(1)

Fil-komunikazzjoni tagħha tad-9 ta’ Marzu 2021 intitolata “Il-Kumpass Diġitali tal-2030: l-approċċ Ewropew għad-Deċennju Diġitali” (il-“Komunikazzjoni dwar il-Kumpass Diġitali”), il-Kummissjoni stabbiliet il-viżjoni tagħha għall-2030 biex tagħti s-setgħa liċ-ċittadini u lin-negozji permezz tat-trasformazzjoni diġitali (id-‘Deċennju Diġitali’). Il-perkors tal-Unjoni għat-trasformazzjoni diġitali tal-ekonomija u tas-soċjetà jenħtieġ li jinkludi (sovranità diġitali) b’mod miftuħ, ir-rispett tad-drittijiet fundamentali, l-istat tad-dritt u d-demokrazija, l-inklużjoni, l-aċċessibbiltà, l-ugwaljanza, is-sostenibbiltà, ir-reżiljenza, is-sigurtà, it-titjib tal-kwalità tal-ħajja, id-disponibbiltà ta’ servizzi u r-rispett tad-drittijiet u l-aspirazzjonijiet taċ-ċittadini. Jenħtieġ li dan jikkontribwixxi għal ekonomija u soċjetà dinamiċi, effiċjenti fl-użu tar-riżorsi u ġusti fl-Unjoni.

(2)

It-trasformazzjoni diġitali mhijiex possibbli mingħajr appoġġ qawwi għax-xjenza, ir-riċerka, l-iżvilupp u għall-komunità xjentifika, li huma l-ixprun tar-rivoluzzjoni teknoloġika u diġitali. Barra minn hekk, peress li l-livell ta’ diġitalizzazzjoni tal-ekonomija jew soċjetà huwa kritika tar-reżiljenza ekonomika u soċjetali kif ukoll fattur fl-influwenza globali tagħhom, huwa neċessarju għall-azzjoni internazzjonali tal-Unjoni li tistruttura l-firxa wiesgħa ta’ kooperazzjoni eżistenti f’konformità mal-pilastri tad-Deċennju Diġitali. Il-ħtieġa għal tali strutturazzjoni hija wkoll riflessa fil-komunikazzjoni konġunta mill-Kummissjoni u mir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà tal-1 ta’ Diċembru 2021 intitolata “Il-Portal Globali”, li permezz tagħha l-Unjoni beħsiebha tikkontribwixxi biex titnaqqas id-diskrepanza fl-investiment globali, abbażi ta’ approċċ demokratiku u mmexxi mill-valuri, li jrawwem sħubijiet trasparenti u standards għoljin sabiex jiġu ssodisfati l-ħtiġijiet tal-iżvilupp tal-infrastruttura globali.

(3)

F’dikjarazzjoni tal-25 ta’ Marzu 2021, il-membri tal-Kunsill Ewropew ikkunsidraw il-Komunikazzjoni dwar il-Kumpass Diġitali bħala pass lejn it-tfassil tal-iżvilupp diġitali tal-Unjoni għad-deċennju li jmiss u kkonfermaw il-viżjoni stabbilita fil-Komunikazzjoni dwar il-Kumpass Diġitali, inkluż l-idea ta’ programm ta’ politika b’qafas ta’ governanza effiċjenti biex tiġi ffaċilitata l-implimentazzjoni ta’ proġetti multinazzjonali li huma meħtieġa għat-trasformazzjoni diġitali tal-Unjoni f’oqsma kritiċi. Stiednu wkoll lill-Kummissjoni biex twessa’ s-sett ta’ għodod ta’ politika tal-Unjoni għat-trasformazzjoni diġitali, kemm fil-livell tal-Unjoni kif ukoll fil-livell nazzjonali, u biex tuża l-istrumenti kollha disponibbli mill-politika industrijali, kummerċjali u tal-kompetizzjoni, il-ħiliet u l-edukazzjoni, il-politika dwar ir-riċerka u l-innovazzjoni u l-istrumenti ta’ finanzjament fit-tul biex tiffaċilita t-trasformazzjoni diġitali.

(4)

Id-Dikjarazzjoni Ewropea dwar id-Drittijiet u l-Prinċipji Diġitali għad-Deċennju Diġitali (“id-Dikjarazzjoni Ewropea”) ser tqiegħed lin-nies fiċ-ċentru tat-trasformazzjoni diġitali, għandha l-għan li tippromwovi l-prinċipji għat-trasformazzjoni diġitali skont il-valuri u l-liġi Ewropej kondiviżi u hija maħsuba li tikkontribwixxi biex jintlaħqu l-għanijiet ġenerali ta’ din id-Deċiżjoni. Għal dak il-għan, jenħtieġ li l-Kummissjoni u l-Istati Membri jqisu l-prinċipji u d-drittijiet diġitali kif stabbiliti fid-Dikjarazzjoni Ewropea meta jikkooperaw, bil-ħsieb li jinkisbu l-objettivi ġenerali stabbiliti f’din id-Deċiżjoni.

(5)

Kif deskritt fil-komunikazzjoni tal-Kummissjoni tal-5 ta’ Mejju 2021 intitolata “Aġġornament tal-Istrateġija Industrijali l-Ġdida tal-2020: Nibnu Suq Uniku aktar b’saħħtu għall-irkupru tal-Ewropa”, huwa neċessarju li l-Unjoni tidentifika sistemi ta’ teknoloġiji kritiċi u setturi strateġiċi, biex tindirizza dgħufijiet strateġiċi u dipendenzi ta’ riskju għoli li jistgħu jwasslu għal nuqqas ta’ provvista jew riskji marbuta maċ-ċibersigurtà, u biex trawwem it-trasformazzjoni diġitali. Dan jisħaq fuq l-importanza li l-Istati Membri jingħaqdu flimkien u jappoġġaw l-isforzi tal-industrija biex tindirizza dawk id-dipendenzi u biex tiżviluppa ħtiġijiet ta’ kapaċità strateġika. Dan iwieġeb ukoll għall-analiżi tal-Kummissjoni stabbilita fil-komunikazzjoni tagħha tat-8 ta’ Settembru 2021 intitolata “Rapport ta’ Prospettiva Strateġika tal-2021 - Il-kapaċità u l-libertà tal-UE li taġixxi”. Fil-qafas tal-Faċilità għall-Irkupru u r-Reżiljenza stabbilita’ permezz tar-Regolament (UE) 2021/241 tal-Parlament Ewropew u tal-Kunsill (3) u t-tħejjija ta’ pjanijiet nazzjonali għall-irkupru u r-reżiljenza, il-Kummissjoni ħeġġet lill-Istati Membri jikkoordinaw l-isforzi tagħhom sabiex, fost l-oħrajn, jistabbilixxu proġetti multinazzjonali fil-qasam diġitali.

