15.11.2008

MT

Il-Ġurnal Uffiċjali ta’ l-Unjoni Ewropea

164

---

REGOLAMENT TAL-KUMMISSJONI (KE) Nru 489/2005

tad-29 ta’ Marzu 2005

li jistabbilixxi regoli dettaljati għall-implimentazzjoni tar-Regolament tal-Kummissjoni (KE) Nru 1785/2003 fir-rigward tad-determinazzjoni ta’ ċentri ta’ intervent u t-teħid ta’ ross li għadu fil-fosdqa mill-aġenziji ta’ intervent

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Unjoni Ewropea,

Wara li kkunsidrat ir-Regolament tal-Kummissjoni (KE) Nru 1785/2003 tad-29 ta’ Settembru 2003 dwar l-organizzazzjoni komuni tas-suq tar-ross (1), u b’mod partikolari l-Artikoli 6(3) u 7(5) tiegħu,

Billi:

(1)	Ir-Regolament (KE) Nru 1785/2003 jiddefinixxi l-kwalità standard tar-ross fil-fosdqa li għalih il-prezz ta’ l-intervent huwa ffissat.

(2)

Bil-għan li tkun stimolata l-produzzjoni ta’ ross ta’ kwalità tajba, il-kriterji ta’ l-intervent għandhom jiġu msaħħa. Żieda fil-produzzjoni mit-tħin, u tnaqqis simultanju fit-tolleranza tal-produzzjonijiet li jiddevjaw mill-produzzjoni bażika huma l-modi l-aktar effettivi għall-promozzjoni tal-produzzjoni ta’ ross ta’ kwalità u li jiżgura l-kwalità tar-ross maħżun mill-aġenziji ta’ intervent. Din hija wkoll l-okkażjoni biex jitneħħew ċerti varjetajiet antiki mil-lista ta’ varjetajiet li hemm fl-Anness II għar-Regolament tal-Kummissjoni (KE) Nru 708/98 tat-30 ta’ Marzu 1998 dwar it-teħid ta’ ross li għadu fil-fosdqa mill-aġenziji ta’ intervent u l-iffissar ta’ l-ammonti korrettivi u ż-żidiet u t-tnaqqis fil-prezz li għandhom jiġu applikati (2).

(3)

Biex tkun żgurata l-ġestjoni sodisfaċenti ta’ l-intervent, għandha tkun iffissata kwantità minima għal kull offerta. Madankollu, għandu jkun hemm dispożizzjoni biex ikun iffissat limitu ogħla biex ikunu jistgħu jiġi kkunsidrati d-drawwiet u l-kundizzjonijiet tal-kummerċ li huma rilevanti fis-suq bl-ingrossa f’xi Stati Membri.

(4)

Ross fil-fosdqa li l-kwalità tiegħu ma tippermettix użu jew ħażna xierqa ma għandux jiġi aċċettat għall-intervent. Meta tiġi ffissata l-kwalità minima, għandha tingħata attenzjoni partikolari lill-kundizzjonijiet tat-temp fiż-żoni tal-Komunità fejn jitkabbar ir-ross. Bil-għan li jkunu jistgħu jittieħdu lottijiet uniformi; għandu jkun speċifikat li lott għandu jkun magħmul mill-istess varjetà ta’ ross.

(5)

Ir-Regolament (KE) Nru 1785/2003 jistabbilixxi li l-prezz ta’ l-intervent huwa ffissat għal ross li għadu fil-fosdqa ta’ kwalità ta’ standard speċifiku u li, jekk il-kwalità tar-ross offrut għall-intervent hija differenti minn dak l-istandard ta’ kwalità, il-prezz ta’ l-intervent huwa aġġustat billi jiġu applikati żidiet jew tnaqqis fil-prezz.

(6)

Għall-applikazzjoni taż-żidiet u t-tnaqqis fil-prezz, għandhom jiġu kkunsidrati l-karatteristiċi bażiċi tar-ross fil-fosdqa, biex b’hekk tkun tista’ ssir evalwazzjoni oġġettiva tal-kwalità tiegħu; l-evalwazzjoni ta’ l-imdewwa tiegħu, il-produzzjoni mit-tħin u d-difetti fil-qamħa, bl-użu ta’ metodi sempliċi u effettivi tissodisfa dan ir-rekwiżit.

(7)

Ir-Regolament (KE) Nru 1785/2003 jillimita l-kwantità li tista’ tinxtara mill-aġenziji ta’ intervent għal 75 000 tunnellata għal kull sena tas-suq. Bil-għan li din il-kwantità titqassam b’mod ġust, il-kwantitajiet għal kull Stat Membru produttur għandhom jiġu ffissati, billi jkunu kkunsidrati ż-żoni fuq bażi nazzjonali ffissati mir-Regolament tal-Kummissjoni (KE) Nru 1782/2003 tad-29 ta’ Settembru 2003 li jistabbilixxi regoli komuni għal skemi diretti ta’ appoġġ fi ħdan il-politika agrikola komuni u li jistabbilixxi ċerti skemi ta’ appoġġ għall-bdiewa u li jemenda r-Regolamenti (KEE) Nru 2019/93, (KE) Nru 1452/2001, (KE) Nru 1453/2001, (KE) Nru 1454/2001, (KE) 1868/94, (KE) Nru 1251/1999, (KE) Nru 1254/1999, (KE) Nru 1673/2000, (KEE) Nru 2358/71 u (KE) Nru 2529/2001 (3) u l-produzzjoni medja stabbilita fl-Anness VII ta’ dak ir-Regolament.

