31996R0031

Ir-Regolament tal-Kummissjoni (KE) Nru 31/96

tal-10 ta' Jannar 1996

dwar iċ-ċertifikat ta' l-eżenzjoni mit-taxxa tas-sisa

IL-KUMMISSJONI TAL-KOMUNITAJIET EWROPEJ,

Wara li kkunsidrat it-Trattat li jistabbilixxi l-Komunità Ewropea,

Wara li kkunsidrat id-Direttiva tal-Kunsill 92/12/KEE tal-25 ta' Frar 1992 dwar l-arranġamenti ġenerali għall-prodotti soġġetti għat-taxxa tas-sisa u fuq iż-żamma, moviment u sorveljar ta' tali prodotti [1], kif emendata ta' l-aħħar mid-Direttiva 94/74/KE [2], u b'mod partikolari l-Artikolu 23 (1a) tagħha,

Billi Stati Membri għandhom jeżentaw mit-taxxa tas-sisa l-prodotti soġġetti għat-taxxa tas-sisa mwassla lill-forzi armati u organizzazzjonijiet imsemmija fl-Artikolu 23(1) tad-Direttiva 92/12/KEE;

Billi skond l-Artikolu 23 (1a) tad-Direttiva 92/12/KEE, il-forzi armati u organizzazzjonijiet imsemmija fl-Artikolu 23(1) għandhom ikunu awtorizzati li jirċievu prodotti minn Stati Membri oħrajn taħt arranġamenti ta' sospensjoni tat-taxxa tas-sisa b'awtorità ta' dokument mehmuż, iżda sakemm dak id-dokument huwa akkompanjat minn ċertifikat ta' eżenzjoni; billi jinħtieġ li titwaqqaf il-forma u l-kontenut taċ-ċertifikat ta' eżenzjoni;

Billi Stati Membri għandhom jitħallew jestendu d-disposizzjonijiet ta' dan ir-Regolament għal oqsma oħrajn ta' taxxa indiretta;

Billi l-miżuri pprovduti f'dan ir-Regolament huma skond l-opinjoni tal-Kumitat tat-Taxxi tas-Sisa,

ADOTTAT DAN IR-REGOLAMENT:

Artikolu 1

Id-dokument imfassal fl-Anness se jintuża bħala ċ-ċertifikat ta' eżenzjoni fi ħdan it-tifsira ta' l-Artikolu 23 (1a) tad-Direttiva 92/12/KEE, bla ħsara għan-noti spjegattivi mfissra fl-Anness.

Artikolu 2

Stati Membri jistgħu jaddattaw iċ-ċertifikat ta' eżenzjoni msemmi fl-Artikolu 1 biex ikopru oqsma oħrajn ta' taxxa indiretta u biex jassiguraw li l-eżenzjoni hija kompatibbli ma' kondizzjonijiet u limitazzjonijiet għall-għotja ta' eżenzjonijiet fil-liġi nazzjonali tagħhom.

Artikolu 3

Stat Membru li jixtieq jadatta ċ-ċertifikat ta' eżenzjoni għandu jinforma lill-Kummissjoni u għandu jipprovdi wkoll lill-Kummissjoni bl-informazzjoni kollha rilevanti u meħtieġa. Il-Kummissjoni għandha tinforma lill-Istati Membri l-oħrajn.

Artikolu 4

Iċ-ċertifikat ta' eżenzjoni għandu jitfassal f'duplikat:

- kopja waħda biex tinżamm minn min jikkunsinja,

- kopja waħda biex takkompanja d-dokument amministrattiv ta' sostenn speċifikat fl-Artikolu 18 tad-Direttiva 92/12/KEE.

Stati Membri jistgħu jeħtieġu kopja addizzjonali għal skopijiet amministrattivi.

Artikolu 5

1. Maggazzinier awtorizzat, li jwassal il-prodotti taħt arranġamenti ta' sospensjoni tat-taxxa tas-sisa lill-forzi armati u organizzazzjonijiet imsemmija fl-Artikolu 23(1) tad-Direttiva 92/12/KEE, huwa meħtieġ li jżomm ċertifikat ta' eżenzjoni tat-taxxa bħala parti mid-dokumentazzjoni tiegħu.

2. Iċ-ċertifikat ta' eżenzjoni mit-taxxa, ittimbrat kif suppost mill-awtoritajiet kompetenti ta' l-Istat Membru riċevent, għandu jingħata mill-konsinnatarju lil maggazzier awtorizzat għall-iskopijiet ta' paragrafu 1.

Madankollu, jekk l-oġġetti mwassla huma maħsubin għall-użu uffiċjali, Stati Membri jistgħu jeżentaw lill-konsinnatarju mill-ħtieġa li jkollu ċ-ċertifikat ittimbrat taħt tali kondizzjonijiet kif jistgħu jistipulaw.

Artikolu 6

1. Stati Membri għandhom jinfurmaw lill-Kummissjoni dwar is-servizz li jkun responsabbli għat-timbrar taċ-ċertifikat ta' eżenzjoni mit-taxxa.

2. Stat Membru li jgħaddi mingħajr l-obbligazzjoni fuq il-konsinnatarju li jkollu ċ-ċertifikat ittimbrat skond it-tieni subparagrafu ta' l-Artikolu 5(2) għandu jinforma lill-Kummissjoni.

3. Il-Kummissjoni għandha tinforma lill-Istati Membri l-oħra dwar l-informazzjoni riċevuta mill-Istati Membri skond il-paragrafi 1 u 2 fi żmien xahar.

Artikolu 7

Dan ir-Regolament għandu jidħol fis-seħħ fis-seba' ġurnata wara li jiġi ppubblikat fil-Ġurnal Uffiċjali tal-Komunitajiet Ewropej.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussell, fl-10 ta' Jannar 1996.

Għall-Kummissjoni

Mario Monti

Membru tal-Kummissjoni

[1] ĠU L 76, tat-23.3.1992, p. 1.

[2] ĠU L 365, tal-31.12.1994, p. 46.

--------------------------------------------------

ANNESS

+++++ TIFF +++++

+++++ TIFF +++++

+++++ TIFF +++++

--------------------------------------------------