Dik l-esperjenza enfasizzat il-ħtieġa li l-Kummissjoni tappoġġa l-isforzi ta’ koordinazzjoni mill-Istati Membri, u li l-Unjoni jkollha mekkaniżmi ta’ implimentazzjoni li jiffaċilitaw l-investimenti konġunti, biex tistabbilixxi proġetti multinazzjonali. Flimkien ma’ inizjattivi oħrajn tal-Kummissjoni, bħall-Osservatorju tal-UE għat-Teknoloġiji Kritiċi, imsemmi fil-komunikazzjoni tal-Kummisjoni tat-22 ta’ Frar 2021 intitolata “Pjan ta’ Azzjoni għas-sinerġiji bejn l-industriji ċivili, tad-difiża, u spazjali”, jenħtieġ li tiġi stabbilita struttura ta’ governanza li timplimenta l-Kumpass Diġitali, jenħtieġ li din tgħin biex jiġu identifikati d-dipendenzi strateġiċi diġitali attwali u futuri possibbli tal-Unjoni u jenħtieġ li, tikkontribwixxi għat-tisħiħ tas-sovranità diġitali tal-Unjoni b’mod miftuħ.

(6)

Fil-komunikazzjoni tagħha tal-11 ta’ Diċembru 2019 intitolata ‘il-Patt Ekoloġiku Ewropew’, il-Kummissjonienfasizzat li l-Unjoni jenħtieġ li tisfrutta l-potenzjal tat-trasformazzjoni diġitali, li hi strument abilitanti ewlieni biex jintlaħqu l-objettivi tal-Patt Ekoloġiku Ewropew. Jenħtieġ li l-Unjoni tippromwovi u tinvesti fit-trasformazzjoni diġitali meħtieġa, billi t-teknoloġiji diġitali u metodi u proċessi ġodda huma strumenti abilitanti kritiċi għall-kisba tal-għanijiet ta’ sostenibbiltà tal-Patt Ekoloġiku Ewropew, tal-Ftehim ta’ Pariġi adottat skont il-Konvenzjoni Qafas tan-Nazzjonijiet Uniti dwar it-Tibdil fil-Klima (4), u tal-Għanijiet ta’ Żvilupp Sostenibbli tan-Nazzjonijiet Uniti f’ħafna setturi differenti. Teknoloġiji diġitali, bħall-intelliġenza artifiċjali, il-5G, is-6G, il-blockchain, il-cloud u l-edge computing, u l-Internet tal-oġġetti jenħtieġ li jaċċelleraw u jimmassimizzaw l-impatt tal-politiki għat-trattament tat-tibdil fil-klima u l-ħarsien tal-ambjent, inkluż permezz ta’ ċikli tal-ħajja sostenibbli. Flimkien man-navigazzjoni u l-lokalizzazzjoni bis-satellita, id-diġitalizzazzjoni tippreżenta wkoll opportunitajiet ġodda għall-monitoraġġ mill-bogħod tat-tniġġis tal-arja u tal-ilma, u għall-monitoraġġ u l-ottimizzazzjoni ta’ kif jintużaw l-enerġija u r-riżorsi naturali. L-Unjoni teħtieġ settur diġitali li jpoġġi s-sostenibbiltà fil-qalba tiegħu, inkluż fil-katina tal-provvista tiegħu, li jipprevjeni dipendenza eċċessiva fuq materja prima kritika, li jiżgura li l-infrastrutturi u t-teknoloġiji diġitali jsiru aktar sostenibbli, rinnovabbli u effiċjenti fl-użu tal-enerġija u tar-riżorsi b’mod verifikabbli, u li jikkontribwixxu għal ekonomija u soċjetà sostenibbli, ċirkolari u newtrali għall-klima f’konformità mal-Patt Ekoloġiku Ewropew.

(7)

Il-politiki dwar l-infrastruttura diġitali u l-investimenti fiha jenħtieġ li jkollhom l-għan li jiżguraw konnettività aċċessibbli għal kulħadd u kullimkien fl-Unjoni, b’aċċess disponibbli għall-Internet, sabiex jingħalaq id-distakk diġitali fl-Unjoni, b’attenzjoni speċjali fuq id-diviżjoni bejn iż-żoni ġeografiċi differenti.

(8)

Jenħtieġ li l-miżuri previsti fil-Komunikazzjoni dwar il-Kumpass Diġitali jiġu implimentati, biex jiġu intensifikati l-azzjonijiet ipprovduti fl-istrateġija ppreżentata mill-komunikazzjoni tal-Kummissjoni tad-19 ta’ Frar 2020 bit-titolu “Insawru l-Futur diġitali tal-Ewropa”, u filwaqt li jibnu fuq l-istrumenti eżistenti tal-Unjoni, bħall-programmi taħt il-Fond Ewropew għall-Iżvilupp Reġjonali u l-Fond ta’ Koeżjoni, stabbiliti bir-Regolament (UE) 2021/1058 tal-Parlament Ewropew u tal-Kunsill (5) u, l-Istrument ta’ Appoġġ Tekniku stabbilit mir-Regolament (UE) 2021/240 tal-Parlament Ewropew u tal-Kunsill (6), u fuq ir-Regolamenti (UE) 2021/523 (7), (UE) 2021/690 (8), (UE) 2021/694 (9), (UE) 2021/695 (10) u, (UE) 2021/1153 (11) tal-Parlament Ewropew u tal-Kunsill u dwar il-fondi allokati għat-trasformazzjoni diġitali skont ir-Regolament (UE) 2021/241. Din id-Deċiżjoni jenħtieġ li tistabbilixxi programm ta’ politika 2030 dwar id-Deċennju Diġitali biex tinkiseb, titħaffef u titfassal trasformazzjoni diġitali b’suċċess tal-ekonomija u s-soċjetà tal-Unjoni.

(9)

Il-Pilastru Ewropew tad-Drittijiet Soċjali mħabbar mill-Parlament Ewropew, mill-Kunsill u mill-Kummissjoni waqt il-laqgħa Informali tal-kapijiet tal-Istat jew gvern, fis-17 ta’ Novembru 2017, f’Gotheburg, l-Iżvezja, isejjaħ għad-dritt ta’ aċċess għal servizzi essenzjali ta’ kwalità tajba, inkluż il-komunikazzjonijiet diġitali, kif ukoll id-dritt għal edukazzjoni, taħriġ u apprendiment tul il-ħajja inklużivi u ta’ kwalità.

(10)

Biex tiġi segwita t-trajettorja tal-Unjoni fir-rigward tal-pass tat-trasformazzjoni diġitali, jenħtieġ li jiġu stabbiliti miri diġitali fil-livell tal-Unjoni. Jenħtieġ li dawk il-miri diġitali jkunu marbuta ma’ oqsma konkreti fejn progress huwa mistenni li jsir b’mod kollettiv fl-Unjoni. Il-miri diġitali jsegwu l-erba’ punti kardinali identifikati fil-Komunikazzjoni dwar il-Kumpass Diġitali, identifikati bħala l-oqsma essenzjali għat-trasformazzjoni diġitali tal-Unjoni: il-ħiliet diġitali, l-infrastrutturi diġitali, id-diġitalizzazzjoni tan-negozji u d-diġitalizzazzjoni tas-servizzi pubbliċi.

(11)

Din id-Deċiżjoni hija mingħajr preġudizzju għall-Artikoli 165 u 166 tat- Trattat dwar il-Funzjonament tal-Unjoni Ewropea (TFUE).

