Appendiċi 3

Proporzjon tal-prestazzjoni waqt l-użu

1.   Introduzzjoni

1.1.   Dan l-Appendiċi jistabbilixxi l-proporzjon tal-prestazzjoni waqt l-użu ta' moniter speċifiku M tar-rekwiżiti tas-sistemi OBD (IUPR M) għal vetturi L3e, L5e-A u L7e-A b'approvazzjoni tat-tip skont dan ir-Regolament.

2.   Verifika tal-IUPR M

2.1.   Fuq talba tal-awtorità tal-approvazzjoni, il-manifattur għandu jirrapporta lill-awtorità tal-approvazzjoni tat-tip dwar talbiet waqt il-garanzija, xogħlijiet ta' tiswija waqt il-garanzija u ħsarat fl-OBD irrekordjati waqt il-manutenzjoni, skont format maqbul fl-approvazzjoni tat-tip. L-informazzjoni għandha tispjega fid-dettall il-frekwenza u s-sustanza tal-ħsarat għal komponenti u għal sistemi marbuta mal-emissjonijiet. Ir-rapporti għandhom jiġu ppreżentati minn tal-inqas darba fiċ-ċiklu ta' produzzjoni tal-vettura, għal kull mudell ta' vettura għad-durata ta' ħames snin mill-produzzjoni jew għad-distanza kif stabbilit fl-Anness VII(A) tar-Regolament (UE) Nru 168/2013, skont liema minnhom tiġi l-ewwel.

2.2.   Parametri li jiddefinixxu l-familja tal-IUPR

Għad-definizzjoni tal-familja tal-IUPR, għandhom jintużaw il-parametri tal-familja tal-OBD elenkati fl-Appendiċi 5.

2.3.   Rekwiżiti ta' informazzjoni

Il-verifika tal-IUPR M issir mill-awtorità tal-approvazzjoni abbażi tal-informazzjoni pprovduta mill-manifattur. B'mod partikolari, din l-informazzjoni għandha tinkludi dan li ġej:

2.3.1.

L-isem u l-indirizz tal-manifattur;

2.3.2.

L-isem, l-indirizz, in-numri tat-telefon u tal-faks u l-indirizz tal-posta elettronika tar-rappreżentant awtorizzat tiegħu fl-oqsma koperti mill-informazzjoni tal-manifattur;

2.3.3.

L-isem/ismijiet tal-mudell(i) tal-vetturi inklużi fl-informazzjoni tal-manifattur;

2.3.4.

Meta jkun xieraq, il-lista tat-tipi ta' vetturi koperti mill-informazzjoni tal-manifattur, jiġifieri għall-OBD u għall-IUPR M, il-familja tal-OBD skont l-Appendiċi 5;

2.3.5.

Il-kodiċijiet tan-numru ta' identifikazzjoni tal-vettura (VIN) applikabbli għal dawn it-tipi ta' vetturi fil-familja (il-prefiss tal-VIN);

2.3.6.

In-numri tal-approvazzjonijiet tat-tip applikabbli għal dawn it-tipi ta' vetturi fil-familja tal-IUPR, inklużi, meta jkun applikabbli, in-numri tal-estensjonijiet kollha u tat-tiswijiet fil-post/tas-sejħiet lura (minħabba difetti mill-fabbrika);

2.3.7.

Id-dettalji tal-estensjonijiet, tat-tiswijiet fil-post/tas-sejħiet lura għal dawk l-approvazzjonijiet tat-tip għall-vetturi koperti mill-informazzjoni tal-manifattur (jekk jintalbu mill-awtorità tal-approvazzjoni);

2.3.8.

Il-perjodu ta' żmien li matulu nġabret l-informazzjoni tal-manifattur;

2.3.9.

Il-perjodu tal-bini tal-vettura kopert mill-informazzjoni tal-manifattur (eż. il-vetturi mmanifatturati matul is-sena kalendarja tal-2017);

2.3.10.

Il-proċedura ta' kontroll tal-IUPR M tal-manifattur, inklużi: (a) il-metodu biex tinstab il-vettura; (b) il-kriterji tal-għażla u tal-esklużjoni tal-vettura; (c) it-tipi ta' testijiet u l-proċeduri li ntużaw għall-programm; (d) il-kriterji tal-aċċettazzjoni/tal-esklużjoni tal-manifattur għall-grupp tal-familja; (e) iż-żona/i ġeografika/ġeografiċi mnejn il-manifattur ġabar l-informazzjoni; (f) id-daqs tal-kampjun u l-pjan tal-kampjunar li ntużaw.

2.3.11.

Ir-riżultati mill-proċedura tal-IUPR M tal-manifattur, inklużi: (a) l-identifikazzjoni tal-vetturi inklużi fil-programm (kemm jekk ittestjati u kemm jekk le). L-identifikazzjoni għandha tinkludi dawn li ġejjin: — l-isem tal-mudell; — in-numru ta' identifikazzjoni tal-vettura (VIN); — ir-reġjun tal-użu (meta jkun magħruf); — id-data tal-manifattura. (b) ir-raġuni(jiet) għall-esklużjoni ta' vettura mill-kampjun; (c) id-dejta tat-test, inklużi dawn li ġejjin: — id-data tat-test/tat-tniżżil; — il-post li fih sar it-test/it-tniżżil; — id-dejta kollha, kif meħtieġ skont il-punt 4.1.6. tal-Appendiċi 1, imniżżla mill-vettura; — il-proporzjon tal-prestazzjoni waqt l-użu għal kull moniter li jrid jiġi rrappurtat.

2.3.12.

Għall-kampjunar tal-IUPR M, dan li ġej: (a) il-medja tal-proporzjonijiet tal-prestazzjoni waqt l-użu tal-IUPR M tal-vetturi magħżula kollha għal kull moniter skont il-punt 4.1.4. tal-Appendiċi 1. (b) Il-persentaġġ ta' vetturi magħżula, li jkollhom IUPR M li jkun ≥ mill-/il-valur minimu applikabbli għall-moniter skont il-punt 4.1.4. tal-Appendiċi 1.

3.   Għażla tal-vetturi għall-IUPR M

3.1.   Il-kampjunar tal-manifattur għandu jittieħed minn tal-inqas minn żewġ Stati Membri b'kundizzjonijiet operattivi tal-vetturi li jkunu sostanzjalment differenti (sakemm ma jkunux disponibbli biss fis-suq ta' Stat Membru wieħed). Fl-għażla tal-Istati Membri għandhom jitqiesu fatturi bħad-differenzi fil-fjuwils, il-kundizzjonijiet ambjentali, il-veloċitajiet medji fit-toroq, u d-diverġenza bejn is-sewqan urban u s-sewqan fl-awtostrada.

