delegati

Il-Kummissjoni adottat diversi atti delegati li jemendaw ir-Regolament (UE) 2018/848 jew l-annessi tiegħu.

• Ir-Regolament Delegat (UE) 2020/427 jemenda l-Anness II tar-Regolament (UE) 2018/848 fir-rigward ta’ ċerti regoli dettaljati tal-produzzjoni għall-prodotti organiċi. Dan, min-naħa tiegħu, kien emendat mir-Regolament Delegat (UE) 2021/269.
• Ir-Regolament Delegat (UE) 2020/1794 jemenda l-Parti I tal-Anness II tar-Regolament (UE) 2018/848 fir-rigward tal-użu ta’ materjal riproduttiv tal-pjanti fil-konverżjoni u mhux organiku.
• Ir-Regolament Delegat (UE) 2021/642 jemenda l-Anness III tar-Regolament (UE) 2018/848 fir-rigward ta’ ċerta informazzjoni li għandha tingħata fuq it-tikkettar ta’ prodotti organiċi.
• Ir-Regolament Delegat (UE) 2021/715 jemenda r-Regolament (UE) 2018/848 fir-rigward tar-rekwiżiti għal gruppi ta’ operaturi.
• Ir-Regolament Delegat (UE) 2021/716 jemenda l-Anness II tar-Regolament (UE) 2018/848 fir-rigward tar-regoli tal-produzzjoni organika dwar iż-żrieragħ bin-nebbieta u l-irjus taċ-ċikwejra, dwar l-għalf għal ċerti annimali tal-akkwakultura u dwar it-trattamenti tal-parassiti tal-akkwakultura.
• Ir-Regolament Delegat (UE) 2021/1006 jemenda r-Regolament (UE) 2018/848 fir-rigward tal-mudell taċ-ċertifikat li jattesta l-konformità mar-regoli dwar il-produzzjoni organika.
• Ir-Regolament Delegat (UE) 2021/1691 tat-12 ta’ Lulju 2021 jemenda l-Anness II tar-Regolament (UE) 2018/848 fir-rigward tar-rekwiżiti għaż-żamma tar-rekords għall-operaturi fil-produzzjoni organika.
• Ir-Regolament Delegat (UE) 2021/1697 jemenda r-Regolament (UE) 2018/848 fir-rigward tal-kriterji għar-rikonoxximent ta’ awtoritajiet ta’ kontroll u korpi ta’ kontroll li huma kompetenti biex iwettqu kontrolli fuq prodotti organiċi f’pajjiżi terzi, u għall-irtirar tar-rikonoxximent tagħhom.
• Ir-Regolament Delegat (UE) 2023/207 jemenda r-Regolament (UE) 2018/848 li jissostitwixxi l-Anness VI tiegħu (mod ta’ ċertifikat li jiċċertifika l-konformità mar-regoli dwar il-produzzjoni organika).

Barra minn hekk, regolamenti delegati oħrajn jissupplimentaw ir-Regolament (UE) 2018/848.

