Koperazzjoni xjentifika u teknoloġika mal-Ġordan

 

SOMMARJU TA’:

Il-Ftehim bejn l-UE u l-Ġordan dwar koperazzjoni xjentifika u teknoloġika

Id-Deċiżjoni 2011/348/KE dwar l-iffirmar u l-applikazzjoni provviżorja tal-ftehim bejn l-Unjoni Ewropea (UE) u l-Ġordan dwar koperazzjoni xjentifika u teknoloġika

Id-Deċiżjoni 2011/343/UE dwar il-konklużjoni tal-ftehim bejn l-l-UE u l-Ġordan dwar kooperazzjoni xjentifika u teknoloġika

Protokoll għall-Ftehim Ewro-Mediterranju li jistabbilixxi assoċjazzjoni bejn l-UE u l-Istati Membri tagħha, fuq parti waħda u l-Ġordan, fuq il-parti l-oħra, dwar ftehim qafas bejn l-UE u l-Ġordan dwar il-prinċipji ġenerali għall-parteċipazzjoni tal-Ġordan fi programmi tal-UE

X’INHU L-GĦAN TAL-FTEHIM, ID-DEĊIŻJONIJIET U L-PROTOKOLL?

• Il-ftehim jistabbilixxi qafas formali u regoli ġenerali għall-koperazzjoni fir-riċerka xjentifika u teknoloġika bejn il-Komunità Ewropea, issa l-Unjoni Ewropea (UE), u l-Ġordan, bil-għan li jinkoraġġixxi, jiżviluppa u jiffaċilita attivitajiet ta’ kooperazzjoni fl-oqsma ta’ interess komuni tax-xjenza u tat-teknoloġija.
• Deċiżjoni tal-Kunsill 2011/348/KE tawtorizza l-iffirmar u l-applikazzjoni provviżorja tal-ftehim bejn l-UE u l-Ġordan dwar koperazzjoni xjentifika u teknoloġika
• Id-Deċiżjoni 2011/343/EU timmarka l-konklużjoni tal-ftehim.
• Fid-dawl tal-appoġġ għall-approċċ tal-Kummissjoni Ewropea li jippermetti lill-pajjiżi sieħba tal-politika Ewropea tal-viċinat li jipparteċipaw fl-aġenziji tal-UE u fi programm fuq il-merti tagħhom, u fejn huma awtorizzati mill-bażijiet legali rilevanti, il-protokoll jistabbilixxi termini u kundizzjonijiet speċifiċi, inklużi l-kontribuzzjoni finanzjarja u proċeduri ta’ rapportar u ta’ evalwazzjoni, applikabbli għall-parteċipazzjoni tal-Ġordan f’kull programm partikolari tal-UE.

PUNTI EWLENIN

Il-partijiet jaqblu li jinkoraġġixxu, jiżviluppaw u jiffaċilitaw attivitajiet xjentifiċi u teknoloġiċi kooperattivi bejn l-UE u l-Ġordan f’oqsma ta’ interess komuni. L-attivitajiet imwettqa skont il-ftehim huma bbażati fuq sett ta’ prinċipji:

• il-promozzjoni ta’ soċjetà bbażata fuq l-għarfien għall-benefiċċju tal-iżvilupp ekonomiku u soċjali tal-partijiet;
• benefiċċju reċiproku bbażat fuq bilanċ ġenerali ta’ vantaġġi;
• aċċess reċiproku għall-attivitajiet ta’ programmi u proġetti ta’ riċerka mwettqa minn kull parti;
• skambju f’waqtu ta’ informazzjoni;
• skambju u protezzjoni tad-drittijiet tal-propjetà intellettwali;
• parteċipazzjoni u finanzjament f’konformità mal-liġijiet rilevanti u r-regolamenti tal-partijiet.

Kooperazzjoni

Entitajiet ġuridiċi* stabbiliti fil-Ġordan jistgħu jieħdu sehem f’attiitajiet kooperattivi indiretti taħt il-programm qafas għar-riċerka u l-innovazzjoni tal-UE (Orizzont Ewropa), b’konformità mar-regoli tiegħu kif ukoll mat-termini u l-kundizzjonijiet tiegħu.

