26.10.2007   

MT

Il-Ġurnal Uffiċjali ta’ l-Unjoni Ewropea

L 282/1

(1)

Skond l-ewwel subparagrafu ta’ l-Artikolu 8(2) tar-Regolament tal-Kunsill (KE) Nru 1947/2005 (1), il-Finlandja tista’, suġġetta għal awtorizzazzjoni mill-Kummissjoni, tagħti assistenza rispettivament għal ċerti kwantitajiet ta’ żrieragħ u għal ċerti kwantitajiet ta’ żerriegħa taċ-ċereali prodotti biss fil-Finlandja minħabba l-kundizzjonijiet klimatiċi speċifiċi tagħha.

(2)

Abbażi tat-tagħrif mibgħut mill-Finlandja lill-Kummissjoni, il-Kummissjoni bagħtet rapport lill-Kunsill, b’konformità mat-tieni subparagrafu ta’ l-Artikolu 8(2), tar-Regolament (KE) Nru 1947/2005. Dak ir-rapport juri li l-produtturi taż-żrieragħ u ż-żerriegħa taċ-ċereali fil-Finlandja għandhom aċċess għal skemi oħra ta’ assistenza u għalhekk jistgħu jibbenefikaw minn sussidji li huma maħsuba biex jagħmlu tajjeb għall-kundizzjonijiet klimatiċi li fihom jaħdmu l-bdiewa Finlandiżi.

(3)

Ir-rapport juri wkoll li l-volum tal-produzzjoni taż-żrieragħ taċ-ċereali fil-Finlandja esperjenza xejra ‘l fuq u li l-kwantità taż-żrieragħ taċ-ċereali importata hija żgħira mqabbla mal-kwantità prodotta lokalment. Barra minn hekk, ir-rapport juri li meta l-produzzjoni taż-żrieragħ imkabbra lokalment naqset, l-importazzjonijiet żdiedu u viċiversa, li jwassal għall-konklużjoni li s-sostituzzjoni ta’ l-importazzjoni bi żrieragħ prodotti lokalment hija possibbli u li l-assistenza nazzjonali Finlandiża taf tikkawża tagħwiġ tal-kompetizzjoni mal-prodotti importati.

(4)

Iż-żerriegħa tal-Ħaxix ta’ l-għalf hija mmultiplikata fil-Finlandja f’kundizzjonijiet kważi mill-aqwa u relattivament kompetittivi. Iż-żamma ta’ l-għajnuna akkoppjata għall-produzzjoni tal-Ħaxix ta’ l-għalf bla dubju ser jippermetti li jinżamm livell għoli ta’ produzzjoni taż-żrieragħ tal-Ħaxix ta’ l-għalf fil-Finlandja. L-għoti ta’ assistenza nazzjonali għall-produzzjoni taż-żrieragħ tal-Ħaxix ta’ l-għalf għandu, għaldaqstant, jitneħħa.

(5)

Minħabba r-raġunijiet imsemmija hawn fuq u sabiex is-suq intern jiffunzjona kif suppost, jixraq li titwaqqaf il-possibbiltà li l-Finlandja tagħti assistenza nazzjonali għaż-żrieragħ u ż-żerriegħa taċ-ċereali. Madankollu, sabiex il-bdiewa fil-Finlandja jkunu jistgħu jħejju għas-sitwazzjoni l-ġdida maħluqa mit-tneħħija ta’ l-assistenza nazzjonali, assistenza għall-produzzjoni taż-żrieragħ u ż-żerriegħa taċ-ċereali għandha tinżamm, bl-eċċezzjoni taż-żrieragħ tal-Ħaxix ta’ l-għalf, matul perjodu aħħari u transitorju, u mbagħad titneħħa.

(6)

Bil-għan li jkun hemm reviżjoni intermedja tas-sistema ta’ assistenza nazzjonali, il-Finlandja ikun jeħtiġilha tagħmel rapport dettaljat dwar ir-riżultati ta’ l-assistenza nazzjonali mogħtija.

(7)

Ir-Regolament (KE) Nru 1947/2005 għandu, għaldaqstant, jiġi emendat skond dan,