• Ir-Regolament Delegat (UE) 2019/2123 — regoli għall-każijiet meta l-verifiki identitarji u l-verifiki fiżiċi fuq ċerti oġġetti jistgħu jitwettqu f’punti ta’ kontroll u l-verifiki dokumentarji jistgħu jitwettqu ’l bogħod mill-postijiet ta’ kontroll fuq il-fruntieri u l-kundizzjonijiet li bihom isiru dawn il-verifiki, emendat aktar tard mir-Regolament Delegat (UE) 2021/2305.
• Ir-Regolament Delegat (UE) 2019/2124 — regoli għall-kontrolli uffiċjali ta’ kunsinni ta’ annimali u ta’ oġġetti fit-tranżitu, fit-trasbord u fit-tkomplija tat-trasport fl-UE, emendat aktar tard bir-Regolamenti Delegati (UE) 2020/2190 u (UE) 2021/2305.
• Ir-Regolament Delegat (UE) 2020/2146 — regoli ta’ produzzjoni eċċezzjonali fil-produzzjoni organika.
• Ir-Regolament Delegat (UE) 2021/771 — kriterji u kundizzjonijiet speċifiċi għall-verifiki tal-kontijiet dokumentarji fil-qafas tal-kontrolli uffiċjali fil-produzzjoni organika u l-kontrolli uffiċjali tal-gruppi ta’ operaturi.
• Ir-Regolament Delegat (UE) 2021/1189 — il-produzzjoni u l-kummerċjalizzazzjoni ta’ materjal riproduttiv tal-pjanti ta’ materjal organiku eteroġenu ta’ ġeneri jew speċijiet partikolari.
• Ir-Regolament Delegat (UE) 2021/1342 — regoli dwar l-informazzjoni li għandha tintbagħat mill-pajjiżi terzi u mill-awtoritajiet ta’ kontroll u mill-korpi ta’ kontroll għall-finijiet tas-superviżjoni tar-rikonoxximent tagħhom skont ir-Regolament (KE) Nru 834/2007 għall-prodotti organiċi importati u l-miżuri li għandhom jittieħdu fl-eżerċizzju ta’ dik is-superviżjoni.
• Ir-Regolament Delegat (UE) 2021/1698 — rekwiżiti proċedurali għar-rikonoxximent tal-awtoritajiet ta’ kontroll u l-korpi ta’ kontroll li huma kompetenti biex iwettqu kontrolli fuq operaturi u gruppi ta’ operaturi li huma ċċertifikati organiċi u fuq prodotti organiċi f’pajjiżi terzi, ir-regoli dwar is-superviżjoni tagħhom u l-kontrolli u azzjonijiet oħra li għandhom jitwettqu minn dawk l-awtoritajiet ta’ kontroll u l-korpi ta’ kontroll.
• Ir-Regolament Delegat (UE) 2021/2304 — regoli dwar il-ħruġ ta’ ċertifikati komplementari li jiċċertifikaw in-nuqqas ta’ użu ta’ antibijotiċi fil-produzzjoni organika ta’ prodotti tal-annimali għall-fini ta’ esportazzjoni.
• Ir-Regolament Delegat (UE) 2021/2305 — ir-regoli dwar il-każijiet meta u l-kundizzjonijiet li fihom il-prodotti organiċi u l-prodotti fil-fażi tal-konverżjoni huma eżentati minn kontrolli uffiċjali fil-postijiet ta’ kontroll fuq il-fruntiera, il-post tal-kontrolli uffiċjali għal tali prodotti.
• Ir-Regolament Delegat (UE) 2021/2306 — regoli dwar il-kontrolli uffiċjali fir-rigward tal-konsenji ta’ prodotti organiċi u prodotti fil-fażi tal-konverżjoni maħsuba għall-importazzjoni fl-Unjoni u dwar iċ-ċertifikat ta’ spezzjoni.
• Ir-Regolament Delegat (UE) 2022/1450 — regoli dwar l-użu ta’ għalf tal-proteina mhux organiku għall-produzzjoni tal-bhejjem organiċi minħabba l-invażjoni tar-Russja fl-Ukrajna.

MINN META BEDA JAPPLIKA R-REGOLAMENT?

Ilu japplika mill-1 ta’ Jannar 2022 (id-data tal-applikazzjoni tiegħu ġiet posposta b’sena bir-Regolament (UE)2020/1693 minħabba l-pandemija tal-COVID-19 u l-kriżi relatata tas-saħħa pubblika).

SFOND

Għal aktar informazzjoni, ara:

• Leġiżlazzjoni għas-settur organiku (il-Kummissjoni Ewropea).

TERMINI EWLENIN

DOKUMENT PRINĊIPALI

Ir-Regolament (UE) 2018/848 tal-Parlament Ewropew u tal-Kunsill tat-30 ta’ Mejju 2018 dwar il-produzzjoni organika u t-tikkettar ta’ prodotti organiċi u li jħassar ir-Regolament tal-Kunsill (KE) Nru 834/2007 (ĠU L 150, 14.6.2018, pp. 1–92).

L-emendi suċċessivi għar-Regolament (UE) 2018/848 ġew inkorporati fit-test oriġinali. Din il-verżjoni konsolidata għandha valur dokumentarju biss.

DOKUMENTI RELATATI

Ir-Regolament Delegat tal-Kummissjoni (UE) 2023/207 tal- 24 ta’ Novembru 2022 li jemenda r-Regolament (UE) 2018/848 tal-Parlament Ewropew u tal-Kunsill fir-rigward tal-mudell taċ-ċertifikat li jagħti prova tal-konformità mar-regoli dwar il-produzzjoni organika (ĠU L 29, 1.2.2023, pp. 6–10).

