31993R2608

Ir-Regolament tal-Kummissjoni (KEE) nru 2608/93

tat-23 ta' Settembru 1993

li jemenda l-Annessi I, II u III tar-Regolament tal-Kunsill (KEE) Nru 2092/91 dwar il-produzzjoni organika ta' prodotti agrikoli u l-indikazzjonijiet li jirreferu għalihom fil-prodotti agrikoli u fl-oġġetti ta' l-ikel

IL-KUMMISSJONI TAL-KOMUNITAJIET EWROPEJ,

Wara li kkonsidrat it-Trattat li jistabbilixxi l-Komunità Ekonomika Ewropea,

Wara li kkonsidrat ir-Regolament tal-Kunsill (KEE) Nru 2092/91 ta' l-24 ta' Ġunju 1991 dwar il-produzzjoni organika ta' prodotti agrikoli u l-indikazzjonijiet li jirreferu għalihom fil-prodotti agrikoli u fl-oġġetti ta' l-ikel [1], kif l-aħħar emendat mir-Regolament tal-Kunsill (KEE) Nru 207/93 [2], u b'mod partikolari l-Artikolu 13 tiegħu,

Billi pjanti miġbura minn żoni naturali li m'għaddewx minn trattamnet ta' prodotti li mhumiex awtorizzati fil-biedja organika għandhom jiġu meqjusa bħala li nkisbu skond il-metodu ta' produzzjoni organika, fejn ġbir bħal dan ikun sar f'żoni u spezzjonati minn persuni taħt id-dispożizzjonijiet tas-sistema ta' spezzjonar li jistabbilixxi l-Artikolu 9 tar-Regolament (KEE) Nru 2092/91; billi għalhekk, l-Annessi I u III għandhom jiġu emendati;

Billi fil-każ ta' xi varjetajiet ta' siġar tat-tuffieħ it-trattament tal-weraq bil-chloride tal-kalċju jidher indispensabbli biex jissodisfa kif suppost il-bżonn tagħhom ta' nutrizzjoni ta' kalċju; filwaqt li l-prattika m'għandha l-ebda effet sinifikattiv fuq l-ambjent; filwaqt li, għalhekk, il-chloride tal-kalċju għandu jiġi mdaħħal fil-parti A ta' l-Anness II;

Bili skond id-dispożizzjonijiet ta' l-Artikolu 8 tar-Regolament (KEE) Nru 2092/91 l-importaturi tal-prodotti minn pajjiżi terzi huma obbligati li jissottomettu l-intrapriżi tagħhom għas-sistema ta' spezzjonar msemmija fl-Artikolu 9; filwaqt li, għalhekk, regoli ta' implimentazzjoni dettaljati għandhom jiġu żviluppati sabiex jaġġustaw id-dispożizzjonijiet kurrenti ta' l-Anness III għas-sitwazzjoni ta' l-importaturi ta' prodotti fil-Komunità; filwaqt li għal raġunijiet ta' kjarezza dawk id-dispożizzjonijiet ġew miġbura f'sezzjoni separata ta' l-Anness III;

Billi l-miżuri mniżżla f'dan ir-Regolament huma konformi ma' l-opinjoni tal-Kumitat imsemmi fl-Artikolu14 tar-Regolament (KEE) Nru 2092/91,

ADOTTA DAN IR-REGOLAMENT:

Artikolu 1

L-Annessi I, II u III tar-Regolament (KEE) Nru 2092/91 huma b' dan emendati kif muri fl-Anness għal dan ir-Regolament.

Artikolu 2

Dan ir-Regolament għandu jiġi nfurzat fis-seba' ġurnata wara l-pubblikazzjoni tiegħu fil-Ġurnal Uffiċjali tal-Komunitajiet Ewropej. Id-dispożizzjonijiet ta' punt 6 tal-parti Ċ ta' l-Anness għandhom jiġu nfurzati sitt xhur wara d-data ta' pubblikazzjoni bħal din.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Magħmul fi Brussel, fit-23 ta' Settembru 1993.

Għall-Kummissjoni

René Steichen

Membru tal-Kummissjoni

[1] ĠU L 198, tat-22.7.1991, p. 1.

[2] ĠU L 25, tat-2.2.1993, p. 5.

