(1)

L-informazzjoni finanzjarja ewlenija fis-sommarju ta’ prospett jenħtieġ li tippreżenta ċ-ċifri finanzjarji ewlenin li jipprovdu lill-investituri b’ħarsa ġenerali fil-qosor lejn l-assi, il-passivi u l-profittabbiltà tal-emittent, kif ukoll kwalunkwe informazzjoni finanzjarja ewlenija oħra li tkun relevanti għall-investituri biex jagħmlu valutazzjoni preliminari tal-prestazzjoni finanzjarja u tal-pożizzjoni finanzjarja tal-emittent. Sabiex jiġi żgurat li din l-informazzjoni tkun konċiża u relevanti, huwa għalhekk meħtieġ li jiġi identifikat għadd limitat ta’ divulgazzjonijiet, jiġi speċifikat it-tqassim tagħhom u tiġi kkalibrata l-informazzjoni finanzjarja biex jitqiesu t-tipi differenti ta’ emittenti u titoli.

(2)

Sabiex jiġi evitat li l-investituri jiġu mqarqa, l-emittenti jenħtieġ li jkunu intitolati li jinkludu divulgazzjonijiet addizzjonali speċifiċi, inklużi miżuri ta’ prestazzjoni alternattivi, fejn iqisu li d-divulgazzjonijiet meħtieġa ma jipprovdux stampa ċara tal-prestazzjoni u tal-pożizzjoni finanzjarja tagħhom. Madankollu, sabiex jiġi żgurat li l-investituri jiffokaw primarjament fuq iċ-ċifri li jirriżultaw mid-dikjarazzjonijiet finanzjarji, jenħtieġ li l-miżuri ta’ prestazzjoni alternattivi ma jingħatawx aktar prominenza fil-prospett milli jingħataw iċ-ċifri estratti mill-informazzjoni finanzjarja storika.

(3)

Sabiex jitnaqqsu l-kostijiet tal-konformità u l-piżijiet amministrattivi fuq l-emittenti, l-informazzjoni finanzjarja ewlenija fis-sommarju ta’ prospett, inklużi partiti addizzjonali u miżuri ta’ prestazzjoni alternattivi, jenħtieġ li tirriproduċi informazzjoni żvelata fil-prospett stess.

(4)

Huwa xieraq li l-informazzjoni finanzjarja ewlenija fis-sommarju tal-prospett tiġi adattata għall-attività ekonomika tal-emittent, għas-settur industrijali tiegħu, għall-partiti prinċipali tar-rapporti finanzjarji tiegħu u għat-tip ta’ titoli li jkunu qegħdin jinħarġu jew jiġu offruti. Madankollu, mhuwiex possibbli li jiġu pprovduti mudelli speċifiċi għat-tipi kollha ta’ emittenti.

(5)

Sabiex jiġi evitat li l-investituri jiġu mqarqa u tiġi żgurata l-konsistenza mal-informazzjoni inkluża fil-prospett, meta l-informazzjoni finanzjarja storika inkluża fil-prospett tkun iddikjarata mill-ġdid fil-każ ta’ żbalji materjali li jkunu jinsabu fid-dikjarazzjonijiet finanzjarji jew bidliet fl-istandards kontabilistiċi, l-informazzjoni finanzjarja ewlenija fis-sommarju ta’ prospett jenħtieġ li tirrifletti dik l-informazzjoni finanzjarja storika mill-ġdid.

(6)

Meta emittent ikollu storja finanzjarja kumplessa, jenħtieġ li, fejn xieraq, jippreżenta l-informazzjoni finanzjarja tiegħu u l-informazzjoni finanzjarja relatata ma’ entità jew entitajiet oħra fit-taqsima indipendenti fis-sommarju tal-prospett.

(7)

L-investituri jeħtieġu ċarezza fir-rigward ta’ liema informazzjoni tifforma parti mill-prospett u lil min qed tiġi indirizzata offerta ta’ titoli lill-pubbliku. Għalhekk, bl-eċċezzjoni tal-informazzjoni inkorporata b’referenza, meta l-prospett ikun fih iperlinks, huwa jenħtieġ li jinforma lill-investituri li l-informazzjoni fuq is-siti web relatati ma tkunx parti mill-prospett u ma ġietx skrutinizzata jew approvata mill-awtorità kompetenti. Barra minn hekk, jenħtieġ li jiġu stabbiliti miżuri sabiex jiġi evitat li s-siti web użati għall-pubblikazzjoni tal-prospett jimmiraw għal residenti fi Stati Membri jew f’pajjiżi terzi fejn ma ssirx l-offerta ta’ titoli lill-pubbliku, pereżempju billi tiġi inkluża fuq is-sit web dikjarazzjoni li tidentifika d-destinatarji tal-offerta.

