32014R0687

EUR-Lex

Access to European Union law

This document is an excerpt from the EUR-Lex website

EUROPA
EUR-Lex home
Regolament implimentattiv - 687/2014 - EN - EUR-Lex

Help

Search tips

Need more search options? Use the Advanced search

Document 32014R0687

Regolament ta' Implimentazzjoni tal-Kummissjoni (UE) Nru 687/2014 tal- 20 ta' Ġunju 2014 li jemenda r-Regolament (UE) Nru 185/2010 fir-rigward taċ-ċarezza, l-armonizzazzjoni u s-simplifikazzjoni ta' miżuri tas-sigurtà tal-avjazzjoni, l-ekwivalenza tal-istandards ta' sigurtà u l-miżuri ta' sigurtà tal-merkanzija u tal-posta Test b'rilevanza għaż-ŻEE

ĠU L 182, 21.6.2014, p. 31–46 (BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)

Legal status of the document No longer in force, Date of end of validity: 14/11/2015; Impliċitament imħassar minn 32015R1998

ELI: http://data.europa.eu/eli/reg_impl/2014/687/oj

HTML

PDF

Official Journal

21.6.2014

Il-Ġurnal Uffiċjali tal-Unjoni Ewropea

L 182/31

REGOLAMENT TA' IMPLIMENTAZZJONI TAL-KUMMISSJONI (UE) Nru 687/2014

tal-20 ta' Ġunju 2014

li jemenda r-Regolament (UE) Nru 185/2010 fir-rigward taċ-ċarezza, l-armonizzazzjoni u s-simplifikazzjoni ta' miżuri tas-sigurtà tal-avjazzjoni, l-ekwivalenza tal-istandards ta' sigurtà u l-miżuri ta' sigurtà tal-merkanzija u tal-posta

(Test b'rilevanza għaż-ŻEE)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 300/2008 tal-Parlament Ewropew u tal-Kunsill tal-11 ta' Marzu 2008 dwar regoli komuni fil-qasam tas-sigurtà tal-avjazzjoni ċivili u li jħassar ir-Regolament (KE) Nru 2320/2002 (1), u b'mod partikolari l-Artikolu 4(3) tiegħu,

Billi:

(1)	L-esperjenza miksuba bl-implimentazzjoni tar-Regolament tal-Kummissjoni (UE) Nru 185/2010 (2) uriet il-ħtieġa ta' emendi fil-modalitajiet ta' implimentazzjoni ta' ċerti standards bażiċi komuni.

(2)

Ċerti miżuri speċifiċi tas-sigurtà tal-avjazzjoni għandhom jiġu ċċarati, armonizzati jew issimplifikati sabiex titjieb iċ-ċarezza legali u b'hekk ma jkunx hemm interpretazzjonijiet diverġenti tal-leġiżlazzjoni, kif ukoll sabiex tkompli tiġi żgurata l-aħjar implimentazzjoni tal-istandards bażiċi komuni dwar is-sigurtà fl-avjazzjoni.

(3)	L-emendi jikkonċernaw l-implimentazzjoni ta' għadd limitat ta' miżuri fir-rigward tal-oġġetti pprojbiti, is-sigurtà tal-inġenji tal-ajru, il-kontrolli tas-sigurtà għall-merkanzija, il-posta, il-provvisti għal matul it-titjira u l-provvisti tal-ajruporti u t-tagħmir ta' sigurtà.

(4)

F'konformità mar-Regolament tal-Kummissjoni (KE) Nru 272/2009 (3), il-Kummissjoni għandha tirrikonoxxi l-ekwivalenza tal-istandards ta' sigurtà tal-avjazzjoni ta' pajjiżi terzi u ta' pajjiżi u territorji oħra li fihom ma japplikax it-Titolu VI tat-TFUE, skont il-kundizzjoni li jiġu ssodisfati l-kriterji stabbiliti f'dak ir-Regolament.

(5)	Il-Kummissjoni vverifikat li l-ajruporti li jinsabu f'Guernsey, fil-Gżira ta' Man u f'Jersey jissodisfaw il-kriterji stabbiliti fil-Parti E tal-Anness tar-Regolament (KE) Nru 272/2009.

(6)

Fl-Anness tar-Regolament tal-Kummissjoni (UE) Nru 185/2010 hemm elenkati l-pajjiżi terzi u l-pajjiżi u t-territorji l-oħra li fihom ma japplikax it-Titolu VI tat-TFUE rikonoxxut bħala li japplika standards ta' sigurtà ekwivalenti għall-istandards bażiċi komuni li jistabbilixxi r-Regolament (KE) Nru 272/2009.

(7)	Ir-Regolament tal-Kummissjoni (KEE) Nru 2454/93 (4) u r-Regolament tal-Kummissjoni (UE) Nru 185/2010 jistabbilixxu rekwiżiti simili ta' sigurtà għall-entitajiet li jaħdmu fil-katina ta' provvista tal-merkanzija u tal-posta.

(8)

Ir-rekwiżiti ta' sigurtà għall-programm tal-aġent regolat tas-sigurtà tal-avjazzjoni u tal-kunsinnatur magħruf iddefiniti fir-Regolament (UE) Nru 185/2010 u għall-programm tal-Operatur Ekonomiku Awtorizzat doganali ddefiniti fir-Regolament (KEE) Nru 2454/93 għandhom jiġu allinjati aktar sabiex jippermettu li r-rikonoxximent reċiproku jiffaċilita lill-awtoritajiet tal-industrija u tal-gvern ikkonċernati filwaqt li fl-istess ħin iżommu l-livelli attwali ta' sigurtà.

(9)	Għaldaqstant, ir-Regolament (UE) Nru 185/2010 għandu jiġi emendat skont dan.

(10)	Il-miżuri stipulati f'dan ir-Regolament huma skont l-opinjoni tal-Kumitat dwar is-Sigurtà tal-Avjazzjoni Ċivili,

ADOTTAT DAN IR-REGOLAMENT:

Artikolu 1

L-Anness tar-Regolament (UE) Nru 185/2010 huwa emendat skont l-Anness ta' dan ir-Regolament.

Artikolu 2

Dan ir-Regolament għandu jidħol fis-seħħ fil-jum ta' wara l-pubblikazzjoni tiegħu f'Il-Ġurnal Uffiċjali tal-Unjoni Ewropea.

Il-punt 5(o) għandu japplika mill-1 ta' Lulju 2014.

Il-punt 10(b) u l-punt 11(b) tal-Anness għandhom japplikaw mill-1 ta' Marzu 2015.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, l-20 ta' Ġunju 2014.

Għall-Kummissjoni

Il-President

José Manuel BARROSO

(1) ĠU L 97, 9.4.2008, p. 72.

(2) Ir-Regolament tal-Kummissjoni (UE) Nru 185/2010 tal-4 ta' Marzu 2010 li jistipula miżuri dettaljati għall-implimentazzjoni tal-istandards bażiċi komuni dwar is-sigurtà fl-avjazzjoni (ĠU L 55, 5.3.2010, p. 1).

(3) Ir-Regolament tal-Kummissjoni (KE) Nru 272/2009 tat-2 ta' April 2009 li jissupplimenta l-istandards bażiċi komuni dwar is-sigurtà tal-avjazzjoni ċivili stabbiliti fl-Anness tar-Regolament tal-Parlament Ewropew u tal-Kunsill (KE) Nru 300/2008 (ĠU L 91, 3.4.2009, p. 7).

(4) Ir-Regolament tal-Kummissjoni (KEE) Nru 2454/93 tat-2 ta' Lulju 1993 li jistabbilixxi d-dispożizzjonijiet għall-implementazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (ĠU L 253, 11.10.1993, p. 1).

ANNESS

L-Anness tar-Regolament (UE) Nru 185/2010 huwa emendat kif ġej:

(1)

Il-Kapitolu 1 huwa emendat kif ġej:

(a)

Jiżdied il-punt 1.0.5 li ġej:

“1.0.5.

