29.11.2008

MT

Il-Ġurnal Uffiċjali ta’ l-Unjoni Ewropea

418

---

REGOLAMENT TAL-KUMMISSJONI (KE) Nru 990/2006

tat-30 ta’ Ġunju 2006

li jiftaħ sejħiet permanenti għall-offerti għall-esportazzjoni taċ-ċereali miżmuma mill-aġenziji ta’ intervent ta’ l-Istati Membri

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat ir-Regolament tal-Kunsill (KE) Nru 1784/2003 tad-29 ta’ Settembru 2003 dwar l-organizzazzjoni komuni tas-suq taċ-ċereali (1), u b’mod partikolari l-Artikolu 6 tiegħu,

Billi:

(1)	Ir-Regolament tal-Kummissjoni (KEE) Nru 2131/93 (2) jistabbilixxi l-proċedura u l-kondizzjonijiet għall-bejgħ taċ-ċereali li jkunu f’idejn l-aġenziji intermedjarji.

(2)	Ir-Regolament tal-Kummissjoni (KEE) Nru 3002/92 (3) jistabbilixxi regoli komuni dettaljati għall-verifika ta' l-użu u/jew destinazzjoni ta' prodotti minn intervent.

(3)

Minħabba l-qagħda preżenti tas-suq taċ-ċereali, fid-dawl tal-kwantitajiet ta’ ċereali disponibbli fl-istokks ta’ intervent u l-prospetti għall-esportazzjoni ta’ dawk iċ-ċereali lejn pajjiżi terzi, is-sejħiet permanenti għall-offerti għandhom jinfetħu għall-esportazzjoni taċ-ċereali miżmuma mill-aġenziji ta’ intervent ta’ l-Istati Membri. Kull waħda minnhom għandha titqies bħala sejħa separata għall-offerta.

(4)

Biex ikun assigurat li l-operazzjonijiet flimkien mal-monitoraġġ tagħhom jiġu effettwati kif suppost, għandhom jiġu stipulati arranġamenti speċjali ta’ monitoraġġ għas-settur taċ-ċereali. Għal dan il-għan, għandhom jiġu depożitati sigurtajiet biex jassiguraw li l-għanijiet stabbiliti mil-leġiżlazzjoni jintlaħqu mingħajr spejjeż eċċessivi għall-operaturi.

(5)

Għandhom isiru derogi skond il-bżonn għal ċerti regoli, b’mod partikolari għal dawk stipulati fir-Regolament (KEE) Nru 2131/93 fir-rigward tal-prezz li jrid jitħallas, il-limitu taż-żmien biex jintefgħu l-offerti kif ukoll l-ammont ta’ sigurtajiet, u fir-Regolament (KEE) Nru 3002/92 fir-rigward ta’ dak li għandu jitniżżel fuq il-liċenzja ta’ l-esportazzjoni, l-ordnijiet ta’ tneħħija u, fejn japplika, il-kopja tat-T5.

(6)	Biex issir prevenzjoni ta’ l-importazzjoni mill-ġdid, l-esportazzjonijiet skond din is-sejħa għall-offerta għandhom ikunu limitati għal ċerti pajjiżi terzi.

(7)

Skond l-Artikolu 7(2) tar-Regolament (KEE) Nru 2131/93, l-inqas spejjeż tal-ġarr bejn il-post tal-ħżin u l-post tat-tagħbija fil-port jew fil-post tal-ħruġ jiġu rimborżati lil min jirbaħ l-offerta. Għal dawk l-Istati Membri li m’għandhomx portijiet bil-baħar, skond l-Artikolu 7(2a) ta’ dak ir-Regolament l-esportatur li jirbaħ l-offerta jista’ jiġi rimborsat l-inqas spejjeż tal-ġarr bejn il-post tal-ħżin u l-post proprja tal-ħruġ, sa ċertu ammont. Din id-dispożizzjoni għandha tiġi applikata lill-Istati Membri konċernati u għandhom jiġu stabbiliti l-kondizzjonijiet biex tiġi applikata.

(8)	Bil-għan li s-sistema titmexxa b’mod tajjeb, għandu jsir provvediment biex l-informazzjoni li teħtieġ il-Kummissjoni tkun tista’ tiġi trażmessa b’mod elettroniku.