(8)

Ir-rapportar u l-pubblikazzjoni ta’ data f’format elettroniku li jinqara minn magna jiffaċilita l-użu effiċjenti u l-iskambju ta’ dik id-data. Għalhekk jenħtieġ li tiġi speċifikata l-lista ta’ attributi ta’ data li għandhom jiġu rrapportati lill-Awtorità Ewropea tat-Titoli u s-Swieq (ESMA) għall-klassifikazzjoni tal-prospetti u l-użu ta’ mudelli f’format XML jenħtieġ li jkun meħtieġ biex jiġi żgurat li dawn l-entrati jkunu jistgħu jinqraw minn magna. Il-lista tad-data jenħtieġ li tkun komprensiva biżżejjed biex tiżgura li l-ESMA tissodisfa l-mandat tagħha skont l-Artikolu 47 tar-Regolament (UE) 2017/1129 biex tippubblika rapport annwali li jkun fih statistika dwar il-prospetti approvati u nnotifikati fl-Unjoni, kif ukoll analiżi tax-xejriet waqt li jikkunsidra t-tip ta’ emittenti u t-tip ta’ ħruġ.

(9)

Sabiex jiġi evitat li investituri individwali jiġu mqarqa matul il-proċess ta’ kummerċjalizzazzjoni ta’ kwalunkwe titolu propost għal offerti pubbliċi jew ammissjoni għall-kummerċ f’suq regolat, jenħtieġ li reklam ma jitqiesx bħala d-dokument prinċipali ta’ informazzjoni. Għaldaqstant u sabiex tiġi evitata l-konfużjoni mal-prospett, jenħtieġ li r-reklami ma jkunux twal iżżejjed.

(10)

Ir-reklami relatati mal-offerta ta’ titoli lill-pubbliku jew ammissjoni għall-kummerċ f’suq regolat jistgħu ma jibqgħux eżattirati jew iqarqu meta jinħoloq fattur ġdid sinifikanti, żball materjali jew ineżattezza materjali relatati mal-informazzjoni fil-prospett korrispondenti. Jenħtieġ li jiġu stabbiliti rekwiżiti biex jiġi żgurat li r-reklami jiġu emendati mingħajr dewmien żejjed meta dawn ma jibqgħux eżatti jew iqarqu minħabba tali fattur ġdid, żball materjali jew ineżattezza materjali.

(11)

Sabiex l-investituri jkunu jistgħu jieħdu deċiżjonijiet informati ta’ investiment, l-informazzjoni li tinsab fir-reklami jenħtieġ li ma tippreżentax perspettiva żbilanċjata, pereżempju, billi tippreżenta aspetti negattivi ta’ din l-informazzjoni b’inqas prominenza minn aspetti pożittivi.

(12)

Bħala alternattiva l-miżuri ta’ prestazzjoni jistgħu b’mod sproporzjonat jinfluwenzaw deċiżjonijiet ta’ investiment, informazzjoni dwar offerta lill-pubbliku jew ammissjoni għall-kummerċ f’suq regolat iċċirkolata barra mill-prospett jenħtieġ li ma tkunx permessa li tinkludi miżuri bħal dawn, sakemm dawn ma jkunux inklużi fil-prospett.

(13)

L-awtoritajiet kompetenti fl-Istati Membri ospitanti ma jagħmlux skrutinju tal-prospetti. Għalhekk, sabiex jiġi żgurat li l-investituri fl-Istati Membri ospitanti jkunu protetti b’mod adegwat, meta l-awtorità kompetenti tal-Istat Membru ospitanti tfittex l-assistenza tal-awtorità kompetenti fl-Istat Membru tad-domiċilju, hija jenħtieġ li tikkomunika l-informazzjoni li hija relevanti għall-awtorità kompetenti fl-Istat Membru tad-domiċilju sabiex tivvaluta l-konsistenza tar-reklam mal-kontenut tal-prospett. Tali komunikazzjoni jenħtieġ li sseħħ fiż-żmien xieraq biex jiġi żgurat li l-investituri fl-Istati Membri ospitanti ma jiġux ippenalizzati mill-fatt li l-awtoritajiet kompetenti ospitanti ma jagħmlux skrutinju tal-prospetti u jkollhom biżżejjed żmien biex janalizzaw l-offerta pubblika sottostanti. L-awtorità kompetenti fl-Istat Membru ospitanti għandha tkun infurmata sa fejn ikun meħtieġ biex teżerċita kontroll fuq il-konformità tal-attività ta’ reklamar fil-ġurisdizzjoni tagħha.