Ir-referenzi għal pajjiżi terzi f'dan il-kapitolu u fejn applikabbli f'Deċiżjoni separata tal-Kummissjoni jinkludu pajjiżi u territorji oħra li fihom, f'konformità mal-Artikolu 355 tat-Trattat dwar il-Funzjonament tal-Unjoni Ewropea, ma japplikax it-Titolu VI tat-Trattat.”;

(b)	Jitħassar il-punt 1.3.1.7;

(c)

Jiżdied il-punt 1.6 li ġej:

“1.6. OĠĠETTI PPROJBITI

1.6.1. Persuni għajr il-passiġġieri ma għandux ikollhom il-permess li jġorru l-oġġetti elenkati fid-Dokument Mehmuż 1-A fiż-żoni ta' sigurtà ristretta.

1.6.2. Tista' tingħata eżenzjoni mill-punt 1.6.1 bil-kundizzjoni li l-persuna tkun awtorizzata ġġorr l-oġġetti pprojbiti f'żoni ta' sigurtà ristretta sabiex twettaq ħidmiet li huma essenzjali għat-tħaddim tal-faċilitajiet tal-ajruport jew tal-inġenji tal-ajru, jew biex twettaq il-ħidmiet ta' waqt it-titjira.

1.6.3. Sabiex jiġi permess it-taqbil tal-persuna awtorizzata li ġġorr oġġett wieħed jew aktar, kif elenkat fid-Dokument Mehmuż 1-A mal-oġġett li jkun qiegħed jinġarr:

(a)

il-persuna għandu jkollha awtorizzazzjoni u għandha ġġorrha magħha. L-awtorizzazzjoni għandha jew tiġi indikata fuq il-karta tal-identifikazzjoni li tagħti aċċess għaż-żoni ta' sigurtà ristretta jew inkella fuq dikjarazzjoni bil-miktub separata. L-awtorizzazzjoni għandha tindika l-oġġetti li jistgħu jinġarru, jew bħala kategorija jew inkella bħala oġġett speċifiku. Jekk l-awtorizzazzjoni tkun indikata fuq il-karta tal-identifikazzjoni, għandha tkun ta' tip li jista' jingħaraf fuq bażi ta' ħtieġa ta' għarfien; jew

(b)	għandu jkun hemm sistema stabbilita fil-punt ta' kontroll tas-sigurtà li tindika liema oġġetti jistgħu jinġarru minn liema persuni, jew bħala kategorija inkella bħala oġġett speċifiku.

It-taqbil għandu jitwettaq qabel ma l-persuna tingħata l-permess iġġorr l-oġġetti kkonċernati fiż-żoni ta' sigurtà ristretta jew abbord inġenju tal-ajru, jew jekk tintalab tagħmel dan minn persuni li jwettqu sorveljanza jew għassa skont il-punt 1.5.1 (c).

1.6.4. L-oġġetti elenkati fid-Dokument Mehmuż 1-A jistgħu jinħażnu f'żoni ta' sigurtà ristretta sakemm jinżammu f'kundizzjonijiet siguri. L-oġġetti elenkati fil-punti (c), (d) u (e) tad-Dokument Mehmuż 4-C jistgħu jinħażnu f'żoni ta' sigurtà ristretta sakemm ma jkunux aċċessibbli għall-passiġġieri.”;

(d)

Jiżdied id-Dokument Mehmuż 1-A li ġej:

“DOKUMENT MEHMUŻ 1-A

PERSUNI GĦAJR PASSIĠĠIERI

LISTA TA' OĠĠETTI PPROJBITI

(a)

armi tan-nar u kwalunkwe apparat ieħor li jispara l-projettili — apparat li jista', jew li jidher li jista' jintuża sabiex jikkawża ġrieħi serji billi jispara projettili, inklużi:

—	armi tan-nar ta' kull tip, bħalma huma l-pistoli, ir-revolvers, l-azzarini, is-snieter,

—	armi tan-nar tal-logħob, kopji u imitazzjonijiet tal-armi tan-nar li dak li jkun jista' jaħsibhom armi ta' vera,

—	partijiet komponenti ta' armi tan-nar, esklużi l-miri teleskopiċi,

—	armi tal-arja u tas-CO2 kkumpressati, bħalma huma pistoli, armi li jisparaw il-pritkuni, azzarini u armi li jisparaw il-ball bearings,

—	pistoli tas-suffarelli tas-sinjali u pistoli tat-tlielaq,

—	qwies, ‘cross bows’ u vleġeġ,

—	apparat li jispara l-ħarpuni jew il-froxxni,

—	wdab u żbandoli;

(b)

apparat li jistordi — apparat maħsub speċifikament biex jistordi jew jimmobilizza, inklużi:

—	apparat li jixxokkja, bħalma huma l-pistoli li jistordu, it-tasers u l-lembubi li jistordu,

—	apparat li jistordi l-annimali u li joqtol l-annimali,

—	kimiċi, gassijiet u sprejs li jrendu inkapaċi, bħalma huma l-mace, l-isprejs tal-bżar, l-isprejs tal-bżar aħdar, il-gass tad-dmugħ, l-isprejs tal-aċidu u l-isprejs li jgerrxu l-annimali;

(c)

splussivi u sustanzi u apparat inċendjarji/u — splussivi u sustanzi u apparat inċendjarji/u li jistgħu, jew jidhru li jistgħu, jintużaw biex jikkawżaw ġrieħi serji jew biex jheddu s-sikurezza tal-inġenju tal-ajru, inklużi:

—	munizzjoni,

—	mezzi detonaturi,

—	detonaturi u miċeċ,

—	apparat splussiv ta' imitazzjoni,

—	mini, granati u oġġetti splussivi militari oħra,

—	logħob tan-nar u oġġetti pirotekniċi oħra,

—	bombi tad-duħħan u stoċċijiet li jiġġeneraw id-dħaħen,

—	dinamite, porvli u splussivi plastiċi;

(d)	kull oġġett ieħor li jista' jintuża biex jikkawża ġrieħi serji u li ġeneralment ma jintużax f'żoni ta' sigurtà ristretta, eż. tagħmir tal-arti marzjali, xwabel, eċċ.”;

(2)

Il-Kapitolu 3 huwa emendat kif ġej:

(a)

Jiżdied il-punt 3.0.6 li ġej:

“3.0.6.

(b)

Jiġi sostitwit il-punt 3.2.1.1 b'dan li ġej:

“3.2.1.1.

Ikun fejn ikun ipparkjat fl-ajruport, kull bieba esterna tal-inġenju tal-ajru għandha tkun protetta minn aċċess mhux awtorizzat billi:

(a)	ikun żgurat li l-persuni li jfittxu li jiksbu aċċess mhux awtorizzat jiġu kkontrollati minnufih; jew

(b)

il-bibien esterni jkunu magħluqin. Meta inġenju tal-ajru jkun f'parti kritika, il-bibien esterni li ma jkunux aċċessibbli minn persuna mill-art għandhom jitqiesu magħluqa jekk l-għajnuniet għall-aċċess ikunu tneħħew u tqiegħdu 'l bogħod biżżejjed mill-inġenju tal-ajru sabiex jiġi ostakolat l-aċċess b'mod raġonevoli minn persuna; jew

(c)	ikun hemm mezzi elettroniċi li immedjatament jindividwaw aċċess mhux awtorizzat; jew;

(d)

ikun hemm sistema b'karta tal-identifikazzjoni tal-ajruport li tagħti aċċess elettroniku għall-bibien kollha li jwasslu direttament għall-pont tal-imbark tal-passiġġieri, maġenb bieb miftuħ tal-inġenju tal-ajru, li tagħti aċċess biss lill-persuni li huma mħarrġa f'konformità mal-punt 11.2.3.7. Dawn il-persuni għandhom jiżguraw li ma jkunx hemm aċċess mhux awtorizzat waqt li jkunu qed jużaw il-bieb.”;

(c)

Jiġi sostitwit id-Dokument Mehmuż 3-B b'dan li ġej:

“DOKUMENT MEHMUŻ 3-B

SIGURTÀ TAL-INĠENJI TAL-AJRU

PAJJIŻI TERZI, KIF UKOLL PAJJIŻI U TERRITORJI OĦRA LI FIHOM, F'KONFORMITÀ MAL-ARTIKOLU 355 TAT-TRATTAT DWAR IL-FUNZJONAMENT TAL-UNJONI EWROPEA, MA JAPPLIKAX IT-TITOLU VI TA' DAK IT-TRATTAT, RIKONOXXUTI BĦALA LI JAPPLIKAW STANDARDS TAS-SIGURTÀ EKWIVALENTI GĦALL-ISTANDARDS BAŻIĊI KOMUNI.

