6.3.2014   

MT

Il-Ġurnal Uffiċjali tal-Unjoni Ewropea

C 67/32

1.1

L-immigrazzjoni irregolari hija suġġett li ġie analizzat mill-KESE f'diversi okkażjonijiet minn angoli differenti (1). Il-fenomenu tal-immigrazzjoni irregolari huwa wieħed kumpless li jmiss diversi aspetti u li jirrikjedi kemm miżuri għal perjodu ta' żmien qasir kif ukoll miżuri fit-tul. Din l-opinjoni ser tiffoka fuq il-punti mniżżla hawn taħt:

1.2

F'dan il-kuntest, il-Kumitat jesprimi sentimenti ta' dispjaċir kbir għall-mewt ta' mill-inqas 311 migrant Afrikan, u probabbilment ħafna aktar, lil hinn mill-kosta ta' Lampedusa f'żewġ inċidenti reċenti ta' nawfraġju. Filwaqt li m'hemmx kawża waħda għal din it-traġedja, il-Kumitat jemmen li dawn l-avvenimenti huma sintomatiċi tal-problema aktar wiesgħa tal-immigrazzjoni irregolari bil-baħar lejn l-UE, u li hemm rabta ta' kawża u effett bejn dawn iż-żewġ inċidenti u dak li jidher bħala n-nuqqas ta' kapaċità tal-UE li tistabbilixxi politiki sodisfaċenti u koerenti dwar l-immigrazzjoni irregolari bbażati fuq is-solidarjetà, fosthom politiki dwar it-tfittxija, is-salvataġġ u d-diżimbark. Il-Kumitat jappella lill-UE u lill-Istati Membri biex iqisu dawn l-inċidenti bħala twissija biex jistenbħu u jaġixxu issa fuq ir-rakkomandazzjonijiet ta' din l-opinjoni qabel ma sseħħ traġedja oħra. It-traġedji ta' Lampeduża jsaħħu l-ħtieġa assoluta li l-UE titratta l-kwistjoni tal-immigrazzjoni irregolari u s-superviżjoni tal-fruntieri bħala kwistjoni Ewropea.

1.3

Drittijiet tal-bniedem: il-Kumitat jinsab imħasseb huwa u josserva li fl-Ewropa qed jiżdiedu l-intolleranza, ir-razziżmu u l-ksenofobija kontra l-immigranti, kontra “l-oħrajn”, u jibża’ li l-effetti soċjali tal-kriżi finanzjarja se jikkontribwixxu sabiex dawn jiżdiedu. Jeħtieġ li l-politiċi, il-mexxejja soċjali u l-mezzi ta’ komunikazzjoni jaġixxu b’mod ferm responsabbli u b’pedagoġija politika u soċjali kbira sabiex jiġi evitat dan it-tip ta’ mġiba. Id-drittijiet tal-bniedem tal-immigranti irregolari jridu jitħarsu f'kull ħin, meta jiġu salvati jew detenuti, jingħataw l-istatus ta' protezzjoni, ikunu fil-qagħda irregolari ta' "persuni mingħajr dokumenti" jew jiġu rimpatrijati lejn il-pajjiżi ta' oriġini tagħhom.

1.4

Salvataġġ ta' persuni fil-baħar: kull min ikun fil-periklu fil-baħar jew isib ruħu f' sitwazzjoni oħra ta' periklu, irid jiġi salvat, u dan jgħodd ukoll għall-immigranti irregolari.

1.5

Żbark: l-UE trid tadotta politika ta' żbark li ma żżidx il-piż fuq l-Istati Membri li diġà qed jiffaċċjaw flussi sproporzjonati. Il-kwistjoni tal-iżbark trid tissolva fuq il-bażi tal-prinċipju tal-iżbark fl-eqreb post sikur biss jekk il-pajjiż inkwistjoni jikkonforma bis-sħiħ mal-konvenzjonijiet internazzjonali kollha dwar id-drittijiiet tal-bniedem u jkun suġġett għall-monitoraġġ tal-organizzazzjonijiet tad-drittijiet tal-bniedem.

1.6

Id-dritt għall-asil u l-għoti tiegħu: għandu jiġi ggarantit il-prinċipju ta’ non-refoulement fil-fruntiera u għandu jiġi żgurat li dawk kollha li għandhom bżonn protezzjoni internazzjonali jkunu jistgħu jippreżentaw l-applikazzjoni tagħhom fl-UE u li dawn l-applikazzjonijiet jiġu pproċessati mill-awtoritajiet nazzjonali kompetenti. F'dan il-kuntest, hemm bżonn li tinħoloq sistema iżjed effiċjenti biex jiġu eżaminati t-talbiet għall-asil. Il-KESE jappoġġja wkoll il-kollaborazzjoni mal-pajjiżi terzi sabiex jissaħħew is-sistemi tal-asil tagħhom u l-konformità mal-istandards internazzjonali.

1.7

Rimpatriju tal-immigranti irregolari: id-Direttiva dwar ir-Ritorn (2) tipprovdi qafas Ewropew ta’ garanziji legali u proċedurali ta’ protezzjoni (3), li huma apprezzati mill-KESE, bħar-rimedju effettiv li persuna tappella kontra d-deċiżjonijiet relatati mar-ritorn quddiem awtorità ġudizzjarja jew amministrattiva kompetenti jew korp kompetenti independenti, kif ukoll rappreżentanza u assistenza legali bla ħlas, ċerti garanziji waqt l-istennija tar-ritorn, il-kundizzjonijiet ta’ detenzjoni, eċċ. Il-Kumitat jipproponi li l-politika Ewropea dwar ir-ritorn għandha tkun imsejsa fuq approċċ volontarju u fuq l-ikbar konsiderazzjoni possibbli tal-valuri umanitarji. Il-leġittimità u l-kredibbiltà tal-politika Ewropea dwar l-immigrazzjoni fil-bqija tad-dinja jiddependu minn dan. L-Artikolu 19 tal-Karta tad-Drittijiet Fundamentali jipprojbixxi b'mod espliċitu tkeċċijiet kollettivi u jiżgura li ħadd ma jista’ jitneħħa, jitkeċċa jew ikun estradit lejn Stat fejn ikun hemm riskju serju li jkun suġġett għall-piena tal-mewt, għat-tortura jew għal pieni jew trattamenti oħra inumani jew degradanti – il-prinċipju ta’ non-refoulement (Artikoli 4 u 19 tal-Karta).

