1. 

Il-bijogass ( 3 ) huwa ġġenerat, f’ambjent naturali jew f’impjanti industrijali, minn reazzjonijiet ta’ degradazzjoni ta’ materjal organiku kkawżati minn ċerti mikroorganiżmi f’ambjenti anerobiċi. L-użu (pereżempju, bħala bijokarburant għat-trasport) huwa pożittiv ħafna għall-ambjent meta joħroġ minn skart organiku ( 4 ), iżda jista’ jagħmel ħsara lil interessi oħra (inkluż il-provvista tal-ikel tal-popolazzjoni jew il-bijodiversità taż-żoni ta’ valur ekoloġiku għoli) jekk jinkiseb minn materja prima mhux ta’ skart ( 5 ).

2. 

Dan ir-riskju huwa dak li d-Direttiva 2009/28/KE ( 6 ) għandha l-għan tirreżisti, meta tistabbilixxi li, sabiex jaqa’ taħt l-iskema ta’ enerġija minn sorsi li jiġġeddu, il-bijogass użat bħala bijokarburant għandu josserva ċerti “kriterji ta’ sosteni bbiltà” stretti. Il-verifika tal-konformità ma’ dawn il-kriterji hija, barra minn hekk, suġġetta għal metodu msejjaħ “bilanċ tal-massa” (iktar ’il quddiem “BM”), li dwaru huma d-domandi mill-qorti tar-rinviju lill-Qorti tal-Ġustizzja.

3. 

Speċifikament, qiegħda titqajjem għall-ewwel darba quddiem il-Qorti tal-Ġustizzja l-kwistjoni dwar jekk l-Artikolu 18 tad-Direttiva 2009/28, li jirregola l-metodu BM, jobbligax lil Stat Membru jaċċetta l-bijogass sostenibbli importat minn Stat Membru ieħor permezz tan-netwerk interkonness ta’ pipelines nazzjonali ( 7 ). Jekk dan ma jkunx hekk, il-qorti tar-rinviju tixtieq tkun jaf jekk din id-dispożizzjoni tiksirx il-projbizzjoni ta’ miżuri b’effett ekwivalenti għal restrizzjonijiet kwantitattivi fuq l-importazzjoni (Artikolu 34 TFUE).

4. 

Sabiex tingħata risposta utli għad-domandi preliminari ( 8 ), naħseb li l-Qorti tal-Ġustizzja għandha tiċċara, ukoll, jekk leġiżlazzjoni nazzjonali, bħal dik Svediża, li tippermetti l-applikazzjoni tal-metodu BM fin-netwerk nazzjonali ta’ pipelines tagħha, iżda mhux fin-netwerk transkonfinali ta’ pipelines interkonnessi, hijiex kompatibbli mal-Artikolu 34 TFUE.

5.

Fl-Artikolu 1:

“Din id-Direttiva tistabbilixxi qafas komuni għall-promozzjoni ta’ enerġija minn sorsi rinnovabbli. Hija tistabbilixxi miri nazzjonali mandatorji għas-sehem globali ta’ enerġija minn sorsi rinnovabbli [li jiġġeddu] fil-konsum finali gross tal-enerġija u għas-sehem ta’ enerġija minn sorsi rinnovabbli fit-trasport. […]Hija tistabbilixxi kriterji ta’ sostenibbiltà għall-bijokarburanti u bijolikwidi”

6.

L-Artikolu 2, it-tieni paragrafu, (a), (e), (i) u (k), jispeċfika:

[…]

[…]

7.

Skont l-Artikolu 3:

“1.   Kull Stat Membru għandu jiżgura li s-sehem ta’ enerġija minn sorsi rinnovabbli [li jiġġeddu], ikkalkulat skont l-Artikoli 5 sa 11, fil-konsum finali gross ta’ enerġija fl-2020 jkun mill-inqas il-mira globali nazzjonali tiegħu għas-sehem tal-enerġija minn sorsi rinnovabbli f’dik is-sena, kif stabbilit fit-tielet kolonna tat-tabella fil-Parti A tal-Anness I. Dawn il-miri globali nazzjonali mandatorji huma konsistenti ma’ mira ta’ sehem ta’ mill-inqas 20 % mill-enerġija minn sorsi rinnovabbli fil-konsum gross finali tal-enerġija tal-Komunità fl-2020. Sabiex il-miri stabbiliti f’dan l-Artikolu jkunu jistgħu jintlaħqu b’mod aktar faċli, kull Stat Membru għandu jippromwovi u jinkuraġġixxi l-effiċjenza u l-iffrankar tal-enerġija.

[…]

4.   Kull Stat Membru għandu jiżgura li s-sehem ta’ enerġija minn sorsi rinnovabbli fil-forom kollha ta’ trasport fl-2020 huwa mill-inqas 10 % tal-konsum finali ta’ enerġija fit-trasport f’dak l-Istat Membru.

[…]”

8.

F’dak li jirrigwarda l-kalkolu tas-sehem ta’ enerġija minn sorsi li jiġġeddu, l-Artikolu 5(1) jipprovdi dan li ġej:

“Il-konsum finali gross ta’ enerġija minn sorsi rinnovabbli [li jiġġeddu] f’kull Stat Membru għandu jkun ikkalkulat bħala s-somma ta’:

Gass, elettriku u idroġenu minn sorsi ta’ enerġija rinnovabbli għandhom ikunu kkunsidrati darba biss fil-punt (a), (b) jew (c) tal-ewwel paragrafu, biex ikun ikkalkulat is-sehem tal-konsum finali gross ta’ enerġija minn sorsi rinnovabbli.

[…] il-bijokarburanti u bijolikwidi li ma jissodisfawx il-kriterji ta’ sostenibbiltà stabbiliti fl-Artikolu 17 (2) sa (6) m’għandhomx jiġu kkunsidrati.”

9.

Skont il-premessa 65

“Il-produzzjoni tal-bijokarburanti għandha tkun sostenibbli. Il-bijokarburanti użati għall-konformità mal-miri stabbiliti f’din id-Direttiva, u dawk li jibbenefikaw minn skemi ta’ sostenn nazzjonali, għandhom għalhekk jiġu meħtieġa jissodisfaw il-kriterji ta’ sostenibbiltà.”

10.

L-Artikolu 17 jipprovdi fid-dettall dawn il-kriterji ta’ sostenibbiltà kif ġej:

“1.   Irrispettivament minn jekk il-materja prima kenitx ikkultivata ġewwa jew barra t-territorji tal-Komunità, l-enerġija mill-bijokarburanti u bijolikwidi għandha tiġi kkunsidrata għall-finijiet msemmija fil-punti (a), (b) u (c) biss jekk tissodisfa l-kriterji ta’ sostenibbiltà stabbiliti fil-paragrafi 2 sa 6:

[…]

2.   L-iffrankar ta’ emissjonijiet ta’ gass b’effett serra mill-użu ta’ bijokarburanti u bijolikwidi kkunsidrat għall-finijiet msemmija fil-punti (a), (b) u (c) tal-paragrafu 1 għandu jkun ta’ mill-anqas 35 %.

[…]

3.   Il-bijokarburanti u bijolikwidi kkunsidrati għall-finijiet msemmija fil-punti (a), (b) u (c) tal-paragrafu 1 m’għandhomx isiru minn materja prima miksuba minn art b’valur għoli ta’ bijodiversità […]

[…]

4.   Il-bijokarburanti u bijolikwidi kkundistrati għall-finijiet msemmija il-punti (a), (b) u (c) tal-paragrafu 1 m’għandhomx isiru minn materja prima miksuba minn art b’ħażna għolja ta’ karbonju […]

[…]

5.   Il-bijokarburanti u bijolikwidi kkunsidrati għall-finijiet msemmija fil-punti (a), (b) u (c) tal-paragrafu 1 m’ għandhomx isiru minn materia prima miksuba minn art li kienet art tal-peat f’Jannar 2008 […].

6.   Materja prima agrikola kkultivata fil-Komunità u użata għall-produzzjoni ta’ bijokarburanti u bijolikwidi kkunsidrati għall-finijiet msemmija fil-punti (a), (b) u (c) tal-paragrafu 1 għandhom jinkisbu skont ir-rekwiżiti u l-istandards taħt id-dispożizzjonijiet imsemmija taħt l-intestatura “Ambjent” fil-Parti A u fil-punt 9 tal-Anness II tar-Regolament (KE) Nru 73/2009 tal-Kunsill, tad-19 ta’ Jannar2009 […]

[…]

8.   Għall-finijiet msemmija fil-punti (a), (b) u (c) tal-paragrafu 1, l-Istati Membri m’għandhomx jirrifjutaw li jikkunsidraw, għal raġunijiet oħra ta’ sostenibbiltà, bijokarburanti u bijolikwidi miksuba f’konformità ma’ dan l-Artikolu.

[…]”

11.