--------------------------------------------------

L-ANNESS

A. It-test tas-sezzjoni "Pjanti u prodotti tal-pjanti" ta’ l-Anness I huwa emendat kif ġej:

1. Fl-aħħar subparagrafu tal-punt 2 il-kliem

"(preparazzjonjiet biodinamiċi)"

huma mħassra. Wara dak is-subparagrafu s-subparagrafu li ġej hu miżjud:

"Il-magħrufa bħala "preparazzjonijiet biodinamiċi" mit-tqiq tal-ġebel, mid-demel jew mill-pjanti jistgħu jiġu użati ukoll għall-iskopijiet koperti minn dan il-paragrafu."

2. Il-punt 4 li ġej hu miżjud:

"4. Il-ġbir ta’ pjanti tajba għall-ikel u partijiet minnhom, li jikbru naturalment f żoni naturali, foresti u żoni agrikoli, huwa meqjus metodu ta’ produzzjoni organika sakemm:

- dawk iż-żoni ma rċevew l-ebda trattamenti bi prodotti oħra barra dawk imsemmija f’L-Anness II għall-perjodu ta’ tliet snin qabel il-ġbir.

- il-ġbir ma jaffettwax l-istabbilità ta’ l-abitat naturali jew il-manteniment ta’ l-ispeċi fiż-żona tal-ġbir."

B. Ma’ l-Anness II, parti A, il-prodott li ġej hu miżjud:

"Isem | Deskrizzjoni, rekwiżiti tal-kompożizzjoni, kundizzjonijiet għall-użu |

Kalċju Klorid | Trattament għall-weraq tas-siġar tat-tuffieħ wara li jkunu ppruvati defiċenzi ta’ kalċju u/jew magneżju; ħtieġa rikonoxxuta mill-korp ta’ kontroll" |

C. L-Anness III huwa emendat kif ġej:

1. It-titolu ta’ parti A hu mibdul b’li ġej:

"A. Pjanti u prodotti tal-pjanti mill-produzzjoni ta’ l-irziezet jew ġbir."

2. It-test tal-punt 2 ta’ parti A huwa mibdul b’li ġej:

"2. Meta l-arranġamenti ta’ l-ispezzjonar huma implimentati għall-ewwel darba, il-produttur, anke fejn l-attività tiegħu hi limitata għall-ġbir ta’ pjanti selvaġġi, u l-korp spezzjonanti għandu jfassal:

- deskrizzjoni sħiħa ta’ l-untià, li turi l-bini għall-ħżin u l-produzzjoni u biċċiet tar-raba’ u/jew żoni tal-ġbir u, fejn applikabbli, bini fejn xi proċessar u/jew operazzjonijiet ta’ l-imballeġġjar iseħħu,

- il-miżuri prattiċi kollha li għandhom jittieħdu mill-produttur fil-livell ta’ l-untità biex jassigura konformità mad-dispożizzjonijiet kollha ta’ dan ir-Regolament.

- u, fil-każ tal-ġbir ta’ pjanti selvaġġi, il-garanziji mogħtija minn partiti terzi, jekk xieraq fejn rilevanti li l-produttur jista’ jipprovdi biex jassigura li l-dispożizzjonijiet ta’ l-Anness I, punt 4 huma sodisfatti.

Id-deskrizzjoni u l-miżuri konċernati għandhom jinżammu f’rapport ta’ spezzjonar b’firma sottoskritta tal-produttur konċernat.

Barra minn hekk, ir-rapport għandu jispeċifika:

- id-data ta’ l-aħħar applikazzjoni fuq il-biċċiet u/jew iż-żoni ta’ ġbir konċernati ta’ prodotti li l-użu tagħhom mhuwiex kompatibbli ma’ l-Artikolu 6(1)(b),

- intrapriża mill-produttur biex iwettaq l-operazzjonjiet skond l-Artikoli 5 u 6 u biex jaċċetta, f’każ ta’ ksur, infurzar tal-miżuri msemmija fl-Artikolu 9(9) u fejn rilevanti, l-Artikolu 10(3)".