1.8

Politika Ewropea globali dwar l-immigrazzjoni irregolari bbażata fuq is-solidarjetà: il-KESE huwa tal-fehma li, sabiex jiġi żgurat ir-rispett tad-drittijiet fundamentali, għandha tissaħħaħ is-solidarjetà tal-UE ma’ dawk l-Istati Membri li, minħabba l-pożizzjoni ġeografika tagħhom, ikollhom jittrattaw ma’ ammonti kbar ta’ vittmi tan-netwerks tat-traffikar/il-kuntrabandu kriminali li jaslu b’mezzi irregolari. Il-fruntieri tal-UE, u dawn jinkludu l-fruntieri tal-baħar tal-Istati Membri tal-UE fil-Mediterran, huma l-fruntieri tal-Istati Membri kollha tal-UE u għaldaqstant, ir-responsabbiltà li jitħarsu tajjeb għandha tinqasam fost l-Istati Membri, b'konformità mat-Trattati. Dan ma jirrigwardax biss it-turija ta' solidarjetà, iżda li l-Istati Membri kollha jassumu r-responsabbiltajiet tagħhom permezz ta' mekkaniżmi li jaqsmu l-piż li ġġib magħha l-immigrazzjoni irregolari. Għalhekk, is-solidarjetà u l-appoġġ għandhom jintwerew ukoll mal-Istati Membri li jinsabu fil-fruntieri esterni tal-UE permezz ta' mekkaniżmi li jaqsmu l-piż li jippermettu li l- applikanti għall-asil jiġu risistemizzati fi ħdan l-UE. Il-KESE jappoġġja b'konvinzjoni l-implimentazzjoni ta' Koeffiċjent ta' Distribuzzjoni tal-UE kif deskritt fir-rapport tal-Parlament Ewropew dwar it-titjib tas-solidarjetà fl-UE fil-qasam tal-ażil (2012/2032 INI).

1.9

Abbozzar ta' ftehimiet ma' pajjiżi terzi: l-għan prinċipali tad-djalogi dwar il-migrazzjoni u l-mobilità tal-UE ma’ pajjiżi terzi għandu jkun li tiġi ffaċilitata l-migrazzjoni legali u ordnata, li tiġi żgurata l-liġi internazzjonali dwar l-asil, li titnaqqas l-immigrazzjoni irregolari u li jiġu miġġielda n-netwerks kriminali tat-traffikar tal-bnedmin. Il-kooperazzjoni ma' pajjiżi terzi hija spiss essenzjali bħala kundizzjoni għall-implimentazzjoni effikaċi tal-proċeduri tar-rimpatriju. Din il-kooperazzjoni trid titjieb biex tikseb riżultati aħjar. Fl-istess waqt trid tingħata assistenza lil ċerti pajjiżi ta' tranżitu biex huma jkunu jistgħu jiġġestixxu l-fruntieri tagħhom aħjar, u anke jkunu jistgħu jibnu l-kapaċità biex jagħtu ħarsien lil dawk li jeħtiġuh.

1.10

L-Aġenzija Ewropea għall-Fruntieri Esterni - Frontex: Frontex għandha tiġi ristrutturata f'aġenzija Ewropea ġenwina għall-fruntieri esterni, bi rwol ta' koordinazzjoni usa' rigward l-azzjoni konġunta tal-UE dwar il-fruntieri esterni tal-Istati Membri tagħha. F'dan ir-rigward hemm bżonn li jsir aktar xogħol fuq il-kunċett ta' Gruppi Ewropej għall-Għassa tal-Fruntieri, kif ġie enfasizzat fir-rapport tal-Parlament Ewropew dwar il-Frontex (A7-0278/2011). L-ambitu tal-azzjoni għandu jitwessa' wkoll sabiex ikun jista' jsir aktar sforz fil-qasam tal-prevenzjoni. Huwa ċar li hemm bżonn ta' aktar riżorsi u mhux inqas jekk din l-aġenzija ser ikollha rwol effikaċi. Madankollu, l-operazzjonijiet konġunti koordinati mill-Aġenzija u r-riperkussjonijiet tagħhom fuq id-drittijiet fundamentali u l-garanziji amministrattivi previsti fil-Kodiċi tal-Fruntieri għandu jsirilhom kontroll demokratiku min-naħa tal-Parlament u tal-Aġenzija tal-Unjoni Ewropea għad-Drittijiet Fundamentali (FRA).

1.11

EASO: l-Uffiċċju Ewropew ta' Appoġġ fil-qasam tal-Asil (EASO) beda jaħdem fi żmien relattivament reċenti. Għalhekk, huwa mistenni li jibda' jwettaq il-ħidma tiegħu b'mod sħiħ malajr, speċjalment rigward ir-rwol tiegħu li jfittex soluzzjonijiet sostenibbli u li jkun proattiv dwar is-solidarjetà fi ħdan l-UE, b'koerenza mal-obbligi tiegħu skont ir-regolament tal-EASO. L-EASO jrid ikun f’pożizzjoni li jidentifika b’mod ċar id-differenzi fil-prattiki tal-asil bejn l-Istati Membri, kif ukoll id-differenzi fil-leġislazzjoni tagħhom, u jipproponi l-bidliet meħtieġa.

1.12

Il-prevenzjoni tal-kuntrabandu uman u l-ġlieda kontrih: Il-KESE jisħaq ukoll li jrid isir kull sforz possibbli biex il-kriminalità organizzata tiġi miġġielda b'determinazzjoni. M'għandhom jinżammu l-ebda riżorsi milli jintużaw biex dawk li 'jiffaċilitaw' il-kuntrabandu tal-persuni jinqabdu u jitressqu quddiem il-ġustizzja. F'dan ir-rigward huwa essenzjali li tiġi mfittxija l-assistenza tal-gvernijiet minn pajjiżi terzi.

