(1)

Déantar foráil i dTreoir (AE) 2021/338 ó Pharlaimint na hEorpa agus ón gComhairle (2) maidir le leasuithe ar Airteagal 57 de Threoir 2014/65/AE a mhéid a bhaineann le teorainneacha suímh, i measc nithe eile, lena n-áirítear cumhachtuithe nua gaolmhara.

(2)

Chun cobhsaíocht agus sláine na margaí airgeadais san Aontas a fheabhsú, ba cheart modheolaíocht a shonrú chun teorainneacha suímh maidir le díorthaigh tráchtearraí a ríomh ar bhealach comhchuibhithe. Leis an modheolaíocht, ba cheart cosc a chur ar arbatráiste rialála agus comhsheasmhacht a chur chun cinn agus, san am céanna, dóthain solúbthachta a thabhairt d’údaráis inniúla chun na héagsúlachtaí i measc margaí díorthach tráchtearraí difriúla agus i measc mhargaí na dtráchtearraí foluiteacha a chur san áireamh. Leis an modheolaíocht chun na teorainneacha a ríomh, ba cheart údaráis inniúla a bheith in ann cothromaíocht a bhaint amach idir na cuspóirí maidir le teorainneacha a shocrú ag leibhéal atá íseal go leor chun cosc a chur ar dhaoine a shealbhaíonn suíomhanna sna díorthaigh tráchtearraí sin mí-úsáid a bhaint as an margadh nó saobhadh a dhéanamh ar an margadh agus na cuspóirí maidir le tacú le socruithe ordúla praghsála agus socraíochta, díorthaigh tráchtearraí nua a fhorbairt agus díorthaigh tráchtearraí a chumasú chun leanúint de thacú le feidhmiú gníomhaíochtaí tráchtála i margadh na dtráchtearraí foluiteacha.

(3)

Ba cheart roinnt coincheap a eascraíonn as Treoir 2014/65/AE agus téarmaí teicniúla a úsáidtear sa Rialachán seo a shainmhíniú chun tuiscint aonfhoirmeach a áirithiú.

(4)

Maidir le suíomhanna fada agus gearra rannpháirtithe sa mhargadh i ndíorthach tráchtearraí ar leith, ba cheart iad a ghlanluacháil in aghaidh a chéile chun méid iarbhír suímh a chinneadh, ar suíomh é a rialaíonn rannpháirtí sa mhargadh tráth ar bith. Maidir le suíomh a shealbhaítear trí chonradh céadrogha nó díorthach tráchtearraí a thrádáiltear ar an ionad trádála céanna ar fo-thacar den phríomhchonradh é, ba cheart méid an tsuímh sin nó méid an díorthaigh sin a ríomh ar bhonn deiltechoibhéiseach. Chun go bhféadfar forbhreathnú cuimsitheach, láraithe agus ionadaíoch a dhéanamh ar ghníomhaíocht duine, agus chun cosc a chur ar imchéimniú chuspóir na teorann suímh a shocraítear le haghaidh an phríomhchonartha, ba cheart a áireamh sa suíomh comhiomlán a shealbhaíonn duine i ndíorthach tráchtearraí a thrádáiltear ar ionad trádála an suíomh a eascraíonn as dí-chomhiomlánú comhpháirteanna conartha raoin difríochta a ligtear isteach chun a thrádála mar ionstraim intrádála aonair ar an ionad trádála céanna agus na suíomhanna i ndíorthaigh tráchtearraí a thrádáiltear ar an ionad trádála céanna ar fo-thacar den phríomhchonradh iad maidir lena méid (dá ngairtear conarthaí minis), nó maidir lena n-aibíocht tréimhse praghsála, amhail conartha iarmhéid na míosa (dá ngairtear conarthaí balmos).

(5)

Ceanglaítear le Treoir 2014/65/AE go n-áireofar aon suíomh a shealbhaíonn tríú páirtithe thar ceann duine i ríomh theorainn suímh an duine sin agus go gcuirfear i bhfeidhm teorainneacha suímh ar leibhéal an eintitis agus ar leibhéal an ghrúpa araon. Is gá, dá bhrí sin, suíomhanna a chomhiomlánú ar leibhéal an ghrúpa. Níl sé iomchuí foráil a dhéanamh maidir le comhiomlánú ar leibhéal an ghrúpa ach amháin más féidir le máthairghnóthas an úsáid suíomhanna a rialú. Dá réir sin, ba cheart do mháthairghnóthais suíomhanna atá á sealbhú ag a gcuid fochuideachtaí a chomhiomlánú le haon suíomh a shealbhaíonn an máthairghnóthas go díreach, sa bhreis ar an gcomhiomlánú a dhéanann na fochuideachtaí ar a suíomhanna féin. Is é a d’fhéadfadh teacht as an gcomhiomlánú sin suíomhanna a ríomhtar ar leibhéal an mháthairghnóthais atá níos airde nó, i ngeall ar ghlanluacháil suíomhanna fada agus gearra a shealbhaíonn fochuideachtaí difriúla, atá níos ísle ná mar atá siad ar leibhéal na fochuideachta aonair. Níor cheart suíomhanna a chomhiomlánú ar leibhéal an mháthairghnóthais má shealbhaíonn gnóthais chomhinfheistíochta na suíomhanna, ar gnóthais chomhinfheistíochta iad a shealbhaíonn na suíomhanna sin thar ceann a n-infheisteoirí seachas thar ceann a máthairghnóthas i gcásanna nach féidir leis an máthairghnóthas úsáid na suíomhanna sin a rialú chun a leasa féin.