(9)	Il-miżuri stipulati f’dan ir-Regolament huma skond l-opinjoni tal-Kumitat tat-Tmexxija taċ-Ċereali,

ADOTTAT DAN IR-REGOLAMENT:

Artikolu 1

1.   Skond dan ir-Regolament, l-aġenziji ta’ intervent ta’ l-Istati Membri indikati fl-Anness I għandhom joħorġu sejħiet permanenti għall-offerti skond ir-Regolament (KEE) Nru 2131/93 għall-esportazzjoni ta’ kull tip ta’ ċereal li huma għandhom. Il-kwantitajiet massimi taċ-ċereali differenti koperti b’dawn is-sejħiet għall-offerti huma indikati fl-Anness I.

2.   Għall-qamħ komuni u s-segala, kull sejħa għall-offerta għandha tkopri kwantità massima għall-esportazzjoni lejn pajjiżi terzi minbarra l-Albanija, il-Bożnija u Herżegovina, il-Bulgarija, il-Kroazja, l-Ex Repubblika Jugoslava tal-Maċedonja, il-Liechtenstein, il-Montenegro, ir-Rumanija, is-Serbja (4) u l-Iżvizzera.

Fil-każ tax-xgħir, kull sejħa għall-offerta għandha tkopri kwantità massima għall-esportazzjoni lejn pajjiżi terzi minbarra l-Albanija, il-Bożnija u Herżegovina, il-Bulgarija, il-Kanada, il-Kroazja, l-Ex Repubblika Jugoslava tal-Maċedonja, il-Liechtenstein, il-Messiku, il-Montenegro, ir-Rumanija, is-Serbja (4), l-Iżvizzera u l-Istati Uniti ta’ l-Amerka.

Artikolu 2

1.   L-ebda rimborż jew taxxa ta’ l-esportazzjoni jew żieda fix-xahar m’għandha tingħata fuq l-esportazzjonijiet li saru skond dan ir-Regolament.

2.   L-Artikolu 8(2) tar-Regolament (KEE) Nru 2131/93 m’għandux japplika.

3.   Minkejja t-tielet paragrafu ta’ l-Artikolu 16 tar-Regolament (KEE) Nru 2131/93, il-prezz li jrid jitħallas għall-esportazzjoni għandu jkun dak kwotat fl-offerta, mingħajr żieda fix-xahar.

4.   Għar-Repubblika Ċeka, il-Lussemburgu, l-Ungerija, l-Awstrija u s-Slovakkja, l-inqas prezzijiet tal-ġarr bejn il-post tal-ħżin u l-post proprja tal-ħruġ li jinsab barra t-territorju tagħhom għandhom jiġu rimborżati lil min jirbaħ l-offerta, skond l-Artikolu 7(2a) tar-Regolament (KEE) Nru 2131/93, sa ammont iffissat fis-sejħa għall-offerta.

Artikolu 3

1.   Il-liċenzji ta’ l-esportazzjoni għandhom ikunu validi mid-data tal-ħruġ tagħhom skond it-tifsira ta’ l-Artikolu 9 tar-Regolament (KEE) Nru 2131/93 sa l-aħħar tar-raba’ xahar wara l-ħruġ.

2.   L-offerti mitfuħa b’risposta għal kull sejħa għall-offerta miftuħa skond dan ir-Regolament m’għandhomx għalfejn ikollhom magħhom l-applikazzjonijiet tal-liċenzja ta’ l-esportazzjoni sottomessi skond l-Artikolu 49 tar-Regolament tal-Kummissjoni (KE) Nru 1291/2000 (5).

Artikolu 4

1.   Minkejja l-Artikolu 7(1) tar-Regolament (KEE) Nru 2131/93, iż-żmien stipulat għat-tfigħ ta' l-offerti taħt l-ewwel sejħa parzjali għall-offerta għandu jkun id-09.00 (ħin ta’ Brussell) tas-6 ta’ Lulju 2006.