Fir-rigward tas-sigurtà tal-inġenji tal-ajru, il-pajjiżi terzi li ġejjin, kif ukoll pajjiżi u territorji oħra li fihom, f'konformità tal-Artikolu 355 tat-Trattat dwar il-Funzjonament tal-Unjoni Ewropea, ma japplikax it-Titolu VI ta' dak it-Trattat, ġew rikonoxxuti bħala li japplikaw standards tas-sigurtà ekwivalenti għall-istandards bażiċi komuni:

L-Istati Uniti tal-Amerika

Il-Gżejjer Faeroe, fir-rigward tal-ajruport Vagar

Il-Groenlandja, fir-rigward tal-ajruport Kangerlussuaq

Guernsey

Jersey

Il-Gżira ta' Man

Il-Kummissjoni għandha, mingħajr dewmien, tinnotifika lill-awtoritajiet nazzjonali xierqa tal-Istati Membri jekk ikollha xi tagħrif li jindika li l-istandards tas-sigurtà applikati mill-pajjiż terz jew minn pajjiż jew territorju ieħor ikkonċernat li jkollhom impatt sinifikanti fuq il-livelli ġenerali tas-sigurtà tal-avjazzjoni fl-Unjoni mhumiex iktar ekwivalenti għall-istandards bażiċi komuni tal-Unjoni.

L-awtoritajiet xierqa tal-Istati Membri għandhom, mingħajr dewmien, jiġu nnotifikati meta l-Kummissjoni jkollha tagħrif dwar azzjonijiet, inklużi miżuri ta' kumpens, li jikkonfermaw li l-ekwivalenza tal-istandards rilevanti tas-sigurtà applikati mill-pajjiż terz jew mill-pajjiż jew territorju ieħor ikkonċernat, hija stabbilita mill-ġdid.”;

(3)

Il-Kapitolu 4 huwa emendat kif ġej:

(a)

Jiżdied il-punt 4.0.5 li ġej:

“4.0.5.

(b)

Jiġi sostitwit id-Dokument Mehmuż 4-B b'dan li ġej:

“DOKUMENT MEHMUŻ 4-B

PASSIĠĠIERI U BAGALJI TAL-KABINA

Fir-rigward tal-passiġġieri u tal-bagalji tal-kabina, il-pajjiżi terzi li ġejjin, kif ukoll pajjiżi u territorji oħra li fihom, f'konformità tal-Artikolu 355 tat-Trattat dwar il-Funzjonament tal-Unjoni Ewropea, ma japplikax it-Titolu VI ta' dak it-Trattat, rikonoxxuti bħala li japplikaw standards tas-sigurtà ekwivalenti għall-istandards bażiċi komuni:

L-Istati Uniti tal-Amerika

Il-Gżejjer Faeroe, fir-rigward tal-ajruport Vagar

Il-Groenlandja, fir-rigward tal-ajruport Kangerlussuaq

Guernsey

Jersey

Il-Gżira ta' Man

(4)

Il-Kapitolu 5 huwa emendat kif ġej:

(a)

Jiżdied il-punt 5.0.5 li ġej:

“5.0.5.

(b)

Jiġi sostitwit id-dokument mehmuż 5-A b'dan li ġej:

“DOKUMENT MEHMUŻ 5-A

BAGALJI TAL-ISTIVA

Fir-rigwardl-bagalji tal-istiva, il-pajjiżi terzi li ġejjin, kif ukoll pajjiżi u territorji oħra li fihom, f'konformità tal-Artikolu 355 tat-Trattat dwar il-Funzjonament tal-Unjoni Ewropea, ma japplikax it-Titolu VI ta' dak it-Trattat, rikonoxxuti bħala li japplikaw standards tas-sigurtà ekwivalenti għall-istandards bażiċi komuni:

L-Istati Uniti tal-Amerika

Il-Gżejjer Faeroe, fir-rigward tal-ajruport Vagar

Il-Groenlandja, fir-rigward tal-ajruport Kangerlussuaq

Guernsey

Jersey

Il-Gżira ta' Man

(5)

Il-Kapitolu 6 huwa emendat kif ġej:

(a)

Jiżdied il-punt 6.0.3 li ġej:

“6.0.3.

(b)

Jiġi sostitwit il-punt 6.3.1.2 (b) b'dan li ġej:

“(b)

l-awtorità xierqa jew validatur tas-sigurtà tal-avjazzjoni tal-UE li jaġixxi f'isimha, għandhom jeżaminaw il-programm tas-sigurtà u mbagħad iwettqu verifika fuq il-post tas-siti speċifikati sabiex jiġi vvalutat jekk l-applikant huwiex konformi mar-rekwiżiti tar-Regolament (KE) Nru 300/2008 u l-atti ta' implimentazzjoni tiegħu.

Għajr għall-ħtiġiet stipulati fil-punt 6.2, eżami tas-sit tal-applikant mill-awtorità doganali rilevanti f'konformità mal-Artikolu 14n tar-Regolament tal-Kummissjoni (KEE) Nru 2454/93 (*) għandu jitqies bħala verifika fuq il-post jekk ikun sar mhux aktar kmieni minn 3 snin qabel id-data li fiha l-applikant ifittex approvazzjoni bħala aġent regolat. Iċ-ċertifikat tal-Operatur Ekonomiku Awtorizzat (AEO) u l-valutazzjoni rilevanti tal-awtoritajiet doganali għandhom ikunu magħmula disponibbli mill-applikant għal spezzjoni ulterjuri.

(*) Ir-Regolament tal-Kummissjoni (KEE) Nru 2454/93 tat-2 ta' Lulju 1993 li jiffissa d-dispożizzjonijiet għall-implementazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Doganali Komunitarju (ĠU L 253, 11.10.1993, p. 1).”;"

(c)	Jiżdied il-paragrafu li ġej fil-punt 6.3.1.4: “Għajr għall-ħtiġiet imniżżla fil-punt 6.2, eżami tas-sit tal-aġent regolat mill-awtorità doganali rilevanti f'konformità mal-Artikolu 14n tar-Regolament tal-Kummissjoni (KEE) Nru 2454/93 għandu jitqies bħala verfika fuq il-post.”;

(d)

Jiġi sostitwit il-punt 6.3.1.5 b'dan li ġej:

“6.3.1.5.

Jekk l-awtorità xierqa ma tibqax sodisfatta fir-rigward tal-konformità tal-aġent regolat mal-ħtiġiet tar-Regolament (KE) Nru 300/2008 u mal-atti ta' implimentazzjoni tiegħu, għandha tirtira l-istatus ta' aġent regolat għas-siti speċifiċi.

Jekk l-entità ma tkunx għadha d-detentriċi taċ-ċertifikat AEO imsemmi fil-punt (b) jew (c) tal-Artikolu 14a(1) tar-Regolament (KEE) Nru 2454/93 jew jekk dan iċ-ċertifikat jiġi sospiż minħabba nuqqas ta' konformità mal-Artikolu 14k ta' dak ir-Regolament, l-awtorità xierqa għandha tieħu azzjoni xierqa biex tissodisfa ruħha li l-aġent regolat huwa konformi mal-ħtiġiet tar-Regolament (KE) Nru 300/2008.

L-entità għandha tinforma lill-awtorità xierqa bi kwalunkwe bidla relatata maċ-ċertifikat AEO tagħha msemmi fil-punt (b) jew (c) tal-Artikolu 14a(1) tar-Regolament (KEE) Nru 2454/93.

Immedjatament wara l-irtirar u, f'kull każ, fi żmien 24 siegħa, l-awtorità xierqa għandha tiżgura li l-bidla fl-istatus tal-aġent regolat preċedenti hija indikata fil-'bażi tad-dejta tal-Unjoni dwar is-sigurtà tal-katina tal-provvista'.”;

(e)

Jiżdied il-punt 6.3.1.8 li ġej:

“6.3.1.8.

