Rikors ippreżentat fid-19 ta’ Diċembru 2019 – Ryanair u Laudamotion vs Il-Kummissjoni

(Kawża T-866/19)

(2020/C 68/54)

Lingwa tal-kawża: l-Ingliż

Partijiet

Rikorrenti: Ryanair DAC (Swords, l-Irlanda), Laudamotion GmbH (Schwechat, l-Awstrija) (rappreżentanti: E. Vahida u I. Metaxas-Maranghidis, avukati)

Konvenuta: Il-Kummissjoni Ewropea

Talbiet

Ir-rikorrenti jitolbu li l-Qorti Ġenerali jogħġobha:

Motivi u argumenti prinċipali

Fir-rikors tagħhom, ir-rikorrenti jitolbu li l-Qorti Ġenerali tannulla id-Deċiżjoni ta’ Implimentazzjoni tal-Kummissjoni (UE) 2019/1585 (1)

Insostenn tar-rikors tagħhom, ir-rikorrenti jinvokaw sitt motivi.

L-ewwel motiv, ibbażat fuq l-allegazzjoni li d-Deċiżjoni ta’ Implimentazzjoni tal-Kummissjoni (UE) 2019/1585 tikser l-obbligu ta’ motivazzjoni u l-prinċipju tal-libertà li jiġu pprovduti servizzi għaliex il-Kummissjoni ma stħarrġitx l-eżistenza ta’ għan ta’ interess ġenerali superjuri li jkun jiġġustifika r-restrizzjoni tal-prinċipju tal-libertà li jiġu pprovduti servizzi stabbilita mir-regoli dwar id-distribuzzjoni tat-traffiku għall-ajruporti ta’ Schiphol u Lelystad.

It-tieni motiv, b’mod sussidjarju, ibbażat fuq l-allegazzjoni li d-Deċiżjoni ta’ Implimentazzjoni tal-Kummissjoni (UE) 2019/1585 tikser il-prinċipju tal-libertà li jiġu pprovduti servizzi u l-Artikolu 19(2) tar-Regolament (KE) Nru 1008/2008 tal-Parlament Ewropew u tal-Kunsill (2) għaliex is-saturazzjoni tal-ajruport ta’ Schiphol u l-benefiċċju superjuri ta’ titjiriet ta’ trasferiment li r-regoli dwar id-distribuzzjoni tat-traffiku huma intiżi li jtebju, ma humiex stabbiliti.

It-tielet motiv, ibbażat fuq l-allegazzjoni li d-Deċiżjoni ta’ Implimentazzjoni tal-Kummissjoni (UE) 2019/1585 tikser il-prinċipju tal-libertà li jiġu pprovduti servizzi u l-Artikolu 19(2) tar-Regolament (KE) Nru 1008/2008 minħabba diskriminazzjoni introdotta bir-regoli dwar id-distribuzzjoni tat-traffiku fl-assenza ta’ ġustifikazzjonijiet oġġettivi.

Ir-raba’ motiv, ibbażat fuq l-allegazzjoni li d-Deċiżjoni ta’ Implimentazzjoni tal-Kummissjoni (UE) 2019/1585 tikser il-prinċipju tal-libertà li jiġu pprovduti servizzi u l-Artikolu 19(2) tar-Regolament (KE) Nru 1008/2008 minħabba n-nuqqas ta’ proporzjonalità tar-regoli dwar id-distribuzzjoni tat-traffiku u n-nuqqas tal-Kummissjoni li tistħarreġ jekk kienx hemm mezzi inqas onerużi.

Il-ħames motiv, ibbażat fuq l-allegazzjoni ta’ ksur tar-Regolament tal-Kunsill (KEE) Nru 95/93 (3) għaliex il-Kummissjoni naqset milli tistħarreġ il-konformità mal-proċedura għall-indikazzjoni tal-ajruport ta’ Lelystad bħala ajruport ikkoordinat u minħabba l-istabbiliment ta’ rabta bejn slots u destinazzjonijiet u kontradizzjoni mal-prinċipji ġenerali li jirregolaw ir-Regolament (KEE) Nru 95/93.

Is-sitt motiv, ibbażat fuq l-allegazzjoni ta’ ksur tal-Artikolu 19(2) tar-Regolament (KE) Nru 1008/2008 għaliex il-Kummissjoni ma stħarrġitx jekk il-kundizzjoni li l-ajruporti joffru servizzi neċessarji lil trasportaturi bl-ajru u ma jippreġudikawx bla bżonn l-opportunitajiet kummerċjali tagħhom, ġietx issodisfatta.

(1)  Deċiżjoni ta’ Implimentazzjoni tal-Kummissjoni (UE) 2019/1585 tal-24 ta’ Settembru 2019 dwar l-istabbiliment ta’ regoli dwar id-distribuzzjoni tat-traffiku skont l-Artikolu 19 tar-Regolament (KE) Nru 1008/2008 tal-Parlament Ewropew u tal-Kunsill għall-ajruporti ta' Amsterdam Schiphol u Amsterdam Lelystad (ĠU 2019, L 246, p. 24).

(2)  Regolament (KE) Nru 1008/2008 tal-Parlament Ewropew u tal-Kunsill ta’ l-24 ta’ Settembru 2008 dwar regoli komuni għall-operat ta’ servizzi ta l-ajru fil-Komunità (ĠU 2008, L 293, p. 3).

(3)  Regolament tal-Kunsill (KEE) Nru 95/93 tat-18 ta’ Jannar 1993 dwar ir-regoli komuni għall-allokazzjoni ta’ slots f’ajruporti tal-Komunità (ĠU Edizzjoni Speċjali bil-Malti, Kapitolu 7, Vol. 2, p. 3)