Kif imsemmi fl-Artikolu 18

“1.   Fejn bijokarburanti u bijolikwidi għandhom jiġu kkunsidrati għall-finijiet msemmija fil-punti (a), (b) u (c) tal-Artikolu 17(1), l-Istati Membri għandhom jeħtieġu li l-operaturi ekonomiċi juru li l-kriterji ta’ sostenibbiltà stabbiliti fl-Artikolu 17(2) sa (5) ġew sodisfatti. Għal dak il-għan għandhom jeħtieġu li l-operaturi ekonomiċi jużaw sistema ta’ bilanċ tal-massa li:

2.   Il-Kummissjoni għandha tirrapporta lill-Parlament Ewropew u lill-Kunsill fl-2010 u l-2012 dwar it-tħaddim tal-metodu ta’ verifika tal-bilanċ tal-massa deskritt fil-paragrafu 1 u dwar il-potenzjal li jkunu permessi metodi oħra ta’ verifika fir-rigward ta’ xi tipi ta’ materja prima, bijokarburanti jew bijolikwidi.[…]

3.   L-Istati Membri għandhom jieħdu miżuri biex jiżguraw li l-operaturi ekonomiċi jippreżentaw informazzjoni affidabbli u li jpoġġu għad-dispożizzjoni tal-Istati Membri, fuq talba, id-data li ntużat biex tkun żviluppata l-informazzjoni. L-Istati Membri għandhom jeħtieġu li l-operaturi ekonomiċi jagħmlu arranġament għal standard adegwat ta’ verifika indipendenti tal-informazzjoni ppreżentata, u li jipprovdu evidenza li dan sar. L-awditjar għandu jivverifika li s-sistemi użati mill-operaturi ekonomiċi huma preċiżi, affidabbli u mħarsa kontra l-frodi. Dan għandu jevalwa l-frekwenza u l-metodoloġija tat-teħid ta’ kampjuni u l-affidabilità tad-data.

L-informazzjoni msemmija fl-ewwel subparagrafu għandha tinkludi b’mod partikolari informazzjoni dwar il-konformità mal-kriterji ta’ sostenibbiltà stabbiliti fl-Artikolu 17(2) sa (5), informazzjoni xierqa u rilevanti dwar il-miżuri meħuda għall-protezzjoni tal-ħamrija, tal-ilma u tal-arja, ir-ristawr tal-art degradata, l-evitar ta’ konsum eċċessiv ta’ ilma f’zoni fejn l-ilma ikun skars kif ukoll informazzjoni xierqa u rilevanti dwar il-miżuri meħuda biex jitqiesu l-kwistjonijiet imsemmija fit-tieni subparagrafu tal-Artikolu 17(7).

[…]

4.   Il-Komunità għandha tħabrek biex tikkonkludi strumenti ta’ ftehim bilaterali jew multilaterali ma’ pajjiżi terzi li fihom dispożizzjonijiet dwar kriterji ta’ sostenibbiltà li jikkorrispondu ma’ dawk ta’ din id-Direttiva. Fejn il-Komunità tkun ikkonkludiet strumenti ta’ ftehim li fihom dispożizzjonijiet li jkopru l-kwistjonijiet koperti mill-kriterji ta’ sostenibbiltà stabbiliti fl-Artikolu 17(2) sa (5), il-Kummissjoni tista’ tiddeċiedi li dawk l-istrumenti ta’ ftehim juru li l-bijokarburanti u bijolikwidi prodotti minn materja prima kkultivata f’dawk il-pajjiżi jikkonformaw mal-kriterji ta’ sostenibbiltà inkwistjoni.[…]

Il-Kummissjoni tista’ tiddeċiedi li skemi nazzjonali jew internazzjonali volontarji li jistabbilixxu standards għall-produzzjoni ta’ prodotti tal-bijomassa jkollhom data preċiża għall-finijiet tal-Artikolu 17(2) jew juru li l-kunsinni ta’ bijokarburant jikkonformaw mal-kriterji ta’ sostenibbiltà stabbiliti fl-Artikolu 17(3) sa (5).

[…]

5.   Il-Kummissjoni għandha tadotta deċiżjonijiet skont il-paragrafu 4 biss jekk il-ftehim jew l-iskema kkonċernati jissodisfaw standards adegwati ta’ affidabbiltà, trasparenza u verifika indipendenti.[…]

6.   Id-deċiżjonijiet taħt il-paragrafu 4 għandhom ikunu adottati skont il-proċedura ta’ konsultazzjoni msemmija fl-Artikolu 25(3). Dawn id-deċiżjonijiet għandhom ikunu validi għal perijodu ta’ mhux aktar minn ħames snin.

7.   Meta operatur ekonomiku jipprovdi prova jew data miksuba skont ftehim jew skema li kienet is-suġġett ta’ deċiżjoni skont il-paragrafu 4, sal-punt kopert minn dik id-deċiżjoni, Stat Membru m’għandux jeħtieġ li l-fornitur jipprovdi evidenza ulterjuri ta’ konformità mal-kriterji ta’ sostenibbiltà stabbiliti fl-Artikolu 17(2) sa (5), u lanqas informazzjoni dwar il-miżuri msemmijin fit-tieni subparagrafu tal-paragrafu 3 ta’ dan l-Artikolu.

[…]”

12.

Skont il-premessa 94 tiegħu:

“Billi l-miżuri previsti fl-Artikoli 17 sa 19 għandhom effett ukoll fuq il-funzjonament tas-suq intern billi jarmonizzaw il-kriterji ta’ sostenibbiltà għall-bijokarburanti u bijolikwidi għall-iskopijiet tal-miri tal-kontabilità taħt din id-Direttiva, u għalhekk jiffaċilitaw, skont l-Artikolu 17(8), il-kummerċ bejn l-Istati Membri fil-bijokarburanti u bjolikwidi oħra li jikkonformaw ma’ dawk il-kondizzjonijiet, dawn huma bbażati fuq l-Artikolu 95 tat-Trattat.

13.

Id-Direttiva 2009/28 ġiet inkorporata fid-dritt Svediż permezz tal-Liġi (2010:598), dwar il-kriterji ta’ sostenibbiltà għall-bijokarburanti u l-bijolikwidi ( 9 ), implementata mir-Regolament (2011:1088) dwar il-kriterji ta’ sostenibbiltà għall-karburanti u l-bijolikwidi ( 10 ). It-tnejn li huma tlestew permezz tad-dispożizzjonijiet tal-iStatens Energimyndighet (Aġenzija Nazzjonali għall-Enerġija, l-Isvezja; iktar ’il quddiem l-“Aġenzija għall-Enerġija”) dwar il-kriterji ta’ sostenibbiltà għall-bijokarburanti u l-bijolikwidi ( 11 ).

14.

L-Artikolu 1(a) tal-Kapitolu 3 tal-Liġi 2010/598 fih xi kjarifiki addizzjonali kemxejn differenti dwar il-proċedura għall-verifika tas-sostenibbiltà tal-bijokarburanti. Huwa jipprovdi, fost oħrajn, li l-persuna obbligata li tagħmel dikjarazzjoni għandha tiżgura, bl-għajnuna ta’ sistema ta’ verifika, li l-bijokarburanti għandhom ikunu sostenibbli, u għaldaqstant tikkonkludi ftehimiet mal-operaturi fil-katina ta’ produzzjoni kollha u tieħu kampjuni fl-impjanti tagħha. Is-sistema ta’ verifika għandha tiġi ssorveljata minn kontrollur indipendenti, li jikkontrolla jekk din tkunx preċiża, affidabbli u reżistenti għall-frodi. Din is-sorveljanza għandha tinkludi wkoll evalwazzjoni tal-metodu ta’ kampjunar u tal-frekwenza tat-teħid tal-kampjuni u għandha tinkludi evalwazzjoni tal-informazzjoni pprovduta mill-persuna obbligata li tagħmel dikjarazzjoni rigward is-sistema ta’ verifika tagħha, u l-kontrollur indipendenti għandu jipprovdi ċertifikazzjoni bl-opinjoni tiegħu dwar dan. Il-Gvern, jew l-awtorità maħtura minnu, jista’ jadotta miżuri addizzjonali dwar is-sistema ta’ verifika u s-sorveljanza tagħha.

15.

Skont l-Artikolu 14 tar-Regolament 2011/1088, is-sistema ta’ verifika tas-sostenibbiltà tal-bijokarburanti għandha tkun il-BM, f’kundizzjonijiet identiċi bħall-Artikolu 18(1), tad-Direttiva 2009/28. L-Aġenzija għall-Enerġija tista’ tadotta miżuri ulterjuri dwar is-sistema ta’ verifika u s-sorveljanza tagħha.

16.

L-Aġenzija għall-Enerġija użat din l-awtorizzazzjoni sabiex tadotta l-STEMFS 2011/2. L-Artikolu 2 tal-Kapitolu 3 jipprovdi li l-persuna obbligata li tagħmel id-dikjarazzjoni għandha tiżgura permezz tas-sistema ta’ verifika tagħha li l-bijokarburanti jkunu traċċabbli mill-post tal-kultivazzjoni, il-ħolqien jew il-ġbir tal-materja prima sal-konsum tal-karburant jew sal-mument li fih t-taxxa ssir dovuta.

17.

