32002R1282

Ir-Regolament tal-Kummissjoni (KE) Nru 1282/2002

tal-15 ta’ Lulju 2002

li jemenda l-Annessi tad-Direttiva tal-Kunsill 92/65/KEE li tistabbilixxi rekwiżiti dwar is-saħħa ta’ l-annimali biex jirregolaw il-kummerċ fi u importazzjoni fil-Komunità ta’ annimali, semen, ova u embrijoni mhux soġġetti għar-rekwiżiti tas-saħħa ta’ l-annimali stabbiliti f’regoli speċifiċi Komunitarji msemmija fl-Anness A(1) tad-Direttiva 90/425/KEE

(Test b’rilevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 92/65/KEE tat-13 ta’ Lulju 1992 li stabbiliet rekwiżiti dwar is-saħħa ta’ l-annimali li jirregolaw il-kummerċ fi u l-importazzjoni fil-Komunità ta’ annimali, semen, ova u embrijoni mhux soġġetti għal rekwiżiti tas-saħħa ta’ l-annimali stabbiliti f’regoli speċifiċi Komunitarji msemmija fl-Anness A(1) tad-Direttiva 90/425/KEE [1], kif l-aħħar emendat bid-Deċiżjoni tal-Kummissjoni 2001/298/KE [2], u partikolarment l-Artikolu 22 tagħha.

Billi:

(1) L-esperjenza ta’ l-Istati Membri fl-implimentazzjoni tad-Direttiva 92/65/KEE dwar il-kummerċ fl-annimali msemmija fl-Artikoli 5, 13 u 23 ta’ dik id-Direttiva, uriet li hemm il-bżonn li jiġu ċċarati r-rekwiżiti għall-korpijet, istituti jew ċentri approvati u li jiġu nklużi xi disposizzjonijiet dwar il-kwarantina.

(2) Għalhekk huwa meħtieġ li jsiru xi adattamenti tekniċi dwar il-kondizzjonijiet li jirregolaw l-approvazzjoni ta’ korpijet, istituti jew ċentri sabiex jiġi ntrodott ċertifikat speċifiku għall-kummerċ f’dawn l-annimali u sabiex tiġi ċċarata l-lista ta’ mard li għandu jiġi avżat.

(3) Dawk il-korpijet, istituti jew ċentri diġà approvati mill-Istati Membri taħt arranġamenti ta’ qabel għandhom ikomplu jkunu approvati u jikkonformaw mar-rekwiżiti l-ġodda mill-aktar fis possibbli.

(4) L-annessi A, C u E tad-Direttiva 92/65/KEE għandhom għalhekk jiġu emendati kif xieraq.

(5) Sabiex jiġi assigurat li jkun hemm perjodu xieraq għall-implimentazzjoni ta’ dawn id-disposizzjonijiet fl-Istati Membri kollha, għandha tiġi stabbilita data għall-implimentazzjoni ta’ dan ir-Regolament.

(6) Il-miżuri li għalihom jipprovdi dan ir-Regolament jaqblu ma’ l-opinjoni tal-Kumitat Permanenti dwar il-Katina ta’ l-Ikel u s-Saħħa ta’ l-Annimali,

ADOTTAT DAN IR-REGOLAMENT:

L-Artikolu 1

L-annessi A, C u E tad-Direttiva 92/65/KEE huma emendati kif stabbilit fl-Anness ta’ dan ir-Regolament.

L-Artikolu 2

Dan ir-Regolament għandu jidħol fis-seħħ fl-20 jum wara dak tal-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fil-15 ta’ Lulju 2002.

Għall-Kummissjoni

David Byrne

Membru tal-Kummissjoni

[1] ĠU L 268, ta’ l-14.09.1992, p. 54.

[2] ĠU L 102, tat-12.04.2001, p. 63.

--------------------------------------------------

L-ANNESS

(1) L-Anness A tad- Direttiva 92/65/KEE huwa mibdul b’dan li ġej:

L-ANNESS A

MARD LI JRID JIĠI NOTIFIKAT FIL-KUNTEST TA' DIN ID-DIRETTIVA

Marda | Ordni/familja/speċi primarjament ikkonċernata |

Marda ta' Newcastle, influenza ta' l-għasafar | Aves |

Psittakosi | Psittaciformes |

American foulbrood | Apis |

Brucella abortus | Antilocapridae, Bovidae, Camelidae, Cervidae, Giraffidae, Hippopotamidae u Tragulidae |

Brucella melitensis | Antilocapridae, Bovidae, Camelidae, Cervidae, Giraffidae, Hippopotamidae u Tragulidae |