(14)

Sabiex tiġi żgurata l-applikazzjoni konsistenti tar-Regolament (UE) 2017/1129 u biex jitqiesu l-iżviluppi tekniċi fis-swieq finanzjarji, huwa meħtieġ li jiġu speċifikati s-sitwazzjonijiet fejn il-pubblikazzjoni ta’ supplimenti għall-prospetti hija meħtieġa. Mhuwiex possibbli li jiġu identifikati s-sitwazzjonijiet kollha fejn ikun meħtieġ suppliment għall-prospett minħabba li dan jista’ jiddependi fuq l-emittent u t-titoli involuti. Għaldaqstant, huwa xieraq li jiġu speċifikati s-sitwazzjonijiet minimi fejn ikun meħtieġ suppliment.

(15)

Rapporti finanzjarji annwali awditjati huma kruċjali għall-investituri meta jittieħdu deċiżjonijiet dwar l-investiment. Sabiex jiġi żgurat li l-investituri jibbażaw id-deċiżjonijiet dwar l-investiment tagħhom fuq l-aktar informazzjoni finanzjarja reċenti, huwa meħtieġ li tkun mitluba l-pubblikazzjoni ta’ suppliment li jinkludi rapporti finanzjarji annwali awditjati ġodda tal-emittenti tat-titoli ta’ ekwità u l-emittenti tal-ishma sottostanti meta riċevuti depożitarji jkunu ppubblikati wara l-approvazzjoni tal-prospett.

(16)

Peress li l-previżjonijiet tal-profitt u l-istimi tal-profitt jistgħu jinfluwenzaw deċiżjoni ta’ investiment, huwa meħtieġ li jiġi ppubblikat suppliment li jkun fih kwalunkwe emenda għal ċifri impliċiti jew espliċiti li jikkostitwixxu previżjonijiet ta’ profitt jew stimi tal-profitt jew l-irtirar ta’ previżjoni ta’ profitt jew stima tal-profitt diġà inkluża fil-prospett. Għall-istess raġuni, fil-każ ta’ titoli ta’ ekwità u riċevuti depożitarji, huwa wkoll meħtieġ li jiġi prodott suppliment għall-prospett fejn tbassir tal-profitt jew stima tal-profitt ġodda jkunu ġew ippubblikati qabel tmiem il-perjodu tal-offerta jew qabel l-ammissjoni għall-kummerċ.

(17)

Informazzjoni dwar l-identità tal-azzjonisti ewlenin jew kwalunkwe entità ta’ kontroll tal-emittent hija vitali għal valutazzjoni informata tal-emittent. Madankollu, bidla fil-kontroll tal-emittent hija partikolarment sinifikanti fejn l-offerta tirreferi għal titoli ta’ ekwità, li ġeneralment ikunu aktar sensittivi għall-prezz għall-bidliet tal-emittenti. Għaldaqstant, għandu jiġi ppubblikat suppliment meta jkun hemm bidla ta’ kontroll ta’ emittent ta’ titoli ta’ ekwità jew emittent ta’ ishma sottostanti ta’ riċevuti depożitarji.

(18)

Huwa essenzjali li l-investituri potenzjali li jivvalutaw offerta pendenti ta’ titoli ta’ ekwità jkunu f’pożizzjoni li jqabblu t-termini u l-kundizzjonijiet ta’ tali offerta mal-prezz jew it-termini ta’ skambju marbuta ma’ kull offerta pubblika ta’ xiri mħabbra matul l-perjodu tal-offerta. Barra minn hekk, ir-riżultat ta’ offerta pubblika ta’ xiri hija sinifikanti għad-deċiżjoni dwar l-investiment minħabba li l-investituri jeħtieġu li jkunu jafu jekk dan jimplikax bidla fil-kontroll tal-emittent jew le. Huwa għalhekk meħtieġ li jiġi ppubblikat suppliment fil-każ ta’ kull offerta pubblika ta’ xiri ġdida.