L-awtorità xierqa għandha tqiegħed għad-dispożizzjoni tal-awtorità doganali kull tagħrif relatat mal-istatus ta' aġent regolat li jista' jkun rilevanti fir-rigward tal-kisba ta' ċertifikat AEO kif imsemmi fil-punt (b) jew (c) tal-Artikolu 14a(1) tar-Regolament (KEE) Nru 2454/93. Dan għandu jinkludi t-tagħrif relatat mal-approvazzjonijiet il-ġodda tal-istatus ta' aġent regolat, mal-irtirar tal-istatus ta' aġent regolat, mal-validazzjoni mill-ġdid u l-ispezzjonijiet, mal-iskedi ta' verifika u mar-riżultati ta' dawn il-valutazzjonijiet.

Sa mhux aktar tard mill-1 ta' Marzu 2015, għandhom jiġu stabbiliti l-modalitajiet għal dan l-iskambju ta' tagħrif bejn l-awtorità xierqa u l-awtoritajiet doganali nazzjonali.”;

(f)

Jiġi sostitwit il-punt 6.3.2.3 b'dan li ġej:

“6.3.2.3

Għall-kunsinni li għalihom ma jkunux ġew applikati minn qabel il-kontrolli tas-sigurtà kollha meħtieġa, l-aġent regolat għandu jiżgura li dawn jiġu:

(a)	skrinjati f'konformità mal-punt 6.2; jew

(b)

aċċettati għall-ħżin taħt ir-repsonsabbiltà esklussiva tal-aġent regolat, ma jkunux jistgħu jiġu identifikati bħala kunsinni li jridu jiġu ttrasportati fuq inġenju tal-ajru qabel jiġu magħżula u li jintgħażlu b'mod awtonomu mingħajr l-ebda intervent tal-kunsinnatur jew ta' kwalunkwe persuna jew entità oħra għajr dawk innominati u mħarrġa mill-aġent regolat għal dak il-għan.

Il-punt (b) jista' jiġi applikat biss jekk ma jistax jitbassar mill-kunsinnatur li l-kunsinna se tiġi ttrasportata bl-ajru.”;

(g)

Jiġi sostitwit il-punt 6.3.2.6 (e) b'dan li ġej:

“(e)

ir-raġuni li għaliha nħareġ l-istatus tas-sigurtà, bl-indikazzjonijiet:

—	"KC", jiġifieri wasal mingħand kunsinnatur magħruf, jew

—	"AC", jiġifieri wasal mingħand kunsinnatur in konto, jew

—	"RA", jiġifieri magħżul minn aġent regolat, jew

—	il-mezz jew il-metodu li ntuża għall-iskrinjar, jew

—	ir-raġunijiet li għalihom il-kunsinna ġiet eżentata mill-iskrinjar;”;

(h)

Jiġi sostitwit il-punt 6.4.1.2 b'dan li ġej:

“6.4.1.2.

L-awtorità xierqa ta' kull Stat Membru għandha tiddefinixxi fil-programm tas-sigurtà nazzjonali tagħha tal-avjazzjoni ċivili kif imsemmi fl-Artikolu 10 tar-Regolament (KE) Nru 300/2008, ir-responsabbiltajiet għall-implimentazzjoni tal-proċedura li ġejja dwar l-approvazzjoni ta' kunsinnaturi magħrufa:

(a)

l-applikant għandu jfittex li jikseb l-approvazzjoni mill-awtorità xierqa tal-Istat Membru li fih jinsab is-sit tiegħu.

L-applikant għandu jingħata 'Gwida għall-kunsinnaturi magħrufa' li tinsab fid-Dokument Mehmuż 6-B u l-'Lista ta' verifika tal-validazzjoni għall-kunsinnaturi magħrufa' li tinsab fid-Dokument Mehmuż 6-C;

(b)

l-awtorità xierqa, jew il-validatur tas-sigurtà tal-avjazzjoni tal-UE li jaġixxi f'isimha, għandhom iwettqu verifika fuq il-post tas-siti speċifikati sabiex jiġi vvalutat jekk l-applikant huwiex konformi mal-ħtiġiet tar-Regolament (KE) Nru 300/2008 u l-atti ta' implimentazzjoni tiegħu.

Sabiex jiġi vvalutat jekk l-applikant huwiex konformi jew le ma' dawn il-ħtiġiet, l-awtorità xierqa, jew validatur tas-sigurtà tal-avjazzjoni tal-UE li jaġixxi f'isimha, għandhom jużaw il-'Lista ta' verifika tal-validazzjoni għall-kunsinnaturi magħrufa' li tinsab fid-Dokument Mehmuż 6-C. Din il-lista ta' verifika tinkludi dikjarazzjoni tal-impenji li għandha tiġi ffirmata mir-rappreżentant legali tal-applikant jew mill-persuna responsabbli għas-sigurtà tas-sit.

Ladarba timtela l-lista ta' verifika tal-validazzjoni, it-tagħrif li jkun hemm fil-lista ta' verifika għandu jiġi ttrattat bħala tagħrif ikklassifikat.

Id-dikjarazzjoni ffirmata għandha tinżamm mill-awtorità xierqa konċernata jew tinżamm mill-validatur tas-sigurtà tal-avjazzjoni tal-UE u meta tintalab tkun disponibbli għall-awtorità xierqa konċernata;

(c)

eżami tas-sit tal-applikant mill-awtorità doganali rilevanti f'konformità mal-Artikolu 14n tar-Regolament tal-Kummissjoni (KEE) Nru 2454/93 għandu jitqies bħala verfika fuq il-post jekk isir mhux aktar kmieni minn 3 snin qabel id-data li fiha l-applikant ifittex approvazzjoni bħala kunsinnatur magħruf. F'dawk il-każijiet, l-applikant għandu jimla t-tagħrif meħtieġ fl-Ewwel Parti tal-'Lista ta' verifika tal-validazzjoni għall-kunsinnaturi mgaħrufa' li tinsab fid-Dokument Mehmuż 6-C u jibgħatha lill-awtorità xierqa flimkien mad-dikjarazzjoni tal-impenji li għandha tiġi ffirmata mir-rappreżentant legali tal-applikant jew mill-persuna responsabbli għas-sigurtà tas-sit.

Iċ-ċertifikat AEO u l-valutazzjoni rilevanti tal-awtoritajiet doganali għandhom ikunu disponibbli mill-applikant għal aktar spezzjoni.

(d)

jekk l-awtorità xierqa tkun sodisfatta bit-tagħrif ipprovdut taħt il-punti (a) u (b) jew (a) u (c), kif applikabbli, għandha tiżgura li d-dettalji meħtieġa tal-kunsinnatur jiddaħħlu fil-'Bażi tad-dejta dwar is-sigurtà tal-katina tal-provvista' sa mhux aktar tard mill-jum tax-xogħol li jkun imiss. Meta t-tagħrif jiddaħħal fil-bażi tad-dejta l-awtorità xierqa għandha tagħti identifikatur alfanumeriku uniku skont il-format standard għal kull sit approvat.

Jekk l-awtorità xierqa ma tkunx sodisfatta bit-tagħrif ipprovdut bħala parti mill-punti (a) u (b) jew (a) u (c), kif applikabbli, ir-raġunijiet għandhom jiġu mgħarrfa minnufih lill-entità li tkun qiegħda tfittex li tikseb l-approvazzjoni bħala kunsinnatur magħruf;

(e)	kunsinnatur magħruf ma għandux jitqies bħala approvat qabel ma d-dettalji tiegħu jiddaħħlu fil-'Bażi tad-dejta tal-Unjoni dwar is-sigurtà tal-katina tal-provvista'.”;

(i)	Jiżdied il-paragrafu li ġej fil-punt 6.4.1.4: “Eżami tas-sit tal-kunsinnatur magħruf mill-awtorità doganali rilevanti f'konformità mal-Artikolu 14n tar-Regolament (KEE) Nru 2454/93 għandu jitqies bħala verfika fuq il-post.”;

(j)

Jiġi sostitwit il-punt 6.4.1.5 b'dan li ġej:

“6.4.1.5

Jekk l-awtorità xierqa ma tibqax sodisfatta fir-rigward tal-konformità tal-kunsinnatur magħruf mal-ħtiġiet tar-Regolament (KE) Nru 300/2008 u l-atti ta' implimentazzjoni tiegħu, għandha tirtira l-istatus ta' kunsinnatur magħruf għas-siti speċifiċi.