(8)

Bil-għan li l-iskema ta’ l-intervent tkun kemm jista’ jkun sempliċi u effiċjenti, l-offerti għandhom jitressqu liċ-ċentru ta’ intervent li huwa l-aktar qrib il-post fejn il-prodotti huma maħżuna u għandhom ikunu stabbiliti dispożizzjonijiet dwar l-ispejjeż għat-trasport tagħhom lejn il-maħżen fejn l-aġenzija ta’ intervent teħodhom fil-pussess.

(9)

Il-kontrolli biex ikun żgurat li l-prodotti offruti huma konformi mar-rekwiżiti fuq il-piż u l-kwalità għandhom jiġu stabbiliti bi preċiżjoni; għandha ssir distinzjoni bejn, minn naħa, l-aċċettazzjoni tal-prodotti offruti wara li tkun ġiet ikkontrollata l-kwantità u l-konformità mar-rekwiżiti minimi ta’ kwalità u, min-naħa l-oħra, l-iffissar tal-prezz li għandu jitħallas lill-applikant wara li jkunu saru t-testijiet meħtieġa biex ikunu identifikati l-karatteristiċi preċiżi ta’ kull lott ibbażati fuq kampjuni rappreżentattivi.

(10)

Għandhom jiġu stabbiliti dispożizzjonijiet speċifiċi li japplikaw għal każijiet fejn il-prodotti jittieħdu fil-pussess mill-imħażen ta’ l-applikant; f’dawn il-każijiet għandha ssir referenza għall-kontijiet ta’ l-istokk ta’ l-applikant, suġġetti għal kontrolli addizzjonali biex ikun żgurat li jkun hemm konformità mar-rekwiżiti fit-teħid tal-pussess mill-aġenzija ta’ intervent.

(11)	Peress li d-dispożizzjonijiet ta’ dan ir-Regolament jissostitwixxu dawk tar-Regolamenti tal-Kummissjoni (KE) Nru 708/98 u (KE) Nru 549/2000 li jiddeterminaw iċ-ċentri (4) ta’ intervent tar-ross, dawk ir-Regolamenti għandhom jiġu revokati.

(12)	Il-miżuri msemmija f’dan ir-Regolament huma skond l-opinjoni tal-Kumitat ta’ Ġestjoni għaċ-Ċereali,

ADOTTAT DAN IR-REGOLAMENT:

Artikolu 1

Iċ-Ċentri ta’ Intervent

Iċ-ċentri ta’ intervent imsemmija fl-Artikolu 6(2) tar-Regolament (KE) Nru 1785/2003 għandhom ikunu dawk elenkati fl-Anness I għal dan ir-Regolament.

Artikolu 2

Xiri mill-aġenziji ta’ intervent

1.   Matul il-perjodu ta’ xiri stabbilit fl-Artikolu 7(1) tar-Regolament (KE) Nru 1785/2003, kull detentur ta’ lott ta’ mhux inqas minn 20 tunnellata ta’ ross fil-fosdqa maħsud fil-Komunità għandu d-dritt li joffri dan ir-ross lill-aġenzija ta’ intervent.

Lott għandu jkun magħmul minn ross ta’ l-istess varjetà.

L-Istati Membri jistgħu jistabbilixxu l-kwantità minima tal-lott imsemmi fl-ewwel sottoparagrafu f’livell ogħla.

2.   Meta lott ikun ikkunsinnat f’diversi tagħbijiet (bi trakk, barkun, ferrovija, eċċ) kull tagħbija għandha tkun konformi mal-karatteristiċi minimi rekwiżiti stabbiliti fl-Artikolu 3, minkejja l-Artikolu 12.

Artikolu 3

Karatteristiċi minimi rekwiżiti

1.   Biex ikun aċċettat għall-intervent, ir-ross fil-fosdqa għandu jkun ta’ kwalità tajba u li jista’ jiġi nnegozjat b’mod ġust.

