(1)

Permezz ta’ ittra tas-6 ta’ Awwissu 2021, il-Finlandja, f’konformità mal-proċedura stabbilita fl-Artikolu 19 tad-Direttiva 2003/96/KE, talbet awtorizzazzjoni biex tapplika rata mnaqqsa ta’ tassazzjoni fuq l-elettriku fornut lill-pompi tas-sħana u lill-bojlers elettriċi li jiġġeneraw is-sħana għan-network tat-tisħin distrettwali, lill-pompi tas-sħana b’output termiku nominali ta’ mill-inqas 0,5 MW mhux konnessi man-network tat-tisħin distrettwali, u lill-pompi tal-ilma li jiċċirkolaw mill-ġdid fl-impjanti tat-tisħin ġeotermali. L-awtoritajiet Finlandiż ipprovdew aktar informazzjoni u kjarifiki b’appoġġ għat-talba fl-4 ta’ Novembru 2021, fis-26 ta’ Jannar 2022, u fis-16 ta’ Frar 2022.

(2)

Permezz tar-rata mnaqqsa prevista, il-Finlandja għandha l-għan li żżid l-elettrifikazzjoni tas-settur tal-użu finali tat-tisħin u li tippromwovi l-produzzjoni tas-sħana mhux mill-kombustjoni sabiex jitnaqqsu l-emissjonijiet. Iż-żieda fl-użu ta’ installazzjonijiet tat-tisħin li jaħdmu bl-elettriku hija mistennija li tagħti benefiċċji ambjentali u klimatiċi.

(3)

Li l-Finlandja titħalla tapplika rata mnaqqsa ta’ tassazzjoni fuq l-elettriku pprovdut lill-pompi tas-sħana u lill-bojlers elettriċi li jiġġeneraw is-sħana għan-network tat-tisħin distrettwali, lill-pompi tas-sħana b’output termiku nominali ta’ mill-inqas 0,5 MW li ma jkunux konnessi man-network tat-tisħin distrettwali u lill-pompi tal-ilma li jiċċirkolaw mill-ġdid fl-impjanti tat-tisħin ġeotermali, ma jmurx lil hinn minn dak li huwa neċessarju biex tiżdied l-elettrifikazzjoni tas-settur tal-użu finali tat-tisħin. Tali installazzjonijiet tat-tisħin jippromwovu t-tranżizzjoni ekoloġika u jnaqqsu l-użu tal-produzzjoni tas-sħana abbażi tal-fjuwils ta’ kombustjoni. Dawk l-installazzjonijiet għadhom ma humiex kompetittivi fis-suq, u l-applikazzjoni ta’ rata tat-taxxa mnaqqsa kif mitluba mill-Finlandja tillimita l-piż amministrattiv. Għalhekk, dik il-miżura x’aktarx li ma twassalx għal distorsjonijiet sinifikanti fil-kompetizzjoni matul il-ħajja tagħha u għalhekk mhux ser taffettwa b’mod negattiv il-funzjonament xieraq tas-suq intern.

(4)

F’konformità mal-Artikolu 19(2) tad-Direttiva 2003/96/KE, kull awtorizzazzjoni mogħtija taħt l-Artikolu 19(1) ta’ dik id-Direttiva għandu jkollha żmien strettament limitat. Sabiex jiġi żgurat li l-perjodu tal-awtorizzazzjoni jkun twil biżżejjed sabiex l-operaturi ekonomiċi rilevanti ma jiġux skoraġġuti milli jagħmlu l-investimenti neċessarji, huwa xieraq li l-awtorizzazzjoni tingħata mill-1 ta’ Jannar 2022 sal-31 ta’ Diċembru 2027. Madankollu, biex ma jiddgħajjifx l-iżvilupp ġenerali futur tal-qafas legali eżistenti, huwa xieraq li jiġi stipulat li, f’każ li l-Kunsill, li jkun qed jaġixxi abbażi tal-Artikolu 113 jew kwalunkwe dispożizzjoni rilevanti oħra tat-Trattat dwar il-Funzjonament tal-Unjoni Ewropea, jintroduċi sistema ġenerali modifikata għat-tassazzjoni tal-prodotti tal-enerġija u l-elettriku li għalihom ma tkunx tista’ tiġi adattata l-awtorizzazzjoni, jenħtieġ li l-awtorizzazzjoni tieqaf tapplika fid-data li fiha dik is-sistema ġenerali modifikata ssir applikabbli.

(5)

Sabiex l-operaturi tal-installazzjoni jkunu jistgħu jsegwu l-promozzjoni tal-pompi tas-sħana u tal-bojlers elettriċi li jiġġeneraw is-sħana għan-network tat-tisħin distrettwali, il-pompi tas-sħana b’output termiku nominali ta’ mill-inqas 0,5 MW mhux konnessi man-network tat-tisħin distrettwali, u l-pompi tal-ilma li jiċċirkolaw mill-ġdid fl-impjanti tat-tisħin ġeotermali, jenħtieġ li jiġi żgurat li l-Finlandja tkun tista’ tapplika t-tnaqqis fit-taxxa, kif mitlub, b’effett mill-1 ta’ Jannar 2022. Billi tipprevedi l-applikazzjoni minn data qabel l-awtorizzazzjoni ssir effettiva, l-aspettattivi leġittimi tal-operaturi ekonomiċi jiġu rispettati, peress li l-awtorizzazzjoni ma taffettwax id-drittijiet u l-obbligi tagħhom.

(6)

Din id-Deċiżjoni hija mingħajr preġudizzju għall-applikazzjoni tar-regoli tal-Unjoni dwar l-għajnuna mill-Istat,