(1)

Ir-Regolament (UE) 2016/1012 jistabbilixxi regoli żootekniċi u ġenealoġiċi għall-kummerċ ta' annimali għat-tnissil, u għad-dħul tagħhom fl-Unjoni. Ir-Regolament (UE) 2016/1012 japplika mill-1 ta' Novembru 2018.

(2)

L-Artikolu 30 tar-Regolament (UE) 2016/1012 jistabbilixxi r-regoli għall-ħruġ, il-kontenut u l-format ta' ċertifikati żootekniċi li jakkumpanjaw annimali għat-tnissil u l-prodotti ġerminali tagħhom (“iċ-ċertifikat żootekniku”). Dan jipprevedi li fejn annimali ta' razza pura għat-tnissil li jkunu ddaħħlu fi ktieb tat-tnissil minn soċjetà tat-tnissil jiġu nnegozjati u fejn dawk l-annimali ta' razza pura għat-tnissil huma maħsuba biex jiddaħħlu fi ktieb tat-tnissil ieħor, dawk l-annimali għat-tnissil iridu jkunu akkumpanjati minn ċertifikat żootekniku.

(3)

L-Artikolu 30(6) tar-Regolament (UE) 2016/1012 jistipula li ċ-ċertifikati żootekniċi għandhom jinkludu l-informazzjoni stabbilita fil-Partijiet u fil-Kapitoli rilevanti tal-Anness V ta' dak ir-Regolament. L-Artikolu 32(1) tar-Regolament (UE) 2016/1012 jipprevedi li, b'deroga mill-Artikolu 30(6) tiegħu, fil-każ ta' annimali ta' razza pura għat-tnissil tal-ispeċi ekwina, l-informazzjoni stabbilita fil-Kapitolu I tal-Parti 2 tal-Anness V tiegħu għandha tkun inkluża f'dokument ta' identifikazzjoni permanenti uniku għall-equidae u għandhom jiġu adottati atti delegati dwar il-kontenut u l-format ta' tali dokumenti ta' identifikazzjoni.

(4)

Il-Kapitolu I tal-Parti 2 tal-Anness V tar-Regolament (UE) 2016/1012 jistabbilixxi regoli dwar l-informazzjoni li trid tiġi inkluża fiċ-ċertifikat żootekniku għal annimali ta' razza pura għat-tnissil. Dik l-informazzjoni trid tinkludi s-sistema ta' identifikazzjoni u n-numru ta' identifikazzjoni indivdwali mogħti lill-annimali ta' razza pura għat-tnissil b'konformità mal-liġi tal-Unjoni dwar is-saħħa tal-annimali dwar l-identifikazzjoni u r-reġistrazzjoni tal-annimali tal-ispeċi kkonċernata.

(5)

Ir-Regolament (UE) 2016/429 tal-Parlament Ewropew u tal-Kunsill (2) jistabbilixxi rekwiżiti ta' traċċabbiltà tal-annimali terrestri miżmuma u tal-prodotti ġerminali. L-Artikolu 114 ta' dak ir-Regolament jipprevedi lil-operaturi li jżommu annimali miżmuma tal-ispeċi ekwina għandhom jiżguraw li dawk l-annimali jiġu identifikati individwalment b'kodiċi uniku li jiġi rreġistrat fil-bażi ta' dejta kompjuterizzata prevista f'dak ir-Regolament u b'dokument ta' identifikazzjoni permanenti uniku li jimtela b'mod korrett. Sabiex iċ-ċertifikat żootekniku jkun armonizzat kemm jista' jkun ma' dak id-dokument ta' identifikazzjoni permanenti uniku fir-rigward tal-kontenut u tal-proċedura amministrattiva, ir-Regolament (UE) 2016/1012 ippreveda li l-atti delegati jiġu adottati fir-rigward tal-format u tal-kontenut ta' dokument ta' identifikazzjoni permanenti uniku għall-annimali tal-ispeċi ekwina.