2.   Ross fil-fosdqa għandu jitqies ta’ kwalità tajba u li jista’ jiġi nnegozjat b’mod ġust jekk:

(a)	huwa ħieles minn irwejjaħ u ma fihx insetti ħajjin,

(b)	il-kontenut tiegħu ta’ mdewwa ma jaqbiżx l-14,5 %,

(c)	il-produzzjoni mit-tħin mhix iktar minn ħames punti taħt il-produzzjoni bażika stipulata fl-Anness II. A,

(d)

il-perċentwali ta’ impuritajiet differenti, il-perċentwali ta’ qmuħ ta’ ross ta’ varjetajiet oħra u l-perċentwali ta’ qmuħ li m’humiex ta’ kwalità difettuża kif definit fl-Anness III għar-Regolament (KE) Nru 1785/2003, ma jaqbżux il-perċentwali massimu stabbilit fl-Anness III għal dan ir-Regolament, bit-tip tar-ross,

(e)	il-livell ta’ radjuattività ma jaqbiżx il-livelli massimi permessi mil-leġiżlazzjoni Komunitarja.

3.   Għall-finijiet ta’ dan ir-Regolament, “impuritajiet differenti” tfisser materjal ieħor barra mir-ross.

Artikolu 4

Żidiet u tnaqqis fil-prezz

Iż-żidiet u t-tnaqqis fil-prezz imsemmija fl-Artikolu 7(2) tar-Regolament (KE) Nru 1785/2003 għandhom japplikaw għall-prezz ta’ l-intervent għar-ross fil-fosdqa offrut għall-intervent billi jkun immultiplikat bis-somma stabbilita tal-perċentwali ta’ żidiet u tnaqqis, kif ġej:

(a)	fejn il-kontenut ta’ l-indewwa tar-ross fil-fosdqa jaqbeż it-13 %, il-perċentwali ta’ tnaqqis fil-prezz tiegħu ta’ l-intervent għandu jkun ugwali għad-differenza bejn il-perċentwali tal-kontenut ta’ l-indewwa tar-ross fil-fosdqa offrut għall-intervent, ikkalkulat sa post deċimali, u 13 %;

(b)

fejn il-produzzjoni mit-tħin tar-ross hija differenti mill-produzzjoni mit-tħin bażika għall-varjetà kkonċernata kif stabbilit fil-Parti A ta’ l-Anness II għal dan, iż-żidiet u t-tnaqqis fil-prezz li għandhom jiġu applikati għal kull varjetà ta’ ross għandhom ikunu kif murija fil-Parti B ta’ l-Anness II;

(c)	fejn id-difetti fil-qamħ tar-ross fil-fosdqa jaqbżu t-tolleranza permessa għall-kwalità standard tar-ross fil-fosdqa, il-perċentwali ta’ tnaqqis li għandu jkun applikat fuq il-prezz ta’ l-intervent għandu jkun kif stabbilit fl-Anness IV, bit-tip ta’ ross;

(d)	fejn il-perċentwali ta’ impuritajiet differenti fir-ross fil-fosdqa jaqbeż 0,1 %, huwa għandu jinxtara bi tnaqqis fil-prezz ta’ l-intervent ta’ 0,02 % għal kull żieda ta’ 0,01 % fid-differenza;

(e)	fejn lott ta’ ross fil-fosdqa huwa offrut għall-intervent għal varjetà partikolari iżda jinkludi qamħ ta’ varjetajiet oħra li jaqbżu t-3 %, il-lott għandu jinxtara bi tnaqqis ta’ 0,1 % fuq il-prezz ta’ l-intervent għal kull żieda ta’ 0,1 % fid-differenza.

Artikolu 5

Kwantitajiet eliġibbli għall-intervent

B’effett mis-sena tas-suq 2004/05, il-kwantitajiet ta’ ross fil-fosdqa eliġibbli għall-intervent għal kull sena għandu jinqasam f’parti speċifika għal kull Stat Membru produttur (parti 1), kif stabbilit fit-tabella fl-Anness V, u parti komuni għall-Komunità kollha magħmula minn kwantitajiet mhux allokati fil-parti 1 (parti 2).

Artikolu 6

Offerti tan-negozjanti

1.   L-offerti kollha għal bejgħ fl-intervent għandhom isiru bil-miktub, u preferibbilment mibgħuta bil-posta elettronika, lil aġenzija ta’ intervent, bl-użu tal-formola mfassla minnha.

Biex ikunu eliġibbli, l-offerti għall-partijiet 1 u 2 għandhom jiġu ppreżentati bejn l-1 u d-9 ta’ April u l-1 u d-9 ta’ Ġunju rispettivament.

2.   L-offerta għandha tinkludi t-tagħrif li ġej:

(a)	l-isem ta’ l-applikant,

(b)	il-post tal-ħażna tar-ross offrut,

(c)	il-kwantità offruta skond l-Artikolu 2,

(d)	il-varjetà,

(e)	il-karatteristiċi prinċipali, inkluża l-produzzjoni totali u l-produzzjoni mit-tħin tal-qamħa sħiħa,

(f)	is-sena tal-ħsad,

(g)	il-kwantità minima ta’ l-offerta, li taħtha l-offerta hija meqjusa mill-applikant li ma tkunx applikabbli,

(h)	iċ-ċentru ta’ intervent li lilu tkun magħmula l-offerta,

(i)	il-prova li l-applikant ikun ippreżenta garanzija ta’ EUR 50 kull tunnellata ta’ ross fil-fosdqa, jew EUR 20 kull tunnellata ta’ ross fil-fosdqa għall-produtturi jew il-gruppi ta’ produtturi li jkunu ssodisfaw ir-rekwiżiti tar-Regolament (KE) Nru 1709/2003 (5),

(j)	id-dikjarazzjoni li l-prodott huwa ta’ oriġini Komunitarja, bl-indikazzjoni tar-reġjun ta’ produzzjoni,

(k)	it-trattamenti tal-pestiċidi mwettqa, bl-ispeċifikazzjoni tad-dożi użati.

