(1)

Ir-Regolament Delegat tal-Kummissjoni (UE) 2020/592 (2) introduċa għadd ta’ derogi għar-regoli eżistenti biex jgħinu lis-setturi tal-frott u l-ħaxix u s-settur tal-inbid ilaħħqu mal-impatt tal-pandemija tal-COVID-19.

(2)

Minħabba l-pandemija tal-COVID-19, fis-sena 2020, ħafna organizzazzjonijiet tal-produtturi u assoċjazzjonijiet ta’ organizzazzjonijiet tal-produtturi rikonoxxuti fis-settur tal-frott u l-ħaxix qed isibu diffikultà fl-implimentazzjoni tal-programmi operazzjonali approvati tagħhom. Xi wħud mill-azzjonijiet u l-miżuri approvati mhux se jiġu implimentati fl-2020 u għalhekk parti mill-fondi operazzjonali mhux se jintefqu. Organizzazzjonijiet tal-produtturi u assoċjazzjonijiet ta’ organizzazzjonijiet tal-produtturi rikonoxxuti oħrajn qed jemendaw il-programmi operazzjonali tagħhom bil-ħsieb li jimplimentaw l-azzjonijiet u l-miżuri li jindirizzaw l-impatt tal-pandemija tal-COVID-19 fis-settur tal-frott u l-ħaxix, bħall-miżuri ta’ ġestjoni tal-kriżijiet. Il-flessibbiltà fir-rigward tal-implimentazzjoni ta’ programmi operazzjonali diġà ġiet prevista fir-Regolament Delegat (UE) 2020/592.

(3)

L-implimentazzjoni tar-Regolament Delegat (UE) 2020/592 uriet li huma meħtieġa aktar miżuri biex l-organizzazzjonijiet tal-produtturi u l-assoċjazzjonijiet tal-organizzazzjonijiet tal-produtturi rikonoxxuti jkunu jistgħu jimmaniġġjaw il-fondi operazzjonali tagħhom, b’mod partikolari fejn ikunu mmodifikaw il-programmi operazzjonali tagħhom abbażi ta’ dak ir-Regolament.

(4)

Jeħtieġ li l-organizzazzjonijiet tal-produtturi u l-assoċjazzjonijiet tal-organizzazzjonijiet tal-produtturi rikonoxxuti jkunu jistgħu jidderieġu mill-ġdid il-fondi, inkluża l-assistenza finanzjarja tal-Unjoni fi ħdan il-fond operazzjonali għall-miżuri li huma meħtieġa biex jiġu indirizzati l-konsegwenzi tal-pandemija tal-COVID-19. Biex ikun żgurat li l-organizzazzjonijiet tal-produtturi u l-assoċjazzjonijiet tal-organizzazzjonijiet tal-produtturi rikonoxxuti jkunu jistgħu jagħmlu dan, huwa meħtieġ li, fis-sena 2020, ikun hemm żieda fil-limitu tal-għajnuna finanzjarja tal-Unjoni stipulata fl-Artikolu 34(1) tar-Regolament (UE) Nru 1308/2013 minn 50 % għal 70 % tan-nefqa reali mġarrba.

(5)

Ir-Regolament Delegat (UE) 2020/592 introduċa għadd ta’ derogi għar-regoli eżistenti fis-settur tal-inbid li kellhom l-għan li jipprovdu ftit nifs lill-produtturi tal-inbid u jgħinuhom ilaħħqu mal-impatt tal-pandemija tal-COVID-19. Madankollu, mill-pubblikazzjoni tar-Regolament Delegat (UE) 2020/592, is-sitwazzjoni għas-settur tal-inbid kompliet sejra għall-agħar.