L-entitajiet legali stabbiliti fl-UE jistgħu jipparteċipaw fil-proġetti ta’ riċerka tal-Ġordan f’oqsma ekwivalenti għal dawk tal-programm qafas skont l-istess kundizzjonijiet bħal dawk applikabbli għall-entitajiet ġuridiċi tal-Ġordan.

Il-kooperazzjoni hija soġġetta għat-termini u kundizzjonijiet stabbiliti minn jew imsemmija fl-Anness I tal-ftehim. Prinċipji dwar l-allokazzjoni tad-drittijiet tal-proprjetà intellettwali huma stabbiliti fl-Anness II.

L-attivitajiet ta’ koperazzjoni jistgħu jieħdu, pereżempju, il-forom li ġejjin:

• djalogu politiku regolari fil-qasam tar-riċerka;
• skambji ta’ informazzjoni xjentifika u teknoloġika;
• skambji ta’ riċerkaturi, inġiniera u tekniċi;
• skambji ta’ tagħmir, materjali u servizzi ta’ ttestjar;
• taħriġ fl-iżvilupp tar-riċerka u tat-teknoloġija;
• parteċipazzjoni minn esperti taż-żewġ partijiet f’seminars, simpożji u workshops tematiċi;
• aċċess reċiproku għal informazzjoni xjentifika u teknika rilevanti għal din il-kooperazzjoni; u
• kwalunkwe arranġament ieħor adottat mill-Kumitat Konġunt għall-Kooperazzjoni Xjentifika u Teknoloġika bejn l-UE u l-Ġordan, li jamministra l-implimentazzjoni tal-ftehim.

Barra minn hekk, l-awtoritajiet tal-Ġordan u l-Kummissjoni Ewropea jaqblu li jikkondividu informazzjoni dwar programmi attwali u opportunitajiet ġodda ta’ koperazzjoni.

L-UE u l-Ġordan jaqblu li jippermettu l-moviment liberu u r-residenza libera tal-ħaddiema riċerkaturi fit-territorji rispettivi tagħhom u l-moviment tal-merkanzija maħsuba għall-użu f’dawn l-attivitajiet, skont il-leġiżlazzjoni applikabbli tagħhom.

Skont il-protokoll, il-Ġordan irid jikkontribwixxi finanzjarment għall-baġit ġenerali tal-UE, li jikkorrispondi għall-programmi speċifiċi li tipparteċipa fihom l-Ġordan. Memorandum ta’ qbil bejn il-Kummissjoni u l-awtoritajiet tal-Ġordan jistabbilixxi t-termini u l-kundizzjonijiet speċifiċi, b’mod partikolari il-kontribuzzjoni finanzjarja u l-proċeduri ta’ rapportar u evalwazzjoni, fir-rigward tal-parteċipazzjoni tal-Ġordan f’kull programm.

Il-Ġordan jipparteċipa fl-inizjattiva ta’ Sħubija fir-Riċerka u l-Innovazzjoni fiż-Żona tal-Mediterran (PRIMA), imwaqqfa taħt id-Deċiżjoni (UE) 2017/1324 (ara s-sommarju). Il-ħsieb wara PRIMA huwa li jinġabru flimkien l-għarfien u r-riżorsi finanzjarji tal-UE u tal-pajjiżi parteċipanti biex jinbnew il-kapaċitajiet ta’ riċerka u innovazzjoni u li jiġu żviluppati l-għarfien u soluzzjonijiet innovattivi konġunti għall-ilma u għas-sistemi agroalimentari fiż-żona tal-Mediterran. L-UE se tikkontribwixxi sa massimu ta’ €220 miljun minn Orizzont 2020 lill-PRIMA.

DATA TAD-DĦUL FIS-SEĦĦ

Il-ftehim daħal fis-seħħ fid-29 ta’ Marzu 2011 u kien applikabbli b’mod provviżorju mal-iffirmar tiegħu fit-30 ta’ Novembru 2009.

SFOND

Il-Ġordan huwa wieħed mill-pajjiżi koperti mill-politika Ewropea tal-viċinat.