3.   L-offerti kollha għandhom isiru lill-aġenzija ta’ intervent ta’ l-Istat Membru produttur fir-rigward taċ-ċentru ta’ intervent fl-Istat Membru li huwa l-eqreb għal fejn ir-ross fil-fosdqa qed jinżamm meta ssir l-offerta. Għall-finijiet ta’ dan ir-Regolament, “l-eqreb ċentru ta’ intervent” tfisser iċ-ċentru fl-Istat Membru produttur li fih ir-ross fil-fosdqa jista’ jkun ikkunsinnat bl-inqas spejjeż.

4.   Ladarba ppreżentata, offerta ma tistgħax tkun mibdula jew irtirata.

5.   Meta offerta mhix eliġibbli, l-aġenzija ta’ intervent għandha tinforma lin-negozjant rilevanti b’dak il-fatt fi żmien 10 ijiem tax-xogħol mill-preżentazzjoni ta’ l-offerta.

Artikolu 7

L-għotja tal-kwantitajiet

1.   Mhux aktar tard mill-ewwel jum ta’ xogħol f’Mejju, l-awtorità kompetenti fl-Istat Membru għandha teżamina jekk il-kwantità totali għall-parti 1 taqbiżx jew le l-kwantità disponibbli. Fejn tinqabeż, hija għandha tapplika ko-effiċjent, sa sitt postijiet deċimali, biex tagħti l-kwantitajiet. Dan il-ko-effiċjent għandu jkun stabbilit fl-ogħla valur possibbli, biex jiżgura (minħabba l-kwantità minima għal kull offerta) li l-kwantità totali mogħtija hija ugwali għal jew inqas mill-kwantità disponibbli. Meta ma jkunx hemm produzzjoni żejda, il-ko-effiċjent ta’ l-għotja għandu jkun ta’ 1.

Fejn xieraq, il-kwantità mhux użata, jew id-differenza bejn il-kwantità disponibbli u l-kwantità totali mogħtija, għandha tkun miżjuda mal-kwantità ffissata għall-parti 2.

L-awtorità kompetenti fl-Istat Membru għandha tinforma lill-Kummissjoni bil-valur tal-ko-effiċjent ta’ l-għotja, il-kwantità totali mogħtija u l-kwantità mhux użata u mgħoddija lill-parti 2, mhux aktar tard mil-jum ta’ wara d-data indikata fl-ewwel sottoparagrafu. Il-Kummissjoni għandha tpoġġi dan it-tagħrif għad-dispożizzjoni tal-pubbliku fuq il-websajt tagħha malajr kemm jista’ jkun.

Mhux aktar tard mit-tieni jum ta’ wara d-data mogħtija fl-ewwel sottoparagrafu, l-awtorità kompetenti fl-Istat Membru għandha tinnotifika lill-applikant li l-offerta tkun ġiet aċċettata għal kwantità mogħtija li tkun ugwali għall-kwantità offerta mmultiplikata bil-ko-effiċjent ta’ l-għotja. Madankollu, jekk din il-kwantità hija taħt il-kwantità minima indikata fl-offerta, din għandha tkun imnaqqsa għal 0.

2.   Għall-parti 2, l-Istati Membri għandhom jinfurmaw lill-Kummissjoni, mhux aktar tard mill-ewwel jum ta’ xogħol f’Lulju, bil-kwantitajiet, fejn xieraq, offruti bil-kwantitajiet minimi speċifikati. Din in-notifika għandha ssir b’mod elettroniku bl-użu tal-mudell fl-Anness VI. Għandha ssir anke jekk ma ġiet offruta l-ebda kwantità ta’ ross.

Il-Kummissjoni tiġbor l-offerti kollha ppreżentati fl-Istati Membri u teżamina jekk il-kwantità totali offruta taqbiżx jew le l-kwantità disponibbli. Meta ma jkunx hemm produzzjoni żejda, għandha tapplika ko-effiċjent, sa sitt postijiet deċimali, biex tagħti l-kwantitajiet. Dan il-ko-effiċjent għandu jkun stabbilit għall-ogħla valur possibbli, biex ikun żgurat (minħabba l-kwantitajiet minimi ta’ kull offerta) li l-kwantità totali offruta hija ugwali għal jew inqas mill-kwantità disponibbli. Meta ma jkunx hemm produzzjoni żejda, il-ko-effiċjent ta’ l-għotja għandu jkun ta’ 1.