Ir-Regolament Delegat tal-Kummissjoni (UE) 2022/1450 tas-27 ta’ Ġunju 2022 li jissupplimenta r-Regolament (UE) 2018/848 tal-Parlament Ewropew u tal-Kunsill fir-rigward tal-użu ta’ għalf ta’ proteini mhux organiku għall-produzzjoni ta’ bhejjem organiċi minħabba l-invażjoni tar-Russja fl-Ukrajna (ĠU L 228, 2.9.2022, pp. 8–9).

Ir-Regolament ta’ Implimentazzjoni tal-Kummissjoni (UE) 2021/2325 tas-16 ta’ Diċembru 2021 li jistabbilixxi, skont ir-Regolament (UE) 2018/848 tal-Parlament Ewropew u tal-Kunsill, il-lista ta’ pajjiżi terzi u l-lista ta’ awtoritajiet ta’ kontroll u korpi ta’ kontroll li ġew rikonoxxuti skont l-Artikolu 33(2) u (3) tar-Regolament tal-Kunsill (KE) Nru 834/2007 għall-fini tal-importazzjoni ta’ prodotti organiċi fl-Unjoni (ĠU L 465, 29.12.2021, pp. 8–88).

Ara l-verżjoni konsolidata.

Ir-Regolament Delegat tal-Kummissjoni (UE) 2021/2304 tat-18 ta’ Ottubru 2021 li jissupplimenta r-Regolament (UE) 2018/848 tal-Parlament Ewropew u tal-Kunsill b’regoli dwar il-ħruġ ta’ ċertifikati komplementari li jiċċertifikaw in-nuqqas ta’ użu ta’ antibijotiċi fil-produzzjoni organika ta’ prodotti tal-annimali għall-fini ta’ esportazzjoni (ĠU L 461, 27.12.2021, pp. 2–4).

Ir-Regolament Delegat tal-Kummissjoni (UE) 2021/2305 tal-21 ta’ Ottubru 2021 li jissupplimenta r-Regolament (UE) 2017/625 tal-Parlament Ewropew u tal-Kunsill b’regoli dwar il-każijiet meta u l-kundizzjonijiet li fihom il-prodotti organiċi u l-prodotti fil-fażi ta’ konverżjoni huma eżentati mill-kontrolli uffiċjali fil-postijiet ta’ kontroll fuq il-fruntiera, fil-post tal-kontrolli uffiċjali għal tali prodotti u li jemenda r-Regolamenti Delegati tal-Kummissjoni (UE) 2019/2123 u (UE) 2019/2124 (ĠU L 461, 27.12.2021, pp. 5–12).

Ir-Regolament Delegat tal-Kummissjoni (UE) 2021/2306 tal-21 ta’ Ottubru 2021 li jissupplimenta r-Regolament (UE) 2018/848 tal-Parlament Ewropew u tal-Kunsill b’regoli dwar il-kontrolli uffiċjali fir-rigward tal-konsenji ta’ prodotti organiċi u prodotti fil-fażi tal-konverżjoni maħsuba għall-importazzjoni fl-Unjoni u dwar iċ-ċertifikat ta’ spezzjoni (ĠU L 461, 27.12.2021, pp. 13–29).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2021/2307 tal-21 ta’ Ottubru 2021 li jistabbilixxi regoli dwar id-dokumenti u n-notifiki meħtieġa għall-prodotti organiċi u l-prodotti fil-fażi ta’ konverżjoni maħsuba għall-importazzjoni fl-Unjoni (ĠU L 461, 27.12.2021, pp. 30–39).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2021/2119 tal-1 ta’ Diċembru 2021 li jistabbilixxi regoli dettaljati dwar ċerti rekords u dikjarazzjonijiet meħtieġa mill-operaturi u mill-gruppi ta’ operaturi u dwar il-mezzi tekniċi għall-ħruġ taċ-ċertifikati f’konformità mar-Regolament (UE) 2018/848 tal-Parlament Ewropew u tal-Kunsill u li jemenda r-Regolament ta’ Implimentazzjoni tal-Kummissjoni (UE) 2021/1378 fir-rigward tal-ħruġ taċ-ċertifikati għall-operaturi, għall-gruppi ta’ operaturi u għall-esportaturi fil-pajjiżi terzi (ĠU L 430, 2.12.2021, pp. 24–27).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2021/1935 tat-8 ta’ Novembru 2021 li jemenda r-Regolament ta’ Implimentazzjoni (UE) 2019/723 fir-rigward tal-informazzjoni u d-data dwar il-produzzjoni organika u t-tikkettar ta’ prodotti organiċi li jridu jitressqu permezz tal-mudell tal-formola standard (ĠU L 396, 10.11.2021, pp. 17–26).

