1.   Miżura ta’ assistenza li tieħu l-forma ta’ programm ġenerali ta’ appoġġ għall-Unjoni Afrikana hija b’dan stabbilita, li tiġi ffinanzjata mill-Faċilità Ewropea għall-Paċi (EPF) (il-‘Miżura ta’ Assistenza’). Il-Miżura ta’ Assistenza għandha tiffinanzja azzjonijiet approvati mill-Kumitat Politiku u ta’ Sigurtà (KPS) qabel il-31 ta’ Diċembru 2021.

2.   L-objettivi tal-Miżura ta’ Assistenza huma li titnaqqas l-inċidenza, id-durata u l-intensità ta’ konflitti vjolenti fl-Afrika u li jissaħħaħ ir-rwol tal-Unjoni Afrikana (UA) fir-rigward tal-paċi u s-sigurtà fil-kontinent Afrikan.

3.   Biex jinkisbu l-objettivi stabbiliti fil-paragrafu 2, il-Miżura ta’ Assistenza għandha tiffinanzja l-aspetti militari tal-operazzjonijiet ta’ appoġġ għall-paċi mmexxija mill-Afrika b’mandat jew awtorizzati mill-Kunsill tal-Paċi u s-Sigurtà tal-UA.

1.   F’konformità mal-Artikolu 59(7) tad-Deċiżjoni (PESK) 2021/509, l-appoġġ għal kwalunkwe azzjoni taħt il-Miżura ta’ Assistenza għandu jkun preċedut minn talba mill-Kummissjoni tal-UA bħala l-benefiċjarju tal-Miżura ta’ Assistenza (il-‘benefiċjarju’).

2.   Wara talba kif imsemmi fil-paragrafu 1, ir-Rappreżentant Għoli, wara konsultazzjoni mal-amministratur għall-miżuri ta’ assistenza maħtur skont id-Deċiżjoni (PESK) 2021/509 (l-‘amministratur għall-miżuri ta’ assistenza’) fir-rigward ta’ kwistjonijiet ta’ implimentazzjoni finanzjarja, għandu jippreżenta rakkomandazzjoni għall-eżami u l-approvazzjoni mill-KPS, li tiddeskrivi l-appoġġ propost, inkluż il-baġit għalih, l-entità jew l-entitajiet magħżula fost dawk elenkati fl-Artikolu 5(2) ta’ din id-Deċiżjoni li jimplimentaw l-appoġġ propost, u konsiderazzjonijiet relatati mas-sensittività għall-konflitti u l-analiżi tar-riskji, kif ukoll miżuri għall-monitoraġġ u l-kontroll kif imsemmi fl-Artikolu 6 ta’ din id-Deċiżjoni, kif meħtieġ.

1.   L-ammont ta’ referenza finanzjarja maħsub sabiex ikopri n-nefqa relatata mal-Miżura ta’ Assistenza għandu jkun ta’ EUR 130 000 000. F’konformità mal-Artikolu 29(5) tad-Deċiżjoni (PESK) 2021/509, l-amministratur għall-miżuri ta’ assistenza jista’ jagħmel sejħa għal kontribuzzjonijiet wara l-adozzjoni ta’ din id-Deċiżjoni, sa EUR 104 000 000, safejn il-fondi disponibbli għall-miżuri ta’ assistenza jkunu suffiċjenti biex jiffinanzjaw il-pagamenti fl-2021. Il-fondi li għalihom għamel sejħa l-amministratur għandhom jintużaw biss biex titħallas in-nefqa fil-limiti approvati mill-Kumitat stabbilit bid-Deċiżjoni (PESK) 2021/509 fil-baġit emendatorju tal-2021 li tikkorrispondi għall-miżura ta’ assistenza.

2.   In-nefqa kollha għandha tiġi ġestita f’konformità mar-regoli għall-implimentazzjoni tad-dħul u n-nefqa ffinanzjata taħt l-EPF.

3.   In-nefqa relatata ma’ azzjonijiet approvati għall-implimentazzjoni taħt il-Miżura ta’ Assistenza għandha tkun eliġibbli għal finanzjament għal 60 xahar mill-1 ta’ Lulju 2021.

1.   Ir-Rappreżentant Għoli għandu jagħmel l-arranġamenti neċessarji mal-benefiċjarju biex jiżgura l-konformità tiegħu mar-rekwiżiti u l-kondizzjonijiet stabbiliti mill-Kunsill, inkluż il-konformità mad-dritt internazzjonali, b’mod partikolari d-dritt internazzjonali dwar id-drittijiet tal-bniedem u d-dritt umanitarju internazzjonali, bħala kondizzjoni għall-għoti ta’ appoġġ taħt il-Miżura ta’ Assistenza.

