Il-prevenzjoni tal-abbuż tas-sistema finanzjarja għall-finijiet tal-ħasil tal-flus u t-terroriżmu (mill-2027) — mekkaniżmi tal-Istati Membri

PUNTI EWLENIN

Stati Membri tal-UE:

• jistgħu japplikaw ir-Regolament (UE) 2024/1624 kollu jew parti minnu għal attivitajiet oħra li huma jqisu esposti għal riskji tal-ħasil tal-flus u tal-finanzjament tat-terroriżmu, u jinfurmaw lill-Kummissjoni Ewropea, u jiġġustifikaw id-deċiżjoni u jassessjaw l-impatt ta’ tali applikazzjoni fuq il-provdiment ta’ servizzi fi ħdan is-suq intern;
• jiżguraw:
  • li l-iskambju tal-munita jew uffiċċji għat-tisrif ta-ċekkijiet u fornituri jew kumpaniji tas-servizzi fiduċjarji jkunu liċenzjati jew irreġistrati;
  • fornituri ta’ servizzi tal-logħob tal-azzard ikunu rreġistrati;
  • entitajiet oħra huma obbligati jikkonformaw ma’ rekwiżiti minimi ta’ reġistrazzjoni biex jippermettu lil superviżuri li jidentifikawhom;
• jridu jnaqqsu r-riskji tal-ħasil tal-flus, jekk jagħtu drittijiet ta’ residenza bi skambju għal investiment, billi:
  • jistabbilixxu proċess tal-ġestjoni tar-riskju, sorveljat minn awtorità nominata biex tidentifika, tikklassifika u tnaqqas ir-riskji;
  • japplikaw miżuri inklużi verifiki fuq profil u sors ta’ ġid ta’ applikant b’verifika kontra rekords eżistenti u rieżamijiet perjodiċi ta’ applikanti ta’ riskju għoli u medju;
  • jippubblikaw rapport annwali pubbliku dwar in-numru ta’ applikazzjonijiet, il-pajjiż ta’ oriġini, permessi ta' residenza mgħotija jew miċħuda u kull tibdil fir-riskji finanzjarji identifikati;
  • jinfurmaw lill-Kummissjoni sal-10 ta’ Lulju 2028 dwar il-miżuri kollha li ttieħdu;
• jitolbu lis-superviżuri li jivverifikaw li l-maniġment superjuri f’entitajiet marbuta bl-obbligu jkunu ta’ reputazzjoni tajba, jaġixxu b’onestà u integrità u jkunu mgħammra biex jagħmlu xogħolhom.

Valutazzjonijiet tar-riskju

Il-Kummissjoni:

• tassessja r-riskji ta’ ħasil tal-flus transkonfinali, ta’ finanzjament tat-terroriżmu u ta’ nuqqas ta’ implimentazzjoni u evażjoni ta’ sanzjonijiet finanzjarji fil-mira li jaffettwaw is-suq intern u li huma relatati ma’ attivitajiet transfruntiera;
• trid tagħmel rapport pubbliku dwar is-sejbiet tagħha sal-10 ta’ Lulju 2028 u taġġornah kull erba’ snin jew aktar frekwenti jekk ikun hemm bżonn.

L-Istati Membri:

• jwettqu valutazzjonijiet nazzjonali tar-riskju biex jidentifikaw, jassessjaw, jifhmu u jnaqqsu r-riskji ta’ ML/TF u n-nuqqas ta’ implimentazzjoni u evażjoni ta’ sanzjonijiet finanzjarji fil-mira;
• jżommu l-valutazzjonijiet aġġornati u jagħmlulhom rieżami kull erba’ snin;
• jinnominaw awtorità biex tikkoordina r-rispons tagħhom għar-riskji tal-ħasil tal-flus, finanzjament tat-terroriżmu u n-nuqqas ta’ implimentazzjoni u evażjoni ta’ sanzjonijiet finanzjarji fil-mira;
• jżommu statistika komprensiva dwar l-effettività tal-istruttura tal-AML/CFT.