Ir-Regolament Delegat tal-Kummissjoni (UE) 2021/1698 tat-13 ta’ Lulju 2021 li jissupplimenta r-Regolament (UE) 2018/848 tal-Parlament Ewropew u tal-Kunsill bir-rekwiżiti proċedurali għar-rikonoxximent tal-awtoritajiet ta’ kontroll u l-korpi ta’ kontroll li huma kompetenti biex iwettqu l-kontrolli fuq operaturi u gruppi ta’ operaturi ċċertifikati organiċi u fuq il-prodotti organiċi f’pajjiżi terzi u bir-regoli dwar is-superviżjoni u l-kontrolli tagħhom u azzjonijiet oħra li għandhom jitwettqu minn dawk l-awtoritajiet ta’ kontroll u l-korpi ta’ kontroll (ĠU L 336, 23.9.2021, pp. 7–41).

Ir-Regolament ta’ Implimentazzjoni tal-Kummissjoni (UE) 2021/1378 tad-19 ta’ Awwissu 2021 li jistabbilixxi ċerti regoli fir-rigward taċ-ċertifikat maħruġ lill-operaturi, lill-gruppi ta’ operaturi u lill-esportaturi f’pajjiżi terzi involuti fl-importazzjonijiet ta’ prodotti organiċi u dawk fil-fażi ta’ konverżjoni fl-Unjoni u jistabbilixxi l-lista ta’ awtoritajiet ta’ kontroll u ta’ korpi ta’ kontroll rikonoxxuti f’konformità mar-Regolament (UE) 2018/848 tal-Parlament Ewropew u tal-Kunsill (ĠU L 297, 20.8.2021, pp. 24–31).

Ara l-verżjoni konsolidata.

Ir-Regolament Delegat tal-Kummissjoni (UE) 2021/1189 tas-7 ta’ Mejju 2021 li jissupplimenta r-Regolament (UE) 2018/848 tal-Parlament Ewropew u tal-Kunsill fir-rigward tal-produzzjoni u l-kummerċjalizzazzjoni ta’ materjal riproduttiv tal-pjanti ta’ materjal organiku eteroġenu ta’ ġeneri jew speċijiet partikolari (ĠU L 258, 20.7.2021, pp. 18–27).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2021/1165 tal-15 ta’ Lulju 2021 li jawtorizza ċerti prodotti u sustanzi għall-użu fil-produzzjoni organika u li jistabbilixxi l-listi tagħhom (ĠU L 253, 16.7.2021, pp. 13–48).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2021/279 tat-22 ta’ Frar 2021 li jistabbilixxi regoli dettaljati għall-implimentazzjoni tar-Regolament (UE) 2018/848 tal-Parlament Ewropew u tal-Kunsill dwar il-kontrolli u miżuri oħra li jiżguraw it-traċċabilità u l-konformità fil-produzzjoni organika u fit-tikkettar ta’ prodotti organiċi (ĠU L 62, 23.2.2021, pp. 6–23).

Ir-Regolament Delegat tal-Kummissjoni (UE) 2021/771 tal-21 ta’ Jannar 2021 li jissupplimenta r-Regolament (UE) 2018/848 tal-Parlament Ewropew u tal-Kunsill billi jistabbilixxi kriterji u kundizzjonijiet speċifiċi għall-verifiki tal-kontijiet dokumentarji fil-qafas tal-kontrolli uffiċjali fil-produzzjoni organika u l-kontrolli uffiċjali tal-gruppi ta’ operaturi (ĠU L 165, 11.5.2021, pp. 25–27).

Ara l-verżjoni konsolidata.

Ir-Regolament Delegat tal-Kummissjoni (UE) 2020/2146 tal-24 ta’ Settembru 2020 li jissupplimenta r-Regolament (UE) 2018/848 tal-Parlament Ewropew u tal-Kunsill fir-rigward ta’ regoli ta’ produzzjoni eċċezzjonali fil-produzzjoni organika (ĠU L 428, 18.12.2020, pp. 5–8).

Ir-Regolament ta’ Implimentazzjoni tal-Kummissjoni (UE) 2020/464 tas-26 ta’ Marzu 2020 li jistabbilixxi ċerti regoli għall-applikazzjoni tar-Regolament (UE) 2018/848 tal-Parlament Ewropew u tal-Kunsill dwar id-dokumenti meħtieġa għar-rikonoxximent retroattiv tal-perjodi għall-konverżjoni, il-produzzjoni ta’ prodotti organiċi u l-informazzjoni li għandha tingħata mill-Istati Membri (ĠU L 98, 31.3.2020, pp. 2–25).