(6)

Ceanglaítear leis na leasuithe a leagtar amach i dTreoir (AE) 2021/338 go bhfuil feidhm ag teorainneacha suímh maidir le díorthaigh tráchtearraí criticiúla nó shuntasacha a thrádáiltear ar ionaid trádála, agus maidir lena gconarthaí thar an gcuntar atá coibhéiseach go heacnamaíoch (conarthaí ‘EEOTC’). Is díorthaigh chriticiúla nó shuntasacha iad díorthaigh tráchtearraí lena mbaineann leas oscailte 300 000 luchtóg ar an meán thar thréimhse bliana. Ós rud é go bhfuil fíorthábhacht ag baint le tráchtearraí talmhaíochta do shaoránaigh, leanfaidh díorthaigh tráchtearraí talmhaíochta agus a gconarthaí thar an gcuntar atá coibhéiseach go heacnamaíoch de bheith faoin gcóras teorainneacha suímh faoi bhun 300 000 luchtóg. An tairseach leachtachta óna mbeidh feidhm ag teorainneacha suímh maidir le díorthaigh tráchtearraí, tá sí sin le sonrú sa Rialachán seo agus níor cheart a mheas go bhfuil méid suntasach díorthach tráchtearraí á dtrádáil ar ionad trádála ach amháin má sháraíonn siad an tairseach leachtachta ar feadh tréimhse ama leordhóthanach.

(7)

I gcás ina ndéantar conradh thar an gcuntar (conradh ‘OTC’) a luacháil ar an tráchtearra foluiteach céanna atá inseachadta ar an láthair chéanna agus a bhfuil na coinníollacha conarthacha céanna aige agus má tá toradh eacnamaíoch an-chomhghaolaithe aige ar chonradh a thrádáiltear ar ionad trádála, ba cheart é a mheas mar thráchtearra atá coibhéiseach go heacnamaíoch gan bean ar dhifríochtaí beaga sna sonraíochtaí conarthacha a bhaineann le méid na luchtóg agus an dáta seachadta. Difríochtaí i socruithe bainistithe rioscaí iarthrádála, amhail socruithe imréitigh, níor cheart iad a bheith ina mbacainní ar chonarthaí den sórt sin a dhearbhú mar chonarthaí atá coibhéiseach go heacnamaíoch. Chun cosc a chur ar ghlanluacháil mhíchuí suíomhanna a d’fhéadfadh a bheith ceannasach a thrádáiltear ar ionad trádála trí úsáid a bhaint as socruithe déthaobhacha i gconarthaí thar an gcuntar agus chun oibriú éifeachtúil an chórais teorainneacha suímh a áirithiú sa chleachtas, is gá díorthaigh tráchtearraí a thrádáiltear thar an gcuntar a mheas mar dhíorthaigh tráchtearraí atá coibhéiseach go heacnamaíoch le conarthaí ionaid trádála faoi imthosca teoranta, agus faoi na himthosca sin amháin. Chun seachaint teorainneacha suímh a dhíspreagadh agus chun sláine an chórais teorainneacha suímh a fheabhsú, is gá sainmhíniú ar chonradh thar an gcuntar atá coibhéiseach go heacnamaíoch a bheith ceaptha go cúng ionas nach gceadófar do dhuine suíomh thar an gcuntar a ghlanluacháil in aghaidh roinnt suíomhanna eile. Thairis sin, discréid maidir leis an roghnú comhsheasmhach suíomhanna, ar suíomhanna iad a ndéantar suíomh thar an gcuntar a ghlanluacháil ina n-aghaidh, ba cheart í sin a theorannú do na himthosca sonracha ina bhfuil conradh thar an gcuntar den sórt sin coibhéiseach go heacnamaíoch le níos mó ná díorthach tráchtearraí amháin a thrádáiltear ar ionad trádála san Aontas.

(8)

Chun a shuí cé hiad na suíomhanna i ndíorthaigh tráchtearraí is féidir a thomhas go hoibiachtúil mar shuíomhanna lena laghdaítear rioscaí a bhaineann go díreach le gníomhaíocht tráchtála, ba cheart critéir áirithe a chur ar fáil, lena n-áirítear úsáid an tsainmhínithe cuntasaíochta ar chonradh fálaithe bunaithe ar rialacha na gCaighdeán Idirnáisiúnta um Thuairisciú Airgeadais (IFRS). Ba cheart an sainmhíniú cuntasaíochta sin a bheith ar fáil d’eintitis neamhairgeadais cé nach gcuireann siad rialacha IFRS i bhfeidhm ar leibhéal an eintitis.