(12)

Il-ħiliet diġitali, bażiċi u avvanzati, kif ukoll ħiliet oħra, inkluż fl-oqsma tax-xjenza, it-teknoloġija, l-inġinerija u l-matematika (STEM), huma essenzjali biex jitħaffef l-aġġustament tal-industrija tal-Unjoni għal bidliet strutturali. Huwa intiż li ċ-ċittadini diġitalment awtonomi u kapaċi, inkluż dawk b’diżabilitajiet, jistgħu jieħdu vantaġġ mill-opportunitajiet tad-Deċennju Diġitali. Sabiex jintlaħaq dak l-għan, jenħtieġ li jkun hemm enfasi fuq l-edukazzjoni biex jiġi żgurat li l-komunita’ tal-edukazzjoni, b’mod partikolari l-għalliema, tkun imħarrġa, mogħtija l-ħiliet u mgħammra b’mod adegwat biex tuża t-teknoloġija b’mod effettiv fil-metodi ta’ tagħlim tagħha u tkun tista’ tgħallem it-teknoloġiji diġitali biex tiżgura li l-istudenti jkunu mgħammra aħjar biex jidħlu fis-suq tax-xogħol fuq perjodu qasir u itwal.

L-edukazzjoni u t-taħriġ diġitali jenħtieġ li jtejbu wkoll l-attraenza tal-Unjoni għal professjonisti b’livell għoli ta’ ħiliet li jkunu kisbu ħiliet diġitali avvanzati u d-disponibbiltà tagħhom fis-suq tax-xogħol tal-Unjoni. L-Indiċi tal-Ekonomija u s-Soċjetà Diġitali (DESI) ippubblikata mill-Kummissjoni tal-2021 jiddikjara li anki qabel il-pandemija COVID-19 in-negozji tal-Unjoni, b’mod partikolari l-intrapriżi żgħar u ta’ daqs medju (SMEs), batew biex isibu biżżejjed professjonisti tat-teknoloġija tal-informazzjoni u l-komunikazzjoni (ICT). Għalhekk, it-taħriġ u l-edukazzjoni diġitali jenħtieġ li jappoġġaw l-azzjonijiet kollha biex jiżguraw li l-forza tax-xogħol tkun mgħammra bil-ħiliet attwali u futuri meħtieġa li jappoġġaw il-mobilizzazzjoni tal-partijiet ikkonċernati rilevanti kollha u l-inċentiv għalihom biex jimmassimizzaw l-impatt tal-investimenti fit-titjib tal-ħiliet eżistenti (titjib tal-ħiliet) u taħriġ f’ħiliet ġodda (taħriġ mill-ġdid) kif ukoll tagħlim tul il-ħajja mill-popolazzjoni attiva, sabiex jiġi żgurat li jittieħed vantaġġ sħiħ mill-opportunitajiet tad-diġitalizzazzjoni tal-industrija u s-servizzi. Jenħtieġ li jitħeġġeġ ukoll it-taħriġ diġitali mhux formali mogħti mill-impjegaturi fil-forma ta’ apprendiment bil-prattika. L-edukazzjoni u t-taħriġ ser iġibu wkoll inċentivi konkreti għall-karriera biex jevitaw u jeliminaw id-differenzi fl-opportunitajiet u fit-trattament bejn in-nisa u l-irġiel.

(13)

Infrastruttura diġitali sostenibbli għall-konnettività, il-mikroelettronika u l-kapaċità li tiġi pproċessata l-big data huma faċilitaturi kritiċi biex jittieħed vantaġġ mill-benefiċċji tad-diġitalizzazzjoni, għal aktar żviluppi teknoloġiċi u għat-tmexxija diġitali tal-Unjoni. F’konformità mal-komunikazzjoni tal-Kummissjoni tat-30 ta’ Ġunju 2021 intitolata “Viżjoni fit-tul għaż-Żoni Rurali tal-UE – Lejn żoni rurali aktar b’saħħithom, konnessi, reżiljenti u prosperużi sal-2040”, hija meħtieġa konnettività affidabbli, veloċi u sigura għal kulħadd u kullimkien fl-Unjoni, inkluż fiż-żoni rurali u remoti, bħall-gżejjer u r-reġjuni muntanjużi u reġjuni skarsament popolati kif ukoll ir-reġjuni ultraperiferiċi. Il-ħtiġijiet tas-soċjetà għall-konverġenza tal-wisa’ tal-banda tad-download u tal-upload qed jiżdiedu b’mod kostanti. Sal-2030, jenħtieġ li n-networks b’veloċitajiet tal-gigabits isiru disponibbli għal dawk li jeħtieġu jew jixtiequ din il-kapaċità. L-utenti finali kollha tal-Unjoni jenħtieġ li jkunu jistgħu jużaw is-servizzi tal-gigabits ipprovduti minn networks f’post fiss installati sal-punt tat-terminazzjoni tan-network. Barra minn hekk, iż-żoni popolati kollha jenħtieġ li jkunu koperti minn network mingħajr fili ta’ veloċità kbira tal-ġenerazzjoni li jmiss b’mill-inqas prestazzjoni ekwivalenti għall-5G. L-atturi kollha tas-suq li jibbenefikaw mit-trasformazzjoni diġitali jenħtieġ li jassumu r-responsabbiltajiet soċjali tagħhom u jagħtu kontribut ġust u proporzjonat lill-beni, lis-servizzi u lill-infrastrutturi pubbliċi, għall-benefiċċju taċ-ċittadini kollha fl-Unjoni.

(14)

In-newtralità teknoloġika, li hija prevista mid-Direttiva (UE) 2018/1972 tal-Parlament Ewropew u tal-Kunsill (12), hija prinċipju li jenħtieġ li jiggwida l-politiki tal-Unjoni u dawk nazzjonali għal infrastruttura ta’ konnettività diġitali tal-ogħla prestazzjoni, reżiljenza, sigurtà u sostenibbiltà, sabiex tkun tista’ tibbenefika mill-prosperità. It-teknoloġiji u s-sistemi ta’ trażmissjoni kollha li jistgħu jikkontribwixxu għall-kisba tal-konnettività tal-gigabits, inkluż l-avvanzi attwali u futuri tal-fibra, tas-satellita, tal-5G jew ta’ kwalunkwe ekosistema futura oħra u tal-Wi-Fi tal-ġenerazzjoni li jmiss jenħtieġ għalhekk li jiġu ttrattati b’mod ugwali, fejn ikollhom prestazzjoni tan-network ekwivalenti.