Brucella ovis | Camelidae, Tragulidae, Cervidae, Giraffidae, Bovidae u Antilocapridae |

Brucella suis | Cervidae, Leporidae, Ovibos moschatus, Suidae u Tayassuidae |

Mycobacterium bovis | Mammalia, b'mod partikolari Antilocapridae, Bovidae, Camelidae, Cervidae, Giraffidae, u Tragulidae |

Marda ta' l-ilsien u d-dwiefer | Artiodactyla u iljunfanti ta' l-Asja |

Pesta klassika tal-majjali, pesta Afrikana tal-majjali | Suidae u Tayassuidae |

Marda vexxikolari tal-majjal | Suidae u Tayassuidae |

Rinderpest | Artiodactyla |

Bluetongue | Antilocapridae, Bovidae, Cervidae, Giraffidae, u Rhinocerotidae |

Pleuropneumonia bovina li tittieħed | Bovini (inklużi zebu, buffalo, bison u yak) |

Stomatitis vexxikolari | Artiodactyla u Equidae |

Peste des petits ruminants | Bovidae u Suidae |

Marda tal-boċoċ fil-ġilda | Bovidae u Giraffidae |

Ġidri tan-nagħaġ u l-mogħoż | Bovidae |

Marda Afrikana taż-żwiemel | Equidae |

Rift valley fever | Bovidae, speċi tal-Camelus u Rhinocerotidae |

Enterovirus encephalomyelitis tal-majjal | Suidae |

Nekrożi ematopejitika infettiva | Salmonidae |

TSE | Bovidae, Cervidae, Felidae u Mustelidae |

Antraċi | Bovidae, Camelidae, Cervidae, Elephantidae, Equidae u Hippopotamidae |

Rabja | Carnivora, u Chiroptera |

(2) L-Anness C tad- Direttiva 92/65/KEE huwa sostitwit b’dan li ġej:

L-ANNESS C

KONDIZZJONIJIET LI JIRREGOLAW L-APPROVAZZJONI TA’ KORPI, ISTITUTI JEW ĊENTRI

1. Sabiex tingħata approvazzjoni uffiċjali skond l-Artikolu 13(2) ta’ din id-Direttiva, korp, istitut jew ċentru kif definit fl-Artikolu 2(1)(ċ) għandu:

(a) ikun mmarkat b’mod ċar u separat mill-ambjent tiegħu, jew l-annimali jkunu magħluqa jew imqiegħda b’mod li ma jkunux ta’ riskju sanitarju lill-impriżi agrikoli li l-istat ta’ saħħa tagħhom jista’ jitqiegħed fil-periklu;

(b) ikollhom mezz xieraq biex jaqbdu, jagħlqu u jiżolaw annimali u, jkollhom għad-disposizzjoni tagħhom faċilitajiet ta’ kwarantina xierqa u proċeduri approvati għal annimali ġejjin minn imkejjen mhux approvati;

(ċ) ikunu ħielsa mill-mard elenkat fl-Anness A u l-mard elenkat fl-Anness B meta l-pajjiż ikollu programm skond l-Artikolu 14. Sabiex korp, istitut jew ċentru jiġi ddikjarat liberu minn dan il-mard l-awtorità lokali kompetenti għandha tagħmel eżami tar-reġistri ta’ l-istat sanitarju ta’ l-annimali miżmuma għall-inqas għat-tliet snin preċedenti u r-riżultati tat-testijiet kliniċi u tal-laboratorji mwettqa fuq l-annimali fil-korp, istitut jew ċentru. B’danakollu, b’deroga minn dan ir-rekwiżit, għandhom jiġu approvati stabbilimenti ġodda jekk l-annimali miġbura hemm ikunu ġejjin minn stabbilimenti approvati;

(d) iżommu reġistri aġġornati li jindikaw:

(i) in-numru, l-identità (età, sess, speċi u identifikazzjoni individwali fejn hu prattiku) ta’ l-annimali ta’ kull speċi preżenti fl-istabbiliment;

(ii) in-numru, l-identità (età, sess, speċi u identifikazzjoni individwali fejn hu prattiku) ta’ l-annimali li jaslu fl-istabbiliment jew jitilqu minnu, flimkien ma’ l-informazzjoni dwar l-oriġini jew id-destinazzjoni tagħhom, it-trasport minn jew lejn l-istabbiliment u l-istat sanitarju ta’ l-annimali;

(iii) ir-riżultati ta’ testijiet tad-demm u proċeduri djanjostiċi oħra;

(iv) il-każijiet ta’ mard u, fejn xieraq, it-trattament mogħti;