Id-dati ta’ l-għeluq għat-tfigħ tas-sejħiet parzjali għall-offerti sussegwenti għal offerta għandhom ikunu kull nhar ta’ Ħamis fid-09.00 (ħin ta’ Brussell), minbarra t-3 t’Awissu 2006, is-17 t’Awissu 2006, l-24 t’Awissu 2006, it-2 ta’ Novembru 2006, it-28 ta’ Diċembru 2006, il-5 t’April 2007 u s-17 ta’ Mejju 2007, jiġifieri ġimgħat meta m’għandha ssir l-ebda sejħa għall-offerta.

L-aħħar sejħa parzjali għall-offerta għandha tiskadi fid-09.00 (ħin ta’ Brussell) fit-28 ta’ Ġunju 2007.

2.   L-offerti għandhom jintefgħu fl-aġenziji ta’ intervent konċernati fl-indirizzi indikati fl-Anness I.

Artikolu 5

L-aġenzija ta’ intervent konċernata, min jaħżen u min jirbaħ l-offerta għandhom, fuq talba ta’ dan ta’ l-aħħar u permezz ta’ ftehim komuni, jew qabel jew wara ż-żmien ta’ tneħħija mill-ħżin kif jagħżel min jitfa’ l-offerta, jieħdu kampjuni ta’ referenza biex terġa’ ssir analiżi bir-rata ta’ mill-anqas kampjun wieħed għal kull 500 tunnellata u għandhom janalizzaw il-kampjuni. Kull aġenzija ta’ intervent tista’ tkun rappreżentata minn prokuratur, sakemm dan ma jkunx min jaħżen.

Għandhom jittieħdu kampjuni ta’ referenza biex jerġgħu jiġu analizzati fi żmien sebat ijiem mid-data li fiha jagħmel it-talba min jirbaħ l-offerta jew fi żmien tlett ijiem tax-xogħol jekk il-kampjuni jittieħdu hekk kif jitneħħew mill-ħżin.

F’każ ta’ tilwim dwar ir-riżultati ta’ l-analiżi, ir-riżultati għandhom jiġu mgħoddija b’mod elettroniku lill-Kummissjoni.

Artikolu 6

1.   Min jirbaħ l-offerta jrid jaċċetta l-lott kif stabbilit jekk ir-riżultat finali ta’ l-analiżi tal-kampjun jindika kwalità li hi:

(a)	ogħla minn dik speċifikata fl-avviż tas-sejħa għall-offerta;

(b)

ogħla mill-karatteristiċi minimi stipulati għall-intervent iżda inqas mill-kwalità deskritta fl-avviż tas-sejħa għall-offerta, dejjem jekk id-differenzi ma jaqbżux il-limiti li ġejjin: — kilo għal kull ettolitru fir-rigward tal-piż speċifiku, li m’għandux, iżda, ikun inqas minn 75 kg/hl għall-qamħ komuni, 64 kg/hl għax-xgħir u 68 kg/hl għas-segala, — punt ta’ persentaġġ fir-rigward tal-kontenut ta’ umdità, — nofs punt ta’ persentaġġ fir-rigward ta’ l-impuritajiet imsemmija fil-punti B.2 u B.4 ta’ l-Anness I tar-Regolament tal-Kummissjoni (KE) Nru 824/2000 (6), — nofs punt ta’ persentaġġ fir-rigward ta’ l-impuritajiet imsemmija fil-punt B.5 ta’ l-Anness I tar-Regolament (KE) Nru 824/2000, iżda l-persentaġġi ammissibbli għall-frott taċ-ċereali li mhux utiq u l-ergot jibqgħu l-istess.

2.   Jekk ir-riżultat finali ta’ l-analiżi li saru fuq il-kampjuni jindikaw kwalità ogħla mill-karatteristiċi minimi stipulati għall-intervent iżda inqas mill-kwalità deskritta fl-avviż tas-sejħa għall-offerta u d-differenza taqbeż il-limiti stipulati fil-paragrafu 1(b), min jirbaħ l-offerta jista’:

(a)	jaċċetta l-lott kif stabbilit, jew

(b)	jirrifjuta li jieħu l-lott konċernat.

Fil-każ ta’ (b) hawn fuq, min jirbaħ l-offerta għandu jinħeles mill-obbligi kollha marbuta mal-lott imsemmi u s-sigurtajiet għandhom jinħelsu sakemm il-Kummissjoni u l-aġenzija ta’ intervent konċernata jkunu notifikati minnufih permezz tal-formola fl-Anness II.