(9)

Ina theannta sin, ba cheart eintitis neamhairgeadais a bheith in ann teicnící bainistithe rioscaí a úsáid chun na rioscaí foriomlána a eascraíonn as a ngníomhaíocht tráchtála nó as gníomhaíocht tráchtála a ngrúpa a mhaolú, lena n-áirítear rioscaí a eascraíonn as roinnt margaí geografacha, táirgí, tréimhsí ama nó eintiteas (is é sin, an macrafhálú nó an fálú punainne). Ar an gcaoi chéanna, eintitis airgeadais atá laistigh de ghrúpaí a bhaineann go príomha leis an tráchtáil, ba cheart iad a bheith in ann teicnící bainistithe rioscaí a úsáid chun na rioscaí foriomlána a eascraíonn as gníomhaíocht tráchtála na n-eintiteas neamhairgeadais atá laistigh den ghrúpa a mhaolú. I gcás ina n-úsáideann eintiteas neamhairgeadais nó eintiteas airgeadais an macrafhálú nó an fálú punainne, d’fhéadfadh sé nach mbeadh sé in ann nasc ceann ar cheann a bhunú idir suíomh sonrach i ndíorthach tráchtearraí agus riosca sonrach a eascraíonn as an ngníomhaíocht tráchtála a bhfuil an díorthach tráchtearraí ceaptha chun é a fhálú. Féadfaidh eintiteas neamhairgeadais nó eintiteas airgeadais díorthach tráchtearraí neamhchoibhéiseach a úsáid chun riosca sonrach a eascraíonn as gníomhaíocht tráchtála an eintitis neamhairgeadais a fhálú i gcás nach bhfuil díorthach tráchtearraí comhionann ar fáil nó i gcás nach bhfuil leachtacht leordhóthanach ag díorthach tráchtearraí atá níos comhghaolaithe (is é sin, an fálú ionadaithe). Sna cásanna sin, le beartais agus córais bainistithe rioscaí, ba cheart a bheith in ann cosc a chur ar idirbhearta neamh-fhálaithe a aicmiú mar idirbhearta fálaithe agus ba cheart a bheith in ann foráil a dhéanamh maidir le tuairim dhí-chomhiomlánaithe leordhóthanach ar phunann an fhálaithe ionas go ndéantar comhpháirteanna amhantracha a shainaithint agus a áireamh mar chuid de na teorainneacha suímh. Níor cheart suíomhanna a cháiliú mar shuíomhanna lena laghdaítear rioscaí a bhaineann le gníomhaíocht tráchtála ar an bhforas gur áiríodh iad mar chuid de phunann laghdaithe rioscaí ar bhonn foriomlán, agus ar an bhforas sin amháin.

(10)

D’fhéadfadh sé go dtiocfaidh éabhlóid ar riosca thar thréimhse ama agus, chun oiriúnú d’éabhlóid an riosca, i gcás díorthaigh tráchtearraí a rinneadh i dtosach chun an riosca a bhaineann le gníomhaíocht tráchtála a laghdú, d’fhéadfadh sé go gcaithfí iad a fhritháireamh trí úsáid a bhaint as conarthaí díorthach tráchtearraí nach mbaineann lena riosca tráchtála a thuilleadh. Ina theannta sin, maidir le héabhlóid riosca ar tugadh aghaidh air trí shuíomh a ghlacadh as láimh i ndíorthach tráchtearraí chun riosca a laghdú, níor cheart, dá bharr sin, athmheastóireacht a dhéanamh ar an suíomh sin ina dhiaidh mar shuíomh nach raibh ina idirbheart faoi phribhléid ón tús.

(11)

Ba cheart eintitis airgeadais agus neamhairgeadais a bheith in ann iarratas a dhéanamh ar an díolúine i ndáil le gníomhaíochtaí tráchtála a fhálú sula nglactar suíomh as láimh. Ba cheart forléargas soiléir achomair a thabhairt don údarás inniúil san iarratas ar ghníomhaíochtaí tráchtála na n-eintiteas neamhairgeadais i leith tráchtearra foluiteach atá beartaithe a fhálú, ar na rioscaí a bhaineann leis agus ar an gcaoi a n-úsáidtear díorthaigh tráchtearraí chun na rioscaí sin a mhaolú. Tá feidhm ag teorainneacha suímh i gcónaí maidir le díorthaigh tráchtearraí talmhaíochta agus maidir le díorthaigh tráchtearraí chriticiúla nó shuntasacha, agus i gcás nach ndeonaíonn an t-údarás inniúil an díolúine sa deireadh, ba cheart don eintiteas airgeadais nó don eintiteas neamhairgeadais, de réir mar a bheidh, aon suíomh atá os cionn teorann a laghdú dá réir sin agus d’fhéadfadh sé go mbeidh bearta maoirseachta i ndán dó i leith teorainn a shárú. Ba cheart d’eintitis airgeadais agus neamhairgeadais athmheasúnú a dhéanamh ar a gcuid gníomhaíochtaí go tréimhsiúil chun a áirithiú go mbeidh údar le leanúint de chur i bhfeidhm an díolúine.

