22.12.2010   

MT

Il-Ġurnal Uffiċjali tal-Unjoni Ewropea

CE 349/88

A.

billi fl-20 ta' Frar 2010 seħħ diżastru naturali kbir f'Madejra, b'xita eċċessiva u bla preċedenti, irwiefen qawwija u mewġ enormi li kkawżaw il-mewt ta' mill-anqas 42 persuna f'Madejra, b'bosta persuni mitlufa, mijiet ta' persuni spustati u għexieren ta' persuni midruba,

B.

billi fis-27 u fit-28 ta' Frar 2010, tempesta enormi u qerrieda fuq skala kbira msejħa “Xynthia” laqtet il-punent ta' Franza, partikolarment ir-reġjuni ta' Poitou-Charentes, Pays-de-la-Loire u l-Bretanja, u kkawżat il-mewt ta' madwar 60 persuna, b’bosta persuni mitlufa u eluf li sfaw bla dar,

C.

billi numru ta' fenomeni meteoroloġiċi, speċjalment it-tempesta “Xynthia”, laqtu wkoll reġjuni differenti fi Spanja, partikolarment il-Gżejjer Kanarji u r-reġjun ta' Andalucia, kif ukoll il-Belġju, il-Ġermanja, l-Olanda u l-Portugall, u kkawżaw bosta mwiet u ħsara materjali qawwija,

D.

billi dan id-diżastru kkawża tbatija qawwija lill-familji tal-vittmi u lill-popolazzjoni milquta,

E.

billi d-diżastru kkawża qerda fuq skala kbira, bi ħsarat sinifikanti lill-infrastrutturi pubbliċi - fosthom it-toroq, il-portijiet, il-provvista tal-ilma, l-elettriku, l-impjanti sanitarji u t-telekomunikazzjonijiet - kif ukoll lill-bini privat, stabbilimenti kummerċjali, l-industriji u r-raba' u għamel ukoll ħsara lill-wirt naturali u kulturali, billi b’mod partikolari l-ħsara lill-provvista tal-ilma u lill-impjanti sanitarji tista’ tkun ta' theddida għas-saħħa pubblika,

F.

billi d-diżastru bħalissa jimpedixxi lill-persuni milli jibqgħu għaddejjin bil-ħajja tagħhom ta' kuljum u x’aktarx ikollu impatt ekonomiku u soċjali fit-tul,

G.

billi jeħtieġ li ż-żoni milquta mid-diżastru jitnaddfu u jerġgħu jinbnew, kif ukoll jirkupraw il-potenzjal produttiv tagħhom u jiġu kkumpensati l-ispejjeż soċjali kkawżati mid-diżastru,

H.

billi fis-snin riċenti qed jidher ċar li l-problemi ta' għargħar, tempesti u fenomeni estremi tat-temp x’aktarx ikunu dejjem aktar frekwenti; billi l-investiment fit-tafja tat-tibdil fil-klima ukoll hu importanti għall-prevenzjoni tal-katastrofi,

I.

billi d-diżastri naturali għandhom konsegwenzi ekonomiċi u soċjali ta' ħsara għall-ekonomiji reġjonali, l-attività produttiva, l-akkwakultura, it-turiżmu, l-ambjent u l-bijodiversità,

1.

Jesprimi l-mogħdrija u s-solidarjetà tiegħu mar-reġjuni milquta, jiddispjaċih għall-konsegwenzi ekonomiċi serji ta' dawn id-diżastri naturali u partikolarment, jibgħat il-kondoljanzi tiegħu lill-qraba kollha tal-vittmi;

2.

Ifaħħar lill-iskwadri ta' tiftix u salvataġġ li ħadmu bla waqfien biex isalvaw lin-nies u jillimitaw il-ħsara umana u materjali;

3.

Jitlob lill-Kummissjoni u lill-Istati Membri sabiex jappoġġjaw lill-dawk milquta mill-konsegwenzi ekonomiċi u soċjali tad-diżastru;

4.

Jikkunsidra li l-awtoritajiet nazzjonali, reġjonali u lokali għandhom jiffukaw fuq politiki ta' prevenzjoni effettivi u għandhom jagħtu aktar attenzjoni għal-leġiżlazzjoni u l-prattiċi adegwati marbutin mal-programmi ta' riforestazzjoni, mal-użu tal-art, mal-ġestjoni tal-ilma u mal-ġestjoni effettiva tar-riskju, fir-rispett, inter alia, għall-kostruzzjoni urbana ma' xatt il-baħar u l-bini ta' digi, u f’żoni agrikoli u afforestati;

5.