(15)

Is-semikondutturi huma essenzjali għall-biċċa l-kbira tal-ktajjen tal-valur strateġiċi ewlenin u huma mistennija jkunu f’domanda saħansitra ogħla fil-futur milli fil-preżent, b’mod partikolari fl-oqsma teknoloġiċi l-aktar innovattivi. Peress li huma ċentrali għall-ekonomija diġitali, is-semikondutturi huma wkoll faċilitaturi kritiċi għat-tranżizzjoni lejn is-sostenibbiltà, b’hekkukoll jikkontribwixxu għall-kisba tal-objettivi tal-Patt Ekoloġiku Ewropew. Semikondutturi b’impronta enerġetika baxxa jikkontribwixxu wkoll fil-pożizzjonament tal-Unjoni bħala mexxejja fit-teknoloġiji diġitali sostenibbli. Huwa maħsub li r-reżiljenza tal-katina tal-valur tas-semikondutturi u tal-kapaċità tal-produzzjoni tas-semikondutturi (inkluż il-materjal, it-tagħmir, id-disinn, il-manifattura, l-ipproċessar u l-imballaġġ) tissaħħaħ, fost l-oħrajn permezz tal-bini ta’ infrastruttura innovattiva fuq skala kbira skont il-liġi tal-Unjoni dwar is-sostenibbiltà ambjentali. Pereżempju, il-kapaċità kwantistika u s-semikondutturi b’potenza baxxa huma faċilitaturi kritiċi biex tinkiseb in-newtralità klimatika ta’ nodi periferiċi siguri ħafna li jiggarantixxu aċċess għal servizzi tad-data b’latenza baxxa, irrispettivament minn fejn jinsab l-utent.

(16)

Lil hinn mir-rwol tagħhom ta’ abilitanti, it-teknoloġiji eżistenti u futuri ser ikunu fil-qalba ta’ prodotti ġodda, proċessi ta’ manifattura ġodda u mudelli kummerċjali ġodda bbażati fuq il-kondiviżjoni ġusta u sigura tad-data fl-ekonomija tad-data, filwaqt li jiżguraw protezzjoni effettiva tal-privatezza u d-data personali. It-trasformazzjoni tan-negozji tiddependi fuq il-kapaċità tagħhom li jadottaw teknoloġiji diġitali ġodda malajr u b’mod komprensiv, inkluż fl-ekosistemi industrijali u tas-servizzi li bħalissa għadhom lura. Dik it-trasformazzjoni hija partikolarment importanti għall-SMEs, li għadhom jiffaċċjaw sfidi fl-adozzjoni ta’ soluzzjonijiet diġitali.

(17)

L-Istati Membri huma mħeġġa japplikaw il-prinċipju ta’ darba biss fl-amministrazzjoni pubblika tagħhom, filwaqt li jrawmu l-użu mill-ġdid tad-data, f’konformità mar-regoli dwar il-protezzjoni tad-data, sabiex l-ebda piż addizzjonali ma jaqa’ fuq iċ-ċittadini jew in-negozji.

(18)

Il-ħajja demokratika u s-servizzi pubbliċi ewlenin jiddependu wkoll b’mod kruċjali fuq it-teknoloġiji diġitali. Kull ċittadin u negozju jenħtieġ li jkun jista’ jinteraġixxi b’mod diġitali mal-amministrazzjonijiet pubbliċi. Diversi parametri ta’ tali interazzjonijiet, inkluż iċ-ċentralità tal-utenti u t-trasparenza, jenħtieġ li jiġu mmonitorjati fid-DESI. Is-servizzi pubbliċi ewlenin, inkluż ir-rekords elettroniċi tas-saħħa, jenħtieġ li jkunu kompletament aċċessibbli fuq bażi volontarja bħala ambjent diġitali tal-aħjar klassi li jipprovdi servizzi u għodod faċli biex jintużaw, effiċjenti, affidabbli u personalizzati bi standards għoljin ta’ sigurtà u privatezza. Tali servizzi pubbliċi ewlenin jenħtieġ li jkopru wkoll servizzi li huma rilevanti għal avvenimenti ewlenin tal-ħajja għal persuni fiżiċi, bħal pereżempju meta jitilfu jew jsibu impjieg, jistudjaw, jippossjedu jew isuqu karozza, jew jibdew negozju, u għal persuni ġuridiċi fiċ-ċirklu tal-ħajja professjonali tagħhom. Madankollu, l-aċċessibbiltà offline tas-servizzi jenħtieġ li tinżamm waqt it-tranżizzjoni lejn għodod diġitali.

(19)

Jenħtieġ li t-teknoloġiji diġitali jikkontribwixxu biex jinkisbu eżiti soċjetali usa’ li ma jkunux limitati għall-isfera diġitali, iżda jkollhom effetti pożittivi fuq il-ħajja ta’ kuljum u l-benesseri taċ-ċittadini. Biex tirnexxi, it-trasformazzjoni diġitali jenħtieġ li timxi id f’id mat-titjib fir-rigward tad-demokrazija, il-governanza tajba, l-inklużjoni soċjali u servizzi pubbliċi aktar effiċjenti.

(20)

Il-Kummissjoni jenħtieġ li tirrevedi l-miri diġitali u d-definizzjonijiet rilevanti sa Ġunju 2026 biex tivvaluta jekk ikunux għadhom jissodisfaw il-livell għoli ta’ ambizzjoni tat-trasformazzjoni diġitali. Il-Kummissjoni jenħtieġ li tkun tista’, fejn hija tqis li huwa neċessarju, li tipproponi emendi għall-miri diġitali sabiex tindirizza l-iżviluppi tekniċi, ekonomiċi u soċjetali, b’mod partikolari fl-oqsma tal-ekonomija tad-data, is-sostenibbiltà u ċ-ċibersigurtà.

(21)

Meta jintużaw fondi pubbliċi, huwa kruċjali li jinkiseb il-valur massimu għas-soċjetà u n-negozji. Għalhekk, il-finanzjament pubbliku jenħtieġ li jimmira biex jiżgura aċċess miftuħ u nondiskriminatorju għall-outputs tal-proġetti ffinanzjatiħlief fejn, f’każijiet sostanzjati u proporzjonati, huwa meqjus xieraq li jsir mod ieħor.

(22)

Progress armonjuż, inklużiv u kostanti lejn it-trasformazzjoni diġitali u lejn l-ilħuq tal-miri diġitali fl-Unjoni jeħtieġ forma ta’ governanza komprensiva, robusta, affidabbli, flessibbli u trasparenti, ibbażata fuq kooperazzjoni u koordinazzjoni mill-qrib bejn il-Parlament Ewropew, il-Kunsill, il-Kummissjoni u l-Istati Membri. Mekkaniżmu xieraq jenħtieġ li jiżgura l-koordinazzjoni tal-konverġenza, l-iskambju tal-aħjar prattiki u l-konsistenza u l-effettività tal-politiki u tal-miżuri fil-livell tal-Unjoni u f’dak nazzjonali, u jenħtieġ li jħeġġeġ ukoll l-attivazzjoni ta’ sinerġiji xierqa bejn il-fondi tal-Unjoni u dawk nazzjonali, kif ukoll bejn l-inizjattivi u l-programmi tal-Unjoni. Għal dak l-għan, il-Kummissjoni tista’ tipprovdi gwida u appoġġ lill-Istati Membri dwar kif l-aħjar jagħmlu użu mill-aktar tipi xierqa ta’ sinerġiji. Għal dak l-għan, huwa neċessarju li jiġu stabbiliti dispożizzjonijiet dwar mekkaniżmu ta’ monitoraġġ u kooperazzjoni li jimplimenta l-Kumpass Diġitali. Tali mekkaniżmu jenħtieġ li jqis id-diversità tas-sitwazzjonijiet madwar u fi ħdan l-Istati Membri, jenħtieġ li jkun proporzjonat, b’mod partikolari fir-rigward tal-piżijiet amministrattivi, u jenħtieġ li jħalli lill-Istati Membri li jsegwu livell ogħla ta’ ambizzjoni meta jistabbilixxu l-objettivi nazzjonali tagħhom.