(12)

Ba cheart eintitis airgeadais agus neamhairgeadais a bheith in ann iarratas a dhéanamh ar an díolúine i ndáil le suíomhanna a eascraíonn as an soláthar éigeantach leachtachta ar ionaid trádála sula ndéanfar na hidirbhearta sin. Ba cheart forléargas soiléir achomair a thabhairt don údarás inniúil san iarratas ar an gcreat maidir le soláthar éigeantach leachtachta faoina n-oibríonn na daoine sin, ar ghníomhaíochtaí an duine i dtrádáil díorthach tráchtearraí i gcomhréir leis an gcomhaontú i scríbhinn a tugadh i gcrích leis an ionad trádála agus ar na suíomhanna oscailte atá ann dá thoradh sin. Tá feidhm ag teorainneacha suímh i gcónaí maidir le díorthaigh tráchtearraí talmhaíochta agus maidir le díorthaigh tráchtearraí chriticiúla nó shuntasacha, agus i gcás nach ndeonaíonn an t-údarás inniúil an díolúine sa deireadh, ba cheart don eintiteas neamhairgeadais nó airgeadais aon suíomh atá os cionn teorann a laghdú dá réir sin agus d’fhéadfadh sé go mbeidh bearta maoirseachta i ndán dó i leith teorainn a shárú. Ba cheart d’eintitis neamhairgeadais agus airgeadais athmheasúnú a dhéanamh ar a gcuid gníomhaíochtaí go tréimhsiúil chun a áirithiú go mbeidh údar le leanúint de chur i bhfeidhm an díolúine.

(13)

Maidir le tréimhse na spotmhíosa, arb í an tréimhse ama díreach roimh an seachadadh ar an dáta dlite, baineann sí go sonrach le gach díorthach tráchtearraí agus d’fhéadfadh sé nach gcomhfhreagróidh sí go díreach d’aon mhí amháin. Níor cheart tagairt a bheith i gconarthaí spotmhíosa don chonradh arb é an chéad chonradh eile sa díorthach tráchtearraí sin a thiocfaidh in aibíocht. Trí shrian a chur leis na suíomhanna a fhéadfaidh duine a shealbhú sa tréimhse a mbeidh seachadadh an tráchtearra fhisicigh le déanamh lena linn, teorannaítear cainníocht an tsoláthair inseachadta fholuitigh a fhéadfaidh gach duine a dhéanamh nó a bhféadfaidh gach duine glacadh lena sheachadadh, agus ar an gcaoi sin, cuirtear cosc ar dhaoine aonair suíomhanna ceannasacha a charnadh, rud a fhéadfaidh a chur ar a gcumas dóibh an margadh a chúngú trí rochtain ar an tráchtearra a shrianadh. Dá bhrí sin, an bhonnlíne chaighdeánach le haghaidh theorainn suímh na spotmhíosa i gcás díorthaigh tráchtearraí a shocraítear go fisiciúil agus díorthaigh tráchtearraí a shocraítear le hairgead tirim araon, ba cheart í a ríomh mar chéatadán den mheastachán ar an soláthar inseachadta. Ba cheart údaráis inniúla a bheith in ann sceideal teorainneacha suímh laghdaitheacha a chur chun feidhme idir an pointe ama a ndéantar conradh spotmhíosa de chonradh go dtí go dtagann sé in aibíocht chun a áirithiú ar bhealach níos beaichte go socrófar teorainneacha suímh go leordhóthanach le linn thréimhse na spotmhíosa agus chun socraíocht ordúil a áirithiú.

(14)

I gcás inar beag trádáil díorthach a dhéantar i gcomparáid le soláthar inseachadta tráchtearra, beidh an leas oscailte níos lú i gcomparáid leis an soláthar inseachadta. In imthosca den sórt sin, d’fhéadfadh sé nach mbeidh na húdaráis inniúla in ann teorainn spotmhíosa a shocrú atá comhsheasmhach leis an gcuspóir maidir le coinníollacha ordúla praghsála agus socraíochta a áirithiú agus maidir le drochúsáid mhargaidh a chosc, fiú amháin agus úsáid a mbaint acu as an gcéatadán is ísle den soláthar inseachadta sa mhodheolaíocht. Chun a áirithiú go gcomhlíonfar na cuspóirí sin i ngach imthoisc, i gcás ina bhfuil an soláthar inseachadta le haghaidh díorthach tráchtearraí i bhfad níos airde ná an leas oscailte an oiread sin go mbainfí an éifeacht den ceanglas ar údaráis inniúla teorainneacha suímh a chur i bhfeidhm leis an teorainn spotmhíosa bunaithe ar sholáthar inseachadta, ba cheart d’údaráis inniúla, mar mhodheolaíocht chúltaca, an figiúr bonnlíne a chinneadh le haghaidh na teorann spotmhíosa sa díorthach tráchtearraí sin agus mar chéatadán den leas oscailte iomlán sa díorthach tráchtearraí sin agus ansin leanúint ar aghaidh leis na fachtóirí coigeartaithe ábhartha.

