(1)

Ir-Regolament (KEE) Nru 2658/87 stabbilixxa nomenklatura magħquda tal-merkanzija (“in-NM”), biex fl-istess waqt tissodisfa r-rekwiżiti tat-Tariffa Doganali Komuni, l-istatistika tal-kummerċ estern tal-Unjoni u politiki oħrajn tal-Unjoni li jikkonċernaw l-importazzjoni jew l-esportazzjoni ta’ merkanzija.

(2)

In-NM hija bbażata fuq in-Nomenklatura tas-Sistema Armonizzata tal-Organizzazzjoni Dinjija Doganali (“SA”), li ġiet emendata skont ir-Rakkomandazzjoni tat-28 ta’ Ġunju 2019 tal-Kunsill għall-Kooperazzjoni Doganali (“is-SA tal-2022”). Ir-Regolament ta’ Implimentazzjoni tal-Kummissjoni (UE) 2021/1832 (2), li ssostitwixxa l-Anness I tar-Regolament (KEE) Nru 2658/87 mill-1 ta’ Jannar 2022, implimenta dawk l-emendi fil-verżjoni tal-2022 tan-NM (“in-NM tal-2022”).

(3)

Fis-SA tal-2022, inħolqot subintestatura separata 4421 20 00 għal “twiebet”. Fin-NM tal-2021, “twiebet tal-fibreboard” ġew ikklassifikati taħt il-kodiċi NM 4421 99 10 b’rata ta’ dazju doganali ta’ 4 %, filwaqt li “twiebet ta’ materjali oħrajn” ġew ikklassifikati taħt il-kodiċi NM 4421 99 91 b’rata ta’ dazju doganali “B’xejn”. Bl-emendi tas-SA tal-2022, fin-NM tal-2022, “twiebet tal-fibreboard” ġew trasferiti għall-kodiċi l-ġdid tan-NM 4421 20 00 b’rata ta’ dazju doganali “B’xejn”.

(4)

Sabiex fl-2022 jiġi impost l-istess trattament tariffarju bħal fin-NM tal-2021, jeħtieġ li tiġi emendata n-NM tal-2022 sabiex jitqiesu l-emendi tas-SA tal-2022 u sabiex tiġi prevista suddiviżjoni separata għal “twiebet tal-fibreboard”.

(5)

Fis-SA tal-2022, inħolqot intestatura separata 8485 għal “Magni għall-manifattura addittiva”, magħrufa wkoll bħala “printers 3D”, li ġiet suddiviża ulterjorment f’kategoriji differenti skont id-diversi depożiti materjali (pereżempju “permezz tad-depożitu tal-metalli”, “permezz tad-depożitu tal-ġibs, tas-siment, taċ-ċeramika jew tal-ħġieġ”, eċċ.”). Il-ħolqien tal-intestatura 8485 implika t-trasferiment ta’ dawk il-magni f’subintestaturi differenti tan-NM tal-2021 (3), u l-ħolqien ta’ kodiċi NM speċifiċi sabiex jingħata l-istess trattament tariffarju bħal fin-NM tal-2021.

(6)

Fin-NM tal-2021, “Magni għall-manifattura addittiva permezz tad-depożitu tar-ramel, tal-konkrit jew depożitu minerali ieħor” ġew ikklassifikati taħt is-subintestatura 8474 80 90“Oħrajn”, b’rata ta’ dazju doganali “Bla ħlas”. Wara l-emendi tas-SA tal-2022, fin-NM tal-2022 dawk il-prodotti huma kklassifikati taħt is-subintestatura l-ġdida 8485 80 00, b’rata ta’ dazju doganali ta’ 1,7 %.

(7)

Sabiex ikompli jingħata l-istess trattament tariffarju bħal fl-2021 għal dawk “Magni għall-manifattura addittiva bl-addittiv ta’ prodotti tar-ramel, tal-konkrit jew prodotti minerali oħra”, jeħtieġ li n-NM tal-2022 tiġi emendata billi tiġi prevista suddiviżjoni separata mingħajr dazju.

(8)

Barra minn hekk, fin-NM tal-2022, partijiet minn dawk il-magni jenħtieġ li jingħataw l-istess trattament tariffarju bħal fin-NM tal-2021. Għalhekk, jixraq li d-deskrizzjoni tal-kodiċi NM 8485 90 10 tiġi emendata sabiex tinkludi fiha l-partijiet tal-“magni għall-manifattura addittiva permezz tad-depożitu tar-ramel, tal-konkrit jew depożitu minerali ieħor”.

(9)

Għaldaqstant jenħtieġ li r-Regolament (KEE) Nru 2658/87 jiġi emendat skont dan.

(10)

Sabiex jiġi żgurat li t-trattament tariffarju fl-2022 għall-printers 3D u l-partijiet tagħhom ikun l-istess bħalma kien fl-2021, l-emendi korrispondenti jenħtieġ li japplikaw mill-1 ta’ Jannar 2022.

(11)

Il-miżuri previsti f’dan ir-Regolament huma f’konformità mal-opinjoni tal-Kumitat tal-Kodiċi Doganali,