Għall-ittestjar tal-IUPR M, għandhom jiġu inklużi fil-kampjun tat-test dawk il-vetturi biss li jissodisfaw il-kriterji tal-punt. 2.3. tal-Appendiċi 4.

3.2.   Fl-għażla tal-Istati Membri għall-kampjunar tal-vetturi, il-manifattur jista' jagħżel vetturi minn Stat Membru li jitqies bħala partikolarment rappreżentattiv. F'dan il-każ, il-manifattur għandu juri lill-awtorità tal-approvazzjoni li tat l-approvazzjoni tat-tip li l-għażla hija rappreżentattiva (eż. billi s-suq ikollu l-ikbar bejgħ annwali ta' familja ta' vetturi fl-Unjoni). Meta familja teħtieġ li jiġi ttestjat iktar minn lott wieħed ta' kampjuni, kif ġie ddefinit fil-punt 3.3., il-vetturi fit-tieni u fit-tielet lottijiet ta' kampjuni għandhom jirriflettu kundizzjonijiet operattivi tal-vetturi differenti minn dawk magħżula għall-ewwel kampjun.

3.3.   Daqs tal-kampjun

3.3.1.   In-numru ta' lottijiet ta' kampjuni għandu jiddependi fuq il-volum ta' bejgħ annwali ta' familja tal-OBD fl-Unjoni, kif ġie ddefinit fit-tabella li ġejja:

Reġistrazzjonijiet fl-UE kull sena kalendarja (għal testijiet tal-emissjonijiet tat-tailpipe), ta' vetturi ta' familja OBD b'IUPR fil-perjodu ta' kampjunar	Numru ta' lottijiet ta' kampjuni
sa 100 000	1
minn 100 001 sa 200 000	2
iżjed minn 200 000	3

3.3.2.   Għall-IUPR, in-numru ta' lottijiet ta' kampjuni li jrid jittieħed huwa deskritt fit-tabella tal-punt 3.3.1. u huwa bbażat fuq in-numru ta' vetturi ta' familja tal-IUPR li huma approvati b'IUPR.

Għall-ewwel perjodu ta' kampjunar ta' familja tal-IUPR, it-tipi kollha ta' vetturi fil-familja li huma approvati b'IUPR għandhom jitqiesu bħala soġġetti għall-kampjunar. Għall-perjodi sussegwenti ta' kampjunar, huma biss it-tipi ta' vetturi li ma kinux ġew ittestjati qabel jew li huma koperti minn approvazzjonijiet tal-emissjonijiet li ġew estiżi mill-perjodu ta' kampjunar preċedenti li għandhom jitqiesu bħala soġġetti għall-kampjunar.

Għal familji li jikkonsistu minn inqas minn 5 000 reġistrazzjoni fl-UE li huma soġġetti għall-kampjunar fil-perjodu ta' kampjunar, in-numru minimu ta' vetturi f'lott ta' kampjuni huwa sitta. Għall-familji l-oħra kollha, in-numru minimu ta' vetturi f'lott ta' kampjuni li jrid jiġi kkampjunat huwa ħmistax.

Kull lott ta' kampjuni għandu jirrappreżenta b'mod adegwat il-mudell tal-bejgħ, jiġifieri minn tal-inqas għandhom jiġu rrappreżentati t-tipi ta' vetturi b'volum għoli (≥ 20 % tat-total tal-familja).

Il-vetturi ta' produzzjonijiet ta' serje żgħar b'inqas minn 1 000 vettura għal kull familja tal-OBD huma eżentati mir-rekwiżiti minimi tal-IUPR kif ukoll mir-rekwiżit li juru dawn lill-awtorità tal-approvazzjoni tat-tip.

4.   Abbażi tal-verifika msemmija fit-Taqsima 2, l-awtorità tal-approvazzjoni għandha tadotta waħda mid-deċiżjonijiet u mill-azzjonijiet li ġejjin:

(a)	tiddeċiedi li l-familja tal-IUPR hija sodisfaċenti u ma tieħu l-ebda azzjoni ulterjuri;

(b)	tiddeċiedi li d-dejta pprovduta mill-manifattur mhijiex biżżejjed biex tittieħed deċiżjoni u titlob informazzjoni addizzjonali jew dejta addizzjonali tat-test mingħand il-manifattur;

(c)

tiddeċiedi li abbażi tad-dejta mill-programmi tal-ittestjar tas-sorveljanza tal-awtorità tal-approvazzjoni jew tal-Istat Membru, dik l-informazzjoni pprovduta mill-manifattur mhijiex biżżejjed biex tittieħed deċiżjoni u titlob informazzjoni addizzjonali jew dejta addizzjonali tat-test mingħand il-manifattur;

(d)	tiddeċiedi li l-eżitu tal-verifika għall-familja tal-IUPR mhuwiex sodisfaċenti u tipproċedi biex tali tip ta' vettura jew familja tal-IUPR jiġu ttestjati skont l-Appendiċi 1.

Jekk skont il-verifika IUPR M, il-kriterji tat-test tal-punt 3.2. tal-Appendiċi 4 jiġu ssodisfati għall-vetturi f'lott ta' kampjuni, l-awtorità tal-approvazzjoni tat-tip trid tieħu l-azzjoni ulterjuri deskritta fil-punt (d) ta' dan il-punt.

4.1.   L-awtorità tal-approvazzjoni, f'kooperazzjoni mal-manifattur, għandha tagħżel kampjun ta' vetturi b'biżżejjed kilometraġġ u li l-użu tagħhom f'kundizzjonijiet normali jista' jiġi żgurat b'mod raġonevoli. Il-manifattur għandu jiġi kkonsultat dwar l-għażla tal-vetturi fil-kampjun u jitħalla jattendi għall-kontrolli konfermatorji tal-vetturi.

Appendiċi 4

Kriterji tal-għażla għal vetturi fir-rigward tal-proporzjonijiet tal-prestazzjoni waqt l-użu

1.   Introduzzjoni

1.1.   Dan l-Appendiċi jistabbilixxi l-kriterji msemmija fit-Taqsima 4 tal-Appendiċi 1 ta' dan l-Anness fir-rigward tal-għażla ta' vetturi għall-ittestjar u għall-proċeduri għal IUPR M.

2.   Kriterji tal-għażla

Il-kriterji għall-aċċettazzjoni ta' vettura magħżula huma ddefiniti għal IUPR M fit-Taqsimiet 2.1. sa 2.5.

2.1.   Il-vettura għandha tappartjeni għal tip ta' vettura bl-approvazzjoni tat-tip skont dan ir-Regolament u tkun koperta b'ċertifikat ta' konformità skont ir-Regolament ta' Implimentazzjoni (UE) Nru 901/2014 (3). Għall-kontroll tal-IUPR M, il-vettura għandha tkun approvata għall-istandard OBD tal-istadju II jew ta' wara. Din għandha tkun irreġistrata u ntużat fl-Unjoni.

