This document is an excerpt from the EUR-Lex website
Document 32008D0049
2008/49/EC: Commission Decision of 12 December 2007 concerning the implementation of the Internal Market Information System (IMI) as regards the protection of personal data (notified under document number C(2007) 6306) (Text with EEA relevance )
2008/49/KE: Deċiżjoni tal-Kummissjoni tat- 12 ta’ Diċembru 2007 dwar l-implimentazzjoni tas-Sistema ta’ Tagħrif tas-Suq Intern (IMI) fir-rigward tal-protezzjoni tad-dejta personali (notifikata taħt id-dokument numru C(2007) 6306) Test b’relevanza għaż-ŻEE
2008/49/KE: Deċiżjoni tal-Kummissjoni tat- 12 ta’ Diċembru 2007 dwar l-implimentazzjoni tas-Sistema ta’ Tagħrif tas-Suq Intern (IMI) fir-rigward tal-protezzjoni tad-dejta personali (notifikata taħt id-dokument numru C(2007) 6306) Test b’relevanza għaż-ŻEE
ĠU L 13, 16.1.2008, p. 18–23
(BG, ES, CS, DA, DE, ET, EL, EN, FR, IT, LV, LT, HU, MT, NL, PL, PT, RO, SK, SL, FI, SV)
No longer in force, Date of end of validity: 03/12/2012; Imħassar b' 32012R1024
Relation | Act | Comment | Subdivision concerned | From | To |
---|---|---|---|---|---|
Repealed by | 32012R1024 |
16.1.2008 |
MT |
Il-Ġurnal Uffiċjali ta’ l-Unjoni Ewropea |
L 13/18 |
DEĊIŻJONI TAL-KUMMISSJONI
tat-12 ta’ Diċembru 2007
dwar l-implimentazzjoni tas-Sistema ta’ Tagħrif tas-Suq Intern (IMI) fir-rigward tal-protezzjoni tad-dejta personali
(notifikata taħt id-dokument numru C(2007) 6306)
(Test b’relevanza għaż-ŻEE)
(2008/49/KE)
IL-KUMMISSJONI TAL-KOMUNITAJIET EWROPEJ,
Wara li kkunsidrat it-Trattat li jistabbilixxi l-Komunità Ewropea,
Wara li kkunsidrat id-Deċiżjoni Nru 2004/387/KE tal-Parlament Ewropew u tal-Kunsill tal-21 ta’ April 2004 dwar it-twassil interoperabbli ta’ servizzi ta’ e-Government pan-Ewropej lill-amministrazzjonijiet pubbliċi, negozji u ċittadini (IDABC) (1), u b’mod partikolari l-Artikolu 4 tagħha,
Billi:
(1) |
Fis-17 ta’ Marzu 2006, rappreżentanti ta’ l-Istati Membri fil-Kumitat Konsultattiv dwar is-Suq Intern (2) approvaw il-Pjan ta’ Implimentazzjoni Globali għas-Sistema ta’ Tagħrif tas-Suq Intern, minn hawn ‘il quddiem l-“IMI”, u l-iżvilupp tagħha immirat lejn it-titjib tal-komunikazzjoni fost l-amministrazzjonijiet ta’ l-Istati Membri. |
(2) |
Fid-Deċiżjoni tagħha COM/2006/3606 ta’ l-14 ta’ Awwissu 2006 dwar it-tielet reviżjoni tal-Programm ta’ Ħidma IDABC 2005 – 2009 il-Kummissjoni ddeċidiet dwar il-finanzjament u l-istabbiliment tas-Sistema ta’ Tagħrif tas-Suq Intern bħala proġett ta’ interess komuni. |
(3) |
Finanzjament ieħor ġie pprovdut mid-Deċiżjoni tal-Kummissjoni COM/2007/3514 tal-25 ta’ Lulju 2007 dwar ir-raba’ reviżjoni tal-Programm ta’ Ħidma IDBAC. |
(4) |
L-IMI hija maħsuba sabiex issostni atti leġislattivi fil-qasam tas-Suq Intern li jirrikjedu l-iskambju ta’ tagħrif bejn l-amministrazzjonijiet ta’ l-Istati Membri, inkluż id-Direttiva 2006/123/KE tal-Parlament Ewropew u tal-Kunsill tat-12 ta’ Diċembru 2006 dwar is-servizzi fis-suq intern (3) u d-Direttiva 2005/36/KE tal-Parlament Ewropew u tal-Kunsill tas-7 ta’ Settembru 2005 dwar ir-rikonoxximent ta’ kwalifiki professjonali (4). |
