12.12.2006

MT

Il-Ġurnal Uffiċjali ta’ l-Unjoni Ewropea

424

---

DEĊIŻONI TAL-KUMMISSJONI

tas-6 ta’ Ottubru 2005

li tikkonċerna miżura ta’ protezzjoni fir-rigward ta’ l-influwenza tat-tjur f’bosta pajjiżi terzi

(innotifikata taħt dokument numru C(2005) 3704)

(Test b’ rilevanza għaż-ŻEE)

(2005/692/KE)

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 91/496/KEE tal-15 ta’ Lulju 1991 li tistabbilixxi l-prinċipji li jirregolaw l-organizzazzjoni tal-kontrolli veterinarji fuq l-annimali li jidħlu fil-Komunità minn pajjiżi terzi u li temenda d-Direttivi 89/662/KEE, 90/425/KEE u 90/675/KEE (1), u b’mod partikolari l-Artikolu 18(1) u (6) tagħha,

Wara li kkunsidrat id-Direttiva tal-Kunsill 97/78/KE tat-18 ta’ Diċembru 1997 li tistipola l-prinċipji li jirregolaw l-organizzazzjoni tal-kontrolli veterinarji fuq prodotti li jkunu ser jidħlu fil-Komunità minn pajjiżi terzi (2), u b’mod partikolari l-Artikolu 22 (1), (5) u (6) tagħha,

Billi:

(1)

L-influwenza tat-tjur hija marda virali li tittieħed fit-tjur u l-għasafar, li hija kawża ta’ mortalità u ta’ tfixkil li jistgħu jaslu sa proporzjonijiet epiżotiċi u li jistgħu jwasslu għall-perikolu serju għas-saħħa ta’ l-annimali u tal-pubbliku u b’ hekk inaqqsu b’ mod konsiderevoli l-profitti tal-biedja tat-tjur.

(2)	Id-Deċiżjoni tal-Kummissjoni 2004/122/KEE tas-6 ta’ Frar 2004 li tikkonċerna ċerti miżuri ta’ protezzjoni relatati ma’ l-influwenza tat-tjur f’bosta pajjiżi terzi (3) tissospendi ċerti importazzjonijiet ta’ tjur u prodotti tat-tjur minn pajjiżi terzi li huma affettwati.

(3)	Il-Mongolja mhix koperta mid-Deċiżjoni 2004/122/KE iżda dak il-pajjiż terz rrapporta tfaqqigħa ta’ l-influwenza tat-tjur fl-għasfur salvaġġ. Għalhekk, l-importazzjonijiet fil-Komunità ta’ għasafar li mhumiex tjur, inklużi l-għasafar li jinqabdu barra, minn dak il-pajjiż terz għandha tiġi sospiża.

(4)

Id-Deċiżjoni 2004/122/KEE hija applikabbli sat-30 ta’ Settembru 2005. Madanakollu, it-tfaqqigħ ta’ l-influwenza avjana għadu jseħħ fil-pajjiżi terzi li jissemmew fid-Deċiżjoni 2004/122/KEE u fil-Mongolja. Fid-dawl tas-sitwazzjoni inkwetanti f’ dawk il-pajjiżi terzi, il-miżuri ta’ protezzjoni għadhom meħtieġa għall-importazzjonijiet minn dawk il-pajjiżi terzi.

(5)	Huwa xieraq li jiġu stipolati regoli speċifiċi għall-importazzjoni ta’ għasafar li mhumiex tjur, għasafar domestiċi jew pets u rix mhux trattat mir-Russja permezz ta’ att separat.

(6)	Id-Deċiżjoni 2004/122/KE ġiet emendata bosta drabi sabiex tieħu in konsiderazzjoni is-sitwazzjoni evoluta fir-rigward ta’ l-influwenza tat-tjur f’ pajjiżi terzi.

(7)	Għar-raġunijiet ta’ ċarezza u trasparenza, d-Deċiżjoni 2004/122/KEE għandha tiġi rrevokata u sostitwita minn din id-Deċiżjoni.

(8)	Il-miżuri stipolati f’din id-Deċiżjoni huma f’konformità ma’ l-opinjoni tal-Kumitat Permanenti dwar il-Katina Alimentari u s-Saħħa ta’ l-Annimali,

ADOTTAT DIN ID-DEĊIŻJONI:

Artikolu 1

1.   L-Istati Membri għandhom jissospendu l-importazzjoni mit-Tajlandja ta’:

a)	laħam frisk tat-tjur, ta’ għasafar li ma jtirux u għasafar salvaġġ li għandu r-rix;

b)	preparazzjonijiet ta’ laħam u ta’ prodotti tal-laħam li jikkonsistu minn, jew li fihom laħam ta’ l-ispeċi li jisemmew fil-punt (a);

c)	ikel tal-pets nej u materjal ta’ għalf mhux ipproċessat li fihom kull parti ta’ dawn l-ispeċi;

d)	bajd li huwa intenzjonat għall-konsum mill-bniedem; kif ukoll

e)	laħam minn tjur tal-kaċċa minn kwalunkwe għasfur.

2.   Permezz tad-deroga mill-paragrafu 1, l-Istati Membri għandhom jawtorizzaw l-importazzjoni tal-prodotti li huma koperti minn dan l-Artikolu li nkisbu minn għasafar li inqatlu qabel l-1 ta’ Jannar 2004.