(v) ir-riżultati ta’ l-eżamijiet post-mortem fuq annimali li mietu fl-istabbiliment, inklużi annimali li twieldu mejta;

(vi) l-osservazzjonijiet li saru waqt xi perjodu ta’ iżolament jew kwarantina;

(e) ikollhom jew arranġament ma’ laboratorju kompetenti biex iwettqu eżamijiet post-mortem, jew ikollhom post wieħed jew aktar xierqa fejn dawn l-eżamijiet jistgħu jitwettqu minn persuna kompetenti taħt l-awtorita’ tal-veterinarju approvat;

(f) ikollhom jew arranġamenti xierqa jew faċilitajiet fil-post għal tneħħija xierqa ta’ l-iġsma ta’ annimali li jmutu minn marda jew jiġu ewtanizzati;

(g) jiżguraw, b’kuntratt jew strument legali ieħor, is-servizzi ta’ veterinarju approvat minn jew taħt il-kontroll ta’ l-awtorità lokali kompetenti, li:

(i) għandha tikkonforma mutatis mutandis mar-rekwiżiti msemmija fl-Artikolu 14(3)(B) tad-Direttiva 64/432/KEE,

(ii) għandha taċċerta li jiġu approvati mill-awtorità lokali kompetenti u applikati fil-korp, istitut jew ċentru, miżuri xierqa ta’ sorveljana u kontroll dwar is-sitwazzjoni tal-mard fil-pajjiż ikkonċernat. Dawn il-miżuri għandhom jinkludu:

- pjan ta’ sorveljanza annwali tal-mard li jinkludi kontroll xieraq fuq l-annimali għaż-żoonożi,

- testijiet kliniċi, tal-laboratorju, u ta’ post-mortem ta’ annimali suspettati li jkunu milquta minn mard li jittieħed,

- vaċċinazzjoni ta’ annimali suxxettibili għall-mard infettiv kif xieraq, biss b’mod konformi mal-leġislazzjoni Komunitarja;

(iii) tiżgura li xi mewt suspettuża jew preżenza ta’ sintomu li joħloq suspett li l-annimali li ħadu xi marda jew aktar mill-mard imsemmi fl-Annessi A u B tiġi avżata bihom mingħajr dewmien l-awtorità lokali kompetenti, jekk dik il-marda partikolari trid tiġi notifikata fl-Istat Membru kkonċernat;

(iv) tassigura li l-annimali deħlin ġew iżolati kif meħtieġ, u skond ir-rekwiżiti ta’ din id-Direttiva u l-istruzzjonijiet, jekk hemm, mogħtija mill-awtorità kompetenti;

(v) ikun responsabbli għall-konformita’ ta’ kuljum mar-rekwiżiti sanitarji ta’ l-annimali ta’ din id-Direttiva u leġislazzjoni Komunitarja dwar il-benessri ta’ l-annimali waqt it-trasport u t-tneħħija ta’ l-iskart ta’ l-annimali;

(h) jekk iżżomm annimali maħsuba għal laboratorji li jwettqu esperimenti, isir skond id-disposizzjonijiet ta’ l-Artikolu 5 tad-Direttiva 86/609/KEE.

2. L-approvazzjoni għandha tibqa meta ir-rekwiżiti li ġejjin ikunu sodisfatti:

(a) il-post huwa taħt il-kontroll ta’ veterinarju uffiċjali mill-awtorità kompetenti, li għandu:

(i) jżur il-post tal-korp, istitut jew ċentru għall-inqas darba kull sena;

(ii) jivverifika l-attività tal-veterinarju approvat u l-implimentazzjoni tal-pjan annwali ta’ sorveljanza;

(iii) jassigura li jintlaħqu d-disposizzjonijiet ta’ din id-Direttiva;

(b) jiġu ntrodotti biss fl-istabbiliment dawk l-annimali li jiġu minn korp, istitut jew ċentru approvat ieħor, skond id-disposizzjonijiet ta’ din id-Direttiva;

(ċ) il-veterinarju uffiċjali jivverifika li:

- id-disposizzjonijiet ta’ din id-Direttiva jkunu sodisfatti,

- ir-riżultati tat-testijiet kliniċi, tal-post-mortem u tal-laboratorji fuq l-annimali ma jkunu żvelaw l-ebda okkorrenza tal-mard imsemmi fl-Annessi A u B;

(d) il-korp, l-istituzzjoni jew iċ-ċentru jżomm ir-reġistri msemmija fil-punt 1(d) wara l-approvazzjoni, għal perjodu ta’ mhux inqas minn għaxar snin.

