EUR-Lex Access to European Union law
This document is an excerpt from the EUR-Lex website
Document 32013R0093
Commission Regulation (EU) No 93/2013 of 1 February 2013 laying down detailed rules for the implementation of Council Regulation (EC) No 2494/95 concerning harmonised indices of consumer prices, as regards establishing owner-occupied housing price indices Text with EEA relevance
Regolament tal-Kummissjoni (UE) Nru 93/2013 tal- 1 ta’ Frar 2013 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 dwar l-indiċijiet armonizzati tal-prezzijiet għall-konsumatur, fir-rigward tal-iffissar ta’ indiċijiet tal-prezzijiet tal-abitazzjonijiet okkupati mis-sidien Test b’relevanza għaż-ŻEE
Regolament tal-Kummissjoni (UE) Nru 93/2013 tal- 1 ta’ Frar 2013 li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 dwar l-indiċijiet armonizzati tal-prezzijiet għall-konsumatur, fir-rigward tal-iffissar ta’ indiċijiet tal-prezzijiet tal-abitazzjonijiet okkupati mis-sidien Test b’relevanza għaż-ŻEE
ĠU L 33, 2.2.2013, p. 14–16
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV) Dan id-dokument ġie ppubblikat f’edizzjoni(jiet) speċjali
(HR)
No longer in force, Date of end of validity: 23/08/2020; Imħassar b' 32020R1148
Relation | Act | Comment | Subdivision concerned | From | To |
---|---|---|---|---|---|
Corrected by | 32013R0093R(01) | (HR) | |||
Repealed by | 32020R1148 | 24/08/2020 |
2.2.2013 |
MT |
Il-Ġurnal Uffiċjali tal-Unjoni Ewropea |
L 33/14 |
REGOLAMENT TAL-KUMMISSJONI (UE) Nru 93/2013
tal-1 ta’ Frar 2013
li jistabbilixxi regoli dettaljati għall-implimentazzjoni tar-Regolament tal-Kunsill (KE) Nru 2494/95 dwar l-indiċijiet armonizzati tal-prezzijiet għall-konsumatur, fir-rigward tal-iffissar ta’ indiċijiet tal-prezzijiet tal-abitazzjonijiet okkupati mis-sidien
(Test b’relevanza għaż-ŻEE)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament tal-Kunsill (KE) Nru 2494/95 tat-23 ta’ Ottubru 1995 dwar l-indiċijiet armonizzati tal-prezzijiet għall-konsumatur (1), u b’mod partikolari t-tielet paragrafu tal-Artikolu 4 u l-Artikolu 5(3) tiegħu,
Wara li kkunsidrat l-opinjoni tal-Bank Ċentrali Ewropew (2),
Billi:
(1) |
Ir-Regolament (KE) Nru 2494/95 jistabbilixxi l-produzzjoni tal-indiċijiet armonizzati tal-prezzijiet tal-konsum (HICP). |
(2) |
L-iffissar tal-indiċijiet tal-prezzijiet għad-djar u partikolarment għal abitazzjonijiet okkupati mis-sidien għandu jiġi esplorat sabiex jittejbu r-rilevanza u l-komparabbiltà tal-HICP. |
(3) |
Bl-għan li jiġu kkompilati l-indiċijiet tal-abitazzjonijiet okkupati mis-sidien, jeħtieġ li jiġu prodotti indiċijiet tal-prezzijiet tal-abitazzjonijiet. L-indiċijiet tal-prezzijiet tad-djar huma wkoll, fihom infushom, indikaturi importanti. |
(4) |
Il-gwida metodoloġika dwar il-kompilazzjoni tal-indiċijiet tal-prezzijiet tad-djar u tal-abitazzjonijiet okkupati mis-sidien hija meħtieġa biex jiġu żgurati riżultati affidabbli u komparabbli mill-Istati Membri kollha. |
(5) |
Il-miżuri stipulati f’dan ir-Regolament huma skont l-opinjoni tal-Kumitat tas-Sistema Statistika Ewropea (il-Kumitat tas-SSE). |
ADOTTAT DAN IR-REGOLAMENT:
Artikolu 1
Suġġett
Dan ir-Regolament jistabbilixxi l-indiċijiet tal-prezzijiet tal-abitazzjonijiet okkupati mis-sidien bl-għan li jittejbu r-rilevanza u l-komparabbiltà tal-indiċijiet armonizzati tal-prezzijiet tal-konsum (“HICP”).