Skont l-Artikolu 3 tal-Kapitolu 3 tal-STEMFS 2011/2

“Il-bilanċ tal-massa għandu jsir skont il-punt 3 tal-ewwel paragrafu tal-Artikolu 14 tar-Regolament dwar il-kriterji ta’ sostenibbiltà f’post iddefinit b’mod ċar u f’perijodu ta’ żmien li jkun adattat għall-katina ta’ produzzjoni.

L-imħażen kollha tat-taxxa, skont il-Liġi (1994:1766) dwar it-taxxa tal-enerġija, ta’ persuna suġġetta għall-obbligu ta’ notifikazzjoni jistgħu jikkostitwixxu post skont it-tifsira tal-ewwel paragrafu”.

18.

Il-kumpannija E.ON Biofor Sverige AB (iktar ’il quddiem, “E.ON Biofor”) tixtri bijogass sostenibbli fil-Ġermanja minn kumpannija oħt u tibagħtu l-Isvezja, mid-Danimarka, filwaqt li żżomm il-proprjetà tiegħu fil-fażijiet kollha. Skont id-deskrizzjoni tagħha tal-fatti, il-kumpannija Ġermaniża żżid il-bijogass f’punt iddefinit b’mod ċar man-netwerk tal-gass Ġermaniż, fil-post fejn id-dritt tal-proprjetà jingħata lill-kumpannija Svediża E.ON Biofor, li mbagħad testratta kwantità ta’ gass min-netwerk b’mod ċar u ddefinit b’mod preċiż (il-konfini bejn in-netwerk Ġermaniż u dak Daniż). Il-gass imbagħad jitlaq min-netwerk Daniż fi Dragör u jidħol fin-netwerk Svediż.

19.

Kull inkorporazzjoni u estrazzjoni minn netwerk tal-gass nazzjonali jitwettqu taħt ir-responsabbiltà ta’ aġent ekonomiku wieħed, li għandu jkollu kuntratt ta’ distribuzzjoni jew xiri f’punt ta’ fruntiera, b’tali mod li l-istess ammonti ma jistgħux jinxtraw jew jinbiegħu darbtejn, li jikkawża żbilanċ fis-sistema. Kull kunsinna li tingħata, b’mod ġenerali, fil-punt tal-fruntiera tan-netwerks nazzjonali tal-pipelines għandha tkun akkumpanjata minn ċertifikat ta’ sostenibbiltà REDcert DE, maħruġ b’mod konformi mas-sistema nazzjonali Ġermaniża b’applikazzjoni tal-metodu BM. Iċ-ċertifikat jiggarantixxi li l-bijogass li jkun ġie ttrasportat u introdott jirrispetta l-kriterji ta’ sostenibbiltà u li ma jkunx nbiegħ lil terz. Dan iċ-ċertifikat jista’ jinkiseb biss ladarba jitwassal direttament lill-kumpannija Svediża E.ON Biofor mill-kumpannija bl-istess isem Ġermaniż tagħha.

20.

L-Aġenzija għall-Enerġija skont l-Artikolu 3 tal-STEMFS 2011/2, talbet lil E.ON Biofor, fit-3 ta’ Settembru 2013, temenda s-sistema ta’ verifika tas-sostenibbiltà tal-bijogass tagħha, sabiex jiġi żgurat li l-BM isir fi “f’post iddefinit b’mod ċar”.

21.

Skont l-Aġenzija għall-Enerġija, huwa possibbli, filwaqt li jinżammu l-karatteristiċi tas-sostenibbiltà, li jiġi injettat bijogass sostenibbli fin-netwerk tal-gass Svediż u jinbiegħ l-ammont korrispondenti, b’dik il-klassifikazzjoni, ikun fejn ikun fl-Isvezja, minkejja li dan ma jkunx l-istess gass fiżiku. Madankollu, fit-talba lill-E.ON Biofor hija qalet li ma jistax japplika l-istess prinċipju lil hinn mill-fruntieri nazzjonali.

22.

Ir-raġuni għaliex l-importazzjoni tal-bijogass permezz tan-netwerk tal-gass naturali ma tissodisfax ir-rekwiżit tal-metodu BM hija, skont l-Aġenzija tal-Enerġija, li dan il-metodu ma japplikax “f’post iddefinit b’mod ċar”, kif meħtieġ mill-Artikolu 3 tal-Kapitolu 3 tal-STEMFS 2011/2. Konsegwentement, il-bijogass li E.ON Biofor importat fl-Isvezja ma setax jiġi inkluż fis-sistema ta’ verifika tas-sostenibbiltà tagħha ( 12 ).

23.

E.ON Biofor appellat quddiem il-qorti tar-rinviju d-deċiżjoni tal-Aġenzija għall-Enerġija, u talbet li jiġi annullat il-punt 4 tat-talba, li din tal-aħħar irrifjutat li tagħmel.

24.

Fid-dawl tal-argumenti opposti, il-Förvaltningsrätten i Linköping (qorti tal-ewwel istanza kontenzjuża-amministrattiva, l-Isvezja) issospendiet il-proċedura u ressqet id-domandi preliminari li ġejjin quddiem il-Qorti tal-Ġustizzja:

25.

Ġew ippreżentati osservazzjonijiet bil-miktub miż-żewġ partijiet fil-kawża prinċipali, il-Parlament Ewropew, il-Kunsill, il-Kummissjoni u l-Gvern tal-Pajjiżi l-Baxxi u l-Gvern tal-Estonja. E.ON Biofor, l-Aġenzija għall-Enerġija u t-tliet istituzzjonijiet Ewropej għamlu interventi fis-seduta, li saret fis-26 ta’ Ottubru 2016.

26.

Skont il-Parlament Ewropew, il-Kunsill u l-Kummissjoni, l-Artikolu 18(1) tad-Direttiva 2009/28 huwa limitat biex jimponi l-użu tal-BM bħala proċess tekniku li jivverifika l-konformità mal-kriterji ta’ sostenibbiltà tal-bijogass. Din id-dispożizzjoni tistipula biss kundizzjonijiet minimi li għandhom jiġu stabbiliti mill-Istati Membri fl-applikazzjoni tal-metodu BM. Fost dawn il-kundizzjonijiet ma hemm l-ebda limitazzjoni ġeografika, u għalhekk l-Istati huma liberi li jipprovdu jew le għall-applikazzjoni tal-BM fuq l-interkambji intra-Komunitarji ta’ bijogass ipprattikati permezz tan-netwerk ta’ pipelines nazzjonali interkonnessi.

27.

Għal dawn l-istituzzjonijiet tal-Unjoni, l-Artikolu 18(1) huwa newtrali fir-rigward tal-kummerċ intra-Komunitarju tal-bijogass, minħabba li ma jirregolax dak il-kamp ta’ applikazzjoni materjali. Skont il-Kummissjoni, id-Direttiva 2009/28 ma fiha ebda klawżola ta’ moviment liberu li tirrikjedi lill-Istati jikkummerċjalizzaw bħala bijogass sostenibbli dak li jkun inbiegħ legalment taħt din il-klassifikazzjoni fi Stati Membri oħra.

28.

Konsegwentement, huma jemmnu li l-Artikolu 18(1) tad-Direttiva 2009/28 ma jistax jiġi interpretat fis-sens li jobbliga lill-Istati jaċċettaw il-kummerċjalizzazzjoni, bħala bijogass sostenibbli, ta’ dak importat minn Stati oħra permezz tan-netwerk tal-pipelines nazzjonali interkonnessi.

29.

Il-Gvern tal-Pajjiżi l-Baxxi jaqbel ma’ dan l-approċċ, iżda jżid li, jekk l-Isvezja taċċetta l-possibbiltà li tintuża l-proċedura BM fin-netwerk tal-pipelines interkonnessi tagħha, għandha taċċetta din ukoll għall-importazzjonijiet ta’ bijogass li ġejjin minn Stati Membri oħra. Din il-konklużjoni hija ġġustifikata, ukoll, permezz tal-eżistenza ta’ sistemi nazzjonali u internazzjonali volontarji, approvati mill-Kummissjoni skont l-Artikolu 18(4) tad-Direttiva 2009/28 u li jippromwovu l-kummerċ transkonfinali tal-bijogass.

30.

E.ON Biofor tqis li l-Artikolu 18(1) tad-Direttiva 2009/28 imur kontra leġiżlazzjoni nazzjonali li timpedixxi l-kummerċjalizzazzjoni, bħala sostenibbli, tal-bijogass importat minn Stat Membru ieħor permezz ta’ pipelines, jekk dik l-importazzjoni tissodisfa l-kundizzjonijiet stabbiliti għall-użu tas-sistema BM.

31.

Fil-fehma tagħha, l-importazzjonijiet mill-Ġermanja lejn l-Isvezja jissodisfaw dawn il-kundizzjonijiet f’dan il-każ. Gassijiet b’karatteristiċi ta’ sostenibbiltà differenti jitħalltu fin-netwerk tal-pipelines u tiġi żgurata r-relazzjoni fiżika bejn il-produzzjoni u l-konsum, peress li l-injezzjonijiet u t-tneħħija tal-bijogass isiru fin-netwerk tal-pipelines nazzjonali interkonnessi tal-gass, bħala spazju fiżiku ddefinit sew.