Ara l-verżjoni konsolidata.

Ir-Regolament Delegat tal-Kummissjoni (UE) 2019/2123 tal-10 ta’ Ottubru 2019 li jissupplimenta r-Regolament (UE) 2017/625 tal-Parlament Ewropew u tal-Kunsill fir-rigward tar-regoli għall-każijiet meta l-verifiki identitarji u l-verifiki fiżiċi fuq ċerti oġġetti jistgħu jitwettqu f’punti ta’ kontroll u l-verifiki dokumentarji jistgħu jitwettqu ’l bogħod mill-postijiet ta’ kontroll fuq il-fruntieri u l-kundizzjonijiet li bihom isiru dawn il-verifiki (ĠU L 321, 12.12.2019, pp. 64–72).

Ara l-verżjoni konsolidata.

Ir-Regolament Delegat Tal-Kummissjoni (UE) 2019/2124 tal-10 ta’ Ottubru 2019 li jissupplimenta r-Regolament (UE) 2017/625 tal-Parlament Ewropew u tal-Kunsill rigward ir-regoli għall-kontrolli uffiċjali ta’ kunsinni ta’ annimali u ta’ oġġetti fit-tranżitu, fit-trasbord u fit-tkomplija tat-trasport fl-Unjoni, u li jemenda r-Regolamenti tal-Kummissjoni (KE) Nru 798/2008, (KE) Nru 1251/2008, (KE) Nru 119/2009, (UE) Nru 206/2010, (UE) Nru 605/2010, (UE) Nru 142/2011, (UE) Nru 28/2012, ir-Regolament ta’ Implimentazzjoni tal-Kummissjoni (UE) 2016/759 u d-Deċiżjoni tal-Kummissjoni 2007/777/KE (ĠU L 321, 12.12.2019, pp. 73–98).

Ara l-verżjoni konsolidata.

Ir-Regolament ta’ Implimentazzjoni tal-Kummissjoni (UE) 2019/723 tat-2 ta’ Mejju 2019 li jistabbilixxi r-regoli għall-applikazzjoni tar-Regolament (UE) 2017/625 tal-Parlament Ewropew u tal-Kunsill fir-rigward tal-mudell tal-formola standard li għandu jintuża fir-rapporti annwali mressqa mill-Istati Membri (ĠU L 124, 13.5.2019, pp. 1–31).

Ara l-verżjoni konsolidata.

Ir-Regolament (UE) 2017/625 tal-Parlament Ewropew u tal-Kunsill tal-15 ta’ Marzu 2017 dwar il-kontrolli uffiċjali u attivitajiet uffiċjali oħra mwettqa biex jiżguraw l-applikazzjoni tal-liġi tal-ikel u tal-għalf, ta’ regoli dwar is-saħħa u t-trattament xieraq tal-annimali, dwar is-saħħa tal-pjanti u dwar prodotti għall-protezzjoni tal-pjanti, li jemenda r-Regolamenti (KE) Nru 999/2001, (KE) Nru 396/2005, (KE) Nru 1069/2009, (KE) Nru 1107/2009, (UE) Nru 1151/2012, (UE) Nru 652/2014, (UE) 2016/429 u (UE) 2016/2031 tal-Parlament Ewropew u tal-Kunsill, ir-Regolamenti tal-Kunsill (KE) Nru 1/2005 u (KE) Nru 1099/2009 u d-Direttivi tal-Kunsill 98/58/KE, 1999/74/KE, 2007/43/KE, 2008/119/KE u 2008/120/KE, u li jħassar ir-Regolamenti (KE) Nru 854/2004 u (KE) Nru 882/2004 tal-Parlament Ewropew u tal-Kunsill, id-Direttivi tal-Kunsill 89/608/KEE, 89/662/KEE, 90/425/KEE, 91/496/KEE, 96/23/KE, 96/93/KE u 97/78/KE u d-Deċiżjoni tal-Kunsill 92/438/KEE (Regolament dwar il-Kontrolli Uffiċjali) (ĠU L 95, 7.4.2017, pp. 1–142).

Ara l-verżjoni konsolidata.

l-aħħar aġġornament 16.03.2023