Artikolu 2
Definizzjonijiet
Għall-finijiet ta’ dan ir-Regolament, għandhom japplikaw id-definizzjonijiet li ġejjin:
1. |
“indiċi tal-prezzijiet tal-abitazzjonijiet okkupati mis-sidien” tfisser indiċi li jkejjel it-tibdil fil-prezzijiet tat-tranżazzjoni tad-djar ġodda għas-settur tal-unitajiet domestiċi u prodotti u servizzi oħra li l-unitajiet domestiċi jiksbu fir-rwol tagħhom bħala sidien okkupanti; |
2. |
“indiċi tal-prezzijiet tad-djar” tfisser indiċi li jkejjel it-tibdil fil-prezzijiet tat-tranżazzjoni tad-djar mixtrija mill-unitajiet domestiċi. |
Artikolu 3
Kopertura
1. Il-kategoriji tan-nefqa li ġejjin għandhom ikunu koperti mill-indiċi tal-prezzijiet tal-abitazzjonijiet okkupati mis-sidien:
O.1. |
Infiq tal-abitazzjonijiet okkupati mis-sidien |
O.1.1. |
Akkwisti tad-djar |
O.1.1.1. |
Djar ġodda |
O.1.1.1.1. |
Xiri ta’ djar ġodda |
O.1.1.1.2. |
Djar mibnija mill-individwi stess u rinnovazzjonijiet kbar |
O.1.1.2. |
Djar eżistenti ġodda għall-unitajiet domestiċi |
O.1.1.3. |
Servizzi oħra relatati mal-akkwist tad-djar |
O.1.2. |
Sjieda tad-djar |
O.1.2.1. |
Manutenzjoni u tiswijiet kbar |
O.1.2.2. |
Assigurazzjoni marbuta mad-djar |
O.1.2.3. |
Servizzi oħra relatati mas-sjieda tad-djar |
2. Il-kategoriji tan-nefqa li ġejjin għandhom jiġu koperti fl-indiċi tal-prezzijiet tad-djar:
H.1. |
Xiri tad-djar |
H.1.1. |
Xiri ta’ djar ġodda |
H.1.2. |
Xiri ta’ djar eżistenti |
3. L-indiċi tal-prezzijiet tal-djar okkupati mis-sidien għandu jkun imsejjes fuq l-approċċ tal-“Akkwisti netti”, li jkejjel it-tibdil fil-prezzijiet reali mħallsa mill-konsumaturi għall-akkwist ta’ djar li huma ġodda għas-settur tal-unitajiet domestiċi kif ukoll it-tibdil fi spejjeż oħra marbuta mas-sjieda, u t-trasferiment tas-sjieda, tad-djar.
4. Kull kategorija tan-nefqa marbuta mal-abitazzjonijiet, kif definita fl-Artikolu 3(1), li l-ponderazzjoni tagħha tirrappreżenta mill-inqas wieħed minn kull mija tan-nefqa totali marbuta mal-abitazzjonijiet O.1, għandha tkun koperta. Kull kategorija tan-nefqa marbuta mal-abitazzjonijiet, kif definita fl-Artikolu 3(2), li l-ponderazzjoni tagħha tirrappreżenta mill-inqas wieħed minn kull mija tan-nefqa totali marbuta mal-abitazzjonijiet H.1, għandha tkun koperta.
Artikolu 4
Manwal metodoloġiku
1. Il-Kummissjoni (Eurostat), b’kooperazzjoni mill-qrib mal-Istati Membri, għandha tistabbilixxi manwal li jipprovdi qafas metodoloġiku għall-indiċijiet tal-prezzijiet tad-djar u tal-abitazzjonijiet okkupati mis-sidien prodotti skont dan ir-Regolament (minn hawn ‘il quddiem il-“manwal OOH-HPI”). Fejn ikun ġustifikat kif xieraq, il-Kummissjoni (Eurostat) għandha taġġorna l-manwal, skont l-arranġamenti proċedurali approvati mill-Kumitat tas-SSE.
2. Il-kriterji tal-kwalità msemmija fl-Artikolu 12(1) tar-Regolament (KE) Nru 223/2009 tal-Parlament Ewropew u tal-Kunsill (3), għandhom japplikaw għall-kompilazzjoni tal-indiċijiet tal-prezzijiet tad-djar u tal-abitazzjonijiet okkupati mis-sidien.
3. L-Istati Membri għandhom jipprovdu lill-Kummissjoni (Eurostat), fuq talba tagħha, bl-informazzjoni meħtieġa biex tivvaluta l-konformità tal-indiċijiet tad-djar u tal-abitazzjonijiet okkupati mis-sidien mad-dispożizzjonijiet ta’ dan ir-Regolament.
Artikolu 5
Rekwiżiti tad-dejta
1. L-Istati Membri għandhom jikkompilaw u jipprovdu lill-Kummissjoni (Eurostat) b’indiċijiet tal-prezzijiet għall-kategoriji stabbiliti fl-Artikolu 3 skont il-manwal OOH-HPI.
2. L-Istati Membri għandhom jipprovdu indiċijiet tal-prezzijiet trimestrali. Minbarra l-indiċijiet trimestrali, l-Istati Membri jistgħu jipprovdu wkoll indiċijiet mensili.
3. L-indiċijiet imsemmija fl-Artikolu 3(1) għandhom jiġu pprovduti mit-tielet kwart tal-2014 relatati mat-tieni kwart tal-2014. L-indiċijiet imsemmija fl-Artikolu 3(2) għandhom jiġu pprovduti mit-tielet kwart tal-2012 relatati mat-tieni kwart tal-2012.
