Rialacháin teicniúla náisiúnta agus saorghluaiseacht earraí

 

ACHOIMRE AR:

Rialachán (CE) Uimh. 764/2008 — nósanna imeachta a bhaineann le cur i bhfeidhm rialachán teicniúil náisiúnta áirithe ar tháirgí a chuirtear ar an margadh go dleathach i dtír eile AE

CAD IS AIDHM LEIS AN RIALACHÁN?

• Tá sé mar aidhm leis feabhas a chur ar shaorghluaiseacht earraí in AE.
• Leagtar amach ann rialacha agus nósanna imeachta nach mór d’údaráis thíortha AE cloí leo nuair a dhéanann siad cinneadh nó nuair atá sé beartaithe acu cinneadh a dhéanamh lena bhféadfaí bac a chur ar shaorghluaiseacht earraí táirge a chuirtear ar an margadh go dleathach i dtír eile AE agus nach bhfuil cumhdaithe faoi rialacha comhchuibhithe ar leibhéal AE.

PRÍOMHPHOINTÍ

Raon feidhme

Tá feidhm ag an rialachán maidir le cinntí riaracháin a bhunaítear ar riail theicniúil a bhfuil na héifeachtaí díreacha nó indíreacha seo a leanas mar thoradh orthu:

• toirmeasc ar tháirge a chur ar an margadh;
• mionathrú nó tástáil bhreise ar an táirge sin sular féidir é a chur ar an margadh;
• aistarraingt an táirge sin.

Níl feidhm ag an rialachán seo maidir le:

• cinntí breithiúnacha;
• córais arna gcumhdach faoi Threoracha 2008/57/CE (idir-inoibritheacht an chórais iarnróid);
• an nós imeachta maidir le cur i seirbhís rothstoic dá bhforáiltear i dTreoir 2004/49/CE (sábháilteacht iarnróid);
• bearta áirithe a bhaineann le táirgí lena mbaineann riosca tromchúiseach atá mionsonraithe i dTreoir 2001/95/CE (sábháilteacht táirge);
• bearta áirithe a bhaineann le bia lena mbaineann riosca arna ghlacadh faoi Rialachán (CE) Uimh. 178/2002 (sábháilteacht bia) agus Rialachán (CE) Uimh. 882/2004 (beatha ainmhithe).

Nósanna imeachta

Cuimsítear faoin rialachán seo an measúnú ar chomhréireacht táirge le rialacha teicniúla náisiúnta. Ní mór do na húdaráis inniúla i dtíortha AE cloí leis na rialacha agus na nósanna imeachta maidir le:

• faisnéis a bhailiú faoin táirge lena mbaineann;
• aitheantas deimhnithe nó tuarascálacha tástála arna n–eisiúint ag comhlacht creidiúnaithe um measúnú comhréireachta i gcomhréir le Rialachán (CE) Uimh. 765/2008 (creidiúnú agus faireachas margaidh): Ní fhéadfaidh tíortha AE deimhnithe nó tuarascálacha tástála a dhiúltú ar fhorais a bhaineann le hinniúlacht an chomhlachta sin;
• meastóireacht ar an ngá atá le riail theicniúil a chur i bhfeidhm: ba cheart an cinneadh a bhunú ar ghnéithe teicniúla nó eolaíocha lena gcruthaítear comhréireacht an bhirt atá beartaithe, a chur in iúl don fhiontar lena mbaineann agus féadfaidh agóid dhlíthiúil a dhéanamh ina choinne;
• fionraí sealadach maidir le táirge a chur ar an margadh: tá toirmeasc air sin le linn an nós imeachta meastóireachta, ach amháin i gcásanna go mbaineann riosca tromchúiseach leis an táirge nó go bhfuil sé toirmiscthe i dtír AE ar fhorais na moráltachta poiblí nó na slándála poiblí.

Pointí teagmhála táirgí

Ní mór do gach tír AE pointe teagmhála táirgí amháin nó níos mó a ainmniú ina gcríocha agus a sonraí teagmhála a chur in iúl don Choimisiún Eorpach agus do thíortha eile AE. Soláthraítear faisnéis ag na pointí sin maidir le:

• na rialacha teicniúla atá i bhfeidhm sa chríoch ina bhfuil siad bunaithe;
• sonraí teagmhála na n–údarás inniúil, agus
• na feabhsúcháin atá ar fáil.

Tuarascálacha agus athbhreithniú

Ní mór do thíortha AE tuarascáil a thabhairt don Choimisiún maidir le cur i bhfeidhm an rialacháin gach bliain. Ní mór don Choimisiún athbhreithniú a dhéanamh ar chur i bhfeidhm an rialacháin seo gach 5 bliana agus liosta táirgí nach bhfuil faoi réir reachtaíochta comhchuibhithe AE a fhoilsiú.

CÉN UAIR ATÁ TOSACH FEIDHME AN RIALACHÁIN?

Tá feidhm leis ón 13 Bealtaine 2009.

CÚLRA

Aisghairtear Treoir 3052/95/CE leis an rialachán seo agus cuirtear an rialachán seo in ionad na Treorach sin.

Le haghaidh tuilleadh faisnéise, féach:

• Aitheantas frithpháirteach (An Coimisiún Eorpach).

PRÍOMHDHOICIMÉAD

Rialachán (CE) Uimh. 764/2008 ó Pharlaimint na hEorpa agus ón gComhairle an 9 Iúil 2008 lena leagtar síos nósanna imeachta a bhaineann le cur chun feidhme rialachán teicniúil náisiúnta áirithe maidir le táirgí a chuirtear ar an margadh go dleathach i mBallstát eile agus lena n–aisghairtear Cinneadh Uimh. 3052/95/CE (IO L 218, 13.8.2008, lgh. 21-29)

Nuashonraithe 01.08.2018