Jekk l-entità ma jkunx għada d-detentur taċ-ċertifikat AEO msemmi fil-punt (b) jew (c) tal-Artikolu 14a(1) tar-Regolament (KEE) Nru 2454/93 jew jekk dan iċ-ċertifikat jiġi sospiż minħabba nuqqas ta' konformità mal-Artikolu 14k ta' dak ir-Regolament, l-awtorità xierqa għandha tieħu azzjoni xierqa biex tissodisfa ruħha li l-kunsinnatur magħruf jikkonforma mal-ħtiġiet tar-Regolament (KE) Nru 300/2008.

L-entità għandha tinforma lill-awtorità xierqa bi kwalunkwe bidla relatata maċ-ċertifikat AEO tagħha msemmi fil-punt (b) jew (c) tal-Artikolu 14a(1) tar-Regolament (KEE) Nru 2454/93.

Immedjatament wara l-irtirar, u, f'kull każ, fi żmien 24 siegħa, l-awtorità xierqa għandha tiżgura li l-bidla fl-istatus tal-kunsinnatur magħruf preċedenti hija indikata fil-'bażi tad-dejta tal-Unjoni dwar is-sigurtà tal-katina tal-provvista'.”;

(k)

Jiżdied il-punt 6.4.1.7 li ġej:

“6.4.1.7.

L-awtorità xierqa għandha tpoġġi għad-dispożizzjoni tal-awtorità doganali, kull tagħrif relatat mal-istatus ta' kunsinnatur magħruf li jista' jkun rilevanti fir-rigward tal-kisba ta' ċertifikat AEO kif imsemmi fil-punt (b) jew (c) tal-Artikolu 14a(1) tar-Regolament (KEE) Nru 2454/93. Dan jinkludi t-tagħrif relatat mal-approvazzjonijiet il-ġodda tal-kunsinnaturi magħrufa, mal-irtirar tal-istatus ta' kunsinnatur magħruf, mal-validazzjoni mill-ġdid u l-ispezzjonijiet, mal-iskedi ta' verifika u mar-riżultati ta' dawn il-valutazzjonijiet.

Sa mhux aktar tard mill-1 ta' Marzu 2015, għandhom jiġu stabbiliti l-modalitajiet għal dan l-iskambju ta' tagħrif bejn l-awtorità xierqa u l-awtoritajiet doganali nazzjonali.”;

(l)

Jiġi sostitwit il-punt 6.6.1.1(c) b'dan li ġej:

(c)

id-dikjarazzjoni tat-trasportatur kif tinsab fid-Dokument Mehmuż 6-E għandha ssir bi qbil mat-trasportatur li jkun daħal fi ftehim dwar it-trasport mal-aġent regolat, il-kunsinnatur magħruf jew il-kunsinnatur in konto, sakemm it-trasportatur innifsu ma jkunx aġent regolat.

Id-dikjarazzjoni ffirmata għandha tinżamm mill-aġent regolat, mill-kunsinnatur magħruf jew mill-kunsinnatur in konto li f'ismu jkun qiegħed isir it-trasport. Meta tintalab, kopja tad-dikjarazzjoni ffirmata għandha tkun magħmula disponibbli wkoll għall-aġent regolat jew għat-trasportatur tal-ajru li jirċievi l-kunsinna, jew għall-awtorità xierqa konċernata; jew";

(m)

Jiġi sostitwit il-punt 6.8.2.3 b'dan li ġej:

“6.8.2.3

L-awtorità xierqa tista' tinnomina trasportatur tal-ajru bħala ACC3 għal perjodu limitat, li jiġi fi tmiemu mhux aktar tard mit-30 ta' Ġunju 2016, f'każ li validazzjoni tas-sigurtà tal-avjazzjoni tal-UE ma tkunx tista' sseħħ għal raġunijiet oġġettivi li jmorru lil hinn mir-responsabbiltà tat-trasportatur tal-ajru. Fejn tali nominazzjoni tingħata għal perjodu ta' aktar minn sitt xhur, l-awtorità xierqa għandha tkun ivverifikat li t-trasportatur tal-ajru japplika programm ta' assigurazzjoni tal-kwalità tas-sigurtà interna li jkun ekwivalenti għall-validazzjoni tas-sigurtà tal-avjazzjoni tal-UE.”;

(n)

Jiġi sostitwit il-punt 6.8.3.1(c) b'dan li ġej:

“(c)

il-kontrolli tas-sigurtà meħtieġa jkunu ġew applikati għall-kunsinna minn kunsinnatur in konto, taħt ir-responsabbiltà tal-ACC3 jew ta' aġent regolat u vvalidat tas-sigurtà tal-avjazzjoni tal-UE, il-kunsinna tkun ġiet protetta minn interferenza mhux awtorizzata minn meta ġew applikati l-kontrolli tas-sigurtà sa ma titgħabba, u ma tinġarrx fuq inġenju tal-ajru tal-passiġġieri; jew”;

(o)

Jiġi sostitwit il-punt 6.8.3.2 b'dan li ġej:

“6.8.3.2.

Il-merkanzija u l-posta li jinġarru lejn l-Unjoni għandhom jiġu skrinjati permezz ta' wieħed mill-mezzi u l-metodi elenkati fil-punt 6.2.1 skont standard li jkun biżżejjed biex jiġi żgurat b'mod raġonevoli li dawn ma jkun fihom l-ebda oġġett ipprojbit.”;

(p)

Jiġi sostitwit il-punt 6.8.3.3 (a) b'dan li ġej:

“(a)

it-trasferiment u t-tranżitu tal-merkanzija jew tal-posta, li l-iskrinjar skont il-punt 6.8.3.2 jew il-kontrolli tas-sigurtà jkunu ġew applikati minnu nnifsu jew minn entità vvalidata tas-sigurtà tal-avjazzjoni tal-UE fil-punt tal-oriġini jew f'xi punt ieħor fil-katina tal-provvista, u li tali kunsinni jkunu ġew protetti minn interferenza mhux awtorizzata minn meta jkunu ġew applikati l-kontrolli tas-sigurtà sa meta jitgħabbew;”;

(q)

Fil-punt 6.8.4.1, is-sentenza tal-bidu tinbidel b'dan li ġej:

“6.8.4.1.

Sabiex isir aġent regolat u vvalidat tas-sigurtà tal-avjazzjoni tal-UE jew kunsinnatur magħruf, l-entitajiet li jinsabu f'pajjiżi terzi għandhom jiġu vvalidati skont waħda miż-żewġ għażliet li ġejjin u għandhom jiġu elenkati fil-bażi tad-dejta tal-ACC3(s) fejn jitwasslu direttament il-merkanzija jew il-posta sabiex jinġarru lejn l-Unjoni:”;

(r)

Jiżdiedu l-punti 6.8.4.4 sa 6.8.4.6 li ġejjin:

“6.8.4.4.

Entità tal-merkanzija jew tal-posta ttrasportata bl-ajru li taħdem f'netwerk b'siti differenti f'pajjiżi terzi, tista' tikseb nominazzjoni waħda bħala aġent regolat u vvalidat tas-sigurtà tal-avjazzjoni tal-UE li tkopri s-siti kollha tan-netwerk jekk:

(a)	l-operazzjonijiet rilevanti tas-sigurtà tal-avjazzjoni tan-netwerk, inklużi s-servizzi ta' trasport bejn is-siti, ikunu koperti minn programm uniku ta' sigurtà jew minn programmi standardizzati ta' sigurtà; u

(b)	l-implimentazzjoni tal-programmi ta' sigurtà għanhom ikunu suġġetti għal programm uniku ta' assigurazzjoni tal-kwalità tas-sigurtà interna li jkun ekwivalenti għall-validazzjoni tas-sigurtà tal-avjazzjoni tal-UE; u

(c)

qabel in-nominazzjoni tan-netwerk bħala aġent regolat tas-sigurtà tal-avjazzjoni tal-UE, is-siti li ġejjin tal-entità ġew soġġetti għal validazzjoni tas-sigurtà tal-avjazzjoni tal-UE:

i.	is-siti li minnhom il-merkanzija jew il-posta titwassal direttament għal ACC3, u

ii.	minn tal-inqas żewġ siti jew numru li jikkorrispondi għal 20 % tas-siti tan-netwerk, skont liema minnhom huwa l-ogħla, li minnhom il-merkanzija jew il-posta tintbagħat fis-siti msemmija fil-punt i., u

iii.	is-siti kollha li jinsabu f'pajjiżi terzi elenkati fid-Dokument Mehmuż 6-I tal-Anness tad-Deċiżjoni tal-Kummissjoni C(2010) 774.