3. B’deroga mill-Artikolu 5(1) ta’ din id-Direttiva u l-punt 2(b) ta’ dan l-Anness, annimali inklużi xadini (simiae u prosimiae) li joriġinaw minn band’oħra barra mill-korp, istitut jew ċentru approvat jistgħu jiġu ntrodotti f’korp, istitut jew ċentru approvat, kemm-il darba dawn l-annimali jiġu sottomessi għal kwarantina taħt kontroll uffiċjali u skond l-istruzzjonijiet mogħtija mill-awtoritajiet kompetenti qabel ma jidħlu f’dak l-istabbiliment.

Għax-xadini (simiae u prosimiae) ir-rekwiżiti tal-kwarantina stabbiliti fil-Kodiċi Internazzjonali Sanitarju tal-OIE (Kapitolu 2.10.1 u Appendiċi 3.5.1) għandhom jiġu rispettati.

Għal annimali oħrajn fil-kwarantina skond il-punt 2(b) ta’ dan l-Anness, il-perjodu ta’ kwarantina għandu jkun mhux inqas minn 30 jum għar-rigward tal-mard elenkat fl-Anness A.

4. Annimali miżmuma f’korp, istitut jew ċentru approvat, jistgħu biss jinħarġu mill-istabbiliment jekk huma destinati għal korp, istitut jew ċentru approvat ieħor, f’dak l-Istat Membru jew fi Stat Membru ieħor; iżda jekk mhux destinati għal korp, istitut jew ċentru approvat, jistgħu jinħarġu biss skond ir-rekwiżiti ta’ l-awtorità kompetenti biex jiġi aċċertat li ma hemm l-ebda riskju ta’ tixrid tal-mard.

5. Meta l-Istat Membru jkollu l-benefiċċju ta’ garanziji addizzjonali taħt leġislazzjoni Komunitarja, jista’ jitlob rekwiżiti u ċertifikazzjoni addizzjonali xierqa għall-ispeċi suxxettibbli li jkunu ser jiżdiedu mal-korp, istitut jew ċentru approvat.

6. Il-proċeduri għas-sospensjoni, l-irtirar jew restituzzjoni parzjali jew fl-intier, ta’ l-approvazzjoni huma dawn li ġejjin:

(a) meta l-awtorità lokali kompetenti ssib li r-rekwiżiti tal-punt 2 ma ġewx sodisfatti jew kien hemm tibdil fl-użu li ma jkunx għadu kopert mill-Artikolu 2 ta’ din id-Direttiva, l-approvazzjoni għandha tiġi sospiża jew irtirata;

(b) meta jingħata avviż ta’ suspett ta’ waħda mill-mardiet elenkati fl-Anness A jew B, l-awtorità lokali kompetenti, għandha tissospendi l-approvazzjoni tal-korp, istitut jew ċentru, sakemm is-suspett jitneħħa uffiċjalment. Skond il-marda involuta u r-riskju tat-tixrid tal-mard, is-sospensjoni tista’ tirreferi għall-istabbiliment kollu jew biss għal xi kategoriji ta’ annimali suxxettibbli għall-marda in kwistjoni. L-awtorità lokali kompetenti għandha tiżgura li l-miżuri meħtieġa biex jiġi konfermat jew eskluż is-suspett, u li jiġi evitat it-tixrid tal-mard, skond leġislazzjoni Komunitarja li tirregola l-miżuri meħuda kontra l-marda in kwistjoni u dwar il-kummerċ fl-annimali;

(ċ) meta tiġi kkonfermata l-marda suspettata, il-korp, istitut jew ċentru għandu jiġi approvat mill-ġdid biss, meta l-kondizzjonijiet stabbiliti f’punt 1 ta’ dan l-Anness, minbarra l-punt 1(ċ), jerġgħu jiġu sodisfatti wara l-eradikazzjoni tal-marda u ta’ l-għejun ta’ infezzjoni fil-post, inkluż tindif u diżinfettazjoni xierqa;

(d) l-awtorità lokali kompetenti għandha tinforma lill-Kummissjoni dwar is-sospensjoni, l-irtirar jew ir-restituzzjoni ta’ approvazzjoni ta’ korp, istitut jew ċentru.”

(3) L-Anness E tad- Direttiva 92/65/KEE huwa sostitwit b’dan li ġej:

L-ANNESS E

L-Ewwel Parti

+++++ TIFF +++++

+++++ TIFF +++++

It-Tieni Parti

+++++ TIFF +++++

+++++ TIFF +++++

It-Tielet Parti

+++++ TIFF +++++

+++++ TIFF +++++

--------------------------------------------------