(1)

Le Rialachán (AE) 2021/953, leagtar síos creat chun deimhnithe idir-inoibritheacha COVID-19 i ndáil le vacsaíniú, tástáil agus téarnamh (“Deimhniú Digiteach COVID AE”) a eisiúint agus a fhíorú agus chun go nglacfaí leo, ionas go n-éascófar do na sealbhóirí a gceart chun saorghluaiseachta a fheidhmiú le linn phaindéim COVID-19. Leis an Rialachán sin, táthar le cur leis an éascú ar dheireadh a chur de réir a chéile agus ar mhodh comhordaithe leis na srianta ar an tsaorghluaiseacht a chuir na Ballstáit i bhfeidhm, i gcomhréir le dlí an Aontais, chun leathadh SARS-CoV-2 a theorannú.

(2)

Le Rialachán (AE) 2021/953, ceadaítear glacadh le deimhnithe COVID-19 arna n-eisiúint ag tríú tíortha do shaoránaigh den Aontas agus a mbaill teaghlaigh i gcás ina gcinnfidh an Coimisiún go n-eisítear na deimhnithe COVID-19 sin i gcomhréir le caighdeáin ba cheart a mheas go bhfuil siad coibhéiseach leis na caighdeáin arna mbunú de bhun an Rialacháin sin. Thairis sin, i gcomhréir le Rialachán (AE) 2021/954 ó Pharlaimint na hEorpa agus ón gComhairle (2), ní mór do na Ballstáit na rialacha a leagtar síos i Rialachán (AE) 2021/953 a chur i bhfeidhm maidir le náisiúnaigh tríú tír nach dtagann faoi raon feidhme an Rialacháin sin, ach atá ag fanacht go dleathach nó a bhfuil cónaí orthu go dleathach ar a gcríoch agus atá i dteideal taisteal chuig Ballstáit eile i gcomhréir le dlí an Aontais. Dá bhrí sin, aon torthaí coibhéise a leagtar síos sa Chinneadh seo, ba cheart feidhm a bheith acu maidir le deimhnithe COVID-19 i ndáil le vacsaíniú agus tástáil arna n-eisiúint ag an Nua-Shéalainn i leith Oileáin Cook, Niue agus Thócalá do shaoránaigh den Aontas agus a mbaill teaghlaigh. Mar an gcéanna, ar bhonn Rialachán (AE) 2021/954, ba cheart feidhm a bheith ag na torthaí coibhéise sin, maidir le deimhnithe COVID-19 i ndáil le vacsaíniú agus tástáil arna n-eisiúint ag an Nua-Shéalainn i leith Oileáin Cook, Niue agus Thócalá do náisiúnaigh tríú tír atá ag fanacht go dleathach nó a bhfuil cónaí orthu go dleathach ar chríoch na mBallstát faoi na coinníollacha a leagtar síos sa Rialachán sin.

(3)

An 15 Samhain 2021, ghlac an Coimisiún Cinneadh Cur Chun Feidhme (AE) 2021/1993 (3) lena leagtar síos i leith na ndeimhnithe COVID-19 arna n-eisiúint ag Nua-Shéalainn faoin gcóras “My Covid Record” go bhfuil siad coibhéiseach, chun an ceart chun saorghluaiseachta laistigh den Aontas a éascú, leis na deimhnithe a eisítear i gcomhréir le Rialachán (AE) 2021/953.

(4)

An 19 Aibreán 2022, chuir an Nua-Shéalainn in iúl don Choimisiún gur iarr Oileáin Cook, Niue agus Tócalá uirthi leathnú a iarraidh ar Chinneadh Cur Chun Feidhme (AE) 2021/1993 chun na deimhnithe COVID-19 arna n-eisiúint in Oileáin Cook, Niue agus Tócalá a chumhdach. Mar a shonraigh an Nua-Shéalainn, is stáit fhéinrialaitheacha atá i gcomhlachas saor leis an Nua-Shéalainn iad Oileáin Cook agus Niue, agus is críoch neamh-fhéinrialaitheach den Nua-Shéalainn í Tócalá. Is ag comhlíonadh na n-oibleagáidí atá uirthi leasanna bunúsacha Oileáin Cook, Niue agus Thócalá a chur san áireamh a bhí an Nua-Shéalainn nuair a rinne sí an iarraidh.

(5)

Sa chomhthéacs sin, thug an Nua-Shéalainn faisnéis mhionsonraithe don Choimisiún faoi eisiúint deimhnithe idir-inoibritheacha COVID-19 i ndáil le vacsaíniú agus tástáil i leith Oileáin Cook, Niue agus Thócalá faoin gcóras “My Covid Record”, is é sin an córas atá cumhdaithe faoi Chinneadh Cur Chun Feidhme (AE) 2021/1993. Chuir an Nua-Shéalainn in iúl don Choimisiún go measann sí, maidir leis na deimhnithe COVID-19 a eisítear i leith Oileáin Cook, Niue agus Thócalá tríd an gcóras “My Covid Record”, go n-eisítear iad i gcomhréir le caighdeán agus córas teicneolaíochta atá idir-inoibritheach leis an gcreat iontaoibhe a bunaíodh le Rialachán (AE) 2021/953, agus gur caighdeán agus córas teicneolaíochta iad sin lenar féidir barántúlacht, bailíocht agus sláine na ndeimhnithe a fhíorú. I ndáil leis sin, chuir an Nua-Shéalainn in iúl don Choimisiún, maidir leis na deimhnithe COVID-19 a eisítear i leith Oileáin Cook, Niue agus Thócalá i gcomhréir leis an gcóras “My Covid Record”, go bhfuil na sonraí iontu a leagtar amach san Iarscríbhinn a ghabhann le Rialachán (AE) 2021/953.