2.   L-arranġamenti msemmija fil-paragrafu 1 għandhom jinkludu dispożizzjonijiet li jobbligaw lill-benefiċjarju jiżgura:

(a)	l-użu xieraq u effiċjenti tal-assi kollha pprovduti taħt il-Miżura ta’ Assistenza għall-finijiet li għalihom ikunu ġew ipprovduti;

(b)	il-manutenzjoni suffiċjenti tal-assi kollha pprovduti taħt il-Miżura ta’ Assistenza biex tiġi żgurata l-użabilità tagħhom u d-disponibbiltà operazzjonali tagħhom matul iċ-ċiklu tal-ħajja tagħhom;

(c)

li l-assi kollha pprovduti taħt il-Miżura ta’ Assistenza mhux ser jintilfu, jew jiġu ttrasferiti mingħajr il-kunsens tal-Kumitat tal-Faċilità stabbilit skont id-Deċiżjoni (PESK) 2021/509 lil persuni jew entitajiet oħra għajr dawk identifikati f’dawk l-arranġamenti, fi tmiem iċ-ċiklu tal-ħajja tagħhom jew mal-iskadenza jew it-terminazzjoni tal-Miżura ta’ Assistenza.

3.   L-arranġamenti msemmija fil-paragrafu 1 għandhom jinkludu dispożizzjonijiet dwar is-sospensjoni u t-terminazzjoni tal-appoġġ taħt il-Miżura ta’ Assistenza f’każ li l-benefiċjarju jinstab li jkun kiser l-obbligi stabbiliti fil-paragrafu 2.

4.   L-amministratur għall-miżuri ta’ assistenza għandu jikkonkludi ftehim ta’ finanzjament mal-benefiċjarju li jkopri l-Miżura ta’ Assistenza. L-amministratur għall-miżuri ta’ assistenza għandhom jinformaw lill-Kumitat stabbilit bid- Deċiżjoni (PESK) 2021/509 bil-ftehim li jrid jiġi konkluż.

1.   Ir-Rappreżentant Għoli għandu jkun responsabbli li jiżgura l-implimentazzjoni ta’ din id-Deċiżjoni f’konformità mad-Deċiżjoni (PESK) 2021/509, u mar-Regoli għall-implimentazzjoni tad-dħul u n-nefqa taħt l-EPF u b’mod konsistenti mal-Qafas Metodoloġiku Integrat għall-valutazzjoni u l-indentifikazzjoni tal-miżuri u l-kontrolli meħtieġa għall-miżuri ta’ assistenza taħt l-EPF.

2.   L-azzjonijiet taħt il-Miżura ta’ Assistenza kif imsemmija fl-Artikolu 2 jistgħu jiġu implimentati kompletament jew parzjalment minn kwalunkwe waħda mill-entitajiet li ġejjin, inkluż permezz ta’ għotjiet li jistgħu jingħataw mingħajr sejħa għal proposti:

(a)	il-Kummissjoni tal-UA;

(b)	l-Unjoni tal-Magreb Għarbi;

(c)	il-Komunità tal-Istati tas-Saħel-Saħarjani;

(d)	is-Suq Komuni għall-Afrika tal-Lvant u tan-Nofsinhar;

(e)	il-Komunità tal-Afrika tal-Lvant;

(f)	il-Forza ta’ Intervent fil-Pront tal-Afrika tal-Lvant;

(g)	il-Komunità Ekonomika tal-Istati tal-Afrika Ċentrali;

(h)	il-Komunità Ekonomika tal-Istati tal-Afrika tal-Punent;

(i)	l-Awtorità Intergovernattiva dwar l-Iżvilupp;

(j)	il-Kapaċità Reġjonali tal-Afrika ta’ Fuq;

(k)	il-Komunità għall-Iżvilupp tan-Nofsinhar tal-Afrika;

(l)	il-G5 tas-Saħel;

(m)	il-Kummissjoni tal-Baċir tal-Lag Chad;

(n)	l-Uffiċċju tan-Nazzjonijiet Uniti (NU) tal-Kummissarju Għoli għad-Drittijiet tal-Bniedem;

(o)	is-Segretarjat tan-NU;

(p)	l-Uffiċċju tas-Servizzi tal-Proġetti tan-NU;

(q)	l-Uffiċċju ta’ Appoġġ tan-NU fis-Somalja

(r)	tali ministeri, dipartimenti tal-Gvern tal-Istati Membri, jew korpi u aġenziji tal-liġi pubblika oħra, jew korpi rregolati mil-liġi privata b’missjoni ta’ servizz pubbliku, kif stabbilit fl-Anness, sa fejn dawn tal-aħħar jingħataw garanziji finanzjarji adegwati.