(5) |
Ladarba trid tiġi żgurata l-protezzjoni tad-dejta personali fl-IMI jinħtieġ li tiġi kkumplimentata d-Deċiżjoni li tistabbilixxi l-IMI f’dan ir-rigward. Ladarba d-diversi kompiti u funzjonijiet tal-Kummissjoni u l-Istati Membri fir-rigward ta’ l-IMI se jinvolvu responsabbiltajiet u obbligi differenti rigward ir-regoli tal-protezzjoni tad-dejta, jinħtieġ li jiġu definiti l-funzjonijiet, ir-responsabbiltajiet u d-drittijiet ta’ l-aċċess rispettivi tagħhom. |
(6) |
L-opinjoni tal-Grupp ta’ Ħidma ta’ l-Artikolu 29 dwar it-temi tal-protezzjoni tad-dejta relatati mas-Sistema ta’ Tagħrif tas-Suq Intern (IMI) (5) issejjaħ b’mod espliċitu għal Deċiżjoni tal-Kummissjoni li tistabbilixxi d-drittijiet u l-obbligi ta’ l-atturi ta’ l-IMI. |
(7) |
L-iskambju ta’ tagħrif b’mod elettroniku bejn l-Istati Membri għandu jikkonforma mar-regoli dwar il-protezzjoni tad-dejta personali fid-Direttiva 95/46/KE tal-Parlament Ewropew u tal-Kunsill ta’ l-24 ta’ Ottubru 1995 dwar il-protezzjoni ta’ individwi fir-rigward ta’ l-ipproċessar ta’ dejta personali u dwar il-moviment liberu ta’ dik id-dejta (6) u r-Regolament (KE) Nru 45/2001 tal-Parlament Ewropew u tal-Kunsill tat-18 ta’ Diċembru 2000 dwar il-protezzjoni ta’ individwi fir-rigward ta’ l-ipproċessar ta’ dejta personali mill-istituzzjonijiet u l-korpi tal-Komunità u dwar il-moviment liberu ta’ dik id-dejta (7). |
(8) |
Bl-għan li jiġu żgurati mistoqsijiet ta’ segwitu bejn l-awtoritajiet kompetenti u fl-ambitu ta’ sitwazzjonijiet li fihom suġġett tad-dejta jkun jixtieq li jappella kontra deċiżjoni amministrattiva negattiva meħuda fuq il-bażi ta’ skambju ta’ tagħrif, id-dejta personali kollha skambjata bejn l-awtoritajiet kompetenti u pproċessata fl-IMI għandha tinżamm għal 6 xhur wara l-għeluq formali ta’ skambju ta’ tagħrif. Wara l-perjodu ta’ sitt xhur id-dejta personali kollha għandha titħassar. Perjodu ta’ żamma ta’ sitt xhur huwa meqjus bħala xieraq minħabba li jikkorrispondi għad-dewmien ta’ proċeduri amministrattivi kif stipulat fil-leġiżlazzjoni Komunitarja li fuq il-bażi tagħha it-tagħrif qed jiġi skambjat, |
ADOTTAT DIN ID-DEĊIŻJONI:
KAPITOLU 1
DISPOŻIZZJONIJIET ĠENERALI
Artikolu 1
Is-Suġġett
Din id-Deċiżjoni tistabbilixxi l-funzjonijiet, id-drittijiet u l-obbligi ta’ l-atturi ta’ l-IMI u l-utenti ta’ l-IMI imsemmija fl-Artikolu 6 fir-rigward tar-rekwiżiti tal-protezzjoni tad-dejta fir-rigward ta’ l-operat tas-Sistema ta’ Tagħrif tas-Suq Intern, minn hawn ‘il quddiem l-“IMI”.
Artikolu 2
Il-kwalità tad-dejta
L-awtoritajiet kompetenti ta’ l-Istati Membri għandhom jiskambjaw u jipproċessaw ulterjorment id-dejta personali biss għall-għanijiet definiti fl-atti Komunitarji rilevanti kif stipulati fl-Anness, li fuq il-bażi tagħhom it-tagħrif qed jiġi skambjat, minn hawn ‘il quddiem “l-atti Komunitarji rilevanti”.
