Fond ta’ Riċerka dwar il-Faħam u l-Azzar — programm u linji gwida

PUNTI EWLENIN

Id-Deċiżjoni 2008/376/KE, kif emendata minn Deċiżjoni (UE) 2021/1094, tirrevedi u terġa’ tiffoka l-prijoritajiet tar-riċerka taħt l-RFCS:

• rigward il-faħam, għandhom l-għan li:
  • jappoġġjaw it-transizzjoni ġusta tas-settur tal-faħam u r-reġjuni,
  • itejbu s-saħħa u s-sigurtà fil-minjieri tal-faħam fil-proċess ta’ għeluq u f’minjieri tal-faħam li qabel kienu sfruttati,
  • inaqqsu l-impatti ambjentali tas-siti tal-minjieri tal-faħam fi transizzjoni;
• rigward l-azzar, dawn jinkludu xogħol fuq:
  • proċessi ġodda, sostenibbli u b’livell baxx ta’emissjonijiet ta’ karbonju fil-produzzjoni u l-finitura tal-azzar,
  • gradi u applikazzjonijiet avvanzati tal-azzar,
  • konservazzjoni tar-riżorsi, protezzjoni tal-ambjent u l-ekonomija ċirkolari,
  • ġestjoni tal-forza tax-xogħol (żviluppar u disseminazzjoni tal-kompetenzi ġodda biex iżommu ma’ proċessi ta’ produzzjoni ta’ azzar ġdid li jkun kważi mingħajr emissjonijiet ta’ karbonju) u titjib tal-kundizzjonijiet tax-xogħol (inklużi s-saħħa, s-sigurtà u ergonomija fil- u madwar il-post tax-xogħol).

Riċerka fuq teknoloġiji rivoluzzjonarji għar-riduzzjoni tal-emissjonijiet tal-CO₂ fis-settur industrijali tal-azzar jistgħu jkunu implimentati permezz tal-programm konġunt Sħubiji Ewropej (jinvolvu l-ġbir flimkien ta’ riżorsi bejn is-sieħba pubbliċi jew privati jew it-tnejn). Dawn jistgħu jkunu stabbiliti konformi mar-regoli li hemm f’Regolament (UE) 2021/695 li waqqfet Orizzont Ewropa (ara sommarju).

Proċedura

• L-RFCS hi ġestita mill-Kummissjoni Ewropea.
• Il-Kumitat tal-Faħam u Azzar, magħmul minn rappreżentanti mill-Istati Membri tal-UE, jassisti l-Kummissjoni bil-ġestjoni kumplessiva tal-RFCS.
• Il-Gruppi konsultattivi għall-faħam u l-azzar jipprovdu pariri lill-Kummissjoni rigward l-iżvilupp tal-programm ta’ riċerka, inkluż it-tfassil tal-prijoritajiet annwali.
• Il-gruppi tekniċi għall-faħam u l-azzar jipprovdu appoġġ lill-Kummissjoni fl-evalwazzjoni u l-monitoraġġ ta’ proġetti.
• L-RFCS toħroġ sejħiet annwali għal proposti, jiġifieri €40 miljun biex tiffinanzja riċerka kollaborattiva u €71 miljun biex tiffinanzja riċerka għal teknoloġiji rivoluzzjonarji li jwasslu għal produzzjoni ta’ azzar mingħajr emissjonijiet ta’ karbonju u proġetti ta’ riċerka. Dawn il-proġetti jipproċessaw it-transizzjoni ġusta ta’ minjieri tal-faħam li qabel kienu joperaw, minjieri tal-faħam fil-proċess li jagħlqu u infrastruttura relatata, konformi mal-Mekkaniżmu għal-Transizzjoni Ġusta u f’konformità ma’ Artikolu 4(2) li jappoġġja t-transizzjoni ġusta tas-settur tal-faħam u r-reġjuni.
• Il-programm RFCS hu mmonitorjat mill-Kummissjoni u hu assessjat kull 7 snin.