(1)

Permezz tar-Regolament (KEE) Nru 2474/93 (2) (“l-investigazzjoni oriġinali”), il-Kunsill impona dazju anti-dumping definittiv ta’ 30,6 % fuq l-importazzjonijiet ta’ roti li joriġinaw fir-Repubblika tal-Poplu taċ-Ċina (“iċ-Ċina”). Minn dak iż-żmien segwew diversi investigazzjonijiet, li estendew jew emendaw il-miżuri inizjali.

(2)

Permezz tar-Regolament (UE) Nru 502/2013 (3), il-Kunsill, wara rieżami interim skont l-Artikolu 11(3) tar-Regolament tal-Kunsill (KE) Nru 1225/2009 (4), emenda l-miżuri. F’din l-investigazzjoni, il-kampjunar ma ġiex applikat għall-produtturi esportaturi fiċ-Ċina u nżamm id-dazju anti-dumping mal-pajjiż kollu ta’ 48,5 %, abbażi tal-marġni tad-dumping, li ġie stabbilit mir-Regolament tal-Kunsill (KE) Nru 1095/2005 (5).

(3)

Il-miżuri attwalment fis-seħħ huma miżuri anti-dumping imposti mir-Regolament ta’ Implimentazzjoni tal-Kummissjoni (UE) 2019/1379 (6), li permezz tagħhom l-importazzjonijiet tal-prodott taħt rieżami prodott mill-applikant huma soġġetti għal dazju anti-dumping definittiv ta’ 48,5 %.

(4)

Il-Kummissjoni rċeviet talba għal rieżami ta’ “esportatur ġdid” skont l-Artikolu 11(4) tar-Regolament bażiku. It-talba tressqet fl-10 ta’ Settembru 2019 u ġiet aġġornata fis-26 ta’ Novembru 2021 minn Zhejiang Feishen Vehicle Industry Co., Ltd. (“l-applikant”), produttur esportatur tar-roti fiċ-Ċina.

(5)

L-applikant sostna li ma kienx relatat mal-ebda wieħed mill-produtturi esportaturi tar-roti, soġġetti għall-miżuri fis-seħħ. Barra minn hekk, l-applikant sostna li kien esporta roti lejn l-Unjoni biss wara t-tmiem tal-perjodu ta’ investigazzjoni tal-investigazzjoni oriġinali.

(6)

Il-Kummissjoni eżaminat l-evidenza disponibbli u kkonkludiet li hemm evidenza biżżejjed biex tiġġustifika t-tnedija ta’ rieżamijiet ta’ “esportatur ġdid”, skont l-Artikolu 11(4) tar-Regolament bażiku. Wara li l-produtturi tal-Unjoni ngħataw opportunità biex jikkummentaw, il-Kummissjoni nediet rieżami tar-Regolament ta’ Implimentazzjoni (UE) 2019/1379 fir-rigward tal-applikant, permezz tar-Regolament ta’ Implimentazzjoni tal-Kummissjoni (UE) 2022/358 (7).

(7)

Il-prodott taħt rieżami huwa biċikletti u roti oħrajn (inklużi triċikletti għat-tqassim, iżda esklużi l-uniċikli), mhux immotorizzati li bħalissa jaqgħu taħt il-kodiċi NM 8712 00 30 u ex 8712 00 70 (il-kodiċijiet TARIC 8712007091, 8712007092 u 8712007099) u li joriġinaw miċ-Ċina.

(8)

Il-Kummissjoni infurmat uffiċjalment lill-applikant, lill-industrija tal-Unjoni, kif ukoll lir-rappreżentanti tal-pajjiż esportatur, bit-tnedija ta’ dan ir-rieżami. Il-partijiet interessati ngħataw l-opportunità li jippreżentaw l-opinjoni tagħhom bil-miktub u li jinstemgħu.

(9)

Fil-jum tat-tnedija, il-Kummissjoni talbet lill-applikant jimla l-kwestjonarju.

(10)

L-investigazzjoni kopriet il-perjodu mill-1 ta’ Jannar 2021 sal-31 ta’ Diċembru 2021 (“il-perjodu ta’ investigazzjoni tar-rieżami”).

(11)

Fid-29 ta’ Lulju 2022, il-Kummissjoni ddivulgat lill-partijiet interessati l-intenzjoni tagħha li ttemm l-investigazzjoni tar-rieżami mingħajr ma tiddetermina marġni tad-dumping individwali għall-applikant. Il-partijiet interessati ngħataw l-opportunità li jikkummentaw.

(12)

Fil-kummenti tiegħu ppreżentati fit-12 ta’ Awwissu 2022, l-applikant ma qabilx mal-analiżi tal-Kummissjoni li tirrifjuta l-istatus ta’ esportatur ġdid abbażi tar-rappreżentattività tal-bejgħ tal-applikant u sostna n-nuqqas ta’ bażi legali għal tali deċiżjoni u li hija inkonsistenti mar-rapporti tal-Bord u tal-Korp tal-Appell fil-Messiku — Miżuri Anti-dumping Definittivi fuq iċ-Ċanga u r-Ross (8).

