Éascú víosaí

 

ACHOIMRE AR:

Comhaontú agus Cinneadh 2014/242/AE idir AE agus Poblacht na hAsarbaiseáine maidir le heisiúint víosaí a éascú

Comhaontú agus Cinneadh 2013/628/AE idir AE agus Poblacht na hAirméine maidir le heisiúint víosaí a éascú

Comhaontú agus Cinneadh 2013/521/AE idir an tAontas Eorpagh agus Poblacht Cabo Verde maidir le heisiúint víosaí gearrfhanachta a éascú

Comhaontú agus Cinneadh 2007/340/CE idir an Comhphobal Eorpach agus Cónaidhm na Rúise maidir le heisiúint víosaí a éascú

CAD IS AIDHM LEIS NA COMHAONTUITHE AGUS LEIS NA CINNTÍ?

• Tugtar isteach leis na comhaontuithe nósanna imeachta simplithe chun an próiseas le víosaí gearrfhanachta a eisiúint (gan níos mó ná 90 lá in aghaidh gach tréimhse 180 lá) a dhéanamh níos éasca do thíortha agus do shaoránaigh neamh-AE lena mbaineann agus, go cómhalartach, i gcásanna áirithe, do shaoránaigh an Aontais Eorpaigh (AE). Tá sé mar aidhm leo teagmháil daoine le daoine a éascú mar ghné thábhachtach d’fhorbairt leanúnach nasc eacnamaíoch, daonnúil, cultúrtha, eolaíoch agus eile.
• Tugtar chun críche leis na cinntí na comhaontuithe éagsúla thar ceann an Aontais Eorpaigh.

PRÍOMHPHOINTÍ

Ballstáit AE atá clúdaithe sna comhaontuithe sin

• Ní bhaineann na comhaontuithe ach le taisteal le haghaidh gearrfhanachta chuig tíortha i limistéar Schengen. Cuireann 22 de na 27 tír AE corpas dlí Schengen (acquis) i bhfeidhm. Ní chuireann an Bhulgáir, an Chróit, an Chipir ná an Rómáin acquis iomlán Schengen i bhfeidhm fós, agus coimeádann Éire rogha an diúltaithe. Ní baill de AE iad an Eilvéis, an Iorua, an Íoslainn agus Lichtinstéin ach is cuid de limistéar Schengen iad.
• Coimeádann an Danmhairg agus Éire agus rogha an diúltaithe i limistéir na saoirse, na slándála agus an cheartais agus ní páirtithe iad sna comhaontuithe sin.

Ceanglais víosa le haghaidh náisiúnach neamh-AE

Le Rialachán (CE) Uimh. 539/2001 aisghairtear agus códaítear Rialachán (AE) 2018/1806. Liostaítear ann na tíortha nach tíortha den Aontas Eorpach iad a bhfuil a náisiúnaigh díolmhaithe ón gceanglas víosa (Iarscríbhinn II) agus na tíortha sin nach tíortha den Aontas Eorpach iad a gcaithfidh a gcuid náisiúnach víosa a fháil chun taisteal go limistéar Schengen.

Socruithe cómhalartacha do shaoránaigh AE

Tá feidhm chómhalartach leis na socruithe do shaoránaigh na hAsarbaiseáine, Cabo Verde agus na Rúise maidir le saoránaigh AE.

Fianaise dhoiciméadach ar chuspóir an turais

Teastaíonn fianaise dhoiciméadach chuí chun cuspóir an turais a dheimhniú do chatagóirí éagsúla iarratasóra ar víosa, a bhféadfadh an méid a leanas a bheith i gceist leis, ag brath ar an tír:

• garghaolta cónaitheoirí dlítheanacha: céilí, leanaí (lena n–áirítear leanaí uchtaithe), tuismitheoirí (lena n–áirítear coimeádaithe), seantuismitheoirí agus garpháistí, de chuid chónaitheoirí dlítheanacha;
• baill de thoscaireachtaí oifigiúla;
• lucht gnó agus ionadaithe eagraíochtaí gnó;
• tiománaithe a sheolann seirbhísí iompair lasta agus paisinéirí idirnáisiúnta;
• daltaí, mic léinn agus múinteoirí tionlacain ar thurais staidéir;
• daoine atá rannpháirteach i ngníomhaíochtaí eolaíochta, acadúla, cultúrtha nó ealaíne;
• iriseoirí agus criú teicniúil tionlacain;
• rannpháirtithe in imeachtaí spóirt idirnáisiúnta agus cúntóirí gairmiúla;
• rannpháirtithe i gcláir mhalartaithe oifigiúla dhá chathrach;
• daoine a thaistealaíonn ar chúiseanna leighis agus a gcomhghleacaithe riachtanacha;
• gairmithe a ghlacann páirt i dtaispeántais, comhdhálacha, siompóisiam, seimineáir idirnáisiúnta nó in imeachtaí comhchosúla;
• ionadaithe eagraíochtaí na sochaí sibhialta ar thurais a bhaineann le hoiliúint, seimineáir, comhdhálacha agus cláir mhalartaithe oideachais;
• gaolta a thugann cuairt ar shearmanais adhlactha;
• cuairteoirí ar reiligí míleata agus sibhialta;
• daoine a thaistealaíonn don turasóireacht.

Víosaí il-iontrála

Tá feidhm ag ceanglais éagsúla maidir le catagóirí éagsúla iarratasóirí ar víosaí, agus eisítear víosaí atá bailí ar feadh suas le 5 bliana. Go ginearálta, ag brath ar an tír, tá baill teaghlaigh agus cuairteoirí oifigiúla i dteideal víosaí 5 bliana, agus tá catagóirí eile incháilithe do víosaí atá bailí ar feadh 1 go 5 bliana.

Táillí

Déantar foráil sna comhaontuithe i leith laghdú táille do náisiúnaigh neamh–AE agus iarratas á dhéanamh acu ar víosa Schengen. Seachas comhaontú Cabo Verde, socraítear leis na comhaontuithe éascaithe víosaí eile go léir an leibhéal táille víosa ar €35 (in aghaidh an iarratais). Ina theannta sin, déantar táillí a tharscaoileadh do go leor catagóirí saoránach ag brath ar a gcuspóir taistil.

Imeacht i gcás doiciméad caillte nó goidte

Féadfaidh saoránaigh a bhfuil a ndoiciméid caillte acu nó ar goideadh a ndoiciméid an tír a fhágáil bunaithe ar dhoiciméid aitheantais bhailí, lena dtugtar teidlíocht dóibh an teorainn a thrasnú, arna n–eisiúint ag misin taidhleoireachta nó poist chonsalachta gan aon víosa nó údarú eile.

Leathnú ar víosa in imthosca eisceachtúla

Maidir le saoránaigh nach féidir leo fágáil faoin am atá luaite ina víosaí ar chúiseanna gan choinne (force majeure), féadfar téarma a víosaí a shíneadh saor in aisce faoi réir dhlíthe na dtíortha lena mbaineann.

Pasanna taidhleoireachta

Is féidir le sealbhóirí pasanna taidhleoireachta bailí dul isteach, imeacht agus idirthuras a dhéanamh trí na críocha atá clúdaithe sna comhaontuithe sin gan víosaí. Foráiltear i gcomhaontú Cabo Verde chomh maith i leith na díolúine céanna do shealbhóirí pasanna seirbhíse (pasanna arna n–eisiúint chuig fostaithe rialtais).

Féadfaidh na catagóirí sin de shealbhóirí pas fanacht i limistéar Schengen ar feadh tréimhse nach faide ná 90 lá laistigh de thréimhse 180 lá.

Comhchoistí

Déanann comhchoistí saineolaithe atá comhdhéanta d’ionadaithe ó AE agus ón tír lena mbaineann nach tír den Aontas Eorpach í faireachán ar chur chun feidhme na gcomhaontuithe.

Filleadh agus athligean isteach

Tá na comhaontuithe sin nasctha le comhaontuithe um athligean isteach agus le comhrialacha chun filleadh imirceach neamhrialta a bhainistiú.

Éascú víosaí AE-na Rúise a chur ar fionraí

I ndiaidh dhul in olcas an cháis arna spreagadh ag fogha míleata na Rúise faoin Úcráin, as ar tháinig roinnt bearta sriantacha (féach an achoimre) agus lenar tugadh údar le bearta maidir le leasanna slándála riachtanacha AE agus a Bhallstát a chosaint, tá an comhaontú maidir le heisiúint víosaí a éascú curtha ar fionraí go hiomlán do shaoránaigh uile na Rúise amhail ón 12 Meán Fómhair 2022 (féach Cinneadh (AE) 2022/1500 ón gComhairle).