(23)

Il-mekkaniżmu ta’ monitoraġġ u kooperazzjoni li jimplimenta l-Kumpass Diġitali jenħtieġ li jinkludi sistema ta’ monitoraġġ imtejba biex jiġu identifikati l-lakuni fil-kapaċitajiet diġitali strateġiċi tal-Unjoni. Jenħtieġ li dan jinkludi wkoll mekkaniżmu sabiex jirrapporta, fost l-oħrajn, dwar il-progress lejn il-miri diġitali stabbiliti f’din id-Deċiżjoni, kif ukoll dwar l-istat aktar ġenerali tal-konformità mal-objettivi ġenerali stabbiliti f’din id-Deċiżjoni. Jenħtieġ li dan jistabbilixxi qafas kooperattiv bejn il-Kummissjoni u l-Istati Membri biex jiġu identifikati soluzzjonijiet li jindirizzaw id-dgħufijiet u jiġu proposti azzjonijiet immirati għal rimedji effettivi.

(24)

Jenħtieġ li d-DESI jiġi integrat fir-rapport dwar l-istat tad-Deċennju Diġitali (ir-‘Rapport dwar id-Deċennju Diġitali’), u jenħtieġ li jintuża għall-monitoraġġ tal-progress lejn il-miri diġitali. Tali -monitoraġġ jenħtieġ li jinkludi analiżi tal-indikaturi li jkejlu l-progress fil-livell tal-Istati Membri, il-politiki u l-inizjattivi nazzjonali mmirati biex jilħqu l-objettivi ġenerali u l-miri diġitali stabbiliti f’din id-Deċiżjoni, kif ukoll l-analiżijiet orizzontali u tematiċi li jsegwu t-trasformazzjoni diġitali tal-ekonomiji tal-Unjoni u klassifikazzjoni tal-progress tal-Istati Membri fihom. B’mod partikolari, id-dimensjonijiet u l-indikaturi tad-DESI jenħtieġ li jkunu allinjati mal-miri diġitali stabbiliti f’din id-Deċiżjoni. Għal kull mira diġitali, l-indikaturi ewlenin tal-prestazzjoni (“KPIs”) jenħtieġ li jiġu stabbiliti fl-atti ta’ implimentazzjoni li għandhom jiġu adottati mill-Kummissjoni. Jenħtieġ li l-KPIs jiġu aġġornati kull meta jkun meħtieġ għal monitoraġġ effettiv kontinwu u biex jitqiesu l-iżviluppi teknoloġiċi. Il-mekkaniżmu għall-ġbir tad-data fi ħdan l-Istati Membri jenħtieġ li jissaħħaħ, fejn xieraq, biex jippreżenta s-sitwazzjoni komprensiva dwar il-progress lejn il-miri diġitali, kif ukoll informazzjoni dwar il-politiki, il-programmi u l-inizjattivi rilevanti fil-livell nazzjonali, u, fejn ikun possibbli, jenħtieġ li jinkludi data diżaggregata skont il-ġeneri u r-reġjuni, f’konformità mal-liġi tal-Unjoni u dik nazzjonali.

Abbażi tar-rieżamijiet tal-Kummisjoni u meta xieraq, jenħtieġ li l-Kummissjoni tħejji, wara konsultazzjoni mal-Istati Membri, skeda ta’ żmien proposta għall-ħtiġijiet futuri tal-ġbir tad-data. Meta tistabbilixxi d-DESI, jenħtieġ li l-Kummissjoni tibbaża l-aktar fuq l-istatistika uffiċjali miġbura fid-diversi stħarriġiet tal-Unjoni dwar is-soċjetà tal-informazzjoni taħt ir-Regolamenti (UE) 2019/1700 (13) u (UE) 2019/2152 (14) tal-Parlament Ewropew u tal-Kunsill. Jenħtieġ li l-Kummissjoni tuża studji speċifiċi biex tiġbor data għal dawk l-indikaturi rilevanti li ma jitkejlux fl-istħarriġiet tal-Unjoni jew li jinġabru permezz ta’ eżerċizzji oħra ta’ rappurtar, bħal fil-qafas tal-istrateġija mħabbra mill-komunikazzjoni tal-Kummissjoni tal-25 ta’ Ġunju 2008 intitolata ““Aħseb Żgħir l-Ewwel”: “Att tan-Negozji ż-Żgħar”” għall-Ewropa, inkluż ir-rieżami annwali tal-prestazzjoni tal-SMEs. Id-definizzjonijiet relatati mal-miri diġitali taħt din id-Deċiżjoni ma jikkostitwixxux preċedenti għall-KPIs u bl-ebda mod ma jfixklu l-kejl li jmiss tal-progress fuq dawk il-miri permezz tal-KPIs.

(25)

Biex il-koleġiżlaturi jinżammu infurmati dwar il-progress tat-trasformazzjoni diġitali fl-Unjoni, jenħtieġ li l-Kummissjoni tippreżenta Rapport annwali dwar id-Deċennju Diġitali lill-Parlament Ewropew u lill-Kunsill, li jkun fih ħarsa ġenerali u analiżi tat-trasformazzjoni diġitali tal-Unjoni u evalwazzjoni tal-progress li jkun sar fir-rigward tal-objettivi ġenerali ta’ din id-Deċiżjoni u l-miri diġitali għall-perjodu sal-2030. Ir-Rapport dwar id-Deċennju Diġitali b’mod partikolari d-DESI, jenħtieġ li jikkontribwixxu għas-Semestru Ewropew, inkluż aspetti relatati mal-Faċilità għall-Irkupru u r-Reżiljenza, filwaqt li l-politiki, il-miżuri u l-azzjonijiet rakkomandati inklużi fir-Rapport dwar id-Deċennju Diġitali jenħtieġ li jkunu komplementari mar-rakkomandazzjonijiet speċifiċi għall-pajjiż.

(26)

Mill-2019, id-DESI inkluda t-Tabella ta’ Valutazzjoni dwar in-Nisa fid-Dinja Diġitali, li tivvaluta l-prestazzjoni tal-Istati Membri fl-oqsma tal-użu tal-Internet, il-ħiliet tal-utenti tal-Internet kif ukoll il-ħiliet speċjalizzati u l-impjiegi, abbażi ta’ 12-il indikatur. L-inklużjoni tat-Tabella ta’ Valutazzjoni dwar in-Nisa fid-Dinja Diġitali fir-Rapport dwar id-Deċennju Diġitali jenħtieġ li tippermetti l-monitoraġġ tad-distakk diġitali bejn il-ġeneri.