(6)

Il-ħażniet tal-inbid fil-bidu tas-sena tas-suq 2019–2020 kienu fl-ogħla livell tagħhom mill-2009. F’Mejju 2020, l-esportazzjonijiet tal-inbid lejn pajjiżi terzi mill-Istati Membri li jipproduċu l-iktar naqsu b’bejn 22 % u 63 % fil-volum taħt dawk ta’ Mejju 2019. Il-konsum tal-inbid ġie affettwat ħafna minn konsegwenzi marbuta mal-pandemija tal-COVID-19, bħall-għeluq tal-fruntieri, l-għeluq tal-industrija tal-ospitalità u tal-catering, u l-interruzzjoni tal-attivitajiet turistiċi kollha. Dawn l-elementi kollha qegħdin kontinwament jikkawżaw it-tkabbir tas-surplus tal-inbid u qed ipoġġu pressjoni fuq is-suq u fuq il-prezzijiet.

(7)

Is-sitwazzjoni mhijiex mistennija li titjieb malajr, anke bl-attivitajiet ta’ ospitalità li parzjalment qed jerġgħu jibdew fl-Unjoni. Il-ftuħ mill-ġdid tar-ristoranti huwa ġeneralment suġġett għar-rekwiżiti ta’ tbegħid soċjali, li jfisser li r-ristoranti u l-bars ma jkunux jistgħu jakkomodaw l-istess numru ta’ klijenti bħal qabel ma l-miżuri stabbiliti biex jindirizzaw il-pandemija tal-COVID-19. Skont l-istimi tal-industrija tal-ospitalità u tal-catering, 30 % tar-ristoranti jaf ma jistgħux jerġgħu jinfetħu. F’bosta Stati Membri, għad hemm fis-seħħ restrizzjonijiet rigward l-ammont ta’ nies f’laqgħat soċjali, inkluż fl-avvenimenti privati ta’ ċelebrazzjoni bħal tiġijiet, fejn tradizzjonalment jiġi kkunsmat l-inbid. Il-kuntatt ristrett għadu rakkomandat jew impost u ċ-ċittadini mhumiex lesti li jerġgħu jibdew l-attivitajiet soċjali preċedenti tagħhom minħabba li l-pandemija tal-COVID-19 għadha għaddejja. Konsegwentement, minkejja l-illaxkar ta’ ċerti regoli imposti matul il-lockdown, f’Ġunju 2020 is-sitwazzjoni għadha mhix lura għan-normal, u din is-sitwazzjoni aktarx tkompli.

(8)

Konsegwentement, minħabba d-durata tar-restrizzjonijiet imposti mill-Istati Membri biex jindirizzaw il-pandemija tal-COVID-19 u l-kontinwazzjoni tal-effetti tagħhom, l-impatti ekonomiċi fuq terminu twil fuq is-swieq ewlenin għall-prodotti tas-settur tal-inbid u l-effetti negattivi tagħhom fuq id-domanda għall-inbid komplew u marru għall-agħar.

(9)

Fid-dawl ta’ dan it-tfixkil partikolarment qawwi tas-suq u tal-akkumulazzjoni ta’ ċirkostanzi diffiċli fis-settur tal-inbid, li jibdew bl-impożizzjoni mill-Istati Uniti ta’ tariffi fuq l-importazzjonijiet ta’ nbejjed tal-Unjoni f’Ottubru 2019 u li jkomplu bil-miżuri ta’ restrizzjoni minħabba l-pandemija dinjija tal-COVID-19 u l-konsegwenzi li għadhom iġorru magħhom, is-settur tal-inbid qed jesperjenza diffikultajiet eċċezzjonali, inkluż ta’ natura finanzjarja. Dan iħalli impatt fuq l-ippjanar, l-implimentazzjoni u l-eżekuzzjoni tal-operazzjonijiet taħt il-programmi ta’ appoġġ fis-settur tal-inbid minħabba li l-operaturi qed isofru minn tnaqqis kbir ta’ likwidità meta mqabbel mas-snin normali.

(10)

L-implimentazzjoni tal-miżuri biex tiġi indirizzata l-kriżi u ż-żidiet fil-kontribuzzjoni massima tal-Unjoni introdotti bir-Regolament Delegat (UE) 2020/592 urew li mhumiex biżżejjed biex titjieb is-sitwazzjoni finanzjarja tal-operaturi fis-settur tal-inbid. B’mod partikolari, ma jistgħux jikkumpensaw għat-telf kbir tad-dħul li qed jirriżulta mill-kriżi.

