15.1.2016   

MT

Il-Ġurnal Uffiċjali tal-Unjoni Ewropea

C 13/201

Relatur uniku:

is-Sur Brian CURTIS

1.1.

Il-KESE jaqbel b’mod ġenerali mal-intenzjoni tal-Kummissjoni li tibni fuq dawk l-affarijiet li jaħdmu sew, u b’hekk iżżomm livell għoli ta’ kontinwità, filwaqt li fl-istess ħin tirreaġixxi għar-rekwiżiti l-ġodda. Huwa jqis ukoll li l-bidliet proposti ma jmorrux lil hinn minn dak li huwa neċessarju u adatt biex jintlaħaq l-għan bażiku tat-titjib tal-kwalità, l-aċċess u d-disponibbiltà tad-data fis-settur tas-sajd.

1.2.

Id-disponibbiltà tad-data hija l-qasam fejn għandu jsir l-aktar progress. Il-proċess li bih l-utenti finali jitolbu d-data mill-Istati Membri (“data calls”) huwa ta’ piż wisq kbir u jitlob wisq riżorsi; l-aċċessibbiltà għad-data dwar l-attività tas-sajd tvarja skont l-Istat Membru minħabba r-regoli differenti dwar l-aċċess, parzjalment minħabba l-limitazzjoni tal-użu b’diversi skopijiet ta’ din id-data; id-data tal-Qafas għall-Ġbir tad-Data (DCF) mhix qed tintuża biżżejjed peress li diffiċli li tiġi aċċessata, u dan qed iwassal biex jintilfu opportunitajiet kbar fl-użu potenzjali ta’ din id-data u għal investimenti mhux meħtieġa meta l-istess data tinġabar għal skopijiet oħra (pereżempju fil-politiki dwar li ġestjoni taż-żoni marittimi). Ir-reviżjoni tad-DCF hija opportunità biex, minn naħa waħda, tiġi żgurata disponibbiltà aħjar ta’ data dwar is-sajd għal ċirku usa’ ta’ partijiet interessati, u min-naħa l-oħra, sabiex jitnaqqas il-piż tat-talbiet għal data li jridu jġorru l-Istati Membri billi jintużaw l-aktar żviluppi tekniċi reċenti.

1.3.

It-titjib fil-kwalità u l-affidabbiltà għad irid jinkiseb. Mod kif tiġi żgurata kwalità għolja tad-data hu li jiġu applikati l-Kodiċi ta’ Prattika tal-Istatistika Ewropea u l-Qafas ta’ Garanzija tal-Kwalità tas-Sistema Ewropea tal-Istatistika.

2.1.

Fl-2000 (1) ġie stabbilit qafas tal-UE għall-ġbir u l-ġestjoni tad-data tas-sajd, u dan saritlu riforma fl-2008 li rriżultat fil-Qafas għall-Ġbir tad-Data (DCF) (2). Id-DCF kien jirrappreżenta progress ewlieni fit-twaqqif ta’ sett armonizzat ta’ regoli tal-UE li jirregolaw il-ġbir tad-data bijoloġika, ambjentali, teknika u soċjoekonomika dwar is-setturi tas-sajd, tal-akkwakultura u tal-ipproċessar.

2.2.

Waqt l-adozzjoni tar-riforma tal-Politika Komuni tas-Sajd (PKS) (3) fl-2013, il-Kunsill u l-Parlament Ewropew talbu lill-Kummissjoni biex tgħaġġel il-proċess għall-adozzjoni ta’ proposta li temenda d-DCF sabiex il-prinċipji u l-objettivi għall-ġbir tad-data, li huma essenzjali għall-appoġġ tal-Politika Komuni tas-Sajd riformata jkunu jistgħu jsiru effettivi b’mod prattiku mill-aktar fis possibbli. Din il-proposta hija maħsuba biex tilħaq dan l-għan, billi tissaħħaħ il-kooperazzjoni reġjonali u billi jsir aġġustament għall-bżonnijiet ġodda tad-data.

2.2.1.

Id-DCF irid ikun allinjat mal-bżonnijiet li jinħolqu mir-Regolament il-ġdid tal-PKS: il-bidla gradwali lejn ir-Rendiment Massimu Sostenibbli (MSY), l-impatt tas-sajd fuq l-ekosistemi (pereżempju l-ispeċijiet protetti, il-ħabitats f’qiegħ il-baħar), l-impatti ambjentali u oħrajn tal-akkwakultura (murija mill-informazzjoni dwar il-mortalità/telf jew l-użu tal-mediċini) u l-effetti tal-obbligu ta’ żbark.

2.2.2.

Ir-reviżjoni tad-DCF għandha wkoll tiżgura li d-data tinġabar skont analiżi tal-kostijiet-benefiċċji jew analiżi tal-kostijiet-użu tal-preċiżjoni miksuba permezz ta’ mudelli xjentifiċi u l-livell ta’ riskju assoċjat (pereżempju minflok ma jitwettaq stħarriġ kull sena, isir kull tliet snin). Tali analiżi għandha tkun ibbażata fuq diskussjoni bejn l-amministraturi tas-sajd, dawk li jiġbru d-data u l-persuni li jipprovdu l-pariri xjentifiċi.

2.3.

Il-proposta tal-Kummissjoni għandha l-għan li tallinja d-DCF u l-leġiżlazzjoni rilevanti l-oħra tal-UE dwar il-ġbir tad-data dwar is-sajd sabiex titneħħa d-duplikazzjoni u b’hekk jitnaqqsu l-ispejjeż tas-sistema kollha tad-data dwar il-baħar. Valutazzjoni separata dedikata ma tqisitx neċessarja minħabba li d-DCF kien soġġett għall-valutazzjoni tal-impatt għall-PKS peress li l-intenzjoni kienet ċara li d-DCF għandu jkun parti minnha.

3.1.

Id-DCF huwa kumpless wisq, kemm fil-qafas legali kif ukoll f’termini ta’ arranġamenti ta’ implimentazzjoni. Sors wieħed ta’ kumplessità u ineffiċjenza huwa d-duplikazzjoni bejn ir-rekwiżiti tad-data koperti mid-DCF u leġiżlazzjoni oħra tal-UE, bħar-regolament dwar il-kontroll (4) u r-regolamenti speċifiċi tal-istatistika (5). Il-fatt li l-istess data mhux ipproċessata trid tintbagħat f’formati aggregati b’mod differenti lill-utenti finali differenti huwa sors ieħor ta’ kumplessità u ineffiċjenza.

3.2.

L-istruttura legali tad-DCF hija eċċessivament preskrittiva u dettaljata, u dan wassal għal sistema ineffiċjenti u li ma tirreaġixxix biżżejjed għall-ħtiġiet li dejjem qed jevolvu. Għalhekk jeħtieġ li l-uttenti finali jiġu inkorporati fit-tħejjija tar-rekwiżiti tad-data biex jiġi żgurat li dawn jissodisfaw ħtiġiethom.

3.3.

Qasam ieħor ta’ interess huwa l-ħtieġa li jiżdiedu s-sinerġiji mal-għanijiet tal-politiki l-oħra tal-UE. Dan huwa primarjament il-każ għad-Direttiva Kwadru dwar l-Istrateġija Marina (MSFD).