3. It-test tal-punt 8 ta’ parti A hu mibdul b’li ġej:

"8.1 Il-Prodotti kif imsemmija fl-Artikolu1 jistgħu jiġu trasportati għal untitajiet oħra, inklużi bejjiegħa bl-ingrossa u bl-imnut, biss f’imballeġġjar xieraq jew containers magħluqa b’mod li ma jħallux issir sostituzzjoni tal-kontenut u mogħnija b’tikketta li tistqarr, mingħajr preġudizzju għal xi indikazzjonijiet oħra meħtieġa mil-liġi:

(a) l-isem u l-indirizz tal-persuna resposabbli għall-produzzjoni jew il-preparazzjoni tal-prodott, jew, fejn bejjiegħ ieħor hu msemmi, dikjarazzjoni li tagħmilha possibbli għall-unità li qed tirċievi u l-korp spezzjonanti li jidentifikaw mingħjr tfixkil il-persuna responsabbli għall-produzzjoni tal-prodott;

(b) l-isem tal-prodott, inkluża referenza għall-metodu ta’ produzzjoni organika, skond l-Artikolu 5.

8.2 Madanakollu, l-għeluq ta’ l-imballeġġjar jew tal-kontenituri mhuwiex meħtieġ fejn:

(a) it-trasportazzjoni hi bejn produttur u operatur ieħor li huma t-tnejn soġġetti għas-sistema ta’l-ispezzjonar imsemmija fl-Artikolu 9, u

(b) il-prodotti jkollhom magħhom dokument li jagħti l-informazzjoni meħtieġa taħt is-subparagrafu ta’ qabel."

4. L-aħħar subparagrafu tal-punt 1 ta’ parti B hu mibdul b’li ġej:

"Barra minn hekk, ir-rapport għandu jinkludi ftehim mill-operatur li jwettaq l-operazzjonijiet b’tali mod li jikkonformaw ma’ l-Artikolu 5 u li jaċċetta, f’każ ta’ ksur, l-infurzar tal-miżuri msemmija fl-Artikolu 9(9) u, fejn rilevanti, fl-Artikolu 10(3)."

5. Il-Punt 6 tal-parti B hu mibdul b’li ġej:

"6. Il-Prodotti kif imsemmija fl-Artikolu 1 jistgħu jiġu trasportati għall-unitajiet oħra, inklużi bejjiegħa bl-ingrossa u u bl-imnut, biss f’imballeġġjar xieraq jew containers magħluqa b’mod li ma jippermetux is-sostituzzjoni tal-kontenut u mogħnija b’tikketta li tistqarr, mingħajr preġudizzju għal xi indikazzjonijiet oħra meħtieġa mil-liġi:

(a) l-isem u l-indirizz tal-persuna resposabbli għall-produzzjoni jew il-preparazzjoni tal-prodott, jew, fejn bejjiegħ ieħor hu msemmi, dikjarazzjoni li tagħmilha possibbli għall-untità li qed tirċievi u l-korp spezzjonanti li jidentifikaw mingħajr tfixkil il-persuna responsabbli għall-produzzjoni tal-prodott;

(b) l-isem tal-prodott, inkluża referenza għall-metodu ta’ produzzjoni organika, skond id-dispożizzjonijiet rilevanti ta’ l-Artikolu 5.

Ma’ l-irċevuta ta’ prodott kif imsemmi fl-Artikolu 1, l-operatur għandu jagħmel tiftix fuq l-egħluq ta’ l-imballeġġjar jew il-kontenitur fejn hu meħtieġ u l-preżenza ta’ l-indikazzjonijiet imsemmija fil-paragrafu ta’ qabel dan, f’punt A.8.1 jew f’punt Ċ.8. Ir-riżultat ta’ din il-verifika għandu jkun espliċitament imsemmi fil-kontijiet imsemmija f’punt B.2. Fejn it-tiftix iħalli xi dubbju li l-prodott konċernat ġie minn operatur soġġett għas-sistema ta’ l-ispezzjonar li jistabbilixxi l-Artikolu 9, jista’ biss jiġi proċessat jew imballeggjat wara t-tneħħija ta’ dak id-dubbju, sakemm ma jiġix imqiegħed fis-suq mingħajr indikazzjoni li għandha x’taqsam mal-metodu ta’ produzzjoni organika".