32.

Barra minn hekk, E.ON Biofor targumenta li ċ-ċertifikati ppreżentati jippermettu lill-Awtorità għall-Enerġija tivverifika li l-kunsinni kollha mneħħija mit-taħlita fl-Isvezja għandhom l-istess karatteristiċi ta’ sostenibbiltà bħall-kunsinni injettati fil-Ġermanja f’dik l-istess taħlita.

33.

Skont E.ON Biofor, l-interpretazzjoni ta’ dan hija konformi mal-għanijiet tal-leġiżlatur tal-Unjoni, peress li t-trasport tal-bijogass permezz tal-pipelines jikkawża inqas tniġġis u jiswa inqas milli t-trasport bit-triq, bil-baħar jew bil-ferrovija. Il-kummerċ transkonfinali jinkoraġġixxi l-konsum tiegħu, b’riperkussjoni pożittiva fuq it-tnaqqis tal-gassijiet serra mitluba mid-Direttiva 2009/28. Għall-kuntrarju, it-tneħħija tal-metodu BM fl-iskambji intra-Komunitarji permezz ta’ pipelines iżżid l-ispejjeż tat-trasport tal-bijogass.

34.

Il-Gvern Estonjan u l-Aġenzija għall-Enerġija jiddefendu l-idea opposta. Huma jargumentaw li l-Artikolu 18(1) tad-Direttiva 2009/28 ma għandux l-għan li jarmonizza l-kummerċ tal-bijogass fl-Unjoni u li, għaldaqstant, ma jistax jiġi interpretat bħala li jobbliga lill-Istati Membri jaċċettaw l-applikazzjoni tal-metodu BM għall-bijogass importat permezz tan-netwerk interkonness tal-pipelines.

35.

Skont l-Aġenzija għall-Enerġija, il-metodu BM jeħtieġ kontroll tat-traċċabbiltà tal-bijogass mill-produzzjoni sal-konsum, li għandu jsir f’“f’post iddefinit sew” fejn awtorità superviżorja tkun tista’ tivverifika s-sostenibbiltà tal-kunsinni tal-bijogass li ġew miżjuda u mneħħija mit-taħlita. Dan il-kontroll ma huwiex fattibbli fin-netwerk interkonness ta’ pipelines nazzjonali, jekk ma jkunx hemm awtorità Ewropea li tissorveljah. F’din is-sitwazzjoni, il-qbil għall-applikazzjoni tal-metodu BM, fir-realtà, ifisser l-aċċettazzjoni tal-użu ta’ sistema ta’ ċertifikati negozjabbli (book and claim).

36.

Fir-rigward tal-validità tal-Artikolu 18(1) tad-Direttiva 2009/28 il-Parlament u l-Kunsill jikkunsidraw li ma hemmx restrizzjoni fuq l-iskambji intra-Komunitarji ta’ bijogass u li, għalhekk dan ma jmurx kontra l-projbizzjoni ta’ miżuri b’effett ekwivalenti fuq l-importazzjoni (Artikolu 34 TFUE). Huma jżidu li, jekk ikun hemm tali restrizzjonijiet, dawn ikunu ġġustifikati mill-ħtieġa imperattiva tal-ħarsien tal-ambjent u l-osservanza tal-prinċipju ta’ proporzjonalità.

37.

Il-Kummissjoni u l-Gvern Estonjan isostnu li l-użu tal-metodu BM jiġġenera ostakolu għall-kummerċ intra-Komunitarju tal-bijogass, li jmur kontra, fil-prinċipju, l-Artikolu 34 TFUE, iżda huwa ġġustifikat mill-ħarsien tal-ambjent. Il-leġiżlatur tal-Unjoni ma jkunx eżerċita b’mod sproporzjonat id-diskrezzjoni tiegħu fl-għażla ta’ BM bħala metodu ta’ kontroll tas-sostenibbiltà tal-bijogass. L-Aġenzija għall-Enerġija, li tappoġġja dan l-argument ukoll, tinvoka bħala ġustifikazzjoni addizzjonali l-ħtieġa li tiġi żgurata l-provvista tal-enerġija.

38.

Madankollu, skont E.ON Biofor, l-Artikolu 18(1) tad-Direttiva 2009/28 imur kontra l-Artikolu 34 TFUE jekk jiġi mifhum bħala li jwettaq armonizzazzjoni eżawrjenti u li ma jiżgurax il-moviment liberu intra-Komunitarju ta’ bijogass sostenibbli permezz ta’ pipelines. Barra minn hekk, hija żżid, li l-miżura Svediża tippermetti l-BM għall-bijogass ta’ oriġini Svediż fin-netwerk nazzjonali ta’ pipelines u tipprojbih għal dak importat permezz tan-netwerk nazzjonali ta’ pipelines interkonnessi tikser l-Artikolu 34 TFUE. Fil-fehma tagħha, din ir-restrizzjoni hija diskriminatorja u ma hijiex iġġustifikata mill-ħarsien tal-ambjent jew mis-sigurtà tal-provvista tal-enerġija, minħabba li dawn ma humiex konformi mal-prinċipju ta’ proporzjonalità.

39.

Peress li t-talba għal deċiżjoni preliminari titlob interpretazzjoni tat-termini “bilanċ tal-massa” u “taħlita”, imsemmija fl-Artikolu 18(1) tad-Direttiva 2009/28, kif ukoll deċiżjoni dwar il-kompatibbiltà ta’ din id-dispożizzjoni mal-Artikolu 34 TFUE, naħseb li huwa importanti li nagħmel xi osservazzjonijiet preliminari dwar dawn il-kunċetti.

40.

L-Artikolu 18(1) tad-Direttiva 2009/28 jimponi l-metodu BM sabiex jiġi vverifikat jekk il-kriterji ta’ sostenibbiltà stipulati fl-Artikolu 17(2) sa (6) tagħha, humiex issodisfatti mill-bijogass sabiex jikkwalifika bħala bijokarburant sostenibbli.

41.

Din il-kwalifika jew “tikketta ekoloġika” hija conditio sine qua non sabiex il-konsum tal-bijokarburant jiġi kkunsidrat sabiex: a) tiġi vvalutata l-konformità mill-Istati tal-obbligu tagħhom li jnaqqsu l-emissjonijiet ta’gassijiet serra; b) tiġi vvalutata l-konformità mal-obbligi tal-użu tal-enerġija li tiġġedded u c) jibbenefika mid-diversi tipi ta’ għajnuniet maħluqa mill-Istati sabiex jippromwovu l-konsum tal-enerġija li tiġġedded.

42.

Ir-raġuni għall-kriterji ta’ sostenibbiltà tal-Artikolu 17(2) sa (6) tad-Direttiva 2009/28 hija li jiġi evitat li żoni ta’ valur ekoloġiku ( 13 ) għoli jiġu ddedikati għall-produzzjoni tal-bijomassa għall-ġenerazzjoni tal-bijokarburanti. Il-materja prima użata fil-produzzjoni tal-bijogass għandha tkun konformi, ukoll, mar-rekwiżiti ambjentali tar-regolamenti agrikoli tal-Unjoni ( 14 ). Il-kriterji ta’ sostenibbiltà tal-bijogass, b’mod partikolari, iservu ż-żewġ għanijiet.

43.

Id-Direttiva 2009/28 wettqet armonizzazzjoni eżawrjenti tal-kriterji ta’ sostenibbiltà tal-bijogass, sabiex l-Istati Membri ma jkunux jistgħu jintroduċu kriterji oħra addizzjonali, skont l-Artikolu 17(8), u lanqas ma jistgħu jieqfu jużaw xi wieħed minn dawk stabbiliti fl-Artikolu 17 tad-Direttiva 2009/28 ( 15 ).

44.

Loġikament, għandu jiġi stabbilit jekk il-bijogass ikkummerċjalizzat jirrispettax il-kriterji ta’ sostenibbiltà, li għalihom hemm diversi tekniki u proċeduri, li d-Direttiva 2009/28 għażlet il-metodu BM minnhom. Din l-għażla tfisser li jitneħħew:

45.

Kif diġà indikajt, il-leġiżlatur tal-Unjoni ddeċieda li jimponi l-metodu BM bħala għażla intermedja bejn it-tnejn ta’ qabel, għax, filwaqt li jippermetti t-taħlit ta’ bijokarburanti differenti għall-kummerċjalizzazzjoni tagħhom, jiżgura t-traċċabbiltà tagħhom mill-oriġini sal-konsum. Il-metodu BM jeħtieġ li n-negozjant ikollu dokumenti li juru li l-istess ammont ta’ bijokarburant bħal dak li tneħħa min-netwerk ta’ distribuzzjoni ġie injettat f’dak in-netwerk, wara li nkiseb skont il-kriterji ta’ sostenibbiltà tal-Artikolu 17(2) sa (6), tad-Direttiva 2009/28. L-ispejjeż amministrattivi għall-applikazjoni tiegħu huma ogħla minn dawk ta’ ċertifikati negozjabbli, imma l-effettività tagħhom hija superjuri sabiex tinkoraġġixxi l-produzzjoni tal-bijokarburanti ( 18 ).

