1.

Is é is aidhm don tionscadal faisnéis cothrom le dáta a chur ar fáil maidir le honnmhaireoirí cláraithe atá bunaithe i dtíortha Scéim na bhFabhar Ginearálaithe (GSP) a onnmhairíonn earraí chuig an Aontas. Tá an córas tras-Eorpach agus áirítear ann freisin sonraí faoi oibreoirí eacnamaíocha an Aontais, chun tacú le honnmhairí chuig tíortha GSP. Cuireadh na sonraí riachtanacha isteach sa chóras de réir a chéile go dtí an 31 Nollaig 2017.

2.

Is é is aidhm don tionscadal uasghrádú a dhéanamh ar an gcóras tras-Eorpach EBTI-3 atá ann cheana chun an méid seo a leanas a áirithiú:

Féadfar an tionscadal a chur chun feidhme in dhá chéim.

Cuireann an chéad chéim (céim 1) feidhmiúlacht ar fáil chun an tacar sonraí dearbhaithe a theastaíonn ó CCA a fháil de réir a chéile ón 1 Márta 2017 go dtí cur chun feidhme na dtionscadal a liostaítear i bpointí 10 agus 14. Braitheann cur chun feidhme iomlán an tionscadail seo ar chur chun feidhme na dtionscadal a liostaítear i bpointí 10 agus 14. Comhlíonann céim 2 an oibleagáid rialaithe úsáide BTI ar bhonn an tacair sonraí dearbhaithe nua is gá agus ar bhonn an ailínithe leis an bpróiseas cinntí custaim.

3.

Is é is aidhm don tionscadal comhchuibhiú a dhéanamh ar na próisis le haghaidh iarratais ar chinneadh custaim, ar chinnteoireacht chustaim agus ar bhainistiú cinntí custaim trí chaighdeánú agus bainistiú leictreonach a dhéanamh ar shonraí iarratais agus cinntí/údarúcháin ar fud an Aontais. Baineann an tionscadal le cinntí náisiúnta agus roinnt Ballstát arna sainiú ag an gCód agus cumhdaítear leis comhchodanna córais a fhorbraítear go lárnach ar leibhéal an Aontais agus comhtháthú le comhchodanna náisiúnta i gcás ina roghnaíonn na Ballstáit iad sin. Éascaíonn an córas tras-Eorpach sin comhairliúchán le linn an phróisis cinnteoireachta agus le linn bhainistiú an phróisis údarúcháin.

4.

Is é cuspóir an tionscadail seo réitigh oibre a chur ar fáil le haghaidh rochtain dhíreach chomhchuibhithe trádálaithe mar sheirbhís do chomhéadain idir úsáideoirí agus córais, a bheidh le comhtháthú sna córais chustaim leictreonacha mar a shainmhínítear i dtionscadail shonracha CCA. Déanfar Bainistíocht Aonfhoirmeach na nÚsáideoirí agus an Síniú Digiteach a chomhtháthú i dtairseacha na gcóras lena mbaineann, agus áirítear leo tacaíocht do chéannacht, do rochtain agus do bhainistiú úsáideoirí i gcomhréir leis na beartais slándála is gá. Tharla an chéad chur chun feidhme in éineacht le córas Cinnteoireachta Custaim CCA.

5.

Is é is aidhm don tionscadal seo feabhas a chur ar na próisis ghnó a bhaineann le hiarratais agus údaruithe AEO, agus athruithe ar fhorálacha dlíthiúla Chód Custaim an Aontais á gcur san áireamh.

Sa chéad chéim, is é is aidhm don tionscadal feabhsuithe móra ar chóras AEO a chur chun feidhme mar chuid de chomhchuibhiú an nós imeachta cinnteoireachta custaim.

Sa dara céim, cuirtear chun feidhme leis an tionscadal foirm leictreonach an iarratais agus an chinnidh AEO agus cuirtear comhéadan comhchuibhithe ar fáil d’oibreoirí eacnamaíocha chun an t–iarratas AEO a chur isteach agus cinneadh AEO a fháil go leictreonach. Úsáidtear an córas uasghrádaithe in dhá eisiúint: cuid 1 maidir leis an iarratas AEO agus an próiseas cinnteoireachta a chur isteach, agus cuid 2 do na próisis eile ina dhiaidh sin.

6.