6. Il-parti li ġejja hi miżjuda:

"Ċ. L-importaturi ta’ prodotti tal-pjanti u affarijiet ta’ l-ikel magħmula essenzjalment minn prodotti tal-pjanti minn pajjiżi terzi

1. Meta l-arranġamenti ta’ l-ispezzjonar huma implimentati għall-ewwel daraba, l-importatur u l-korp spezzjonant għandhom ifasslu:

- deskrizzjoni sħiħa tat-taqsimiet ta’ l-importatur u ta’ l-attivitajiet ta’ l-importazzjoni tiegħu, li jindikaw sakemm hu possibbli l-punti ta’ dħul tal-prodotti fil-Komunità u kwalunkwe faċilitajiet oħra li l-importatur għandu l-intenzjoni li juża għall-ħażna tal-prodotti impurtati;

- il-miżuri prattiċi kollha li għandhom jittieħdu mill-importatur biex jassigura konformità ma’ dan ir-Regolament.

Id-deskrizzjoni u l-miżuri konċernati għandhom jinżammu f’rapport ta’ spezzjoni, b’firma sottoskritta ta’ l-importatur ikkonċernat.

Barra minn hekk, ir-rapport għandu jinkludi ftehim mill-importatur

- biex iwettaq l-operazzjonijiet ta’ l-importazzjoni b’tali mod li jikkonformaw mad-dispożizzjonijiet ta’ Artikolu 11 u biex jaċċetta, f’każ ta’ ksur, l-infurzar tal-miżuri msemmija fl-Artikolu 9(9);

- biex jassigura li kwalunkwe faċilitajiet ta’ ħażna li l-importatur juża’ huma miftuħa għall-ispezzjonar, li għandha titwettaq jew mill-korp spezzjonanti jew, meta l-faċiltajiet ta’ ħażna jinstabu fi Stat Membru ieħor jew f’reġjun ieħor, minn korp ta’ spezzjoni approvat għall-ispezzjonar f’dak l-Istat Membru jew reġjun.

2. Għandhom jinżammu kontijiet miktuba li jippermettu l-korp ta’ spezzjoni li jintraċċa għal kull lot ta’ prodotti msemmija fl-Artikolu1, importati minn pajjiż terz:

- l-oriġini, n-natura u l-kwantità tal-lott konċernat, u fuq talba mill-korp ta’ spezzjoni, kwalunkwe dettalji fuq l-arranġamenti ta’ trasport mill-esportatur fil-pajjiż terz għat-taqsimiet jew il-faċilitajiet ta’ ħażna ta’ l-importatur;

- ix-xorta, il-kwantitajiet u min qed jikkunsinnja l-lott konċernat, u fuq talba mill-korp ta’ spezzjoni, dettalji fuq l-arranġamenti ta’ trasport mit-taqsimiet jew il-faċilitajiet ta’ ħżin ta’ l-importatur għal min qed jagħmel il-kunsinna.

3. L-importatur għandu jinforma l-korp ta’ spezzjoni b’kull kunsinna importata fil-Komunità, bl-għoti ta’ kwalunkwe dettalji li dan il-korp jew awtorità tista’ teħtieġ, bħal kopja taċ-ċertifikat ta’ ispezzjoni għall-importazzjoni ta’ prodotti organiċi. Meta l-prodotti konċernati qed jiċċirkolaw fi Stat Membru jew reġjun ieħor barra minn dak fejn il-korp ta’ spezzjoni hu approvat għall-ispezzjonar, dak il-korp jista’ jgħaddi l-informazzjoni lil xi korp approvat għall-ispezzjonar f’dak l-Istat Membru jew reġjun, għal ispezzjonar fuq il-post tal-kunsinna importata.

4. Fejn prodotti importati msemmija fl-Artikolu 1 huma maħżuna f’faċilitajiet ta’ ħażna fejn prodotti agrikoli u affarijiet ta’ l-ikel oħra huma wkoll proċessati, imballeġġjati jew maħżuna:

- il-prodotti kif imsemmija fl-Artikolu 1 għandhom jinżammu separati mill-prodotti agrikoli u/jew l-affarijiet ta’ l-ikel l-oħra;

- għandha tittieħed kull miżura biex tassigura l-identifikazzjoni ta’ lottijiet u biex jiġi evitat it-taħlit ma’ prodotti mhux miksuba skond ir-regoli mniżżla f’dan ir-Regolament.