(6)

Għaldaqstant, jenħtieġ li jiġu stabbiliti l-kontenut u l-format taċ-ċertifikat żootekniku li jrid ikun inkluż f'dokument ta' identifikazzjoni permanenti uniku għall-equidae, li bih l-equidae jridu jiġu identifikati b'konformità mal-Artikolu 114(1)(c) tar-Regolament (UE) 2016/429, u li jrid jakkumpanja lill-annimali ta' razza pura għat-tnissil tal-ispeċi ekwina f'kull ħin, inkluż meta dawn jiġu nnegozjati fl-Unjoni.

(7)

L-Artikolu 31 tar-Regolament (UE) 2016/1012 jistabbilixxi derogi mir-rekwiżiti dwar il-ħruġ, il-kontenut u l-format ta' ċertifikati żootekniċi għall-kummerċ ta' annimali għat-tnissil. Dan jipprevedi li meta r-riżultati tal-kontroll tal-prestazzjoni jew tal-evalwazzjoni ġenetika jkunu disponibbli pubblikament fuq sit web, fiċ-ċertifikat żootekniku jista' jkun hemm referenza għas-sit web minn fejn wieħed ikun jista' jara dawk ir-riżultati, minflok ma jiġu inklużi fiċ-ċertifikat żootekniku. Dik il-possibbiltà jenħtieġ li tkun riflessa fir-rekwiżiti għaċ-ċertifikat żootekniku għall-kummerċ ta' annimali ta' razza pura għat-tnissil tal-ispeċi ekwina stabbiliti f'dan ir-Regolament.

(8)

Il-Parti 3 tal-Anness I tar-Regolament (UE) 2016/1012 tistabbilixxi rekwiżiti addizzjonali għas-soċjetajiet tat-tnissil li jistabbilixxu jew iżommu kotba tat-tnissil għal annimali ta' razza pura għat-tnissil tal-ispeċi ekwina. B'konformità mal-punt 1 tal-Parti 3 ta' dak l-Anness, l-annimali ta' razza pura għat-tnissil tal-ispeċi ekwina għandhom jiddaħħlu biss fi ktieb tat-tnissil fejn jiġu identifikati permezz ta' ċertifikat ta' kopertura u, fejn meħtieġ mill-programm ta' tnissil, bħala “moħor mhux miftum minn ommu”. B'deroga minn dik ir-regola, Stat Membru jew, jekk huwa hekk jiddeċiedi, l-awtorità kompetenti tiegħu, jistgħu jawtorizzaw soċjetà tat-tnissil biex iddaħħal annimali ta' razza pura għat-tnissil tal-ispeċi ekwina fil-ktieb tat-tnissil miżmum minn dik is-soċjetà tat-tnissil fejn dawk l-annimali jiġu identifikati b'kull metodu ieħor adatt li jipprovdi tal-anqas l-istess grad ta' ċertezza bħal ċertifikat ta' kopertura, bħal kontroll tal-parentela bbażat fuq analiżi tad-DNA jew fuq analiżi tal-gruppi tad-demm tagħhom, sakemm din l-awtorizzazzjoni timxi skont il-prinċipji stabbiliti mis-soċjetà tat-tnissil li żżomm il-ktieb tat-tnissil tal-oriġini ta' dik ir-razza.

(9)

Filwaqt li jitqiesu r-rekwiżiti stabbiliti fil-punt 1 tal-Parti 3 tal-Anness I tar-Regolament (UE) 2016/1012, l-informazzjoni dwar iċ-ċertifikat ta' kopertura, dwar l-identifikazzjoni bħala “moħor mhux miftum minn ommu” u dwar ir-riżultati tal-kontroll ta' parentela, jenħtieġ li tkun riflessa fir-regoli dwar il-kontenut taċ-ċertifikati żootekniċi għal annimali ta' razza pura għat-tnissil tal-ispeċi ekwina stabbiliti f'dan ir-Regolament.