46.

Skont il-premessa 76 tad-Direttiva 2009/28, il-Kummissjoni kellha tikkunsidra proċeduri ta’ verifika oħra tal-bijokarburanti u tinforma (l-Artikolu 18(2) lill-Parlament Ewropew u lill-Kunsill, fis-snin 2010 u 2012, dwar it-tħaddim tal-metodu BM u dwar il-possibbiltà li jiġu approvati oħrajn. Ir-rapport tagħha kkonkluda li l-metodu BM baqa’ jkun dak l-iktar xieraq ( 19 ).

47.

L-Artikolu 18(1) tad-Direttiva 2009/28 jagħmel, fil-fehma tiegħi, armonizzazzjoni parzjali ta’ kif għandu jiġi applikat il-metodu BM ( 20 ), filwaqt li jimponi, f’kull każ, tliet kundizzjonijiet, jiġifieri:

48.

Fuq il-bażi ta’ din l-armonizzazzjoni parzjali, id-Direttiva 2009/28 tippermetti l-implementazzjoni tal-metodu BM permezz, alternattivament:

49.

Fil-preżent, l-Unjoni ma kkonkludiet ebda ftehim bħal dan ma’ Stati terzi u l-metodu BM japplika jew permezz ta’ sistemi nazzjonali (bħal dik Svediża f’dan il-każ), jew inkella permezz tad-dsatax-il sistema volontarji li l-Kummissjoni approvat sa issa ( 21 ).

50.

Il-qorti tar-rinviju, fl-ewwel domanda preliminari tagħha, tistaqsi jekk l-Artikolu 18(1) tad-Direttiva 2009/28, inkwantu jistabbilixxi l-użu tal-metodu BM, jobbligax l-awtorizzazzjoni tal-kummerċ ta’ bijogass bejn l-Istati Membri permezz ta’ netwerk interkonness ta’ pipelines.

51.

Il-fattur li wassal għal din il-kwistjoni huwa, kif intqal diġà, ir-rekwiżit li l-BM isir f’“post iddefinit b’mod ċar” fl-Isvezja, għal-liema raġuni l-Aġenzija għall-Enerġija infurmat lil E.ON Biofor li n-netwerk nazzjonali ta’ pipelines interkonnessi ma kienx jissodisfa dak ir-rekwiżit.

52.

Fil-fatt, l-Artikolu 18(1) tad-Direttiva 2009/28 ma jinkludix, fost ir-rekwiżiti tal-BM, il-ħtieġa li dan isir f’post iddefinit b’mod ċar. Ir-riferiment għal “post” jidher fil-Komunikazzjoni tal-Kummissjoni tal-2010 li, peress li ttrattat forom differenti li tista’ tieħu t-taħlita ta’ bijokarburanti, tipprovdi li “l-kunsinni normalment ikunu f’kuntatt, bħal f’kontejner, fi proċess jew f’faċilità jew sit loġistiku jew ta’ proċessar (definiti bħala lokazzjoni ġeografika bil-limiti preċiżi li fiha l-prodotti jistgħu jitħalltu)” ( 22 ).

53.

Din il-kjarifika tal-Kummissjoni ma tipprovdi ebda rekwiżit addizzjonali ma’ dawk tal-Artikolu 18(1) tad-Direttiva 2009/28 għall-użu tal-metodu BM. Għalhekk, jistgħu jitħalltu bijogassijiet b’livelli differenti ta’ sostenibbiltà u bijogassijiet b’gass li jkun ġej minn fjuwils fossili u t-taħlita għandha ssir f’post ġeografiku li jippermetti dan (kontejner, faċilità ta’ trattament jew ta’ loġistika, pipelines, eċċ.).

54.

Peress li l-Artikolu 18(1) tad-Direttiva 2009/28 jinkludi biss ir-rekwiżiti tekniċi bażiċi, li għamilt riferiment għalihom qabel ( 23 ),għall-applikazzjoni tal-metodu BM, l-impatt tiegħu fuq il-kummerċ intra-Komunitarju ta’ bijogass permezz ta’ pipelines huwa newtrali. Jien naqbel mal-Kummissjoni, il-Kunsill u l-Parlament li d-dispożizzjoni ma timponix u lanqas ma tipprojbixxi l-applikazzjoni ta’ dak il-metodu fi skambji ta’ bijogass transkonfinali.

55.

Huma l-Istati Membri li għandhom jiddeterminaw ir-regoli li jirregolaw il-metodu BM, sabiex ttitwettaq l-applikazzjoni tiegħu, filwaqt li tiġi żgurata l-konformità mal-kundizzjonijiet tal-Artikolu 18(1) tad-Direttiva 2009/28. Jistgħu għalhekk jipprovdu li l-BM isir kemm fl-impjanti ta’ produzzjoni, kif ukoll fin-netwerk nazzjonali ta’ pipelines (kif approvaw l-Isvezja, il-Ġermanja u l-Pajjiżi l-Baxxi), jew f’netwerk nazzjonali ta’ pipelines interkonnessi, dejjem sakemm ikun possibbli li tiġi żgurata l-katina ta’ sorveljanza u t-traċċabbiltà tal-bijogass.

56.

L-armonizzazzjoni sħiħa tal-kriterji ta’ sostenibbiltà, l-impożizzjoni tal-BM sabiex jiġi vverifikat li l-bijogass ikun konformi magħhom u l-armonizzazzjoni parzjali tal-kundizzjonijiet tekniċi għall-użu tal-BM, mingħajr dubju, jiffavorixxu, l-iskambji intra-Komunitarji ta’ dan il-bijokarburant. Il-premessa 94 tad-Direttiva 2009/28 tirreferi preċiżament għall-għan ta’ armonizzazzjoni tal-Artikoli 17 u 18 tagħha, u tispeċifika li l-bażi legali għall-adozzjoni tagħhom hija l-Artikolu 95 TKE (l-Artikolu 114 TFUE) u li permezz tagħhom “jiffaċilitaw[tiffaċilita] […] il-kummerċ bejn l-Istati Membri fil-bijokarburanti u bjolikwidi […]”.

57.

Madankollu, kif ġie rrilevat mill-Kummissjoni fl-osservazzjonijiet tagħha, id-Direttiva 2009/28 ma tinkludi ebda klawżola ta’ ċirkolazzjoni mingħajr kundizzjonijiet tal-bijogass bejn l-Istati Membri, u dawn jistgħu jimplementaw sistemi differenti ta’ applikazzjoni tal-BM, li jiġġeneraw restrizzjonijiet fuq il-kummerċ intra-Komunitarju ta’ bijogass sostenibbli. Kellu jkun hemm armonizzazzjoni sħiħa tal-kundizzjonijiet għall-użu tal-metodu BM sabiex is-sistemi nazzjonali kollha jkunu simili u, għalhekk, jiġi ggarantit il-moviment liberu tal-bijogass ikkummerċjalizzat legalment taħt xi waħda minnhom.

58.

Fin-nuqqas ta’ tali armonizzazzjoni sħiħa, l-operaturi jistgħu jiksbu biss il-moviment liberu transkonfinali tal-bijogass billi jużaw is-sistemi volontarji ta’ verifika awtorizzati mill-Kummissjoni, skont l-Artikolu 18(4) tad-Direttiva 2009/28. L-Aġenzija għall-Enerġija tirrikonoxxi, f’dan il-kuntest, li ma hemm l-ebda diffikultà fl-aċċettazzjoni tal-bijogass sostenibbli importat bi kwalunkwe wieħed minn dawk iċ-ċertifikati ( 24 ), sakemm ikopri l-kummerċ transkonfinali, bħal fil-każ tal-iskemi International Sustainability and Carbon Certification (ISCC), REDcert EU u NTA 8080 ( 25 ).

59.

Għaldaqstant, nipproponi li l-Qorti tal-Ġustizzja tirrispondi għall-ewwel domanda preliminari billi tiddikjara li l-interpretazzjoni tal-kunċetti “bilanċ tal-massa” u ta’ “taħlita”, tal-Artikolu 18(1) tad-Direttiva 2009/28 ma timpedixxix u lanqas ma tobbliga lill-Istati Membri jawtorizzaw mingħajr kundizzjonijiet il-kummerċ tal-bijogass sostenibbli permezz ta’ netwerk interkonness ta’ pipelines nazzjonali.

60.

Il-qorti tar-rinviju tistaqsi lill-Qorti tal-Ġustizzja, f’każ li l-ewwel domanda tingħata risposta negattiva, dwar l-inkompatibbiltà eventwali tal-Artikolu 18(1) tad-Direttiva 2009/28 mal-Artikolu 34 TFUE, li jipprojbixxi miżuri li għandhom effett ekwivalenti għal restrizzjonijiet kwantitattivi fuq l-importazzjoni.

61.