Reġistri tas-sjieda benefiċjarja ċentrali

L-Istati Membri jassikuraw li:

• informazzjoni dwar reġistri ċentrali tas-sjieda benefiċjarja tkun adegwata, korretta u aġġornata, u li tinżamm f’reġistru nazzjonali ċentrali;
• ir-reġistri ċentrali tas-sjieda benefiċjarja jkunu interkonnessi permezz tal-Pjattaforma Ewropea Ċentrali;
• awtoritajiet nazzjonali kompetenti u l-Awtorità għall-Ħasil tal-flus u li Tiġġieled il-Finanzjament tat-Terroriżmu (AMLA) jrid ikollhom aċċess immedjat, mhux iffiltrat, dirett u bla ħlas għall-informazzjoni mingħajr ma javżaw lis-suġġett tat-tfittxija;
• individwi u organizzazzjonijiet kapaċi li jkunu jistgħu juru interess leġittimu, bħal ġurnalisti, korpi tas-soċjetà ċivili, akkademiċi u awtoritajiet varji, jkollhom aċċess għall-informazzjoni dwar, pereżempju, l-isem, in-nazzjonalità, il-pajjiż ta’ residenza, u n-natura u l-estent tal-interess benefiċjarju li jkollu s-sid;
• jkun hemm salvagwardji biex jirrestrinġu aċċess għall-informazzjoni personali fejn is-sid hu minuri jew f’riskju ta’ frodi, sekwestru ta’ persuna, rikatt, estorsjoni, fastidju, vjolenza jew intimidazzjoni.

Informazzjoni dwar pagament, bank, titoli trasferibbli u kontijiet tal-kriptoassi u kaxxi ta’ sikurezza għad-depożitu

L-Istati Membri jassikuraw li

• mekkaniżmi ċentralizzati awtomatizzati (reġistri ċentrali jew sistemi elettroniċi tal-ġbir ta' dejta) jkunu fil-post biex jidentifikaw id-detenturi ta’ kontijiet ta’ pagament, kontijiet ta’ bank identifikati minn numru internazzjonali tal-kont bankarju (IBAN) (inklużi IBANs virtwali), kontijiet tat-titoli trasferibbli, kontijiet tal-kriptoassi u kaxxi ta’ sikurezza għad-depożitu;
• l-interkonnessjoni tal-mekkaniżmi awtomatizzati ċentralizzati permezz tas-Sistema tal-Interkonnessjoni tar-Reġistri tal-Kont Bankarju li ser ikun żviluppat u operat mill-Kummissjoni;
• id-dettalji huma disponibbli kompletament għal FIUs, superviżuri tal-AML/CFT u AMLA.

Informazzjoni dwar proprjetà immobbli

L-Istati Membri:

• jwaqqfu punt singolu ta’ aċċess għal informazzjoni dwar is-sjieda ta’ proprjetà immobbli li l-awtoritajiet rilevanti jistgħu jaċċessaw direttament u bla ħlas.
• jassikuraw li l-informazzjoni jkollha d-dettalji minimi li ġejjin
  • proprjetà — informazzjoni katastali, lokazzjoni ġeografika, erja/daqs u tip ta’ proprjetà,
  • sjieda — isem tal-individwu, entità legali jew arranġament legali u prezz tax-xiri,
  • talbiet legali (“aggravji”) — ipoteki, restrizzjonijiet ġudizzjariji, drittijiet ta’ proprjetà jew garanziji oħra,
  • storja — sjieda, prezz u aggravji relatati,
  • dokument rilevanti.

Unitajiet tal-intelliġenza finanzjarja

Kull Stat Membru jwaqqaf FIU biex jipprevjeni, jikxef u effettivament jiġġieled il-ħasil tal-flus, ir-reati predikati tiegħu u l-finanzjament tat-terroriżmu. L-FIU:

• hu unità singola ċentrali responsabbli biex tirċievi u tanalizza rapporti dwar tranżazzjonijiet suspettużi mressqa minn entitajiet marbuta bl-obbligu;
• ixxerred ir-riżultati tal-analiżi tagħha lill-awtoritajiet rilevanti kompetenti meta tissusspetta ML/TF;
• taħtar uffiċċjal tad-drittijiet tal-individwu biex tassikura konformità mal-liġi;
• jkollha aċċess immedjat u dirett għal firxa ta’ informazzjoni finanzjarja, amminstrattiva u dwar infurzar tal-liġi;
• tirrispondi għal talbiet għal informazzjoni u tipprovdi dan b’mod spontanju lil superviżuri AML/CFT;
• tista’ taġixxi immedjatament biex twaqqaf jew iżżomm il-kunsens għal tranżazzjoni jew kont li tqis hu marbut ma’ ML/TF;
• tista’ tgħarraf lil entitajiet marbuta bl-obbligi biex jissorveljaw tranżazzjonijiet jew attivitajiet li jiġġestjonaw għal xi ħadd li jippreżenta riskju sinifikanti;
• tippreżenta rapport annwali li jkollu informazzjoni dwar ix-xogħol tagħha u fuq xejriet u tipoloġiji identifikati;
• tikkoopera ma’ FIUs oħra u twettaq analiżi konġunta ta’ tranżazzjonijiet u attivitajiet suspettużi.

Superviżjoni ta’ kontra l-ħasil tal-flus

Superviżuri nazzjonali:

• jassikuraw li entitajiet marbuta bl-obbligi jikkonformaw mal-obbligi li jirriżultaw mir-reġim AML/CFT tal-UE;
• jipprovdu informazzjoni dwar ML/TF (pereżempju l-valutazzjoni tar-riskju tal-Kummissjoni, valutazzjoni tar-riskju nazzjonali jew settorjali, linji gwida rilevanti u rakkomandazzjonijiet maħruġa minn AMLA) lill-entitajiet marbuta bl-obbligu taħt is-superviżjoni tagħhom;
• japplikaw approċċ bbażat fuq riskju għas-superviżjoni;
• jinfurmaw lill-FIU fil-pront dwar il-fatti jew sejbiet rilevanti kollha;
• jwaqqfu kulleġġi superviżorji dedikati AML/CFT meta grupp ta’ istituzzjonijiet ta’ kreditu jew finanzjarji joperaw f’tal-inqas żewġ Stati Membri jew istituzzjoni ta’ kreditu jew finanzjarja tkun waqqfet stabbilimenti ġo tal-inqas tliet Stati Membri.

L-Istati Membri jassikuraw li:

• penali jkunu imposti fuq entitajiet marbuta bl-obbligu għal ksur serju, ripetut jew sistematiku tal-liġi;
• superviżuri jistgħu japplikaw miżuri amministrattivi bħal rakkomandazzjonijiet, miżuri korrettivi speċifiċi u restrizzjonijiet tan-negozji appoġġjati minn pagamenti ta’ penali perjodiċi għal nuqqas ta’ konformità;
• dawk li jfasslu l-politika, FIUs, superviżuri, inklużi AMLA, u awtoritajiet rilevanti oħra jikkooperaw, speċjalment biex jiġġieldu ML/TF u biex jimplimentaw sanzjonijiet finanzjarji fil-mira.

AMLA, b’kooperazzjoni mal-Bank Ċentrali Ewropew, l-Uffiċċju tal-Prosekutur Pubbliku Ewropew, Europol (l-Aġenzija tal-Unjoni Ewropea għall-Kooperazzjoni fl-Infurzar tal-Liġi), Eurojust (l-Aġenzija tal-Unjoni Ewropea għall-Kooperazzjoni fil-Ġustizzja Kriminali) u l-awtoritajiet Ewropej superviżorji toħroġ linji gwida dwar kooperazzjoni u proċedura.

Dispożizzjonijiet finali

Il-Kummissjoni:

• għandha s-setgħa biex tadotta atti delegati għal perjodu indeterminat mid-9 ta’ Lulju 2024;
• tirrapporta lill-Parlament Ewropew u lill-Kunsill tal-Unjoni Ewropea sal-10 ta’ Lulju 2032, u kull tliet snin wara dan, dwar l-implimentazzjoni tad-direttiva.

Id-Direttiva temenda d-Direttiva (UE) 2019/1937 (ara s-sommarju) u temenda u tħassar id-Direttiva (UE) 2015/849 (ara s-sommarju) mill-10 ta’ Lulju 2027.