Nuashonraigh an Coimisiún treoirlínte maidir le heisiúint víosaí i ndáil le hiarratasóirí na Rúise agus rialuithe shaoránaigh na Rúise ag na teorainneacha seachtracha, lena n áirítear saoránaigh na Rúise atá ag teitheadh ó shlogadh míleata. Iarrtar sna treoirlínte ar chonsalachtaí agus ar údaráis teorann na mBallstát seiceálacha slándála agus grinnscrúdú méadaithe a chur i bhfeidhm ar eisiúint víosaí, mar aon le rialuithe méadaithe teorann, agus beartas tearmainn an Aontais Eorpaigh dóibh siúd a bhfuil fíorghá acu le cosaint idirnáisiúnta á urramú (féach na treoirlínte agus an teachtaireacht maidir le treoirlínte maidir le víosaí a eisiúint i ndáil le hiarratasóirí na Rúise a sholáthar).

DÁTA THEACHT I BHFEIDHM

Tír	Dáta theacht i bhfeidhm an chomhaontaithe	Tá feidhm ag an gCinneadh ón
An Asarbaiseáin	1 Meán Fómhair 2014	14 Aibreán 2014
An Airméin	1 Eanáir 2014	22 Deireadh Fómhair 2013
Cabo Verde	1 Nollaig 2014	7 Deireadh Fómhair 2013
An Rúis	1 Meitheamh 2007	19 Aibreán 2007

CÚLRA

Ní bhaineann na comhaontuithe maidir le héascú víosaí a chuir an tAontas Eorpach i gcrích leis na tíortha seo a leanas nach tíortha den Aontas Eorpaigh iad a thuilleadh le sealbhóirí pasanna bithmhéadracha ó na tíortha sin a díolmhaíodh ón gceanglas víosa ina dhiaidh sin: An Albáin, an Bhoisnia agus an Heirseagaivéin, an Mhacadóin Thuaidh, an Mholdóiv, Montainéagró, an tSeirbia, an tSeoirsia agus an Úcráin.

Le haghaidh tuilleadh faisnéise, féach:

• Beartas víosaí (An Coimisiún Eorpach)
• Filleadh agus athligean isteach (An Coimisiún Eorpach).

PRÍOMHDHOICIMÉID

Comhaontú idir an tAontas Eorpach agus Poblacht na hAsarbaiseáine maidir le heisiúint víosaí a éascú (IO L 128, 30.4.2014, lgh. 49–60).

Cinneadh 2014/242/AE ón gComhairle an 14 Aibreán 2014 maidir le tabhairt i gcrích an Chomhaontaithe idir an tAontas Eorpach agus Poblacht na hAsarbaiseáine maidir le heisiúint víosaí a éascú (IO L 128, 30.4.2014, lgh. 47–48).

Comhaontú idir an tAontas Eorpach agus Poblacht na hAirméine maidir le heisiúint víosaí a éascú (IO L 289, 31.10.2013, lgh. 2–11).

Cinneadh 2013/628/AE ón gComhairle an 22 Deireadh Fómhair 2013 maidir le tabhairt i gcrích an Chomhaontaithe idir an tAontas Eorpach agus Poblacht na hAirméine maidir le heisiúint víosaí a éascú (IO L 289, 31.10.2013, lch. 1).

Comhaontú idir an tAontas Eorpach agus Poblacht Rinn Verde maidir le heisiúint víosaí gearrfhanachta a éascú do shaoránaigh Phoblacht Rinn Verde agus an Aontais Eorpaigh (IO L 282, 24.10.2013, lgh. 3–12).

Rinneadh leasuithe comhleanúnacha ar an gcomhaontú a chorprú sa bhuntéacs. Níl de luach ar an leagan comhdhlúite seo ach luach doiciméadach amháin.