(15)

Is féidir barra i dtáirgí talmhaíochta a bheith faoi réir luaineacht ard i ngeall ar dhálaí aimsire. Tá sé iomchuí, dá bhrí sin, go mbeidh an tréimhse thagartha a úsáidtear chun soláthar inseachadta i ndíorthaigh tráchtearraí talmhaíochta a chinneadh níos faide ná an tréimhse thagartha a úsáidtear chun soláthar inseachadta i ndíorthaigh tráchtearraí eile a chinneadh.

(16)

Cuirtear an teorainn suímh míonna eile i bhfeidhm i gcás gach aibíochta seachas aibíocht na spotmhíosa. An bhonnlíne chaighdeánach le haghaidh na dteorainneacha suímh míonna eile i gcás díorthaigh tráchtearraí a shocraítear go fisiciúil agus díorthaigh tráchtearraí a shocraítear le hairgead tirim araon, ba cheart í a ríomh mar chéatadán den leas oscailte iomlán. Is minic a bhíonn an dáileadh suíomhanna thar na míonna eile de chonradh tráchtearraí dírithe ar na míonna is gaire don aibíocht. Dá bhrí sin, leis an leas oscailte iomlán, cuirtear bonnlíne níos iomchuí ar fáil chun teorainneacha suímh a shocrú ná mar a chuirtear ar fáil agus úsáid á mbaint as figiúr a mheánaítear thar gach aibíocht. Ós rud é go bhféadfadh athrú suntasach a theacht ar leas oscailte thar thréimhse ghearr ama, ba cheart do na húdaráis inniúla an leas oscailte a ríomh thar thréimhse ama lena léirítear go leordhóthanach saintréithe trádála an díorthaigh tráchtearraí. Leis an tréimhse thagartha sin, ba cheart an tséasúracht a bhaineann le trádáil conartha a chur san áireamh go háirithe.

(17)

Chun a áirithiú go mbeidh na teorainneacha suímh arna mbunú na húdaráis inniúla bunaithe ar léiriú cuimsitheach ar na suíomhanna oscailte foriomlána a shealbhaítear i ndíorthach tráchtearraí, ba cheart a áireamh sa leas oscailte arna ríomh ag an údarás inniúil na suíomhanna nach bhfuil ar an ionad trádála ar a dtrádáiltear an díorthach tráchtearraí mar aon leis na suíomhanna nach bhfuil sealbhaithe sna conarthaí thar an gcuntar atá coibhéiseach go heacnamaíoch arna dtuairisciú don údarás inniúil.

(18)

An bhonnlíne chaighdeánach, is í sin 25 % den soláthar inseachadta agus den leas oscailte, socraíodh í faoi threoir na taithí atá faighte ó mhargaí agus ó dhlínsí eile. Ba cheart do na húdaráis inniúla an bhonnlíne a choigeartú chun go mbeifear in ann í a laghdú go 5 % den soláthar inseachadta agus den leas oscailte, nó go 2,5 % i gcás roinnt díorthach tráchtearraí talmhaíochta, agus chun go mbeifear in ann í a mhéadú suas le 35 % den soláthar inseachadta agus den leas oscailte i gcás inar gá sin a dhéanamh i ngeall ar shaintréithe an mhargaidh chun tacú le socraíocht agus feidhmiú ordúil an chonartha agus a mhargaidh fholuitigh. Ós rud é nach bhfuil feidhm ag aon choigeartú ar an bhfigiúr bonnlíne ach amháin i gcás inar gá é sin a dhéanamh i ngeall ar shaintréithe oibiachtúla an mhargaidh, agus fad agus atá gá leis sin a dhéanamh i ngeall orthu sin, ba cheart a bheith in ann, dá bhrí sin, coigeartú sealadach a dhéanamh ar an mbonnlíne. Ba cheart do na húdaráis inniúla a áirithiú go mbeidh éifeacht ar choigeartú anuas ar an mbonnlíne i gcás ina bhfuil gá leis chun suíomhanna ceannasacha a chosc agus chun tacú le praghsáil ordúil sa díorthach tráchtearraí agus ina thráchtearra foluiteach. I gcás díorthaigh nach mbaineann tráchtearra foluiteach inláimhsithe leo, ní féidir an soláthar inseachadta a úsáid chun teorainn suímh a bhunú. Dá bhrí sin, ba cheart na húdaráis inniúla a bheith in ann na modheolaíochtaí a fheabhsú nó a choigeartú chun teorainneacha suímh a chinneadh le haghaidh na ndíorthach tráchtearraí sin bunaithe ar pharaiméadair dhifriúla, amhail úsáid an leasa oscailte freisin le haghaidh na spotmhíosa.

