9.3.2012   

MT

Il-Ġurnal Uffiċjali tal-Unjoni Ewropea

L 71/42

(1)

Ir-Regolament (KE) Nru 834/2007, u b’mod partikulari l-Kapitolu 4 tat-Titolu III tiegħu jistabilixxi rekwiżiti bażiċi f’dak li għandu x’jaqsam mal-produzzjoni organika tal-ikel proċessat. Ir-regoli dettaljati għall-implimentazzjoni ta’ dawk ir-rekwiżiti bażiċi ġew stabiliti permezz tar-Regolament tal-Kummissjoni (KE) Nru 889/2008 tal-5 ta’ Settembru 2008 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 834/2007 dwar il-produzzjoni organika u t-tikkettar ta' prodotti organiċi fir-rigward tal-produzzjoni, it-tikkettar u l-kontroll organiċi (2).

(2)

Għandhom jiġu stipulati dispożizzjonijiet speċifiċi dwar il-produzzjoni tal-inbid organiku fir-Regolament (KE) Nru 889/2008. Dawk id-dispożizzjonijiet għandhom japplikaw għall-prodotti tas-settur tal-inbid kif imsemmi fir-Regolament tal-Kunsill (KE) Nru 1234/2007 tat-22 ta’ Ottubru 2007 li jistabbilixxi organizzazzjoni komuni tas-swieq agrikoli u dwar dispożizzjonijiet speċifiċi għal ċerti prodotti agrikoli (ir-Regolament dwar l-OKS Unika) (3).

(3)

L-ipproċessar tal-inbid organiku jeħtieġ l-użu ta’ ċerti prodotti u sustanzi bħal addittivi jew aġenti tal-ipproċessar, taħt kundizzjonijiet iddefiniti sew. Għal dak l-għan u abbażi tar-rakkomandazzjonijiet tal-istudju li jkopri l-Unjoni kollha dwar "Il-vitikultura u vinikultura organiċi: l-iżvilupp ta’ teknoloġiji favorevoli għall-ambjent u għall-konsumatur għat-titjib tal-kwalità tal-inbid organiku u qafas leġiżlattiv b'bażi xjentifika" ("Organic viticulture and wine-making: development of environment and consumer friendly technologies for organic wine quality improvement and scientifically based legislative framework" magħruf ukoll bħala "ORWINE") (4), l-użu ta’ tali prodotti u sustanzi għandu jkun permess skont l-Artikolu 21 tar-Regolament (KE) Nru 834/2007.

(4)

Ċerti prodotti u sustanzi, li jintużaw bħala adittivi u aġenti tal-ipproċessar għall-prattiki enoloġiċi skont ir-Regolament tal-Kummissjoni (KE) Nru 606/2009 tal-10 ta’ Lulju 2009 li jistabbilixxi regoli ddettaljati għall-implimentazzjoni tar-Regolament tal-Kunsill (KE) Nru 479/2008 fir-rigward tal-kategoriji tal-prodotti tad-dwieli, il-prattiċi enoloġiċi u r-restrizzjonijiet applikabbli (5), huma derivati minn materja prima ta’ oriġini agrikola. F'tali każijiet il-materja prima tista' tkun disponibbli fis-suq fil-forma organika. Sabiex jitħeġġeġ l-iżvilupp tad-domanda tagħhom fis-suq, għandha tingħata preferenza lill-użu ta’ addittivi u aġenti tal-ipproċessar derivati minn materja prima minn biedja organika.

(5)

Il-prattiki u t-tekniki għall-produzzjoni tal-inbid huma stabbiliti fuq il-livell tal-Unjoni fir-Regolament (KE) Nru 1234/2007 u r-regoli implimentattivi tiegħu kif stipulati fir-Regolament (KE) Nru 606/2009 u fir-Regolament tal-Kummissjoni (KE) Nru 607/2009 tal-14 ta’ Lulju 2009 li jistabbilixxi ċerti regoli dettaljati għall-implimentazzjoni tar-Regolament tal-Kunsill (KE) Nru 479/2008 fir-rigward tad-denominazzjonijiet tal-oriġini u l-indikazzjonijiet ġeografiċi protetti, termini tradizzjonali, it-tikkettar u l-preżentazzjoni ta’ ċerti prodotti fis-settur tal-inbid (6). L-użu ta’ dawn il-prattiki u tekniki fil-vinikultura organika jista' jkun li mhux konformi mal-għanijiet u l-prinċipji stipulati fir-Regolament (KE) Nru 834/2007, u partikolarment mal-prinċipji speċifiċi applikabbli għall-ipproċessar tal-ikel organiku, imsemmi fl-Artikolu 6 tar-Regolament (KE) Nru 834/2007. Għaldaqstant, għandhom jiġu stabiliti restrizzjonijiet u limitazzjonijiet speċifiċi għal ċerti prattiki u proċessi enoloġiċi.

(6)

Ċerti prattiki oħrajn li huma użati ħafna fl-ipproċessar tal-ikel huma wkoll disponibbli għall-vinikultura, u jista’ wkoll ikollhom xi effetti fuq ċerti karatteristiċi essenzjali tal-prodotti organiċi, u għaldaqstant fuq in-natura proprja tagħhom, imma bħalissa ma hemm l-ebda teknika alternattiva għalihom. Dan japplika għat-trattamenti bis-sħana, filtrazzjoni, osmożi inversa u l-użu tar-reżini ta' skambju joniku. Konsegwentement, dawk il-prattiki jridu jkunu disponibbli għall-produtturi tal-inbid organiku, imma l-użu tagħhom għandu jkun ristrett. Possibbilità għar-rieżaminazzjoni tat-trattament bis-sħana, bir-reżini ta’ skambju joniku u bl-ożmożi inversa għandha tiġi prevista f'waqtha.

