This document is an excerpt from the EUR-Lex website
Document 52021XC1230(02)
Communication from the Commission Criteria for the analysis of the compatibility with the internal market of State aid to promote the execution of important projects of common European interest 2021/C 528/02
Komunikazzjoni tal-Kummissjoni Kriterji għall-analiżi tal-kompatibbiltà mas-suq intern tal-għajnuna mill-Istat għall-promozzjoni tal-eżekuzzjoni ta’ proġetti importanti ta’ interess Ewropew komuni 2021/C 528/02
Komunikazzjoni tal-Kummissjoni Kriterji għall-analiżi tal-kompatibbiltà mas-suq intern tal-għajnuna mill-Istat għall-promozzjoni tal-eżekuzzjoni ta’ proġetti importanti ta’ interess Ewropew komuni 2021/C 528/02
C/2021/8481
ĠU C 528, 30.12.2021, p. 10–18
(BG, ES, CS, DA, DE, ET, EL, EN, FR, HR, IT, LV, LT, HU, MT, NL, PL, PT, RO, SK, SL, FI, SV)
30.12.2021 |
MT |
Il-Ġurnal Uffiċjali tal-Unjoni Ewropea |
C 528/10 |
KOMUNIKAZZJONI TAL-KUMMISSJONI
Kriterji għall-analiżi tal-kompatibbiltà mas-suq intern tal-għajnuna mill-Istat għall-promozzjoni tal-eżekuzzjoni ta’ proġetti importanti ta’ interess Ewropew komuni
(2021/C 528/02)
1. INTRODUZZJONI
1. |
Din il-Komunikazzjoni tipprovdi gwida dwar il-valutazzjoni tal-finanzjament pubbliku ta’ proġetti importanti ta’ interess Ewropew komuni (important projects of common European interest, IPCEIs) skont ir-regoli tal-Unjoni dwar l-għajnuna mill-Istat. |
2. |
L-IPCEIs jistgħu jagħtu kontribut importanti ħafna għat-tkabbir ekonomiku sostenibbli, għall-impjiegi, għall-kompetittività u għar-reżiljenza tal-industrija u tal-ekonomija fl-Unjoni u jsaħħu l-awtonomija strateġika miftuħa tagħha, billi jippermettu l-innovazzjoni rivoluzzjonarja u l-proġetti infrastrutturali permezz ta’ kooperazzjoni transfruntiera u b’effetti kollaterali pożittivi fuq is-suq intern u s-soċjetà kollha kemm hi. |
3. |
L-IPCEIs jagħmluha possibbli li l-għarfien, l-għarfien espert, ir-riżorsi finanzjarji u l-atturi ekonomiċi minn madwar l-Unjoni jitlaqqgħu biex jingħelbu l-fallimenti tas-suq jew in-nuqqasijiet sistemiċi importanti jew l-isfidi tas-soċjetà li ma jkunux jistgħu jingħelbu b’mod ieħor. Huma maħsuba biex ilaqqgħu s-settur privat u dak pubbliku biex iwettqu proġetti fuq skala kbira li jipprovdu benefiċċju sinifikanti lill-Unjoni u liċ-ċittadini tagħha. |
4. |
L-IPCEIs jistgħu jirfdu l-politiki u l-azzjonijiet kollha li għandhom l-għan li jilħqu għanijiet Ewropej komuni, b’mod partikolari l-Patt Ekoloġiku Ewropew (1), l-Istrateġija Diġitali (2) u d-Deċennju Diġitali (3), l-Istrateġija Industrijali l-Ġdida għall-Ewropa (4) u l-aġġornament tagħha (5), l-Istrateġija Ewropea għad-Data (6) u Next Generation EU (7). L-IPCEIs jistgħu jikkontribwixxu wkoll għal irkupru sostenibbli wara disturbi ekonomiċi serji bħal dawk ikkawżati mill-pandemija tal-COVID-19 u jappoġġaw l-isforzi biex tissaħħaħ ir-reżiljenza soċjali u ekonomika tal-Unjoni. |
5. |
Filwaqt li jitqiesu l-aġġornament tal-Istrateġija Industrijali l-Ġdida kif ukoll l-Istrateġija għal Intrapriżi Żgħar u ta’ Daqs Medju (8) (Small and Medium-sized Enterprises, SMEs), huwa importanti li l-SMEs u n-negozji l-ġodda jkunu jistgħu jipparteċipaw fl-IPCEIs u jibbenefikaw minnhom. Fil-valutazzjoni tagħha, il-Kummissjoni se tqis kwalunkwe ċirkostanza li tindika li huwa anqas probabbli li l-għajnuna notifikata tfixkel il-kompetizzjoni bla bżonn, pereżempju minħabba l-ammont tagħha. |
6. |
L-introduzzjoni tal-IPCEIs spiss titlob parteċipazzjoni sinifikanti mill-awtoritajiet pubbliċi kull meta s-suq ma jiffinanzjax proġetti bħal dawn. Din il-Komunikazzjoni tistabbilixxi r-regoli li japplikaw fejn il-finanzjament pubbliku ta’ proġetti bħal dawn jikkostitwixxi l-għajnuna mill-Istat, sabiex l-għajnuna mill-Istat għall-IPCEIs titqies kompatibbli mas-suq intern. B’mod partikolari, ir-regoli għandhom l-għan li jiżguraw li għajnuna bħal din ma taffettwax b’mod negattiv wisq il-kundizzjonijiet tal-kummerċ bejn l-Istati Membri, u li jillimitaw l-effetti ta’ tali għajnuna fuq il-kummerċ u l-kompetizzjoni għall-minimu neċessarju. |
7. |
L-Artikolu 107(3)(b) tat-Trattat dwar il-Funzjonament tal-Unjoni Ewropea jipprevedi li l-għajnuna maħsuba sabiex tippromwovi l-eżekuzzjoni ta’ proġetti importanti ta’ interess Ewropew komuni tista’ titqies kompatibbli mas-suq intern. Għaldaqstant, din il-Komunikazzjoni tistabbilixxi gwida dwar il-kriterji li se tapplika l-Kummissjoni għall-valutazzjoni tal-għajnuna mill-Istat li tingħata biex tippromwovi l-eżekuzzjoni tal-IPCEIs. L-ewwel, hija tiddefinixxi l-kamp ta’ applikazzjoni tagħha, u mbagħad tipprovdi lista ta’ kriterji li se tuża l-Kummissjoni biex tivvaluta n-natura u l-importanza tal-IPCEIs għall-finijiet tal-applikazzjoni tal-Artikolu 107(3)(b) tat-Trattat. Imbagħad, hija tispjega kif il-Kummissjoni se tivvaluta l-kompatibbiltà tal-finanzjament pubbliku tal-IPCEIs mar-regoli dwar l-għajnuna mill-Istat. |