1.13

Finanzjar: il-KESE jixtieq jisħaq li l-kwistjoni tat-twaqqif u l-ġestjoni tal-flussi tal-immigrazzjoni hija waħda li tirrigwarda l-Komunità kollha, u li dan il-fatt irid jiġi rifless fid-distribuzzjoni tal-ispejjeż finanzjari tal-għodod meħtieġa biex tiġi implimentata politika effikaċi. Il-KESE jappoġġja l-proposta tal-Kummissjoni li l-Fond għall-Migrazzjoni u l-Ażil u l-Fond għas-Sigurtà Interna jkunu ġestiti b'mod iżjed flessibbli mill-2014 'il quddiem

2.1

Il-politika komuni dwar l-immigrazzjoni għandu jkollha approċċ globali li jqis diversi aspetti, bħas-sitwazzjoni demografika u s-swieq tax-xogħol, ir-rispett tad-drittijiet tal-bniedem, it-trattament ugwali u n-nondiskriminazzjoni, il-leġislazzjoni dwar l-ammissjoni ta’ immigranti ġodda, is-sitwazzjoni tal-immigranti f'sitwazzjoni irregolari, l-akkoljenza u l-protezzjoni ta’ dawk li jfittxu asil, il-ġlieda kontra n-netwerks kriminali tat-traffikar illegali tal-bnedmin, il-kollaborazzjoni ma’ pajjiżi terzi, is-solidarjetà Ewropea, il-politika soċjali u l-integrazzjoni.

2.2

Matul l-aħħar snin kien hemm avvenimenti, dikjarazzjonijiet u deċiżjonijiet politiċi li dwarhom il-Kumitat jinsab dejjem iżjed imħasseb, għaliex qed tinfirex fostna lkoll marda antika u magħrufa sew tal-Ewropej: il-ksenofobija u n-nazzjonaliżmu li jeskludi lill-oħrajn. Il-minoranzi u l-immigranti qed jisfaw vittmi ta’ disprezz, tgħajjir u politiki aggressivi u diskriminatorji.

2.3

Is-suġġett tal-immigrazzjoni irregolari huwa wieħed partikolarment serju u kumpless, kif juru t-tabelli fl-appendiċijiet fl-aħħar tad-dokument. Barra minn hekk, din hija kwistjoni tal-Unjoni Ewropea (UE) kollha u għandha tiġi trattata bħala tali. L-immigranti irregolari li jgħaddu mill-fruntiera tan-Nofsinhar dejjem ifittxu li jsibu sistemazzjoni f'pajjiżi oħra tal-UE.

2.4

Minħabba li fiż-żona Schengen ma jeżistux fruntieri interni, il-kwistjoni tal-immigrazzjoni irregolari għandha implikazzjonijiet għall-Ewropa kollha u trid tiġi indirizzata b'politika Ewropea komuni u effikaċi.

2.5

Il-KESE studja s-suġġett tal-immigrazzjoni irregolari bir-reqqa u esprima l-fehmiet tiegħu f'għadd ta' opinjonijiet, adottati b'maġġoranzi wesgħin.

2.6

Dawn l-opinjonijiet fihom analiżi tal-kawżi tal-immigrazzjoni irregolari lejn l-UE, filwaqt li nnutaw in-nuqqas ta' politika globali tal-UE dwar l-immigrazzjoni irregolari u li l-progress qed isir bil-mod wisq sabiex l-UE jkollha politika komuni dwar l-immigrazzjoni u l-asil kif ukoll leġislazzjoni li għandha livell għoli ta' armonizzazzjoni. Hemm ukoll referenza estensiva għall-konsegwenzi tal-problema u jiġu proposti għadd ta' soluzzjonijiet.

2.7

Eluf ta' immigranti irregolari jidħlu fl-UE bil-baħar. Dan ifisser li l-kwistjoni tal-immigrazzjoni irregolari bil-baħar, li skont il-Frontex tinsab l-aktar fir-reġjun Ewro-Mediterranju, trid tiġi trattata b'mod speċifiku.

2.8

L-għan ewlieni tal-opinjoni huwa li jiġi studjat il-fenomenu tal-immigrazzjoni irregolari bil-baħar, filwaqt li tirreferi għal xi wħud mill-kwistjonijiet ewlenin assoċjati mal-immigrazzjoni irregolari b'mod ġenerali, biex jitfittxew soluzzjonijiet globali li jiggarantixxu politika ta' immigrazzjoni li hija effikaċi, umana u finanzjarjament abbordabbli.

3.1.1

Id-drittijiet tal-immigranti irregolari għandhom jiġu rispettati totalment f'kull ħin, mill-mument li jiġu salvati jew detenuti sakemm jiksbu l-istatut ta' ħarsien, isibu ruħhom f'sitwazzjoni irregolari "mingħajr dokumenti" jew jiġu rimpatrijati fil-pajjiż ta' oriġini tagħhom. Il-migrazzjoni irregolari bil-baħar spiss twassal għat-telf tal-ħajjiet. F'dan ir-rigward, il-KESE jisħaq fuq l-importanza li jiġu mħarsa d-drittijiet fundamentali tal-bniedem f'kull waqt. Il-KESE ppropona li l-Aġenzija tad-Drittijiet Fundamentali tissorvelja wkoll l-azzjonijiet ta' kontroll tal-fruntieri u l-operazzjonijiet tal-Frontex. Il-Kumitat jappoġġja l-attivitajiet tal-Forum Konsultattiv tal-Frontex u jesprimi l-interess tiegħu fil-kooperazzjoni.

