This document is an excerpt from the EUR-Lex website
Document 32023D0437
Commission Implementing Decision (EU) 2023/437 of 22 February 2023 on the request for registration of the European citizens’ initiative entitled ‘Ensuring a dignified reception of migrants in Europe’, pursuant to Regulation (EU) 2019/788 of the European Parliament and of the Council (notified under document C(2023) 1121) (Only the English text is authentic)
Deċiżjoni ta’ Implimentazzjoni tal-Kummissjoni (UE) 2023/437 tat-22 ta’ Frar 2023 dwar it-talba għar-reġistrazzjoni tal-inizjattiva taċ-ċittadini Ewropej intitolata “Niżguraw li l-migranti jingħataw akkoljenza dinjituża fl-Ewropa”, skont ir-Regolament (UE) 2019/788 tal-Parlament Ewropew u tal-Kunsill (notifikata bid-dokument C(2023) 1121) (It-test bl-Ingliż biss huwa awtentiku)
Deċiżjoni ta’ Implimentazzjoni tal-Kummissjoni (UE) 2023/437 tat-22 ta’ Frar 2023 dwar it-talba għar-reġistrazzjoni tal-inizjattiva taċ-ċittadini Ewropej intitolata “Niżguraw li l-migranti jingħataw akkoljenza dinjituża fl-Ewropa”, skont ir-Regolament (UE) 2019/788 tal-Parlament Ewropew u tal-Kunsill (notifikata bid-dokument C(2023) 1121) (It-test bl-Ingliż biss huwa awtentiku)
C/2023/1121
ĠU L 63, 28.2.2023, p. 54–55
(BG, ES, CS, DA, DE, ET, EL, EN, FR, GA, HR, IT, LV, LT, HU, MT, NL, PL, PT, RO, SK, SL, FI, SV)
In force
28.2.2023 |
MT |
Il-Ġurnal Uffiċjali tal-Unjoni Ewropea |
L 63/54 |
DEĊIŻJONI TA’ IMPLIMENTAZZJONI TAL-KUMMISSJONI (UE) 2023/437
tat-22 ta’ Frar 2023
dwar it-talba għar-reġistrazzjoni tal-inizjattiva taċ-ċittadini Ewropej intitolata “Niżguraw li l-migranti jingħataw akkoljenza dinjituża fl-Ewropa”, skont ir-Regolament (UE) 2019/788 tal-Parlament Ewropew u tal-Kunsill
(notifikata bid-dokument C(2023) 1121)
(It-test bl-Ingliż biss huwa awtentiku)
IL-KUMMISSJONI EWROPEA,
Wara li kkunsidrat it-Trattat dwar il-Funzjonament tal-Unjoni Ewropea,
Wara li kkunsidrat ir-Regolament (UE) 2019/788 tal-Parlament Ewropew u tal-Kunsill tas-17 ta’ April 2019 dwar l-inizjattiva taċ-ċittadini Ewropej (1), u b’mod partikolari l-Artikolu 6(2) u (3) tiegħu,
Billi:
(1) |
Fit-30 ta’ Diċembru 2022 il-Kummissjoni ġiet ippreżentata talba għar-reġistrazzjoni ta’ inizjattiva taċ-ċittadini Ewropej intitolata “Niżguraw li l-migranti jingħataw akkoljenza dinjituża fl-Ewropa”. |
(2) |
L-għanijiet tal-inizjattiva kif ġew spjegati mill-organizzaturi huma: “Ta’ sikwit it-trattament tal-migranti fl-Unjoni Ewropea (UE) ma jirrispettax il-prinċipji tad-dinjità tal-bniedem, li huwa valur fundamentali tal-Unjoni. Fil-fehma tagħna, ir-raġuni ewlenija għal dan hija l-inadegwatezza persistenti tar-regoli Ewropej u n-nuqqas ta’ solidarjetà bejn l-Istati Membri. Peress li l-Unjoni hija “spazju ta’ libertà, sigurtà u ġustizzja li jirrispetta d-drittijiet fundamentali”, aħna, iċ-ċittadini