(1)

De bhun Airteagal 11(1) de Threoir 98/8/CE ó Pharlaimint na hEorpa agus ón gComhairle (2), an 23 Nollaig 2010 cuireadh faoi bhráid údarás inniúil na Sualainne iarratas ar níotráit airgid a fhormheas le haghaidh a húsáide i dtáirgí bithicídeacha de chineál táirge 7, leasaithigh sceo, mar a thuairiscítear in Iarscríbhinn V a ghabhann leis an Treoir sin, rud a chomhfhreagraíonn do chineál táirge 7, leasaithigh sceo, mar a thuairiscítear in Iarscríbhinn V a ghabhann le Rialachán (AE) Uimh. 528/2012.

(2)

De bhun Airteagal 90(2), an chéad fhomhír, de Rialachán (AE) Uimh. 528/2012, iarratais a chuirtear isteach chun críocha Threoir 98/8/CE, iarratais nach ndearnadh meastóireacht na mBallstát orthu, i gcomhréir le hAirteagal 11(2) de Threoir 98/8/CE, a chur i gcrích faoin 1 Meán Fómhair 2013, déanfaidh na húdaráis inniúla meastóireacht orthu i gcomhréir le forálacha an Rialacháin sin.

(3)

An 10 Feabhra 2022, le linn don údarás inniúil meastóireachta a bheith i mbun meastóireacht ar an tsubstaint ghníomhach, tharraing an t-iarratasóir a iarratas siar agus níl sé ag iarraidh a thuilleadh go ndéanfaí níotráit airgid a fhormheas mar shubstaint ghníomhach lena húsáid i dtáirgí bithicídeacha de chineál táirge 7.

(4)

Ní áirítear níotráit airgid i dtaca le cineál táirge 7 in Iarscríbhinn II a ghabhann le Rialachán Tarmligthe (AE) Uimh. 1062/2014 ón gCoimisiún (3), áit a liostaítear na teaglamaí substainte gníomhaí/cineáil táirge a áirítear sa chlár oibre chun scrúdú a dhéanamh ar shubstaintí gníomhacha bithicídeacha atá ann cheana i dtáirgí bithicídeacha. Dá bhrí sin, táirgí bithicídeacha de chineál táirge 7 a bhfuil níotráit airgid iontu, ní chumhdaítear iad leis na forálacha idirthréimhseacha a leagtar síos in Airteagal 89(2) de Rialachán (AE) Uimh. 528/2012, agus dá bhrí sin ní fhéadfar iad a chur ar fáil ná a úsáid ar mhargadh an Aontais.

(5)

Mar sin féin, i gcomhréir leis an bhforáil idirthréimhseach a leagtar amach in Airteagal 94(1), pointe (a), de Rialachán (AE) Uimh. 528/2012, earra cóireáilte a cóireáladh le táirge bithicídeach amháin nó níos mó, nó ina gcuimsítear táirge bithicídeach amháin nó níos mó d’aon ghnó, táirgí nach bhfuil de shubstaintí gníomhacha iontu ach substaintí a bhí faoi scrúdú an 1 Meán Fómhair 2016 maidir leis an gcineál táirge ábhartha sa chlár oibre dá dtagraítear in Airteagal 89(1) den Rialachán sin, nó ar cuireadh isteach iarratas ar a bhformheas maidir leis an gcineál táirge ábhartha faoin dáta sin, nó táirgí nach bhfuil de shubstaintí gníomhacha iontu ach teaglaim de shubstaintí den chineál sin agus substaintí gníomhacha a áirítear sa liosta arna tharraingt suas i gcomhréir le hAirteagal 9(2) den Rialachán sin maidir leis an gcineál táirge ábhartha agus an úsáid ábhartha nó a áirítear in Iarscríbhinn I, féadfar é a chur ar an margadh go dtí an dáta a bheidh ann 180 lá tar éis cinnidh gan ceann de na substaintí gníomhacha a fhormheas le haghaidh na húsáide ábhartha, i gcás ina nglacfar cinneadh den sórt sin tar éis an 1 Meán Fómhair 2016.

(6)

Ós rud é gur tharraing an t-iarratasóir siar an t-iarratas ar fhormheas níotráite airgid le haghaidh a húsáide i dtáirgí bithicídeacha de chineál táirge 7, níl meastóireacht le déanamh ar aon táirge bithicídeach. Dá bhrí sin, níor chuir an t-údarás inniúil bailchríoch ar an tuarascáil ar an measúnú agus níor ullmhaigh an Ghníomhaireacht Eorpach Ceimiceán tuairim. Ar deireadh, táirge bithicídeach de chineál táirge 7 a bhfuil níotráit airgid ann, ós rud é nach ann do tháirge den chineál sin a bhféadfadh coinne a bheith leis go gcomhlíonfadh sé na critéir a leagtar síos in Airteagal 19(1), pointe (b), de Rialachán (AE) Uimh. 528/2012, tá na coinníollacha a leagtar síos in Airteagal 4(1) den Rialachán sin gan comhlíonadh. Ina theannta sin, i bhfianaise an ghá atá ann lena áirithiú nach gcuirfear ar mhargadh an Aontais a thuilleadh, i dtaca le cineál táirge 7, earraí cóireáilte a cóireáladh le níotráit airgid nó ina gcuimsítear níotráit airgid d’aon ghnó, is iomchuí gan níotráit airgid a fhormheas le haghaidh a húsáide i dtáirgí bithicídeacha de chineál táirge 7.

(7)

Na bearta dá bhforáiltear sa Chinneadh seo, is bearta iad atá i gcomhréir le tuairim an Bhuanchoiste um Tháirgí Bithicídeacha,