2.2.   Il-vettura għandha tkun ilha tintuża għal minn tal-inqas 3 000 km jew għal sitt xhur, skont liema minnhom jiġi wara, u għal mhux iżjed mill-kilometraġġi ta' durabbiltà mogħtija għall-kategorija rilevanti ta' vetturi msemmija fl-Anness VII(A) tar-Regolament (UE) Nru 168/2013 jew għal ħames snin, skont liema minnhom jiġi l-ewwel.

2.3.   Għall-kontroll tal-IUPR M, il-kampjun tat-test għandu jinkludi biss vetturi li:

(a)

ġabru biżżejjed dejta dwar it-tħaddim tal-vettura biex il-moniter jiġi ttestjat. Fil-każ ta' moniters meħtieġa biex jiġi ssodisfat il-proporzjon tal-prestazzjoni waqt l-użu tal-moniter u biex tiġi ttraċċata u rrappurtata d-dejta dwar il-proporzjon skont il-punt 4.6.1. tal-Appendiċi 1, biżżejjed dejta dwar it-tħaddim tal-vettura għandha tfisser li d-denominatur jissodisfa l-kriterji stabbiliti hawn taħt. Sabiex il-moniter jiġi ttestjat, id-denominatur, kif iddefinit fil-punti 4.3. u 4.5. tal-Appendiċi 1, irid ikollu valur ugwali jew ikbar minn wieħed mill-valuri li ġejjin: (i) 15 fil-każ ta' moniters tas-sistema evaporattiva, moniters tas-sistema tal-arja sekondarja, u moniters li jużaw denominatur inkrimentat skont il-punt 4.3.2. tal-Appendiċi 1 (eż. moniters tal-istartjar b'magna kiesħa, moniters tas-sistema tal-arja kkondizzjonata, eċċ.); jew (ii) 5 fil-każ ta' moniters tal-filtru tal-materja partikulata u moniters tal-katalizzatur tal-ossidazzjoni li jużaw denominatur inkrimentat skont il-punt 4.3.2. tal-Appendiċi 1; jew (iii) 30 fil-każ ta' moniters tal-katalizzatur, tas-sensur tal-ossiġenu, tal-EGR, tal-VVT u għal kull moniter ieħor tal-komponenti.

(b)	ma jkunux ġew imbagħbsa jew mgħammra b'partijiet miżjuda jew immodifikati li jwasslu biex is-sistema tal-OBD ma tikkonformax mar-rekwiżiti tal-Anness XII.

2.3.   Jekk tkun saret xi manutenzjoni, din għandha tkun skont l-intervalli rrakkomandati mill-manifattur għall-manutenzjoni.

2.4.   Il-vettura ma għandha turi l-ebda indikazzjoni ta' abbuż (eż. tlielaq, tagħbija eċċessiva, alimentazzjoni bi fjuwil ħażin, jew użu ħażin ieħor), jew ta' fatturi oħra (eż. tbagħbis) li jistgħu jaffettwaw il-prestazzjoni tal-emissjonijiet. Għandhom jitqiesu l-kodiċi tal-ħsara u l-informazzjoni dwar il-kilometraġġ maħżuna fil-kompjuter. Vettura ma għandhiex tintgħażel għall-ittestjar jekk l-informazzjoni maħżuna fil-kompjuter turi li l-vettura tħaddmet wara li nħażen xi kodiċi tal-ħsara u li ma saritx tiswija relattivament fil-pront.

2.5.   Ma għandhiex tkun saret xi tiswija maġġuri mhux awtorizzata fuq il-magna jew xi tiswija maġġuri tal-vettura.

3.   Pjan tal-miżuri ta' rimedju

3.1.   L-awtorità tal-approvazzjoni tat-tip għandha titlob lill-manifattur jippreżenta pjan tal-miżuri ta' rimedju biex jiġi rrimedjat in-nuqqas ta' konformità meta:

3.2.   Għall-IUPR M ta' moniter M partikolari, il-kundizzjonijiet statistiċi li ġejjin ikunu ssodisfati f'kampjun tat-test, li d-daqs tiegħu jkun iddeterminat skont il-punt 3.3.1. tal-Appendiċi 3.

Għall-vetturi ċċertifikati għal proporzjon ta' 0,1 skont il-punt 4.1.4. tal-Appendiċi 1, id-dejta miġbura mill-vetturi tindika għal minn tal-inqas moniter M wieħed fil-kampjun tat-test, jew li l-proporzjon medju tal-prestazzjoni waqt l-użu tal-kampjun tat-test huwa inqas minn 0,1 jew inkella li 66 fil-mija jew iktar tal-vetturi fil-kampjun tat-test għandhom proporzjon tal-prestazzjoni waqt l-użu tal-moniter ta' inqas minn 0,1.

3.3.   Il-pjan tal-miżuri ta' rimedju għandu jiġi ppreżentat lill-awtorità tal-approvazzjoni tat-tip mhux iktar tard minn 60 jum tax-xogħol mid-data tan-notifika msemmija fil-punt 3.1. Fi żmien 30 jum tax-xogħol, l-awtorità tal-approvazzjoni tat-tip għandha tiddikjara l-approvazzjoni jew id-diżapprovazzjoni tagħha fir-rigward tal-pjan tal-miżuri ta' rimedju. Madankollu, għandha tingħata estensjoni meta l-manifattur ikun jista' juri, għas-sodisfazzjon tal-awtorità kompetenti tal-approvazzjoni tat-tip, li hemm bżonn ta' iktar żmien għall-investigazzjoni tan-nuqqas ta' konformità sabiex jiġi ppreżentat pjan tal-miżuri ta' rimedju.

3.4.   Il-miżuri ta' rimedju għandhom japplikaw għall-vetturi kollha li x'aktarx jiġu affettwati mill-istess difett. Il-ħtieġa li jiġu emendati d-dokumenti tal-approvazzjoni tat-tip għandha tiġi vvalutata.

3.5.   Il-manifattur għandu jipprovdi kopja tal-komunikazzjonijiet kollha relatati mal-pjan tal-miżuri ta' rimedju, u għandu jżomm ukoll rekord tal-kampanja tas-sejħiet lura, u jipprovdi rapporti ta' status regolari lill-awtorità tal-approvazzjoni tat-tip.

3.6.   Il-pjan tal-miżuri ta' rimedju għandu jinkludi r-rekwiżiti speċifikati fil-punti 3.6.1. sa 3.6.11. Il-manifattur għandu jassenja isem jew numru uniku ta' identifikazzjoni lill-pjan tal-miżuri ta' rimedju.