3.   L-amministratur għall-miżuri ta’ assistenza għandu jikkonferma l-kapaċità ta’ entità speċifika li timplimenta azzjoni jew parti minnha qabel l-approvazzjoni ta’ appoġġ għall-azzjoni mill-KPS.

1.   Miżuri għall-monitoraġġ, l-evalwazzjoni u l-kontroll ta’ azzjonijiet taħt il-Miżura ta’ Assistenza għandhom jiġu stabbiliti b’mod konsistenti mal-Qafas Metodoloġiku Integrat għall-valutazzjoni u l-identifikazzjoni tal-miżuri u l-kontrolli meħtieġa għall-miżuri ta’ assistenza skont l-EPF.

2.   Il-miżuri msemmija fil-paragrafu 1, għandhom iservu b’mod partikolari biex jiżguraw il-konformità tal-benefiċjarju u ta’ kwalunkwe entità oħra li tibbenefika direttament mill-appoġġ taħt il-Miżura ta’ Assistenza mad-dritt internazzjonali dwar id-drittijiet tal-bniedem u mad-dritt umanitarju internazzjonali, kif ukoll il-konformità tal-benefiċjarju ma’ kwalunkwe impenn u obbligu ieħor stabbilit taħt l-arranġamenti msemmija fl-Artikolu 4.

3.   Skont l-appoġġ approvat għal azzjoni taħt il-Miżura ta’ Assistenza, il-miżuri msemmija fil-paragrafu 1 jistgħu jinkludu l-monitoraġġ tal-progress fir-rigward tal-kondizzjonijiet u l-punti ta’ riferiment miftiehma mal-benefiċjarju, l-istabbiliment u l-monitoraġġ ta’ oqfsa ta’ konformità tad-dritt internazzjonali dwar id-drittijiet tal-bniedem u tad-dritt umanitarju internazzjonali u r-rekwiżiti tad-diliġenza dovuta, il-kontroll tal-assi wara l-konsenja biex jiġi żgurat l-użu xieraq u tiġi evitata d-devjazzjoni, u l-identifikazzjoni ta’ strateġiji ta’ diżimpenn u ta’ ħruġ.

1.   F’konformità mal-Artikolu 64 tad-Deċiżjoni (PESK) 2021/509, il-KPS jista’ jiddeċiedi li jissospendi jew itemm l-appoġġ għal azzjonijiet taħt il-Miżura ta’ Assistenza, jew li jissospendi l-miżura ta’ assistenza kollha, fuq it-talba ta’ Stat Membru jew tar-Rappreżentant Għoli, fil-każijiet li ġejjin:

(a)	jekk il-benefiċjarju jkun qed jikser l-obbligi tiegħu skont id-dritt internazzjonali, b’mod partikolari d-dritt internazzjonali dwar id-drittijiet tal-bniedem u d-dritt umanitarju internazzjonali, jew jekk ma jissodisfax l-impenji meħuda taħt l-arranġamenti msemmija fl-Artikolu 4;

(b)	jekk il-kuntratt ma’ attur responsabbli mill-implimentazzjoni jkun ġie sospiż jew mitmum wara ksur tal-obbligi tiegħu skont il-kuntratt;

(c)	jekk is-sitwazzjoni fiż-żona ġeografika ta’ tħassib ma tibqax tippermetti li l-miżura tiġi implimentata filwaqt li jiġu żgurati garanziji suffiċjenti;

(d)	jekk l-insegwiment tal-miżura ma jibqax jaqdi l-objettivi tiegħu jew ma jibqax fl-interess tal-Unjoni.

F’każijiet urġenti u eċċezzjonali, ir-Rappreżentant Għoli jista’ b’mod proviżorju jissospendi kompletament jew parzjalment l-implimentazzjoni tal-Miżura ta’ Assistenza sakemm tittieħed deċiżjoni mill-KPS.

2.   Il-KPS jista’ jirrakkomanda lill-Kunsill it-terminazzjoni tal-Miżura ta’ Assistenza.