(1)

Leagtar síos le hAirteagal 11 de Rialachán (AE) 2017/852 go meastar gur dramhaíl atá beartaithe le haghaidh diúscairt deiridh iad mearcair agus comhdhúile mearcair, i bhfoirm íon nó i meascáin, ó cheithre fhoinse mhóra a shonraítear san Airteagal sin, de réir bhrí Threoir 2008/98/CE ó Pharlaimint na hEorpa agus ón gComhairle (2).

(2)

Ceanglaítear le hAirteagal 13(3) de Rialachán (AE) 2017/852, maidir le dramhaíl mhearcair, lena n-áirítear dramhaíl a tháirgtear ó na ceithre phríomhfhoinse lena mbaineann, go ndéanfar oibríochtaí cóireála sonracha uirthi roimh an diúscairt deiridh, i.e. í a chomhshó agus, i gcás ina mbeartaítear í a dhiúscairt go buan i saoráidí os cionn talún, í a chomhshó agus a sholadú.

(3)

Ceadaítear le hAirteagal 13(1) de Rialachán (AE) 2017/852, de mhaolú ar Airteagal 5(3), pointe (a), de Threoir 1999/31/CE ón gComhairle (3), dramhaíl mhearcair i bhfoirm leachtach a stóráil go sealadach, go dtí go ndéanfar í a chomhshó agus a sholadú, i láithreáin líonta talún tiomnaithe agus feistithe go dtí an 31 Nollaig 2022, i gcomhréir leis na ceanglais maidir le cosaint an chomhshaoil agus sláinte an duine a leagtar amach i dTreoir 1999/31/CE.

(4)

Thug faisnéis a thuairiscigh na Ballstáit i mí na Bealtaine 2022 le fios gur raibh breis agus 2 000 tona de dhramhaíl mhearcair leachtach fós i stóráil shealadach san Aontas agus go raibh níos mó ama ag teastáil chun an dramhaíl sin a chomhshó agus a sholadú. Meastar gur gá síneadh a chur leis an tréimhse stórála sin go dtí an 31 Nollaig 2025 chun a áirithiú go leanfar den stóráil shealadach i láithreáin líonta talún i gcomhréir leis na ceanglais is infheidhme a leagtar amach i dTreoir 1999/31/CE.

(5)

Ba cheart dá bhrí sin Rialachán (AE) 2017/852 a leasú dá réir,