8. |
Din il-Komunikazzjoni ma teskludix il-possibbiltà li l-għajnuna li tippromwovi l-eżekuzzjoni ta’ IPCEIs jistgħu jinstabu wkoll li jkunu kompatibbli mas-suq intern abbażi ta’ dispożizzjonijiet oħrajn tat-Trattat, b’mod partikolari l-Artikolu 107(3)(c) tat-Trattat. Madankollu, jista’ jkun li dawk id-dispożizzjonijiet tat-Trattat ma jindirizzawx bis-sħiħ ir-rilevanza, l-ispeċifiċitajiet u l-karatteristiċi tal-IPCEIs. Dawn jistgħu jeħtieġu regoli speċifiċi ta’ eliġibbiltà u ta’ kompatibbiltà kif ukoll dawk proċedurali, kif stabbilit f’din il-Komunikazzjoni. |
2. KAMP TA’ APPLIKAZZJONI
9. |
Il-Kummissjoni se tapplika l-prinċipji stabbiliti f’din il-Komunikazzjoni għall-IPCEIs fis-setturi kollha tal-attività ekonomika. |
10. |
Dawk il-prinċipji ma japplikawx għal:
|
3. KRITERJI TA’ ELIĠIBBILTÀ
11. |
Hija u tiddetermina jekk proġett jaqax fil-kamp ta’ applikazzjoni tal-Artikolu 107(3)(b) tat-Trattat jew le, il-Kummissjoni se tapplika l-kriterji stabbiliti fit-taqsimiet 3.1, 3.2 u 3.3 ta’ din il-Komunikazzjoni. |
3.1. Definizzjoni ta’ proġett
12. |
Il-proposta għal għajnuna trid tikkonċerna proġett uniku, li jkun iddefinit b’mod ċar fir-rigward tal-għanijiet tiegħu kif ukoll it-termini tal-implimentazzjoni tiegħu, inkluż il-parteċipanti u l-finanzjament tiegħu (12). |
13. |
Il-Kummissjoni tista’ wkoll tqis “proġett integrat”, jiġifieri grupp ta’ proġetti uniċi inkorporati fi struttura, pjan direzzjonali jew programm komuni, bl-istess għan u bbażati fuq approċċ sistemiku koerenti, bħala wieħed eliġibbli. Il-komponenti individwali tal-proġett integrat jistgħu jirrelataw ma’ livelli separati tal-katina ta’ provvista, iżda dawn iridu jkunu kumplimentari u jżidu l-valur b’mod sinifikanti fil-kontribut tagħhom biex jintlaħaq l-għan importanti Ewropew (13). |
3.2. Interess komuni Ewropew
3.2.1. Kriterji kumulattivi ġenerali
14. |
Il-proġett irid jirrappreżenta kontribut importanti konkret, ċar u identifikabbli għall-għanijiet jew l-istrateġiji tal-Unjoni u jrid ikollu impatt sinifikanti fuq it-tkabbir sostenibbli, pereżempju billi jkun ta’ importanza ewlenija għall-Patt Ekoloġiku Ewropew, l-Istrateġija Diġitali, id-Deċennju Diġitali u l-Istrateġija Ewropea għad-Data, l-Istrateġija Industrijali l-Ġdida għall-Ewropa u l-aġġornament tagħha, Next Generation EU, l-Unjoni Ewropea tas-Saħħa (14), iż-Żona Ewropea tar-Riċerka l-ġdida għar-riċerka u l-innovazzjoni (15), il-Pjan ta’ Azzjoni l-ġdid għal Ekonomija Ċirkolari (16), jew l-għan tal-UE biex issir newtrali għall-klima sal-2050, fost l-oħrajn. |
15. |
Il-proġett irid juri li huwa mfassal biex jegħleb fallimenti tas-suq jew nuqqasijiet sistemiċi importanti, li jipprevjenu li l-proġett jitwettaq bl-istess mod fin-nuqqas tal-għajnuna, jew sfidi tas-soċjetà, li kieku ma jiġux indirizzati jew rimedjati sew b’mod ieħor. |
16. |
Sakemm numru iżgħar ma jkunx iġġustifikat min-natura tal-proġett (17), il-proġett normalment irid jinvolvi mill-inqas erba’ Stati Membri u l-benefiċċji tiegħu ma jridux ikunu limitati għall-Istati Membri li jiffinanzjaw, iżda jestendu għal parti usa’ tal-Unjoni. Il-benefiċċji tal-proġett iridu jkunu definiti b’mod ċar, konkret u identifikabbli (18). |
17. |
L-Istati Membri kollha jridu jingħataw opportunità ġenwina biex jipparteċipaw fi proġett emerġenti. L-Istati Membri notifikanti jridu juru li l-Istati Membri kollha kienu infurmati bil-possibbiltà li jitfaċċa proġett — pereżempju permezz ta’ kuntatti, alleanzi, laqgħat, jew avvenimenti ta’ tlaqqigħ, li jinvolvu wkoll l-SMEs u n-negozji l-ġodda — u li ngħataw l-opportunità li jipparteċipaw. |
18. |
Il-benefiċċji tal-proġett ma jridux ikunu limitati għall-impriżi jew għas-settur ikkonċernat, iżda jridu jkunu ta’ rilevanza u applikazzjoni usa’ għall-ekonomija jew għas-soċjetà fl-Unjoni permezz ta’ effetti kollaterali pożittivi (bħal effetti sistemiċi fuq diversi livelli tal-katina tal-valur, jew fuq is-swieq upstream jew downstream, jew użi alternattivi f’setturi oħrajn jew bidla modali) li jkunu definiti b’mod ċar, konkret u identifikabbli. |
19. |
Il-proġett irid jinvolvi kofinanzjament importanti mill-benefiċjarju (19). |
20. |