(10)

Sabiex tkun żgurata l-uniċità u l-kontinwità tal-identifikazzjoni ta' annimali ta' razza pura għat-tnissil tal-ispeċi ekwina u b'konformità mar-rekwiżiti stabbiliti fil-punti 1(c) u 3 tal-Kapitolu I tal-Parti 1 tal-Anness II tar-Regolament (UE) 2016/1012, il-kodiċi uniku kif previst fl-Artikolu 114(1)(a) tar-Regolament (UE) 2016/429, u l-isem ta' tali annimali għat-tnissil jenħtieġ li jiġu inklużi fiċ-ċertifikat żootekniku għall-kummerċ bħala parti mid-dettalji tal-identifikazzjoni tiegħu.

(11)

Ir-Regolament ta' Implimentazzjoni tal-Kummissjoni (UE) 2015/262 (3) jirrikjedi korp emittenti, inklużi l-organizzazzjonijiet jew l-assoċjazzjonijiet li jkunu stabbilew jew li jżommu kotba li jkun fihom ir-razez taż-żwiemel għall-equidae rreġistrati, li jassenja lil kull annimal ekwin numru permanenti uniku, li jiġbor f'kodiċi alfanumeriku informazzjoni dwar l-annimali ekwin individwali u l-bażi ta' dejta u l-pajjiż fejn din l-informazzjoni tkun ġiet irreġistrata l-ewwel darba. Dan in-numru permanenti uniku jrid ikun kompatibbli mas-sistema tan-Numru Universali Permanenti tal-Ekwini (UELN).

(12)

Intlaħaq qbil dwar is-sistema UELN bejn l-organizzazzjonijiet ewlenin tar-riproduzzjoni taż-żwiemel u tal-kompetizzjonijiet. Din is-sistema ġiet żviluppata fuq l-inizjattiva tal-World Breeding Federation for Sport Horses (WBFSH), l-International Stud-Book Committee (ISBC), il-World Arabian Horse Organization (WAHO), il-European Conference of Arabian Horse Organisations (ECAHO), il-Conférence internationale de l'anglo-arabe (CIAA), il-Fédération equestre internationale (FEI) u l-Union européenne du trot (UET) u tista' tinstab informazzjoni dwarha fuq is-sit web tal-UELN (4).

(13)

Il-format u l-kontenut tan-numru ta' identifikazzjoni individwali msemmi fil-punt 3 tal-Kapitolu I tal-Parti 1 tal-Anness II tar-Regolament (UE) 2016/1012 ma jistgħux jiġu deċiżi sakemm l-atti delegati li jistabbilixxu r-rekwiżiti dettaljati għall-mezzi u għall-metodi ta' identifikazzjoni, inklużi l-applikazzjoni u l-użu tagħhom, ikunu ġewadottati b'konformità mal-Artikolu 118(1)(a) tar-Regolament (UE) 2016/429. Madankollu, fiċ-ċertifikat żootekniku jenħtieġ li jkun hemm partijiet fejn jiddaħħal in-numru permanenti uniku assenjat lill-annimali ta' razza pura għat-tnissil tal-ispeċi ekwina b'konformità mar-Regolament ta' Implimentazzjoni (UE) 2015/262.

(14)

Sal-21 ta' April 2021, li hija d-data tal-applikazzjoni tar-Regolament (UE) 2016/429, il-Parti I taċ-ċertifikat żootekniku stabbilit fl-Anness ta' dan ir-Regolament hija fakultattiva jekk dokument ta' identifikazzjoni permanenti uniku għall-equidae jinkludi t-Taqsima V tal-mudell tad-dokument ta' identifikazzjoni stabbilit fil-Parti 1 tal-Anness I tar-Regolament ta' Implimentazzjoni (UE) 2015/262.

(15)

Dan ir-Regolament jenħtieġ li jkun applikabbli mill-1 ta' Novembru 2018 b'konformità mad-data tal-applikazzjoni prevista fir-Regolament (UE) 2016/1012,