(19)

Maidir le díorthaigh tráchtearraí a ligeadh isteach chun a dtrádála den chéad uair ar ionad trádála, d’fhéadfadh sé go mbeadh imthosca ann ina ndearnadh díorthach den sórt sin a thrádáil ar ionad trádála amháin nó níos mó san Aontas nó i dtríú tíortha sular ligeadh isteach é. Chun go mbeifear in ann an díorthach tráchtearraí a aistriú go rianúil, ba cheart don údarás inniúil an leas oscailte sa díorthach tráchtearraí a trádáladh roimhe sin ar an ionad trádála eile nó ar na hionaid trádála eile a chur san áireamh agus na teorainneacha suímh tosaigh á mbunú le haghaidh an díorthaigh tráchtearraí a ligtear isteach chun a thrádála den chéad uair. D’fhéadfadh sé go dtiocfaidh imthosca eile chun cinn, mar shampla, i gcás ina dtrádáiltear dhá dhíorthach tráchtearraí ar an ionad céanna agus i ngeall ar dhifríocht bheag ina saintréithe, amhail athrú ar an innéacs foluiteach nó ar an gcrios tairisceana, meastar go n-aistreoidh an leas oscailte sna conarthaí níos sine go tapa chuig an gconradh is déanaí. Agus teorainneacha suímh á mbunú le haghaidh an chonartha is déanaí, ba cheart don údarás inniúil an leas oscailte sa chonradh is sine a chur san áireamh ionas gur féidir an conradh is déanaí a fhorbairt go rianúil.

(20)

Foráiltear i ndíorthaigh tráchtearraí áirithe, go háirithe díorthaigh tráchtearraí atá bunaithe ar chumhacht agus ar ghás, go ndéanfar an tráchtearra foluiteach a sheachadadh go leanúnach thar thréimhse shonraithe ama amhail lá, mí nó bliain. Thairis sin, conarthaí gaolmhara a bhfuil tréimhsí seachadta níos giorra acu amhail tréimhse ráithe nó tréimhse míosa (dá ngairtear conarthaí cascáideacha), féadfar iad a chur in ionad conarthaí áirithe a bhfuil tréimhsí seachadta níos faide acu amhail tréimhse bliana nó tréimhse ráithe. Sna cásanna sin, bheadh teorainn suímh spotmhíosa le haghaidh an chonartha atá le hionadú roimh sheachadadh iomchuí, óir ní chumhdófaí leis an teorainn sin dul in éag agus seachadadh fisiciúil ná socraíocht airgid thirim an chonartha. A mhéid a bhíonn forluí ann idir tréimhsí seachadta conarthaí a bhaineann leis an tráchtearra foluiteach céanna, ba cheart feidhm a bheith ag teorainn suímh amháin maidir leis na conarthaí gaolmhara uile chun na suíomhanna sna conarthaí sin a d’fhéadfaí a sheachadadh a chur san áireamh mar is ceart. Chun an méid sin a éascú, ba cheart conarthaí gaolmhara a thomhas in aonaid den tráchtearra foluiteach agus ba cheart iad a chomhiomlánú agus a ghlanluacháil dá réir.

(21)

I gcás díorthaigh tráchtearraí talmhaíochta áirithe, a bhfuil tionchar ábhartha acu ar phraghsanna bia do thomhaltóirí, leis an modheolaíocht, ba cheart é a chur ar a chumas d’údarás inniúil bonnlíne agus teorainn suímh a shocrú faoi bhun íosmhéid an raoin ghinearálta, i gcás ina dtagann sé ar fhianaise i dtaobh gníomhaíocht amhantrach a imríonn tionchar suntasach ar phraghsanna.

(22)

Ba cheart don údarás inniúil measúnú a dhéanamh ar cé acu atá nó nach bhfuil gá leis an mbonnlíne a choigeartú i ngeall ar na fachtóirí a liostaítear faoi Airteagal 57(3) de Threoir 2014/65/AE chun leibhéal deiridh na teorann suímh a shocrú. Ba cheart na fachtóirí sin a chur san áireamh sa mheasúnú mar fhachtóirí atá ábhartha maidir leis an díorthach tráchtearraí ar leith atá i gceist. Ba cheart treoir a thabhairt sna modheolaíochtaí maidir le conas an teorainn a shocrú gan an cinneadh deiridh maidir le teorainn suímh iomchuí le haghaidh díorthach tráchtearraí a bhaint den údarás inniúil chun drochúsáid mhargaidh a chosc. Leis na fachtóirí sin, ba cheart táisc thábhachtacha a thabhairt do na húdaráis inniúla agus don Údarás Eorpach um Urrúis agus Margaí, chun a éascú dóibh teacht ar thuairimí agus ailíniú leordhóthanach teorainneacha suímh a áirithiú ar fud an Aontais.

(23)