Sabiex l-aġent regolat u vvalidat tas-sigurtà tal-avjazzjoni tal-UE jibqa' nnominat għas-siti kollha tan-netwerk li jkunu għadhom ma ġewx ivvalidati sa mhux aktar tard mit-30 ta' Ġunju 2018, kull sena wara s-sena tan-nominazzjoni, minn tal-inqas żewġ siti jew numru li jikkorispondi għal 20 % tas-siti, skont liema minnhom huwa l-ogħla, li minnhom il-merkanzija jew il-posta tintbagħat fis-siti msemmija fil-punt (c) i. għandhom ikunu suġġetti għal validazzjoni tas-sigurtà tal-avjazzjoni tal-UE sakemm is-siti kollha jkunu vvalidati.

Validatur tas-sigurtà tal-avjazzjoni tal-UE għandu jistabbilixxi l-pjan direzzjonali li jelenka l-ordni tas-siti li jridu jiġu vvalidati kull sena, magħżula b'mod aleatorju. Il-pjan direzzjonali għandu jiġi stabbilit b'mod indipendenti mill-entità li tħaddem in-netwerk u ma jistax jinbidel minn dik l-istess entità. Dan il-pjan direzzjonali għandu jifforma parti integrali mir-rapport ta' validazzjoni li abbażi tiegħu n-netwerk ikun ġie nnominat bħala aġent tal-UE regolat u vvalidat ta' pajjiż terz.

Ladarba jkun ġie suġġett għal validazzjoni tas-sigurtà tal-avjazzjoni tal-UE, sit tan-netwerk għandu jitqies bħala aġent regolat u vvalidat tas-sigurtà tal-avjazzjoni tal-UE skont il-punt 6.8.4.2 (a).

6.8.4.5.

Jekk il-validazzjoni tas-sigurtà tal-avjazzjoni tal-UE ta' sit tan-netwerk imsemmi fil-punt 6.8.4.4 (c) ii tikkonkludi li s-sit naqas milli jikkonforma mal-objettivi msemmija fil-lista ta' verifika li tinsab fid-Dokument Mehmuż 6-C2, il-merkanzija u l-posta minn dak is-sit għandhom jiġu skrinjati f'sit ivvalidat skont il-punt 6.8.4.2 (a) sakemm validazzjoni tas-sigurtà tal-avjazzjoni tal-UE tikkonferma l-konformità mal-objettivi tal-lista ta' verifika.

6.8.4.6.

Il-punti 6.8.4.4 sa 6.8.4.6 jiskadu fit-30 ta' Ġunju 2018.”

(6)

Id-Dokument Mehmuż 6-B huwa emendat kif ġej:

(a)

jiddaħħal il-paragrafu li ġej qabel it-taqsima bl-isem ta' 'Introduzzjoni':

“Jekk int detentur ta' ċertifikat AEO imsemmi fil-punt (b) jew (c) tal-Artikolu 14a(1) tar-Regolament (KEE) Nru 2454/93 (l-hekk imsejħa ċertifikati AEOF u AEOS) u jekk is-sit li għalih qed titlob l-istatus ta' kunsinnatur magħruf ġie eżaminat b'suċċess mill-awtoritajiet doganali f'data li ma tkunx qabel 3 snin mid-data tat-talba tal-istatus ta' kunsinnatur magħruf, int meħtieġ li timla, u li rappreżentant legali tal-kumpanija tiegħek jiffirma, l-Ewwel (1) Parti dwar l-organizzazzjoni u r-responsabbiltajiet, kif ukoll id-dikjarazzjoni tal-impenji tal-'Lista ta' verifika tal-validazzjoni għal kunsinnaturi magħrufa' li tinsab fid-Dokument Mehmuż 6-C.”;

(b)

tinbidel it-taqsima 'L-organizzazzjoni u r-responsabbiltajiet' b'dan li ġej:

“L-organizzazzjoni u r-responsabbiltajiet

Se tkun meħtieġ tipprovdi dettalji dwar l-organizzazzjoni tiegħek (l-isem, in-numru tal-VAT jew tal-Kamra tal-Kummerċ jew in-numru ta' reġistrazzjoni tal-korporazzjoni jekk ikunu applikabbli, in-numru taċ-ċertifikat AEO u d-data tal-aħħar eżami ta' dan is-sit mill-awtoritajiet doganali, jekk ikun applikabbli), l-indirizz tas-sit li għandu jiġi vvalidat u l-indirizz ewlieni tal-organizzazzjoni (jekk dan ikun differenti minn dak tas-sit li jkun se jiġi vvalidat). Huma meħtieġa: id-data taż-żjara tal-validazzjoni preċedenti u l-aħħar identifikatur alfanumeriku uniku (jekk ikun applikabbli), kif ukoll in-natura tal-kummerċ, l-għadd approssimattiv tal-ħaddiema fuq il-post, l-isem u t-titlu tal-persuna responsabbli għas-sigurtà tal-merkanzija bl-ajru/posta bl-ajru u d-dettalji ta' kuntatt.”;

(7)

Tinbidel il-Parti 1 tad-Dokument Mehmuż 6-C b'dan li ġej:

“Parti 1: L-organizzazzjoni u r-responsabbiltajiet

1.1	Data tal-validazzjoni*

jj/xx/ssss

1.2	Data tal-validazzjoni ta' qabel u l-Identifikatur Uniku, fejn ikun applikabbli

jj/xx/ssss

UNI

1.3	Isem l-organizzazzjoni li għandha tiġi vvalidata*

Isem

Numru tal-VAT/Numru tal-Kamra tal-Kummerċ/Numru ta' reġistrazzjoni tal-korporazzjoni (jekk applikabbli)

1.4	Tagħrif dwar iċ-ċertifikat AEOF jew AEOS, jekk applikabbli

Numru taċ-ċertifikat tal-AEO

Data ta' meta dan is-sit ġie eżaminat l-aħħar mill-awtoritajiet doganali

1.5	Indirizz tas-sit li għandu jiġi vvalidat*

Numru/Unità/Bini

Triq

Belt

Kodiċi postali

Pajjiż

1.6	Indirizz ewlieni tal-organizzazzjoni (jekk dan ikun differenti minn dak tas-sit li se jiġi vvalidat, sakemm ikun fl-istess pajjiż)

Numru/Unità/Bini

Triq

Belt

Kodiċi postali

Pajjiż

1.7	Natura tal-Kummerċ — tipi ta' merkanzija pproċessati

1.8	L-applikant huwa responsabbli għal dawn li ġejjin:

(a)	Produzzjoni

(b)

Imballaġġ

(c)

Ħżin

(d)

Dispaċċ

(e)	Oħrajn, jekk jogħġbok speċifika

1.9	Għadd approssimattiv ta' ħaddiema fuq il-post

1.10	Isem u t-titlu tal-persuna responsabbli għas-sigurtà tal-merkanzija bl-ajru/posta bl-ajru*

Isem

Titlu tax-xogħol

1.11	Numru ta' kuntatt bit-telefown

Numru tat-telefown

1.12	Posta elettronika *

Posta elettronika”;

(8)

Jiġi sostitwit is-seba' inċiż tat-tieni paragrafu tad-Dokument Mehmuż 6-E b'dan li ġej:

“—

It-trasport mhux se jiġi subkuntrattat lil parti terza, sakemm il-parti terza:

(a)	ma jkollhiex ftehim ta' trasportatur ma' aġent regolat, ma' kunsinnatur magħruf jew ma' kunsinnatur in konto responsabbli mit-trasport [l-istess isem ta' hawn fuq]; jew

(b)	ma tkunx approvata jew ċertifikata mill-awtorità xierqa; jew

(c)

ma jkollhiex ftehim ta' trasportatur mat-trasportatur firmatarju li jeħtieġ li l-parti terza ma tagħmilx subkuntratti ulterjuri u li din timplimenta l-proċeduri ta' sigurtà li jinsabu f'din id-dikjarazzjoni. It-trasportatur firmatarju jġorr ir-responsabbiltà kollha għat-trasport kollu f'isem l-aġent regolat, il-kunsinnatur magħruf jew il-kunsinnatur in konto; u”;

(9)

Jiġi sostitwit id-Dokument Mehmuż 6-F b'dan li ġej:

“DOKUMENT MEHMUŻ 6-F

MERKANZIJA U POSTA

6-Fi

6-Fii

IL-PAJJIŻI TERZI, KIF UKOLL PAJJIŻI U TERRITORJI OĦRA LI FIHOM, F'KONFORMITÀ MAL-ARTIKOLU 355 TAT-TRATTAT DWAR IL-FUNZJONAMENT TAL-UNJONI EWROPEA, MA JAPPLIKAX IT-TITOLU VI TA' DAK IT-TRATTAT, LI GĦALIHOM MHIJIEX MEĦTIEĠA NOMINAZZJONI ACC3, HUMA ELENKATI F'DEĊIŻJONI SEPARATA TAL-KUMMISSJONI.