Talbiet għal tagħrif mill-awtoritajiet kompetenti ta’ Stat Membru wieħed għall-ieħor u r-risposti relatati għandhom jiġu bbażati fuq il-mistoqsijiet b’diversi lingwi u s-sezzjonijiet tad-dejta definiti għall-finijiet ta’ l-IMI u jitfasslu mill-Kummissjoni b’kooperazzjoni ma’ l-Istati Membri.
Artikolu 3
Kontrolluri
Ir-responsabbiltajiet tal-kontrollur skond l-Artikolu 2(d) tad-Direttiva 95/46/KE u l-Artikolu 2(d) tar-Regolament (KE) Nru 45/2001 għandhom jiġu eżerċitati flimkien ma’ oħrajn mill-atturi ta’ l-IMI skond l-Artikolu 6 b’konformità mar-responsabbiltajiet rispettivi tagħhom fl-IMI.
Il-kontrolluri għandhom jiżguraw li s-suġġett tad-dejta jkun jista’ jeżerċita b’mod effettiv id-drittijiet tiegħu għat-tagħrif, għall-aċċess, għall-korrezzjoni u għall-oġġezzjoni skond il-leġiżlazzjoni tal-protezzjoni tad-dejta applikabbli. L-atturi ta’ l-IMI għandhom jipprovdu dikjarazzjonijiet ta’ privatezza f’forma xierqa.
Artikolu 4
Iż-żamma tad-dejta personali tas-suġġetti tad-dejta ta’ l-iskambji ta’ tagħrif
Id-dejta personali kollha fir-rigward tas-suġġetti tad-dejta ta’ l-skambji ta’ tagħrif, li huma skambjati bejn l-awtoritajiet kompetenti u pproċessati fl-IMI, għandhom jitħassru sitt xhur wara l-għeluq formali ta’ l-skambju ta’ tagħrif, sakemm it-tħassir qabel dak il-perjodu ma jkunx mitlub espressament mill-awtorità kompetenti lill-Kummissjoni.
Fejn issir din it-talba, il-Kummissjoni għandha taġixxi fuqha fi żmien għaxart ijiem tax-xogħol suġġett għall-ftehim ta’ l-awtorità kompetenti l-oħra involuta.
Artikolu 5
Iż-żamma tad-dejta personali ta’ l-utenti ta’ l-IMI
Id-dejta personali marbuta ma’ l-utenti ta’ l-IMI, imsemmija fl-Artikolu 6, għandha tiġi miżmuma fl-IMI sakemm jibqgħu jkunu utenti ta’ l-IMI u għandha titħassar mill-awtorità kompetenti meta ma jibqgħux aktar utenti.
Id-dejta personali msemmija fl-ewwel paragrafu għandha tinkludi l-isem sħiħ, l-indirizz tal-posta elettronika professjonali, in-numru tat-telefon u n-numru tal-faks professjonali ta’ l-utenti ta’ l-IMI.
KAPITOLU 2
IL-FUNZJONIJIET U R-RESPONSABBILTAJIET FIR-RIGWARD TA’ L-IMI
Artikolu 6
L-atturi u l-utenti ta’ l-IMI
1. Dawn li ġejjin għandhom ikunu l-atturi ta’ l-IMI:
a) |
L-awtoritajiet kompetenti ta’ l-Istati Membri skond l-Artikolu 7; |
b) |
il-koordinaturi skond l-Artikolu 8; |
ċ) |
il-Kummissjoni. |
2. Persuni naturali li qed jaħdmu taħt il-kontroll ta’ awtorità kompetenti jew ta’ koordinatur, minn hawn ‘il quddiem “l-utenti ta’ l-IMI”, biss, jistgħu jużaw l-IMI skond l-Artikolu 9.
Artikolu 7
L-awtoritajiet kompetenti
L-awtoritajiet kompetenti għandhom, għall-għanijiet definiti fl-att Komunitarju rilevanti fuq il-bażi ta’ liema t-tagħrif għandu jiġi skambjat, jiżguraw l-iskambju fl-IMI tat-tagħrif ikkonċernat.