3.2.1

L-Istati Membri u l-bastimenti privati huma obbligati li jsalvaw lil kull minn huwa fil-periklu fil-baħar. Dan jinkludi lill-immigranti u t-traffikanti/kuntrabandisti li ħadu riskji b'mod konsapevoli. F'ħafna każijiet, in-netwerks tal-kriminali li jittraffikaw/jikkuntrabandaw il-persuni li qed ifittxu l-asil jew l-immigranti irregolari jesponu lil dawn il-persuni għal riskji kbar. L-aġenziji u l-NGOs indikaw li fil-Mediterran kull sena jmutu eluf ta' persuni f'ċirkostanzi bħal dawn u, f'xi każijiet, dawn il-persuni ma rċevewx għajnuna jew ma ġewx salvati mill-bastimenti li kienu għaddejjin qrib.

3.3.1

Fl-aħħar snin kien hemm kontroversji legali u politiċi meta s-salvataġġ isir fl-ilmijiet internazzjonali fil-Mediterran, li poġġew f'riskju żejjed il-ħajja ta' ħafna persuni. Il-KESE jisħaq li l-kwistjoni tal-iżbark trid tissolva fuq il-bażi ta' żbark fl-eqreb post sikur bil-kundizzjoni li l-pajjiż inkwistjoni jikkonforma mal-konvenzjonijiet internazzjonali kollha dwar id-drittijiet tal-bniedem u jkun suġġett għall-monitoraġġ tal-organizzazzjonijiet tad-drittijiet tal-bniedem. Fil-każ tal-missjonijiet tal-Frontex, il-KESE ma jaqbel xejn li l-migranti dejjem iridu jittieħdu għand l-Istat Membru li jkun qed jospita l-missjonijiet. Politika bħal din toħloq tal-anqas żewġ problemi: (i) hija żżid il-pressjoni fuq l-Istati Membri li diġà qed jiffaċċjaw piżijiet kbar, sal-punt li ma tibqax vijabbli li l-Istati Membri li l-aktar li għandhom bżonn il-Frontex jospitaw xi missjoni Frontex; (ii) tagħmel ħsara lill-persuni salvati, peress li jridu jiġu trasportati t-triq kollha sal-pajjiż li jospita l-missjoni Frontex, aktar milli sal-post li jkun l-aktar adatt fiċ-ċirkostanzi (is-soltu l-aktar post sikur fil-viċin).

3.4.1

Il-KESE jħeġġeġ lill-UE li tkompli tadotta sistema ta' asil komuni b'livell għoli ta' armonizzazzjoni leġislattiva. Ir-Regolament ta' Dublin jiddetermina r-responsabbiltà ta' kull Stat Membru inkarigat mill-eżami tal-applikazzjonijiet għall-asil. Il-KESE diġà wera li din is-sistema toħloq diversi problemi. Dak li jfittex l-asil għandu jiġi mistoqsi dwar liema Stat Membru jixtieq li jeżamina l-applikazzjoni tiegħu. Fl-Opinjoni tiegħu dwar il-Green Paper (4), il-Kumitat irrakkomanda li “dak li jfittex l-asil ikollu l-libertà li jagħżel il-pajjiż li jkun irid iressaq l-applikazzjoni tiegħu quddiemu u li, f’din il-perspettiva, l-Istati Membri jkunu diġà mħeġġa sabiex japplikaw il-klawsola umanitarja prevista fl-Artikolu 15(1) tar-Regolament.

3.4.2

Fil-qasam tal-kooperazzjoni bejn l-Istati Membri nbdew numru ta’ attivitajiet li qed jitmexxew mill-Eurasil, grupp ta’ esperti nazzjonali mmexxija mill-Kummissjoni. Ġie stabbilit ukoll strument ta’ solidarjetà finanzjarja bil-ħolqien tal-Fond Ewropew għar-Refuġjati. Mill-2014, il-Fond għall-Migrazzjoni u l-Ażil ser ikollu aktar riżorsi kif ukoll aktar flessibbiltà għas-sitwazzjonijiet ta' emerġenza.

3.4.3

It-talbiet ta' dawk li jfittxu l-asil għall-protezzjoni jridu jiġu studjati fid-dawl tal-liġijiet Ewropej dwar l-asil u l-għoti ta' ħarsien internazzjonali. Dawk li verament jeħtieġu l-ħarsien għandhom jirċevuh.

3.4.4

Il-KESE jtenni li t-trattament u l-garanziji li jingħataw lil dawk li jfittxu l-asil fil-fruntieri jridu jkunu l-istess bħal dawk li jingħataw lil dawk li jippreżentaw it-talba tagħhom fit-territorju tal-Istat Membru.

3.4.5

Il-Kumitat jappella li l-UE turi impenn akbar fil-ġlieda kontra n-netwerks kriminali li jittraffikaw il-bnedmin, iżda jqis li xi politiki dwar il-ġlieda kontra l-immigrazzjoni irregolari qed iwasslu għal kriżi serja tal-asil fl-Ewropa. Il-KESE qal f’diversi Opinjonijiet (5) li l-ġlieda kontra l-immigrazzjoni irregolari m’għandhiex toħloq problemi ġodda relatati mal-asil, u li l-uffiċjali responsabbli mill-kontroll tal-fruntieri għandhom jirċievu taħriġ xieraq biex jiggarantixxu d-dritt tal-asil.

3.4.6

Il-KESE jappoġġja l-proposti mressqa mill-UNHCR biex jitwaqqfu gruppi ta’ esperti dwar l-asil li jgħinu fl-operazzjonijiet kollha ta’ kontroll tal-fruntieri fl-UE.

3.4.7

Huwa importanti ħafna li jiġi indikat li iżjed minn eluf minn dawk li jidħlu fl-UE ma jitolbux l-asil peress li huma migranti ekonomiċi u l-aspirazzjoni ewlenija li jkunu daħlu biha fl-UE hija li jkomplu fi triqthom lejn pajjiżi Ewropej oħra, u mhux li jibqgħu fil-pajjiż fejn ikunu waslu fil-bidu.