Skont ġurisprudenza stabbilita tal-Qorti tal-Ġustizzja, il-projbizzjoni tal-Artikolu 34 TFUE “ma tapplikax biss għall-miżuri nazzjonali, iżda wkoll għall-miżuri adottati mill-istituzzjonijiet [tal-Unjoni]”, b’tali mod li r-regoli tal-leġiżlazzjoni sekondarja wkoll għandhom jirrispettawha ( 26 ).

62.

Madankollu, din il-projbizzjoni hija imposta fuq l-istituzzjonijiet tal-Unjoni b’mod inqas strett milli fuq l-Istati Membri ( 27 ), minħabba li l-Qorti tal-Ġustizzja tagħtihom diskrezzjoni wiesgħa sabiex jeżerċitaw il-kompetenza ta’ armonizzazzjoni tagħhom fil-qasam tal-produzzjoni u l-kummerċjalizzazzjoni ta’ merkanziji. Huma jistgħu, għalhekk, jadottaw regoli li temporanjament iżommu ostakoli għall-kummerċ intra-Komunitarju, bħala pass qabel ir-rimi finali tiegħu ( 28 ).

63.

L-impożizzjoni tal-metodu BM sabiex tiġi vverifikata l-konformità mal-kriterji ta’ sostenibbiltà tal-bijogass, fit-termini tal-Artikolu 18(1) tad-Direttiva 2009/28, toħloq ċertu ostakoli għall-iskambji intra-Komunitarji ta’ din il-merkanzija, peress li tobbliga lill-operaturi ekonomiċi jieħdu xi piżijiet amministrattivi u finanzjarji addizzjonali, li kienu jkunu ineżistenti kieku ntuża l-metodu ta’ ċertifikati negozjabbli (jew, anki, deregolamentazzjoni sħiħa li kienet tagħti liberta sħiħa lill-operaturi ekonomiċi sabiex jagħtu prova permezz ta’ mezzi oħra tas-sostenibbiltà tal-bijogass).

64.

Barra minn hekk, kif diġà indikajt, l-armonizzazzjoni parzjali tal-Artikolu 18(1) tad-Direttiva 2009/28 rigward il-metodu BM tiftaħ il-possibbiltà għall-Istati Membri li jistabbilixxu sistemi nazzjonali differenti għall-użu tiegħu, u għalhekk il-bijogass meqjus sostenibbli, b’konformità ma’ sistema nazzjonali jista’ ma jkunx hemm fi Stat Membru ieħor. Armonizzazzjoni sħiħa kienet tevita l-ħolqien ta’ dawn l-ostakoli tekniċi u tiggarantixxi li l-bijogass sostenibbli, ladarba mmanifatturat u kkummerċjalizzati legalment fi Stat Membru, seta’ jkollu aċċess, b’din l-istess “tikketta”, għall-pajjiżi l-oħra tal-Unjoni sabiex jiġi ddistribwit fihom.

65.

Madankollu, ir-restrizzjonijiet fuq il-kummerċ intra-Komunitarju li jirriżultaw mill-użu tal-metodu BM (li possibbilment imorru kontra l-projbizzjoni tal-Artikolu 34 TFUE) jistgħu jkunu ġġustifikati mill-ħtieġa imperattiva li jiġi mħares l-ambjent u għandhom jirrispettaw il-prinċipju tal-proporzjonalità. Il-kunsiderazzjonijiet li se nagħmel iktar 'il quddiem dwar ir-regola nazzjonali li teħtieġ li jsir BM f’post iddefinit b’mod ċar fl-Isvezja jistgħu jiġu estrapolati hawn, bid-differenza li r-regolamentazzjoni tal-Artikolu 18 tad-Direttiva 2009/28 hija ġenerali għall-Istati kollha, mingħajr ebda element diskriminatorju jew protettiv li jikser il-prinċipju ta’ proporzjonalità.

66.

Għaldaqstant, minkejja li l-Artikolu 18(1) tad-Direttiva 2009/28 jinvolvi restrizzjoni temporanja fuq il-kummerċ intra-Komunitarju tal-bijogass, huwa jiffavorixxi wkoll l-iżvilupp ta’ dan il-kummerċ fit-tul, li jeskludi l-klassifikazzjoni tiegħu bħala miżura b’effett ekwivalenti li tmur kontra l-Artikolu 34 TFUE, skont il-Qorti tal-Ġustizzja ċċitata iktar ’il fuq. Diversi raġunijiet jiffavorixxu din il-konklużjoni.

67.

L-ewwel, il-metodu BM jipprovdi inqas diffikultajiet għall-kummerċ intra-Komunitarju milli għall-metodu ta’ preservazzjoni tal-identità, kif spjegajt qabel ( 29 ), filwaqt li jippermetti kontroll tat-traċċabbiltà tal-bijogass sostenibbli.

68.

It-tieni, id-Direttiva 2009/28 aċċettat fl-Artikolu 18(4), li l-operaturi jirrikorru għal sistemi volontarji nazzjonali u internazzjonali sabiex japplikaw is-sistema BM, ladarba jiġu rrikonoxxuti mill-Kummissjoni. Dawn is-sistemi volontarji jistgħu jintużaw kemm fil-kummerċ intern ta’ pajjiż kif ukoll fil-kummerċ intra-Komunitarju. Bl-użu tagħhom, l-operatur għandu l-garanzija, skont l-Artikolu 18(7) ta’ dik id-direttiva ( 30 ), li l-bijogass li s-sostenibbiltà tiegħu tkun ġiet akkreditata bil-BM milqugħ fi kwalunkwe waħda minn dawn is-sistemi volontarji jista’ jiġi kkummerċjalizzat fi Stat Membru ieħor, fl-istess kundizzjonijiet bħall-bijogass ta’ oriġini nazzjonali vverifikat b’BM li jikkonforma mas-sistema nazzjonali.

69.

It-tielet, l-Artikolu 18(9), tad-Direttiva 2009/28 jipprovdi għall-possibbiltà li fil-futur, il-metodu BM, jiġi mibdul b’wieħed inqas restrittiv għall-kummerċ intra-Komunitarju, kif jistgħu jkunu ċ-ċertifikati negozjabbli. Din id-dispożizzjoni turi li l-metodu BM jirrappreżenta l-ewwel pass fil-promozzjoni tal-kummerċ intra-Komunitarju tal-bijogass, anki jekk temporanjament jinżammu ċerti ostakoli li jistgħu jiġu kkoreġuti iktar tard.

70.

Konsegwentement, peress li l-għażla tal-metodu BM, fit-termini li saru, issegwi evalwazzjoni ta’ diversi fatturi (ta’ natura ekonomika u teknika) ta’ kumplessità ovvja, u ma narax li din hija miżura li hija inadegwata b’mod ċar fir-rigward tal-għan propost, ma hemm ebda raġuni biex wieħed jemmen li l-Artikolu 18(1) tad-Direttiva 2009/28 jikser l-Artikolu 34 TFUE.

71.

Il-Qorti tal-Ġustizzja ddikjarat li, meta ambitu jkun ġie armonizzat b’mod eżawrjenti fil-livell tal-Unjoni, kwalunkwe miżura nazzjonali adottata fih għandha tiġi evalwata fid-dawl tad-dispożizzjonijiet tal-miżura ta’ armonizzazzjoni u mhux ta’ dawk tad-dritt primarju ( 31 ). Madankollu, kwalunkwe regola interna li tittrasponi direttiva ta’ armonizzazzjoni mhux eżawrjenti fid-dritt intern għandha tkun konformi mad-dritt primarju ( 32 ).

72.

Peress li l-Artikolu 18(1) tad-Direttiva 2009/28 jarmonizza biss parzjalment u mhux b’mod eżawrjenti l-użu tal-metodu BM sabiex tiġi vverifikata n-natura sostenibbli tal-bijogass, is-sistema nazzjonali Svediża għandha tiġi analizzata fid-dawl tal-Artikolu 34 TFUE.

73.

B’mod iktar speċifiku, għandu jiġi ddeterminat jekk il-kundizzjoni li l-BM isir f’post iddefinit b’mod ċar, bħan-netwerk Svediż tal-pipelines, iżda mhux fin-netwerk interkonness ta’ pipelines nazzjonali, tikkostitwixxix miżura li għandha effett ekwivalenti għal restrizzjoni kwantitattiva fuq l-importazzjoni, ipprojbita mill-Artikolu 34 TFUE. Għalkemm il-qorti tar-rinviju ma tagħmilx din id-domanda direttament, naħseb li jeħtieġ li tiġi indirizzata sabiex ir-risposta tal-Qorti tal-Ġustizzja tkun utli biex tiddeċiedi l-kawża prinċipali.

74.

Skont ġurisprudenza stabbilita sew, billi l-Artikolu 34 TFUE jipprojbixxi l-miżuri b’effett ekwivalenti għal restrizzjonijiet kwantitattivi fuq l-importazzjoni bejn l-Istati Membri, jaffettwa kwalunkwe miżura nazzjonali li tista’ xxekkel direttament jew indirettament, attwalment jew potenzjalment, il-kummerċ intra-Komunitarju ( 33 ).