Artikolu 8
Il-koordinaturi ta’ l-IMI
1. Kull Stat Membru għandu jaħtar koordinatur nazzjonali ta’ l-IMI wieħed sabiex jiżgura li l-IMI qed tiġi implimentata fuq livell nazzjonali.
Kull Stat Membru jista’ jaħtar ulterjorment koordinatur delegat ta’ l-IMI wieħed jew aktar skond l-istruttura amministrattiva interna tiegħu sabiex ikun jista’ jwettaq ir-responsabbiltajiet ta’ koordinazzjoni għal qasam leġiżlattiv partikolari, diviżjoni ta’ l-ammimistrazzjoni jew reġjun ġeografiku.
2. Il-Kummissjoni għandha tirreġistra l-koordinaturi nazzjonali ta’ l-IMI fl-IMI u għandha tagħtihom aċċess għall-IMI.
3. Jekk Stat Membru jaħtar koordinatur delegat ta’ l-IMI skond il-paragrafu 1, il-koordinatur nazzjonali ta’ l-IMI għandu jirreġistra l-koordinatur delegat ta’ l-IMI fl-IMI u għandu jagħtih aċċess għall-IMI.
4. Il-koordinaturi għandhom jirreġistraw jew jawtentikaw ir-reġistrazzjoni ta’ l-awtoritajiet kompetenti li jeħtieġu l-aċċess għall-IMI u jiżguraw il-funzjonament effiċjenti tiegħu. Għandhom jagħtu aċċess lill-awtoritajiet kompententi għal dawk l-oqsma leġiżlattivi li jkunu kompetenti fihom.
5. Il-koordinaturi kollha jistgħu jaġixxu bħala awtoritajiet kompetenti. F’każijiet bħal dawn koordinatur jeżerċita l-istess drittijiet ta’ aċċess bħall-awtorità kompetenti.
Artikolu 9
Ir-rwoli ta’ l-utenti ta’ l-IMI
1. L-utenti ta’ l-IMI jisgħu jwettqu wieħed jew aktar mir-rwoli li ġejjin: persuni li jieħdu ħsieb it-talbiet, allokaturi, persuni li jieħdu ħsieb ir-riferimenti u amministratturi tad-dejta lokali.
2. Kull utent ta’ l-IMI għandu jingħata sett definit ta’ drittijiet ta’ aċċess assoċjati mar-rwol ta’ utent tagħhom kif stipulat fl-Artikolu 12.
3. L-utenti kollha ta’ l-IMI jistgħu jfittxu awtorità kompetenti speċifika.
4. L-utenti ta’ l-IMI li jkunu nħatru bħala persuni li jieħdu ħsieb it-talbiet jistgħu jipparteċipaw fl-iskambju ta’ tagħrif f’isem l-awtorità kompetenti tagħhom.
5. L-utenti ta’ l-IMI li jkunu nħatru bħala allokaturi f’awtorità kompetenti jistgħu jattribbwixxu talba għal tagħrif lil wieħed jew aktar mill-persuni li jieħdu ħsieb it-talbiet f’dik l-awtorità.
L-utenti ta’ l-IMI li jkunu nħatru bħala allokaturi f’koordinatur jistgħu jattribbwixxu talba għal tagħrif lil wieħed jew aktar mill-persuni li jieħdu ħsieb ir-riferimenti f’dik l-awtorità.
6. L-utenti ta’ l-IMI f’koordinatur jistgħu jinħatru bħala persuni li jieħdu ħsieb ir-riferimenti.
Jistgħu japprovaw li jintbagħtu talbiet jew tweġibiet minn awtorità kompetenti fejn dan il-proċess ta’ approvazzjoni jkun ġie indikat bħala ħtieġa mill-koordinatur u jistgħu jindikaw ftehim jew nuqqas ta’ ftehim meta l-awtorità kompetenti li qed tagħmel it-talba ma tkunx sodisfatta bit-tweġiba li tkun irċeviet.