3.6.1.   Deskrizzjoni ta' kull tip ta' vettura inkluż fil-pjan tal-miżuri ta' rimedju.

3.6.2.   Deskrizzjoni tal-modifiki, tal-alterazzjonijiet, tat-tiswijiet, tal-korrezzjonijiet, tal-aġġustamenti speċifiċi, jew ta' bidliet oħra li jridu jsiru biex il-vetturi jkunu konformi, inkluż sommarju qasir tad-dejta u tal-istudji tekniċi li jappoġġaw id-deċiżjoni tal-manifattur fir-rigward tal-miżuri partikolari li jridu jittieħdu biex jiġi rrimedjat in-nuqqas ta' konformità.

3.6.3.   Deskrizzjoni tal-metodu li permezz tiegħu l-manifattur jinforma lis-sidien tal-vetturi.

3.6.4.   Deskrizzjoni tal-manutenzjoni xierqa jew tal-użu xieraq, jekk ikun hemm, li l-manifattur jistipula bħala kundizzjoni ta' eliġibbiltà għal tiswija skont il-pjan tal-miżuri ta' rimedju, u spjegazzjoni tar-raġunijiet għaliex il-manifattur impona kwalunkwe kundizzjoni bħal din. Ma tista' tiġi imposta l-ebda kundizzjoni fuq il-manutenzjoni jew l-użu sakemm ma jkunx jista' jintwera li hija relatata man-nuqqas ta' konformità u mal-miżuri ta' rimedju.

3.6.5.   Deskrizzjoni tal-proċedura li trid tiġi segwita mis-sidien tal-vetturi biex jiġi rrimedjat in-nuqqas ta' konformità. Din għandha tinkludi data li warajha jistgħu jittieħdu l-miżuri ta' rimedju, iż-żmien stmat biex il-workshop iwettaq it-tiswijiet u fejn dawn jistgħu jsiru. It-tiswija għandha ssir malajr, fi żmien raġonevoli wara li tiġi kkonsenjata l-vettura.

3.6.6.   Kopja tal-informazzjoni trażmessa lis-sid tal-vettura.

3.6.7.   Deskrizzjoni qasira tas-sistema li juża l-manifattur biex jiżgura provvista adegwata ta' komponenti jew ta' sistemi biex ikun jista' jwettaq l-azzjoni ta' rimedju. Għandu jiġi indikat meta se jkun hemm provvista adegwata ta' komponenti jew ta' sistemi biex tinbeda l-kampanja.

3.6.8.   Kopja tal-istruzzjonijiet kollha trid tintbagħat lil dawk il-persuni li jkunu se jagħmlu t-tiswija.

3.6.9.   Deskrizzjoni tal-impatt tal-miżuri ta' rimedju proposti fuq l-emissjonijiet, il-konsum tal-fjuwil, l-abbiltà tas-sewqan u s-sikurezza ta' kull tip ta' vettura, koperti mill-pjan tal-miżuri ta' rimedju b'dejta, studji tekniċi, eċċ. li jappoġġaw dawn il-konklużjonijiet.

3.6.10.   Kwalunkwe informazzjoni, rapport jew dejta oħra li l-awtorità tal-approvazzjoni tat-tip tista' tiddetermina b'mod raġonevoli li huma meħtieġa biex jiġi evalwat il-pjan tal-miżuri ta' rimedju.

3.6.11.   Meta l-pjan tal-miżuri ta' rimedju jinkludi sejħa lura, għandha tiġi ppreżentata lill-awtorità tal-approvazzjoni tat-tip deskrizzjoni tal-metodu biex ikun hemm rekord tat-tiswija. Jekk tintuża tikketta, għandu jiġi ppreżentat eżempju tagħha.

3.7.   Il-manifattur jista' jintalab iwettaq testijiet iddisinjati b'mod raġonevoli u meħtieġa fuq komponenti u fuq vetturi li jinkorporaw bidla, tiswija jew modifika proposta biex tintwera l-effettività tal-bidla, tat-tiswija jew tal-modifika.

3.8.   Il-manifattur huwa responsabbli milli jżomm rekord ta' kull vettura li tissejjaħ lura u tissewwa u tal-workshop li jagħmel it-tiswija. L-awtorità tal-approvazzjoni tat-tip għandu jkollha aċċess għar-rekord meta titolbu għal perjodu ta' ħames snin mill-implimentazzjoni tal-pjan tal-miżuri ta' rimedju.

3.9.   It-tiswija u/jew il-modifika jew iż-żieda ta' tagħmir ġdid għandhom jiġu rrekordjati f'ċertifikat ipprovdut mill-manifattur lis-sid tal-vettura.

Appendiċi 5

Familja tad-dijanjostika abbord

1.   Introduzzjoni

1.1.   Dan l-Appendiċi jistabbilixxi l-kriterji biex tiġi ddefinita familja tal-OBD kif imsemmi fl-Appendiċijiet 3 u 4

2.   Kriterji tal-għażla

It-tipi ta' vetturi li għalihom minn tal-inqas il-parametri deskritti hawn taħt huma identiċi jitqiesu li jappartjenu għall-istess kombinazzjoni ta' magna/kontroll tal-emissjonijiet/sistema tal-OBD.

2.2.   Magna:

—	il-proċess ta' kombustjoni (jiġifieri positive ignition/tqabbid bil-kompressjoni, two stroke/four stroke/rotatorja),

—	il-metodu ta' alimentazzjoni tal-magna (jiġifieri injezzjoni tal-fjuwil minn punt wieħed jew minn diversi punti),

—	it-tip ta' fjuwil (jiġifieri petrol, diżil, flex fjuwil petrol/etanol, flex fjuwil diżil/bijodiżil, NG/bijometan, LPG, petrol/NG/bijometan b'żewġ fjuwils, petrol/LPG b'żewġ fjuwils),

2.3.   Sistema ta' kontroll tal-emissjonijiet:

—	it-tip ta' konvertitur katalitiku (jiġifieri katalizzatur tal-ossidazzjoni, katalizzatur tridirezzjonali, katalizzatur imsaħħan, SCR, katalizzatur ieħor),

—	it-tip ta' filtru tal-materja partikulata,

—	l-injezzjoni tal-arja sekondarja (jiġifieri biha jew mingħajrha),

—	ir-riċirkolazzjoni tal-gassijiet tal-egżost (jiġifieri biha jew mingħajrha),

2.4.   Partijiet u funzjonament tal-OBD:

—	il-metodi tal-monitoraġġ funzjonali tal-OBD, tal-individwazzjoni tal-ħsarat u tal-indikazzjoni tal-ħsarat lis-sewwieq tal-vettura.

Appendiċi 3

Test tad-durabbiltà tat-tiqdim fuq il-bank

1.   Test tad-durabbiltà tat-tiqdim fuq il-bank

1.1.   Il-vettura ttestjata skont il-proċedura stabbilita f'dan l-appendiċi tkun akkumulat iżjed minn 100 km wara li tkun ġiet startjata fi tmiem il-linja tal-produzzjoni.