(7)

Prattiki u proċessi enoloġiki li jistgħu jiżgwidaw fir-rigward tan-natura proprja tal-prodotti organiċi għandhom jiġu esklużi mill-vinikultura organika. Dan japplika għall-konċentrazzjoni bit-tkessiħ, id-dealkolizzazzjoni, l-eliminazzjoni tad-dijossidu tal-kubrit by proċess fiżiku, eletrodialiżi u l-użu ta’ skambjaturi ta’ katjoni minħabba dawk il-prattiki enoloġiċi jbiddlu konsiderevolment il-kompożizzjoni tal-prodott tal-punt li jistgħu jiżgwidaw dwar in-natura proprja tal-inbid organiku. Għall-istess finijiet, l-użu jew ż-żieda ta’ ċerti sustanzi jistgħu jiżgwidaw ukoll rigward in-natura proprja tal-inbid organiku. Għalhekk huwa xieraq li jiġi stipulat li tali sustanzi ma għandhomx jintużaw jew jiġu miżjuda bħala prattiki enoloġiċi organiċi u pproċessar ta’ trattament.

(8)

Fir-rigward tas-sulfiti b'mod aktar speċifiku, ir-riżultati tal-istudju ORWINE juru li t-tnaqqis fil-livell tad-dijossidu tal-kubrit fl-inbejjed magħmula minn għeneb organiku diġà ntlaħaq mill-produtturi tal-inbid organiku fl-Unjoni, meta mqabbel mal-kontenut massimu ta’ dijossidu tal-kubrit li jiġi awtorizzat għall-inbejjed mhux organiċi. Għaldaqstant, jaqbel li jiġi ffissat kontenut massimu tal-kubrit speċifiku għall-inbejjed organiċi, li għandu jkun inqas mil-livell awtorizzat għall-inbejjed mhux organiċi. Il-kwantitajiet meħtieġa ta’ dijossidu tal-kubrit jiddependu mill-kategoriji varji tal-inbejjed, kif ukoll minn ċerti karatteristiċi intrinsiċi tal-inbid, speċifikament il-kontenut ta’ zokkor, li għandhom jitqiesu meta jiġu stabbiliti l-livelli massimi tal-kontenut ta’ dijossidu tal-kubrit speċifiku għall-inbejjed organiċi. Madankollu, il-kundizzjonijiet estremi tat-temp jistgħu jipprovokaw diffikultajiet f'ċerti żoni vinikoli, li jwasslu għall-ħtieġa li jintużaw ammonti supplimentari ta’ sulfiti fit-tħejjija tal-inbejjed biex tintlaħaq l-istabbiltà tal-prodott finali ta’ dik is-sena. Għaldaqstant, għandha tkun permessa ż-żieda fil-kontenut massimu tad-dijossidu tal-kubrit meta jokkorru tali kundizzjonijiet.

(9)

L-inbid huwa prodott b'ħajja ta' ħżin twila, u ċerti nbejjed ikunu tradizzjonalment maħżuna għal bosta snin fil-ġarer jew tankijiet qabel ma jitqiegħdu fis-suq. Skont il-kundizzjonijiet tar-Regolament tal-Kunsill (KEE) Nru 2092/91 tal-24 ta' Ġunju 1991 dwar il-produzzjoni organika ta' prodotti agrikoli u l-indikazzjonijiet li jirreferu għalihom fil-prodotti agrikoli u fl-oġġetti tal-ikel (7) u għal perjodu limitat skont ir-Regolament (KE) Nru 889/2008, il-kummerċjalizzazzjoni ta’ tali nbejjed permezz taż-żamma tar-rekwiżiti tal-ittikkettar skont dak ir-Regolament għandu jkun permess sakemm l-inventarji jiġu eżawriti.

(10)

Uħud mill-inbejjed maħżuna kienu diġà prodotti bi proċess vinikolu li diġà kien jikkonforma mar-regoli tal-produzzjoni tal-inbid organiku previst minn dan ir-Regolament. Fejn dan ikun jista' jiġi pprovat, l-użu tal-logo Komunitarju tal-produzzjoni organika kif imsemmi fl-Artikolu 25(1) tar-Regolament (KE) Nru 834/2007, li mill-1 ta’ Lulju 2010 jissejjaħ il-"Logo organiku tal-UE", għandu jkun awtorizzat, biex ikunu possibbli l-paragun u l-kompetizzjoni ġusti bejn l-inbejjed organiċi prodotti qabel u wara d-dħul fis-seħħ ta’ dan ir-Regolament. Jekk dan ma jkunx il-każ, l-inbid għandu jiġi ttikkettat esklussivament bħala "inbid magħmul minn għeneb organiku", mingħajr ma juri l-logo organiku tal-UE, sakemm l-inbid ikun prodott skont ir-Regolament (KEE) Nru 2092/91 u r-Regolament (KEE) Nru 889/2008 qabel l-emendi permezz ta’ dan ir-Regolament.

(11)

Ir-Regolament (KE) Nru 889/2008 għandu għalhekk jiġi emendat skont dan.

(12)

Il-miżuri previsti permezz ta’ dan ir-Regolament huma skont l-opinjoni tal-Kumitat Regolatorju dwar il-produzzjoni organika,

(1)

It-Titolu II huwa emendat kif ġej:

(2)

It-Titolu V huwa emendat kif ġej:

(3)

Jiddaħħal l-Anness ġdid VIIIa, li t-test tiegħu huwa stipulat fl-Anness ta' dan ir-Regolament.