Is é is aidhm don tionscadal seo mion–uasghrádú a dhéanamh ar an gcóras EORI tras-Eorpach atá ann cheana lena gcumasaítear clárú agus sainaithint oibreoirí eacnamaíocha an Aontais agus tríú tíortha agus daoine seachas oibreoirí eacnamaíocha atá gníomhach in ábhair chustaim san Aontas.

7.

Is é is aidhm don tionscadal seo uasghrádú a dhéanamh ar an gcóras Faireachais 2+ chun a áirithiú go n–ailínítear é le ceanglais CCA amhail malartú caighdeánach faisnéise trí theicnící próiseála sonraí leictreonacha agus bunú na bhfeidhmiúlachtaí is gá chun an tacar sonraí faireachais iomlán a fhaightear ó na Ballstáit a phróiseáil agus a anailísiú.

Áirítear leis cumais bhreise mianadóireachta sonraí agus feidhmiúlachtaí tuairiscithe, dá bhrí sin, a chuirfear ar fáil do na Ballstáit agus don Choimisiún.

Braitheann cur chun feidhme iomlán an tionscadail seo ar chur chun feidhme na dtionscadal a liostaítear i bpointí 10 agus 14. Leagann na Ballstáit amach dáta cur chun feidhme an chórais sin mar chuid dá bpleananna náisiúnta.

8.

Is é is aidhm don tionscadal córas tras-Eorpach nua a chruthú chun Cruthúnas ar Stádas Aontais T2L/F agus an lastliosta earraí custaim a stóráil, a bhainistiú agus a aisghabháil (arna eisiúint ag eisitheoir neamhúdaraithe).

Ós rud é go bhfuil cur chun feidhme an lastliosta earraí custaim le nascadh leis an timpeallacht Eorpach Ionaid Ilfhreastail Mhuirí, cumhdófar an chuid sin den tionscadal i gcéim 2.

9.

Is é is aidhm don tionscadal seo an córas NCTS tras-Eorpach atá ann cheana a ailíniú le CCA nua.

Comhchuid 1 - ‘NCTS-Céim 5’: is é is aidhm don chéim sin an córas NCTS a ailíniú le ceanglais nua CCA seachas eilimintí sonraí sábháilteachta agus slándála i ndearbhuithe custaim idirthurais maidir le hearraí a thugtar isteach i gcríoch chustaim an Aontais.

Cumhdaítear leis imeachtaí ‘faoi bhealach’ a chlárú, malartuithe faisnéise a ailíniú le ceanglais sonraí CCA agus comhéadain le córais eile a uasghrádú agus a fhorbairt.

Féadfar an tionscadal a chur chun feidhme in dhá chéim.

Céim 1: Príomhfheidhmiúlachtaí le haghaidh NCTS-Céim 5 lena n–áiritheofar leanúnachas oibríochtúil an chórais, amhail an dearbhú caighdeánach idirthurais (sreabhadh lárnach), nós imeachta simplithe ag imeacht/ceann scríbe (coinsíneoir/coinsíní údaraithe), leasú/neamhbhailíochtú, atreorú (san oifig idirthurais agus cinn scríbe), próisis fiosrúcháin/aisghabhála agus sonraí staidrimh gnó a sheoladh. Féadfar na feidhmiúlachtaí nach bhfuil lárnach mar a shainítear i gcéim 2 a chumhdach leis an gcéim sin freisin.

Céim 2: cumhdaítear leis an gcéim sin na feidhmiúlachtaí atá fágtha amhail comhéadan comhchuibhithe a fhorbairt le AES, dearbhú a taisceadh roimh thíolacadh na n–earraí, dearbhú le tacar sonraí laghdaithe, Teagmhas ‘faoi bhealach’ agus foirmiúlachtaí ag an Oifig Imeachta le haghaidh Idirthurais.

Comhchuid 2 - ‘NCTS-Céim 6’: is é is aidhm don chéim sin na ceanglais nua shonracha a chur chun feidhme le haghaidh eilimintí sonraí sábháilteachta agus slándála i ndearbhuithe custaim idirthurais maidir le hearraí a thugtar isteach i gcríoch chustaim an Aontais, ceanglais nua atá ann mar gheall ar thionscadal 17 (CCA ICS2). Cumhdaítear leis forbairt an chomhéadain le ICS2, chun taisceadh dearbhaithe maidir le hidirthuras ina bhfuil sonraí an dearbhaithe iontrála achomair a éascú trí Airteagal 130(1) CCA a chur i bhfeidhm.