7. L-utenti ta’ l-IMI li jkunu nħatru bħala amministraturi tad-dejta lokali jistgħu jagħmlu kwalunkwe wieħed minn dawn li ġejjin:
a) |
jaġġornaw id-dejta personali dwar l-utenti ta’ l-IMI ta’ l-awtorità tagħhom stess; |
b) |
jirreġistraw utenti addizzjonali għall-awtorità tagħhom stess; |
ċ) |
jibdlu l-profili ta’ l-utenti għall-utenti ta’ l-awtorità tagħhom stess. |
Artikolu 10
Il-Kummissjoni
1. Il-Kummissjoni għandha tiżgura d-disponibbiltà u ż-żamma ta’ l-infrastruttura ta’ l-IT li fuqha se titmexxa l-IMI. Għandha tipprovdi sistema b’diversi lingwi li tiffunzjona fil-lingwi uffiċjali kollha kif ukoll help-desk sabiex igħin lill-Istati Membri fl-użu ta’ l-IMI.
2. Il-Kummissjoni se tqiegħed għad-dispożizzjoni tal-pubbliku l-ġabra ta’ mistoqsijiet u tas-sezzjonijiet tad-dejta msemmija fl-Artikolu 2 paragrafu 2.
3. Il-Kummissjoni tista’ tipparteċipa fi skambji ta’ tagħrif f’każijiet speċifiċi biss fejn l-att Komunitarju rilevanti jipprovdi li tagħrif jiġi skambjat bejn l-Istati Membri u l-Kummissjoni.
4. Fil-każijiet imsemmija fit-tielet paragrafu, il-Kummissjoni għandha teżerċita l-istess drittijiet ta’ aċċess bħall-awtorità kompetenti skond l-Artikolu 12.
KAPITOLU 3
DRITTIJIET TA’ AĊĊESS GĦAD-DEJTA PERSONALI
Artikolu 11
Is-suġġett tad-dejta
Għall-għanijiet ta’ dan il-Kapitolu, “is-suġġett tad-dejta” għandu jfisser biss is-suġġett tad-dejta ta’ skambju ta’ tagħrif speċifiku u m’għandux jinkludi l-utenti ta’ l-IMI.
Artikolu 12
Id-drittijiet ta’ aċċess għall-utenti ta’ l-IMI
1. Il-persuni li jieħdu ħsieb it-talbiet ta’ l-awtorità kompetenti għandu jkollhom aċċess biss, matul skambju ta’ tagħrif, għad-dejta personali ta’
a) |
persuni oħra li jieħdu ħsieb it-talbiet ta’ l-istess awtorità kompetenti involuta fl-iskambju ta’ tagħrif ikkonċernat; |
b) |
il-persuna li tieħu ħsieb it-talbiet ta’ l-awtorità kompetenti l-oħra involuta fl-iskambju ta’ tagħrif ikkonċernat; |
ċ) |
il-persuni li jieħdu ħsieb ir-riferimenti tal-koordinaturi li qed jittrattaw l-iskambju ta’ tagħrif ikkonċernat; |
d) |
is-suġġetti tad-dejta ta’ l-iskambju ta’ tagħrif ikkonċernat. Il-persuni li jieħdu ħsieb it-talbiet ta’ l-awtorità kompetenti li qed twieġeb għandu jkollhom aċċess biss għad-dejta personali tas-suġġetti tad-dejta ladarba t-talba tkun ġiet aċċettata mill-awtorità kompetenti tagħhom. |
2. L-allokaturi ta’ awtorità kompetenti għandu jkollhom aċċess biss għad-dejta personali ta’
a) |
il-persuni kollha li jieħdu ħsieb it-talbiet ta’ l-istess awtorità kompetenti; |
b) |
il-persuna li tieħu ħsieb it-talbiet ta’ l-awtorità kompetenti l-oħra involuta fl-iskambju ta’ tagħrif ikkonċernat; |
ċ) |
il-persuni li jieħdu ħsieb ir-riferimenti tal-koordinaturi li qed jittrattaw l-iskambju ta’ tagħrif ikkonċernat. |
M’għandux ikollhom aċċess għad-dejta personali tas-suġġetti tad-dejta.
3. L-allokaturi ta’ koordinatur għandu jkollhom aċċess biss għad-dejta personali ta’
a) |
il-persuni li jieħdu ħsieb ir-riferimenti kollha ta’ l-istess koordinatur; |
b) |
il-persuni li jieħdu ħsieb it-talbiet ta’ l-awtoritajiet kompetenti involuti fl-iskambju ta’ tagħrif ikkonċernat; |
ċ) |
il-persuna li tieħu ħsieb ir-riferimenti tal-koordinatur l-ieħor li qed jittratta l-iskambju ta’ tagħrif ikkonċernat. |
M’għandux ikollhom aċċess għad-dejta personali tas-suġġetti tad-dejta.
