Rekwiżiti tal-ekodisinn u tat-tikkettar tal-enerġija — magni tal-ħasil tal-ħwejjeġ domestiċi u magni tal-ħasil u tat-tnixxif tal-ħwejjeġ domestiċi

PUNTI EWLENIN

Regolament (UE) 2019/2023

• Ma japplikax għall-magni tal-ħasil tal-ħwejjeġ domestiċi b’kapaċità ta’ inqas minn 2 kg u għal magni tal-ħasil u tat-tnixxif tal-ħwejjeġ domestiċi b’kapaċità ta’ 2 kg jew inqas.
• Jistabbilixxi r-rekwiżiti tal-ekodisinn fl-Anness II, li jkopru:
  • ir-rekwiżiti tal-programm, inklużi regoli dwar il-forniment ta’ programm “eco 40-60” u (għall-magni tal-ħasil u tat-tnixxif) ta’ ċiklu tal-ħasil u tat-tnixxif. Il-programm “eco 40-60” għandu jiġi stabbilit bħala l-programm awtomatiku, fejn possibbli, jew ikun disponibbli għal għażla diretta mingħajr il-ħtieġa ta’ għażla oħra bħal temperatura jew tagħbija speċifika. L-indikazzjonijiet “normali”, “ta’ kuljum”, “regolari” u “standard”, m’għandhomx jintużaw f’ismijiet ta’ programmi la waħedhom u lanqas flimkien ma’ informazzjoni oħra;
  • ċiklu tal-ħasil u tat-tnixxif;
  • l-effiċjenza enerġetika;
  • ir-rekwiżiti funzjonali (l-effiċjenza tal-ħasil u l-effikaċja tat-tlaħliħ);
  • ir-rekwiżiti dwar it-tul ta’ żmien;
  • il-konsum tal-ilma,
  • il-modalitajiet ta’ enerġija baxxa (modalità mitfija u modalità stand-by);
  • l-effiċjenza fl-użu tar-riżorsi, inkluża d-disponibbiltà tal-ispare parts, l-aċċess għall-informazzjoni dwar it-tiswija u l-manutenzjoni, l-irkupru u r-riċiklaġġ;
  • informazzjoni għall-installaturi u għall-utenti aħħarin;
• Jistabbilixxi l-proċedura ta’ valutazzjoni tal-konformità: l-awtoritajiet nazzjonali għandhom japplikaw il-proċeduri ta’ verifika stabbiliti fl-Anness IV meta jwettqu l-kontrolli tas-sorveljanza tas-suq, u l-metodi u l-kalkoli tal-kejl li għandhom jiġu segwiti, fl-Anness III.
• Fl-Anness V jistabbilixxi parametri referenzjarji indikattivi bbażati fuq il-prodotti u t-teknoloġiji bl-aqwa rendiment disponibbli għal tali apparat f’termini tal-konsum tal-ilma u tal-enerġija, l-effiċjenza tal-ħasil u tal-emissjonijiet ta’ storbju akustiku fl-arja.
• Il-Kummissjoni Ewropea għandha tirrevedi r-regolament fid-dawl tal-progress teknoloġiku u tivvaluta għadd ta’ aspetti, bħar-rekwiżiti għat-tnaqqis tal-mikroplastiċi, 6 snin wara li jidħol fis-seħħ.

Ir-Regolament Delegat (UE) 2019/2014

• Dan l-att delegat jistabbilixxi l-klassi tal-effiċjenza enerġetika, il-klassi tal-effiċjenza tat-tnixxif bit-tidwir u l-klassi tal-emissjoni ta’ storbju akustiku fl-arja li huma bbażati fuq indiċi fl-Anness II.
• Tistabbilixxi obbligi fuq il-fornituri, inkluż biex jiġi żgurat li:
  • kull magna tal-ħasil tal-ħwejjeġ domestika u kull magna tal-ħasil u tat-tnixxif tal-ħwejjeġ domestika tkun fornuta b’tikketta stampata fil-format kif stabbilit fl-Anness III u, għal magna tal-ħasil tal-ħwejjeġ domestika b’diversi tnabar jew għal magna tal-ħasil u tat-tnixxif domestika b’diversi tnabar, skont l-Anness X;
  • il-parametri tal-iskeda tal-informazzjoni dwar il-prodott (Annes V) u tad-dokumentazzjoni teknika (Anness VI) jiddaħħlu fil-bażi tad-data tal-prodott;
  • ttikketta elettronika fil-format u bl-informazzjoni kif stabbilit fl-Anness III tkun disponibbli għan-negozjanti għal kull mudell ta’ magna tal-ħasil tal-ħwejjeġ domestika jew ta’ magna tal-ħasil u tat-tnixxif tal-ħwejjeġ domestika.
• Jistabbilixxi obbligi fuq in-negozjanti, inkluż li jiżgura li:
  • kull apparat għall-bejgħ ikollu tikketta mogħtija mill-fornituri viżibbli b’mod ċar f’konformità mal-Anness III;
  • fil-każ ta’ bejgħ mill-bogħod, it-tikketta u l-iskeda tal-informazzjoni dwar il-prodott ikunu konformi mal-Annessi VII u VIII.
• Il-pjattaformi ta’ hosting tal-internet għandhom jiżguraw li t-tikketta elettronika u l-iskeda elettronika tal-informazzjoni dwar il-prodott mogħtija min-negozjant huma murija b’mod ċar, skont l-Anness VIII, fuq kull tali apparat mibjugħ direttament permezz tas-sit.
• L-awtoritajiet nazzjonali japplikaw il-proċedura ta’ verifika stipulata fl-Anness IX meta jwettqu kontrolli tas-sorveljanza tas-suq.
• Il-Kummissjoni għandha tirrevedi r-Regolament Delegat fid-dawl tal-progress teknoloġiku 6 snin wara d-dħul fis-seħħ inkluż il-possibilità li jiġu indirizzati l-objettivi tal-ekonomija ċirkolari.

MINN META JAPPLIKAW IR-REGOLAMENTI?

It-tnejn li huma jibdew japplikaw mill-1 ta’ Marzu 2021.