10.

Is é is aidhm don tionscadal seo ceanglais CCA a chur chun feidhme maidir le honnmhairiú agus imeacht.

Comhpháirt 1 - ‘AES Tras-Eorpach’. Is é is aidhm don tionscadal an Córas Rialaithe Onnmhairí tras-Eorpach atá ann cheana a fhorbairt a thuilleadh d’fhonn AES iomlán a chur chun feidhme lena gcumhdófar na riachtanais ghnó le haghaidh próiseas agus sonraí a thagann ó Chód Custaim an Aontais. Féadfar Comhchuid 1 a chur chun feidhme in trí chéim.

Céim 1: Príomhfheidhmiúlachtaí le haghaidh AES a chumasóidh uathoibriú iomlán nósanna imeachta onnmhairiúcháin agus foirmiúlachtaí imeachta. Cumhdaíonn AES codanna atá le forbairt go lárnach agus go náisiúnta, lena n–áirítear na comhpháirteanna náisiúnta ina dtaisctear agus ina bpróiseáiltear an dearbhú onnmhairiúcháin agus lenar féidir faisnéis a mhalartú ina dhiaidh sin leis an oifig custaim imeachta trí chomhpháirteanna coiteanna AES. Áirítear ar an gcéim seo freisin feidhmeanna foirmiúlachtaí imeachta atá riachtanach chun na hearraí a scaoileadh le haghaidh imeachta. Féadfar na feidhmiúlachtaí a shainítear faoi chéimeanna 2 agus 3 a chumhdach leis an gcéim sin freisin.

Céim 2: Cumhdaítear leis an gcéim sin comhéadan comhchuibhithe a fhorbairt leis an gCóras um Rialú agus um Ghluaiseacht Máil (EMCS). Féadfar na feidhmiúlachtaí nach bhfuil lárnach mar a shainítear i gcéim 3 a chumhdach leis an gcéim sin freisin.

Céim 3: Cumhdaítear leis an gcéim seo feidhmiúlachtaí eile amhail dearbhuithe simplithe agus forlíontacha, forbairt ar chomhéadan comhchuibhithe le NCTS, imréiteach láraithe, dearbhú a taisceadh roimh thíolacadh na n–earraí.

Comhpháirt 2 - ‘uasghrádú na gCóras Náisiúnta Onnmhairiúcháin’. I bpróiseas atá lasmuigh de raon feidhme AES ach a bhfuil dlúthnasc eatarthu, déanfar córais náisiúnta ar leith a uasghrádú le haghaidh eilimintí náisiúnta sonracha a bhaineann le foirmiúlachtaí onnmhairiúcháin agus/nó imeachta. I gcás nach ndéanfaidh na heilimintí sin difear don fhearann coiteann le haghaidh AES, is féidir iad a chumhdach faoin gcomhchuid sin.

11.

Is é is aidhm don tionscadal seo córas tras-Eorpach nua a fhorbairt chun tacú le próisis bainistithe sonraí INF agus le láimhseáil sonraí INF go leictreonach agus chun na próisis agus an láimhseáil sin a chuíchóiriú i bhfearann na Nósanna Imeachta Speisialta.

12.

Is é is aidhm don tionscadal seo dlús a chur le Nósanna Imeachta Speisialta ar fud an Aontais, iad a éascú agus a chomhchuibhiú trí shamhlacha coiteanna próisis ghnó a sholáthar. Leis na córais náisiúnta, cuirfear chun feidhme na hathruithe uile CCA is gá le haghaidh stórasú custaim, úsáid deiridh, cead isteach sealadach, próiseáil isteach agus amach.

Cuirfear an tionscadal sin chun feidhme in dhá chéim.

Comhchuid 1 - ‘SP EXP Náisiúnta’. Soláthraítear na réitigh leictreonacha náisiúnta is gá le haghaidh gníomhaíochtaí nósanna imeachta speisialta a bhaineann le honnmhairiú.

Comhchuid 2 - ‘SP IMP Náisiúnta’. Soláthraítear na réitigh leictreonacha náisiúnta is gá le haghaidh gníomhaíochtaí nósanna imeachta speisialta a bhaineann le hallmhairiú.