(11)

B’kont meħud ta’ dawn iċ-ċirkostanzi, jenħtieġ li l-benefiċjarji jkunu jistgħu jirċievu pagamenti bil-quddiem skont il-miżuri introdotti mir-Regolament Delegat (UE) 2020/592, jiġifieri “distillazzjoni tal-inbid f’każ ta’ kriżi” u “għajnuna għall-ħżin tal-inbid fi kriżi”. These advances should cover 100 % of the amount of the Union support and should be paid provided that a guarantee of an amount at least equal to 110 % of the advance has been lodged. Dan isir bl-intenzjoni li jiggarantixxi li jkun jista’ jiġi rtirat kemm jista’ jkun inbid mis-suq taħt dawn iż-żewġ miżuri matul is-sena finanzjarja 2020, filwaqt li jgħin lill-benefiċjarji kkonċernati bil-likwidità tagħhom u jipprovdi flessibilità li tippermetti lil aktar benefiċjarji jwettqu operazzjonijiet taħt dawn iż-żewġ miżuri. Barra minn hekk, li jiġi permess il-ħlas ta’ pagamenti 100 % bil-quddiem jippermetti lill-Istati Membri jużaw b’mod effiċjenti l-allokazzjoni finanzjarja annwali tagħhom u jikkumpensaw id-dewmien fl-implimentazzjoni tal-miżuri minħabba l-pandemija tal-COVID-19.

(12)

Ir-Regolament Delegat (UE) 2020/592 ippreveda wkoll il-possibbiltà li l-Istat Membru jagħti pagamenti nazzjonali li jikkomplementaw l-appoġġ tal-Unjoni għall-miżuri ta’ “distillazzjoni tal-inbid f’każ ta’ kriżi” u “għajnuna għall-ħżin tal-inbid fi kriżi” għaliex, bħala konsegwenza tal-effetti tal-pandemija tal-COVID-19, jeħtieġ li jiġu rtirati mis-suq l-ogħla kwantitajiet possibbli ta’ nbid li la ġew ikkonsmati, la mibjugħa u lanqas esportati matul il-perjodu tal-pandemija. Il-pagamenti nazzjonali jagħmluha possibbli li jiġu massimizzati dawn il-kwantitajiet flimkien ma’ dawk li jistgħu jiġu appoġġati taħt il-limiti tal-baġit stabbiliti għall-programmi ta’ appoġġ fis-settur tal-inbid. Ir-Regolament Delegat (UE) 2020/592 ippreveda wkoll li dawk il-pagamenti nazzjonali addizzjonali jkunu soġġetti għal regoli dwar l-għajnuna mill-Istat. Madankollu, dan l-obbligu wera li jagħmilha impossibbli għal ċerti Stati Membri li jagħtu pagamenti nazzjonali u jimplimentaw il-miżuri introdotti mir-Regolament Delegat (UE) 2020/592 b’mod effiċjenti. Għalhekk huwa xieraq li r-Regolament Delegat (UE) 2020/592 jiġi emendat biex jiġi żgurat li l-Artikolu 211(2)(a) tar-Regolament (UE) Nru 1308/2013, li jipprevedi li l-pagamenti magħmula mill-Istati Membri ma jkunux soġġetti għar-regoli dwar l-għajnuna mill-Istat, japplika għal dawk il-miżuri.

(13)

Fost id-derogi introdotti mir-Regolament Delegat (UE) 2020/592, il-kontribuzzjoni tal-Unjoni għall-ispejjeż reali tal-miżuri stabbiliti fl-Artikoli 46(6), 47(3), 49(2) u 50(4) tar-Regolament (UE) Nru 1308/2013 żdiedet temporanjament b’ 5 % jew 10 %.