L-Istati Membri jridu jipprovdu evidenza dwar jekk il-proġett jikkonformax mal-prinċipju “la tagħmilx ħsara sinifikanti” skont it-tifsira tal-Artikolu 17 tar-Regolament (UE) 2020/852, jew ma’ metodoloġiji komparabbli oħra (20). Fl-ibbilanċjar globali tal-effetti pożittivi tal-għajnuna kontra l-effetti negattivi tagħha fuq il-kompetizzjoni u l-kummerċ, il-Kummissjoni se tqis il-konformità ma’ dan il-prinċipju bħala fattur importanti fil-valutazzjoni tagħha. B’mod ġenerali, l-investimenti li jagħmlu ħsara sinifikanti lill-għanijiet ambjentali skont it-tifsira tal-Artikolu 17 tar-Regolament (UE) 2020/852 x’aktarx ma jkollhomx biżżejjed effetti pożittivi biex jissuperaw l-effetti negattivi tagħhom fuq il-kompetizzjoni u l-kummerċ. F’kull każ, l-effetti pożittivi ta’ proġett fl-indirizzar ta’ fallimenti tas-suq jew nuqqasijiet sistemiċi importanti, jew sfidi tas-soċjetà li kieku ma setgħux jiġu indirizzati, huma soġġetti għal valutazzjoni individwalizzata fil-każijiet kollha. |
3.2.2. Indikaturi pożittivi ġenerali
21. |
Minbarra l-kriterji kumulattivi fit-Taqsima 3.2.1, il-Kummissjoni se tieħu nota pożittiva ta’ dawn l-elementi li ssuġġerew l-Istati Membri:
|
3.2.3. Kriterji speċifiċi
22. |
Il-proġetti ta’ Riċerka, Żvilupp u Innovazzjoni (“RŻI”) jridu jkunu ta’ natura innovattiva maġġuri jew jikkostitwixxu valur miżjud importanti f’termini ta’ RŻI fid-dawl tal-ogħla livell ta’ żvilupp tekniku fis-settur ikkonċernat (23). |
23. |
Il-proġetti li jinkludu l-ewwel użu industrijali jridu jippermettu l-iżvilupp ta’ prodott jew servizz ġdid b’kontenut għoli ta’ riċerka u innovazzjoni jew l-użu ta’ proċess ta’ produzzjoni fundamentalment innovattiv. Aġġornamenti regolari mingħajr dimensjoni innovattiva ta’ faċilitajiet eżistenti u l-iżvilupp ta’ verżjonijiet aktar ġodda ta’ prodotti eżistenti ma jikkwalifikawx bħala l-ewwel użu industrijali. |
24. |
Għall-iskop ta’ din il-Komunikazzjoni, l-ewwel użu industrijali jirreferi għat-titjib ta’ faċilitajiet pilota, ta’ impjanti ta’ dimostrazzjoni jew tat-tagħmir u l-faċilitajiet li huma l-ewwel mit-tip tagħhom u li jkopru l-passi kollha wara l-linja pilota, inkluż il-fażi tal-ittestjar u ż-żieda tal-produzzjoni tal-lott, iżda mhux il-produzzjoni tal-massa jew l-attivitajiet kummerċjali (24). It-tmiem tal-ewwel użu industrijali huwa ddeterminat billi, fost oħrajn, jitqiesu l-indikaturi tal-prestazzjoni rilevanti li huma relatati mar-RŻI u li jindikaw il-kapaċità li tibda l-produzzjoni tal-massa. L-ewwel attivitajiet ta’ użu industrijali jistgħu jiġu ffinanzjati bl-għajnuna mill-Istat sakemm l-ewwel użu industrijali jsegwi attività tar-RŻI, u fih innifsu jinkorpora komponent importanti tar-RŻI li jikkostitwixxi element integrali u neċessarju għall-implimentazzjoni b’suċċess tal-proġett. L-ewwel użu industrijali ma għandux għalfejn jitwettaq mill-istess entità li tkun wettqet l-attività tar-RŻI, dment li dik l-entità takkwista d-drittijiet biex tuża r-riżultati li jkunu nkisbu mill-attività tar-RŻI preċedenti, u li l-attività tar-RŻI u l-ewwel użu industrijali jkunu t-tnejn deskritti fil-proġett. |
25. |
Il-proġetti ta’ infrastruttura fis-setturi ambjentali, tal-enerġija, tat-trasport, tas-saħħa jew diġitali, sa fejn mhumiex koperti mill-punti 22 u 23, iridu jkunu ta’ importanza kbira għall-istrateġiji ambjentali, klimatiċi, tal-enerġija (inkluż is-sigurtà tal-provvista tal-enerġija), tat-trasport, tas-saħħa, industrijali jew diġitali tal-Unjoni jew jikkontribwixxu b’mod sinifikanti għas-suq intern, inkluż, iżda mhux limitat għal dawk is-setturi speċifiċi, u jistgħu jiġu appoġġati għall-perjodu sakemm isiru totalment operazzjonali wara li jinbnew. |
3.3. L-importanza tal-proġett
26. |
Sabiex jikkwalifika bħala IPCEI, proġett irid ikun importanti kemm fil-kwantità kif ukoll fil-kwalità. Jenħtieġ li l-proġett ikun jew ta’ daqs jew ta’ kamp ta’ applikazzjoni partikolarment kbir, jew jimplika livell ta’ riskju teknoloġiku jew finanzjarju konsiderevolment għoli, jew it-tnejn li huma. Biex tiddetermina l-importanza ta’ proġett, il-Kummissjoni se tqis il-kriterji stabbiliti fit-taqsima 3.2. |
4. KRITERJI TA’ KOMPATIBBILTÀ
27. |
Fil-valutazzjoni tal-kompatibbiltà mas-suq intern tal-għajnuna għall-promozzjoni tal-eżekuzzjoni ta’ IPCEI abbażi tal-Artikolu 107(3)(b) tat-Trattat, il-Kummissjoni se tqis il-kriterji (25) stabbiliti fit-taqsimiet 4.1, 4.2 u 4.3 ta’ din il-Komunikazzjoni. |
28. |
Il-Kummissjoni se twettaq test ta’ bbilanċjar, skont it-tifsira tat-taqsima 4.2, biex tivvaluta jekk l-effetti pożittivi mistennija tal-għajnuna jisbqux l-effetti negattivi possibbli. |
29. |
Filwaqt li tqis in-natura tal-proġett, il-Kummissjoni tista’ tqis li l-preżenza ta’ nuqqasijiet tas-suq, nuqqasijiet sistemiċi jew sfidi soċjetali importanti, kif ukoll il-kontribut għal interess Ewropew komuni, tista’ tiġi preżunta għall-komponenti individwali ta’ proġett integrat meta l-proġett ikun jissodisfa l-kriterji ta’ eliġibbiltà stabbiliti fit-taqsima 3. |