3.   Meta r-riżultat finali ta’ l-analiżi tal-kampjun jindika kwalità inqas mill-karatteristiċi stipulati għall-intervent, min jirbaħ l-offerta ma jistax ineħħi l-lott imsemmi. Min jirbaħ l-offerta għandu jinħeles mill-obbligi marbuta mal-lott imsemmi u s-sigurtajiet għandhom jinħelsu sakemm il-Kummissjoni u l-aġenzija ta’ intervent konċernata jiġu notifikati minnufih permezz tal-formola stipulata fl-Anness II.

Artikolu 7

Jekk ikun il-każ imsemmi fil-punt (b) ta’ l-ewwel subparagrafu ta’ l-Artikolu 6(2) u ta’ l-Artikolu 6(3), min jirbaħ l-offerta jista’ jitlob lill-aġenzija ta’ intervent biex tipprovdi lott alternattiv ta’ ċereali tal-kwalità mixtieqa, bl-ebda spejjeż oħra. F’dak il-każ, is-sigurtà m’għandhiex tinħeles. Il-lott irid jinbidel fi żmien tlett ijiem mid-data li fiha jagħmel it-talba min jirbaħ l-offerta. Min jirbaħ l-offerta għandu jgħarraf minnufih lill-Kummissjoni dwar dan b’mod elettroniku, permezz tal-formola stipulata fl-Anness II.

Jekk, minħabba tibdil suċċessiv, min jirbaħ l-offerta ma jkunx irċieva lott ta’ sostituzzjoni ta’ kwalità kif stipulata fi żmien xahar mid-data ta’ l-ewwel talba għal sostituzzjoni, min jirbaħ l-offerta għandu jinħeles mill-obbligi kollha u s-sigurtajiet għandhom jinħelsu, sakemm il-Kummissjoni u l-aġenzija ta’ intervent konċernata jiġu infurmati minnufih b’mod elettroniku permezz tal-formola stipulata fl-Anness II.

Artikolu 8

1.   Jekk iċ-ċereali jitneħħew qabel ma jkunu magħrufa r-riżultati ta’ l-analiżi stipulati fl-Artikolu 5, min jirbaħ l-offerta għandu jerfa’ r-riskji kollha miż-żmien li l-lott jitneħħa, mingħajr preġudizzju għal kwalunkwe mezz ta’ appell li min jirbaħ l-offerta jista’ jkollu kontra min jaħżen.

2.   L-ispejjeż tat-teħid ta’ kampjuni u biex issir l-analiżi stipulata fl-Artikolu 5, minbarra dawk imsemmija fl-Artikolu 5, minbarra dawk imsemmija fl-Artikolu 6(3), għandhom jitħallsu mill-Fond Agrikolu Ewropew ta’ Gwida u Garanzija (EAGGF) sa analiżi waħda għal kull 500 tunnellata, minbarra l-ispejjeż ta’ trasferimenti inter-bin. L-ispejjeż ta’ trasferimenti inter-bin u kull analiżi addizzjonali mitluba minn min jirbaħ l-offerta għandha titħallas minnu stess.

Artikolu 9

Minkejja l-Artikolu 12 tar-Regolament (KEE) Nru 3002/92, id-dokumenti marbuta mal-bejgħ taċ-ċereali li saru skond dan ir-Regolament, u b’mod partikolari l-liċenzja ta’ l-esportazzjoni, l-ordni ta’ tneħħija msemmija fl-Artikolu 3(1)(b) tar-Regolament (KEE) Nru 3002/92, id-dikjarazzjoni dwar l-esportazzjoni u, fejn japplika, il-kopja T5 għandu jkollhom:

(a)	għall-qamħ komuni, waħda mill-figuri mniżżla stipulati fl-Anness III(A) ta’ dan ir-Regolament;

(b)	għax-xgħir, waħda mill-figuri mniżżla stipulati fl-Anness III(B) ta’ dan ir-Regolament;

(c)	għas-segala, waħda mill-figuri mniżżla stipulati fl-Anness III(Ċ) ta’ dan ir-Regolament;

Artikolu 10

1.   Is-sigurtà mqiegħda skond l-Artikolu 13(4) tar-Regolament (KEE) Nru 2131/93 għandha tinħeles la darba jinħarġu l-liċenzji ta’ l-esportazzjoni lil dawk li jirbħu l-offerti.