3.4.8

Is-sħubijiet ta' mobbiltà m'għandhomx ifissru li l-pajjiżi msieħba jridu jħallsu l-ispejjeż kollha tal-proċeduri tal-asil għall-persuni li jkunu għaddejjin mit-territorju tagħhom. L-UE għandha turi l-appoġġ tagħha permezz tal-Fond għall-Ażil. Dan il-fond għandu jikkontribwixxi għall-istabbiliment ta' mekkaniżmi u strutturi li jippermettu li l-applikazzjonijiet għall-asil jiġu studjati u tittieħed deċiżjoni dwarhom fi żmien raġonevoli fil-kuntest tal-garanziji tal-liġi internazzjonali.

3.4.9

Il-KESE jħeġġeġ lill-UE li tkompli tadotta sistema ta' asil komuni b'livell għoli ta' armonizzazzjoni leġislattiva. It-talbiet għall-asil għandhom jiġu pproċessati mhux biss fil-pajjiżi ta' dħul, iżda wkoll mill-Istati Membri l-oħra. Kull applikant għall-asil għandu jiġi mistoqsi dwar liema Stat Membru jixtieq li jeżamina l-applikazzjoni tiegħu. Fl-Opinjoni tiegħu dwar il-Green Paper (6), il-Kumitat rrakkomanda li “dak li jfittex l-asil ikollu l-libertà li jagħżel il-pajjiż li jkun irid iressaq l-applikazzjoni tiegħu quddiemu u li, f’din il-perspettiva, l-Istati Membri jkunu diġà mħeġġa sabiex japplikaw il-klawsola umanitarja prevista fl-Artikolu 15(1) tar-Regolament” u b'hekk jitħaffef l-ipproċessar tat-talbiet u tittaffa l-konġestjoni burokratika fil-pajjiżi tad-dħul. Il-KESE jaqbel li l-UE taħdem flimkien ma' pajjiżi terzi biex jitjiebu s-sistemi tagħhom tal-asil li jsiru konformi mal-livelli internazzjonali. Fl-aspett estern tal-asil sar progress f’oqsma bħalma huma l-appoġġ tal-pajjiżi terzi li għandhom numru kbir ta’ refuġjati (il-Programmi ta’ Protezzjoni Reġjonali huma importanti ħafna) jew ir-risistemizzazzjoni tar-refuġjati fl-UE.

3.5.1

Ir-ritorn tal-migranti li jkunu daħlu fl-UE b'mod irregolari jrid jiġi trattat b'attenzjoni. F'dan ir-rigward, ftehimiet ta' ritorn ma' pajjiżi terzi huma essenzjali biex jiġu assigurati li d-drittijiet tal-migranti li jkunu qed jirritornaw jiġu rispettati għal kollox.

3.5.2

Is-sħubijiet għall-mobbiltà għandhom jipprevedu proċeduri ta' ritorn li jkunu bbażati primarjament fuq ir-ritorn volontarju b'sistemi ta' appoġġ stabbiliti (7). Meta jiġu implimentati proċeduri ta' ritorn sfurzat, dawn iridu jsiru bl-ikbar rispett għad-drittijiet tal-bniedem tal-persuni rimpatrijati, fid-dawl tar-rakkomandazzjonijiet tal-Kunsill tal-Ewropa (8).

3.5.3

Il-Kumitat jappella għal aktar trasparenza fir-rigward taċ-ċentri ta’ detenzjoni ġewwa u barra l-UE u jitlob li l-UNHCR tinżamm infurmata dwar is-sitwazzjoni tal-persuni li jinżammu f’dawn iċ-ċentri u li dawn il-persuni jingħataw assistenza adegwata mill-NGOs. Il-KESE jemmen li n-nisa tqal u l-minorenni għandhom jirċievu protezzjoni speċjali u għandhom jitpoġġew f'faċilitajiet adatti li għandhom jitwaqqfu bl-appoġġ finanzjarju tal-UE.

3.6.1

Il-KESE jisħaq li l-problema hija waħda Ewropea u mhux biss tal-pajjiżi tal-Mediterran; mhux l-anqas peress li mill-eżistenza tal-ftehim Schengen l-immigrazzjoni fir-reġjun tal-Mediterran trid tiġi indirizzata bi sforz Ewropew komuni. Dan ma jirrigwardax biss it-turija ta' solidarjetà komunitarja iżda wkoll li l-Istati Membri tal-UE jassumu r-responsabbiltajiet tagħhom, permezz ta' politika Ewropea komuni li għandha tiġi proposta mill-Kummissjoni u approvata mill-Kunsill u l-Parlament.

3.6.2

Il-fruntieri tal-Istati Membri tal-Unjoni Ewropea, u dan jinkludi l-fruntieri tal-baħar tal-Istati Membri tal-UE li jinsabu fix-xtut tal-Mediterran, huma l-fruntieri tal-Istati Membri kollha tal-UE, u l-Istati Membri kollha għandhom jaqsmu r-responsabbiltà biex iħarsuhom b'mod adegwat.

3.6.3

F'dan ir-rigward l-Istati Membri kollha għandhom jassistu u jipparteċipaw fi: (i) il-provvista tar-riżorsi meħtieġa għal salvataġġ mill-baħar u kontroll tal-fruntieri effikaċi (ii) l-ipproċessar tal-applikazzjonijiet tal-asil, fil-qafas tar-responsabbiltajiet tagħhom (iii) sitwazzjonijiet straordinarji, l-implimentazzjoni tal-proċeduri tar-rimpatriju u tal-espulsjoni (iv) it-trasferiment fi ħdan l-UE tal-migranti mill-Istati Membri ż-żgħar tal-Mediterran (v) il-ġlieda kontra l-kriminalità organizzata u t-traffikar.

3.6.4

Ir-rilokazzjoni għandha sseħħ fuq il-bażi ta' mekkaniżmu stabbilit u permanenti. F'dan il-kuntest, il-Kummissjoni għandha tressaq il-proposta leġislattiva tagħha għal mekkaniżmu permanenti u effikaċi ta' rilokazzjoni ġewwa l-UE, bl-użu ta' koeffiċjent ta' distribuzzjoni tal-UE għar-rilokazzjoni dawk li japplikaw għall-asil, kif ġie deskritt fir-rapport tal-Parlament Ewropew dwar it-titjib tas-solidarjetà fl-UE fil-qasam tal-ażil (2012/2032 INI). Biex jiġi aċċertat li dan il-mekkaniżmu jkun kemm jista' jkun effikaċi, din il-proposta leġislattiva għandha tqis ukoll l-esperjenza prattika miksuba mill-proġett pilota għal Malta EUREMA (9).