Mhux aktar tard mit-tielet jum ta’ xogħol wara l-pubblikazzjoni tal-ko-effiċjent ta’ l-għotja f’Il-Ġurnal Uffiċjali ta’ l-Unjoni Ewropea, l-awtorità kompetenti fl-Istat Membru għandha tinnotifika lill-applikant li l-offerta ġiet aċċettata għal kwantità ta’ għotja ugwali għall-kwantità offruta mmultiplikata bil-ko-effiċjent ta’ l-għotja. Madankollu, jekk din il-kwantità hija taħt il-kwantità minima indikata fl-offerta, hija għandha titnaqqas għal 0.

3.   Il-garanzija msemmija fil-paragrafu 6(2)(i) għandha tkun rilaxxata proporzjonalment għall-kwantità offruta iżda mhux mogħtija. Għall-kwantità mogħtija, din għandha tkun rilaxxata fit-totalità tagħha ladarba 95 % tal-kwantità tkun ġiet ikkunsinnata skond l-Artikolu 9.

Artikolu 8

L-ispejjeż tat-trasport

1.   L-ispejjeż biex jiġu trasportati l-prodotti mill-maħżen fejn huma maħżuna fil-mument li l-offerta hija ppreżentata lill-eqreb ċentru ta’ intervent, għandu jħallashom l-applikant.

2.   Jekk l-aġenzija ta’ intervent ma tieħux ir-ross fil-fosdqa fl-eqreb ċentru ta’ intervent, l-ispejjeż addizzjonali ta’ trasport għandhom jitħallsu mill-aġenzija ta’ intervent.

3.   L-ispejjeż imsemmija fil-paragrafi 1 u 2 għandhom ikunu stabbiliti mill-aġenzija ta’ intervent.

Artikolu 9

Il-kunsinna

1.   L-aġenzija ta’ intervent għandha tiffissa d-data u ċ-ċentru ta’ intervent għall-kunsinna u għandha tinnotifika minnufih lill-applikant bit-tnejn. Dawn il-kundizzjonijiet jistgħu jiġu appellati sa mhux aktar tard minn jumejn ta’ xogħol minn meta tasal in-notifika.

2.   Il-kunsinna liċ-ċentru ta’ intervent għandha ssir mhux aktar tard mit-tmiem it-tielet xahar wara li tasal l-offerta u f’kull każ mhux aktar tard mill-31 ta’ Awwissu tas-sena tas-suq attwali.

Fil-każ ta’ kunsinni maqsumin fiż-żmien, l-aħħar parti tal-lott għandha tkun ikkunsinnata skond l-ewwel sottoparagrafu.

3.   L-aġenzija ta’ intervent għandha tieħu l-prodotti fil-preżenza ta’ l-applikant jew ta’ l-aġent awtorizzat tiegħu/tagħha.

Artikolu 10

It-teħid tal-pussess mill-aġenzija ta’ intervent

1.   Ir-ross offrut għandu jittieħed mill-aġenzija ta’ intervent meta l-kwantità minima u l-karatteristiċi stabbiliti fl-Artikoli 2 u 3 ikunu ġew stabbiliti mill-aġenzija ta’ intervent jew mill-aġent tagħha għall-prodotti kkunsinnati lill-maħżen ta’ l-intervent, skond l-Artikolu 12.

2.   Il-kwantità kkunsinnata għandha tiġi stabbilita bil-piż fil-preżenza ta’ l-applikant u rappreżentant ta’ l-aġenzija ta’ intervent, li ma għandu jkollu l-ebda relazzjoni ma’ l-applikant. Il-persuna responsabbli mill-maħżen tista’ tirrappreżenta lill-aġenzija ta’ intervent.

3.   F’dan il-każ l-aġenzija ta’ intervent stess għandha twettaq kontroll fi żmien 30 jum wara li tkun saret il-kunsinna. Ta’ l-inqas għandu jkun ikkontrollat il-piż, bl-użu ta’ miżuri volumetriċi.

Jekk, meta jkun intuża l-metodu volumetriku msemmi fl-ewwel sottoparagrafu, il-piż huwa inqas minn 6 % taħt il-kwantità rreġistrata fil-kotba tal-persuna responsabbli mill-maħżen, din il-persuna għandha tħallas l-ispejjeż kollha relatati mal-kwantitajiet neqsin hekk stabbiliti f’użin sussegwenti mqabbla mal-piż irreġistrat fil-kotba fil-mument tat-teħid tal-pussess.

Jekk, meta jkun intuża l-metodu msemmi fl-ewwel sottoparagrafu, il-piż huwa iktar minn 6 % taħt il-kwantità rreġistrata fil-kotba tal-persuna responsabbli mill-maħżen, il-prodotti għandhom jintiżnu immedjatament. L-ispejjeż involuti għall-użin għandhom jitħallsu mill-persuna responsabbli mill-maħżen jekk il-piż stabbilit huwa inqas mill-piż irreġistrat fil-kotba. Fil-każ oppost, l-aġenzija ta’ intervent għandha tħallas l-ispejjeż ta’ użin.

