Servizzi għall-kiri ta’ akkomodazzjoni għal żmien qasir — il-ġbir u l-kondiviżjoni ta’ data

PUNTI EWLENIN

Ir-regolament:

• japplika għal pjattaformi online li joffru akkomodazzjoni għal żmien qasir u għal ospitanti¹ li jirreklamw il-propjetajiet direttament;
• ma japplikax għal lukandi, suites, lukandi tal-appartmenti, motels, hostels, campsites jew veikoli tar-rikreazzjoni u parkeġġi tat-trejlers;
• ma jaffettwax:
  • regoli nazzjonali, reġjonali jew lokali dwar kiri ta’ akkomodazzjoni għal żmien qasir, użu tal-art, ippjanar tal-bliet u tal-pajjiż, regolamenti dwar il-bini, l-abitazzjoni u l-kirjiet;
  • liġi tal-UE jew nazzjonali dwar reati kriminali u l-użu ta’ statistika Ewropea u nazzjonali;
  • leġiżlazzjoni separata tal-UE dwar tassazzjoni u servizzi diġitali u tas-soċjetà tal-informazzjoni.

Proċedura tar-reġistrazzjoni

L-Istati Membri tal-UE għandhom:

• japplikaw ir-regolament jekk joperaw sistema ta’ reġistrazzjoni nazzjonali, reġjonali jew lokali għall-kiri ta’ akkomodazzjoni bl-għamara għal żmien qasir (magħrufa bħala “unitajiet”) fuq it-territorju tagħhom;
• jassikuraw il-proċedura ta’ reġistrazzjoni li tiddependi fuq dikjarazzjonijiet mill-ospitanti tal-akkomodazzjoni, tkun disponibbli online, tkun bla ħlas fejn possibbli u tissodisfa ċerti rekwiżiti tekniċi;
• jipprovdu reġistru pubbliku u li jkun faċilment aċċessibbli għan-numri ta’ reġistrazzjoni li jinħarġu u jippermettu ospitanti tal-akkomodazzjoni li jissottomettu d-dokumentazzjoni kollha tagħhom diġitalment;
• jassikuraw li l-informazzjoni u dokumentazzjoni kollha li jirċievu tkun maħżuna b’mod sigur, miżmuma kemm ikun neċessarju u titneħħa mhux aktar tard minn 18-il xahar wara li l-ospitant jiddeċiedi li jneħħi l-proprjetà mir-reġistru.

Ospitanti jridu jipprovdu:

• informazzjoni korretta dwar kull kirja ta’ akkomodazzjoni, bħal indirizz, numru ta’ sodod u jekk, fejn ikun meħtieġ, għandhomx l-awtorizzazzjoni bżonnjuża;
• l-isem, l-indirizz postali u tal-email, numru tat-telefown tal-kuntatt u numru tal-identifikazzjoni nazzjonali, jekk persuna fiżika;
• l-isem, l-indirizz u email reġistrat, in-numru nazzjonali tar-reġistrazzjoni tan-negozju u r-rappreżentant legali bd-dettalji tat-telefown tal-kuntatt, jekk persuni ġuridika.

Verifika

Awtoritajiet kompetenti:

• jivverifikaw id-dikjarazzjonijiet li ospitanti jkunu ssottomettew u jistgħu jitolbu dettalji addizzjonali jekk iqisu li l-informazzjoni jew dokumentazzjoni ma tkunx kompluta jew tkun skorretta;
• jistgħu jissospendu n-numru ta’ reġistrazzjoni tal-ospitant u temporanjament jneħħu kull elenkar minn pjattaformi online, jekk, fil-każ ta’ dokumentazzjoni mhux kompluta jew skorretta — u meta jintalbu jirrettifikawha — l-ospitant jonqos milli jagħmel hekk, jew meta jkollhom dubji serji dwar l-awtentiċità jew validità tagħha;
• jistgħu jikkanċellaw ir-reġistrazzjoni u jitolbu li l-proprjetà titneħħa minn pjattaformi online jekk l-ospitant, permezz ta’ mġiba ħażina volontarja jew negliġenza grossa, jonqos li jirrettifika d-dettalji tagħhom jew li jipprovdi informazzjoni mhux awtentika jew invalida;
• jridu jipprovdu raġunijiet għal kull azzjoni li jieħdu u informazzjoni li tippermetti li l-proprjetà u l-ospitant ikunu identifikati.