Níor cheart bacainní a chur ar fhorbairt díorthach nua tráchtearraí talmhaíochta de bharr teorainneacha suímh agus níor cheart cosc a chur ar chodanna beagleachtacha de mhargaí díorthach tráchtearraí talmhaíochta oibriú go leormhaith. Ba cheart a chur san áireamh sa mhodheolaíocht an t-am is gá chun leachtacht a fhorbairt agus a mhealladh chuig díorthaigh tráchtearraí nua agus chuig díorthaigh tráchtearraí atá ann cheana agus, go háirithe, i gcás díorthaigh tráchtearraí talmhaíochta a d’fhéadfadh a bheith ina dtacaíocht leis an mbainistíocht riosca i margaí saincheaptha nó i margaí neamhaibí nó lena bhféadfaí féachaint le socruithe fálaithe nua a fhorbairt i dtráchtearraí nua. Ar an gcaoi chéanna, tá conarthaí díorthach tráchtearraí talmhaíochta ann nach bhféadfaí rannpháirtithe leordhóthanacha nó leachtacht leordhóthanach a mhealladh leo chun cur i bhfeidhm éifeachtach teorainneacha suímh a chumasú gan an riosca a bheith ann go sáródh rannpháirtithe an teorainn go tráthrialta agus go neamhaireach agus, dá dheasca sin, go gcuirfí isteach ar phraghsáil agus socraíocht na ndíorthach tráchtearraí sin. Chun aghaidh a thabhairt ar na rioscaí sin d’fheidhmiú éifeachtach na margaí, ba cheart an teorainn suímh le haghaidh na spotmhíosa agus na míonna eile a shocrú ag leibhéal seasta 10 000 luchtóg go dtí go sáróidh an leas oscailte sa díorthach tráchtearraí talmhaíochta tairseach 20 000 luchtóg.

(24)

Maidir le líon, comhdhéanamh agus ról rannpháirtithe sa mhargadh i ndíorthach tráchtearraí, is féidir tionchar a bheith ag na nithe sin ar chineál agus ar mhéid na suíomhanna a shealbhaíonn rannpháirtithe áirithe sa mhargadh. I gcás roinnt díorthach tráchtearraí, d’fhéadfadh suíomh mór a bheith ag rannpháirtithe áirithe sa mhargadh atá ina léiriú ar an ról atá acu i gceannach, díol agus seachadadh an tráchtearra i gcás ina bhfuil siad ar an taobh eile den mhargadh i gcomparáid le tromlach na rannpháirtithe eile sa mhargadh a sholáthraíonn leachtacht nó seirbhísí bainistithe rioscaí le haghaidh mhargadh an tráchtearra fholuitigh.

(25)

Soláthar, úsáid agus infhaighteacht an tráchtearra fholuitigh, mar aon leis an rochtain air, saintréithe mhargadh an tráchtearra fholuitigh is ea iad. Trí mheasúnú a dhéanamh ar chomhpháirteanna níos mionsonraithe de na saintréithe sin, amhail meatacht an tráchtearra agus an modh iompair, ba cheart an t-údarás inniúil a bheith in ann solúbthacht an mhargaidh a chinneadh agus teorainneacha suímh a choigeartú go hiomchuí.

(26)

D’fhéadfadh sé go mbeidh neamhréireacht mhór idir leas oscailte agus soláthar inseachadta i gcás roinnt díorthach tráchtearraí. D’fhéadfadh sé sin tarlú i gcás inar beag trádáil díorthach a dhéantar i gcomparáid leis an soláthar inseachadta, agus sa chás sin beidh an leas oscailte níos lú i gcomparáid leis an soláthar inseachadta, nó, mar shampla, i gcás ina n-úsáidtear díorthach tráchtearraí áirithe go forleathan chun go leor neamhchosaintí difriúla ar rioscaí a fhálú agus ina bhfuil an soláthar inseachadta níos lú i gcomparáid leis an leas oscailte dá bhrí sin. Le neamhréireachtaí suntasacha den sórt sin idir an leas oscailte agus an soláthar inseachadta, tugtar údarú le hísliú nó ardú a dhéanamh ón mbonnlíne is infheidhme chuig an teorainn míonna eile, chun margadh mí-ordúil a sheachaint tráth a bheidh an spotmhí ag teannadh. Go sonrach, i gcás ina bhfuil an leas oscailte i bhfad níos airde ná an soláthar inseachadta, ba cheart an teorainn míonna eile a ísliú chun éifeacht aille ar an teorainn spotmhíosa a sheachaint, ar teorainn í atá bunaithe ar sholáthar inseachadta. Ní bheadh sé iomchuí an teorainn spotmhíosa a ardú i gcásanna den sórt sin i bhfianaise an riosca maidir le cúinneáil an mhargaidh. I gcás ina bhfuil an soláthar inseachadta i bhfad níos airde ná an leas oscailte, ba cheart an teorainn míonna eile a ardú chun an riosca go gcuirfí srian míchuí ar thrádáil a sheachaint. I gcás ina bhfuil an soláthar inseachadta i bhfad níos airde ná an leas oscailte, meastar go sáróidh an teorainn spotmhíosa atá bunaithe ar sholáthar inseachadta a eascraíonn as an mbonnlíne na suíomhanna oscailte a shealbhaíonn rannpháirtithe sa mhargadh sa spotmhí. Chun a áirithiú go gcuirfear cosc ar rannpháirtithe sa mhargadh suíomh ceannasach a thiomargadh leis an teorainn spotmhíosa agus go mbainfear amach go héifeachtach na cuspóirí maidir le drochúsáid mhargaidh a chosc agus praghsáil ordúil a áirithiú, mar a cheanglaítear le hAirteagal 57(1) de Threoir 2014/65/AE, ba cheart an teorainn spotmhíosa, mar sin féin, a ísliú i gcás ina bhfuil sí bunaithe ar sholáthar inseachadta.

