(1)

Leagtar amach leis an gComhaontú um Tharraingt Siar (2) na socruithe maidir le Ríocht Aontaithe na Breataine Móire agus Thuaisceart Éireann (“an Ríocht Aontaithe”) a bheith ag tarraingt siar as an Aontas agus as an gComhphobal Eorpach do Fhuinneamh Adamhach (“Euratom”).

(2)

Tiocfaidh deireadh leis an idirthréimhse a leagtar amach i gCuid a Ceathair den Chomhaontú um Tharraingt Siar an 31 Nollaig 2020 nuair a scoirfidh dlí an Aontais d’fheidhm a bheith aige maidir leis an Ríocht Aontaithe agus sa Ríocht Aontaithe.

(3)

De bhun Airteagal 5(4) den Phrótacal maidir le hÉirinn/Tuaisceart Éireann a ghabhann leis an gComhaontú um Tharraingt Siar, arna léamh in gcomhar le hIarscríbhinn 2 a ghabhann leis an bPrótacal sin, beidh feidhm ag forálacha Rialachán (AE) 2019/125 maidir leis an Ríocht Aontaithe i leith Thuaisceart Éireann agus sa Ríocht Aontaithe i leith Thuaisceart Éireann amhail ó dheireadh na hidirthréimhse.

(4)

I gcás ina mbunaítear le Rialachán (AE) 2019/125 ceanglas maidir le húdarú le haghaidh trádáil ón Aontas chuig tríú tíortha, ba é “údarás inniúil” na Ríochta Aontaithe a bheadh freagrach, ón 1 Eanáir 2021, as cinneadh a dhéanamh maidir le haon iarratas ar údarú den sórt sin, de bhun an Rialacháin sin, a dhéanann onnmhaireoirí atá bunaithe nó a bhfuil cónaí orthu i dTuaisceart Éireann.

(5)

Faoi réir chur i bhfeidhm Rialachán (AE) 2019/125 maidir leis an Ríocht Aontaithe i leith Thuaisceart Éireann agus sa Ríocht Aontaithe i leith Thuaisceart Éireann, i gcomhréir le hAirteagal 5(4), den Phrótacal maidir le hÉirinn/Tuaisceart Éireann a ghabhann leis an gComhaontú um Tharraingt Siar, arna léamh i gcomhar le pointe 47 d’Iarscríbhinn 2 a ghabhann leis an bPrótacal sin, is iomchuí dá bhrí sin Iarscríbhinn I a ghabhann le Rialachán (AE) 2019/125 a leasú.

(6)

De bhun Airteagail 16 agus 19 de Rialachán (AE) 2019/125, tá údarú de dhíth chun táirgí a liostaítear in Iarscríbhinn IV a ghabhann leis an Rialachán a onnmhairiú, ar táirgí iad a d’fhéadfaí a úsáid chun daoine a chur chun báis trí bhíthin instealladh marfach.

(7)

Déantar foráil le hAirteagal 20(1) de Rialachán (AE) 2019/125 maidir le “húdarú ginearálta onnmhairiúcháin ón Aontas”.

(8)

I gcomhréir le hIarscríbhinn V a ghabhann le Rialachán (AE) 2019/125, tá feidhm ag an údarú ginearálta onnmhairiúcháin ón Aontas maidir le honnmhairí earraí a liostaítear in aon iontráil in Iarscríbhinn IV a ghabhann le Rialachán (AE) 2019/125 agus tá sé bailí ar fud an Aontais i gcás onnmhairí chuig na cinn scríbe a liostaítear i gCuid 2 d’Iarscríbhinn V. Is tríú tíortha iad na cinn scríbe sin a bhfuil pionós an bháis dhíothaithe acu i gcás gach coire agus a bhfuil an díothú sin deimhnithe trí ghealltanas idirnáisiúnta (3).

(9)

Maidir leis an ualach rialála a chuirtear ar chuideachtaí de chuid an Aontais a onnmhairíonn earraí a liostaítear in Iarscríbhinn IV a ghabhann leis an Rialachán, cuidíonn an t-údarú ginearálta onnmhairiúcháin ón Aontas é sin a laghdú agus táirgí íocshláinte den sórt sin á n-onnmhairiú acu chun críoch dlisteanach teiripe.

(10)

Dhaingnigh an Ríocht Aontaithe Prótacal Uimh. 13 a ghabhann leis an gCoinbhinsiún chun Cearta an Duine agus Saoirsí Bunúsacha a Chosaint, maidir le pionóis an bháis a chur ar ceal i ngach imthoisc agus, dá bhrí sin, comhlíonann sí na ceanglais chun í a chur ar liosta na gceann scríbe a leagtar síos i gCuid 2 d’Iarscríbhinn V a ghabhann le Rialachán (AE) 2019/125.

(11)

Gan dochar do chur i bhfeidhm Rialachán (AE) 2019/125 maidir leis an Ríocht Aontaithe i leith Thuaisceart Éireann agus sa Ríocht Aontaithe i leith Thuaisceart Éireann, i gcomhréir le hAirteagal 5(4), arna léamh i gcomhar le pointe 47 d’Iarscríbhinn 2 a ghabhann leis an bPrótacal maidir le hÉirinn/Tuaisceart Éireann atá i gceangal leis an gComhaontú um Tharraingt Siar, is iomchuí dá bhrí sin Iarscríbhinn V a ghabhann le Rialachán (AE) 2019/125 a leasú.

(12)

Is iomchuí foráil a dhéanamh maidir le hinfheidhmeacht an Rialacháin seo tar éis dheireadh na hidirthréimhse, le héifeacht ón 1 Eanáir 2021. Má thagann deireadh leis an tréimhse agóide tar éis an 1 Eanáir 2021 is iomchuí, ar chúiseanna deimhneachta dlíthiúla agus chun aon suaitheadh díobhálach a sheachaint a d‘fhéadfaí a dhéanamh ar oibríochtaí cuideachtaí de chuid an Aontais ar mian leo earraí a liostaítear in Iarscríbhinn IV a onnmhairiú chuig an Ríocht Aontaithe, foráil a dhéanamh maidir le hinfheidhmeacht chúlghabhálach an Rialacháin ón 1 Eanáir 2021.