4.1. Il-ħtieġa u l-proporzjonalità tal-għajnuna
30. |
L-għajnuna ma tridx tissussidja l-kostijiet ta’ proġett li impriża xorta waħda kien ikollha ġġarrab, u ma tridx tikkumpensa r-riskju normali tan-negozju ta’ attività ekonomika. Mingħajr l-għajnuna, it-twettiq tal-proġett għandu jkun impossibbli, jew għandu jkun possibbli biss fuq skala iżgħar, b’kamp ta’ applikazzjoni aktar ristrett, jew mhux malajr biżżejjed, jew b’mod differenti li jirrestrinġi b’mod sinifikanti l-benefiċċji mistennija tiegħu (26). L-għajnuna se titqies proporzjonali biss jekk l-istess riżultat ma jkunx jista’ jinkiseb b’inqas għajnuna. |
31. |
L-Istati Membri jridu jipprovdu informazzjoni adegwata lill-Kummissjoni dwar il-proġett megħjun flimkien ma’ deskrizzjoni komprensiva tax-xenarju kontrofattwali li jikkorrispondi għal sitwazzjoni fejn ma tingħata l-ebda għajnuna minn l-ebda Stat Membru (27). Ix-xenarju kontrofattwali jista’ jikkonsisti fin-nuqqas ta’ proġett alternattiv, meta l-evidenza turi li dan x’aktarx ikun kontrofattwali, jew ta’ proġett alternattiv meqjus mill-benefiċjarji fit-teħid tad-deċiżjonijiet interni tagħhom, u jista’ jkun marbut ma’ proġett alternattiv li jitwettaq kompletament jew parzjalment barra l-Unjoni. Biex tintwera l-kredibbiltà tax-xenarju kontrofattwali ppreżentat mill-benefiċjarji, l-Istat Membri notifikanti huma mistednin jipprovdu dokumenti interni rilevanti tal-benefiċjarji, bħal preżentazzjonijiet tal-bord, analiżijiet, rapporti u studji (28). |
32. |
Fin-nuqqas ta’ proġett alternattiv, il-Kummissjoni se tivverifika li l-ammont ta’ għajnuna mill-Istat ma jkunx jaqbeż il-minimu meħtieġ biex il-proġett megħjun ikun profittabbli biżżejjed, pereżempju billi tagħmilha possibbli li tinkiseb rata ta’ redditu interna li tikkorrispondi għall-parametru referenzjarju speċifiku jew ir-rata minima speċifika tas-settur jew tad-ditta. Rati normali ta’ redditu meħtieġa mill-benefiċjarji fi proġetti ta’ investiment oħra simili, il-kost tal-kapital tagħhom fl-intier tiegħu, jew ir-redditi li sikwit jiġu osservati fl-industrija kkonċernata jistgħu jintużaw ukoll għal din il-fini. Għandhom jitqiesu l-kostijiet u l-benefiċċji rilevanti kollha mistennija matul il-ħajja tal-proġett. |
33. |
Il-livell massimu ta’ għajnuna permessa se jkun iddeterminat fir-rigward tad-diskrepanza fil-finanzjament identifikata b’rabta mal-kostijiet eliġibbli. Jekk tkun iġġustifikata mill-analiżi tad-diskrepanza fil-finanzjament, l-intensità tal-għajnuna tista’ tkopri l-kostijiet eliġibbli kollha. Id-diskrepanza fil-finanzjament tirreferi għad-differenza bejn il-flussi ta’ flus pożittivi u negattivi matul il-ħajja tal-investiment, imraħħsa sal-valur attwali tagħhom abbażi ta’ fattur ta’ skont xieraq li jirrifletti r-rata ta’ redditu meħtieġa għall-benefiċjarju biex iwettaq il-proġett, partikolarment fid-dawl tar-riskji involuti. Il-kostijiet eliġibbli huma stabbiliti fl-Anness (29). |
34. |
Fejn jintwera — pereżempju permezz ta’ dokumenti interni ta’ kumpanija — li l-benefiċjarju tal-għajnuna għandu għażla ċara bejn li jwettaq proġett megħjun jew proġett alternattiv mingħajr l-għajnuna, l-Kummissjoni se tqabbel il-valuri attwali netti mistennija tal-investiment fil-proġett megħjun u fil-proġett kontrofattwali, filwaqt li tqis il-probabbiltajiet li jseħħu x-xenarji kummerċjali differenti. |
35. |
L-għajnuna mill-Istat biex tippromwovi l-eżekuzzjoni tal-IPCEIs tista’ tiġi akkumulata ma’ finanzjament tal-Unjoni jew għajnuna oħra mill-Istat, dment li l-ammont totali ta’ finanzjament pubbliku mogħti fir-rigward tal-istess kostijiet eliġibbli ma jaqbiżx ir-rata ta’ finanzjament l-aktar favorevoli stabbilita fir-regoli applikabbli tad-dritt tal-Unjoni. |
36. |
Bħala salvagwardja addizzjonali biex jiġi żgurat li l-għajnuna mill-Istat tibqa’ proporzjonata u limitata għal dak meħtieġ, il-Kummissjoni tista’ titlob lill-Istat Membru notifikanti biex jimplimenta mekkaniżmu ta’ rkupru (30). Jenħtieġ li l-mekkaniżmu ta’ rkupru jiżgura distribuzzjoni bbilanċjata ta’ qligħ addizzjonali meta l-proġett ikun aktar profittabbli milli previst fl-analiżi notifikata tad-diskrepanza fil-finanzjament u jenħtieġ li japplika biss għal dawk l-investimenti li, abbażi tar-riżultati tal-fluss tal-flus ex post u tal-iżborżi tal-għajnuna mill-Istat, jilħqu rata ta’ redditu li taqbeż il-kost tal-kapital tal-benefiċjarji. Jenħtieġ li kwalunkwe mekkaniżmu ta’ rkupru bħal dan jiġi definit b’mod ċar minn qabel sabiex jipprovdi prevedibbiltà finanzjarja għall-benefiċjarji fil-mument tat-teħid tad-deċiżjonijiet dwar il-parteċipazzjoni fil-proġett. Jenħtieġ li mekkaniżmi bħal dawn jitfasslu b’tali mod li jżommu inċentivi għall-benefiċjarji biex jimmassimizzaw l-investiment u l-prestazzjoni tal-proġetti tagħhom. |