(6)

Ar a bharr sin, chuir an Nua-Shéalainn in iúl don Choimisiún go nglacann Oileáin Cook, Niue agus Tócalá le deimhnithe i ndáil le vacsaíniú agus tástáil arna n-eisiúint ag na Ballstáit agus ag tíortha LEE i gcomhréir le Rialachán (AE) 2021/953.

(7)

An 25 Iúil 2022, tar éis di iarraidh a fháil ón Nua-Shéalainn thar ceann Oileáin Cook, Niue agus Thócalá, rinne an Coimisiún tástálacha teicniúla a léirigh go bhfuil na deimhnithe COVID-19 i ndáil le vacsaíniú agus tástála arna n-eisiúint ag an Nua-Shéalainn i leith Oileáin Cook, Niue agus Thócalá i gcomhréir leis an gcóras “My Covid Record” idir-inoibritheach leis an gcreat iontaoibhe a bunaíodh le Rialachán (AE) 2021/953, ar córas é lenar féidir barántúlacht, bailíocht agus sláine na ndeimhnithe a fhíorú. Dheimhnigh an Coimisiún freisin maidir leis na deimhnithe COVID-19 a eisíonn an Nua-Shéalainn i leith Oileáin Cook, Niue agus Thócalá i gcomhréir leis an gcóras “My Covid Record” go bhfuil na sonraí riachtanach iontu.

(8)

De bhreis air sin, chuir an Nua-Shéalainn in iúl don Choimisiún go n-eisíonn sí deimhnithe COVID-19 idir-inoibritheacha i ndáil le vacsaíniú i leith Oileáin Cook, Niue agus Thócalá agus go bhfuil Comirnaty ar cheann de na vacsaíní a bhaineann leis na deimhnithe sin.

(9)

Chomh maith leis sin, chuir an Nua-Shéalainn in iúl don Choimisiún go n-eisíonn sí deimhnithe tástála idir-inoibritheacha i ndáil le tástálacha aimpliúcháin aigéid núicléasaigh agus i ndáil le tástálacha antaiginí arna gcomhaontú ag an gCoiste Slándála Sláinte a bunaíodh le hAirteagal 17 de Chinneadh Uimh. 1082/2013/AE ó Pharlaimint na hEorpa agus ón gComhairle (4) ar bhonn Mholadh an 21 Eanáir 2021 ón gComhairle (5), i leith Oileáin Cook, Niue agus Thócalá.

(10)

Thairis sin, chuir an Nua-Shéalainn in iúl don Choimisiún nach n-eisíonn sí deimhnithe idir-inoibritheacha i ndáil le téarnamh i leith Oileáin Cook, Niue agus Thócalá.

(11)

Ina theannta sin, chuir an Nua-Shéalainn in iúl don Choimisiún gur chun vacsaíniú nó torthaí tástála an tsealbhóra a fhíorú agus a dheimhniú, agus chuige sin amháin, a phróiseálfar na sonraí pearsanta atá san áireamh sna deimhnithe nuair a bheidh deimhnithe a bhfíorú ag fíoraitheoirí in Oileáin Cook, Niue agus Tócalá, agus nach gcoinneofar na sonraí dá éis sin.

(12)

Dá bhrí sin, na heilimintí is gá chun a shuí gur cheart na deimhnithe COVID-19 arna n-eisiúint ag an Nua-Shéalainn i leith Oileáin Cook, Niue agus Thócalá i gcomhréir leis an gcóras “My Covid Record”, gur cheart a mheas go bhfuil siad choibhéiseach leis na deimhnithe arna n-eisiúint i gcomhréir le Rialachán (AE) 2021/953, tá na heilimintí sin comhlíonta.

(13)

Dá bhrí sin, na deimhnithe COVID-19 arna n-eisiúint ag an Nua-Shéalainn i leith Oileáin Cook, Niue agus Thócalá i gcomhréir leis an gcóras “My Covid Record”, ba cheart glacadh leo faoi na coinníollacha dá dtagraítear in Airteagail 5(5), 6(5) agus 7(8) de Rialachán (AE) 2021/953.

(14)

Chun go mbeidh an Cinneadh seo oibríochtúil, ba cheart nascadh na Nua-Shéalainne leis an gcreat iontaoibhe maidir le Deimhniú Digiteach COVID AE arna bhunú le Cinneadh Cur Chun Feidhme (AE) 2021/1993 a leathnú chun deimhnithe arna n-eisiúint in Oileáin Cook, Niue agus Tócalá a chumhdach.

(15)

Chun leas an Aontais a chosaint, go háirithe i réimse na sláinte poiblí, féadfaidh an Coimisiún a chumhachtaí a úsáid chun an Cinneadh seo a chur ar fionraí nó a fhoirceannadh i gcás nach gcomhlíonfar na coinníollacha in Airteagal 8(2) de Rialachán (AE) 2021/953 a thuilleadh.

(16)

Ós rud é gur gá nascadh na Nua-Shéalainne leis an gcreat iontaoibhe maidir le Deimhniú Digiteach COVID AE arna bhunú le Rialachán (AE) 2021/953 a leathnú chun deimhnithe arna n-eisiúint i leith Oileáin Cook, Niue agus Thócalá a chumhdach a luaithe is féidir, ba cheart an Cinneadh seo a theacht i bhfeidhm an lá tar éis lá a fhoilsithe in Iris Oifigiúil an Aontais Eorpaigh.

(17)

Tá na bearta dá bhforáiltear sa Chinneadh seo i gcomhréir leis an tuairim ón gCoiste a bunaíodh le hAirteagal 14 de Rialachán (AE) 2021/953,