4. Il-persuni li jieħdu ħsieb ir-riferimenti għandu jkollhom aċċess biss għad-dejta personali ta’
a) |
il-persuni li jieħdu ħsieb ir-riferimenti tal-koordinaturi involuti fl-iskambju ta’ tagħrif ikkonċernat; |
b) |
il-persuni li jieħdu ħsieb it-talbiet ta’ l-awtoritajiet kompetenti involuti fl-iskambju ta’ tagħrif ikkonċernat. |
M’għandux ikollhom aċċess għad-dejta personali tas-suġġetti tad-dejta.
5. L-amministraturi tad-dejta lokali ta’ awtorità kompetenti għandu jkollhom aċċess biss għad-dejta personali ta’ l-utenti ta’ l-IMI kollha ta’ l-istess awtorità kompetenti.
M’għandux ikollhom aċċess għad-dejta personali tas-suġġetti tad-dejta.
6. L-amministraturi tad-dejta lokali ta’ koordinatur għandu jkollhom aċċess biss għad-dejta personali ta’
a) |
l-utenti kollha ta’ l-IMI ta’ l-istess koordinatur; |
b) |
l-amministraturi kollha tad-dejta lokali ta’ l-awtoritajiet kompetenti u l-koordinaturi li tagħhom huma l-koordinatur. |
M’għandux ikollhom aċċess għad-dejta personali tas-suġġetti tad-dejta.
7. L-amministraturi tad-dejta lokali tal-Kummissjoni għandu jkollhom aċċess biss għad-dejta personali ta’
a) |
l-amministraturi tad-dejta lokali l-oħra kollha tal-Kummissjoni; |
b) |
l-amministraturi tad-dejta lokali kollha tal-koordinaturi nazzjonali ta’ l-IMI. |
L-amministraturi tad-dejta lokali tal-Kummissjoni jistgħu jħassru d-dejta personali tas-suġġetti tad-dejta f’konformità ma’ l-Artikolu 4, imma ma jkunux jistgħu jaraw din id-dejta.
KAPITOLU 4
DISPOŻIZZJONI FINALI
Artikolu 13
Destinatarji
Din id-Deċiżjoni hija indirizzata lill-Istati Membri.
Magħmul fi Brussell, 12 ta’ Diċembru 2007.
Għall-Kummissjoni
Charlie McCREEVY
Membru tal-Kummissjoni
(2) Maħluq bid-Deċiżjoni tal-Kummissjoni 93/72/KEE (ĠU L 26, 3.2.1993, p. 18).
(3) ĠU L 376, 27.12.2006, p. 36.
(4) ĠU L 255, 30.9.2005, p. 22. Id-Direttiva kif l-aħħar emendata bir-Regolament tal-Kummissjoni (KE) Nru 1430/2007 (ĠU L 320, 6.12.2007, p. 3).
(5) Opinion 01911/07/EN, WP 140.
(6) ĠU L 281, 23.11.1995, p. 31. Id-Direttiva kif emendata mir-Regolament (KE) Nru 1882/2003 (ĠU L 284, 31.10.2003, p. 1).
ANNESS
Atti Komunitarji rilevanti imsemmija fl-Artikolu 2
L-atti Komunitarji rilevanti imsemmija fl-Artikolu 2 paragrafu 1 huma:
1. |
Id-Direttiva 2005/36/KE tal-Parlament Ewropew u tal-Kunsill tas-7 ta’ Settembru 2005 dwar ir-rikonoxximent ta’ kwalifiki professjonali (1); |
2. |
Id-Direttiva 2006/123/KE tal-Parlament Ewropew u tal-Kunsill tat-12 ta’ Diċembru 2006 dwar is-servizzi fis-suq intern (2). |
(1) ĠU L 255, 30.9.2005, p. 22. Id-Direttiva kif l-aħħar emendata bid-Direttiva tal-Kunsill 2006/100/KE (ĠU L 363, 20.12.2006, p. 141).