31999R1662

Ir-Regolament tal-Kummissjoni (KE) Nru 1662/1999

tat-28 ta' Lulju 1999

li emenda r-Regolament (KEE) Nru 2454/93 u stabbilixxa dispożizzjonijiet għall-implimentazzjoni tar-Regolament tal-Kunsill (KEE) Nru 2913/92 li jistabbilixxi l-Kodiċi Komunitarja Doganali

(Test b'rilevanza għaż-ŻEE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KEE) Nru 2913/92 tat-12 ta' Ottubru 1992 li jistabbilixxi l-Kodiċi Komunitarja Doganali [1], kif l-aħħar emendat bir-Regolament tal-Parlament Ewropew u tal-Kunsill (KE) Nru 955/1999 [2], u b'mod partikolari l-Artikolu 249 tiegħu,

(1) Billi r-Regolament tal-Kummissjoni (KEE) Nru 2454/93 [3], kif l-aħħar emendat bir-Regolament (KE) Nru 502/1999 [4], jipprovdi għal każijiet fejn is-simplifikazzjonijiet tal-proċedura tal-proċessar il ġewwa tista' tkun awtorizzata skond deċiżjoni tal-Kummissjoni; billi huwa xieraq li tiġi modifikata l-proċedura għall-għoti ta' l-awtorizzazzjoni li tippermetti l-faċilitar ta' flows ta' kummerċ speċifiċi trijangolari ma' numru kbir biżżejjed ta' operazzjonijiet ta' esportazzjoni minn qabel;

(2) Billi importazzjoni temporanja ta' mezzi ta' trasport għandha tilħaq il-bżonnijiet tat-turiżmu f'reġjuni ġeografiċi tal-Komunità skond l-infrastrutturi tat-trasport ta' pajjiżi terzi;

(3) Billi huwa mixtieq li l-lista fl-Anness 87 tkun estiża fuq bażijiet ekonomiċi għal materjal PVC għall-proċessar f'filmscreens;

(4) Billi r-Regolament (KEE) Nru 2454/93 għandu għalhekk ikun emendat skond dan;

(5) Billi l-miżuri provduti b'dan ir-Regolament huma skond l-opinjoni tal-Kumitat tal-Kodiċi Doganali,

ADOTTAT DAN IR-REGOLAMENT:

L-Artikolu 1

Ir-Regolament (KEE) Nru 2454/93 għandu jkun emendat kif ġej:

1. L-Artikolu 601(6) huwa mibdul b'dan li ġej:

"6. Fejn iktar minn Stat Membru wieħed huwa involut fl-aggregazzjoni ta' esportazzjonijiet minn qabel, il-proċedura provduta fl-Artikolu 556(2) għandha tapplika mutatis mutandis.";

2. fl-Artikolu 719(11), huwa miżjud il-punt (d) li ġej:

"(d) f'każijiet ġenerali jew individwali barra minn dawk imsemmija fil-punti (a), (b) u (ċ), l-awtoritajiet tad-dwana jistgħu jawtorizzaw persuni naturali stabbiliti fit-teritorju tad-dwana tal-Komunità biex jużaw f'dak it-territorju vettura mikrija taħt kuntratt bil-miktub barra minnha, u li jilħaq il-kundizzjonijiet stabbiliti fil-paragrafu 3(ċ). L-awtorizzazzjoni għal dan l-użu għandha tkun soġġetta għall-kundizzjoni li l-pajjiżi fejn il-vetturi huma mikrija u reġistrati jawtorizzaw importazzjoni temporanja taħt ċirkostanzi simili għal vetturi mikrija u reġistrati fit-teritorju tad-dwana tal-Komunità.

Il-vettura għandha tkun esportata mill-ġdid jew ritornata lil servizz ta' kiri tal-vetturi stabbilit fit-teritorju tad-dwana tal-Komunità għal esportazzjoni mill-ġdid iktar tard fi żmien tmint ijiem mid-dħul fis-seħħ tal-kuntratt. Il-kuntratt għandu jkun preżentat fuq talba ta' l-awtoritajiet tad-dwana.";

3. L-Anness 87 hu emendat skond l-Anness ta' hawnhekk.

L-Artikolu 2

Dan ir-Regolament għandu jidħol fis-seħħ fis-seba' jum wara l-pubblikazzjoni tiegħu fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-28 ta' Lulju 1999.

Għall-Kummissjoni

Mario Monti

Membru tal-Kummissjoni

[1] ĠU L 302, tad-19.10.1992, p. 1.

[2] ĠU L 119, tas-7.5.1999, p. 1.

[3] ĠU L 253, tal-11.10.1993, p. 1.

[4] ĠU L 65, tat-12.3.1999, p. 1.

--------------------------------------------------

L-ANNESS

Il-punt li ġej huwa miżjud ma' l-Anness 87 tar-Regolament (KEE) Nru 2454/93:

"Nru ta' l-ordni | Kolonna 1 | Kolonna 2 |

Merkanzija li għaliha, proċessar taħt kontroll tad-dwana huwa awtorizzat | Proċessar li jista' jsir |

19 | Materjal tal-PVC li jaqa' taħt kodiċi NM 39219060 | Proċessar f'filmscreens li jaqgħu taħt kodiċi NM 90106000" |

--------------------------------------------------