3.7.1

L-Unjoni Ewropea għandha tuża l-influwenza politika u ekonomika kollha tagħha, partikolarment fil-pajjiżi li jibbenefikaw minn fondi importanti tal-UE, biex tikkonvinċihom jikkooperaw fil-kwistjonijiet tal-immigrazzjoni. Il-Kumitat jemmen li s-sħubijiet għall-mobilità għandhom jinkludu l-erba’ pilastri tal-Approċċ Globali: il-faċilitazzjoni u l-organizzazzjoni tal-migrazzjoni legali u l-mobilità; il-prevenzjoni u t-tnaqqis tal-migrazzjoni irregolari u t-traffikar tal-bnedmin; il-promozzjoni tal-protezzjoni internazzjonali u t-titjib tad-dimensjoni esterna tal-politika tal-asil; u l-massimizzazzjoni tal-impatt fuq l-iżvilupp tal-migrazzjoni u l-mobilità.

3.7.2

Is-soluzzjoni għall-problema trid tħares lil hinn mill-miżuri ta' għassa għal azzjoni preventiva li trid issir fil-pajjiżi terzi, filwaqt li jkun hemm enfasi akbar fuq l-iżvilupp ta' programmi ta' kooperazzjoni biex jappoġġjaw il-kultivazzjoni tal-art u t-trobbija tal-bhejjem, l-SMEs eċċ. L-UE trid turi li għandha s-saħħa politika li taħdem flimkien mal-pajjiżi li magħhom hija suppost qed tikkoopera u li qed jirċievu livelli għoljin ta' finanzjament biex issir ħidma konġunta fuq kwistjonijiet ta' sigurtà, il-kriminalità organizzata, u l-immigrazzjoni irregolari. Il-KESE jilqa’ l-ftehim reċenti mar-Renju tal-Marokk u l-inizjattiva li jiġu stabbiliti sħubijiet għall-mobilità bejn l-UE u t-Tuneżija, l-Eġittu u l-Libja. Madankollu, ser ikun hemm bżonn li ssir valutazzjoni dwar l-effikaċja u l-impatt tas-sħubijiet għall-mobilità li jeżistu bħalissa. Il-KESE jappoġġja l-inizjattiva tal-Kummissjoni li tiżgura li s-sħubijiet għall-mobilità jkollhom mekkaniżmu effiċjenti ta’ valutazzjoni. Mill-banda l-oħra, is-sħubijiet għall-mobilità, li huma dikjarazzjonijiet politiċi konġunti li mhumiex legalment vinkolanti għall-Istati parteċipanti, għandhom isiru ftehimiet internazzjonali. Il-Kumitat iqis li l-UE u l-Istati Membri għandhom jikkonkludu ftehimiet ġodda ma' pajjiżi oħra tar-reġjun. Minħabba r-relazzjoni speċjali tal-UE mat-Turkija, il-kwistjonijiet fil-qasam tal-migrazzjoni għandhom jissaħħu bejn iż-żewġ partijiet, speċjalment dawk relatati mal-ġlieda kontra n-netwerks kriminali.

3.7.3

Sabiex jiġi żgurat li l-proċeduri amministrattivi u legali jaħdmu tajjeb, huwa essenzjali li l-UE titlob lill-pajjiżi ta' oriġini tal-migranti irregolari li jipprovdu d-dokumenti tal-ivvjaġġar malajr.

3.7.4

Din il-kwistjoni għandha tiġi indirizzata fi ħdan tal-konferenza Ewro-Mediterranja, peress li għadd sostanzjali tal-immigranti irregolari jidħlu fl-UE minn pajjiżi terzi fuq il-kosta tal-Mediterran.

3.7.5

Trid tingħata assistenza lil ċerti pajjiżi ta' tranżitu biex huma jkunu jistgħu jiġġestixxu l-fruntieri tagħhom aħjar, iwaqqfu strutturi ta' asil u anke jkunu jistgħu jibnu l-kapaċità biex jagħtu ħarsien huma stess lil dawk li jeħtiġuh.

3.8.1

Il-Frontex għandha tkompli tiġi ristrutturata f'aġenzija Ewropea tal-fruntieri esterni ġenwina, b'mandat usa' għall-koordinazzjoni u l-prevenzjoni. Għaldaqstant, trid tissaħħaħ b'riżorsi finanzjarji adegwati li jippermettulha tipprovdi l-assistenza meħtieġa lill-Istati Membri tan-Nofsinhar li qed jitħabtu biex ikampaw mal-flussi migratorji. Fl-istess waqt, l-għadd ta' persunal (fosthom gwardji tal-fruntiera) irid jiżdied u r-riżorsi għall-monitoraġġ u r-reġistrazzjoni elettroniċi jitjiebu. F'dan ir-rigward irid isir aktar biex jissaħħaħ il-kunċett ta' Gruppi Ewropej tal-Għassa tal-Fruntieri, kif ġie enfasizzat fir-rapport tal-Parlament Ewropew dwar il-Frontex (A7-0278/2011). Barra minn hekk, issa trid tiġi kunsidrata bis-serjetà l-possibbiltà li Frontex tuża l-kapaċitajiet il-ġodda tagħha (bħal dik li tixtri l-apparat).

3.8.2

In-Netwerk Ewropew tal-Pattulji li jipprovdu s-sigurtà għall-fruntieri reġjonali għandu jissaħħaħ, b'mod li jippermetti l-koordinazzjoni tar-riżorsi nazzjonali u l-miżuri Ewropej, u li tissaħħaħ il-kooperazzjoni fil-livelli nazzjonali u Ewropej.