(27)

B’mod partikolari, jenħtieġ li l-Kummissjoni tindirizza fir-Rapport tagħha dwar id-Deċennju Diġitali kemm l-objettivi ġenerali ta’ din id-Deċiżjoni ġew implimentati b’mod effettiv f’politiki, miżuri jew azzjonijiet, kif ukoll dwar il-progress lejn il-kisba tal-miri diġitali, filwaqt li tagħti dettalji dwar il-livell ta’ progress tal-Unjoni b’rabta mat-trajettorji proġettati għal kull mira, il-valutazzjoni tal-isforzi meħtieġa biex tinkiseb kull mira, inkluż kwalunkwe lakuna fl-investiment fil-kapaċitajiet diġitali u fl-innovazzjoni, kif ukoll fis-sensibilizzazzjoni dwar l-azzjonijiet meħtieġa biex tiżdied is-sovranità diġitali b’mod miftuħ. Jenħtieġ li r-rapport jinkludi wkoll valutazzjoni tal-implimentazzjoni tal-proposti regolatorji rilevanti u valutazzjoni tal-azzjonijiet imwettqa fil-livell tal-Unjoni u tal-Istati Membri.

(28)

Abbażi tal-valutazzjoni tal-Kummissjoni, ir-rapport jenħtieġ li jinkludi politiki, miżuri u azzjonijiet rakkomandati speċifiċi. Meta tirrakkomanda politiki, miżuri jew azzjonijiet fir-rapport, jenħtieġ li l-Kummissjoni tqis l-aktar data reċenti disponibbli, l-impenji konġunti meħuda, il-politiki u l-miżuri definiti mill-Istati Membri, kif ukoll il-progress rigward l-azzjonijiet rakkomandati identifikati f’rapporti preċedenti u indirizzati permezz tal-mekkaniżmu ta’ kooperazzjoni. Barra minn hekk, jenħtieġ li l-Kummissjoni tqis id-differenzi fil-potenzjal tal-Istati Membri individwali li jikkontribwixxu għall-miri diġitali, kif ukoll il-politiki, il-miżuri u l-azzjonijiet diġà fis-seħħ u meqjusa bħala xierqa biex jintlaħqu dawk il-miri, anki jekk l-effetti tagħhom ikunu għadhom ma mmaterjalizzawx.

(29)

Bil-ħsieb li jiġi żgurat li jintlaħqu l-objettivi ġenerali u l-miri diġitali stabbiliti f’din id-Deċiżjoni, u li l-Istati Membri kollha jikkontribwixxu b’mod effettiv għal dak l-għan, it-tfassil u l-implimentazzjoni tal-mekkaniżmu ta’ monitoraġġ u kooperazzjoni jenħtieġ li jiżguraw l-iskambji ta’ informazzjoni u tal-aħjar prattiki permezz ta’ djalogu kostruttiv u inklużiv bejn l-Istati Membri u l-Kummissjoni. Il-Kummissjoni jenħtieġ li tiżgura li l-Parlament Ewropew jiġi nfurmat fil-ħin dwar l-eżitu tad-djalogu.

(30)

Jenħtieġ li l-Kummissjoni, flimkien mal-Istati Membri, tistabbilixxi trajettorji proġettati għall-Unjoni biex tikseb il-miri diġitali stabbiliti f’din id-Deċiżjoni. Dawk it-trajettorji proġettati jenħtieġ, fejn possibbli, li jiġu kkonvertiti fi trajettorji proġettati nazzjonali mill-Istati Membri u, jenħtieġ, fejn xieraq, li jieħdu kont debitu tad-dimensjoni reġjonali. Il-potenzjal differenti, u l-punti ta’ tluq differenti, tal-Istati Membri individwali li jikkontribwixxu għall-miri diġitali jenħtieġ li jitqiesu u jiġu riflessi fit-trajettorji proġettati nazzjonali. Jenħtieġ li t-trajettorji proġettati nazzjonali jgħinu fil-valutazzjoni tal-progress maż-żmien fil-livell tal-Unjoni u f’dak nazzjonali.

(31)

Biex jiġi żgurat li l-kooperazzjoni bejn il-Kummissjoni u l-Istati Membri tkun effiċjenti u effettiva, jenħtieġ li l-Istati Membri jippreżentaw lill-Kummissjoni pjanijiet direzzjonali strateġiċi nazzjonali tad-deċennju diġitali li jkopru l-perjodu sal-2030 (il-“pjanijiet direzzjonali nazzjonali”) li jipproponu, meta possibbli, trajettorji proġettati nazzjonali li jistgħu jitkejlu fil-livell nazzjonali, li jiddeskrivu l-istrumenti kollha ippjanati, adottati, jew implimentati bil-ħsieb li jikkontribwixxu għall-ilħuq fil-livell tal-Unjoni tal-objettivi ġenerali u tal-miri diġitali stabbiliti f’din id-Deċiżjoni. L-Istati Membri jenħtieġ li jkunu jistgħu jinkludu fil-pjanijiet direzzjonali nazzjonali tagħhom informazzjoni dwar politiki, miżuri u azzjonijiet li għandhom jittieħdu fil-livell reġjonali. Il-pjanijiet direzzjonali nazzjonali jenħtieġ li jiġu abbozzati wara li jiġu kkonsultati l-partijiet ikkonċernati ewlenin, bħall-organizzazzjonijiet kummerċjali, inkluż ir-rappreżentanti tal-SMEs, is-sħab soċjali u s-soċjetà ċivili, inkluż il-persuni akbar fl-età u ż-żgħażagħ, kif ukoll ir-rappreżentanti lokali u reġjonali, u jenħtieġ li jkunu għodda kruċjali għall-koordinazzjoni tal-politiki tal-Istati Membri u sabiex tiġi żgurata l-prevedibbiltà għas-suq. Jenħtieġ li l-Istati Membri jqisu l-inizjattivi settorjali rilevanti, fil-livell tal-Unjoni u f’dak nazzjonali, u jrawmu l-konsistenza magħhom. L-impenn ta’ Stat Membru li jipprovdi pjan direzzjonali nazzjonali biex jikkontribwixxi għall-miri diġitali fil-livell tal-Unjoni ma jimpedixxix lill-istess Stat Membru milli jfassal u jimplimenta strateġiji fil-livell nazzjonali jew reġjonali, jew milli jispeċjalizza f’ċerti oqsma industrijali jew diġitali.

(32)

Matul iċ-ċikli ta’ kooperazzjoni bejn il-Kummissjoni u l-Istati Membri, l-Istati Membri jistgħu jipproponu aġġustamenti għall-pjanijiet direzzjonali nazzjonali tagħhom biex iqisu l-evoluzzjoni tat-trasformazzjoni diġitali fil-livell tal-Unjoni u f’dak nazzjonali, u biex jirrispondu b’mod partikolari, għall-politiki, il-miżuri u l-azzjonijiet rakkomandati mill-Kummissjoni. Sabiex jitrawwem approċċ konsistenti u komparabbli fl-Istati Membri kollha u sabiex tiġi ffaċilitata t-tħejjija tal-pjanijiet direzzjonali nazzjonali tagħhom, jenħtieġ li l-Kummissjoni tipprovdi gwida li tistabbilixxi f’aktar dettall l-elementi ewlenin tal-istruttura ta’ pjan direzzjonali nazzjonali u, b’mod partikolari, l-elementi komuni li l-pjanijiet direzzjonali kollha jenħtieġ li jinkludu. Il-gwida jenħtieġ li tipprevedi wkoll approċċ ġenerali li għandu jiġi segwit mill-Istati Membri meta jiżviluppaw it-trajettorji proġettati nazzjonali tagħhom.