(13)

Il-Kummissjoni tindika li l-Bord u l-Korp tal-Appell eżaminaw il-kundizzjonijiet biex jaċċettaw jew jirrifjutaw talba biex jitwettaq rieżami mħaffef ta’ esportatur ġdid, kif stabbilit fid-dritt Messikan. F’dan il-każ, il-Kummissjoni aċċettat it-talba tal-applikant u nediet ir-rieżami tal-esportatur ġdid kif xieraq iżda biex twettaq kalkolu affidabbli tal-marġni tad-dumping, il-Kummissjoni teħtieġ prezz tal-esportazzjoni affidabbli li jitqies li jirrifletti l-imġiba normali tal-ipprezzar tal-produttur esportatur ikkonċernat. Kif spjegat fil-premessi (25) sa (28) it-tranżazzjoni magħmula mill-applikant ma tistax tintuża bħala bażi għall-kalkolu tal-marġni tad-dumping peress li ma tikkostitwixxix riflessjoni preċiża biżżejjed ta’ mġiba normali u sostenibbli fl-ipprezzar tal-esportazzjoni li tista’ tifforma l-bażi għad-determinazzjoni ta’ marġni tad-dumping individwali li jista’ japplika għal tranżazzjonijiet futuri. Din il-pretensjoni għalhekk ġiet miċħuda.

(14)

L-applikant irrefera għal diversi investigazzjonijiet tar-rieżami ta’ esportaturi ġodda, fejn l-esportaturi għamlu biss tranżazzjoni waħda ta’ bejgħ u madankollu ngħataw marġni tad-dumping favorevoli. L-applikant talab lill-Kummissjoni biex issegwi prattika konsistenti fir-rigward tat-talba fil-każ attwali.

(15)

Ir-rieżamijiet li l-applikant irrefera għalihom kienu jikkonċernaw investigazzjonijiet fejn ir-rata medja tal-kampjun kienet tabilħaqq disponibbli. Għalhekk, ma kienx meħtieġ li jiġu ddeterminati l-marġnijiet tad-dumping individwali. Għall-kuntrarju ta’ dak li sostna l-applikant, il-metodu tal-Kummissjoni biex tivvaluta s-sitwazzjoni tal-esportatur il-ġdid huwa konsistenti. Fir-rieżami li jikkonċerna l-aċidu triklorojsoċjanuriku li joriġina mir-Repubblika tal-Poplu taċ-Ċina (9), il-Kummissjoni ma setgħetx tuża l-prezz tal-esportazzjoni, u dan ikkawża t-tmiem tar-rieżami mingħajr ma setgħet tagħti rata individwali lill-applikant.

(16)

L-applikant sostna li l-Kummissjoni evalwat b’mod żbaljat l-evidenza fattwali fil-kuntest tad-determinazzjoni tar-rappreżentattività tal-bejgħ, it-tqabbil tal-prezz tal-esportazzjoni mad-data statistika u l-prezz tal-bejgħ mill-ġdid tal-klijent tagħhom.

(17)

Għat-tqabbil tal-prezz tal-esportazzjoni, l-applikant sostna li l-prodotti tiegħu kienu pożizzjonati bħala prodotti ta’ livell għoli u ngħataw premji tad-disinn f’kompetizzjonijiet internazzjonali, għalhekk it-tqabbil ma’ statistika ta’ aggregazzjoni mħallta li wriet prezz ogħla mhuwiex rilevanti. L-applikant ikkontestat ukoll ir-rilevanza tal-informazzjoni pprovduta mill-importatur Awstrijak, li ddefinixxa t-tranżazzjoni bħala prova, u sostna li mill-perspettiva tal-applikant, din kienet tranżazzjoni ordinarja u mhux prova.

(18)

Il-Kummissjoni tinnota li l-ebda wieħed mill-argumenti tal-applikant ma kien fih informazzjoni li tqiegħed f’dubju l-informazzjoni li l-Kummissjoni kkunsidrat fl-evalwazzjoni tagħha tal-fatti. Għalhekk, bħala tali, dawn huma miċħuda.

(19)

Bħala alternattiva, l-applikant ippropona l-monitoraġġ tal-miżuri jew id-determinazzjoni ta’ prezz minimu tal-importazzjoni.

(20)

Il-Kummissjoni ma tista’ taċċetta l-ebda waħda minn dawn iż-żewġ talbiet imressqa mill-applikant. La l-monitoraġġ u lanqas il-prezz minimu tal-importazzjoni ma huma xierqa għas-sitwazzjoni ta’ produttur esportatur ġdid. Fl-eżempju tal-monitoraġġ fil-każ ta’ pins u stejpils (10) imressaq mill-applikant, dan intuża biex tiġi mmonitorjata s-sitwazzjoni tal-importazzjonijiet f’każ ta’ nuqqas ta’ impożizzjoni ta’ miżuri anti-dumping. Il-mekkaniżmu tal-prezz minimu tal-importazzjoni huwa għodda biex jiġi ddeterminat il-livell tad-dazju fuq l-esportazzjonijiet totali tal-pajjiż ikkonċernat fi proċedimenti fejn il-Kummissjoni tqis li din il-forma ta’ miżura hija xierqa fid-dawl taċ-ċirkostanzi speċifiċi tal-każ. F’dan il-każ, il-miżuri jieħdu l-forma ta’ dazji ad valorem u l-għan tar-rieżami tal-esportatur ġdid mhuwiex li tiġi rieżaminata l-forma tal-miżuri.