Artikolu 11

It-teħid tal-pussess fil-maħżen ta’ l-applikant

1.   L-aġenzija ta’ intervent tista’ tieħu r-ross fil-fosdqa mill-post fejn huwa maħżun meta tkun saret l-offerta pjuttost milli miċ-ċentru ta’ intervent imsemmi mill-applikant. F’dan il-każ il-prodotti meħuda fil-pussess għandhom ikunu maħżuna separatament minn prodotti oħra.

Id-data ta’ teħid tal-pussess għandha taqbel mad-data li fiha l-karatteristiċi minimi elenkati fir-reġistru ta’ teħid tal-pussess imsemmija fl-Artikolu 14 ikunu ġew irreġistrati.

2.   Fejn it-teħid tal-pussess isir skond il-kundizzjonijiet stabbiliti fil-paragrafu 1, il-kwantità tista’ tkun stabbilita fuq il-bażi tal-kotba ta’ l-istokkijiet — magħmula skond speċifikazzjonijiet professjonali u skond ir-rekwiżiti ta’ l-aġenzija ta’ intervent — kemm-il darba:

(a)	il-kotba juru: — il-piż irreġistrat bl-użin, imwettaq mhux aktar minn 10 xhur qabel, — il-karatteristiċi tal-kwalità fil-mument ta’ l-użin, b’mod partikolari l-kontenut ta’ l-indewwa, — kull trasferiment minn silo għal ieħor, — u l-ipproċessar imwettaq;

(b)	il-persuna responsabbli mill-maħżen tiddikjara li l-lott offrut jaqbel f’kull dettall mat-tagħrif fil-kotba.

Il-piż li jrid jiġi rreġistrat għandu jkun il-piż imdaħħal fil-kotba, aġġustat kif xieraq biex titqies kull differenza bejn il-kontenut ta’ l-indewwa stabbilit waqt l-użin u l-kontenut stabbilit fuq il-bażi tal-kampjun rappreżentattiv.

Madankollu, l-aġenzija ta’ intervent għandha twettaq kontroll volumetriku fi żmien 30 jum mid-data tat-teħid tal-pussess. Kull differenza bejn il-kwantità mwieżna u l-kwantità stimata bl-użu tal-metodu volumetriku ma għandhiex tkun aktar minn 6 %.

Jekk, meta jkun intuża l-metodu volumetriku msemmi fit-tielet sottoparagrafu, il-piż huwa inqas minn 5 % taħt il-kwantità rreġistrata fil-kotba tal-persuna responsabbli mill-maħżen, din il-persuna għandha tħallas l-ispejjeż kollha li jirrigwardaw il-kwantitajiet neqsin hekk stabbiliti fl-użin sussegwenti mqabbel ma’ l-użin irreġistrat fil-kotba fil-mument tat-teħid tal-pussess.

Jekk, meta jintuża l-metodu msemmi fit-tielet sottoparagrafu, il-piż huwa aktar minn 6 % taħt il-kwantità rreġistrata fil-kotba tal-persuna responsabbli mill-maħżen, din il-persuna għandha tiżen ir-ross immedjatament. Il-persuna responsabbli mill-maħżen għandha tħallas l-ispejjeż ta’ l-użin jekk l-użin hekk stabbilit huwa inqas mill-piż kif irreġistrat. Il-FAEGG għandha tħallas l-ispejjeż fil-każ oppost.

Artikolu 12

Il-verifika tar-rekwiżiti tal-kwalità

1.   Sabiex ikunu vverifikati r-rekwiżiti tal-kwalità mitluba taħt l-Artikolu 3 għall-aċċettazzjoni tar-ross fl-intervent, għandhom jittieħdu kampjuni mill-aġenzija ta’ intervent fil-preżenza ta’ l-applikant jew ta’ aġent debitament awtorizzat tiegħu/tagħha.

Għandhom jinġabru tliet kampjuni rappreżentattivi, kull wieħed jiżen mill-inqas kilogramma. Kull wieħed għandu jmur għand:

(a)	l-applikant,

(b)	il-maħżen fejn għandu jseħħ it-teħid tal-pussess,

(c)	l-aġenzija ta’ intervent.

Biex jinħadmu l-kampjuni rappreżentattivi, in-numru ta’ kampjuni individwali li għandhom jittieħdu għandhom jinkisbu billi ssir diviżjoni tal-kwantità b’10 tunnellati. Kull kampjun individwali għandu jiżen l-istess. Il-kampjuni rappreżentattivi għandhom ikunu magħmula mis-somma tal-kampjuni individwali, diviżi bi tlieta.