(14)

Barra minn hekk, qabel ir-Regolament Delegat (UE) 2020/592, ir-Regolament ta’ Implimentazzjoni tal-Kummissjoni (UE) 2020/132 (3) introduċa, b’deroga mill-Artikolu 45(3) tar-Regolament (UE) Nru 1308/2013, żieda temporanja ta’ 10 % tal-kontribuzzjoni tal-Unjoni għall-ispejjeż reali tal-miżura “promozzjoni” biex tiġi indirizzata s-sitwazzjoni diffiċli fis-swieq tal-esportazzjoni wara l-impożizzjoni mill-Istati Uniti ta’ tariffi fuq l-importazzjonijiet tal-inbid tal-Unjoni f’Ottubru 2019.

(15)

Iż-żieda fil-kontribuzzjoni tal-Unjoni tirrappreżenta forma ta’ appoġġ finanzjarju li, madankollu, ma teħtieġx finanzjament addizzjonali min-naħa tal-Unjoni għax jibqgħu japplikaw il-limiti baġitarji għall-programmi ta’ appoġġ għas-settur tal-inbid stabbiliti fl-Anness VI tar-Regolament (UE) Nru 1308/2013. Għalhekk l-Istati Membri jistgħu jiddeċiedu li jallokaw ammonti akbar għall-miżuri inkwistjoni biss fil-baġit annwali previst f’dak l-Anness. Għaldaqstant, il-miżura hi mmirata biex tipprovdi appoġġ lis-settur f’din is-sitwazzjoni instabbli tas-suq mingħajr ma jkun hemm bżonn jiġu mmobilizzati iżjed fondi.

(16)

Madankollu, l-ewwel reazzjonijiet tas-settur ippreżentat lill-Kummissjoni mill-Intergrupp tal-Inbid u l-Ispirti tal-Parlament Ewropew u mir-rappreżentanti tas-settur Ewropew tal-inbid indikaw li ż-żidiet ta’ hawn fuq fil-kontribuzzjoni massima tal-Unjoni għall-miżura ta’ “promozzjoni”, introdotta bir-Regolament ta’ Implimentazzjoni (UE) 2020/132, u għall-miżuri ta’ “ristrutturar u konverżjoni tal-vinji”, “ħsad bikri”, “assigurazzjoni tal-ħsad” u “investimenti”, introdotti bir-Regolament Delegat (UE) 2020/592, ma kinux biżżejjed biex jippermettu lill-biċċa l-kbira tal-benefiċjarji potenzjali jimplimentaw dawn il-miżuri fl-2020. L-ammonti li ntefqu taħt il-limiti baġitarji għall-programmi nazzjonali ta’ appoġġ mis-16 ta’ Ottubru 2019 sal-aħħar ta’ April 2020 huma taħt il-medja tas-soltu tan-nefqa bejn is-16 ta’ Ottubru u l-aħħar ta’ April tas-sena ta’ wara.

(17)

Jidher ċar li l-miżuri ta’ lockdown li ttieħdu fl-Istati Membri matul dawn l-aħħar xhur aggravaw is-sitwazzjoni, peress li, fost l-oħrajn, ir-restrizzjonijiet f’movimenti ta’ oġġetti u ta’ persuni, introdotti fil-ġlieda kontra l-pandemija tal-COVID-19, waqqfu lill-operaturi milli japplikaw għal finanzjament taħt il-programmi ta’ appoġġ fis-settur tal-inbid u l-benefiċjarji milli jimplimentaw l-operazzjonijiet magħżula tagħhom. B’riżultat ta’ dan, l-Istati Membri nefqu ammont żgħir ħafna tal-allokazzjoni baġitarja tagħhom għas-sena finanzjarja 2020.