Déanfar na tionscadail sin a chur chun feidhme trí na tionscadail a liostaítear i bpointí 10 agus 14.

13.

Fógra CCA maidir le Teacht, Cur i láthair agus Stóráil Shealadach

Is é cuspóir an tionscadail seo sainiú a dhéanamh ar na próisis maidir le Fógra a thabhairt faoi theacht na modhanna iompair, Cur i láthair na n–earraí (Fógra Cur i láthair) agus Dearbhú maidir le Stóráil Shealadach mar a thuairiscítear in CCA agus tacú le comhchuibhiú ina leith sin ar fud na mBallstát a mhéid a bhaineann leis an malartú sonraí idir trádáil agus custam.

Clúdaíonn an tionscadal uathoibriú próiseas ar an leibhéal náisiúnta.

14.

Uasghrádú ar Chórais Allmhairiúcháin Náisiúnta CCA

Is é is aidhm don tionscadal gach riachtanas próiseála agus sonraí a eascraíonn as CCA a bhaineann leis an bhfearann allmhairiúcháin (agus nach gcumhdaítear le ceann de na tionscadail eile a shainítear sa chlár oibre) a chur chun feidhme. Baineann sé go príomha leis na hathruithe ar an nós imeachta ‘Eisiúint i saorchúrsaíocht’ (nós imeachta caighdeánach + simplithe), ach cumhdaítear leis freisin an tionchar a eascraíonn as ascnaimh chórais eile. Baineann an tionscadal seo leis an bhfearann allmhairiúcháin náisiúnta a chumhdaíonn córais phróiseála náisiúnta um dhearbhú custaim chomh maith le córais eile amhail córais náisiúnta chuntasaíochta agus íocaíochta.

15.

Imréiteach Láraithe um Allmhairiú (CCI) Chód Custaim an Aontais

Is é is aidhm don tionscadal go bhféadfar earraí a chur faoi nós imeachta custaim trí úsáid a bhaint as imréiteach láraithe, rud a chuirfidh ar chumas oibreoirí eacnamaíocha a ngnó a lárú ó thaobh an chustaim de. Déanfar próiseáil an dearbhaithe custaim agus eisiúint fhisiciúil na n–earraí a chomhordú idir na hoifigí custaim gaolmhara. Baineann sé le córas tras-Eorpach ina bhfuil comhchodanna arna bhforbairt go lárnach agus go náisiúnta.

Cuirfear an tionscadal chun feidhme in dhá chéim.

Céim 1: Leis an gcéim sin, cumhdófar imréiteach láraithe le dearbhuithe caighdeánacha custaim agus d’fhéadfaí go gcumhdófar imréiteach láraithe le dearbhuithe custaim simplithe mar aon leis na dearbhuithe forlíontacha ginearálta nó tréimhsiúla faoi seach (aon dearbhú custaim simplithe amháin a thabhairt chun rialtachta). Ina theannta sin, cumhdófar leis earraí a chuimsiú faoi na nósanna imeachta custaim seo a leanas: eisiúint le haghaidh saorchúrsaíochta, stórasú custaim, próiseáil isteach agus úsáid deiridh. I gcás an chineáil earraí, cumhdófar leis an gcéim sin gach cineál earra cé is moite d’earraí máil, earraí ón Aontas i gcomhthéacs trádáil le críocha fioscacha speisialta agus earraí atá faoi réir bhearta an chomhbheartais talmhaíochta.

Céim 2: Is é is aidhm don chéim seo na feidhmiúlachtaí uile a chur chun feidhme faoi raon feidhme iomlán CCI: dearbhuithe simplithe agus forlíontacha (mura gcuirtear chun feidhme iad faoi Chéim 1), na dearbhuithe custaim trí iontráil i dtaifid an dearbhóra agus na dearbhuithe forlíontacha achoimreacha (lena ndéantar níos mó ná dearbhú custaim simplithe amháin nó níos mó ná iontráil amháin i dtaifid an dearbhóra a thabhairt chun rialtachta), earraí a chur faoin nós imeachta um chead isteach sealadach, earraí máil, earraí ón Aontas i gcomhthéacs na trádála le críocha fioscacha speisialta agus earraí atá faoi réir bhearta an chomhbheartais talmhaíochta.

16.