37. |
Fl-analiżi tagħha, il-Kummissjoni se tqis l-elementi li ġejjin:
|
38. |
Sabiex ikunu indirizzati d-distorsjonijiet attwali jew potenzjali diretti jew indiretti tal-kummerċ internazzjonali, il-Kummissjoni tista’ tqis il-fatt li, direttament jew indirettament, il-kompetituri li jinsabu barra mill-Unjoni, fl-aħħar tliet snin, ikunu rċevew jew ikunu se jirċievu għajnuna ta’ intensità ekwivalenti għal proġetti simili. Madankollu, meta d-distorsjonijiet tal-kummerċ internazzjonali x’aktarx li jseħħu wara aktar minn tliet snin minħabba n-natura partikolari tas-settur inkwistjoni, il-perjodu ta’ referenza jista’ jiġi estiż b’mod korrispondenti. Jekk possibbli b’xi mod jew ieħor, l-Istat Membru kkonċernat se jipprovdi lill-Kummissjoni b’biżżejjed informazzjoni biex tkun tista’ tivvaluta s-sitwazzjoni, b’mod partikolari rigward il-ħtieġa li jitqies il-vantaġġ kompetittiv li jgawdi kompetitur f’pajjiż terz. Jekk il-Kummissjoni ma jkollhiex evidenza rigward l-għajnuna mogħtija jew proposta, hija tista’ wkoll tibbaża d-deċiżjoni tagħha fuq evidenza ċirkostanzjali. Il-Kummissjoni tista’ wkoll tieħu azzjoni xierqa biex tindirizza d-distorsjonijiet tal-kompetizzjoni li jirriżultaw minn sussidji rċevuti barra mill-Unjoni. |
39. |
Meta tiġbor evidenza, il-Kummissjoni tista’ tuża s-setgħat investigattivi tagħha (31). |
40. |
L-għażla tal-istrument ta’ għajnuna trid issir fid-dawl tal-falliment tas-suq jew ta’ nuqqasijiet sistemiċi importanti oħrajn li għandu l-għan li jindirizza. Pereżempju, meta l-problema sottostanti tkun nuqqas ta’ aċċess għal finanzjament, normalment jeħtieġ li l-Istati Membri jirrikorru għall-għajnuna fil-forma ta’ għajnuna ta’ likwidità, bħal self jew garanzija (32). Meta jkun meħtieġ li impriża tingħata wkoll ċertu grad ta’ kondiviżjoni tar-riskju, l-istrument ta’ għajnuna magħżul normalment għandu jkun avvanz ripagabbli. Strumenti ta’ għajnuna ripagabbli ġeneralment se jitqiesu bħala indikatur pożittiv. |
41. |
L-għażla tal-benefiċjarji permezz ta’ proċedura kompetittiva, trasparenti u nondiskriminatorja se titqies bħala indikatur pożittiv. |
4.2. Prevenzjoni ta’ distorsjonijiet bla bżonn tal-kompetizzjoni u test ta’ bbilanċjar
42. |
L-Istat Membru jrid jipprovdi evidenza li l-miżura ta’ għajnuna proposta tikkostitwixxi l-istrument politiku xieraq biex jindirizza l-għan tal-proġett. Miżura ta’ għajnuna mhijiex se titqies xierqa jekk strumenti ta’ politika jew tipi ta’ strumenti ta’ għajnuna oħrajn li joħolqu inqas distorsjoni jkunu jistgħu jiksbu l-istess riżultat. |
43. |
Sabiex l-għajnuna tkun kompatibbli, l-effetti negattivi tal-miżura ta’ għajnuna f’termini ta’ distorsjonijiet tal-kompetizzjoni u l-impatt fuq il-kummerċ bejn l-Istati Membri jridu jkunu limitati u inferjuri meta mqabbla mal-effetti pożittivi f’termini tal-kontribut għall-għanijiet ta’ interess komuni. |
44. |
Fil-valutazzjoni tal-effetti negattivi tal-miżura ta’ għajnuna, il-Kummissjoni se tiffoka l-analiżi tagħha fuq l-impatt prevedibbli li l-għajnuna jista’ jkollha fuq il-kompetizzjoni bejn l-impriżi fis-swieq tal-prodott ikkonċernati, inkluż is-swieq upstream jew downstream, u fuq ir-riskju ta’ kapaċità żejda. |
45. |
Il-Kummissjoni se tivvaluta r-riskju ta’ esklużjoni mis-suq u d-dominanza fih. Il-proġetti li jinvolvu l-kostruzzjoni ta’ infrastruttura (33) jridu jikkonformaw mal-prinċipji tal-aċċess miftuħ u nondiskriminatorju għall-infrastruttura u l-ipprezzar nondiskriminatorju u t-tħaddim tan-network, inkluż dawk stabbiliti fid-dritt tal-Unjoni (34). |
46. |
Il-Kummissjoni se tivvaluta l-effetti negattivi potenzjali fuq il-kummerċ, inkluż ir-riskju li ssir kompetizzjoni bejn l-Istati Membri ta’ min joffri l-aktar sussidji, li tista’ sseħħ speċjalment fir-rigward tal-għażla tal-post. |
47. |
Fil-valutazzjoni tagħha tal-effetti negattivi potenzjali fuq il-kummerċ, il-Kummissjoni se tqis jekk l-għajnuna tiddependix fuq ir-rilokazzjoni ta’ attività ta’ produzzjoni jew kwalunkwe attività oħra tal-benefiċjarju minn Parti Kontraenti oħra għall-Ftehim taż-ŻEE lejn it-territorju tal-Istat Membru li jagħti l-għajnuna. Kundizzjoni bħal din tidher li tagħmel ħsara lis-suq intern, irrispettivament kemm verament jintilfu impjiegi fl-istabbiliment inizjali tal-benefiċjarju fiż-ŻEE, u x’aktarx ma tiġix ikkumpensata minn kwalunkwe effett pożittiv. |
4.3. Trasparenza
48. |
L-Istati Membri jridu jiżguraw li l-informazzjoni li ġejja tiġi pubblikata fil-modulu ta’ trasparenza (transparency award module) tal-Kummissjoni, jew fuq sit web komprensiv dwar l-għajnuna mill-Istat, fil-livell nazzjonali jew reġjonali:
|
49. |