(33)

Il-mekkaniżmu ta’ kooperazzjoni u ta’ monitoraġġbejn il-Kummissjoni u l-Istati Membri jenħtieġ li jibda b’valutazzjoni tal-pjanijiet direzzjonali nazzjonali tagħhom u jenħtieġ li jkun ibbażat fuq id-data pprovduta u l-valutazzjoni magħmula fir-Rapport dwar id-Deċennju Diġitali, kif ukoll fuq ir-rispons li taw il-partijiet ikkonċernati rilevanti, bħall-organizzazzjonijiet kummerċjali, inkluż ir-rappreżentanti tal-SMEs, is-sħab soċjali u s-soċjetà ċivili, kif ukoll ir-rappreżentanti reġjonali u lokali.

(34)

L-għażla taż-żmien tal-kooperazzjoni jenħtieġ li tqis il-ħtieġa li jiġu riflessi r-riżultati taċ-ċikli tal-kooperazzjoni preċedenti, kif ukoll il-politiki, il-miżuri, l-azzjonijiet u l-aġġustamenti possibbli għall-pjanijiet direzzjonali nazzjonali kull sentejn.

(35)

Biex isir progress lejn il-miri diġitali f’allinjament mat-trajettorji proġettati, l-Istati Membri, li huma kkunsidrati fir-rapport bħala li għamlu progress insuffiċjenti f’qasam partikolari, jenħtieġ li jipproponu aġġustament għall-politiki, miżuri u azzjonijiet li għandhom il-ħsieb li jieħdu biex irawmu l-progress f’dak il-qasam kritiku. Barra minn hekk, jenħtieġ li l-Kummissjoni u l-Istati Membri jeżaminaw kif il-politiki, il-miżuri u l-azzjonijiet rakkomandati msemmija fir-rapport tas-sena preċedenti ġew indirizzati mill-Istati Membri b’mod kollettiv u individwali. Stat Membru jenħtieġ li jkun jista’ jitlob li jiġi mniedi proċess ta’ rieżami bejn il-pari biex Stati Membri oħrajn jingħataw opportunità li jikkummentaw dwar il-proposti li jkollu l-ħsieb li jippreżenta fil-pjan direzzjonali nazzjonali tiegħu, b’mod partikolari fir-rigward tal-adegwatezza tagħhom biex jilħqu mira speċifika. Jenħtieġ li l-Kummissjoni tiffaċilita l-iskambju ta’ esperjenza u l-aħjar prattiki permezz tal-proċess ta’ rieżami bejn il-pari.

(36)

Il-Kummissjoni u Stat Membru wieħed jew aktar, jew mill-inqas żewġ Stati Membri, jenħtieġ li jkunu jistgħu jidħlu għal impenji konġunti fir-rigward ta’ azzjonijiet ikkoordinati li jixtiequ jwettqu biex jilħqu l-miri diġitali, biex jistabbilixxu proġetti multinazzjonali, u biex jaqblu fuq kwalunkwe politika, miżura u azzjoni oħra fil-livell tal-Unjoni u f’dak nazzjonali bl-għan li jsir progress lejn dawk il-miri f’allinjament mat-trajettorji proġettati. Impenn konġunt huwa inizjattiva ta’ kooperazzjoni, b’mod partikolari bil-għan li tikkontribwixxi għall-kisba tal-objettivi ġenerali u l-miri diġitali stabbiliti f’din id-Deċiżjoni. Il-proġetti multinazzjonali u l-konsorzji għal infrastruttura diġitali Ewropea (EDICs) jenħtieġ li jinkludu mill-inqas tliet Stati Membri.

(37)

Fil-monitoraġġ tal-kisba tal-objettivi ġenerali u l-miri diġitali stabbiliti f’din id-Deċiżjoni, il-Kummissjoni u l-Istati Membri għandhom obbligu li jikkooperaw b’mod sinċier f’konformità mal-Artikolu 4(3) tat-Trattat dwar l-Unjoni Ewropea. Huwa għalhekk meħtieġ li kwalunkwe sejħa għal kooperazzjoni magħmula mill-Kummissjoni tiġi segwita b’mod xieraq mill-Istati Membri, b’mod partikolari fejn ikun hemm devjazzjoni sinifikanti mit-trajettorja proġettata nazzjonali ta’ Stat Membru jew fejn tali devjazzjoni ma tkunx ġiet indirizzata għal perjodu sostanzjali.

(38)

L-implimentazzjoni effettiva tal-politiki, tal-miżuri u tal-azzjonijiet rakkomandati u tal-pjanijiet direzzjonali nazzjonali u l-aġġustamenti għalihom, hija kruċjali għall-kisba tal-objettivi ġenerali u tal-miri diġitali stabbiliti f’din id-Deċiżjoni. Djalogu strutturat mal-Istati Membri individwali huwa essenzjali biex jiggwida u jappoġġhom fl-identifikazzjoni u l-implimentazzjoni tal-miżuri xierqa biex isir progress lejn it-trajettorji proġettati nazzjonali tagħhom, b’mod partikolari fejn l-Istati Membri jqisu li huwa meħtieġ li jaġġustaw il-pjanijiet direzzjonali nazzjonali tagħhom abbażi tal-politiki, il-miżuri jew l-azzjonijiet rakkomandati tal-Kummissjoni. Il-Kummissjoni jenħtieġ li żżomm lill-Parlament Ewropew u lill-Kunsill infurmati kif xieraq, b’mod partikolari rigward il-proċess u l-eżitu tad-djalogu strutturat.

(39)

Biex tiżgura t-trasparenza u l-parteċipazzjoni pubblika, jenħtieġ li l-Kummissjoni tinvolvi ruħha mal-partijiet ikkonċernati interessati kollha. Għal dak l-għan, il-Kummissjoni jenħtieġ li tikkoopera mill-qrib mal-partijiet ikkonċernati, inkluż is-soċjetà ċivili u atturi privati u pubbliċi, bħal korpi regolati mil-liġijiet pubbliċi tas-setturi tal-edukazzjoni u t-taħriġ jew tas-saħħa, u jenħtieġ li tikkonsulta magħhom dwar miżuri biex titħaffef it-trasformazzjoni diġitali fil-livell tal-Unjoni. Meta jiġu kkonsultati l-partijiet ikkonċernati, il-Kummissjoni jenħtieġ li ttkun kemm jista’ jkun inklużiva u tinvolvi korpi li huma strumentali għall-promozzjoni tal-parteċipazzjoni tal-bniet u tan-nisa fl-edukazzjoni diġitali u fil-karrieri professjonali diġitali, bl-għan li jiġi promoss sa fejn hu possibbli approċċ ibbilanċjat bejn il-ġeneri meta jkunu qed jiġu implimentati l-pjanijiet direzzjonali nazzjonali mill-Istati Membri. L-involviment tal-partijiet ikkonċernati huwa importanti wkoll fil-livell tal-Istati Membri, b’mod partikolari meta jadottaw il-pjanijiet direzzjonali nazzjonali tagħhom u l-aġġustamenti possibbli għalihom. Kemm fil-livell tal-Unjoni kif ukoll f’dak nazzjonali, il-Kummissjoni u l-Istati Membri jenħtieġ li jinvolvu lill-organizzazzjonijiet kummerċjali, inkluż ir-rappreżentanti tal-SMEs, is-sħab soċjali u s-soċjetà ċivili, b’mod li jkun f’waqtu u proporzjonat mar-riżorsi disponibbli.