3.9.1

L-Uffiċċju Ewropew ta’ Appoġġ għall-Asil (EASO) irid ikun f’pożizzjoni li jidentifika b’mod ċar id-differenzi fil-prattiki tal-asil bejn l-Istati Membri, kif ukoll id-differenzi fil-leġislazzjoni tagħhom, u jipproponi l-bidliet meħtieġa. Irid ikollu wkoll is-setgħa li jfassal linji gwida komuni dwar l-interpretazzjoni u l-applikazzjoni tal-aspetti proċedurali u ta’ sustanza differenti tal-acquis tal-UE dwar l-asil, kif ipproponiet il-Kummissjoni fil-Green Paper tagħha.

3.9.2

Dan l-Uffiċċju jista’ jsir ċentru importanti għall-iskambju ta’ prattiki tajbin, u għall-iżvilupp ta’ attivitajiet ta’ taħriġ dwar l-asil, b’mod partikolari għall-uffiċjali tal-fruntieri. Jista’ jkun ukoll ċentru għall-monitoraġġ u l-analiżi tar-riżultati tal-miżuri l-ġodda li l-UE qed tiżviluppa b’rabta mal-asil. Barra minn hekk jista’ jkun il-post fejn jiġu stabbiliti u ġestiti l-gruppi konġunti ta’ esperti dwar l-asil.

3.9.3

L-Uffiċċju Ewropew ta’ Appoġġ għall-Asil (EASO) irid jaħdem f'netwerk, jikkollabora mal-Eurasil u jżomm rabtiet stretti mal-UNHCR u mal-NGOs speċjalizzati.

3.9.4

L-Uffiċċju Ewropew ta' Appoġġ għall-Asil beda jaħem fi żmien relattivament reċenti. Huwa mistenni li jibda' jwettaq il-ħidma tiegħu b'mod sħiħ mingħajr aktar dewmien, speċjalment rigward ir-rwol tiegħu li jfittex soluzzjonijiet sostenibbli u jiżgura li l-ispejjeż jiġu maqusma bejn l-Istati Membri, kif hemm deskritt fir-regolament tal-EASO. Fl-istess waqt l-EASO jrid ikun proattiv ukoll fir-rigward tas-solidarjetà fi ħdan l-UE b'koerenza mal-obbligi tiegħu skont ir-regolament tal-EASO.

3.10.1

L-immigrazzjoni irregolari bil-baħar hija perikoluża u tpoġġi ħajjet in-nies fil-periklu. Eluf ta' persuni tilfu ħajjithom filwaqt li qasmu l-Mediterran fuq bastimenti li ma kinux tajbin għall-baħar. Il-vjaġġi perikolużi huma organizzati miċ-ċrieki ta' kriminali li jdeffsu mijiet ta' persuni (fosthom nisa u tfal), mingħajr tagħmir u provvisti adegwati (l-anqas tagħmir għas-salvataġġ tal-ħajja), f'dgħajjes, li ħafna minnhom mhumiex tajbin għall-baħar. Ir-riżoluzzjoni li għaddiet mill-Assemblea Parlamentari tal-Kunsill tal-Ewropa (Riżoluzzjoni 1872(2012)) bit-titlu "Lives lost in the Mediterranean Sea – Who is responsible?" [Ħajjiet mitlufin fil-Baħar Mediterran – Min hu responsabbli?] tiddeskrivi r-rwol li għandhom it-traffikanti tal-migranti fl-organizzazzjoni ta' vjaġġi perikolużi fil-Mediterran b'mod iddettaljat ħafna u għandha titqies għall-iskop li tinftihem il-gravità tal-kwistjoni.

3.10.2

Il-proċedimenti kriminali u s-sentenzi kontra t-traffikanti u l-kuntrabandisti tal-persuni għandhom ikunu mill-aktar severi, b'penali li jinkludu l-ħabs għall-għomor. Il-persuni sfruttati mit-traffikanti għandhom dejjem jitqiesu bħala vittmi innoċenti.

3.10.3

It-traffikar tan-nies joħloq attività kriminali hekk kif iċ-ċrieki kriminali li jorganizzaw il-vjaġġi jiġbru l-ħlas għal kull persuna li tivjaġġa, spiss b'estorsjoni u l-użu ta' mezzi inumani. Il-KESE jenfasizza li l-UE għandha tikkoopera mal-pajjiżi ta' tluq u l-pajjiżi ta' oriġini, bil-għan li tkisser iċ-ċrieki kriminali involuti. Il-KESE jinsisti wkoll li l-UE trid taġixxi bl-aktar mod deċiżiv possibbli biex twaqqaf it-traffikanti tal-persuni milli joperaw u jpoġġu ħajjet in-nies fil-periklu.

3.10.4

L-UE għandha wkoll tikkunsidra li tiffirma ftehimiet ma' pajjiżi terzi dwar il-ħolqien ta' ċentri li jirċievu l-migranti u tipprovdi appoġġ finanzjarju biex dawn jitwaqqfu u jinżammu. Iċ-ċentri li jitwaqqfu f'dawn il-pajjiżi jistgħu jaħdmu flimkien ma' ċentri oħra ta' akkoljenza għall-iskopijiet ta' identifikazzjoni u ta' kura. L-IOM, l-UNHCR, l-Aġenzija tad-Drittijiet Fundamentali u l-NGOs speċjalizzati għandhom jissorveljaw il-mod kif joperaw dawn iċ-ċentri.

3.10.5

Barra minn hekk, l-UE trid twettaq inizjattivi ta' informazzjoni li permezz tagħhom immigranti irregolari potenzjali jiġu skuraġġuti milli jidħlu fl-UE b'mod illegali billi tissensibilizzahom dwar il-perikli u d-diffikultajiet inerenti għall-immigrazzjoni illegali. L-immigranti irregolari potenzjali jridu jiġu sensibilizzati wkoll għad-diffikultajiet enormi li jiltaqgħu magħhom biex isibu impjieg fl-Ewropa meta jidħlu mingħajr id-dokumenti meħtieġa.