Ir-rekwiżit li tiġi ppubblikata l-informazzjoni japplika fir-rigward tal-għotjiet ta’ għajnuna individwali li jaqbżu l-EUR 100 000. Informazzjoni bħal din trid tiġi ppubblikata wara li tittieħed id-deċiżjoni li tingħata l-għajnuna, trid tinżamm mill-inqas għal 10 snin, u trid tkun disponibbli għall-pubbliku ġenerali mingħajr restrizzjonijiet (37). |
5. NOTIFIKA, RAPPURTAR U APPLIKAZZJONI
5.1. Obbligu ta’ notifika
50. |
Skont l-Artikolu 108(3) tat-Trattat, l-Istati Membri jridu jinfurmaw lill-Kummissjoni bil-quddiem bi kwalunkwe pjan biex tingħata jew tinbidel l-għajnuna mill-Istat, inkluż l-għajnuna għall-IPCEIs. |
51. |
L-Istati Membri involuti fl-istess IPCEI huma mistiedna, kull meta jkun possibbli, jippreżentaw notifika komuni lill-Kummissjoni li tinkludi test konġunt li jiddeskrivi l-IPCEI u li juri l-eliġibbiltà tiegħu. |
5.2. Evalwazzjoni ex post u rappurtar
52. |
L-eżekuzzjoni tal-proġett trid tkun soġġetta għal rappurtar regolari. Meta xieraq, il-Kummissjoni tista’ titlob li ssir evalwazzjoni ex post. |
5.3. Applikazzjoni
53. |
Il-Kummissjoni se tapplika l-prinċipji stabbiliti f’din il-Komunikazzjoni mill-1 ta’ Jannar 2022. |
54. |
Hija se tapplika dawk il-prinċipji għall-proġetti ta’ għajnuna notifikati kollha u li fir-rigward tagħhom hija msejħa tieħu deċiżjoni dakinhar tal-1 ta’ Jannar 2022 jew aktar tard, anki meta l-proġetti jkunu ġew notifikati qabel dik id-data. |
55. |
F’konformità mal-Avviż dwar id-determinazzjoni tar-regoli applikabbli għall-valutazzjoni ta’ għajnuna mill-Istat illegali (38), fil-każ ta’ għajnuna mhux notifikata, il-Kummissjoni se tapplika l-prinċipji stabbiliti f’din il-Komunikazzjoni jekk l-għajnuna tkun ingħatat dakinhar tal-1 ta’ Jannar 2022 jew aktar tard, u r-regoli fis-seħħ fiż-żmien li ngħatat l-għajnuna għall-każijiet l-oħra kollha. |
(1) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Il-Patt Ekoloġiku Ewropew”, COM(2019) 640 final, il-11 ta’ Diċembru 2019.
(2) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Insawru l-futur diġitali tal-Ewropa”, COM(2020) 67 final, id-19 ta’ Frar 2020.
(3) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Il-Kumpass Diġitali tal-2030: l-approċċ Ewropew għad-Deċennju Diġitali”, COM(2021) 118 final, id-9 ta’ Marzu 2021.
(4) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Strateġija Industrijali Ġdida għall-Ewropa”, COM(2020) 102 final, l-10 ta’ Marzu 2020.
(5) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Aġġornament tal-Istrateġija Industrijali l-Ġdida tal-2020: Nibnu Suq Uniku aktar b’saħħtu għall-irkupru tal-Ewropa”, COM(2021) 350 final, il-5 ta’ Mejju 2021.
(6) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Strateġija Ewropea għad-data”, COM(2020) 66 final, id-19 ta’ Frar 2020.
(7) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Il-mument tal-Ewropa: Tiswija u Tħejjija għall-Ġenerazzjoni li Jmiss”, COM(2020) 456 final, is-27 ta’ Mejju 2020.
(8) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Strateġija għall-SMEs għal Ewropa sostenibbli u diġitali”, COM(2020) 103 final, l-10 ta’ Marzu 2020.
(9) Il-linji gwida dwar l-għajnuna mill-Istat għas-salvataġġ u r-ristrutturar ta’ impriżi mhux finanzjarji f’diffikultà (ĠU C 249, 31.7.2014, p. 1). Kif spjegat fil-paragrafu 23 ta’ dawk il-linji gwida, minħabba li l-eżistenza stess tagħha tinsab fil-periklu, intrapriża f’diffikultà ma tistax titqies bħala mezz xieraq għall-promozzjoni ta’ għanijiet oħrajn ta’ politika pubblika sakemm tkun garantita l-vijabbiltà tagħha.
(10) Il-Komunikazzjoni tal-Kummissjoni – Qafas Temporanju għal miżuri ta’ għajnuna mill-Istat biex jingħata sostenn lill-ekonomija matul it-tifqigħa preżenti tal-COVID-19 (ĠU C 91I, 20.3.2020, p. 1), u l-emendi tagħha.
(11) Ara pereżempju l-Kawża C-156/98 Il-Ġermanja vs Il-Kummissjoni [2000] ECLI:EU:C:2000:467, il-paragrafu 78 u l-Kawża C-333/07 Régie Networks vs Rhone Alpes Bourgogne [2008] ECLI:EU:C:2008:764, il-paragrafi 94 sa 116.
(12) Fil-każ ta’ riċerka u żvilupp, meta żewġ proġetti jew aktar ma jkunux separabbli minn xulxin b’mod ċar, u b’mod partikolari meta ma jkollhomx probabbiltajiet indipendenti ta’ suċċess teknoloġiku, dawn iridu jitqiesu bħala proġett uniku.
(13) Minn hawn ’il quddiem, proġett uniku u proġett integrat se jissejħu “proġett”.
(14) Il-Komunikazzjoni tal-Kummissjoni lill-Parlament Ewropew, lill-Kunsill Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Il-bini ta’ Unjoni Ewropea tas-Saħħa: Rinforzar tar-reżiljenza tal-UE għat-theddid transkonfinali għas-saħħa”, COM(2020) 724 final, il-11 ta’ Novembru 2020.
(15) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “ŻER ġdida għar-Riċerka u l-Innovazzjoni”, COM(2020) 628 final, it-30 ta’ Settembru 2020.
