Appell ippreżentat fil-21 ta’ Lulju 2014 minn Dunamenti Erőmű Zrt mis-sentenza mogħtija mill-Qorti Ġenerali (Is-Sitt Awla) fit-30 ta’ April 2014 fil-Kawża T-179/09, Dunamenti Erőmű Zrt vs Il-Kummissjoni Ewropea

(Kawża C-357/14 P)

2014/C 329/10

Lingwa tal-kawża: l-Ingliż

Partijiet

Appellanti: Dunamenti Erőmű Zrt (rappreżentanti: J. Philippe, F.-H. Boret, A.-C. Guyon, avukati)

Parti oħra fil-proċedura: Il-Kummissjoni Ewropea

Talbiet tal-appellanti

Aggravji u argumenti prinċipali

L-appellanti tinvoka ħames aggravji. Fis-sentenza appellata, il-Qorti Ġenerali ċaħdet ir-rikors tal-appellanti intiż, essenzjalment, għall-annullament tad-Deċiżjoni Kummissjoni 2009/609/KE, tal-4 ta’ Ġunju 2008, dwar l-Għajnuna mill-Istat C-41/05 mogħtija mill-Ungerija permezz ta’ Ftehimiet għax-Xiri tal-Enerġija u, sussidjarjament, għall-annullament tal-Artikoli 2 u 5 tal-imsemmija deċiżjoni.

Permezz tal-ewwel aggravju, l-appellanti tikkontesta l-evalwazzjoni tal-Qorti Ġenerali meta ddeċidiet li l-Ftehimiet għax-Xiri tal-Enerġija (iktar 'il quddiem il-“FXE”) setgħu jiġu kklassifikati bħala għajnuna ġdida mingħajr ma stabbiliet minn qabel jekk il-FXE kinux jikkostitwixxu għajnuna mill-Istat skont l-Artikolu 107(1) TFUE.

Permezz tat-tieni aggravju, l-appellanti tikkontesta d-deċiżjoni tal-Qorti Ġenerali li l-Kummissjoni ma kinitx ħadet żball meta sostniet li l-mument tal-adeżjoni tal-Ungerija fl-Unjoni Ewropea kien il-perijodu ta’ referenza xieraq sabiex miżura tiġi kklassifikata bħala għajnuna mill-Istat skont il-kriterji stabbiliti fl-Artikolu 107(1) TFUE. Il-Qorti Ġenerali tkun qed twettaq żball ta’ liġi meta tqis li l-Anness IV stabbilixxa regola li tgħid li l-perijodu rilevanti sabiex jiġi evalwat jekk miżura tal-Istat kinitx tikkostitwixxi għajnuna mill-Istat kien il-mument tal-adeżjoni tal-Ungerija. It-tifsira tal-Artikolu IV ġie distort peress li dan ma kienx jipprevedi u lanqas ma kien jissuġġerixxi li l-analiżi tal-kwistjoni dwar jekk miżura tikkostitwixxix għajnuna mill-Istat għandha ssir fid-data tal-adeżjoni.

Permezz tat-tielet aggravju, l-appellanti tosserva li l-Qorti Ġenerali tkun qed twettaq żball ta’ liġi meta tqis li ngħata vantaġġ skont l-Artikolu 107(1) mingħajr ma tieħu inkunsiderazzjoni l-elementi eżistenti fil-mument tal-konklużjoni tal-FXE. Il-Qorti Ġenerali tagħmel żball meta tqis li ngħata vantaġġ fil-mument li i) Magyar Villamos Művek (MVM) kienet aġixxiet bħala investitur privat meta kkonkludiet il-FXE bħala miżura preparatorja sabiex tiffaċilita l-privatizzazzjoni tad-Dunamenti, u (ii) fi kwalunkwe każ, anki li kieku l-FXE kienet tat vantaġġ (xi ħaġa li l-appellanti tikkontesta), dan ingħata lura permezz tal-bejgħ tad-Dunamenti.

Permezz tar-raba’ aggravju, l-appellanti tikkontesta l-evalwazzjoni tal-Qorti Ġenerali tar-riskju li ġej mill-obbligu tal-xiri minimu tal-MVM. Il-Qorti Ġenerali tkun qed twettaq żball ta’ liġi meta tasal għall-konklużjoni li jeżisti vantaġġ li ġej mill-obbligu ta’ xiri minimu tal-MVM mingħajr ma tipproduċi prova dwar l-eżistenza ta’ riskju strutturali.

Permezz tal-ħames aggravju, l-appellanti tikkontesta l-konferma tal-Qorti Ġenerali tal-metodu wżat mill-Kummissjoni sabiex tagħmel kalkolu tal-ammont tal-għajnuna. Il-Qorti Ġenerali tkun qed twettaq żball ta’ liġi meta tivvalida l-metodu preskritt peress li dan kien jiddefinixxi l-ammonti li għandhom jiġu miġbura bħala d-differenza fid-dħul u mhux bħala d-differenza fil-profitti peress li din id-differenza tkun tista’ tikkonfuta l-eżistenza tal-għajnuna mill-Istat.

(1)  ĠU L 225, p. 53.