75.

Madankollu, il-miżura tal-Aġenzija għall-Enerġija, li hija applikabbli bl-istess mod għall-bijogass sostenibbli kollu kkummerċjalizzat fl-Isvezja, irrispettivament mill-oriġini tiegħu, timpedixxi li jsir BM tal-bijogass importat fin-netwerk interkonness ta’ pipelines nazzjonali, peress li dan ifixkel jew jostakola l‑importazzjonijiet tal-bijogass li ġejjin minn Stat Membru ieħor permezz ta’ dak in-netwerk.

76.

Jekk il-bijogass prodott u kkummerċjalizzat legalment fil-Ġermanja, li fil-prinċipju jissodisfa r-rekwiżiti ta’ sostenibbiltà tal-Artikolu 17 tad-Direttiva 2009/28, ma jistax jidħol l-Isvezja bħala bijogass sostenibbli meta jiċċirkola f’pipeline, il-miżura nazzjonali tirrestrinġi l-importazzjoni u, għalhekk, tmur kontra l-Artikolu 34 TFUE. Anki jekk, skont kif targumenta l-Aġenzija għall-Enerġija, jista’ jiġi ddistribwit bħala bijogass mhux sostenibbli, il-profittabbiltà għall-operatur ekonomiku titnaqqas, peress li huwa l-bijogass sostenibbli biss li jibbenefika minn sistema fiskali favorevoli, u għalhekk jagħmlu kompetittiv meta mqabbel mal-fjuwils fossili.

77.

Għall-Aġenzija għall-Enerġija, ir-regola Svediża ma timpedixxix il-kummerċ transkonfinali tal-bijogass sostenibbli, li l-operaturi jistgħu jimportaw minn Stati Membri oħra permezz ta’ pipeline billi jużaw waħda mis-sistemi volontarji approvati mill-Kummissjoni, skont l-Artikolu 18(4) tad-Direttiva 2009/28 ( 34 ). Hija żżid li huma jistgħu, ukoll, jużaw trasport bit-triq, bil-ferrovija jew bil-vapur u mbagħad jinjettaw dan il-bijiogass importat fin-netwerk Svediż tal-pipelines.

78.

L-ebda wieħed miż-żewġ argumenti ma naħseb li huwa biżżejjed sabiex jiġi eskluż l-effett restrittiv tal-miżura. Il-bijogass jista’, ċertament, jiġi likwifikat u esportat lejn l-Isvezja bl-art, bil-baħar jew bil-ferrovija, filwaqt li jinżammu l-karatteristiċi tiegħu u jiġi applikat il-metodu ta’ preservazzjoni tal-identità għall-kontroll tas-sostenibbiltà tiegħu, iżda, kif indikat E.ON Biofor, dawn il-mezzi tat-trasport, li ma humiex pipelines, jagħmlu l-prezz finali tiegħu konsiderevolment ogħla, u għalhekk jimpedixxu, de facto, l-importazzjoni tiegħu fl-Isvezja, peress li ma jkunx kompetittiv mal-bijogass ta’ oriġini Svediża ( 35 ).

79.

L-użu ta’ sistema volontarja ta’ applikazzjoni tal-metodu BM huwa l-uniku mod biex jiġi esportat bijogass sostenibbli lejn l-Isvezja għall-operaturi ekonomiċi ta’ Stati oħra, filwaqt li l-produtturi Svediżi tal-bijogass jistgħu jibbenefikaw minn waħda minn dawn is-sistemi volontarji jew mis-sistema nazzjonali Svediża, li jista’ jirriżulta iktar favorevoli għalihom. E.ON Biofor, biex turi s-sostenibbiltà tal-bijogass tagħha, użat is-sistema nazzjonali Ġermaniża REDCert DE u, kif iddikjarat fis-seduta, l-użu ta’ sistema volontarja ta’ verifika tal-BM approvata mill-Kummissjoni, kif tista’ tkun REDCert UE, kien twassalha biex tidħol fi spejjeż addizzjonali

80.

L-ostakolu għall-importazzjonijiet tal-bijogass minn Stati Membri oħra permezz tan-netwerk ta’ pipelines jista’, madankollu, ikun iġġustifikat minn waħda mir-raġunijiet ta’ interess ġenerali elenkati fl-Artikolu 36 TFUE jew minn rekwiżiti imperattivi. Il-Qorti tal-Ġustizzja aċċettat li regola jew prassi nazzjonali li tikkostitwixxi miżura ta’ effett ekwivalenti għal restrizzjonijiet kwantitattivi fuq l-importazzjoni tista’ tkun koperta minn dawk ir-raġunijiet jew rekwiżiti. Fiż-żewġ każijiet, f’konformità mal-prinċipju ta’ proporzjonalità, id-dispożizzjoni nazzjonali għandha tkun xierqa sabiex tiggarantixxi t-twettiq tal-għan imfittex u ma għandhiex tmur lil hinn minn dak li huwa neċessarju sabiex dan jintlaħaq ( 36 ).

81.

Il-miżura tal-Aġenzija għall-Enerġija tiffaċilita l-użu tal-BM mill-produtturi Svediżi tal-bijogass, billi tippermettilhom iħalltuh fin-netwerk nazzjonali tal-pipelines permezz tal-metodu BM, li huwa inqas restrittiv milli kieku dawn kienu ġew sfurzati li jużawh f’kull impjant ta’ produzzjoni. Konsegwentement, din tiffavorixxi l-użu ta’ din l-enerġija rinnovabbli u, minn din il-perspettiva, tista’ tkun koperta mill-ħarsien tal-ambjent ( 37 ) u, b’mod iktar speċifiku, mill-promozzjoni tal-bijogass bħala enerġija li tiġġedded ( 38 ), li jikkontribwixxi għat-tnaqqis tal-emissjonijiet ta’ gassijiet serra, waħda mill-kawżi ewlenin tat-tibdil fil-klima li l-Unjoni u l-Istati Membri tagħha impenjaw ruħhom li jiġġieldu kontriha ( 39 ). Il-miżura Svediża hija pożittiva wkoll sabiex tiżgura l-provvista tal-elettriku, peress li tgħin biex tkopri d-domanda tal-bijogass għat-trasport, għan tas-sistema Svediża ta’ inċentivi fiskali.

82.

Billi tiffavorixxi l-preservazzjoni tal-ambjent, il-promozzjoni tal-enerġiji rinnovabbli, b’mod ġenerali, u tal-bijogass, b’mod partikolari, il-miżura tikkontribwixxi wkoll, indirettament, għall-protezzjoni tas-saħħa u l-ħajja tan-nies u tal-annimali, kif ukoll għall-preservazzjoni tal-pjanti, li huma raġunijiet ta’ interess ġenerali elenkati fl-Artikolu 36 TFUE ( 40 ).

83.

Madankollu, id-deċiżjoni tal-Aġenzija għall-Enerġija Svediża għandha tirrispetta l-prinċipju ta’ proporzjonalità, li jfisser li għandha tkun adegwata sabiex tiżgura li jintlaħaq l-għan imfittex u ma tmurx lil hinn minn dak li huwa neċessarju sabiex dan jintlaħaq.

84.

Jien ma nemminx li l-limitazzjoni tal-metodu BM għan-netwerk Svediż tal-pipelines, bl-esklużjoni tan-netwerk interkonness ta’ pipelines nazzjonali ta’ Stati Membri tal-UE, hija strettament neċessarja sabiex jiġi promoss l-użu tal-bijogass sostenibbli fl-Isvezja. Anzi għall-kuntrarju, din tagħmel impossibbli de facto l-importazzjoni fl-Isvezja ta’ bijogass li jkun ġej minn Stati Membri oħra, meta dawn l-importazzjonijiet iżidu l-provvista ta’ bijogass u jippermettu użu aħjar ta’ dan il-bijokarburant.

85.

Ma nistax insib biżżejjed raġunijiet sabiex l-Isvezja timpedixxi, għall-operaturi li jixtiequ dan, l-importazzjoni ta’ bijogass sostenibbli, ivverifikat permezz tal-metodu BM, permezz tan-netwerk ta’ pipelines interkonnessi ma’ pajjiżi oħra tal-Unjoni, sakemm dawk ikunu jistgħu juru, bl-istess mod bħall-produtturi Svediżi, li s-sostenibbiltà tal-bijogass tagħhom hija ggarantita skont l-Artikolu 18 tad-Direttiva 2009/28 u tas-sistema nazzjonali tagħhom ta’ applikazzjoni tal-metodu BM. Dan l-argument huwa infurzat jekk jidher li l-Kummissjoni tkun tista’ tadotta deċiżjoni li tiddetermina li sistema nazzjonali għall-applikazzjoni tal-metodu BM (li jkun ġie nnotifikat lilha) jinvolvi awtomatikament rikonoxximent reċiproku, bħas-sistemi volontarji ( 41 ).

86.