Ir-rekwiżiti tal-kwalità mitluba għandhom jiġu vverifikati bl-użu tal-kampjun rappreżentattiv li għandu jmur fil-maħżen fejn għandu jseħħ it-teħid tal-pussess.

2.   Meta r-ross jittieħed barra mill-maħżen ta’ l-applikant, għandhom jittieħdu kampjuni rappreżentattivi għal kull parti tal-kunsinna (bi trakk, barkun, ferrovija) skond il-kundizzjonijiet stabbiliti fil-paragrafu 1.

Qabel id-dħul tagħha fil-maħżen ta’ l-intervent l-eżami ta’ kull parti tal-kunsinna tista’ tkun limitata għal kontroll tal-kontenut ta’ l-indewwa u l-livell ta’ impurità u l-verifika li m’humiex preżenti insetti ħajjin. Madankollu, jekk aktar tard meta l-kontroll ikun intemm jirriżulta li parti mill-kunsinna ma tissodisfax ir-rekwiżiti minimi tal-kwalità, il-lott għandu jiġi miċħud għat-teħid tal-pussess. Il-lott kollu għandu jiġi rtirat. L-applikant għandu jħallas l-ispejjeż ta’ din l-operazzjoni.

Jekk l-aġenzija ta’ intervent fi Stat Membru hija kapaċi tikkontrolla r-rekwiżiti minimi kollha tal-kwalità għal kull parti ta’ kunsinna qabel ma tidħol fil-maħżen, hija għandha tirrifjuta t-teħid tal-pussess ta’ kull parti ta’ kunsinna li tonqos milli tissodisfa dawn ir-rekwiżiti.

3.   Meta t-teħid tal-pussess isir fil-maħżen ta’ l-applikant, kif stipulat fl-Artikolu 11, il-kontroll għandu jkun ibbażat fuq kampjun rappreżentattiv tal-lott offrut skond il-kundizzjonijiet stabbiliti fil-paragrafu 1.

Il-kontroll għandu jistabbilixxi li l-prodotti huma konformi mar-rekwiżiti minimi tal-kwalità. Jekk dan ma jkunx il-każ, il-lott ma għandux jittieħed.

Artikolu 13

L-iffissar tal-karatteristiċi tar-ross

1.   Meta l-prodotti huma aċċettati, ladarba l-eżami taħt l-Artikolu 12 ikun twettaq il-karatteristiċi preċiżi tal-prodotti għandhom ikunu identifikati bil-ħsieb li jkun stabbilit il-prezz li għandu jitħallas lill-applikant. Dan il-prezz għandu jkun stabbilit għal-lott offrut fuq il-bażi tal-medja mwieżna tar-riżultati tat-test fuq il-kampjun rappreżentattiv kif definit fl-Artikolu 12.

Ir-riżultati tat-test għandhom ikunu nnotifikati lill-applikant fir-reġistru tat-teħid tal-pussess kif stipulat fl-Artikolu 14.

2.   Jekk l-applikant jikkontesta r-riżultat tat-test imwettaq biex ikun determinat il-prezz skond il-paragrafu 1, laboratorju approvat mill-awtoritajiet kompetenti għandu jwettaq analiżi dettaljata oħra tal-karatteristiċi tal-prodotti bl-użu ta’ kampjun rappreżentattiv ġdid magħmul minn partijiet ugwali ta’ kampjuni miżmuma mill-applikant u l-aġenzija ta’ intervent. Fil-każ ta’ partijiet tal-kunsinni tal-lott offrut, ir-riżultat għandu jinkiseb mill-medja mwieżna tar-riżultati ta’ l-analiżi tal-kampjuni rappreżentattivi ġodda ta’ kull parti tal-kunsinna.

Ir-riżultat ta’ dan l-analiżi għandu jkun finali u għandu jiddeċiedi l-prezz li għandu jitħallas lill-applikant. L-ispiża biex issir din l-analiżi għandha titħallas mill-parti telliefa.

Artikolu 14

Ir-reġistru tat-teħid tal-pussess

Għal kull lott għandu jitħejja reġistru ta’ teħid tal-pussess mill-aġenzija ta’ intervent. L-applikant jew l-aġent tiegħu/tagħha jista’ jkun preżenti meta r-reġistru jkun qed jitħejja.

Huwa għandu jindika:

(a)	id-data li fiha l-kwantità u l-karatteristiċi minimi ġew ivverifikati,

(b)	il-varjetà u l-piż ikkunsinnat,

(c)	in-numru ta’ kampjuni meħuda biex isir il-kampjun rappreżentattiv,

(d)	il-karatteristiċi fiżiċi u kwalitattivi osservati.

Artikolu 15

L-iffissar tal-prezz li għandu jitħallas lill-applikant u l-ħlas

1.   Il-prezz li għandu jitħallas lill-applikant għandu jkun dak iffissat skond l-Artikolu 7(2) tar-Regolament (KE) Nru 1785/2003 għal prodotti kkunsinnati mhux maħtuta fil-maħżen u validi fid-data ffissata bħala l-ewwel jum ta’ kunsinna, filwaqt li jitqiesu ż-żidiet u t-tnaqqis fil-prezz stipulat fl-Artikolu 4 u d-dispożizzjonijiet ta’ l-Artikolu 8 ta’ dan ir-Regolament.