(21)

Skont l-Artikolu 11(4) tar-Regolament bażiku, il-kriterji li għandhom jiġu ssodisfati għal produttur esportatur ġdid huma dawn li ġejjin:

(22)

L-investigazzjoni kkonfermat li l-applikant ma kienx esporta l-prodott ikkonċernat matul il-perjodu ta’ investigazzjoni oriġinali.

(23)

L-applikant wera li ma kienx relatat mal-ebda wieħed mill-produtturi esportaturi Ċiniżi soġġetti għall-miżuri anti-dumping fis-seħħ fir-rigward tal-prodott ikkonċernat.

(24)

Fir-rigward tal-kriterju li l-applikant kien beda jesporta l-prodott ikkonċernat lejn l-Unjoni wara l-perjodu ta’ investigazzjoni oriġinali, il-Kummissjoni vvalutat dan li ġej. L-applikant għamel tranżazzjoni waħda ta’ esportazzjoni ta’ volum limitat matul il-perjodu ta’ investigazzjoni tar-rieżami (“PIR”), għalhekk il-Kummissjoni eżaminat jekk dik it-tranżazzjoni ta’ esportazzjoni setgħetx titqies suffiċjenti biex tipprovdi riflessjoni preċiża tal-imġiba tal-esportazzjoni attwali u futura tal-applikant. B’mod speċifiku, il-Kummissjoni analizzat aktar is-sehem tal-kwantità esportata fir-rigward tat-total tal-produzzjoni u l-prezzijiet tal-bejgħ lejn l-UE fir-rigward tal-prezzijiet medji ta’ produtturi esportaturi Ċiniżi oħra li esportaw volumi sinifikanti lejn l-UE matul il-PIR.

(25)

L-applikant għamel bejgħ wieħed ta’ 30 rota tat-tfal, li jirrappreżenta 1 % tal-produzzjoni totali tiegħu, lil importatur Awstrijak. Il-prezz tat-tranżazzjoni tal-applikant fil-livell CIF kien 73 % (11) ogħla mill-prezz medju ta’ produtturi esportaturi Ċiniżi oħra fis-suq Awstrijak. Dan indika li din it-tranżazzjoni ma saritx taħt termini kummerċjali normali.

(26)

Il-Kummissjoni kkuntattjat lill-importatur biex tikseb aktar informazzjoni dwar in-natura tat-tranżazzjoni u l-valur tal-bejgħ mill-ġdid.

(27)

L-importatur Awstrijak ikkonferma wkoll li din kienet biss tranżazzjoni ta’ prova (mhux tranżazzjoni kummerċjali ordinarja), li l-prezz tax-xiri kien għoli wisq u li konsegwentement reġa’ biegħ ir-roti lill-klijenti finali bi prezz aktar baxx mill-prezz tax-xiri.

(28)

Fid-dawl ta’ dawn ta’ hawn fuq, il-Kummissjoni kkunsidrat li t-tranżazzjoni ppreżentata mill-applikant ma kinitx tikkostitwixxi bażi rappreżentattiva biżżejjed u ma pprovditx riflessjoni preċiża biżżejjed tal-imġiba fl-ipprezzar tal-esportazzjoni attwali u futura tiegħu li tista’ tifforma l-bażi għad-determinazzjoni ta’ marġni tad-dumping individwali. Abbażi ta’ dan, jenħtieġ li l-investigazzjoni tar-rieżami tintemm.

(29)

Fid-dawl tas-sejbiet deskritti hawn fuq, il-Kummissjoni kkonkludiet li jenħtieġ li r-rieżami li jikkonċerna l-importazzjonijiet ta’ roti manifatturati mill-applikant u li joriġinaw miċ-Ċina jintemm. Id-dazju applikabbli għall-“kumpaniji l-oħra kollha” skont l-Artikolu 1(2) tar-Regolament ta’ Implimentazzjoni (UE) 2019/1379 jenħtieġ li japplika għall-prodotti mmanifatturati mill-applikant. Konsegwentement, jenħtieġ li r-reġistrazzjoni tal-importazzjonijiet tal-applikant tintemm u d-dazju għall-pajjiż kollu applikabbli għall-kumpaniji l-oħra kollha (48,5 %), impost mir-Regolament ta’ Implimentazzjoni (UE) 2019/1379, jiġi impost fuq dawn l-importazzjonijiet mid-data tat-tnedija ta’ dan ir-rieżami. Dan huwa mingħajr preġudizzju għall-possibbiltajiet li l-importaturi jitolbu rifużjoni f’konformità mal-Artikolu 11(8) tar-Regolament bażiku.

(30)

Il-miżuri previsti f’dan ir-Regolament huma f’konformità mal-opinjoni tal-Kumitat stabbilit mill-Artikolu 15(1) tar-Regolament (UE) 2016/1036.