1.2.   Il-fjuwil li ntuża matul it-test għandu jkun wieħed mill-fjuwils speċifikati fl-Appendiċi 2 tal-Anness II.

2.   Proċedura għall-Vetturi b'Magni Positive Ignition

2.1.   Il-proċedura li ġejja tat-tiqdim fuq il-bank għandha tkun applikabbli għall-vetturi positive ignition, inklużi l-vetturi ibridi li jużaw katalizzatur bħala l-apparat prinċipali għall-kontroll tal-emissjonijiet wara t-trattament.

Il-proċedura tat-tiqdim fuq il-bank teħtieġ l-installazzjoni tas-sistema tal-katalizzatur flimkien mas-sensur tal-ossiġenu fuq bank tat-tiqdim tal-katalizzatur.

It-tiqdim fuq il-bank għandu jitwettaq billi jiġi segwit iċ-ċiklu standard tal-bank (SBC) għall-perjodu ta' ħin ikkalkulat mill-ekwazzjoni tal-ħin tat-tiqdim fuq il-bank (BAT). L-ekwazzjoni tal-BAT teħtieġ, bħala input, dejta dwar il-ħin f'tali temperatura tal-katalizzatur imkejla matul iċ-Ċiklu Standard tat-Triq (SRC-LeCV) deskritt fl-Appendiċi 1. Bħala alternattiva, jekk ikun applikabbli, tista' tintuża d-dejta dwar il-ħin f'tali temperatura tal-katalizzatur imkejla matul iċ-ċiklu tad-durabbiltà AMA, kif deskritt fl-Appendiċi 2.

2.2.   Ċiklu standard tal-bank (SBC). It-tiqdim standard tal-katalizzatur fuq il-bank għandu jitwettaq billi jiġi segwit l-SBC. L-SBC għandu jitwettaq għall-perjodu ta' ħin ikkalkulat mill-ekwazzjoni tal-BAT. L-SBC huwa deskritt fl-Appendiċi 4.

2.3.   Dejta dwar il-ħin f'tali temperatura tal-katalizzatur. It-temperatura tal-katalizzatur għandha titkejjel waqt minn tal-inqas żewġ ċikli sħaħ taċ-ċiklu tal-SRC-LeCV kif deskritt fl-Appendiċi 1, jew jekk ikun applikabbli, waqt minn tal-inqas żewġ ċikli sħaħ ta' AMA kif deskritt fl-Appendiċi 2.

It-temperatura tal-katalizzatur għandha titkejjel fil-post bl-ogħla temperatura fl-iżjed katalizzatur jikwi fil-vettura tat-test. Alternattivament, it-temperatura tista' titkejjel f'post ieħor diment li tiġi aġġustata sabiex tirrappreżenta t-temperatura mkejla fl-iżjed post jikwi filwaqt li jintuża ġudizzju inġineristiku tajjeb.

It-temperatura tal-katalizzatur għandha titkejjel b'rata minima ta' hertz wieħed (kejl wieħed fis-sekonda).

Ir-riżultati tat-temperatura mkejla tal-katalizzatur għandhom jiġu ttabulati f'istogramma bi gruppi ta' temperaturi li ma jkunux ikbar minn 25 °C.

2.4.   Ħin tat-tiqdim fuq il-bank. Il-ħin tat-tiqdim fuq il-bank għandu jiġi kkalkulat billi tintuża l-ekwazzjoni tal-ħin tat-tiqdim fuq il-bank (BAT) kif ġej:

te għal bin ta' temperaturi = th e((R/Tr) – (R/Tv))

Total ta' te = is-somma ta' te fuq il-gruppi kollha ta' temperaturi

ħin tat-tiqdim fuq il-bank = A (Total ta' te)

Fejn:

A	=	1,1 Dan il-valur jaġġusta l-ħin tat-tiqdim tal-katalizzatur biex titqies id-deterjorazzjoni minn sorsi li mhumiex it-tiqdim termali tal-katalizzatur.
R	=	Reattività termali tal-katalizzatur = 18 500
th	=	Il-ħin (f'sigħat) imkejjel fil-bin ta' temperaturi preskritti tal-istogramma tat-temperaturi tal-katalizzatur tal-vettura aġġustat għal bażi ta' ħajja utli sħiħa, eż. jekk l-istogramma kienet tirrappreżenta 400 km, u l-ħajja utli skont l-Anness VII tar-Regolament (UE) Nru 168/2013 hija ta' 20 000 km, pereżempju għal-Le3; l-entrati kollha tal-ħin fl-istogramma jiġu mmultiplikati b'50 (20 000 /400).
Total ta' te	=	Il-ħin ekwivalenti (f'sigħat) għat-tiqdim tal-katalizzatur fit-temperatura ta' Tr fuq il-bank tat-tiqdim tal-katalizzatur billi jintuża ċ-ċiklu tat-tiqdim tal-katalizzatur biex jiġi prodott l-istess ammont ta' deterjorazzjoni li esperjenza l-katalizzatur minħabba d-deattivazzjoni termali tul l-użu għal distanza speċifika fil-ħajja utli għall-klassi ta' vetturi fl-Anness VII tar-Regolament (UE) Nru 168/2013, pereżempju għal 20 000 km għal-Le3.
te għal bin ta' temperaturi	=	Il-ħin ekwivalenti (f'sigħat) għat-tiqdim tal-katalizzatur fit-temperatura ta' Tr fuq il-bank tat-tiqdim tal-katalizzatur billi jintuża ċ-ċiklu tat-tiqdim tal-katalizzatur biex jiġi prodott l-istess ammont ta' deterjorazzjoni li esperjenza l-katalizzatur minħabba d-deattivazzjoni termali fil-bin ta' temperaturi ta' Tv tul l-użu għal distanza speċifika fil-ħajja utli għall-klassi ta' vetturi fl-Anness VII tar-Regolament (UE) Nru 168/2013, pereżempju għal 20 000 km għal-Le3.
Tr	=	It-temperatura effettiva ta' referenza (f'°K) tal-katalizzatur għas-sekwenza fuq il-bank tal-katalizzatur fiċ-ċiklu tat-tiqdim fuq il-bank. It-temperatura effettiva hija t-temperatura kostanti li tirriżulta fl-istess ammont ta' tiqdim bħad-diversi temperaturi li jkunu ġew esperjenzati matul iċ-ċiklu tat-tiqdim fuq il-bank.
Tv	=	It-temperatura fil-punt tan-nofs (f'°K) tal-bin ta' temperaturi tal-istogramma tat-temperaturi tal-katalizzatur tal-vettura fit-triq.