Meta r-ross jittieħed mill-maħżen ta’ l-applikant skond l-Artikolu 11, il-prezz li għandu jitħallas għandu jiġi stabbilit fuq il-bażi tal-prezz ta’ l-intervent validu fid-data li fiha tkun aċċettata l-offerta, aġġustat biż-żidiet u t-tnaqqis tal-prezz applikabbli, u mnaqqas bl-ispejjeż ta’ trasport l-aktar vantaġġużi bejn il-post fejn ir-ross fil-fosdqa jittieħed fil-pussess u ċ-ċentru ta’ intervent l-aktar qrib, u mill-ispejjeż tat-tneħħija mill-maħżen. Dawn l-ispejjeż għandhom ikunu ddeterminati mill-aġenzija ta’ intervent.

2.   Il-ħlas għandu jsir bejn it-32 u s-37 jum wara l-jum tat-teħid tal-pussess imsemmi fl-Artikolu 10(1) jew l-Artikolu 11(1).

Fejn japplika l-Artikolu 13(2), il-ħlas għandu jsir mill-aktar fis possibbli wara li r-riżultati ta’ l-aħħar test ikunu nnotifikati lill-applikant.

Meta l-applikanti għandhom jippreżentaw fattura qabel ma jkunu jistgħu jitħallsu u meta din il-fattura mhix ippreżentata fil-limitu ta’ żmien stipulat fl-ewwel sottoparagrafu, il-ħlas għandu jsir fi żmien ħamest ijiem tax-xogħol mill-preżentazzjoni proprja tal-fattura.

Artikolu 16

Il-monitoraġġ tar-ross maħżun

Operaturi li jaħżnu l-prodotti mixtrija f’isem l-aġenzija ta’ intervent għandhom regolarment jimmonitorjaw il-preżenza tagħhom u l-istat ta’ preżervazzjoni tagħhom u għandhom jinfurmaw lill-aġenzija minnufih b’kull problema f’dan ir-rigward.

L-aġenzija ta’ intervent għandha tikkontrolla l-kwalità tal-prodott maħżun mill-inqas darba fis-sena. It-teħid tal-kampjun għal dan il-għan jista’ jsir matul l-inventarju annwali mitlub mir-Regolament tal-Kummissjoni (KE) Nru 2148/96 (6).

Artikolu 17

Il-kontroll tal-livell ta’ kontaminazzjoni radjuattiva

Ir-ross għandu jiġi mmonitorjat għall-kontaminazzjoni radjuattiva biss jekk is-sitwazzjoni titlob hekk u għall-perjodu meħtieġ. Fejn ikun meħtieġ, it-tul u l-għan tal-kontrolli għandhom ikunu ddeterminati skond il-proċeduri msemmija fl-Artikolu 26(2) tar-Regolament (KE) Nru 1785/2003.

Artikolu 18

Regoli nazzjonali

L-aġenziji ta’ intervent għandhom, meta jkun meħtieġ, jadottaw il-proċeduri ta’ teħid tal-pussess u kundizzjonijiet addizzjonali, kompatibbli mad-dispożizzjonijiet ta’ dan ir-Regolament, biex jikkunsidraw kull kundizzjoni li tipprevali fl-Istat Membru li jappartjenu għalih.

Artikolu 19

Revoka

Ir-Regolamenti (KE) Nru 708/98 u (KE) Nru 549/2000 huma b’dan revokati.

Artikolu 20

Dħul fis-seħħ

Dan ir-Regolament għandu jidħol fis-seħħ fil-jum wara dak tal-pubblikazzjoni tiegħu fil-Ġurnal Uffiċjali ta’ l-Unjoni Ewropea.

Dan għandu japplika mill-1 ta’ April 2005.

---

(1)  ĠU L 270, 21.10.2003, p. 96.

(2)  ĠU L 98, 31.3.1998, p. 21. Ir-Regolament kif emendat l-aħħar bir-Regolament (KE) Nru 1107/2004 (ĠU L 211, 12.6.2004, p. 14).

(3)  ĠU L 270, 21.10.2003, p. 1. Ir-Regolament kif emendat l-aħħar bir-Regolament tal-Kummissjoni (KE) Nru 118/2005 (ĠU L 24, 27.1.2005, p. 15).

(4)  ĠU L 67, 15.3.2000, p. 14. Ir-Regolament kif emendat l-aħħar bir-Regolament (KE) Nru 1091/2004 (ĠU L 209, 11.6.2004, p. 8).

(5)  ĠU L 243, 27.9.2003, p. 92.

(6)  ĠU L 288, 9.11.1996, p. 6.

---

---

---

---

---

---

---