5. Barra miż-żjajjar ta’ spezzjonar mhux avżat, il-korp ta’ spezzjoni għandu jagħmel spezzjoni fiżika sħiħa, għall-inqas darba f’sena, tal-bini ta’ l-importatur u, fejn rilevanti, ta’ selezzjoni tal-faċilitajiet ta’ ħżin oħra li l-importatur juża.

Il-korp ta’ spezzjoni għandu jispezzjona l-kontijiet miktuba msemmija f’ punt C.2 u ċ-ċertifikati msemmija fl-Artikolu 11(1)(b) u (3). Jistgħu jittieħdu kampjuni ta’ sostanzi mhux awtorizzati taħt dan ir-Regolament biex jiġu ttestjati. Madanakollu, għandhom jittieħdu fejn l-użu ta’ sostanzi mhux awtorizzati huwa suspettat. Għandu jsir rapport ta’ spezzjoni wara kull żjara, b’firma sottoskritta tal-persuna responsabbli għall-untità spezzjonata.

6. L-importatur għandu, għal raġunijiet ta’ spezzjonar, jagħti lill-korp ta’ spezzjoni aċċess għall-bini u għall-kontijiet miktuba u d-dokumenti ta’ support relevanti, b’mod partikolari xi ċertifikati ta’ l-importazzjoni. Għandu jagħti lill-korp ta’ spezzjoni kwalunkwe informazzjoni neċessarja għall-iskopijiet ta’ l-ispezzjoni.

7. Il-Prodotti msemmija fl-Artikolu 1 għandhom jiġu importati minn pajjiż terz f’imballeġġjar xieraq jew kontenituri magħluqa b’tali mod li jipprevjenu li ssir is-sostituzzjoni tal-kontenut u mogħnija b’identifikazzjoni mill-esportatur u b’kwalunkwe marki u numri oħra li jservu biex il-lott jiġi identifikat maċ-ċertifikat ta’ spezzjoni.

Ma’ l-irċevuta ta’ prodott kif imsemmi fl-Artikolu 1, impurtat minn pajjiż terz, l-operatur għandu jagħmel tiftix fuq l-egħluq ta’ l-imballeġġjjar jew il-kontenitur u l-korrispondenza ta’ l-identifikazzjoni tal-lott maċ-ċertifikat imsemmi fl-Artikolu 11(1)(b) jew ċertifikat simili fejn meħtieġ mill-awtoritajiet taħt kwalunkwe arranġamenti adottati taħt l-Artikolu 11(6). Ir-riżultat ta’ din il-verifika għandu jkun espliċitament imsemmi fil-kontijiet imsemmija f’punt Ċ.2. Fejn it-tiftix iħalli kwalunkwe dubbju dwar l-oriġini tal-prodott minn pajjiż terz jew minn esportatur f’pajjiż terz mhux aċċettat taħt l-Artikolu 11, il-prodott għandu jitqiegħed fis-suq, jew proċessat jew imballeġġjat, biss wara li dubbju bħal dan jitneħħa, sakemm mhux imqiegħed fis-suq mingħajr indikazzjoni tal-metodu ta’ produzzjoni organika.

8. Prodotti kif imsemmija fl-Artikolu1 jistgħu jiġu trasportati għall-untitajiet oħra, inklużi bejjiegħa bl-ingrossa u bl-imnut, biss f’imballeġġjjar xieraq jew "containers" magħluqa b’mod li jipprevenu milli ssir is-sostituzzjoni tal-kontenut u mogħnija b’tikketta li tistqarr, mingħajr preġudizzju għal xi indikazzjonijiet oħra meħtieġa mil-liġi:

(a) l-isem u l-indirizz ta’ l-imporatur tal-prodott, jew dikjarazzjoni li tagħmilha possibli għall-untità li qed tirċievi u għall-korp ta’ spezzjoni li jidentifikaw mingħajr tfixkil l-importatur tal-prodott;

(b) l-isem tal-prodott, inkluża referenza għall-metodu ta’ produzzjoni organika, taħt l-Artikolu 5."

--------------------------------------------------