3.10.6

L-organizzazzjonijiet li jaħdmu biex jissensibilizzaw lill-pubbliku fil-pajjiżi tat-tluq dwar il-kwistjonijiet li ġew imsemmija hawn fuq, biex jiskoraġġixxu l-migranti potenzjali milli jippruvaw li jagħmlu dan il-vjaġġ perikoluż, għandhom jingħataw appoġġ morali u finanzjarju.

3.10.7

Il-KESE jappella wkoll li tingħata attenzjoni lill-kawżi aktar profondi tal-problema li jridu jiġu indirizzati, u li huma relatati mal-livell tal-għajxien fil-pajjiżi tat-tluq. Għal dan il-għan għandhom jitwaqqfu programmi speċifiċi. Is-suġġett fit-totalità tiegħu għandu jkun fuq l-aġenda tal-konferenza Ewro-Mediterranja.

3.11.1

Hemm bżonn ta' finanzi biex jiġu evitati u mwaqqfa l-flussi ta' immigrazzjoni irregolari. Irridu noqgħodu attenti li fl-ippjanar taċ-ċentri tad-detenzjoni jiġi assigurat li l-migranti irregolari jinżammu separati mir-refuġjati li qed ifittxu asil. Il-minorenni u persuni vulnerabbli għandhom jingħataw akkomodazzjoni separata fi żmien 15-il jum. Skont riċerka Taljana provduta minn Frontex, l-ispiża ta' kuljum ta' immigrant irregolari hija fil-medja ta' EUR 48. Jekk din iċ-ċifra tiġi moltiplikata b'100 000 għan-numru ta' immigranti li jaslu kull sena (data tal-Frontex (10)) u b'365 għal kull ġurnata, l-ispiża totali hija ta' 'l fuq minn EUR 1,752 biljun għal kull sena li tgħaddi.

3.11.2

Il-KESE jilqa’ l-isforzi tal-Kummissjoni Ewropea sabiex tissemplifika l-istrumenti finanzjarji permezz tal-ħolqien ta’ żewġ Fondi, wieħed għall-Migrazzjoni u l-Ażil (11), u l-ieħor għas-Sigurtà Interna (12), li huma akkumpanjati minn regolament orizzontali, b’għadd ta’ regoli komuni dwar l-ipprogrammar, l-informazzjoni, il-ġestjoni finanzjarja, il-kontroll u l-evalwazzjoni (13). Il-KESE jappoġġja l-proposta tal-Kummissjoni li tistabbilixxi ammont bażiku u ieħor varjabbli jew flessibbli meta jitqassmu r-riżorsi finanzjarji fost l-Istati Membri. Fir-rigward tal-ammont flessibbli, il-KESE jqis essenzjali li kull Stat Membru jfassal il-programm annwali tiegħu b’konformità mal-prijoritajiet tal-UE u jkun jinkludi l-kooperazzjoni ma’ Stati Membri oħra. Il-Kumitat jappoġġja l-fatt li mill-2014, il-Fond għall-Migrazzjoni u l-Ażil ser ikollu aktar riżorsi kif ukoll aktar flessibbiltà għas-sitwazzjonijiet ta' emerġenza.

3.11.3

Il-bidliet ippjanati ser jegħlbu l-problemi attwali peress li l-programmi ta' ġestjoni tal-flussi tal-migrazzjoni u dawk tal-istabbiliment taċ-ċentri ta' detenzjoni tal-UE jaħdmu fuq bażi annwali. L-istess japplika għall-finanzi u l-miżuri. Madankollu huwa kważi impossibbli li jiġu kompluti installazzjonijiet għall-akkoljenza u r-residenza fuq il-bażi ta' skeda annwali. Għaldaqstant, dawn it-tipi ta' programmi għandhom jiġu organizzati b'mod iżjed flessibbli.

3.11.4

Pajjiżi terzi li jinsabu fir-rotta mill-pajjiż ta' tluq inizjali għandhom jingħataw fondi biex iwaqqfu ċentri ta' akkoljenza u residenza.

Fid-dawl tal-eżempju ekonomiku msemmi hawn fuq, il-baġit tal-UE għandu jwarrab il-fondi biex isaħħaħ il-miżuri ta' monitoraġġ u ta' prevenzjoni (patrol boats, stazzjonijiet tal-gwardji tal-kosta, ħelikopters) u għandu jara li l-Frontex u l-EASO għandhom baġits annwali adegwati biex iwettqu l-ħidma tagħhom b'mod sħiħ. Il-finanzi jridu jiġu garantiti biex il-pajjiżi ta' dħul ikunu jistgħu jikkombattu ċ-ċrieki ta' kriminali b'mod effikaċi filwaqt li jipprovdu wkoll kundizzjonijiet ġusti għall-migranti li jidħlu.

—

tal-25.4.2002 dwar il-“Komunikazzjoni tal-Kummissjoni lill-Kunsill u lill-Parlament Ewropew dwar metodu miftuħ ta' koordinazzjoni għall-politika Komunitarja dwar l-immigrazzjoni” (relatur: is-Sur Pariza Castaños), ĠU C 221, 17.9.2002(mhux disponibbli bil-Malti);

—

tad-29.1.2004 dwar il-“Proposta għal Regolament tal-Kunsill li joħloq Aġenzija Ewropea għall-amministrazzjoni tal-kooperazzjoni operattiva fil-fruntieri esterni” (relatur ġenerali: is-Sur Pariza Castaños), ĠU C 108, 30.4.2004(mhux disponibbli bil-Malti);

—

tas-27.10.2004 dwar il-“Proposta għal Deċiżjoni tal-Kunsill li temenda d-Deċiżjoni Nru 2002/463/KE li tadotta programm ta' azzjoni għal kooperazzjoni amministrattiva fl-oqsma ta' fruntieri esterni, viżi, ażil u immigrazzjoni (Programm ARGO)” (relatur, is-Sur Pariza Castaños), ĠU C 120, 20.5.2005(mhux disponibbli bil-Malti);

—

tat-12.3.2008 dwar il-“Green Paper dwar is-Sistema ta’ Ażil Komuni Ewropea tal-ġejjieni” (relatur: is-Sinjura Le Nouail Marlière), ĠU C 204, 9.8.2008.