Fl-2002, daħlal fis-seħħ il-Ftehim Ewro-Mediterranju (ara s-sommarju) li stabbilixxa assoċjazzjoni bejn il-Komunità Ewropea u l-Istati Membri tagħhom, minn naħa, u l-Ġordan, min-naħa l-oħra.

Għal aktar informazzjoni, ara:

• L-Unjoni Ewropea u l-Ġordan (Servizz Ewropew għall-Azzjoni Esterna).
• Il-politika Ewropea tal-Viċinat — il-Ġordan (Il-Kummissjoni Ewropea).

Għal aktar informazzjoni dwar il-kooperazzjoni tar-riċerka u l-innovazzjoni mal-Ġordan, ara:

• Koperazzjoni internazzjonili fir-R&Ż mal-Ġordan (il-Kummissjoni Ewropea).

TERMINI EWLENIN

DOKUMENTI EWLENIN

Il-Ftehim bejn il-Komunità Ewropea u r-Renju Ħaxemita tal-Ġordan dwar Koperazzjoni Xjentifika u Teknoloġika (ĠU L 159, 17.6.2011, pp. 108–114).

Id-Deċiżjoni tal-Kunsill 2011/343/UE tad-9 ta’ Marzu 2011 dwar il-konklużjoni tal-Ftehim bejn il-Komunità Ewropea u r-Renju Ħaxemita tal-Ġordan dwar Koperazzjoni Xjentifika u Teknoloġika (ĠU L 159, 17.6.2011, p. 1).

Id-Deċiżjoni tal-Kunsill 2011/348/KE tal-10 ta’ Novembru 2009 dwar l-iffirmar, f’isem il-Komunità, u l-applikazzjoni provviżorja tal-Ftehim bejn il-Komunità Ewropea u r-Renju Ħaxemita tal-Ġordan dwar Koperazzjoni Xjentifika u Teknoloġika (ĠU L 159, 17.6.2011, p. 107).

Protokoll għall-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, minn naħa waħda, u r-Renju Ħaxemita tal-Ġordan, min-naħa l-oħra, fir-rigward ta’ Ftehim Qafas bejn l-Unjoni Ewropea u r-Renju Ħaxemita tal-Ġordan dwar il-prinċipji ġenerali għall-parteċipazzjoni tar-Renju Ħaxemita tal-Ġordan fil-programmi tal-Unjoni (ĠU L 117, 27.4.2013, pp. 2–5).

DOKUMENTI RELATATI

Id-Deċiżjoni (UE) 2017/1324 tal-Parlament Ewropew u tal-Kunsill tal-4 ta’ Lulju 2017 dwar il-parteċipazzjoni tal-Unjoni fi Programm Konġunt ta’ Riċerka u Innovazzjoni fiż-Żona tal-Mediterran (PRIMA) li pparteċipaw fiha b’mod konġunt diversi Stati Membri (ĠU L 185, 18.7.2017, pp. 1–15).

Informazzjoni dwar id-dħul fis-seħħ tal-Ftehim bejn il-Komunità Ewropea u r-Renju Ħaxemita tal-Ġordan dwar koperazzjoni xjentifika u teknoloġika (ĠU L 116, 28.4.2012, p. 1).

Il-Ftehim Ewro-Mediterranju li jistabbilixxi Assoċjazzjoni bejn il-Komunitajiet Ewropej u l-Istati Membri tagħhom, min-naħa l-waħda, u r-Renju Ħaxemita tal-Ġordan, min-naħa l-oħra — Il-Protokoll 1 dwar l-arranġamenti applikabbli għall-importazzjoni fil-Komunità ta’ prodotti agrikoli li joriġinaw mill-Ġordan — Il-Protokoll 2 dwar l-arranġamenti applikabbli għall-importazzjoni fil-Ġordan ta’ prodotti agrikoli li joriġinaw mill-Komunità — Il-Protokoll 3 dwar id-definizzjoni tal-kunċett ta’ “prodotti oriġinarji” u metodi ta’ kooperazzjoni amministrattiva — Il-Protokoll 4 dwar l-assistenza reċiproka bejn l-awtoritajiet amministrattivi f’materji doganali — Dikjarazzjonijiet Konġunti — Att Finali (ĠU L 129, 15.5.2002, pp. 3–176).

l-aħħar aġġornament 07.06.2024