Ewropej, nitolbu lill-UE tiżgura akkoljenza dinjituża lill-migranti, minnufih kif jidħlu fit-territorju, b’manjiera kompatibbli mad-drittijiet fundamentali li huma rikonoxxuti lil kull bniedem mill-Karta tad-Drittijiet Fundamentali tal-UE u mid-dritt internazzjonali. Nappellaw li jiġu adottati regolamenti, fil-qafas tal-iżvilupp ta’ politika komuni dwar l-ażil, li jikkontribwixxu għal dan billi: 1) jiġi introdott mekkaniżmu ġdid għad-distribuzzjoni ta’ dawk li japplikaw għall-ażil fl-UE, abbażi tar-rieda ħielsa tagħhom u tas-solidarjetà effettiva bejn l-Istati Membri (reviżjoni tar-Regolament ta’ Dublin); 2) tobbliga standards ta’ akkoljenza vinkolanti f’dawk li huma ikel, saħħa; akkomodazzjoni, edukazzjoni u xogħol, li jiggarantixxu kundizzjonijiet tal-għajxien dinjitużi, komparabbli fl-Unjoni kollha.” |
(3) |
L-inizjattiva tinkludi anness li jipprovdi aktar dettalji dwar is-suġġett, l-objettivi u l-isfond. L-organizzaturi jsostnu li minkejja x-xewqa kostanti tal-Kummissjoni li ttejjeb reġim tal-ażil u l-migrazzjoni li ma jaħdimx tajjeb, għad iridu jiġu adottati ħafna bidliet leġiżlattivi u ta’ politika, kemm fil-livell tal-Unjoni kif ukoll f’dak nazzjonali, li jiżguraw it-trattament dinjituż lill-migranti kollha. L-ewwel nett, huma jitolbu lill-Kummissjoni tistabbilixxi mekkaniżmu ġdid għad-distribuzzjoni ta’ dawk li japplikaw għall-ażil fl-Unjoni billi tirrevedi r-Regolament (UE) Nru 604/2013 tal-Parlament Ewropew u tal-Kunsill (2) bil-ħsieb li tibbilanċja l-kondiviżjoni tal-akkoljenza ta’ dawk li japplikaw għall-ażil fl-UE filwaqt li tqis l-aspirazzjonijiet ta’ dawk li japplikaw għall-ażil bħala kriterju ġdid u tipprevedi mekkaniżmu vinkolanti ta’ solidarjetà għar-rilokazzjoni bejn l-Istati Membri li jikkoreġu allokazzjonijiet sproporzjonati. It-tieni, huma jitolbu li jiġi adottat regolament dwar il-kundizzjonijiet ta’ akkoljenza għal dawk li japplikaw għall-ażil fl-UE sabiex jiġu ggarantiti livell ta’ għajxien dinjituż u kundizzjonijiet ta’ għajxien komparabbli madwar l-Unjoni, li jirrikjedi li l-Istati Membri jirrispettaw bis-sħiħ id-drittijiet fundamentali, jiżgura li l-kundizzjonijiet materjali ta’ akkoljenza għal dawk li japplikaw għall-ażil jikkonformaw mal-istandards operazzjonali u mal-indikaturi żviluppati mill-Uffiċċju Ewropew għall-Migrazzjoni u l-Ażil (European Asylum and Migration Office, EASO), jiggarantixxi d-drittijiet tat-tfal, jiffaċilita l-aċċess għall-impjieg u jipprevedi pjanijiet ta’ akkoljenza ta’ emerġenza. |
(4) |
Ġie ppreżentat ukoll dokument addizzjonali li jipprovdi informazzjoni dwar l-isfond tal-inizjattiva taċ-ċittadini proposta. |
(5) |
Fir-rigward tal-għanijiet tal-inizjattiva, il-Kummissjoni għandha s-setgħa li tippreżenta proposta għal att legali li jintroduċi mekkaniżmu ġdid għad-distribuzzjoni ta’ dawk li japplikaw għall-ażil u jobbliga ċerti standards ta’ akkoljenza abbażi tal-Artikolu 78(2) tat-Trattat fl-Istati Membri. |