Jitlob lill-Kummissjoni, sabiex, hekk kif il-gvernijiet tal-pajjiżi milquta jressqu t-talbiet rispettivi tagħhom, immedjatament tieħu kull azzjoni meħtieġa għall-mobilizzazzjoni tal-Fond ta' Solidarjetà għall-Unjoni Ewropea bl-aktar mod urġenti u flessibbli u fl-akbar miżura possibbli;

6.

Jitlob lill-Kummissjoni sabiex tikkunsidra n-natura speċifika tar-reġjuni individwali milquta, partikolarment il-fraġilità tar-reġjuni insulari u l-aktar imbiegħda, bil-għan li tingħata l-aqwa għajnuna possibbli lill-vittmi ta' dan id-diżastru;

7.

Iħeġġeġ lill-Kummissjoni, biex minbarra li timmobilizza l-Fond ta' Solidarjetà tal-Unjoni Ewropea, tkun miftuħa u flessibbli fir-rigward tan-negozjati mal-awtoritajiet rilevanti fir-reviżjoni tal-Programmi Operattivi Reġjonali Intervir+ (FEŻR) u Rumos (FSE) u l-ekwivalenti Franċiżi tagħhom, kif ukoll tat-taqsima dwar il-Madejra tal-Programm Operattiv Tematiku ta' Tisħiħ Territorjali, iffinanzjat mill-Fond ta' Koeżjoni; jitlob lill-Kummissjoni biex tkompli għaddejja bir-reviżjoni tagħha malajr kemm jista' jkun u biex tanalizza l-possibilità li fl-2010 żżid ir-rata ta' kofinanzjament tal-Komunità għal proġetti speċifiċi fil-Programmi Operattivi rispettivi f'konformità mar-regoli u l-limiti massimi stipulati fir-Regolament Ġenerali dwar il-Fondi Strutturali 2007-2013 (Regolament tal-Kunsill (KE) Nru 1083/2006), mingħajr ma terġa' tqajjem il-kwistjoni dwar il-pakkett finanzjarju annwali allokat lill-Istati Membri kkonċernati;

8.

Itenni li huwa importanti ħafna li jkun hemm Regolament ġdid dwar l-EUSF ibbażat fuq il-proposta tal-Kummissjoni (COM(2005)0108) biex jiġu indirizzati l-problemi kkawżati mid-diżastri naturali b'mod aktar flessibbli u effettiv; jikkritika l-fatt li l-Kunsill imblokka d-dossier minkejja l-fatt li l-Parlament adotta l-pożizzjoni tiegħu b'maġġoranza kbira ħafna fl-ewwel qari f'Mejju 2006; iħeġġeġ lill-Presidenza Spanjola u lill-Kummissjoni sabiex tinstab soluzzjoni mingħajr dewmien għall-attivazzjoni mill-ġdid ta' dan ir-Regolament, bil-għan li jinħoloq strument aktar qawwi u aktar flessibbli li jkun kapaċi jiffaċċja b’mod aktar effettiv l-isfidi l-ġodda tat-tibdil fil-klima;

9.

Jitlob lill-Istati Membri u lir-reġjuni milquta sabiex jniedu pjanijiet adegwati ta' restawr u riabilitazzjoni għaż-żoni milquta; jitlob lill-Istati Membri biex jeżaminaw il-ħtieġa li għal investimenti fit-tul f'politiki ta' prevenzjoni ta' dawn id-diżastri u l-limitazzjoni tal-ħsarat tagħhom;

10.

Jitlob lill-Istati Membri biex jadattaw għall-konsegwenzi tat-tibdil fil-klima billi jsegwu l-leġiżlazzjoni eżistenti permezz ta' approċċ integrat fl-oqsma kollha kkonċernati;

11.

Jisħaq fuq il-bżonn li r-rakkomandazzjonijiet tal-White Paper dwar l-adattament għat-tibdil fil-klima jiġu tradotti f'miżuri konkreti u li jittieħdu passi sabiex jiġi żgurat li l-adattament għat-tibdil fil-klima jsir realtà fl-Unjoni Ewropea;

12.

Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet tal-Istati Membri u lill-Gvern tar-Reġjun Awtonomu ta' Madejra.