Cinneadh 2013/521/AE ón gComhairle an 7 Deireadh Fómhair 2013 maidir le tabhairt i gcrích an Chomhaontaithe idir an tAontas Eorpach agus Poblacht Rinn Verde maidir le heisiúint víosaí gearrfhanachta a éascú do shaoránaigh Phoblacht Rinn Verde agus an Aontais Eorpaigh (IO L 282, 24.10.2013, lgh. 1–2).

Comhaontú idir an Comhphobal Eorpach agus Cónaidhm na Rúise maidir le heisiúint víosaí a éascú do shaoránaigh an Aontais Eorpaigh agus Chónaidhm na Rúise (IO L 129, 17.5.2007, lgh. 27–34).

Cinneadh 2007/340/CE ón gComhairle an 19 Aibreán 2007 maidir le tabhairt i gcrích an Chomhaontaithe idir an Comhphobal Eorpach agus Chónaidhm na Rúise maidir le heisiúint víosaí gearrfhanachta a éascú (IO L 129, 17.5.2007, lgh. 25–26).

DOICIMÉID GHAOLMHARA

Cinneadh (AE) 2022/1500 ón gComhairle an 9 Meán Fómhair 2022 maidir le cur i bhfeidhm an Chomhaontaithe idir an Comhphobal Eorpach agus Cónaidhm na Rúise maidir le heisiúint víosaí do shaoránaigh an Aontais Eorpaigh agus Chónaidhm na Rúise a éascú a chur ar fionraí go hiomlán (IO L 234l, 9.9.2022, lgh. 1–3).

Rialachán (AE) 2019/592 ó Pharlaimint na hEorpa agus ón gComhairle an 10 Aibreán 2019 lena leasaítear Rialachán (AE) 2018/1806 lena liostaítear na tríú tíortha a mbeidh ar a náisiúnaigh víosaí a bheith ina seilbh acu ar thrasnú teorainneacha seachtracha dóibh agus lena liostaítear na tríú tíortha a mbeidh a náisiúnaigh díolmhaithe ón gceanglas sin, a mhéid a bhaineann le tarraingt siar na Ríochta Aontaithe as an Aontas (IO L 103I, 12.4.2019, lgh. 1–4).

Rialachán (AE) 2018/1806 ó Pharlaimint na hEorpa agus ón gComhairle an 14 Samhain 2018 lena liostaítear na tríú tíortha a mbeidh ar a náisiúnaigh víosaí a bheith ina seilbh acu ar thrasnú teorainneacha seachtracha dóibh agus lena liostaítear na tríú tíortha a bhfuil a náisiúnaigh díolmhaithe ón gceanglas sin (códú) (IO L 303, 28.11.2018, lgh. 39–58).

Féach an leagan comhdhlúite.

Treoir 2008/115/CE ó Pharlaimint na hEorpa agus ón gComhairle an 16 Nollaig 2008 maidir le caighdeáin choiteanna agus nósanna imeachta coiteanna sna Ballstáit i ndáil le náisiúnaigh ó thíortha neamh–AE atá ag fanacht go mídhleathach a sheoladh ar ais (IO L 348, 24.12.2008, lgh. 98–107).

Faisnéis maidir le teacht i bhfeidhm an Chomhaontaithe idir an Comhphobal Eorpach agus Poblacht na hAsarbaiseáine maidir le heisiúint víosaí a éascú (IO L 215, 21.7.2014, lch. 1).

Faisnéis maidir le teacht i bhfeidhm an Chomhaontaithe idir an Comhphobal Eorpach agus Poblacht na hAirméine maidir le heisiúint víosaí a éascú (IO L 334, 13.12.2013, lch. 1).

Faisnéis maidir le teacht i bhfeidhm an Chomhaontaithe idir an tAontas Eorpach agus Poblacht Rinn Verde maidir le heisiúint víosaí gearrfhanachta a éascú do shaoránaigh Phoblacht Rinn Verde agus an Aontais Eorpaigh (IO L 321, 7.11.2014, lch. 1).

Faisnéis maidir le teacht i bhfeidhm an Chomhaontaithe idir an Comhphobal Eorpach agus Cónaidhm na Rúise maidir le heisiúint víosaí a éascú do shaoránaigh an Aontais Eorpaigh agus Chónaidhm na Rúise (IO L 173, 3.7.2007, lch. 34).

Nuashonraithe 14.09.2022