2.5.   Temperatura effettiva ta' referenza fiċ-ċiklu standard tal-bank (SBC). It-temperatura effettiva ta' referenza tal-SBC għandha tiġi ddeterminata għad-disinn reali tas-sistema tal-katalizzatur u għall-bank reali tat-tiqdim li jkunu se jintużaw permezz tal-proċeduri li ġejjin:

(a)

Kejjel id-dejta dwar il-ħin f'tali temperatura fis-sistema tal-katalizzatur fuq il-bank tat-tiqdim tal-katalizzatur billi ssegwi l-SBC. It-temperatura tal-katalizzatur għandha titkejjel fil-post bl-ogħla temperatura tal-iżjed katalizzatur jikwi fis-sistema. Alternattivament, it-temperatura tista' titkejjel f'post ieħor diment li tiġi aġġustata biex tirrappreżenta t-temperatura mkejla fl-iżjed post jikwi. It-temperatura tal-katalizzatur għandha titkejjel b'rata minima ta' hertz wieħed (kejl wieħed fis-sekonda) matul minn tal-inqas 20 minuta ta' tiqdim fuq il-bank. Ir-riżultati tat-temperatura mkejla tal-katalizzatur għandhom jiġu ttabulati f'istogramma bi gruppi ta' temperaturi li ma jkunux ikbar minn 10 °C.

(b)

L-ekwazzjoni tal-BAT għandha tintuża biex tiġi kkalkulata t-temperatura effettiva ta' referenza b'bidliet iterattivi fit-temperatura ta' referenza (Tr) sakemm il-ħin ikkalkulat tat-tiqdim ikun daqs jew jaqbeż il-ħin reali rrappreżentat fl-istogramma tat-temperaturi tal-katalizzatur. It-temperatura li tirriżulta hija t-temperatura effettiva ta' referenza fl-SBC għal dik is-sistema tal-katalizzatur u għal dak il-bank tat-tiqdim.

2.6.   Bank tat-tiqdim tal-katalizzatur. Il-bank tat-tiqdim tal-katalizzatur għandu jsegwi l-SBC u jwassal il-fluss tal-egżost u l-livell ta' emissjonijiet xierqa skont il-fluss tal-egżost tal-magna li l-katalizzatur ikun iddisinjat għaliha, il-kostitwenti tal-egżost u t-temperatura tal-egżost fil-wiċċ tal-katalizzatur.

It-tagħmir u l-proċeduri kollha tat-tiqdim fuq il-bank għandhom jirrekordjaw l-informazzjoni xierqa (pereżempju l-proporzjonijiet A/F imkejla u l-ħin f'tali temperatura fil-katalizzatur) biex jiżguraw li tassew ikun seħħ biżżejjed tiqdim.

2.7.   Ittestjar meħtieġ. Sabiex jiġu kkalkulati l-fatturi ta' deterjorazzjoni, fuq il-vettura tat-test għandhom jitwettqu minn tal-inqas żewġ testijiet tat-Tip 1 qabel it-tiqdim fuq il-bank tal-ħardwer tal-kontroll tal-emissjonijiet u minn tal-inqas żewġ testijiet tat-Tip 1 wara li jiġi installat mill-ġdid il-ħardwer tal-emissjonijiet b'tiqdim fuq il-bank.

Il-kalkolazzjoni tal-fatturi ta' deterjorazzjoni għandha ssir skont il-metodu ta' kalkolazzjoni kif speċifikat hawn taħt.

Fattur ta' deterjorazzjoni tal-emissjonijiet tal-egżost multiplikabbli għandu jiġi kkalkulat għal kull sustanza li tniġġes kif ġej:

Fejn:

Mi1	=	l-emissjonijiet tal-massa tas-sustanza li tniġġes i fi g/km wara t-test tat-tip 1 ta' vettura speċifikata fil-punt 1.1. ta' dan l-Appendiċi.
Mi2	=	l-emissjonijiet tal-massa tas-sustanza li tniġġes i fi g/km wara t-test tat-tip 1 ta' vettura li tkun ġiet soġġetta għal proċess ta' tiqdim skont il-proċedura deskritta f'dan l-Anness.

Dawn il-valuri interpolati għandhom jiġu aġġustati għal minimu ta' erba' ċifri lejn il-lemin tal-punt deċimali qabel ma jiġi diviż valur bl-ieħor biex jiġi ddeterminat il-fattur ta' deterjorazzjoni. Ir-riżultat għandu jiġi aġġustat 'il fuq għal tliet ċifri lejn il-lemin tal-punt deċimali.

Jekk fattur ta' deterjorazzjoni jkun inqas minn wieħed, jitqies li huwa ugwali għal wieħed.

Fuq talba tal-manifattur, tista' tintuża deterjorazzjoni tal-addittivi tal-emissjonijiet tal-egżost, u l-fattur għandu jiġi kkalkulat għal kull sustanza li tniġġes kif ġej:

D. E. F. = Mi2 – Mi1

Appendiċi 4

Ċiklu standard tal-bank (SBC)

1.   Introduzzjoni

Il-proċedura standard tad-durabbiltà tat-tiqdim tikkonsisti mit-tiqdim ta' sistema ta' katalizzatur/ta' sensur tal-ossiġenu fuq bank tat-tiqdim li jsegwi ċ-ċiklu standard tal-bank (SBC) deskritt f'dan l-Appendiċi. L-SBC jeħtieġ l-użu ta' bank tat-tiqdim b'magna bħala s-sors tal-gass ta' alimentazzjoni għall-katalizzatur. L-SBC huwa ċiklu ta' 60 sekonda li jiġi ripetut kif ikun meħtieġ fuq il-bank tat-tiqdim sabiex jitwettaq it-tiqdim għall-perjodu ta' ħin meħtieġ. L-SBC huwa ddefinit abbażi tat-temperatura tal-katalizzatur, tal-proporzjon ta' arja/ta' fjuwil (A/F) fil-magna, u l-ammont ta' injezzjoni tal-arja sekondarja li tiġi miżjuda quddiem l-ewwel katalizzatur.

2.   Kontroll tat-temperatura tal-katalizzatur

2.1.   It-temperatura tal-katalizzatur għandha titkejjel fis-saff tal-qiegħ tal-katalizzatur, fil-post fejn ikun hemm l-ogħla temperatura fl-iżjed katalizzatur jikwi. Alternattivament, it-temperatura tal-gass ta' alimentazzjoni tista' titkejjel u tiġi kkonvertita f'temperatura tas-saff tal-qiegħ tal-katalizzatur billi tintuża trasformazzjoni lineari kkalkulata mid-dejta ta' korrelazzjoni li tkun inġabret dwar id-disinn tal-katalizzatur u l-bank tat-tiqdim li jridu jintużaw fil-proċess tat-tiqdim.