6- Fiii

ATTIVITAJIET TA' VALIDAZZJONI TA' PAJJIŻI TERZI, KIF UKOLL PAJJIŻI U TERRITORJI OĦRA LI FIHOM, F'KONFORMITÀ MAL-ARTIKOLU 355 TAT-TRATTAT DWAR IL-FUNZJONAMENT TAL-UNJONI EWROPEA, MA JAPPLIKAX IT-TITOLU VI TA' DAK IT-TRATTAT, RIKONOXXUTI BĦALA EKWIVALENTI GĦALL-VALIDAZZJONI TAS-SIGURTÀ TAL-AVJAZZJONI TAL-UE.”;

(10)

Il-Kapitolu 8 huwa emendat kif ġej:

(a)

Jinbdiel il-punt 8.0.4 b'dan li ġej:

“8.0.4.

Il-lista ta' oġġetti pprojbiti fil-provvisti għal matul it-titjira hija l-istess bħal dik stabbilita fid-Dokument Mehmuż 1-A. L-oġġetti pprojbiti għandhom jiġu ttrattati f'konformità mal-punt 1.6.”;

(b)

Mill-1 ta' Marzu 2015, jinbidel il-punt 8.1.4 b'dan li ġej:

“8.1.4. Nominazzjoni tal-fornituri magħrufa

8.1.4.1. Kwalunkwe entità ('il-fornitur') li tiżgura li l-kontrolli tas-sigurtà kif imsemmija fil-punt 8.1.5 u li twassal il-provvisti għal matul it-titjira, iżda mhux direttament sal-inġenju tal-ajru, għandha tiġi nnominata bħala fornitur magħruf mill-operatur jew l-entità li tkun qiegħda tforni ('l-entità li tinnomina'). Dan ma għandux japplika għal fornitur regolat.

8.1.4.2. Sabiex jiġi nnominat bħala fornitur magħruf, il-fornitur irid jipprovdi lill-entità li tinnomina bi:

(a)	id-'Dikjarazzjoni tal-impenji — fornitur magħruf tal-provvisti matul it-titjira' li tinsab fid-Dokument Mehmuż 8-B. Din id-dikjarazzjoni għandha tiġi ffirmata mir-rappreżentant legali; u

(b)	il-programm ta' sigurtà li jkopri l-kontrolli ta' sigurtà kif imsemmi fil-punt 8.1.5.

8.1.4.3. Il-fornituri magħrufa kollha jridu jinnominaw abbażi ta' validazzjonijiet ta':

(a)	ir-relevanza u l-kompletezza tal-programm ta' sigurtà fir-rigward tal-punt 8.1.5; u

(b)	l-implimentazzjoni tal-programm ta' sigurtà mingħajr defiċenzi.

Jekk l-awtorità xierqa jew l-entità li tinnomina ma jibqgħux sodisfatti fir-rigward tal-konformità tal-fornitur magħruf mal-ħtiġiet tal-punt 8.1.5, l-entità li tinnomina għandha, mingħajr dewmien, tirtira l-istatus ta' fornitur magħruf.

8.1.4.4. L-awtorità xierqa għandha tiddefinixxi fil-programm nazzjonali tagħha għas-sigurtà tal-avjazzjoni ċivili kif imsemmi fl-Artikolu 10 tar-Regolament (KE) Nru 300/2008, jekk il-validazzjonijiet tal-programm ta' sigurtà u l-implimentazzjoni tiegħu għandhomx jitwettqu minn awditur nazzjonali, minn validatur tas-sigurtà tal-avjazzjoni tal-UE jew minn persuna li taġixxi f'isem l-entità li tinnomina li tkun ġiet innomminata u mħarrġa għal dak il-għan.

Il-validazzjonijiet iridu jiġu rreġistrati f'din il-leġiżlazzjoni u jekk mhux iddikjarat mod ieħor, iridu jsiru qabel in-nominazzjoni u jiġu ripetuti kull sentejn wara dik id-data.

Jekk il-validazzjoni ma ssirx f'isem l-entità li tinnomina, kwalunkwe reġistrazzjoni tagħha għandha titqiegħed għad-dispożizzjoni tagħha.

8.1.4.5. Il-validazzjoni tal-implimentazzjoni tal-programm ta' sigurtà li jikkonferma n-nuqqas ta' defiċenzi għandu jikkonsisti jew fi:

(a)	żjara tal-fornitur fuq is-sit kull sentejn; jew

(b)

kontrolli regolari mal-wasla tal-provvisti li jitwasslu minn dak il-fornitur magħruf, li għandhom jibdew wara n-nominazzjoni, inkluż:

—	verifika li l-persuna li twassal il-provvisti f'isem il-fornitur magħruf kienet imħarrġa sew; u

—	verifika li l-provvisti huma tassew siguri; u

—	skrinjar tal-provvisti daqslikieku l-provvisti ġejjin mingħand fornitur mhux magħruf.

Dawn il-kontrolli jridu jitwettqu b'mod mhux prevedibbli u għandhom isiru minn tal-inqas darba kull tliet xhur jew fuq 20 % tal-provvisti kollha mwassla mill-fornitur magħruf lill-entità li tinnomina.

L-għażla b) tista' tintuża biss jekk l-awtorità xierqa tkun iddefiniet fil-programm nazzjonali tagħha għas-sigurtà tal-avjazzjoni ċivili li l-validazzjoni għandha titwettaq minn persuna li taġixxi f'isem l-entità li tinnomina.

8.1.4.6. Il-metodi applikati u l-proċeduri li għandhom jiġu segwiti matul u wara n-nominazzjoni għandhom jiġu stabbiliti fil-programm ta' sigurtà tal-entità li tinnomina.

8.1.4.7. L-entità li tinnomina għandha żżomm:

(a)	lista tal-fornituri magħrufa kollha li tkun innominat, li turi d-data ta' skadenza tan-nominazzjoni tagħhom, u

(b)	id-dikjarazzjoni ffirmata, kopja tal-programm ta' sigurtà u kull rapport li jirreġistra l-implimentazzjoni tagħha għal kull fornitur magħruf, għal mill-inqas 6 xhur wara l-iskadenza tan-nominazzjoni tagħha.

Fuq talba, dawn id-dokumenti għandhom ikunu magħmula disponibbli għall-awtorità xierqa għal finijiet ta' monitoraġġ tal-konformità.”;

(11)

Il-Kapitolu 9 huwa emendat kif ġej:

(a)

Jiġi sostitwit il-punt 9.0.4 b'dan li ġej:

“9.0.4.

Il-lista ta' oġġetti pprojbiti fil-provvisti tal-ajruport hija l-istess bħal dik stabbilita fid-Dokument Mehmuż 1-A. L-oġġetti pprojbiti għandhom jiġu ttrattati f'konformità mal-punt 1.6.”;

(b)

Mill-1 ta' Marzu 2015, jinbidel il-punt 9.1.3 b'dan li ġej:

“9.1.3. Nominazzjoni tal-fornituri magħrufa

9.1.3.1. Kwalunkwe entità ('il-fornitur') li tiżgura li tiżgura li l-kontrolli tas-sigurtà kif imsemmija fil-punt 9.1.4 u li twassal il-provvisti tal-ajruport, għandha tiġi nnominata bħala fornitur magħruf mill-operatur tal-ajruport.