(18)

Minħabba l-kombinazzjoni bla preċedent ta’ ċirkostanzi u t-tfixkil fis-suq li jirriżulta, jeħtieġ li jiġi pprovdut aktar appoġġ finanzjarju lill-operaturi biex jgħinuhom permezz ta’ dawn iż-żminijiet ekonomikament diffiċli. Din il-flessibbiltà hija finanzjarjament possibbli minħabba d-disponibbiltà ta’ fondi riżervati għall-programmi ta’ appoġġ fis-settur tal-inbid li baqgħu ma ntefqux sa issa u li, minħabba l-annwalità baġitarja, kieku jintilfu.

(19)

Sabiex jiġi pprovdut l-appoġġ meħtieġ għas-settur tal-inbid u sabiex il-benefiċjarji potenzjali jiġu megħjuna jimplimentaw miżuri skont il-programm nazzjonali ta’ appoġġ għas-settur tal-inbid, li għandhom l-għan li jsaħħu l-pożizzjoni tagħhom fis-suq u huma meħtieġa biex jgħinu l-irkupru tagħhom wara l-kriżi, huwa xieraq li ssir deroga mill-Artikoli 45(3), 46(6), 47(3), 49(2) u 50(4) tar-Regolament (UE) Nru 1308/2013 għad-durata ta’ din il-miżura. Jenħtieġ li d-derogi jipprevedu żieda temporanja ta’ 20 % tal-kontribuzzjoni massima tal-Unjoni għall-miżura ta’ “informazzjoni”, kif stabbilit fl-Artikolu 45(3) tar-Regolament (UE) Nru 1308/2013, u b’10 % addizzjonali għall-miżura ta’ “promozzjoni”, kif attwalment stabbilita fir-Regolament ta’ Implimentazzjoni (UE) 2020/132, u għall-miżuri ta’ “ristrutturar u konverżjoni tal-vinji”, ta’ “ħsad ekoloġiku”, ta’ “assigurazzjoni tal-ħsad” u ta’ “investimenti”, kif attwalment stabbiliti fir-Regolament Delegat (UE) 2020/592. Dan se jipprovdi lill-benefiċjarji b’aktar għajnuna finanzjarja billi jnaqqas il-kontribuzzjoni proprja tal-benefiċjarji u jgħin lill-Istati Membri jużaw il-massimu tal-baġit disponibbli tagħhom.

(20)

Sabiex tiġi evitata d-diskriminazzjoni, jenħtieġ li l-possibbiltà għall-benefiċjarji li jitolbu pagamenti bil-quddiem ta’ 100 % għad-distillazzjoni u l-ħżin ta’ kriżi u l-possibbiltà li l-Istati Membri jikkomplementaw il-kontribuzzjoni tal-Unjoni għal dawk il-miżuri b’pagamenti nazzjonali, mingħajr ma dawk il-pagamenti jkunu soġġetti għal regoli dwar l-għajnuna mill-Istat, tapplika b’mod retroattiv mid-dħul fis-seħħ tar-Regolament Delegat (UE) 2020/592. Għall-istess raġuni u wkoll biex tiġi żgurata l-applikazzjoni koerenti tal-miżuri kollha, il-kontribuzzjoni tal-Unjoni għall-applikazzjonijiet li ntgħażlu taħt il-miżuri ta’ “informazzjoni u promozzjoni”, ta’ “ristrutturar u konverżjoni tal-vinji”, ta’ “ħsad bikri”, ta’ “assigurazzjoni tal-ħsad” u ta’ “investimenti” wara d-dħul fis-seħħ tar-Regolament Delegat (UE) 2020/592 u sa mhux aktar tard mill-15 ta’ Ottubru 2020 tista’ tiżdied retroattivament, u soġġett għar-rispett tar-regoli dwar l-għajnuna mill-Istat, fejn applikabbli.

(21)

Għaldaqstant, jenħtieġ li r-Regolament Delegat (UE) 2020/592 jiġi emendat skont dan.

(22)

Fid-dawl tal-ħtieġa li tittieħed azzjoni immedjata, jenħtieġ li dan ir-Regolament jidħol fis-seħħ dakinhar tal-pubblikazzjoni tiegħu f’Il-Ġurnal Uffiċjali tal-Unjoni Ewropea,