(27)

Agus an cuspóir céanna aige maidir le margaí mí-ordúla a theorannú tráth a bheidh an spotmhí ag teannadh de bharr neamhréireachtaí móra idir ríomh an tsoláthair inseachadta agus an leasa oscailte, ba cheart soláthar inseachadta a shainmhíniú chun aon ghrád ionadach nó aon chineál tráchtearra is féidir a sheachadadh chun conradh díorthach tráchtearraí a shocrú a áireamh faoi théarmaí an chonartha sin.

(28)

Le hAirteagal 57(1), (3) agus (12) de Threoir 2014/65/AE, tugtar de chumhacht don Choimisiún oiriúnú a dhéanamh ar an modheolaíocht chun teorainneacha suímh a bhunú agus a chur i bhfeidhm chun córas comhchuibhithe teorainneacha suímh a bhunú i gcás díorthaigh tráchtearraí a thrádáiltear ar ionaid trádála agus i gconarthaí thar an gcuntar atá coibhéiseach go heacnamaíoch. Ceanglaítear le hAirteagal 57(1) modheolaíocht chun ríomh a dhéanamh atá le cur i bhfeidhm ag údaráis inniúla chun teorainneacha suímh a bhunú le haghaidh díorthaigh tráchtearraí. Ceanglaítear le hAirteagal 57(1) freisin nós imeachta a chinneadh maidir le hiarratas a dhéanamh ar an díolúine soláthair leachtachta agus ar an díolúine laghdaithe riosca le haghaidh eintitis airgeadais, atá ina gcuid de ghrúpa a bhaineann go príomha leis an tráchtáil. Ceanglaítear le hAirteagal 57(3) go sonrófar conas ba cheart d’údaráis inniúla fachtóirí a chur san áireamh agus teorainneacha suímh spotmhíosa agus teorainneacha suímh míonna eile á mbunú acu le haghaidh díorthaigh tráchtearraí a shocraítear go fisiciúil agus díorthaigh tráchtearraí a shocraítear le hairgead tirim. Ceanglaítear le hAirteagal 57(12) go gcinnfear conas ba cheart modheolaíocht na dteorainneacha suímh a chur i bhfeidhm, mar shampla, chun suíomhanna laistigh de ghrúpa a chomhiomlánú, i gcás ina bhféadfar suíomh a cháiliú mar shuíomh laghdaithe rioscaí nó i gcás ina bhféadfaidh gnólacht díolúine fálaithe a úsáid. Tá nasc substainteach idir ábhar na rialacha, ós rud é go bhfuil dlúthbhaint acu leis an modheolaíocht chun teorainneacha suímh a bhunú. Ar mhaithe le simplíocht agus trédhearcacht, agus chun cur i bhfeidhm na rialacha a éascú agus dúbláil a sheachaint, ba cheart iad a leagan síos in aon ghníomh amháin seachas i roinnt gníomhartha ar leithligh lena mbaineann go leor crostagairtí.

(29)

Tá an Rialachán seo bunaithe ar na dréachtchaighdeáin theicniúla rialála arna gcur faoi bhráid an Choimisiúin ag an Údarás Eorpach um Urrúis agus Margaí.

(30)

Rinne an tÚdarás Eorpach um Urrúis agus Margaí comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán seo bunaithe, rinne sé anailís ar na costais agus ar na tairbhí a d’fhéadfadh a bheith ag baint leo agus d’iarr sé comhairle ón nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (3).

(31)

Le Rialachán Tarmligthe (AE) 2017/591 ón gCoimisiún (4), forlíontar Treoir 2014/65/AE maidir le caighdeáin theicniúla rialála chun teorainneacha suímh a chur i bhfeidhm maidir le díorthaigh tráchtearraí. Cuirtear an Rialachán seo in ionad an Rialacháin Tharmligthe sin, agus na leasuithe ar Threoir 2014/65/AE a tugadh isteach le Treoir (AE) 2021/338 á gcur san áireamh, ina leagtar amach forálacha nua maidir le díolúintí fálaithe i ndáil le soláthar leachtachta agus maidir le díolúintí fálaithe le haghaidh eintitis airgeadais atá ina gcuid de ghrúpa neamhairgeadais den chuid is mó, lena dtugtar de chumhacht don Choimisiún gníomh tarmligthe a ghlacadh ina sonraítear na critéir maidir leis an díolúine soláthair leachtachta agus maidir leis an díolúine laghdaithe rioscaí le haghaidh eintitis airgeadais. Thairis sin, scriosadh an coincheap ‘conradh tráchtearraí céanna’ agus níl díorthaigh urrús faoin raon feidhme a thuilleadh. Ar deireadh, soiléiríodh ríomh an leasa oscailte agus simplíodh an mhodheolaíocht le haghaidh conarthaí díorthach tráchtearraí talmhaíochta nua agus conarthaí díorthach tráchtearraí talmhaíochta beagleachtacha. Dá bhrí sin, ba cheart Rialachán Tarmligthe (AE) 2017/591 a aisghairm agus an Rialachán seo a chur ina ionad,