(40)

Proġetti multinazzjonali jenħtieġ li jippermettu intervent fuq skala kbira f’oqsma ewlenin meħtieġa għall-ilħuq tal-miri diġitali, stabbiliti f’din id-Deċiżjoni, b’mod partikolari billi jinġabru flimkien ir-riżorsi mill-Unjoni, mill-Istati Membri u, meta xieraq, minn sorsi privati. Meta jkun meħtieġ biex jintlaħqu l-miri diġitali, jenħtieġ li l-Istati Membri jkunu jistgħu jinvolvu lill-pajjiżi terzi assoċjati ma’ programm tal-Unjoni ġestit direttament li jappoġġa t-trasformazzjoni diġitali tal-Unjoni. Jenħtieġ li proġetti multinazzjonali jiġu implimentati b’mod ikkoordinat, f’kooperazzjoni mill-qrib bejn il-Kummissjoni u l-Istati Membri. Il-Kummissjoni jenħtieġ li taqdi rwol ċentrali fl-aċċellerazzjoni tal-implimentazzjoni ta’ proġetti multinazzjonali permezz tal-identifikazzjoni ta’ proġetti multinazzjonali lesti għall-implimentazzjoni fost il-kategoriji ta’ proġetti inklużi b’mod indikattiv f’Anness għal din id-Deċiżjoni, meta tiġi biex tagħti pariri lill-Istati Membri dwar l-għażla tal-mekkaniżmu ta’ implimentazzjoni eżistenti l-aktar adattat, dwar l-għażla tas-sorsi ta’ finanzjament u l-kombinazzjoni tagħhom u dwar kwistjonijiet strateġiċi oħra relatati mal-implimentazzjoni ta’ dawk il-proġetti. Fejn xieraq, jenħtieġ li l-Kummissjoni tipprovdi gwida dwar l-istabbiliment ta’ EDIC bħala mekkaniżmu ta’ implimentazzjoni. L-Istati Membri li jixtiequ jagħmlu dan jistgħu wkoll jikkooperaw jew jieħdu azzjoni kkoordinata f’oqsma oħra għajr dawk previsti f’din id-Deċiżjoni.

(41)

L-appoġġ pubbliku għall-proġetti multinazzjonali jenħtieġ li, b’mod partikolari, jintuża biex jiġu indirizzati l-fallimenti tas-suq jew sitwazzjonijiet ta’ investiment subottimali, b’mod proporzjonat, mingħajr ma ssir distorsjoni tal-kondizzjonijiet ekwivalenti jew mingħajr ma jiġi duplikat jew eskluż il-finanzjament privat. Proġetti multinazzjonali jenħtieġ li jkollhom valur miżjud Ewropew ċar u jenħtieġ li jiġu implimentati skont il-liġi applikabbli tal-Unjoni u skont il-liġi nazzjonali li hija konsistenti mal-liġi tal-Unjoni.

(42)

Il-Proġetti multinazzjonali jenħtieġ li jkunu jistgħu jattiraw u jikkombinaw, b’mod effiċjenti, diversi sorsi ta’ finanzjament tal-Unjoni u tal-Istati Membri u, fejn applikabbli, finanzjament minn pajjiżi terzi assoċjati ma’ programm tal-Unjoni ġestit direttament li jappoġġa t-trasformazzjoni diġitali tal-Unjoni, filwaqt li jsibu, fejn possibbli, sinerġiji bejniethom. B’mod partikolari, il-kombinazzjoni tal-fondi mill-programmi tal-Unjoni ġestiti ċentralment ma’ riżorsi impenjati mill-Istati Membri jenħtieġ li tkun possibbli, inklużi, f’ċerti kundizzjonijiet, kontribuzzjonijiet mill-Faċilità għall-Irkupru u r-Reżiljenza, kif spjegat fil-Parti 3 tal-gwida tal-Kummissjoni lill-Istati Membri dwar il-Pjanijiet għall-Irkupru u r-Reżiljenza nazzjonali tagħhom, kif ukoll kontribuzzjonijiet mill-Fond Ewropew għall-Iżvilupp Reġjonali jew mill-Fond ta’ Koeżjoni. Kull meta jkun ġustifikat min-natura ta’ proġett multinazzjonali partikolari, jenħtieġ li jkunu permessi wkoll kontribuzzjonijiet ta’ entitajiet oħra għajr l-Unjoni u l-Istati Membri, inkluż għal kontribuzzjonijiet privati.

(43)

Il-Kummissjoni, f’kooperazzjoni mal-Istati Membri u billi taġixxi bħala l-koordinatur ta’ proġetti multinazzjonali, jenħtieġ li tgħin lill-Istati Membri fl-identifikazzjoni tal-interessi tagħhom fi proġetti multinazzjonali, tagħti gwida mhux vinkolanti rigward l-għażla ta’ mekkaniżmi ta’ implimentazzjoni ottimali, u tipprovdi assistenza fl-implimentazzjoni, filwaqt li tikkontribwixxi għall-aktar parteċipazzjoni wiesgħa possibbli. Il-Kummissjoni jenħtieġ li tipprovdi tali appoġġ sakemm l-Istati Membri li jipparteċipaw fi proġett multinazzjonali ma joġġezzjonawx. Il-Kummissjoni jenħtieġ li taġixxi f’kooperazzjoni mal-Istati Membri parteċipanti.

(44)

Wara applikazzjoni mingħand l-Istati Membri kkonċernati„ u wara valutazzjoni ta’ dik l-applikazzjoni, il-Kummissjoni jenħtieġ tkun tista’ tistabbilixxi EDIC biex jimplimenta il-proġett multinazzjonali partikolari.

(45)

Jenħtieġ li l-Istat Membru ospitanti jiddetermina jekk EDIC jissodisfax ir-rekwiżit għar-rikonoxximent bħala korp internazzjonali kif imsemmi fl-Artikolu 143, il-punt (g), u fl-Artikolu 151(1), punt (b), tad-Direttiva tal-Kunsill 2006/112/KE (15) u bħala organizzazzjoni internazzjonali kif imsemmi fl-Artikolu 12(1), il-punt (b), tad-Direttiva tal-Kunsill 2008/118/KE (16).

(46)

Sabiex ikunu żgurati kundizzjonijiet uniformi għall-implimentazzjoni ta’ din id-Deċiżjoni, jenħtieġ li jingħataw setgħat ta’ implimentazzjoni lill-Kummissjoni fir-rigward tal-KPIs u għat-twaqqif tal-EDICs. Jenħtieġ li dawk is-setgħat jiġu eżerċitati f’konformità mar-Regolament (UE) Nru 182/2011 tal-Parlament Ewropew u tal-Kunsill (17).

(47)

Din id-Deċiżjoni ma tapplikax għal miżuri meħuda mill-Istati Membri dwar is-sigurtà nazzjonali, is-sigurtà pubblika jew id-difiża,