(19)

Meta dikjarazzjoni tal-kapital operatorju ma tkunx valida aktar, l-investituri ma jkunux f’pożizzjoni li jieħdu deċiżjoni dwar l-investiment bl-informazzjoni kollha dwar is-sitwazzjoni finanzjarja tal-emittent. L-investituri għandhom ikunu f’pożizzjoni li jivvalutaw mill-ġdid id-deċiżjonijiet dwar l-investiment tagħhom fid-dawl tal-informazzjoni l-ġdida dwar il-kapaċità tal-emittent li jaċċessa flus kontanti u riżorsi likwidi disponibbli oħra biex jagħmel tajjeb għar-responsabbiltajiet tiegħu. Sabiex dan isir, huwa meħtieġ suppliment.

(20)

Wara l-approvazzjoni ta’ prospett, emittent jew offerent jista’ jiddeċiedi li joffri t-titoli fi Stati Membri oħra għajr dawk imsemmija fil-prospett, jew japplika għall-ammissjoni għall-kummerċ tat-titoli fi swieq regolati fi Stati Membri oħra li mhumiex dawk previsti fil-prospett. L-informazzjoni dwar tali offerti u ammissjonijiet fih hija importanti għall-valutazzjoni tal-investitur ta’ ċerti aspetti tat-titoli tal-emittent u għalhekk huwa xieraq li f’dawn il-każijiet jintalab suppliment.

(21)

Il-pożizzjoni finanzjarja jew in-negozju tal-entità x’aktarx ikunu affettwati minn impenn finanzjarju sinifikanti. Għaldaqstant, l-investituri għandhom ikunu intitolati li jirċievu informazzjoni addizzjonali dwar il-konsegwenzi ta’ dan l-impenn f’suppliment għall-prospett.

(22)

Żieda tal-ammont nominali aggregat ta’ programm ta’ offerti tipprovdi informazzjoni dwar il-ħtieġa akbar tal-emittenti għall-finanzjament jew żieda fit-talbiet għat-titoli tal-emittenti. F’każ bħal dan, jenħtieġ li jiġi ppubblikat suppliment għall-prospett.

(23)

L-awtoritajiet kompetenti relevanti jenħtieġ li jirċievu l-prospett u d-datali takkumpanjahom fil-ħin debitu permezz tal-portal ta’ notifika, flimkien ma’ ċertifikat ta’ approvazzjoni li jiddikjara li l-prospett tfassal skont ir-Regolament (UE) 2017/1129. L-ESMA jenħtieġ li tiżgura li l-portal ta’ notifika jippreserva s-sigurtà u l-integrità tal-informazzjoni skambjata bejn l-awtoritajiet kompetenti. L-awtoritajiet kompetenti jibqgħu responsabbli għas-sottomissjoni ta’ tali informazzjoni. Sabiex ikun permess it-tħaddim bla xkiel u f’waqtu tal-portal ta’ notifika, huwa neċessarju li tiġi speċifikata d-datali takkumpanjahom li għandha tittella’ f’dak il-portal ta’ notifika.

(24)

F’konformità mal-Artikolu 10 tar-Regolament (UE) Nru 1095/2010, tal-Parlament Ewropew u tal-Kunsill (2), l-ESMA wettqet konsultazzjonijiet pubbliċi miftuħa dwar tali abbozzi tal-istandards tekniċi regolatorji, analizzat l-ispejjeż u l-benefiċċji potenzjali relatati u talbet l-opinjoni tal-Grupp tal-Partijiet Interessati tat-Titoli u s-Swieq stabbilit skont l-Artikolu 37 ta’ dak ir-Regolament. Madankollu, l-ESMA ma kkonsultatx lil dak il-grupp ta’ partijiet ikkonċernati dwar l-abbozz tal-istandards tekniċi regolatorji dwar l-arranġamenti tekniċi għall-portal ta’ notifika peress li dawk l-arranġamenti jaffettwaw biss lill-ESMA u lill-awtoritajiet nazzjonali kompetenti.

(25)

Dan ir-Regolament huwa bbażat fuq l-abbozz ta’ standards tekniċi regolatorji ppreżentati mill-ESMA lill-Kummissjoni.

(26)

Peress li dan ir-Regolament jissostitwixxi r-Regolament ta’ Delega tal-Kummissjoni (UE) Nru 382/2014 (3) u r-Regolament Delegat tal-Kummissjoni (UE) 2016/301 (4), dawn ir-Regolamenti Delegati jsiru obsoleti u għalhekk jenħtieġ li jitħassru.

(27)

Peress li dan ir-Regolament jissupplimenta d-dispożizzjonijiet tar-Regolament (UE) 2017/1129, l-applikazzjoni tiegħu jenħtieġ li tiġi ddifferita sad-data tal-applikazzjoni tar-Regolament (UE) 2017/1129,