2.2.   Ikkontrolla t-temperatura tal-katalizzatur fit-tħaddim stojkjometriku (1 sa 40 sekonda fiċ-ċiklu) għal minimu ta' 800 °C (± 10 °C) billi tagħżel il-veloċità tal-magna, it-tagħbija u t-tajming tal-ispark għall-magna li jkunu xierqa. Ikkontrolla t-temperatura massima tal-katalizzatur li jkun hemm matul iċ-ċiklu sa 890 °C (± 10 °C) billi tagħżel il-proporzjon A/F xieraq tal-magna waqt il-fażi ta' proporzjon “rikk” deskritta fit-tabella ta' hawn taħt.

2.3.   Jekk tintuża temperatura baxxa ta' kontroll differenti minn 800 °C, it-temperatura għolja ta' kontroll għandha tkun 90 °C ogħla mit-temperatura baxxa ta' kontroll.

Ċiklu standard tal-bank (SBC)

Ħin (sekondi)	Proporzjon ta' Arja/ta' Fjuwil fil-Magna	Injezzjoni tal-Arja Sekondarja
1-40	Stojkjometriku b'tagħbija, b'tajming tal-ispark u b'veloċità tal-magna kkontrollati biex tinkiseb temperatura minima tal-katalizzatur ta' 800 °C	L-ebda
41-45	“Rikk” (proporzjon A/F magħżul biex tinkiseb temperatura massima tal-katalizzatur tul iċ-ċiklu kollu ta' 890 °C jew ta' 90 °C ogħla mit-temperatura baxxa ta' kontroll)	L-ebda
46-55	“Rikk” (proporzjon A/F magħżul biex tinkiseb temperatura massima tal-katalizzatur tul iċ-ċiklu kollu ta' 890 °C jew ta' 90 °C ogħla mit-temperatura baxxa ta' kontroll)	3 % (± 0,1 %)
56-60	Stojkjometriku bl-istess tagħbija, tajming tal-ispark u veloċità tal-magna li ntużaw fil-perjodu ta' 1-40 sekonda taċ-ċiklu	3 % (± 0,1 %)

3.   Tagħmir u proċeduri tal-bank tat-tiqdim.

3.1.   Konfigurazzjoni tal-bank tat-tiqdim. Il-bank tat-tiqdim għandu jipprovdi r-rata tal-fluss tal-egżost, it-temperatura, il-proporzjon ta' arja/ta' fjuwil, il-kostitwenti tal-egżost u l-injezzjoni tal-arja sekondarja li jkunu xierqa fil-wiċċ tal-bokka tal-katalizzatur.

Il-bank standard tat-tiqdim jikkonsisti minn magna, kontrollur tal-magna u dinamometru tal-magna. Konfigurazzjonijiet oħra jistgħu jkunu aċċettabbli (eż. vettura sħiħa fuq dinamometru, jew berner li jipprovdi l-kundizzjonijiet korretti tal-egżost), diment li jiġu ssodisfati l-kundizzjonijiet tal-bokka tal-katalizzatur u l-karatteristiki ta' kontroll speċifikati f'dan l-appendiċi.

Bank tat-tiqdim wieħed jista' jkollu l-fluss tal-egżost maqsum f'diversi flussi diment li kull wieħed minn dawn il-flussi tal-egżost jissodisfa r-rekwiżiti ta' dan l-appendiċi. Jekk il-bank ikollu iżjed minn kurrent wieħed tal-egżost, is-sistemi ta' katalizzaturi multipli jistgħu jitqaddmu simultanjament.

3.2.   Installazzjoni tas-sistema tal-egżost. Is-sistema kollha tal-katalizzatur(i) flimkien mas-sensur(i) tal-ossiġenu, flimkien mal-pajpijiet kollha tal-egżost li jikkollegaw dawn il-komponenti, jiġu installati fuq il-bank. Għall-magni bi flussi tal-egżost multipli, kull bank tas-sistema tal-egżost jiġi installat separatament fuq il-bank b'mod parallel.

Għas-sistemi tal-egżost li fihom katalizzaturi allinjati multipli, is-sistema kollha tal-katalizzaturi, inklużi l-katalizzaturi kollha, is-sensuri kollha tal-ossiġenu u l-pajpijiet tal-egżost assoċjati, tiġi installata bħala unità għat-tiqdim. Alternattivament, kull katalizzatur individwali jista' jitqaddem separatament għall-perjodu ta' ħin xieraq.

3.3.   Kejl tat-temperatura. It-temperatura tal-katalizzatur għandha titkejjel billi tintuża termokoppja mqiegħda fis-saff tal-qiegħ tal-katalizzatur fil-post fejn ikun hemm l-ogħla temperatura fl-iżjed katalizzatur jikwi. Alternattivament, it-temperatura tal-gass ta' alimentazzjoni eżattament qabel il-wiċċ tal-bokka tal-katalizzatur tista' titkejjel u tiġi konvertita f'temperatura tas-saff tal-qiegħ tal-katalizzatur billi tintuża trasformazzjoni lineari kkalkulata mid-dejta ta' korrelazzjoni li tkun inġabret mid-disinn tal-katalizzatur u mill-bank tat-tiqdim li jridu jintużaw fil-proċess tat-tiqdim. It-temperatura tal-katalizzatur għandha tinħażen b'mod diġitali, b'veloċità ta' hertz wieħed (kejl wieħed fis-sekonda).

3.4.   Kejl tal-proporzjon ta' arja/ta' fjuwil. Għandhom isiru provvedimenti għall-kejl tal-proporzjon ta' arja/ta' fjuwil (A/F) (pereżempju sensur tal-ossiġenu b'firxa wiesgħa) kemm jista' jkun qrib il-bokka tal-katalizzatur u l-flanġijiet tal-ħruġ. L-informazzjoni minn dawn is-sensuri għandha tinħażen b'mod diġitali, b'veloċità ta' hertz wieħed (kejl wieħed fis-sekonda).

3.5.   Bilanċ tal-fluss tal-egżost. Għandhom isiru provvedimenti biex jiġi żgurat li l-ammont xieraq ta' egżost (imkejjel fi grammi/sekonda fl-istojkjometrija, b'tolleranza ta' ± 5 grammi/sekonda) jgħaddi minn kull sistema tal-katalizzaturi li tkun qed titqaddem fuq il-bank.

Ir-rata xierqa tal-fluss tiġi ddeterminata abbażi tal-fluss tal-egżost li jkun hemm fil-magna tal-vettura oriġinali bil-veloċità tal-magna fi stat stabbli u bit-tagħbija magħżula għat-tiqdim fuq il-bank fil-punt 3.6..