L-Aġenzija għall-Enerġija Svediża tipprova tiġġustifika l-aġir tagħha fin-nuqqas ta’ awtorità superviżorja Ewropea fuq in-netwerk tal-pipelines nazzjonali, li jkollha l-kapaċità li tissorvelja l-applikazzjoni tal-BM, sabiex tiggarantixxi t-traċċabbiltà tal-lottijiet ta’ bijogass sostenibbli suġġetti tal-kummerċ intra-Komunitarju u sabiex tevita, fl-istess ħin, li l-operaturi jkunu jistgħu jibbenefikaw minn iktar minn għajnuna waħda għall-produzzjoni jew il-kummerċjalizzazzjoni tiegħu. Waqt is-seduta, hija sostniet l-impossibbiltà li tiġi vverifikata l-katina tal-informazzjoni tal-bijogass importat mill-Ġermanja lejn l-Isvezja, minħabba li hija stess ma tistax teżerċita kontroll fuq il-produtturi tal-bijogass fil-Ġermanja.

87.

Ma naħsibx li dan l-argument huwa aċċettabbli, peress li l-Artikolu 18(4) tad-Direttiva 2009/28 jippermetti l-moviment liberu tal-bijogass sostenibbli permezz ta’ pipelines, meta t-traċċabbiltà tiegħu tkun garantita minn sistemi volontarji approvati mill-Kummissjoni. Jekk operatur juri, skont is-sistema nazzjonali tal-pajjiż ta’ produzzjoni, il-konformità mal-BM ta’ lott ta’ bijogass sostenibbli importat minn Stat Membru permezz ta’ pipelines, l-awtoritajiet Svediżi għandhom jaċċettaw l-importazzjoni tiegħu u ma jimpedixxux it-trasport tiegħu fin-netwerk Svediż tal-pipelines.

88.

L-armonizzazzjoni parzjali tal-użu tal-BM, irregolata mill-Artikolu 18(1) u (3), tad-Direttiva 2009/28 għandha tippermetti lok għar-rikonoxximent reċiproku tal-bijogass sostenibbli miksub fl-Istati Membri, sakemm ma jintweriex li hemm rekwiżit imperattiv sabiex jiġi ġġustifikat ir-rifjut tiegħu. L-Aġenzija għall-Enerġija Svediża ma pprovdietx argumenti suffiċjenti sabiex tirribatti din il-preżunzjoni tal-applikazzjoni tar-rikonoxximent reċiproku għall-bijogass immanifatturat u kkummerċjalizzat legalment fil-Ġermanja bħala sostenibbli u esportat lejn l-Isvezja permezz ta’ pipelines.

89.

L-Isvezja setgħet ippermettiet li l-operaturi ekonomiċi juru n-natura sostenibbli tal-bijogass tagħhom bl-informazzjoni tas-sistema ta’ applikazzjoni tal-metodu tal-BM tal-pajjiż ta’ oriġini tiegħu. Din hija alternattiva inqas restrittiva tal-kummerċ intra-Komunitarju mill-projbizzjoni, de facto, tal-importazzjonijiet permezz tal-pipelines. Fir-realtà, hekk kif iddikjarat matul is-seduta, l-Aġenzija għall-Enerġija tikkontrolla s-sostenibbiltà tal-bijogass billi teżamina d-dokumenti ppreżentati lilha mill-operaturi nazzjonali. Ma nifhimx għaliex ma setgħetx tapplika din l-istess soluzzjoni għall-importaturi tal-bijogass li jipprovdu ċertifikati nazzjonali affidabbli, li juru l-kwalità sostenibbli tal-bijogass.

90.

Il-miżura kkontestata, għalhekk, fil-fehma tiegħi, ma hijiex konformi mal-prinċipju ta’ proporzjonalità. Fi kwalunkwe każ, hija l-Aġenzija għall-Enerġija (u, eventwalment l-imħallef li jiddeċiedi dwar id-deċiżjonijiet tagħha fl-appell) li għandha tiddetermina jekk il-provi pprovduti minn E.ON Biofor humiex adegwati sabiex juru li l-lottijiet tal-bijogass importati jissodisfaw il-kriterji ta’ sostenibbiltà tad-Direttiva 2009/28, li jkunu kkonformaw mar-rekwiżiti tal-metodu BM u li ma hemm ebda riskju ta’ għadd doppju tal-lottijiet fil-Ġermanja u fl-Isvezja, minkejja t-trasport tiegħu permezz tan-netwerk ta’ pipelines nazzjonali interkonnessi.

91.

Fl-aħħar nett, sussidjarjament u biss għall-ipoteżi li d-domandi magħmula mill-qorti tar-rinviju jitqiesu mill-perspettiva tar-restrizzjonijiet ammissibbli għall-“iskemi ta’ appoġġ nazzjonali” għall-produzzjoni tal-bijogass, fis-sens tal-punt (k) tat-tieni paragrafu tal-Artikolu 2 tad-Direttiva 2009/28, xtaqt nenfasizza li l-limitazzjoni tal-metodu BM għall-bijogass li jiċċirkola mill-pipelines Svediżi, bl-esklużjoni ta’ dak li ġej minn netwerk interkonness ta’ pipelines nazzjonali, ma taqa’ taħt ebda waħda minn dawn l-iskemi. Lanqas ma tista’ titqabbel mas-sistemi nazzjonali ta’ għajnuna għall-produzzjoni tal-elettriku ekoloġiku eżaminati mill-Qorti tal-Ġustizzja fil-kawża Ålands Vindkraft ( 42 ).

92.

Għalkemm id-digriet tar-rinviju ma jsemmix dan b’mod espliċitu ( 43 ), jidher li jista’ jiġi dedott minnu (u dan ġie kkonfermat mill-Aġenzija għall-Enerġija fis-seduta) li t-trattament fiskali favorevoli jestendi għall-bijogass sostenibbli kollu, u mhux biss għal dak ta’ oriġini Svediża, u għalhekk jibbenefika minn dan ukoll, dak il-bijogass importat li jkun konformi mas-sistemi volontarji għall-applikazzjoni tal-BM ( 44 ).

93.

Il-Qorti tal-Ġustizzja aċċettat li l-Istati jistgħu jieħdu miżuri diskriminatorji biex jappoġġjaw l-elettriku ekoloġiku u jillimitawhom għal dak li joriġina fit-territorju tagħhom ( 45 ). Fil-fehma tiegħi, din il-ġurisprudenza, li xi elementi tagħha ġew ikkritikati ( 46 ), ma tistax tiġi estrapolata għal din il-kawża. L-ewwel, għaliex, nirrepeti, dan ma huwiex il-każ ta’ skema ta’ appoġġ nazzjonali għall-produzzjoni ta’ bijogass. It-tieni, minħabba li fil-produzzjoni u l-kummerċ tal-elettriku ekoloġiku, it-traċċabbiltà hija diffiċli ħafna sabiex tinżamm (li jispjega l-użu ta’ ċertifikati negozjabbli), filwaqt li dik tal-bijogass hija fattibbli u hija żgurata permezz tad-Direttiva 2009/28, preċiżament permezz tal-metodu BM. Fl-aħħar, il-Qorti tal-Ġustizzja kkunsidrat li ċerti miżuri diskriminatorji nazzjonali (bħall-applikazzjoni ta’ tariffi tat-trasport preferenzjali biss għall-elettriku ekoloġiku ta’ oriġini reġjonali) imorru kontra l-Artikolu 34 TFUE u ma humiex iġġustifikati ( 47 ).

94.

Fil-qosor, jiena nemmen li miżura nazzjonali li teħtieġ li jiġi applikat il-metodu BM f’post iddefinit b’mod ċar, bħan-netwerk nazzjonali tal-pipelines, bl-esklużjoni tal-bijogass ivverifikat b’dan il-metodu li jkun ġej min-netwerk interkonness ta’ pipelines nazzjonali, tikkostitwixxi miżura ta’ effett ekwivalenti għal restrizzjoni kwantitattiva fuq l-importazzjoni, li tmur kontra l-Artikolu 34 TFUE.

95.

Fid-dawl tal-kunsiderazzjonijiet preċedenti, nipproponi li l-Qorti tal-Ġustizzja tirrispondi għad-domandi preliminari magħmula mill-Förvaltningsrätten i Linköping (Qorti tal-Ewwel Istanza Kontenzjuża-Amministrattiva, l-Isvezja) kif ġej:

a)

It-titolu I.A għandu jipprevedi “A. Id-dritt tal-Unjoni: Direttiva 2009/28”, minflok “A. Id-dritt tal-Unjoni”. Għal din ir-raġuni t-titolu I.A.1 Direttiva 2009/28 tneħħa.

b)

In-nota ta’ qiegħ il-paġna Nru 16 lejn l-aħħar għandha tipprevedi “p. 148”, minflok p. 143.

ċ)

In-nota ta’ qiegħ il-paġna Nru 22 għandha tipprevedi “punt 47”, minflok punt 48.

d)

In-nota ta’ qiegħ il-paġna Nru 28 għandha tipprevedi “punti 43 u 44”, minflok punti 45 u 46

e)

In-nota ta’ qiegħ il-paġna Nru 33 għandha tipprevedi “punt 68”, minflok punt 69.