(16) Il-Komunikazzjoni tal-Kummissjoni lill-Parlament Ewropew, lill-Kunsill, lill-Kumitat Ekonomiku u Soċjali Ewropew u lill-Kumitat tar-Reġjuni — “Pjan ta’ Azzjoni ġdid dwar l-Ekonomija Ċirkolari Għal Ewropea aktar nadifa u kompetittiva”, COM(2020) 98 final, il-11 ta’ Marzu 2020.
(17) Jista’ jiġi ġustifikat għadd iżgħar ta’ Stati Membri, iżda mhux inqas minn tnejn, f’ċirkostanzi speċifiċi u debitament motivati, pereżempju, jekk il-proġett ikun jikkonċerna infrastrutturi tar-riċerka interkonnessi, proġetti TEN-E u TEN-T li huma ta’ importanza fundamentalment transnazzjonali minħabba li huma parti minn netwerk transfruntier konness fiżikament, jew huma essenzjali għat-titjib tal-ġestjoni tat-traffiku transfruntier jew tal-interoperabilità; jew il-proġett ikun iffinanzjat mill-fondi tal-UE, li fir-rigward tagħhom id-dispożizzjonijiet legali dwar il-kollaborazzjoni tal-Istati Membri jirrikjedu numru iżgħar ta’ Stati Membri parteċipanti. Fil-każijiet kollha, il-proġetti jridu jitfasslu b’mod trasparenti f’konformità mal-punt 17.
(18) Is-sempliċi fatt li l-proġett jitwettaq minn impriżi f’pajjiżi differenti, jew li infrastruttura tar-riċerka sussegwentement tintuża minn impriżi stabbiliti fi Stati Membri differenti, mhuwiex suffiċjenti biex proġett jikkwalifika bħala IPCEI. Il-Qorti approvat il-politika tal-Kummissjoni li tqis li proġett jista’ jkun deskritt bħala wieħed ta’ interess Ewropew komuni għall-finijiet tal-Artikolu 107(3)(b) meta jifforma parti minn programm Ewropew transnazzjonali appoġġat b’mod konġunt minn għadd ta’ gvernijiet tal-Istati Membri, jew meta jkun ġej minn azzjoni kkonċertata minn għadd ta’ Stati Membri biex jegħlbu theddida komuni. Il-Kawżi Magħquda C-62/87 u 72/87 Exécutif régional wallon u SA Glaverbel vs Il-Kummissjoni [1988] ECLI:EU:C:1988:132, il-paragrafu 22.
(19) Meta jiġi vvalutat sa liema punt sar kofinanzjament, il-Kummissjoni se tqis l-ispeċifiċitajiet ta’ċerti setturi u tal-SMEs. F’ċirkostanzi eċċezzjonali u debitament motivati, il-Kummissjoni tista’ tqis li l-għajnuna tkun iġġustifikata anke fin-nuqqas ta’ kofinanzjament importanti mill-benefiċjarju.
(20) Ir-Regolament (UE) 2020/852 tal-Parlament Ewropew u tal-Kunsill tat-18 ta’ Ġunju 2020 dwar l-istabbiliment ta’ qafas biex jiġi ffaċilitat l-investiment sostenibbli (ĠU L 198, 22.6.2020, p. 13). Għal miżuri li huma identiċi għal miżuri fi ħdan il-Pjanijiet għall-Irkupru u r-Reżiljenza kif approvati mill-Kunsill, il-konformità tagħhom mal-prinċipju “la tagħmilx ħsara sinifikanti” titqies sodisfatta peress li din diġà ġiet ivverifikata.
(21) Finanzjament tal-Unjoni ġestit ċentralment mill-istituzzjonijiet, l-aġenziji, l-impriżi konġunti jew korpi oħra tal-UE, li l-Istat Membru ma jikkontrollax direttament jew indirettament, ma jikkostitwixxix għajnuna mill-Istat. L-għajnuna mill-Istat tista’ tiġi akkumulata ma’ finanzjament minn fond tal-Unjoni dment li jkun hemm konformità mal-kundizzjoni fil-punt 35
(22) Kontribuzzjoni ta’ assi tanġibbli u intanġibbli, kif ukoll l-art, iridu jkunu vvalutati bil-prezz tas-suq.
(23) Dan jista’ jinkludi, meta rilevanti, progress gradwali lejn l-ogħla livell ta’ żvilupp tekniku, sa fejn l-għan tal-proġett parteċipanti jkun li, b’mod ċar u kredibbli, jiddeskrivi kif se jmur lil hinn minn dan il-livell.
(24) Bejgħ limitat, meta meħtieġ fis-settur speċifiku, relatat mal-fażi tal-ittestjar, inkluż il-bejgħ ta’ kampjuni, ta’ feedback jew ta’ ċertifikazzjoni, huwa eskluż mill-kunċett ta’ “attivitajiet kummerċjali”.
(25) Skont il-Qorti tal-Ġustizzja, il-Kummissjoni tgawdi minn diskrezzjoni fir-rigward tal-valutazzjoni tal-kompatibbiltà tal-IPCEIs. Il-Kawżi Magħquda C-62/87 u 72/87 Exécutif régional wallon u SA Glaverbel vs Il-Kummissjoni [1988] ECLI:EU:C:1988:132, il-paragrafu 21.
(26) L-applikazzjoni għall-għajnuna trid tippreċedi l-bidu tax-xogħlijiet, li jkun jew il-bidu ta’ xogħlijiet ta’ kostruzzjoni fuq l-investiment, jew l-ewwel impenn sod biex jiġi ordnat tagħmir jew impenn ieħor li jagħmel l-investiment irriversibbli, skont liema jsir l-ewwel f’termini ta’ żmien. Ix-xiri ta’ art u xogħlijiet preparatorji, bħall-kisba ta’ permessi u t-twettiq ta’ studji preliminari dwar il-fattibbiltà, mhumiex meqjusa bħala l-bidu tax-xogħlijiet.
(27) Għal proġetti mill-SMEs, ix-xenarju kontrofattwali jista’ jikkonsisti fin-nuqqas ta’ proġett alternattiv kif imsemmi fil-punt 32.
(28) Meta l-informazzjoni pprovduta tkun koperta mill-obbligu tas-segretezza professjonali, din għandha tiġi ttrattata f’konformità mal-Artikolu 30 tar-Regolament tal-Kunsill (UE) 2015/1589 tat-13 ta’ Lulju 2015 li jistabbilixxi regoli dettaljati għall-applikazzjoni tal-Artikolu 108 tat-Trattat dwar il-Funzjonament tal-Unjoni Ewropea (ĠU L 248, 24.9.2015, p. 9).