3.6.   Konfigurazzjoni. Il-veloċità tal-magna, it-tagħbija u t-tajming tal-ispark jintgħażlu biex tinkiseb temperatura tas-saff tal-qiegħ tal-katalizzatur ta' 800 °C (± 10 °C) bi tħaddim stojkjometriku fi stat stabbli.

Is-sistema tal-injezzjoni tal-arja hija ssettjata biex tipprovdi l-fluss tal-arja meħtieġ biex jiġi prodott 3,0 % (± 0,1 %) ossiġenu fil-fluss tal-egżost stojkjometriku fi stat stabbli eżattament quddiem l-ewwel katalizzatur. Valur tipiku fil-punt 'il fuq mill-kejl A/F (meħtieġ fil-punt 5) huwa lambda 1,16 (li bejn wieħed u ieħor hija 3 % ossiġenu).

Bl-injezzjoni tal-arja mixgħula, issettja l-proporzjon A/F “Rikk” biex tiġi prodotta temperatura tas-saff tal-qiegħ tal-katalizzatur ta' 890 °C (± 10 °C). Valur tipiku ta' A/F għal dan il-pass huwa lambda 0,94 (bejn wieħed u ieħor 2 % CO).

3.7.   Ċiklu tat-tiqdim. Il-proċeduri standard tat-tiqdim fuq il-bank jużaw iċ-ċiklu standard tal-bank (SBC). L-SBC jiġi ripetut sakemm jinkiseb l-ammont ta' tiqdim ikkalkulat mill-ekwazzjoni tal-ħin tat-tiqdim fuq il-bank (BAT).

3.8.   Garanzija tal-kwalità. Matul it-tiqdim, it-temperaturi u l-proporzjon A/F fil-punti 3.3. u 3.4. għandhom jiġu rieżaminati perjodikament (minn tal-inqas kull 50 siegħa). Għandhom isiru l-aġġustamenti meħtieġa biex jiġi żgurat li l-SBC qed jiġi segwit b'mod xieraq matul il-proċess tat-tiqdim kollu.

Wara li jitlesta l-proċess tat-tiqdim, il-ħin f'tali temperatura tal-katalizzatur li nġabar matul il-proċess tat-tiqdim għandu jiġi ttabulat f'istogramma bi gruppi ta' temperaturi li ma jkunux ogħla minn 10 °C. L-ekwazzjoni tal-BAT u t-temperatura kkalkulata u effettiva ta' referenza għaċ-ċiklu tat-tiqdim, skont il-punt 2.4. tal-Appendiċi 3 tal-Anness VI, jintużaw biex jiġi ddeterminat jekk l-ammont xieraq ta' tiqdim termali tal-katalizzatur seħħx tabilħaqq. It-tiqdim fuq il-bank jiġi estiż jekk l-effett termali tal-ħin tat-tiqdim ikkalkulat ma jkunx minn tal-inqas ta' 95 % tat-tiqdim termali fil-mira.

3.9.   Startjar u tfigħ. Għandha tingħata attenzjoni biex jiġi żgurat li t-temperatura massima tal-katalizzatur għal deterjorazzjoni rapida (eż. 1 050 °C) ma sseħħx waqt l-istartjar jew it-tfigħ. Jistgħu jintużaw proċeduri speċjali għal temperatura baxxa waqt l-istartjar u t-tfigħ biex jittaffa dan it-tħassib.

4.   Determinazzjoni sperimentali tal-fattur R għall-proċeduri tad-durabbiltà tat-tiqdim fuq il-bank

4.1.   Il-fattur R huwa l-koeffiċjent tar-reattività termali tal-katalizzatur li jintuża fl-ekwazzjoni tal-ħin tat-tiqdim fuq il-bank (BAT). Il-manifatturi jistgħu jiddeterminaw il-valur ta' R b'mod sperimentali billi jużaw il-proċeduri li ġejjin.

4.2.   Billi tuża ċ-ċiklu tal-bank u l-ħardwer tat-tiqdim fuq il-bank applikabbli, wettaq it-tqaddim ta' diversi katalizzaturi (minimu ta' tliet katalizzaturi tal-istess disinn) f'temperaturi differenti ta' kontroll bejn it-temperatura tat-tħaddim normali u t-temperatura tal-limitu ta' ħsara. Kejjel l-emissjonijiet (jew l-ineffiċjenza tal-katalizzatur (1 – l-effiċjenza tal-katalizzatur)) għal kull kostitwent tal-egżost. Kun żgur li l-ittestjar finali jrendi dejta li tkun daqs l-istandard tal-emissjonijiet jew darbtejn iktar minnu.

4.3.   Stima l-valur ta' R u kkalkula t-temperatura effettiva ta' referenza (Tr) għaċ-ċiklu tat-tiqdim fuq il-bank għal kull temperatura ta' kontroll skont il-punt 2.4. tal-Appendiċi 3 tal-Anness VI.

4.4.   Immarka f'graff l-emissjonijiet (jew l-ineffiċjenza tal-katalizzatur) imqabbla mal-ħin tat-tiqdim għal kull katalizzatur. Ikkalkula l-linja li toqgħod l-aħjar u li hija kwadrata l-inqas fost id-dejta. Sabiex is-sett ta' dejta jkun utli għal dan l-għan, id-dejta għandu jkollha interċetta bejn wieħed u ieħor komuni [ta' bejn 0 u 6 400 km – għal eżempju ara l-graff li ġejja].

4.5.   Ikkalkula l-inklinazzjoni tal-linja li toqgħod l-aħjar għal kull temperatura tat-tiqdim.

4.6.   Immarka f'graff il-log naturali (ln) tal-inklinazzjoni ta' kull linja li toqgħod l-aħjar (iddeterminata fil-punt 4.5.) tul l-assi vertikali, imqabbel mal-invers tat-temperatura tat-tiqdim (1/(it-temperatura tat-tiqdim, deg K)) tul l-assi orizzontali. Ikkalkula l-linji li joqogħdu l-aħjar u li huma l-inqas kwadrati fost id-dejta. L-inklinazzjoni tal-linja hija l-fattur R. Għal eżempju ara l-graff li ġejja.

4.7.   Qabbel il-fattur R mal-valur inizjali li ntuża skont il-punt 4.3.. Jekk il-fattur R ikkalkulat ikun differenti mill-valur inizjali b'iżjed minn 5 %, agħżel fattur R ġdid li jkun bejn il-valuri inizjali u dawk ikkalkulati, u mbagħad irrepeti l-passi tal-punt 4 sabiex tasal għal fattur R ġdid. Irrepeti dan il-proċess sakemm il-fattur R ikkalkulat ikun fi ħdan 5 % tal-fattur R li ġie preżunt inizjalment.

4.8.   Qabbel il-fattur R iddeterminat separatament għal kull kostitwent tal-egżost. Uża l-iktar fattur R baxx (l-agħar każ) għall-ekwazzjoni tal-BAT.