(6) |
Għal dawn ir-raġunijiet, l-ebda parti mill-inizjattiva ma taqa’ manifestament barra mill-qafas tas-setgħat tal-Kummissjoni li tippreżenta proposta għal att legali tal-Unjoni għall-fini tal-implimentazzjoni tat-Trattati. |
(7) |
Din il-konklużjoni hija mingħajr preġudizzju għall-valutazzjoni ta’ jekk il-kundizzjonijiet sostantivi konkreti meħtieġa biex il-Kummissjoni taġixxi, inklużi l-konformità mal-prinċipji tal-proporzjonalità u tas-sussidjarjetà u l-kompatibbiltà mad-drittijiet fundamentali, ikunux issodisfati f’dan il-każ. |
(8) |
Il-grupp ta’ organizzaturi pprovda evidenza xierqa li huwa jissodisfa r-rekwiżiti stipulati fl-Artikolu 5(1) u (2) tar-Regolament (UE) 2019/788 u ħatar il-persuni ta’ kuntatt f’konformità mal-Artikolu 5(3), l-ewwel subparagrafu, ta’ dak ir-Regolament. |
(9) |
L-inizjattiva la hija manifestament abbużiva, frivola jew vessatorja u lanqas ma tmur manifestament kontra l-valuri tal-Unjoni kif stabbiliti fl-Artikolu 2 tat-Trattat dwar l-Unjoni Ewropea jew kontra d-drittijiet minquxin fil-Karta tad-Drittijiet Fundamentali tal-Unjoni Ewropea. |
(10) |
Għaldaqstant l-inizjattiva intitolata “Niżguraw li l-migranti jingħataw akkoljenza dinjituża fl-Ewropa” għandha tiġi rreġistrata. |
(11) |
Il-konklużjoni li l-kundizzjonijiet għar-reġistrazzjoni skont l-Artikolu 6(3) tar-Regolament (UE) 2019/788 huma ssodisfati ma timplikax li l-Kummissjoni b’xi mod jew ieħor tikkonferma l-korrettezza fattwali tal-kontenut tal-inizjattiva, li hija r-responsabbiltà unika tal-grupp ta’ organizzaturi tal-inizjattiva. Il-kontenut tal-inizjattiva jesprimi biss il-fehmiet tal-grupp ta’ organizzaturi, u bl-ebda mod ma jista’ jitqies li jirrifletti l-fehmiet tal-Kummissjoni, |
ADOTTAT DIN ID-DEĊIŻJONI:
Artikolu 1
L-inizjattiva intitolata “Niżguraw li l-migranti jingħataw akkoljenza dinjituża fl-Ewropa” għandha tiġi rreġistrata.
Artikolu 2
Din id-Deċiżjoni hija indirizzata lill-grupp ta’ organizzaturi tal-inizjattiva taċ-ċittadini intitolata “Niżguraw li l-migranti jingħataw akkoljenza dinjituża fl-Ewropa”, irrappreżentat mis-Sinjura Stéphanie POPPE u mis-Sinjura Pascale HÖGER li jaġixxu bħala persuni ta’ kuntatt.
Magħmul fi Brussell, it-22 ta’ Frar 2023.
Għall-Kummissjoni
Věra JOUROVÁ
Viċi President
(1) ĠU L 130, 17.5.2019, p. 55.
(2) Ir-Regolament (UE) Nru 604/2013 tal-Parlament Ewropew u tal-Kunsill tas-26 ta’ Ġunju 2013 li jistabbilixxi l-kriterji u l-mekkaniżmi biex ikun iddeterminat liema hu l-Istat Membru responsabbli biex jeżamina applikazzjoni għall-protezzjoni internazzjonali iddepożitata għand wieħed mill-Istati Membri minn ċittadin ta’ pajjiż terz jew persuna apolida (ĠU L 180, 29.6.2013, p. 31).