Cuspóirí téamacha maidir le Cistí SIE

PRÍOMHPHOINTÍ

Cuimsítear 5 chiste i gCistí SIE: Ciste Forbraíochta Réigiúnaí na hEorpa (CFRE), Ciste Sóisialta na hEorpa (CSE), an Ciste Comhtháthaithe, an Ciste Eorpach Talmhaíochta um Fhorbairt Tuaithe agus an Ciste Eorpach Muirí agus Iascaigh.

Chomh maith le misin chiste-shonracha, tacaíonn gach Ciste SIE le tosaíochtaí infheistíochta ar a dtugtar cuspóirí téamacha:

1. Taighde, forbairt teicneolaíochta agus nuálaíocht a neartú;
2. Úsáid agus cáilíocht theicneolaíochtaí na faisnéise agus na cumarsáide, agus rochtain orthu, a fheabhsú;
3. Iomaíochas fiontar beag agus meánmhéide a fheabhsú;
4. Tacú leis an aistriú i dtreo geilleagar ísealcharbóin;
5. Oiriúnú don athrú aeráide, seachaint riosca agus bainistíocht riosca a chur chun cinn;
6. An comhshaol a chosaint agus a chaomhnú agus éifeachtúlacht acmhainní a chur chun cinn;
7. Iompar inbhuanaithe a chur chun cinn agus réidh a fháil le baic i bpríomhbhonneagar líonra;
8. Fostaíocht inbhuanaithe agus ar ardcháilíochta a chur chun cinn agus tacú le soghluaisteacht an lucht saothair;
9. Cuimsiú sóisialta a chur chun cinn, an bhochtaineacht agus aon idirdhealú a chomhrac;
10. Infheistiú san oideachas agus san oiliúint le haghaidh scileanna agus na foghlama ar feadh an tsaoil;
11. Feabhas a chur ar chumas na n–údarás poiblí agus ar riarachán poiblí éifeachtúil.

Aistrítear cuspóirí téamacha go tosaíochtaí a bhaineann go sonrach le gach Ciste SIE. Baineann téamaí 1-4 leis an CFRE, agus is príomhthéamaí iad téamaí 8-11 maidir leis an CSE.

Cur chuige comhtháite, comhordaithe agus comhlántach

Ní mór do thíortha AE a áirithiú go gcomhlíonfaidh rogha a gcuspóirí téamacha na riachtanais forbartha agus na dúshláin chríochacha, agus go n–áiritheofar leo seachadadh comhtháite Chistí SIE.

Comhordú agus sineirgí idir cistí SIE agus beartais eile AE

Ní foláir nó go mbreithneoidh tíortha AE agus an Coimisiún Eorpach na modhanna is oiriúnaí chun cistí AE a úsáid chun tacú le hinfheistíocht, comhordú a dhéanamh idir Cistí SIE agus ionstraimí eile AE, lena n–áirítear:

• An comhbheartas talmhaíochta agus an comhbheartas iascaigh;
• Deiseanna Nua 2020 agus cláir AE eile a bhainistítear go lárnach sna réimsí taighde agus nuálaíochta;
• Cistiú taispeántais an Chúlchiste Iontrálaithe Nua (NER) 300;
• Clár AE um an comhshaol agus um ghníomhú ar son na haeráide (LIFE);
• ERASMUS+;
• Clár AE um fhostaíocht agus um nuálaíocht shóisialta;
• An tSaoráid um Chónascadh na hEorpa;
• Ionstraim um Chúnamh Réamhaontachais, an Ionstraim Eorpach um Chomharsanacht agus an Ciste Eorpach Forbraíochta.

Bunprionsabail

Croíchuspóirí trasnacha beartais a bhaineann le tosaíochtaí téamacha uile Chistí SIE:

• comhpháirtíocht agus rialtas il-leibhéal;
• forbairt inbhuanaithe;
• Comhionannas idir fir agus mná agus neamh-idirdhealú a chur chun cinn;
• inrochtaineacht;
• dul i ngleic le hathrú déimeagrafach;
• maolú a dhéanamh ar an athrú aeráide agus oiriúnú dó.

Dul i ngleic le príomhdhúshláin chríochacha

Ní mór do thíortha AE gnéithe geografacha nó déimeagrafacha a chur san áireamh agus cistiú SIE á chur i bhfeidhm acu agus ní mór dóibh dul i ngleic le dúshláin chríochacha shonracha gach réigiúin chun leas a bhaint as a acmhainn shonrach forbartha.