9.1.3.2. Sabiex jiġi nnominat bħala fornitur magħruf, il-fornitur irid jipprovdi lill-operatur tal-ajruport bi:

(a)	id-'Dikjarazzjoni tal-impenji — fornitur magħruf tal-provvisti tal-ajruport' li tinsab fid-Dokument Mehmuż 9-A. Din id-dikjarazzjoni għandha tiġi ffirmata mir-rappreżentant legali; u

(b)	il-programm ta' sigurtà li jkopri l-kontrolli ta' sigurtà kif imsemmi fil-punt 9.1.4.

9.1.3.3. Il-fornituri magħrufa kollha jridu jinnominaw abbażi ta' validazzjonijiet ta':

(a)	ir-relevanza u l-kompletezza tal-programm ta' sigurtà fir-rigward tal-punt 9.1.4; u

(b)	l-implimentazzjoni tal-programm ta' sigurtà mingħajr defiċenzi.

Jekk l-awtorità xierqa jew l-operatur tal-ajruport ma jibqgħux sodisfatti fir-rigward tal-konformità tal-fornitur magħruf mal-ħtiġiet tal-punt 9.1.4, l-operatur tal-ajruport għandu, mingħajr dewmien, jirtira l-istatus ta' fornitur magħruf.

9.1.3.4. L-awtorità xierqa għandha tiddefinixxi fil-programm nazzjonali tagħha għas-sigurtà tal-avjazzjoni ċivili kif imsemmi fl-Artikolu 10 tar-Regolament (KE) Nru 300/2008, jekk il-validazzjonijiet tal-programm ta' sigurtà u l-implimentazzjoni tiegħu għandhomx jitwettqu minn awditur nazzjonali, minn validatur tas-sigurtà tal-avjazzjoni tal-UE jew minn persuna li taġixxi f'isem l-operatur tal-ajruport li tkun innomminata u mħarrġa għal dak il-għan.

Il-validazzjonijiet iridu jiġu rreġistrati f'din il-leġiżlazzjoni u jekk mhux iddikjarat mod ieħor, iridu jsiru qabel in-nominazzjoni u jiġu ripetuti kull sentejn wara dik id-data.

Jekk il-validazzjoni ma ssirx f'isem l-operatur tal-ajruport, kwalunkwe reġistrazzjoni tagħha għandha titpoġġa għad-dispożizzjoni tiegħu.

9.1.3.5. Il-validazzjoni tal-implimentazzjoni tal-programm ta' sigurtà li jikkonferma n-nuqqas ta' defiċenzi għandu jikkonsisti jew fi:

(a)	żjara tal-fornitur fis-sit kull sentejn; jew

(b)

kontrolli regolari mal-aċċess għaż-żona ta' sigurtà ristretta tal-provvisti li jitwasslu minn dak il-fornitur magħruf, li għandhom jibdew wara n-nominazzjoni, inklużi:

—	verifika li l-persuna li twassal il-provvisti f'isem il-fornitur magħruf kienet imħarrġa sew; u

—	verifika li l-provvisti huma tassew siguri; u

—	skrinjar tal-provvisti daqslikieku l-provvisti ġejjin mingħand fornitur mhux magħruf.

Dawn il-kontrolli jridu jitwettqu b'mod mhux previst u jsiru minn tal-inqas darba kull tliet xhur jew fuq 20 % tal-provvisti kollha mwassla mill-fornitur magħruf lill-operatur tal-ajruport.

L-għażla b) tista' tintuża biss jekk l-awtorità xierqa ddefiniet fil-programm nazzjonali tagħha għas-sigurtà tal-avjazzjoni ċivili li l-validazzjoni għandha titwettaq minn persuna li taġixxi f'isem l-operatur tal-ajruport.

9.1.3.6. Il-metodi applikati u l-proċeduri li jridu jiġu segwiti matul u wara n-nominazzjoni għandhom jiġu stabbiliti fil-programm ta' sigurtà tal-operatur tal-ajruport.

9.1.3.7. L-operatur tal-ajruport għandu jżomm:

(a)	lista tal-fornituri magħrufa kollha li nnomina bid-data ta' skadenza tan-nominazzjoni tagħhom, u

(b)	id-dikjarazzjoni ffirmata, kopja tal-programm ta' sigurtà u kull rapport li jirreġistra l-implimentazzjoni tagħha għal kull fornitur magħruf, għal mill-inqas 6 xhur wara l-iskadenza tan-nominazzjoni tiegħu.

Fuq talba, dawn id-dokumenti għandhom ikunu magħmula disponibbli għall-awtorità xierqa għal finijiet ta' monitoraġġ tal-konformità.”;

(12)

Il-Kapitolu 12 huwa emendat kif ġej:

(a)

Jiġi sostitwit il-punt 12.4.2 'Standards għall-EDS' b'dan li ġej:

“12.4.2. Standards għall-EDS

12.4.2.1. L-EDS kollha installati qabel l-1 ta' Settembru 2014 għandhom minn tal-inqas jissodisfaw l-istandard 2.

12.4.2.2. L-istandard 2 għandu jiskadi fl-1 ta' Settembru 2020.

12.4.2.3. L-awtorità xierqa tista' tippermetti li l-EDS tal-istandard 2 installati bejn l-1 ta' Jannar 2011 u l-1 ta' Settembru 2014 jibqgħu jintużaw sa mhux aktar tard mill-1 ta' Settembru 2022.

12.4.2.4. Meta l-awtorità xierqa tagħti l-awtorizzazzjoni tagħha li tippermetti li l-EDS tal-istandard 2 jibqgħu jintużaw mill-1 ta' Settembru 2020, din għandha tgħarraf lill-Kummissjoni.

12.4.2.5. L-EDS kollha installati mill-1 ta' Settembru 2014 għandhom jissodisfaw l-istandard 3.

12.4.2.6. L-EDS kollha għandhom jissodisfaw l-istandard 3 sa mhux aktar tard mill-1 ta' Settembru 2020, sakemm ma jkunx japplika l-punt 12.4.2.3.”;

(b)

Il-lista ta' Dokumenti Mehmuża wara l-punt 12.11 tinbidel b'dan li ġej:

“DOKUMENT MEHMUŻ 12-A

Id-dispożizzjonijiet dettaljati dwar il-ħtiġiet tal-prestazzjoni għad-WTMD huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-B

Id-dispożizzjonijiet dettaljati dwar il-ħtiġiet tal-prestazzjoni għall-EDS huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-C

Id-dispożizzjonijiet dettaljati dwar il-ħtiġiet tal-prestazzjoni għat-tagħmir sabiex ikunu skrinjati l-likwidi, l-aerosols u l-ġellijiet (LAGS) huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-D

Id-dispożizzjonijiet dettaljati dwar il-ħtiġiet tal-prestazzjoni għal EDD huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-E

Id-dispożizzjonijiet dettaljati dwar il-proċeduri ta' approvazzjoni ta' EDD huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-F

Id-dispożizzjonijiet dettaljati dwar iż-żoni ta' ttestjar u l-kundizzjonijiet tat-test tal-approvazzjoni għal EDD huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-G

Id-dispożizzjonijiet dettaljati dwar il-ħtiġiet tal-kontroll tal-kwalità għal EDD huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-H

Id-dispożizzjonijiet dettaljati dwar ’EDD li joperaw liberament — Standards għall-metodoloġija tal-użu’ huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-I

Id-dispożizzjonijiet dettaljati dwar ’EDD li jaħdmu biss permezz tal-metodu ta' lokalizzazzjoni mill-bogħod ta' traċċi ta' splussivi — Standards għall-metodoloġija tal-użu’ huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-J

Id-dispożizzjonijiet dettaljati dwar il-ħtiġiet tal-prestazzjoni għal MDE huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-K

Id-dispożizzjonijiet dettaljati dwar il-ħtiġiet tal-prestazzjoni għall-iskanners tas-sigurtà huma stabbiliti f'Deċiżjoni separata tal-Kummissjoni.

DOKUMENT MEHMUŻ 12-L

Id-dispożizzjonijiet dettaljati dwar il-ħtiġiet tal-prestazzjoni għall-Individwazzjoni ta' Traċċi ta' Splussivi (ETD) huma stabbiliti f'Deċiżjoni separata tal-Kummissjoni.”

Top

Choose the experimental features you want to try