(29) Fil-każ ta’ proġett integrat, il-kostijiet eliġibbli jridu jkunu dettaljati fil-livell ta’ kull proġett individwali.
(30) Għal proġetti mill-SMEs, l-ebda mekkaniżmu ta’ rkupru ma jrid jiġi implimentat ħlief f’ċirkostanzi eċċezzjonali, b’mod partikolari fid-dawl tal-ammonti ta’ għajnuna nnotifikati għal proġetti bħal dawn.
(31) Ara l-Artikolu 25tar-Regolament tal-Kunsill (UE) 2015/1589 tat-13 ta’ Lulju 2015 li jistabbilixxi regoli dettaljati għall-applikazzjoni tal-Artikolu 108 tat-Trattat dwar il-Funzjonament tal-Unjoni Ewropea, (ĠU L 248, 24.9.2015, p. 9).
(32) L-għajnuna fil-forma ta’ garanziji trid tkun limitata fiż-żmien, u l-għajnuna fil-forma ta’ self trid tkun soġġetta għal perjodi ta’ ħlas lura.
(33) Biex jiġu evitati d-dubji, linji pilota ma jitqisux bħala infrastrutturi.
(34) Jekk il-proġett jinvolvi infrastruttura tal-enerġija, dan għandu jkun soġġett għar-regolamentazzjoni dwar it-tariffi u l-aċċess u għar-rekwiżiti ta’ separazzjoni meta meħtieġa skont il-leġiżlazzjoni dwar is-suq intern.
(35) C(2003) 4582 (ĠU C 297, 9.12.2003, p. 6).
(36) Għotja/Sussidju tar-rata tal-imgħax; Self/Avvanzi ripagabbli/Għotja rimborsabbli; Garanzija; Benefiċċju fuq it-taxxa jew eżenzjoni mit-taxxa; Finanzjament ta’ riskju; Oħrajn. Jekk l-għajnuna tingħata permezz ta’ diversi strumenti ta’ għajnuna, l-ammont ta’ għajnuna jrid jiġi pprovdut skont l-istrument.
(37) Din l-informazzjoni trid tiġi ppubblikata fi żmien 6 xhur mid-data tal-għotja. F’każ ta’ għajnuna illegali, l-Istati Membri se jkunu meħtieġa li jiżguraw il-pubblikazzjoni ta’ din l-informazzjoni ex post fi żmien 6 xhur mid-data tad-deċiżjoni tal-Kummissjoni. L-informazzjoni trid tkun disponibbli f’format li jippermetti li d-data tkun tista’ titfittex, tiġi estratta u faċilment ippubblikata fuq l-internet, pereżempju f’format CSV jew XML.
(38) Commission notice on the determination of the applicable rules for the assessment of unlawful State aid (In-Notifika tal-Kummissjoni dwar id-determinazzjoni tar-regoli applikabbli għall-valutazzjoni ta’ għajnuna mill-Istat illegali) (ĠU C 119, 22.5.2002, p. 22).
ANNESS
Spejjeż eliġibbli
a) |
Studji tal-fattibilità, inklużi studji tekniċi preparatorji, u l-ispejjeż biex jinkisbu l-permessi meħtieġa għat-twettiq tal-proġett. |
b) |
L-ispejjeż tal-istrumenti u t-tagħmir, (inklużi installazzjonijiet u vetturi tat-trasport) sal-punt u għat-tul taż-żmien użati mill-proġett. Meta ħajjet dawn l-istrumenti u t-tagħmir ma tintużax kollha fil-proġett, jitqiesu eliġibbli biss l-ispejjeż ta’ deprezzament li jikkorrispondu għall-ħajja tal-proġett, kif kalkolati fuq il-bażi ta’ prassi tajba tal-kontabilità. |
c) |
L-ispejjeż tal-akkwiżizzjoni (jew tal-kostruzzjoni) tal-binjiet, tal-infrastruttura u l-artijiet, sal-punt u għat-tul taż-żmien użati mill-proġett. Meta dawn l-ispejjeż jiġu determinati fir-rigward tal-valur ta’ trasferiment kummerċjali jew tal-ispejjeż tal-kapital realment imġarrba, f’paragun mal-ispejjeż ta’ deprezzament, il-valur residwu tal-artijiet, tal-binjiet jew tal-infrastruttura jenħtieġ li jitnaqqas mid-diskrepanza tal-finanzjament, jew ex ante jew inkella ex post. |
d) |
L-ispejjeż ta’ materjali oħra, provvisti u prodotti simili meħtieġa għall-proġett. |
e) |
L-ispejjeż għall-kisba, il-validazzjoni u d-difiża tal-privattivi u assi intanġibbli oħrajn. L-ispejjeż tar-riċerka kuntrattwali, għarfien u privattivi mixtrija jew liċenzjati minn sorsi barranin b’kundizzjonijiet normali tas-suq, kif ukoll l-ispejjeż tal-konsulenzi u s-servizzi ekwivalenti użati esklużivament għall-proġett. |
f) |
L-ispejjeż amministrattivi u tal-persunal (inklużi l-ispejjeż ġenerali) direttament imġarrba għal attivitajiet ta’ RŻI, inklużi dawk l-attivitajiet ta’ RŻI marbuta mal-ewwel użu industrijali, jew fil-każ ta’ proġett ta’ infrastruttura, imġarrba matul il-kostruzzjoni tal-infrastruttura. |
g) |
F’każ ta’ għajnuna fi proġett tal-ewwel użu industrijali, in-nefqa kapitali u dik operattiva sal-firxa u għall-perjodu użat għall-proġett, sakemm l-użu industrijali jirriżulta minn attività RŻI, u fih innifsu jinkorpora komponent importanti ta’ RŻI li jikkostitwixxi f’element integrali u neċessarju għall-implimentazzjoni b’suċċess tal-proġett. In-nefqiet operattivi jridu jkunu relatati ma’ tali komponent tal-proġett. |
h) |
Jistgħu jiġu aċċettati spejjeż oħrajn, jekk ikunu ġġustifikati, u meta dawn ikunu marbuta bis-sħiħ mat-twettiq tal-proġett, minbarra l-ispejjeż operattivi li ma jkunux koperti mill-punt (g). |