4. L-Istati Membri għandhom jipprovdu lill-Kummissjoni (Eurostat) bl-indiċijiet trimestrali fi skadenza li ma għandhiex tkun aktar minn 85 jum minn tmiem it-trimestru li miegħu huma relatati l-indiċijiet. Dawk l-Istati Membri li jagħżlu li jipprovdu wkoll indiċijiet mensili, għandhom jipprovduhom fi żmien 30 jum minn tmiem ix-xahar li miegħu huma relatati l-indiċijiet.
5. Kull sena, l-Istati Membri għandhom jikkompilaw u jipprovdu lill-Kummissjoni (Eurostat) b’sett wieħed ta’ ponderazzjonijiet tan-nefqa għall-indiċijiet tal-prezzijiet tal-abitazzjonijiet okkupati mis-sidien u sett wieħed ta’ ponderazzjonijiet tan-nefqa għall-indiċijiet tal-prezzijiet tad-djar, kif definiti fil-manwal OOH-HPI u skont ir-Regolament tal-Kummissjoni (UE) Nru 1114/2010 (4).
Il-ponderazzjonijiet għall-indiċijiet trimestrali għandhom jiġu pprovduti mhux aktar tard mill-15 ta’ Ġunju tas-sena li tiġi wara s-sena li magħha huma relatati l-ponderazzjonijiet.
L-Istati Membri li jipprovdu l-indiċijiet mensili għandhom jipprovdu l-ponderazzjonijiet korrispondenti mhux aktar tard mill-20 ta’ Frar tas-sena li tiġi wara s-sena li magħha huma relatati l-ponderazzjonijiet.
6. L-Istati Membri għandhom jikkompilaw u jipprovdu lill-Kummissjoni (Eurostat) bi stima tad-dejta retrospettiva li tibda bl-indiċi għall-ewwel kwart tal-2010 għall-indiċijiet imsemmija fl-Artikolu 3(1), mhux aktar tard mill-iskadenzi msemmija fl-Artikoli 5(3) u (4). L-Istati Membri għandhom jikkompilaw u jipprovdu lill-Kummissjoni (Eurostat) bi stima tad-dejta retrospettiva li tibda bl-indiċi għall-ewwel kwart tal-2008 għall-indiċijiet imsemmija fl-Artikolu 3(2), mhux aktar tard mill-iskadenzi msemmija fl-Artikoli 5(3) u (4).
7. L-Istati Membri għandhom jipprovdu d-dejta mitluba minn dan ir-Regolament u l-metadejta assoċjata skont standard ta’ skambju speċifikat mill-Kummissjoni (Eurostat). Id-dejta u l-metadejta għandhom jiġu pprovduti lill-Kummissjoni (Eurostat) permezz tas-servizzi ta’ Punt ta’ Kuntatt Waħdieni jew b’tali mod li l-Kummissjoni tkun tista’ taċċessahom permezz tas-servizzi ta’ Punt ta’ Kuntatt Waħdieni.
Artikolu 6
Miżuri tranżitorji
1. Sena u tliet snin rispettivament wara d-data tad-dħul fis-seħħ ta’ dan ir-Regolament, l-Istati Membri għandhom jipprovdu lill-Kummissjoni (Eurostat) bir-rapporti dwar il-kwalità tad-dejta, fuq il-bażi tal-istandards definiti fis-Sistema Statistika Ewropea u fil-manwal OOH-HPI.
2. Il-Kummissjoni (Eurostat) għandha, fi żmien ħames snin mid-data tad-dħul fis-seħħ ta’ dan ir-Regolament, tħejji rapport dwar l-indiċijiet stabbiliti skont dan ir-Regolament u b’mod partikolari dwar il-grad ta’ konformità mar-Regolament tal-Kummissjoni (KE) Nru 1749/96 (5) u mar-Regolament (UE) Nru 1114/2010. Ir-rapport għandu jindirizza wkoll l-adegwatezza tal-indiċijiet tal-abitazzjonijiet okkupati mis-sidien għall-integrazzjoni fil-kopertura tal-HICP.
Artikolu 7
Dħul fis-seħħ
Dan ir-Regolament għandu jidħol fis-seħħ fl-20 jum wara l-pubblikazzjoni tiegħu f’Il-Ġurnal Uffiċjali tal-Unjoni Ewropea.
Dan ir-Regolament għandu jibda japplika mill-1 ta’ Settembru 2012. Dan ir-Regolament għandu jorbot fl-intier tiegħu u japplika direttament fl-Istati Membri skont it-Trattati.
Magħmul fi Brussell, l-1 ta’ Frar 2013.
Għall-Kummissjoni
Il-President
José Manuel BARROSO
(1) ĠU L 257, 27.10.1995, p. 1.
(2) Opinjoni mogħtija fil-19.10.2012 (L-opinjoni għandha mhijiex ippubblikata fil-Ġurnal Uffiċjali).
(3) ĠU L 87, 31.3.2009, p. 164.
(4) ĠU L 316, 2.12.2010, p. 4.
(5) ĠU L 229, 10.9.1996, p. 3.