(1)

Le Treoir (AE) 2021/338 ó Pharlaimint na hEorpa agus ón gComhairle (2), leagtar amach leasuithe ar Airteagal 57 de Threoir 2014/65/AE maidir le rialuithe ar bhainistíocht suímh.

(2)

I gcomhréir leis na leasuithe sin ar Airteagal 57 de Threoir 2014/65/AE, ní mór d’ionaid trádála, a thrádálann díorthaigh tráchtearraí, rialuithe éifeachtacha ar bhainistíocht suímh a bheith curtha i bhfeidhm acu chun trádáil mhí-ordúil a chosc agus aghaidh a thabhairt uirthi, chun tacú le coinníollacha praghsála agus socraíochta ordúla agus chun éifeachtúlacht na margaí a áirithiú.

(3)

Áirítear le rialuithe éifeachtacha ar bhainistíocht suímh, mar shampla, socruithe dlíthiúla chun sonraí sealbhóirí suíomhanna deiridh agus máthairghnóthas a fháil agus a úsáid, chomh maith le socruithe teicniúla, amhail tuarascálacha agus méadrachtaí chun clár suímh a chruthú, mar shampla. Dá bhrí sin, ba cheart rialuithe éifeachtacha ar bhainistíocht suímh a bheith fite fuaite san fhaireachán leanúnach ag an ionad trádála, agus ba cheart na rialuithe sin a bheith ag brath ar an bhfaireachán céanna.

(4)

Chun a áirithiú nach mbeidh tionchar míchuí ar an bpróiseas praghas-aimsithe toisc suíomh a bheith ann agus chun a shainaithint an carnadh i gcomhchruinnithe suíomhanna a d’fhéadfadh saobhadh praghsanna, cúbláil mhargaidh nó cleachtais trádála mhí-úsáideacha eile a bheith mar thoradh air, ba cheart d’ionaid trádála a bheith ar an eolas faoi shuíomhanna móra atá i seilbh sealbhóirí suíomhanna deiridh agus máthairghnóthas i ndíorthaigh tráchtearraí a shocraítear go fisiceach agus faoi na cúiseanna leis na suíomhanna sin a choinneáil ina seilbh. De réir mar a dhéantar soláthar iarbhír an tráchtearra fhisicigh fholuitigh a theorannú go soláthar finideach, na díorthaigh tráchtearraí a shocraítear go fisiceach, is soghabhálaí iad i leith cleachtais trádála mhí-ordúla amhail cúngach margaidh agus cúinneáil margaidh i gcás ina mbainfidh contrapháirtithe úsáid as ceannasacht chun an praghas ar dhíorthach tráchtearraí, nó ar an díorthach foluiteach, a shocrú ar leibhéal saorga. Dá bhrí sin, ba cheart suíomhanna móra a shainaithint i ndíorthaigh tráchtearraí a shocraítear go fisiceach trí dhearadh agus i ndíorthaigh tráchtearraí is féidir a shocrú de réir rogha an cheannaitheora nó an díoltóra.

(5)

Ba cheart d’ionaid trádála a chinneadh cad is suíomh mór ann agus méid agus comhdhéanamh an mhargaidh atá i gceist á gcur san áireamh. Chun na críche sin, ba cheart d’ionaid trádála critéir cháilíochtúla nó chainníochtúla a bhunú, ar critéir iad a úsáidfear chun suíomhanna móra den sórt sin a shainaithint agus ba cheart nósanna imeachta a bheith curtha i bhfeidhm acu chun na suíomhanna uile atá i seilbh aon duine a sháraíonn leibhéil chuntasachta réamhchinntithe den sórt sin a shainaithint. D’fhéadfadh sé gurbh éard a bheadh sna critéir cháilíochtúla nó chainníochtúla, méid an leasa oscailte iomláin sa díorthach tráchtearraí, an sciar de shuíomh an tsealbhóra suíomhanna, luaineacht na margaí agus saintréithe an mhargaidh díorthach fholuitigh, i measc nithe eile. I gcás ina sárófar na leibhéil sin, ba cheart don ionad trádála féachaint leis an réasúnaíocht atá taobh thiar de charnadh an tsuímh mhóir sin a thuiscint. Chuige sin, ba cheart don ionad trádála a mheasúnú cé acu is gá nó nach gá dó faisnéis bhreise a iarraidh ón duine atá i seilbh an tsuímh mhóir sin, á gcur san áireamh aige go háirithe a mhinice a sháraíonn na suíomhanna atá i seilbh an duine sin na leibhéil cuntasachta agus a mhéid a sháraítear na leibhéil cuntasachta. D’fhéadfaí suíomhanna i dtáirgí gaolmhara, an chúis eacnamaíoch leis an suíomh oscailte agus an ghníomhaíocht i margadh tráchtearraí foluiteach gaolmhar, i measc nithe eile, a bheith san fhaisnéis sin. Ar bhonn na faisnéise atá ar fáil cheana nó a bailíodh tríd an iarraidh ar fhaisnéis, ba cheart don ionad trádála bearta iomchuí a dhéanamh i gcás inar gá.

(6)

Tá sé tábhachtach, i dtaca leis na leibhéil chuntasachta a socraíodh, go mbeidh siad fós leordhóthanach agus éifeachtach chun freastal ar a gcríoch bheartaithe agus go gcuirfear an t-údarás inniúil ar an eolas faoin modheolaíocht a úsáideadh chun na leibhéil chuntasachta sin a shocrú agus a thabhairt cothrom le dáta.

(7)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Eorpach um Urrúis agus Margaí.

(8)

Rinne an tÚdarás Eorpach um Urrúis agus Margaí comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ón nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (3).