Pjattaformi online:

• jfasslu l-interfaċċi tagħhom b’mod li l-ospitanti jkunu jistgħu jiddikjaraw jekk proċedura ta’ reġistrazzjoni tkunx fis-seħħ u, jekk ikun hekk, jekk utenti jkunux jistgħu jidentifikaw il-proċeduri permezz tan-numru ta’ reġistrazzjoni;
• jagħmlu verifiki b’mod aleatorju dwar jekk ospitanti jkunux ipprovdew dikjarazzjoni korretta u dwar il-validità tan-numru ta’ reġistrazzjoni li jkunu ddikjaraw;
• jinfurmaw lill-awtoritajiet kompetenti u ospitanti fil-pront dwar kwalunkwe dikjarazzjoni skorretta jew użata ħażin jew numri ta’ reġistrazzjoni invalidi;
• jħallu lil ospitanti jkunu jafu jekk ikollhomx bżonn jirreġistraw u l-obbligi li din ir-reġistrazzjoni tinvolvi.

Rapportar ta’ data

Pjattaformi online għal kiri għal żmien qasir fejn l-awtoritajiet jitolbu li tinġabar ċerta data u tintbagħat l-informazzjoni għal kull proprjetà lill-awtoritajiet nazzjonali kompetenti kull xahar, jew trimestrali jekk ikollhom inqas minn 4,250 elenkar.

L-Istati Membri:

• jistabbilixxu punt ta’ dħul diġitali uniku biex jirċievu u jiġġestjonaw id-data ġġenerat mill-pjattaformi online;
• jassikuraw li l-punt ta’ dħul:
  • jkunu jistgħu jiġġestjonaw trażmissjoni ta’ data dwar attività minn magna għal magna u manwalment;
  • jiffaċilitaw verifiki b’mod aleatorju u l-kondiviżjoni ta’ informazzjoni,
  • jippermettu li l-awtoritajiet rilevanti jaċċessaw id-data,
  • jkollhom bażi ta’ data online aċċessibbli b’mod ħieles u li tinqara minn magna,
  • jiggarantixxi l-kunfidenzjalità, l-integrità u s-sigurtà tad-data kollha;
• jaħtru koordinatur nazzjonali bħala punt ta’ kuntatt għal pajjiżhom, biex jikkoordina mal-Kummissjoni Ewropea u, bħala membru tal-grupp ta’ koordinazzjoni tal-punti uniċi diġitali ta’ dħul, jgħin jimplimenta r-regolament;
• jistabbilixxu lista tal-awtoritajiet responsabbli għall-oqsma li jimplimentaw proċedura tar-reġistrazzjoni u li huma eliġibbli li jaċċessaw id-data;
• jinnominaw awtorità biex tissorvelja l-implimentazzjoni nazzjonali tar-regolament u biex jirrapportaw l-osservazzjonijiet tagħhom lill-Kummissjoni kull sentejn;
• jiddeterminaw, sal-20 ta’ Mejju 2026, pieni għal pjattaformi online u ospitanti li jiksru r-regoli.

Ir-regolament jemenda r-Regolament (UE) 2018/1724.

Il-Kummissjoni tevalwa l-leġiżlazzjoni u tippreżenta s-sejbiet prinċipali tagħha sal-20 ta’ Mejju 2031 lill-Parlament Ewropew, lill-Kunsill tal-Unjoni Ewropea, lill-Kumitat Ekonomiku u Ewropew u lill-Kumitat tar-Reġjuni.