Is é is aidhm don tionscadal seo a chinntiú go ndéanfar bainistiú éifeachtach éifeachtúil ar na cineálacha éagsúla ráthaíochtaí.

Comhchuid 1 - ‘GUM’: Cumhdófar leis an gcomhchuid lárnach den chóras tras-Eorpach bainistiú na ráthaíochtaí cuimsitheacha a fhéadfar a úsáid i níos mó ná Ballstát amháin. Cuirfear chun feidhme é i gCóras Cinnteoireachta Custaim CCA agus déanfar comhéadan le comhpháirt náisiúnta (féach Comhchuid 2) chun faireachán a dhéanamh ar an méid tagartha. Féadfaidh baint a bheith ag an méid tagartha sin le gach dearbhú custaim, dearbhú forlíontach nó faisnéis iomchuí eile maidir leis na sonraí is gá chun faireachán a dhéanamh ar mhéideanna tagartha na ráthaíochtaí cuimsitheacha le haghaidh stóráil shealadach agus na nósanna imeachta custaim uile dá bhforáiltear i gCód Custaim an Aontais, cé is moite d’Idirthuras a láimhseáiltear mar chuid de thionscadal NCTS.

Comhchuid 2 - ‘Bainistíocht Ráthaíochta Náisiúnta’. Cuirfear an chomhchuid sin chun feidhme trí chóras leictreonach náisiúnta ina gclárófar agus ina mbainisteofar ráthaíochtaí cuimsitheacha atá bailí i níos mó ná Ballstát amháin agus ina ndéanfar faireachán ar a mhéid tagartha. Úsáidfear é freisin le haghaidh ráthaíochtaí eile.

Nascfaidh an chomhchuid leis na córais náisiúnta dearbhaithe custaim aon uair a agrófar ráthaíochtaí sa dearbhú custaim agus, i gcás ráthaíochtaí cuimsitheacha, ba cheart di na sonraí gnó ábhartha a aisghabháil ón údarú faoi seach chun ráthaíocht chuimsitheach a sholáthar.

17.

Is é is aidhm don chlár seo sábháilteacht agus slándáil réamhtheachta na n–earraí a thagann isteach san Aontas a neartú trí cheanglais nua CCA a chur chun feidhme maidir le dearbhuithe iontrála achomair (ENS) a thaisceadh agus a láimhseáil, go háirithe sonraí ENS a sholáthar i níos mó ná aighneacht amháin, bíodh sí/siad ó dhuine amháin nó ó dhaoine éagsúla, agus malartú na sonraí sin agus torthaí na hanailíse riosca i measc na n–údarás custaim. Is é an toradh a bheidh ar ICS2 go mbeidh ailtireacht iomlán nua ann agus go gcuirfear córas nua in áit an chórais ICS thras-Eorpaigh atá ann cheana de réir a chéile.

Tá an clár á chur chun feidhme i dtrí eisiúint.

Eisiúint 1: Cumhdaítear leis an eisiúint sin an oibleagáid atá ar na hoibreoirí eacnamaíocha ábhartha (oibreoirí poist agus meariompróirí san aeriompar) na sonraí íosta a sholáthar, i.e. tacar sonraí réamhluchtaithe ENS.

Eisiúint 2: Cumhdaítear leis an eisiúint sin cur chun feidhme oibleagáidí iomlána nua ENS, próisis ghaolmhara ghnó agus bainistíochta riosca le haghaidh na n–earraí uile san aerthrácht.

Eisiúint 3: Cumhdófar leis an eisiúint sin cur chun feidhme oibleagáidí iomlána nua ENS, próisis ghaolmhara bainistíochta gnó agus riosca le haghaidh na n–earraí uile in uiscebhealaí idir mhuirí agus intíre agus trácht bóthair agus iarnróid (áirítear leis sin earraí i gcoinsíneachtaí poist a iompraítear sna modhanna iompair sin). Déanfar feidhmiú céimneach ar Eisiúint 3 ar an mbealach seo a leanas: beidh na chéad iompróirí uiscebhealaí idir mhuirí agus intíre á dtabhairt isteach de réir a chéile (céim 1), ansin na comhdaitheoirí bille ládála muirí i dtrácht na n–uiscebhealaí idir mhuirí agus intíre (céim 2), agus ansin na hiompróirí bóthair agus iarnróid (céim 3).