3.   Fiċ-ċertifikati veterinarji/fid-dokumenti kummerċjali li jakkumpanjaw il-konsenji tal-prodotti li jissemmew fil-paragrafu 2 il-kliem li ġej kif japplikaw b’ mod xieraq għall-ispeċi għandhom jiġu inklużi:

4.   Permezz tad-deroga mill-paragrafu 1, l-Istati Membri għandhom jawtorizzaw l-importazzjoni ta’ prodotti tal-laħam li jikkonsistu minn, jew li fihom laħam ta’ tjur, ta’ għasafar li ma jtirux u ta’ tjur salvaġġ bir-rix imrobbi mill-biedja jew salvaġġ, meta l-laħam minn dawn l-ispeċi ikun għadda minn wieħed mi-trattamenti speċifiċi li jisemma fil-punti B, C, jew D tal-Parti 4 ta’ l-Anness II mad-Deċiżjoni tal-Kummissjoni 2005/432/KE (4).

Artikolu 2

L-Istati Membri għandhom jissospendu l-importazzjoni miċ-Ċina ta’:

a)	laħam frisk tat-tjur;

b)	preparazzjonijiet tal-laħam u tal-prodotti tal-laħam li jikkonsistu minn, jew li fihom laħam tat-tjur;

c)	ikel nej ta’ annimali domestiċi u materjal ta’ l-għalf mhux ipproċessat li jkun fihom kull parti ta’ tjur;

d)	bajd li huwa intenzjonat għall-konsum mill-bniedem; kif ukoll

e)	laħam minn tjur tal-kaċċa mhux ttrattat minn kwalunkwe għasfur.

Artikolu 3

L-Istati Membri għandhom jissospendu l-importazzjoni mill-Malażja ta’:

a)	ikel nej ta’ annimali domestiċi u materjal ta’ l-għalf mhux ipproċessat li jkun fihom kull parti ta’ tjur;

b)	bajd li huwa intenzjonat għall-konsum mill-bniedem; u

c)	laħam minn tjur tal-kaċċa mhux ttrattat minn kwalunkwe’ għasfur.

Artikolu 4

1.   L-Istati Membri għandhom jissospendu l-importazzjoni mill-Kambodja, miċ-Ċina inkluż Ħong Kong, mill-Indonesja, mill-Każakstan, mil-Laos, mill-Malażja, mill-Mongolja, mill-Korea ta’ Fuq, mill-Pakistan, mit-Tajlandja u mill-Vjetnam ta’:

a)	rix u partijiet minn rix mhux ipproċessati; u

b)	għasafar ħajjin ħlief tjur tad-dar kif iddefinit mill-Artikolu 1, fit-tielet inċiż mid-Deċiżjoni 2000/666/KE (5), inklużi għasafar li huma akkumpajati minn sidhom (għasafar domestiċi).

2.   Permezz tad-deroga mill-punt (a) tal-paragrafu 1, l-Istati Membri għandhom jawtorizzaw l-importazzjoni ta’ rix u partijiet ta’ rix mhux ipproċessat mill-Mongolja.

3.   L-Istati Membri għandhom jaċċertaw li għall-importazzjoni ta’ rix ipproċessat jew ta’ partijiet ta’ rix ipproċessati, għandhom jiġu akkumpanjati minn dokument li jgħid li r-rix ipproċessat jew partijiet tagħhom għaddew minn kurrent ta’ fwar jew minn xi proċess ieħor li jiżgura li ma jkun hemm ebda trażmissjoni ta’ organiżmi patoġeniċi.

Madanakollu dak id-dokument kummerċjali m’ għandux jinħtieġ għar-rix dekorattiv ipproċessat, għar-rix ipproċessat li jiġu trasportati minn persuni li jivjaġġaw għall-użu personali tagħhom jew għall-konsenji ta’ rix mhux ipproċessat għall-individwi privati għall-raġunijiet mhux industrijali.

Artikolu 5

Id-Deċiżjoni 2004/122/KE hi rrevokata.

Artikolu 6

L-Istati Membri għandhom jemendaw il-miżuri li japplikaw għall-importazzjoni sabiex jikkonformawhom ma’ din id-Deliżjoni u għandhom jippubblilizzaw il-miżuri adottati b’mod xieraq u immedjat. Huma għandhom jinfurmaw immedjatament lill-Kummissjoni bihom.

Artikolu 7

Din id-Deċiżjoni għandha tapplika mill-1 ta’ Ottubru ta’ l-2005 sat-30 ta’ Settembru ta’ l-2006.

Artikolu 8

Din id-Deċiżoni hija ndirizzata lill-Istati Membri.

---

(1)  ĠU L 268, 24.9.1991, p. 56. Direttiva kif l-aħħar emendata mill-Att ta’ l-Adeżjoni ta’ l-2003.

(2)  ĠU L 24, 30.1.1998, p. 9. Direttiva kif l-aħħar emendata mir-Regolament (KE) Nru 882/2004 tal-Parlament Ewropew u tal-Kunsill (ĠU L 165, 30.4.2004, p. 1. Verżjoni kkoreġuta ĠU L 191, 28.5.2004, p. 1).

(3)  ĠU L 36, 7.2.2004, p. 59. Deċiżjoni kif emendata l-aħħar bir-Regolament Nru 2005/619/KE (ĠU L 214, 19.8.2005, p. 66).

(4)  ĠU L 151, 14.6.2005, p. 3.

(5)  ĠU L 278, 31.10.2000, p. 26

---