2.   Minkejja l-Artikolu 17(1) tar-Regolament (KEE) Nru 2131/93, l-obbligu biex jesporta għandu jkun kopert b’sigurtà ugwali għad-differenza bejn il-prezz ta’ l-intervent li japplika dakinhar li jingħata l-prezz u l-prezz mogħti, iżda mhux inqas minn EUR 25 kull tunnellata. Nofs din is-sigurtà għandha titqiegħed meta tinħareġ il-liċenzja ta’ l-esportazzjoni u l-bilanċ għandu jingħata qabel ma jitneħħew iċ-ċereali mill-post tal-ħżin.

Artikolu 11

L-aġenziji ta’ intervent konċernati għandhom jikkomunikaw lill-Kummissjoni l-offerti mitfugħa fi żmien sagħtejn mindu jiskadi ż-żmien stipulat għat-tfigħ ta’ l-offerti stipulati fl-Artikolu 4(1). Jekk ma tintefa' l-ebda offert, l-Istat Membru konċernat għandu jikkomunika dan lill-Kummissjoni fl-istess limiti taż-żmien. Jekk l-Istat Membru ma jibgħatx komunikazzjoni lill-Kummissjoni fiż-żmien ta’ skadenza stipulat, il-Kummissjoni għandha tqis li ma ntefgħet l-ebda offerta fl-Istat Membru konċernat.

Il-komunikazzjonijiet imsemmija fl-ewwel subparagrafu għandhom jintbagħtu b’mod elettroniku, skond il-mudell fl-Anness IV. Għandha tintbagħat formola separata għal kull tip ta’ ċereali lill-Kummissjoni għal kull sejaħ għal offerta. Min jitfa’ l-offerta m’għandux jiġi identifikat.

Artikolu 12

1.   Skond il-proċedura msemmija fl-Artikolu 25(2) tar-Regolament (KE) Nru 1784/2003 il-Kummissjoni għandha tistipula, għal kull ċereali konċernat u mill-Istat Membru, il-prezz tal-bejgħ minimu, jew tiddeċiedi li ma tieħu l-ebda azzjoni fir-rigward ta' l-offerti li tirċievi, skond l-Artikolu 10 tar-Regolament (KEE) Nru 2131/93.

2.   Jekk l-iffissar ta’ prezz minimu, skond il-paragrafu 1, jista’ jwassal biex tinqabeż il-kwantità massima disponibbli lil xi Stat Membru, jista’ jiġi stabbilit koeffiċjent ta’ għotja fl-istess ħin għall-kwantitajiet offruti bil-prezz minimu sabiex jikkonformaw mal-kwantità massima disponibbli lil dak l-Istat Membru.

Artikolu 13

Dan ir-Regolament għandu jidħol fis-seħħ fit-tielet ġurnata mill-pubblikazzjoni tiegħu fil- Ġurnal Uffiċjali ta’ l-Unjoni Ewropea.

---

(1)  ĠU L 270, 21.10.2003, p. 78. Regolament kif emendat mir-Regolament tal-Kummissjoni (KE) Nru 1154/2005 (ĠU L 187, 19.7.2005, p. 11).

(2)  ĠU L 191, 31.7.1993, p. 76. Regolament kif emendat l-aħħar mir-Regolament (KE) Nru 749/2005 (ĠU L 126, 19.5.2005, p. 10).

(3)  ĠU L 301, 17.10.1992, p. 17. Regolament kif emendat l-aħħar mir-Regolament (KE) Nru 770/96 (ĠU L 104, 27.4.1996, p. 13).

(4)  Inkluż il-Kosovo, kif definit fir-Riżoluzzjoni tal-Kunsill tas-Sigurtà tan-NU 1244 ta’ l-10 June 1999.

(5)  ĠU L 152, 24.6.2000, p. 1.

(6)  ĠU L 100, 20.4.2000, p. 31.

---

---

---

---

---