(1)

An 4 Deireadh Fómhair 2021, fuair an Coimisiún gearán de bhun Airteagal 10 den bhun-Rialachán arna chur isteach ag Graphite Cova GmbH, Showa Denko Carbon Holding GmbH agus Tokai ErftCarbon GmbH (“na gearánaigh”).

(2)

An 18 Samhain 2021, tar éis dó comhairliúcháin a dhéanamh le Rialtas Dhaon-Phoblacht na Síne an 16 Samhain 2021, thionscain an Coimisiún Eorpach imeachtaí frith-fhóirdheontais maidir le córais leictreoidí graifíte áirithe de thionscnamh Dhaon-Phoblacht na Síne a allmhairítear isteach san Aontas. D’fhoilsigh sé Fógra Tionscnaimh in Iris Oifigiúil an Aontais Eorpaigh (“an Fógra Tionscnaimh”) (2).

(3)

An 6 Aibreán 2022, d’fhorchuir an Coimisiún Eorpach dleachtanna frithdhumpála áirithe in imeachtaí frithdhumpála ar leithligh maidir le hallmhairí an táirge chéanna de thionscnamh Dhaon-Phoblacht na Síne (3).

(4)

Chumhdaigh an tréimhse imscrúdúcháin an tréimhse ón 1 Eanáir 2020 go dtí an 31 Nollaig 2020. Chumhdaigh an tréimhse faoi bhreathnú an tréimhse ón 1 Eanáir 2017 go dtí an 31 Nollaig 2020.

(5)

San Fhógra Tionscnaimh, iarradh ar na páirtithe leasmhara teagmháil a dhéanamh leis an gCoimisiún chun bheith rannpháirteach san imscrúdú. Ina theannta sin, chuir an Coimisiún iúl go sonrach do na gearánaigh, do tháirgeoirí agus comhlachais aitheanta de chuid an Aontais agus do Rialtas Dhaon-Phoblacht na Síne chomh maith gur tionscnaíodh an t-imscrúdú agus d’iarr sé orthu a bheith páirteach ann.

(6)

Bhí deis ag na páirtithe leasmhara barúil a thabhairt ar thionscnamh an imscrúdaithe agus éisteacht a iarraidh leis an gCoimisiún agus/nó leis an Oifigeach Éisteachta in imeachtaí trádála.

(7)

Is éard atá sa táirge atá faoi réir an imscrúdaithe seo, leictreoidí graifíte de chineál a úsáidtear le haghaidh foirnéisí leictreacha, ag a bhfuil dlús dealraitheach 1,5 g/cm3 nó níos mó, agus ag a bhfuil friotaíocht leictreach 7,0 μ.Ω.m nó níos lú, bíodh siní feistithe orthu nó ná bíodh (“an táirge faoi imscrúdú”).

(8)

Ina litir chuig an gCoimisiún an 9 Bealtaine 2022, tharraing na gearánaigh siar a ngearán.

(9)

I gcomhréir le hAirteagal 14(1) den bhun-Rialachán, féadfar an imeacht a fhoirceannadh, ach amháin mura mbeadh foirceannadh den sórt sin chun leas an Aontais.

(10)

Níor tháinig aon chúinse chun cinn le linn an imscrúdaithe a léirigh nach mbeadh foirceannadh den sórt sin chun leas an Aontais.

(11)

Dá bhrín sin, mheas an Coimisiún gur cheart na himeachtaí a fhoirceannadh.

(12)

Cuireadh na páirtithe leasmhara ar an eolas dá réir agus tugadh deis dóibh barúil a thabhairt.

(13)

Ní bhfuair an Coimisiún aon bharúil as a dtiocfaí ar an gconclúid nach mbeadh foirceannadh den sórt sin chun leas an Aontais.

(14)

Tá an Cinneadh seo i gcomhréir leis an tuairim ón gCoiste arna bhunú le hAirteagal 25(1) den bhun-Rialachán,